KA HMING UMZIE

 ~ Jami Darngawn.

Nov 12, 2021

Inza um tak Prof. Dr. Lal Dena in nikhat laia a mi fielna "Pathien thu naw deu khawm hung ziek rawh" a ti khan kei chun "Pu, Pathien thu naw chu ka thiemnawh/theinawh" tia ka lo dawn kha a ni renga ! Sienkhawm vawizan tieng ka thlaisuong lai chun pu Den ṭawngkam kha ka lungrila a hung thar vawng vawnga inphalam lo takin "Ka hming umzie" ti thupui hmangin hung suklang ka tih.

Ka hming hi ka Pi (ka pa nu) chun umzie nei deua a mi siem pek pakhat chu a um ngeia, sienkhawm ka hung tleirawl ṭan khan tlangval ṭhenkhat chun fiemthu'n an mi hmang pek hlaka chuleichun ka ditnaw leiin ka Pi  kuoma chun hming dang ka dit thu ka hrila ka Pi phalna ngeiin parte hming "Joujam" ti chu ka put tah a nih. Eini Hmar ṭawnga chun "Zamzo" ei ti hlak. Chun Thadou-Kuki ṭawng a khawm "Zouzam" tiin mi dang chun an ziek hlaka kei khawmin ka nunghak lai chun "Zouzam" tiin ka ziek ve bawk hlak a nih.

Ka pasal leh kan intawng dan hang hril met lang.

kum 1996 1st November Chavang Kut Sawikawt khawpuia a um khan kei khawm nunghak kum 19 ka lo ni ve taha chuongchun ka u le ka ruol hai le chun Saikhawpui iengtika ka la hmu ngailo a chun Kut hmang dingin kan fe taha (kei ka unu le hin ruolpawla inpawl zing hlak  kan nih) ka u ruol hai pasal  pakhat chun ka u a hung bieka chu pa chun ruol pasal pakhat a nei ve bawka chuongchun kan in chibai tawl tah a nih. Ka u ruolpa, a ruolpa nawk chun an in a chun tuisik dawn dingin a mi ṭhuoi tawl taha chuongchun zantieng chen chun mak takin kan inpawl ta pei a nih. 

Chuongchun le.... a zing a khawm chun ka u ruol hai pasal  pahni chu kan um na hmuna an la hung leng tapeia kei chun ka u ruol hai en in ka la en zinga amiruokchu  khuonu'n ka ta dinga a lo ruot ka Lu ding le chun kan lo inpawl/intawng zing a lo ni ta lem a nih. Tlangval fel tak  le puitling êm êm Saikawt  tlangval chun thiem tak le zei takin a mi lo hel zing ta kha a lo na ka hrietnaw karin kha tlangval zûn a chun ka lo tlu der tah a nih. 

Ṭawng thu ah.

Hmangaina biethu kan inhlan khan a ma ṭawng ka hriet thiem sienawh, a man kei ṭawng a hrietnaw bawk leiin ṭawng dangin biethu kan inhlan el tah a nih. Chuonga ṭawng danga biethu kan inhlan el zing ding kha chu arem changnaw a ti lei ningei ding ana  Dictionary a mi hung siem pek tawp el tah a nih. Chuongchun Hmar Bible pakhat a mi present bawka ṭawnghai siemtu ei Pathien kuoma hni zing pumin Hmar ṭawng chu ka nunghak laia inthawk ta khan kan chuk tah a nih. 

Kum 1998 Feb 25 khan Pathien le mipui hma a chun damsunga inhmangai/innei zing dingin thutiem kan lo nei tah a nih. Pasal ka nei hnung khan ka pasal le a sunghai chun "Joujam" tia ka hming ka lo ziek hlak kha "Jami Darngawn" tiin an mi thlak pek tah a nih. 

JAMI/ZÂMI

"Jami" tia 'J' ka hmang hi mi tamtak chun an mi sawisel tawl taha chu ka pasal chun 'J' hmang lem dinga a mi ti lei a nih, ama hril dan chun "kei khawm John ka niha nang khawmin 'J' hmang lem rawh J - Jesus "  tiin ama ditdan ang takin 'J' chu ka lo hmang ta lem a nih. Chun eini Hmar pahnam laia "Joute" inti hai khawm in 'J' an hmang tho leiin inphalam lo takin J - Jami ka hmang tah a nih. 

A tawp taka dingin

Ka pasal a lungsen pha chun  "Joujam" tiin a mi ko hlaka a lungawi pha "Jam" tiin. Chun tlawma a mi duot deu chang "J" tiin a mi ko duot hlak. 😄😄

Ka lawm ie.

INTIEMNA SUKPUITLING

~ Jami Darngawn.

Vawitûk July 26, 2020 ka tho chara ka lungrila thu hung um hmasa tak chu Jeptha hai pafa chan kha a nih.

Roreltuhai 11:
29 Chuongchun LALPA Thlarau chu Jeptha chungah a hung tlung a....

30. Chun Jeptha chun LALPA kuomah ṭawng ân khâm a, “Ammon thlahai hi ka kuta i mi pêk tak meu chun, hienghi hung nîng a ta,

31. Ammon thlahai kuoma inthawka râlmuonga ka in ka kîr nawk pha chun, iengkhawm ka kawtkhâra mi hung tuok hmasatak phawt chu, LALPA ta ding nîng a ta, pumrawhmang thilinhlân dingin hmang ngei ngei ka tih,” a ta.

A chang ṭhenkhat ei hang bawkân a nih ;

34.  Chun Jeptha chu a umna khuo Mizpa chu a tlung ta a, chun ngai ta, a naunu chun khuongtehai leh lâmin ama a lo tuok a; a nau nei sun a nih. Ama naw chu naunuhmei le naupasal dang hrim hrim a nei nawh.

35. Chun hienghi a na, ama chu a hang hmu phing chun a puonhai a keithlêr a, “E khai, ka naunu! I mi sukhnuoi ta ngei de! A mi suklungzînghai laia mi i ni ta hi! LALPA tienga chun ka bau ka lo ka ta si a, chu chu inphat nawk thei kan ta nawh,” a ta.

