DC khuollienin a thang ding
CCPUR: District Health Society (DHS), National Health Mission (NHM), CCPur chun October 1, 2016, 11AM hin YPA GHQ Hall, Hiangtam Lamka, CCPur­ah District ASHA Convention program hmang an tih. Hi huna hin Pu Lunminthang Haokip, IAS, DC & Chairman, DHS, CCPur khuollienin thang a ta, Dr Thangchinkhup Guite, CMO/Dist. Mission Director, DHS; Dr Somorjit, State Nodal Officer (ASHA), State Health Society le Dr Vumchinpau, DFWO/Dist. Nodal Officer (ASHA) hai chu functional president, guest of honour le chief host in thang an tih. Hi huna hin Best ASHA le Best ASHA Facilitator hai kuomah chawimawina Certificate le thilpek inhlan ning an ta, PHCs le block wise a inelna um bawk a tih.

EFCI Saikawt Presby. Nuhmei Conference
CCPUR: Evangelical Free Church of India (EFCI), Saikawt Presbytery Nuhmei Pawl 49th Annual Conference, 2016 chu October 1,­2, 2016 inkar sung khin “I ram hung tlung raw seh” ti thupui hmangin Sielmat EFCI Biekin­ah hmang ning a tih.


Conference hi Pastor Ralsunthang Hmar in hawng a tih. Conference sunga thuhriltu ding hai chu­ Oct. 1, 2016 zan dar 5:30 mipuiinkhawm huna Mrs Rebec Darneimawi, chairperson CNHP; Oct. 2, 2016, 10:30 Zing inkhawm hunah Dr Lalrimawi Pudaite, Colorado Springs, USA ning a ta, sun inkhawm hunah Mrs Lalhuolhim, Lamka le zan inkhawm huna thuhriltu ding chu  Mrs Lalsanhim, Khawmawi ning a tih.

Auto le Bolero an inbaw pal
CCPUR: Zani zantieng 2:30PM vel khan Partnership Mission Society (PMS) building tuol Bijang/ Hmarveng Oil pump bul lai passenger pahni phura Tuibong pana tlan Diesel Auto  MN02A­6341 le Lamka tieng pana hung tlan Bolero MN02A­6400 chu an inhrut/ inbaw a, hliem na taluo tuok an umnaw a, sienkhawm motor hai hi a hmatieng a se ve ve. Diesel Auto hi a hmatieng glass a kawi bakah a body a se nuol a. Bolero khawm hi a hmatieng (right side) a se nuol bakah a ke (tyre) a kawi bawk.

Bolero motor neitu hi Joy Hotel, New Bazar hai niin, Diesel Auto hi Bolero neitu han an siemthat pek dingin an inbiekrem.

Nov. 30 chenin document peklut thei
CCPUR: National Food Security Act (NFSA) le inzawma ration card nei hai document hran hran   peklut dinga ti la pelut lo han November 30, 2016 chenin District Supply Officer (DSO), CCPur Office­ah peklut thei a la nih. Documents peklut  ding hai chu ­Aadhar Card Xerox Copy; Income Certificate; Domicile Certiricate, Voter Identity Card, Mobile Number le Bank Account number hai an nih. Hieng document pelut lo hai chun NFSA hnuoia hamthatna an dawng thei tanaw ding a nih.

STC/BSF a SI heart attack in a thi
CCPUR:  STC/BSF, CCPur a Sub­Inspector Mr Ashwani Kumar, s/o KN Sharma of Indira Village, Kangla District, Himachal Pradesh chu zani hmasa zing dar 2:00AM vel khan heart attack leiin inrang takin hospital panpui a ni a, sienkhawm doctor han san thei ta lovin a thi in an puong. A ruong hi Police hai le thangruolin RIMS, Imphal­ah post­mortem thaw a ni a, post­mortem thaw zoin a ruong hi BSF hai kutah inhlan nawk a nih. Hi thil le inzawm hin Police chun UD No. 5/CCP­PS/2016 U/S 174 Cr.PC an registered.

Thangpuina Rs. 65,000/­  le thuomhnaw an pek
IMPHAL:  September 28, 2016 nia New Lambulane, Imphal Hmar venga kangmei nasa tak suoka harsatna tuortu sungkuo hai thangpuina dinga Joint Headquarter Imphal HYA in an thangpuina an dawl khawm Rs 65000/­ le thuomhnaw thahnem tawk tak zani hmasa khan inhlanna an nei. Kangmei suok khan Pu Lallienkhum Tlangte in, Pu Tlangte In hluoa um mek Pu Pienga Kholum le New Lambulane EFCI Biekin hai a kangsiet a nih.