36. Chun ama chun a kuomah, “Pa, LALPA tieng i bau lo ka ta che chu, i bauva thu suok ang ngeiin ka chungah i thaw el ding a nih; LALPA chun i hmêlma Ammon thlahai chunga ngei chun i phuba a lâk ta si a,” a ta.

37. Chun a pa kuoma chun, “Hiengang hin thawng ka tih, thla hni sûng chu keia khâtin um hran ka tih: tlângahai hang rawl ka ta, ka nunghâk thienghlimna hi hang sûn ka tih, kei le ka ruolhai le hin,” a ta.

Jepṭha hai pafa inbiekna hin ka lungril a tawk êm êma ka hang inchan sina a tu tu ta ding khawma thil inhawi leh awlsam chu a ninaw ngêia, sienkhawm Pathien hmaa a bau a lo ka ta leiin an pafa'n an hang sukpuitling el hi chu a ropui tinaw ruol annawh ie.

Lalpa kuoma chun "Pa!  Vawitûka ka thopui chanchin hi iengtin am kei a tieng ka lo laklut ve ding, iem i mi hril nuom?" Tia ka ṭawngṭai lai chun ka lungrila chieng êm êmin ka um dan a hung inlang tah a nih. A ni ngêi kei khawm naupangte kani lai a'nthawkin hrisello leh thi vang vanga lo um ka nih a, nikhuo ka hrietthei chin a'nthawk khan Lalpa Pathien kuoma ka taksa hriselnawna hai  mi sukdam dingin ka lo hni hlaka "Lalpa i mi sukdam chun i rawng bawl ka tih" ka lo ti bawk hlak a nih.

Vawitûk chu a tharin ka hang inen chienga Lalpa hmaa ka bau ka lo kak ve nahai chu a tharin a hung inlanga ka thawthei tawk hai chu ka thei ang anga Lalpa ropuina dinga thaw pei dingin Lalpa hmaa chun kan hlân thar nawk tah a nih.

Aw le, unau dit um tak nang khawm Pathien nau i ni char khan (i piengthar ni) Lalpa Pathien hmaa iengtin am i bau i lo ka a le ? Ama rawngbawl dingin i lo in tiem ve ka ringa i lo intiem angin i hringnun kha i hmang pei am aw ? Ei rawngbawl theidan ruok chu in ang naw ni ti ei hriet a nih. Ka ruolnu pakhat chun hieng hin a tih "Lalpa rawngbawl hi ka nuom thei vei leh kei chu insunga fak zawngtu ka ni leiin ka nuom angin Lalpa rawng ka bawl thei nawh" a tia, a ni ngêi a'ndik a nih. Sienkhawm Lalpa ngaia chun rawngbawltu ropui tak a lo ni thei a nih, eini mihriem haiin rawngbawl ropui tak taka ei ngai hai khawm hi Lalpa ta ding chun a ni naw el thei bawk a nih ti hriet a ṭha awm de !

Chuleichun, ei theina zâwn seng ah ei thawthei tawk sengah ṭhahnem ngai taka ei thaw chu a ṭul takzet a nih, chu ding chun Lalpa'n tiemtu leh ziektu hi a tharin A hratna'n mi'n thuom thar raw se. Amen !

REV. DR. ROBINSON ZOTE KAN LA PHAL NAW CHE

~ Jami Darngawn.

Vawitûk (June 5, 2020) ka chanchin hriet chun ami va ṭhawng ngei de aw !! Mihremna ram a chun kan la phal lul naw che Hotupa Rev. Dr. Robinson Zote. Sienkhawm Pathien remruot ani mieu si a maw !!!

Țum khat chu damnaw kan va kana, kan damnaw kan chun phone call a dawnga phone a'nthawk chun pasal pakhatin kan damnaw kan chu a hung țawngțai peka, chu pa țawngțaina chu a hring rieu niin ka hrieta kei ngei khawmin thlarau malsawmna ka lo dawngpha a nih. Țawngțaina a nei zo chun  WhatsApp group a'nthawk a sermon hring tak tak ka lo ngaithlak Rev. Dr. Robinson Zote a ni thu kan damnaw kan chun ami hrila, Lalpa a'nthawkin ka va ngaisang/ngaina ngei de. A tak ngeia a thu hril ngaithlak chu ka lo beisei leh ka tum pakhat chu a lo ni tah a nih.

Lalpa remruotna zarin unaupa Robinson le chun kan inbiekaw thei taa, ka lawm hle a nih, chuongchun Imphal hmuna kohran pakhat lai chun rawngbawlna a hung nei ding thu a mi hung hrila chuong chun Oct 29, 2017 khan kan nupa chun unaupa Robinson chu Pathien rawngbawltu a ni leiin ngainatna/ngaisangna inentirna dingin Hmar thangsuopuon chu kan van insiltir ve a ka lawm hle a nih.  Chanchin hai inhrepaw peiin țawngțaina kan insantuo zing kan ti lai hienga chanchin a hung nei thut hi mak ka tiin ka lan pam hle a nih.

Ka pasal le chun "kan Biekin ngei ah vawikhat bek chu Pathien thucha hung hril rawh aw?" Tia kan fielna chu ama khawmin phur tak leh inhawk takin a lo remtia sienkhawm hun remchang a um theinaw leiin beisei takin ka pasal leh hun remchang chu kan lo nghak zing a nih.

Unaupa Robinson hi ka kum nekin a kum chu a number tlawm lem sienkhawm thlarau rama a puitling em leiin "Hotupa" tiin ka ko hlak a nih.