Imphal HYA JHQ inrawinain vangduoina tuoktuhai hi sawmdawlna sin thaw nghal a ni a, ni 2 zet social work nei a ni hnungin kangmeiin In a suksiet hai hi inthielfai vawng a nih. Upa Laldawnlien Varte Prez HYA GHQ le Ms Thangthatling Prez HYA Imphal Jhq hai inrawinaa fun drive neizui nghal a ni bawk a, hriet thei china HYA fethlenga thangpuina lut  tapo chu­ Imphal HYA Rs. 65,000/­ le thuomhnaw tamtawk tak; HYA GHQ 1000/­, HYA Rengkai Branch Rs. 1000/­ a ni a,  HYA hmalaknain Open Table Donation hawng zing a ni bawk.  Hi thila kut rawl nuom hai ta dingin Ms Thangthatling Prez HYA Imphal­ +91 7085186480, Upa Laldawnlien Varte Prez HYA GHQ­ 09436270074 hai kuoma in report thei zing a nih.

Irabot lim siem le inthut ding
IMPHAL: Zanikhan Manipur state sunga hmun hran hran haiah Lamyanba Hijam Irabot piengchampha a vawi 120­na hmang a nih. Hijam Irabot Birthday celebration Committee huoihawtnain 120th Lamyanba Hijam Irabot birth anniversary hi MDU Hall, Imphal­ah hmang a ni a, CM O.Ibobi Singh khuollienin a thang. Irabot hi Social Activist chau ni lovin political activist khawm a ni a, society a inthlakthlengna hung um ditttu a ni bawk. Manipur mipuihai hriet le ngainat a nih. Imphal khawpuia hmun remchangna lai takah Irabot lim siem le inthut ning a tih tiin hi huna O. Ibobi Singh in thu a hril huna a hril.

Political pa4rty thar pahni indin
IMPHAL: Zanikhan Imphal khawpuiah Political party thar pahni, Manipur National Democratic Front (MNDF) ti le Meeyamgi Thougalloi Manipur (MTM) ti hai indin a nih. MNDF thuoitu dinga ruothai lai Congress MLA hlui Bijoy Koijam khawm a thang. Hi huna hin Manipur CM hlui Radhabinod Koijom khawmin thuhrilna a nei. MTM Convenor chu Chungkham Joyraj a nih.

AR Major pakhat a hliem
IMPHAL: Zani zingkar dar 4:30 vel khan Kamjong area, Ukhrul district ah helpawl han 31 Assam Rifles convoy an lo lambun a, major Mandeep Singh a hliem a, Helicopter hmangin Hospital panpui a nih tiin ei thu dawngna chun a hril.

K. Meghachandra thang an dodal
IMPHAL: Zanikhan Charangpat­ah Rural Youth Development Organisation 20th Foundation Day hmang a ni a, hi Day hmangnaa Wangkhem A/C MLA K. Meghachandra a thang ditnaw pawl han an dodal a, insukbuoina a suok leiin Police han hi buoina suok control­na dingin tear gas shell an kap leiin nuhmei pakhat thangsain mi 4 an hliem. K. Meghachandra hi Day hmangnaa a thang dodaltu hi K. Jadu tantuhai an nih. K. Jadu hi Manipur Assembly Election hung um dinga Wangkhem A/C a ngir ve tum a nih. Police han buoina an sukkieng zovin K. Meghachandra hin Rural Youth Development Organisation building thar a hawng.

Samari mitha Pu Laltanlien Khobung in mi ngaisaklo meikang Hospital­ah admit
MON: Nagaland­a Mon district a cheng, epilepsy natna a nei leia buoina lo tuok rawp hlak, Nk. Ptisha (16) chu September thla bul lai khan a natna suokin mei a baw a, a khata tho el thei ta lova a um leiin a kut le a phing hai meiin nasa takin a kanghliem a. An khawsak harsat leia hospital­a khawm inenkawl thei lova um, dam tieng pan thei lova um chu World Vision­a thawk Pu (Dr) Laltanlien Khawbung  chun zani hmasa lai khan hriein, meiin a kang hliemna leia a taksa thenkhat hmawn tan ta leia rim se em em ta chu Hospital­ah thuoiin tuhin Hospital­ah enkawl mek a nih.