Kan inbiek tawpna tak chu Oct 12, 2019 khan Lalpa zarin lekhabu ka lo tlangzar ve a, chu ka lekhabu chu a lo hmua a lo tiem zo chun ami hung call a, Pathien thu ramtin kan hrilzo chun ama khawmin lekhabu a buotsai mek chu a mi hrila Lalpa'n rem a ti chun a lekhabu a siemzo pha bukhat ami present ding thu ami hril nghe nghe a nih. Beisei taka ka lo thlir zing lai vawisun a chanchin maktak ka hriet hi ka lung a awi thei nawa ka unaunu chu ka call a "U, Rev. Dr. Robinson hi Pathienin a hringna a la suksei thei awm vei leh iem ata a lak el ning a ta?" Tiin ka hril a, ka U mi hung dawnna chu "Mițha le mifel hai hi Pathien khawmin a kuoma um dingin a dit ve an nawm" tiin a mi dawna hrilsap ding a vang ta ngei de !!!

Ani ngei maw, nang leh kei khawm Pathien ta ei na, ei Pa chun a nuom hun hunah a kuoma um dingin a mi lak/țhuoi ve ding a nih.

Krista Pasalțha Rev. Dr. Robinson Zote, kan lan ro hle a chu keini neka hmangaitu A rawng i bawl pek Lalpa Israelhai Pathien, ei Pathien angsunga natna le harsatna um ta nawna hmuna chun lo chawl hadam ta rawh le..

Damtakin Mangpha !!!

HRÂTTAK LE HUOITAKIN

~ Jami Darngawn

(Ahmasa'n hi ka testimony hi ziek dingin inlang hlak sienkhawm kan phalam leiin ziek lovin ka um hlaka May 4, 2020 zân khan ka naupa ka mengpuia zân sawt hnungin a hung inlang nawka chuongchun khawvar tawmin ka ziek dawk ta nghe nghe a nih. Hang delete nawk dingin ka khawvarpui/ka sawlpui em leiin ka la hung suklang el ding a nih. Lalpa ropuina ding chauvin leh !)

Joshua 1:9
Hrâttak le huoitakin um rawh; ți naw la, zâm bawk naw rawh, LALPA i Pathien chu i fena taphawtah, i kuomah a um pei ding an nawm,” tiin, a hril a.

Kum 2007 a inthawk khan Lalpa hratna zarin ka thei ang angin rawngbawlna ka lo nei hlaka ruithei sala intanghai kuomah kum 5 vel chu ka thei ang anga rawng ka bawl lai chun ni khat chu thuthar ka dawng tlat el tah a, ka thuthar dawng chu "Li inthuk tieng pan rawh" ti a nih. Ka thuthar dawng chu a umzie ka hrietnaw lei chun Pastor nuhmei pakhat kan dawna a ma chun a mi hrilfie peka ka lawm hle a nih.

Chuongchun kum 2012 a hung inher suoka kan kohran Kristien nuhmeipawl inthlang kum a lo niha chutak a chun a tawizawngin hril inla kei chu țhuoitu (Chairperson) dingin thlangtlingin ka uma mak ka tiin ka hamhai hle, ka huphur taluo leiin ka nina dinga ruota um chu laknaw ka tum lungril tah a nih. Sienkhawm in ka tlung hnung chun Lalpa kuomah ka țawngțai taha ka nina dinga ruota ka um chu lak naw ka tum thu ka hril lai chun Lalpa Thlarau chun A mi chenchila ka lungril a chun chieng em emin thu a mi hrila, chu thu chu hi hi a nih. "Hrâttak le huoitakin um rawh" tiin a mi hril a. Chun,  "Joshua bungkhat changkuona en rawh" ti a nih.

Amiruokchu ka la awi naw rawpa, ka pasal kuomah ka hrila ka huphur thu chu ka pasal khawmin țhuoitu ni chu ka zo naw ding ti a mi hrietchieng leiin ka lak naw ding chu a mi remtipui tah a nih. Sienkhawm chuonga thuthlukna kan nei zo chun țawngthei lovin ka uma Lalpa Thlarau chun a mi pawla thu a mi hril nawk tah a nih. Chuongchun kan kohrana nupui pakhat naupai a uma ama kuoma va fea a naupai lai khawm pasal a ni ding thu le a hming khawm Joshua a ni ding thu a mi van hriltir tah a nih. Chu umzie chu Lalpa'n Joshua kuoma a lo hril angkhan ka kuom a khawm a mi hrilve ti inentirna a nih. Chuongang tak chun nupui pakhat naupai kuom a chun ka va hril tah a nih.

Chuongchun naute nei a hung hun taha naute pa chun a mi hung call a "Pi Jam, naute kha Doctorin nuhmeite ding a nih a tih a" tiin a hung hrila kei chun "Aningei chutie la hung țawngțai ka tih aw" tiin Lalpa kuoma ka țawngțai lai chun naute pasalte hmel chiengtakin ka hmua chuongchun naute pa kha ka hang hril nawka hun sawtnawte hnung chun call a hung nawk a "Pi Jam, Joshua a pieng tah ie" a hung ti chu ka Halelui zak el a nih.

Lalpa ropui tak raw se.

Chuongchun Lalpa hratna zar chauvin Kristien nuhmeipawl chun țhang nasa takin kan hung lak taha Missionary chawmna dingin kan thei ang angin țhang kan laka thil kan zawr nasa bawk chu ning a tih kei țawngbau thiem lo le țawngmawltak khawm kan thil zawrpha țhuoitu ka ni leiin kei chu a țawng takin ka țhanga, chutaka inthawk chun țawngbauțha khawm ka hung inchuk dawk ve niin kan hriet a nih. Kan thil zawr ding pha hin harsatna keima mimal nuna ka tuok nasa em em hlaka, a changchun sawiselna khawm ka tuok chang a um ve  hlak a nih. Sienkhawm Lalpa ei Pathien rawngbawl ka nih ti ka chieng lei chun harsatnahai chu ka lo paltlang thei hram hlak a nih.