Pitisha nu hi Naga­a Konyak hnama mi a ni a, a pa chu Nepali niin L/Sheanghah village, Mon district a cheng an ni a. An insung infuknaw leiin a nuin a tlansan hnungah a pa le chaua khawsa niin, Konyak Naga hnam a ninaw leiin tukhawmin an ngaisak tha nuomnaw leiin a hliemna hi a hung zuol pei a, hospital­a inenkawlna ding an neinaw leia an thei ang anga ina inenkawl an nih.

Hi nunghak chungthu a rawi han an hang hril chun Pu Dr Laltanlien khobung hin inhmaw takin Mon Civil Hospital­ah a admit a nih. Hospital tlungpui a ni hnung khawm hin a kut hai hmawn der dur a nita leiin a thu hle a, staff hai khawmin rinum ti takin hnar hip pumin an sawngbawl a, ama ngeiin Wheel Chair lain a nawr a, hienganga hmangai taka sawngbawl lei hin a hmutu hai chun an thlir zui vawng vawng el nia hril a nih. A bul chun doctor hai khawmin an uksak tha nuom mang naw a, sienkhawm Pu Tana nina le ama an hang hrietchieng pei bakah Hospital­a a um sunga bill chu anni sungkuo le World Vision in an pek ding thu hrilin security a pek leiin tha takin an hung enkawl ta chau nia hril a nih. Pharmacy hai khawm damdawi an mamaw ang ang lo pe pei dingin a hril tawl bawk. Chun Pu Tana nuhmei Pi Mary Lalromawi khawm nitin hospital a fein Pitisha lu chunga hin kut innghatin a tawngtaipek hlak a nih. Amiruokchu a kut hai a lo hmawn ta leiin Sept. 30, 2016 khan tanbawng dinga ti a a nih.

Dr Laltanlien Khobung hi JNU a Ph.D zo, kum 2001 June thlaa World Vision­a sin thaw tan niin Assam ram hmun hran hrana a um hnungin nikum khan Mon, Nagaland­a hin transfer in tuhin Programme Manager sinthawin a um mek a nih. Dr Laltanlien hai nupa inpekzona hi ngaisang a umin inza a um hle. Samari Mitha a tling takzet a nih. (SinlengNews)

Pakistan in SAARC Summit nei ding thul a ni thu official in a puong;
Home Minister rawiin internal security meeting nei a nih
ISLAMABAD/NEW DELHI:November 9 & 10, 2016 haia Islamabad khawpuia 19th South Asian Association for Regional Cooperation (SAARC) Summit nei dinga ti chu Pakistan chunga India a lungawinaw leia Summit thang a tumnaw thu a puong hnunga India lungawinawna thlawpa Bangladesh, Afghanistan le Bhutan han Summit Boycott­naa an thangnaw ding an puong ve hnungin zanikhan Sri Lanka chun hi Summit­a a thang theinaw ding thu a puong nawk leiin Pakistan chun SAARC Summit nei ding chu official­in thul a ni thu zanikhan a puong.

SAARC a hin rambung 8­ Afghanistan, Bangladesh, Bhutan, India, Maldives, Nepal, Pakistan le Sri Lanka hai an um a, India thangin member rambung 5 chu thang lo dingin an inhnukdawk a nih. SAARC charter dungzuiin member pakhat chau thanglo khawma thul thei a ni lai rambung 5 zet an inhnukdawk ta leia Summit hi thul a nih.

Pakistan Foreign Office chun 19th SAARC Summit thul a nina chu India lei a nih tiin an tum a, Summit nei hun ding a puong nawk vat a ni ding thu a hril. SAARC hi kum 1985 a kha indin a nih.

Tulai hnai ela Pakistan­a inthawka intan terrorist han Jammu & Kashmir­a Uri  Army base camp an hlukhum leia India sipai 18, a hnunga pakhat a thi belsa nawk leia India sipai 19 zetin an thi phana kha India chun a ngaimaw hle a, a lungawinaw leia  SAARC Summit­a hin a thang theinaw ding thu a puong a nih.