Aw le, unau dit um tak nang le kei khawm Lalpa rawng ei bawl dan hi inang kher nawng a tih, sienkhawm Joshua Pathien kha ei Pathien a ni a, chu Pathien chun nang leh kei Ami umpui zing a nih. Lalpa hminga ei thilthaw chite hai khawm Lalpa'n a mi hriet pek dawp dawpa hi hnuoia ei um lai khawm hin mal Ami sawm hlak a nih ti chu ka hung suklang nuom a nih. Chun, tulai ti inla hun iem ani chen chu fesuokin rawngbawl thei naw langkhawm ka umna hmuna ka thei ang anga ka testimony annawleh Pathien thu ka hriet ang anga ka hung suksuok hai hi a chang chun ka pei naw le inphalam ka kawp hlaka amiruokchu Lalpa thu keia hung tlung hai hi ka  chun Lalpa chun Ami lawmnaw ding anga kan hriet leiin ka hung ziek /suklang nawk el hlak a nih. Lalpa'n ei nia thaw dinga Amin hriettir hai chu lo harsa deu hlak sienkhawm Ama ringsana hrâttak le huoitaka ei thaw chun hnena le malsawmna chu ei ta a nih.

LALPA'N MALSAWM RAW SEN CHE.

EI PHULOVIN AMI CHAWIMAWI

~ Jami Darngawn.

Zâni zân tieng (May 2, 2020) ka pasalin a mi hung call a "ieng hme am l lo suong le?" A hung tia, kei chun "Thlai ka la suong le" tiin ka dawn a. Chuongchun ka pasalin kan naupa du em em hlak arsa chu a hung hawna a hung tlung charin saptheihna leh ka zeu sawk sawka kan fak tah a. Chuonga bu kan fak lai chun ka hme suong a'nthawk chun ka nina chieng takin kan hmu suok a nih.

Saptheihna hi akha  ana a khata fak chun naupang chun a du ngainawha puitling chun ei du hlak,  kei khawm thilkha hi ka du em ema amiruokchu tulai ka taksa a chau deu leiin thilkha fak hi kan sum deu a nih. Amiruokchu thilkha khawm nisien a suongpui izir khan naupang chun a lo fak theia kei ngei khawmin a khata suong nekin arsa leh hang suong kha chu ka fak rawn deu a hawi.

Aningei kei hi thilkha fakpei umlo ang ka nih ti ka chieng hle, mihai fak tlak dingin ka hringnun hi iengkhawm hmu ding a um ve naw a nih.  Sienkhawm Lal ISU thisen mantam taka silfai/intlan ka ni tak leiin Ama zar chun ka țhatnawna leh ka tlinnawna hai hriet fuk nitalovin ka lo mawi hlak chu a nih. Diktak chun kei hi mihriem laia chu mi țawmkailo pawla țhang hrim hrim chu ka nih ti kan hriet chieng hle hlak, tulai karkhat sung lem lem hi chu inngaisiet na'n ka hun ka hmang a ni tak awm ie.  Thiemna le varna  kawnga khawm ruolbanlo ka niha  thildang a khawm tlingnawna tamtak ka nei țeu a nih, sienkhawm ka phulovin Lalpa'n Ami dawmsang/chawimawi hi inpaklo thei kan nawh ie.

"Aw Lalpa kan Pathien ka phulovin I mi chawimawia ka lawm em em a nih" 

Sâm ziektu chun hienghin a lo inzawt a ;
 
Ram po po hai, LALPA chawimawiin hlimtakin khêk ro!
Sâm 100 :1

Aningei "Ram po po" ti a hin kei a tieng hienghin a hung um chutie. Hi khawvel ram po po hin ei Pathien ei lo chawimawi thei hrinaw khawm a ni thei ie, sienkhawm ei nia um ram hai hi taksa bawrsawmna, rimsiekna, pasietna, natna, vangduoina, țamna, malsawmna, hausakna, thiemna, varna hai po po khawm hi Lalpa ropuina dingin hang hmang  inla  ei Pa Vana mi chu a lawm awm de aw ! Ti chu a nih.
Kei khawm mi ka angzo nawna hai hin Lalpa ropui ziet ka hmu zuol hlaka Ama kan pak thei bawk hlak a nih, ka natna le ka pasietna hai hi inzapui lovin Lalpa ropuina dingin ka puong hlak a nih.

Unau dit um tak l chan a khan l lung awi chie naw khawm a ni thei ie,  sienkhawm huoi le van le a sunga thil um po po  Siemtu leh Neitu ei Pathien nau ditum tak ei ni hi a va ropui ngei de maw ! Ei țhatnawna le felnawna hai mi hmu pek lovin Lal lsu zar chauvin Ami hmu mawi ve em em a nih. Chu neka lawm um chu um tang a tiem maw ? Khawvel mithiem le mi inlar tak tak hai Lal lsu neinawtuhai chu Lalpa mita chun an lo mawinaw khawm a ni thei, nang leh kei ruokchu Lalpa ei Pathien mita ei mawi em em a nih. Chuleichun Lalpa ei Pathien chawimawi le inpak hi ei thaw ding hrim a nih.

LALPA ROPUI TAK RAW SE.

I DAM DE MAW?

~ Jami Darngawn.

Zani zantieng (April 28, 2020) ka thlaisuong hma'n Biekin a țawngțai dingin ka naupa leh kan fe a, Biekin kan lut hma deu chun kan in kawlhai eini mi nuhmei pakhat leh lampuia kan intuoka ama chun hieng hin a hrila  kan in kawlhai tho ringnawtu hausa deu pasal pakhat chun (Hmingthup) "Jami hi a damnaw am a nih ava vang ta de?" A ti che a, kei chun "A naupa a enkawlna a sawl ema khawlai khawm a suok ngainaw a nih ka lo tia" a tiha. Kei khawm chun innui pumin "Lockdown a ni hitie aw" ti pum chun Biekin kan lut tah a nih.

Biekin kan lut char chun ka lungrila chieng em emin hieng hin a hung inlanga "Ringnawtu hai hmanin ka dam leh damnaw an mi ngaiven/uksak a ni chun, ka Pa tak tak Vana mi chun iengtin am Ami ngaisak/ngaiven naw ding ?" tiin ka lungrila a hung uma ka dam huoi huoi niin kan hrieta ka va lawm ngei de ! Diktak chun ka taksa bawrsawm leiin kan ngaisiet chang a um hlaka, a chang chun Lalpa'n Ami theinghil tam a nih aw ka ti vawng vawng chang a um hlak, sienkhawm hnuoi leh van Siemtu leh Neitu ei Pa Vana mi chun nang leh kei Ami ngaisak/uksak hle a nih ti chu ka suklang nuom a nih.

Lalpa chun taksa damna nekin thlarau damna a ngai pawimaw leiin a chang chun ei țhatna  dingin ei taksa  ngei khawm a bawrsawm chang a um hlak. A nuom chun Ami sukdam thei êm êm laiin natna rinum ziet leh A ropuina  ei hriet nawkzuol theina dingin Ami'n tuortir hlak niin keima a chun ka chieng hle hlak a nih. Tirko Paula chun hienghin a lo inzawta ropui ka va ti ngei de! 

2Korinth 12:
8. Chu chungchâng thua chun a mîn kiensan theina dingin Lalpa chu vawithum ka hni a.

9. Chun ama chun ka kuoma, “Ka lunginsietna i ta dingin a hun tawk, Ka thilthawtheina hi hrâtnawnaah i sawn naw sukfamkima a um,” a ti ta a. Chuongchun Krista thilthawtheina chu ka chunga a um theina dingin, lawmtakin ka hrâtnawnahai hi suong lem tâng ka tih.

Tirko Paula țawngkam hi ka ta ding chun ka thlarau  damna/hratna a ni rawp hlak. Aningei kei khawm vawithum neka tam Lalpa ei Pathien kuom a chun ka taksa damna dingin ka hni hlak, sienkhawm Ami dawnna chu "I thlarau ka sukdam tah" ti a nih. Chuleichun ka taksa damna dingin ka hni ta ngai nawha ka thlarau hratna ding leh mihai ta dinga malsawmna kani theina dingin ka hni lem hlak a nih. Chuleichun ei taksa damna ding nekin ei thlarau damna/hratna ding hi zawng mawl mawl ding a lo nih.

Tiemtu dit um tak taksa leh thlaraua bawrsawmna i lo nei a ni chun Lal ISU hmingin lo dam vawng vawng ta rawh.
Ama chun A ngaisak/uksak che a nih.

Haleluiah. Lalpa ei Pathienin ropuina chang mawl raw se. Amen.

INPAK PEI KA CHE LALPA

~ Jami Darngawn

Vawizan tieng (April 24, 2020) ka pasal office țin chu ni dang angin gate va hawng pek theinaw lang khawm kan varanda a chun ka lo lawm a, sawtnawte deia ka lo um lei chun ka taksa bawrsawmna chu a hung insang ta hle ela chuongchun ka thuok inhawinaw lei chun doctor min chaw nebulizer chu ka thaw nawk tah a nih.

Mak tak chu ka thuok inhawinaw chang hin Pathien ropui zie leh a thilthawthei ziet hi kei ah anlang zuol hle hlak a, ka taksa'n inthuok theina a mamaw nekin ka thlarauin inthuok inhawina hi ka mamaw ziet ka hrietthar hlak a nih. Ka naupang lai a inthawk thuok tieng harsatna nei hlak ka ni leia  ruol banzo lo reng kha ka na, tuta ka thuok harsat khawm hi kan ngaisie chuong nawha Lalpa ropuina dinga  suklang ka nuom lem hlak a nih.

Ka naupa kum 10 mi kuom a chun "Tawi, ka damsawt khawm ka ring ta nawha mi duot hle rawh aw ?" ka ti peka  ka naupa chun "Nu nu, sawt deu l  dam ding annawm" a mi tia. Nie, ka naupang laia inthawka thi el dinga khawvel doctor hai mi ti kha ka na, Lalpa Pathien lunginsietna zar chauvin kum 42 chu hi khawvel eiin zinna ram a hin ka la cham thei chu ka nih.  Chuleichun ka chan chunga hin nuorna ding ka nei nawha Lalpa ropuina dinga suklang pei hi ka thaw ding makmaw niin kan hriet  lem nih.

Sâm ziettu chun hienghin a lo inzawt a ;

Iengkim inthuok thei taphawt chun LALPA chu inpâk raw hai se.
LALPA chu inpâk ro!
Sâm 150:6

Ani ngei inthuok harsat chang nei hlak langkhawm  "inthuok thei taphawt" ti lai hin ka țhang ve a, chuleichun mi hai angin hlasak kawnga Lalpa inpak/chawimawi theinaw lang khawm ka thei ang angin ka chunga Lalpa Pathien thilthawhai ka suklang hi Ama ka chawimawina le kan pakna chu a nih.

Ka naupa bawk chu kar hmasak lai khan zan karin a khakhnuoi lai inbawk a lo uma doctor panpui kan tum leh doctor hai chun lockdown leiin mi an ennaw thu kan hriet leiin pan theilovin kan uma Lalpa Pathien kuoma chun titak zetin sungkuo Maicham kan siemna a chun kan intlun tah a nih. Mak takin ka țawngțai lai chun suk danglamin ka uma ka naupa ka pai ding tawma Van tieng doctor haiin an mi hung en ka ti kha an hung inlang nawka ka naupa Anaya Lalropuia chu an hung en/tawk niin ka thlarau mita chun ka hmua ka lawm êm êma kan țawngțai zo chun ka pasal kuoma "Ei naupa hi Lalpa'n a rawngbawl dinga Ami pek kha ana Ama bawkin a natna hi a sukdam ding a nih" ka tia, chuongchun Lalpa zar chauvin a zinga chun anbawk chu a hung chin deua a zingnawka chun a bo der tah a nih.

Haleluiah Lalpa ei Pathien chu inpakin um pei raw se.

Iengkim inthuok thei taphawtin Lalpa chu inpak ei tiuva Ama chun boruok țha inthuok theina Ami pek hi lawm hle ding a nih.