Hieng laizing hin zanikhan Union Home Minister Rajnath Singh inrawinain New Delhi hmunah internal security meeting nei a ni a, NSA, IB, RAW le Home Secretary hai an thang.  Pakistan in India sipai a man le hrantang chu sansuok ngei dinga hma nasa taka lak a ni thu a Rajnath Singh chun a hril. China le Russia hai chun India an thlawp thu an puong a. Pakistan chu terrorism sukrena dinga hma la nasa nawk zuol dingin an ngen. Afghanistan le South Korea hai chun Pakistan chu Terroist­hai inhumhimna petuin an intum a. US chun Pakistan chu a thaw diknaw lemin a hril. Rambung tum tum hai chun inbieknaa Pakistan le India buoina hi chingfel dingin an ngen a, China le Russia hai chun India le Pakistan inremna dinga hma an lak pei ding thu an hril. Pakistan in India sipai a hrentang hi Maharashtra mi Chandu Babulal Chohan (22) a nih.

Hienanga boruok um lai zing hin Pakistan news thenkhat chun India sipai 1 an man bakah mi 8 an that niin a hril a. Sienkhawm hi thil hi India chun India sipai 8 an that nia an hril chu thudiklo a ni thu hrilin nasa takin a hniel.

Pakistan PM Nawaz Sharif khawmin India le Pakistan inkar security chungthuah zanikhan special cabinet meeting a ko. A ram le a mipui hai venghimna dingin Pakistan chun a tul anga hma a lak dign thu a hril.

Hmatieng ieng thil am a hung tlung ding ti hriet ninaw sienkhawm Pakistan le India chu  indo nawk nawng an ti ti thei a ninaw a, a tu tieng tieng khawm khawmuol, tuipui le boruok tieng sipai hai chu an inralring tha hle a nih.

Hliemna tuok sipai pakhat a thi nawk
NEW DELHI: Ni 12 vel liemtaa Terrorist han Uri, Jammu & Kashmir a Army base camp an hlukhum huna hliemna tuok army personnel pakhat Naik Raj Kishore Singh chu zanikhan enkawla a umna Army Research and Referal Hospital, New Delhi hmuna a thi nawk. Hi lei hin Terrorist han Uri army base an bei leia sipai thina tuok chu 19 an tling tah.

Hieng laizing hin Jammu and Kashmir­a Pakistan le ramri Mendhar Tehsil distirct a chun ramri zula inbiruk helpawl hai dapsuok tumin security forces han dappui ngawr takin an sunzawm zing.

Heroin Rs. 1 crore manhu leh man
INDORE: Central Bureau of Narcotices official hai chun zani hmasa khan Madhya Pradesh­a Mandsaur district­a Mr Nandakishore Sutar chengna Ina inthawk Heroin grams 600, Rs. 1 crore manhu ding dapdawkin Mr Nandakishore Sutar (43) leh an man. Narcotic Drugs and Psychotropic Substances (NDPS) Act. hnuoia case siem khum a nih.

Pakistan in a hung kap nawk
JAMMU: Pakistan sipai hai chun ceasefire bawsie in zani hmasa zan khan Jammu and Kashmir­a Akhnoor district a army post a hung kap nawk. September thla sunga Pakistan in Ceasefire bawsie­a India ram tieng silaia a hung kap vawi 5­na a ni tah. Nikum khan Pakistan sipai han ceasefire bawsiea India border outpost vawi 405 lai zet silaia an hung kap leiin civil mi 16 in thina an tuok bakah midang 71 in hliemna an tuok niin army officer pakhat chun a hril.

VAWISUN THUPUI
Nisienlakhawm, Peterin, “Tangka le rangkachak iengkhawm ka nei nawh; nisienlakhawm, ka nei sun peng ka ti che; Nazareth Isu Krista hmingin kein lawn ta hraw,” a ta.   ­ Thilthawhai 3:6

Editorial: Thangruol hi

Tulai hin India le Pakistan inkarah boruok a tang hle a. Hi chunchang hin India rammipui le Pakistan ram mipui hai  chau ni lovin khawvel rambung tum tum sawrkarhai ngaiven khawm a hlaw hle. Ei hriet seng angin Kashmir chungthua India le Pakistan ram hai inkara  boruok hi a hung sosang a nih. Hi buoina le inzawma sawrkar  hmalakna hi India rama Political party tum tum hai khawma an thlawp a, India ram le a mipuihai venghimna ding chun thangruol an tum tha khawpel. Hi kawnga hin an mimal le an party politics sie thain  India ram venghimna  dinga India ram thuoituhai inthuruolna le thangruolna hi lawm a um a, inza a um hle bawk. Politics thila an ngaidan le dit dan inkalna, indemna le inhrilsietna hai sie tha a, India ram venghimna dinga an inthuruolna le thangruolna hi a ropui a, India mipuihai ta ding chun a thlamuong thlak a, innghatna tlak thuoitu puitling an nih. Ei state a politician­hai ta ding khawma entawntlak an nih.