Amiruokchu taksaa inthuok inhawi hle siin thlarau tieng inthuok harsa ti pal ei tih ti chu mgaituo tham ava ni nawk si de ?? Chuleichun ei thlarau damna/hratna  ding mawl hi a nih ei ngai pawimaw bek bek ding le ei Pathien khawma a ngai pawimaw chu a nih.

LALPA'N TAKSA LE THLARAUVA HRATNA PE PEI RAW SE CHE.

April 24, 2020.

PATHIEN CHÊNGNA EI NIH

~ Jami Darngawn

Tulai ei khawvel tawng mêk hi thil hmû ding le hriet ding a tam êm êm a, thil țha naw a um chun thil țha khawm a pieng sa a nih ti chu hretu hai ei nih.

Aw le, hi khawvela mi tam takin thina lê beidawngna ei tuok lai zing hin nang lê kei Lalpa ringtu tâ ding chun insiem țhatna ding a va tam ngêi dê, kei ngêi khawm nî danga ka lungril put nekin tuhin chu a danglam ta a nih. Kum 10 vêl liem taa khan ruithei salâ intâng hâi kuoma tirin ka um a, chu chu ka lungrila chieng taka mi hriltu Lalpa Thlarau Thienghlim a nih tî ka pawm tlat a nih. Chuongchun, ka thei ang angin thiem lê thiem lovin lungrila um hâi chu ka khêk suokpui hlaka, ruithei salâ intâng ni nâw deuva ei ngâi hâi kuoma chen tirin ka um hlak a nih.

"Ruithei" ti a hin zu le drugs chau nilo, hieng zarda, kuva, talab, khaini, dumziel etc hâi khawm hi ruithei chikhat a nih ti chu ei hriet seng ring a um. Kan  khawsakna Manipur phairuoma hin unau Meitei nupui haiin țhahnemngâi takin hieng thil ṭha naw hâi hi an dodâl a, chu el khela Sawrkarpa khawmin a dodâl bawk a nih. Chuong hai chu ei ni Kristien hâi khawmin ei dodâl ding chu ni âwm tak a nih.

Chuonga Kum 2007 a inthawka ka thei ang anga ruithei sala intanghai kuoma an intângna salâ inthawka suok dingin Lalpa hrâtna ringsana ka lo hril hlak laiin, hieng ruithei ve bawk Tobaco sala intanghai kuoma khawm ka thei ang angin ka hril vê bawk hlak. Vawikhat chu kohran țhuoitu pakhat kuoma zarda le raja a fak țhat nâw/mâwi nâw thû ka hril a, sien khawm ka ring nâw tieng dai hin ka thu hril chu a lo theida êm êm taa "l mi hril ka ngâi lê" a mi tia, chu taka inthawk chun ka pasal chun "Mi khâng khan ti ta ngâi nâw rawh" a mi ti hiel a nih. Kei khawm ka'n phalam hlê leiin Lalpa kuoma kei ni lo mi dang hmang lem ta dingin ka lo hni hlak a nih.  Vawikhat chu mikhuol dâr an ri a, kan hang inkhâwm chu mak takin  kan Biek ina chun  kohran upa  pakhatin hieng zardâ, khâini, dumziel etc fâk a  țhat nâw thû a hung hrila Lalpa'n hi thu hi khêkpui dinga a lo ti thu chu a hril lai zing chun  ka lo lawm êm êma inkhâwm țin khan chibai malamin ka um dân hâi kha ka hril a, kei nuhmeitê thu hril an ngainuom nâw khawma Berâmpu thu hril chu an lo ngâi tâwl ka ring tlat a nih. Upa pâ khan tlângram tieng khawm Lalpa'n a mi tira ka fê pei ding a nih a tia ka lawm hlê a nih.

Tulai ei khawvel buoi leiin fâk le dâwn thua harsatna a hung um zeu zeu ta a, chulaizing chun kuva zardâ fâk khat man le bufai 1kg man an ang thu ka hang hriet chun ka lungril a tâwk hle a, chuong baka kuva zardâ le shikhar, talab tî vêl dû leia buoi hmû ding an um nuol ta bawk. Zâni lai khawm khan unau Meitei nupui haiin kuva hna le zardâ motora an phur rûk an lo mana khap takte'n an khap a nih, Kristien nâw hâi kuhi felna kawnga chun ei tluk nâw chu a lo ni hi tie tia ngâituo ding a va tam ngêi dê  !!!

Ei Pathien thu chun ;

Bû ni si lova ieng dinga tangka in sêng am a na?
Khawp le tlaina ni si lova ieng dinga in tha in sêng am a na? Ka thu ngun takin ngâi unla, thil țha chu fa ro, in hringna chu hnienginhnâr takin hlim raw se.
Isai 55:2

A ni ngêi,  Lal țawngțaina ei neipha "Ni tin kan fâk khawp ding bû mi pe la" tiin ei Lalpa kuoma ei hni hlak a, Amâ chun ei taksa hratna ding bu le thlâihna le thil dang dang ei fak chu a phal lai zingin, thil dang dang tî hin ei taksa tâ dinga khawpna le tlaina nilo ei taksa sukse theitu ding ei fak chu a phal naw ding a nih. Ei sum sêngna hai hi thil țha inchâwkna a ni am ? tî hi ngaituo nawn tham a tling a nih.

Ni ê, "Ka pawisa chu ka thu thu annawm" ei ti thei, sienkhawm Lalpa Pathien nau indik tak ei ni chun taksa leh thlaraua ei thienghlim ding a nih. Ringnâwtu hâi hman thil țha lo a nih tia an fâk nuom nâw chun nang lê kei Pathien Thienghlim nâu hâi hin iengtin am fâ'ng ei tâ! Hî thil hi ka hril zâtin mi theidâtu an um ding a ni tî khawm ka hriet, sienkhawm Lalpa hmangainaa inthawkin kei  țawng mâwl takin ka hung khêkpui nâwk a nih.