Manipur State a chun Political party tum tum hai hi ei en vang vang a, an party sunga ngei khawm an thangruol thei tak tak nawh. An party sunga thuoituhai lai inkhik inkhalna a um deu zing a, an hrat ding angin an hrat thei tak tak  naw niin an lang.  Inerna le midang sirde a, mani chan sukhrat hlur hi ei politician tam lem hai um dan le thil thaw nuom dan a nih ti inla ei hril suol taluo ring a um nawh. An politics khel hi ram le hnam politics ni lovin mani phingpui politics niin an lang. Ei  ngaisang am, ei ngaisang naw am, ram rorelna le politics­a a ha cheltu an ni mieu leiin an huhau a na naw thei naw a, hi hi ei ram le hnam hin kawng hran hranah a tuor mek a nih.

Manipur ram mi indik takhai humhimna dingin Inner Line Permit System (ILPS) hmang nawk chu tha ei ti seng. Hi le inzawm hin ei state sawrkarin Draft Bill a siem a, ei policies, pawl tum tuma thuoituhai le a ram mipui hai hi bill  thua hin ei inthuruol thei naw tlat leiin tuchen hin  umzie nei lovin a la um a nih. Ei ram le hnam thatna ding nia ei ngai le hrieta hman ei inthuruol thei naw chun thil dang haia inthuruol le a kar a hla. State danga inthawk mi lo thlirtu haiin iengtin am an mi ngai ding  chu maw? Inbie khawmin inbietlang thei lo ei ni a, ei inbiektlang thei naw chun inthuruol le thangruol ngaina a um naw hrim a nih.

India ram thuoituhai chu India ram le a mipui hai venghimna ding kawngah chun an thangruolin an inthruol thap el. Nangni pawl, kei ni pawl an ti der nawh. Ram pumpui thatna ding a ni phawt chun siethat tul an theinghil a, bansan tul an bansan ngam nghal a nih. Ei ni rawi ruok chu Central tienga ei ram thuoituhai ang ei ni nawh. Ei lungril put dan hi a la puitling tawk naw leia inthuruolna hi ei tlasam niin an lang. Ei lungril sukthienghlim a, ei um dan hai hi ei inbichieng nuom a um. Ram le hnam hmangaina tak tak ei nei thei hun huna inthuruolna hi chu a hung um thei ding chau niin an lang.

Nangni tlangmi, keini phaimi tia ei inthlier hran sung hin chu thangruolin ngirsuok ngai nawng ei tih. ILPS le inzawma draft bill thua khawm hin lungril ruk taka ei in en hran sung hin chu inlungruolna um thei ngai naw nih. Ei ngaidan, ei dit dan le tha ti dan ve ve fe thleng dingin ei dit a, hiengang hlak hin kumkhuoin um thei ngai naw ni a, ei hmabak ding hi an thim hle a nih. Ei hnam bik ta ding le ei chan ve ve that ding chau ei thlir ngawr ngawr chun ieng thila khawm inlungruolna um thei ngai naw nih. Ei ram le hnam pumpui huop thatna dinga lungril lien le tha ei put a tul bek bek el a nih.

Mimalah, khawtlangah, ram le hnamah, a thangruol thei thei an ngirsuok hlak a, chu chu khawvel fe dan kalhmang a nih. Nisienlakhawm, chu thil chu hriezing pumin ei thangruol thei naw a ni hi! Manipur a hnam hran hran cheng hai hi a hawna khawsa dinga Pathien mi siem hai ei ni a, mani hnam khata khawsa thei ding ei um nawh. Hnam tum tum hai hi inmamawtuo seng ei nih. Chuleiin, hnam tum tum hai hi ei thangruol thiem a tul. Hnam hran hran hai hi ei thangruol thei naw chun ei dawk ding a ni el. Manipur a hnam tum tum hai hi ei ngirsuok theina ding chun ei thangruol thei a tul tlat a nih.


Post a Comment

Powered by Blogger.