Hieng thil țha nâw  chîng zawng sak ei lo um chun ei nî hrâtna ni lovin Lalpa hrâtna ringsanin hi thil tirdakum tak hâi hi bân san tum ei tiu, Lalpa le iengkim ei thâw thei a ni tî hre zingin țawngțaina le bei fan fan ei tiu leh. Ei nia Lalpa In um hi sukthienghlim ei ta, mi hâiin ei nia um Lalpa hmêl an hmû theina dingin.

1Korinth 3: 19-20
19 Pathien pêk chêu, nangnia um, Thlarau Thienghlim chêngna tempul chu in taksa hi a nih ti in hriet naw’m a ni? Nangni ta in ni ta nawh;
20 mana inchâwk in ni tah. Chuleiin, in taksain Pathien chawimawi ro.


LALPA'N MALSAWM RAW SE CHE.

A LA PANGAI ZING A NIH

~ Jami Darngawn

Aw leh, tulai ei khawvel tawngmek hi a makin a danglam êm êma, Pathien nei naw lem inla chu beidawngin ei thi el awm ie ka ti hiel a nih. Amiruokchu, Pathien hring neituhai ei ni leiin ția thlaphang el ding ei ni nawh ti chu kei ve bawkin ka hung khekpui a nih.

Sâm ziektu chun hienghin a lo inzawt a;

Pathien chu ei humhimna le ei hrâtna, lungzîng laia țhangpui vattu hnai zing a nih.
Chuleiin ți naw mei nih,
Leilung hi sawna umin, tlânghai hi tuifinriet sûng daiah insawn sienkhawm;
A tuihai chu inri humhumin, so burbur sienlakhawm, a fawn nasa leiin tlânghai hi inhnîng durdur sienkhawm ți chuong bawk naw mei nih.
Sâm 46: 1-3.

Ani ngei maw khawvel tukvera ei dak chun tuifawn hi a nasa ema, a sobur bur el a ni hi tie, tlanghai khawm tuifinrieta insawnlut ang elin ei buoizo tah a nih. Kei ve bawk khawm khawvel tuifawn a nasat em leiin ka thaw thei ve sun chu tiin Lalpa ei Pathien kuoma țawngțai el naw chu thaw thei  ka nei nawa, kar hmasak lai khan ka naupa leh kan damnaw ve vea, ka chau angreng bawk. Ka damdawi fak nasat lei am a nih, ka bau a hung na vawnga ka țawng thei nawh, ka naupa zan imu intuo thei naw leiin khawvarpui a ngai zie bawk. Ka bing khiengtieng hlak ana êm êm bawk, doctor pan ka huphur leiin ka pasal kuoma ka natna hai ka hril suok ngam nawh. Ka bau nat leia ka țawng thei naw lei chun kan ruolnu Doctor fel êm êm pakhat chu phone a inthawk chun kan rawna, damdawi a min chawhai chu ka faka, chun kohran mipuihai mi țawngțaipuina zarin leh a zie chu ka hung um pei tah a, ka lawm hle a nih.

Amiruokchu ka lungril um an hawi thei țhak nawa, ka taksa natna hai dam deu ta sienkhawm ka lungril chu ana vawng vawng nawka, chutaka chun Lalpa'n a min hriettir anga ngaiin ka lo thaw zawm ta naw kha tulai khawvel tuifawn nasat em leiin zingtieng bungheia țawngțai kha ka hung thaw nawk thei tah a. Chutaka chun mak takin suklang lamin ka uma, ka taksa dam chieng naw khawm chu a hung dam tah a nih.

Haleluiah Lalpa ropui tak raw se.

Hi thu ka hung suklang nasan tak chu ei Biekin hai kharin um sienkhawm ei Pathien leh ei inbiek/pawlna chu a la pangai zinga, ei Biekin kawthai khar nisienkhawm ei lungril kawtkhar hi Lalpa ei Pathien Thlarau Thienghlim hung lutna dingin hawng zing ei tiu. Tulai Lalpa rawngbawltuhai an fesuok thei naw leiin internet fethlengin Pathien thu țha tak tak an hung suklanga ei vangnei êm êm a nih, ei taksa damna nekin ei thlarau damna hi Lalpa'n a ngai pawimaw lem a nih. Chun, Doctor leh Nurse leh khawtlang țhuoituhai leh etc. an inpekzona hai hi inpak an um êm êma an ta dinga Lalpa kuoma țawngțai pek mawl mawl ei thaw ding makmaw a ni reng a nih.

A tawp taka dingin.

Lalpa Israel hai Pathien, ei Pathien thil thawtheina hi a la pangai zinga, a la danglam naw a nih. Tuhin ei leilunghai chu a hung danglam meka, sienkhawm lungngai ding ei ni nawh. Ei Pathien chu ei inhumhimna leh ei hratna, lungzing laia țhangpui vattu hnai zing a ni leiin ei umna hmung senga Lalpa chu ko/hnai mawl mawl ei tiu khai.

LALPA'N A HMANGAI CHE.

KUM THAR LALPA LEH

~Jami Darngawn

DIARY BU: Kum 2019 Diary Bu phêt suok zo talova mi tamtakin fam-muol an mi lo inlawisan hnungah, kum 2020 Diary Bu thar inhlana ei um nawk el ta hi a va ropui de aw!! Min hlântu ei Pathien hringzing chu inpakin um mawl raw se.

Awleh, hi Diary Bu thar hi, mi lien, mi chin, mi hausa le pasie khawm inang rawnga pek ei nih. Pathien mit a chun, angkhat vawng ei nih. Amiruokchu, ei fill up dan ruok chu inang ta naw hlêng a tih. Ei fill up dan dungzuiin Pathien chun a mi Judge ding a nih. A va pawimaw ta ngei de!! Ei Diary bu thar 2020 hi ieng chen am ei ziek hman ding, a tawp chen ei ziek suok zo ngut dim?
Tukhawm a hril thei ei um nawh! Chuleiin, kumthar a bul ei hmang ṭan mek hi fimkhur takin hmang ei tiu.

Deu.11:12 chun, "Lalpa in Pathien mit chu kum thara inthawka a tawp chenin a fu hlak" a ti a nih. Chuleiin unau, a mi entu le judge tu Isu leh nitin ei Diary hi fill up tlâng ei tiu. Chu ding chun, ei nia Pathien Thlarau Thienghlim’in neitu chan a chang a ni a ṭul a nih. Kum 2019 a ei mark hmu tam thei nawna Thlarau le inmil lo ei kawlhai chu, kum 2020 phek masa tak a inthawk hin inlang ta lo dingin chawkre tâng ei tiu, phum hmang ngam ei tiu. Nitina Ei Diary hih "Isu leh" ni dingin Resolution thlâk ei tiu. Chuongchun, ei fill up tawp chin chinah Award/chawimawina min hlan dingin a mi nghak/ami en zing a nih.

LALPA ZUI TLATTUHAI: 
Kronikul 16:9 a chun, “Ama zui tlattuhai chunga a hrâtzie insuklang dingin Lalpa mit chun hnuoi chung popova kil le kap a mel a” ti ei hmuh. Lalpa hin Ama zui tlattuhai hi a va en nghawk naw de! hriet a nuom a nih, inchik a nuom a nih, chawimawi a nuom a nih, a hratzie ama fethlenga suklang khawm a nuom a nih. Chudingchun Lalpa mit chun hnuoi chung po po kil le kap a mel a ni chuh! Ama zui tlattuhai chu mi hmu ṭhel naw tawp a tih. A thlâwnin zui naw mei nih, ni khat chu mi la chawimawi a ta, hnenapuon la sil ngei ei tih. Kum 2019 lo liem tah a khan, a hratna suklang ding khawpa Lalpa mit ei chunga a lo la fu zo naw a lo ni khawma, A hmangaina le zangaina zarah ei hringnahai, kum 2020 a hlangkaiin ei la um an nâwm! Lalpa ropui raw se! Lalpa mit le ei mit infu tawn dingin Lalpa zui tlat ei tiu.

INHMU HMELTHAT: 
Mîn Krista zâra an bawsietna ngaidama uma, an nitin suolnahai bânsana, an zu dawn hun lai, an lekha deng hun lai, an damdawi addict hun lai, an tienlai hun maksan tahai popo kha, theinghil pêk a nuom a nih. In-hrie pek zingin inhmu hmelsie pek zing ta naw mei niu. Kum hlui an herliem tah! Kum thara hlangkai ei ni tah, in hmu hmelṭha tang ei tiu. Chuongchun ei ni lai Pathien a ropui ding an nawm!

Hla khawma, “Kan siengna renga misuol ka ni a, Khawvel en in tlinna ka nei nawh, Thlirna tinrenga ka hang thlir khawma, Tlinna ka nei nawh I hma a hin. Ka tlinna Lalpa, ka mawina Isu, Nang chauh hi I nih ka tlinna le mawina, Tun am thiemlo min changtir an ta, Thiem min changtirtu Krista a ni si a” ei ti tah a ni kha ti maw!

“Pathien-in a naupa Isu Krista a mi peka, hnuoi le van karah remna thu a hung puonga, tlinglo hai khawma Krista zarah, “Ka tlingna Lalpa, ka mawina Isu” an hung ti thei ve tak hnunga khawma, Ieng leia mi ei hmu hmel ṭha thei naw am a na?  Mi tienlai silfen hlui kha iengleia lan bel tir hram hram am ei na? Piengthar in ti ta si in, Eden ra/Tisa ra, ei niah thin thlâklo a la um leiin mi ei hmu hmel ṭha thei naw khawm ni rawi naw nîm!!  Kum hlui hin ei tisa mit le lungril, Eden rahai chu sawiṭil in liempui sien in hmu hmelṭha tâng ei tiu.

Tirko Paula khawma, hnung tienga thil umhai chu theinghilin, hma tienga thil umhai chu en lem dingin a mi ti a nih (Phil 3:13) Lalpa'n a en ta lo, ei nin ei la en ṭâl ṭâl hlak hin mi ei hmu hmelṭha thei naw a ei hnawtzâm lem hlak a nih.

Uire-nu mantuhai khan thawṭha inti takin Isu kuomah an fe pui a, “Mosie dan chun, chuongin khangin” an va ti a. Isun “In va thaw ṭha deh, lawm in va um deh” a ti ṭhak nawh, “Nangni laia suolna nei lovin deng raw se” a ti lem a nih. Mi suolna hmupeka, hril hril, dem dem hi kum hlui khan liempui ta sien, kum thar hin, mani suolna in hmu lem’in, Lalpa hma a tlulut ei tiu. Chuong mihai chunga chun Lalpa a lawm lem a nih. Mi suolna hmu zingtuhai chu; Uirenu Isu bula ṭhuoituhai ang chauh an nih.

ISU KUOMA UMZING HI DAMNA A NIH
Sam 73:27,28 “Ngaita, nangmaa inthawka hla taka umhai chu an bohmang ding a ni sia. Kei ata ding chun Pathien hnai hi a ṭha a nih”  Pathiena inthawka hlataka um, tlansuoksan hi bohmangna a nih. Jona khawm Pathiena inthawk a tlanhmang rawka, Tuipui mawngah, ngapui phing-sungah khum’in a um el a nih. A va thawpik tlak awm de!! Juda Iskariot khawm Isu bula inthawk a tlansuok rawka, a nun a hlim ṭhak le! A van âwkhlum hlawl a nih. Kum 2020 hi “Pathien hnai Kum” “Pathien zui tlat Kum” ti dâma inpuong khum thei inla chu a ropui âwm de aw!

“Pathien hnai ro, chuongchun amân hnai a ti cheu” (Jakob 4:8)
“Kei ata ding chun Pathien hnai hi/Pathien zui tlat hi a ṭha a nih” ti thei a, Kum 2020 a mi hlangkaitu ei Pathien hi inphatsan lova, hnai a, zui tlattu ni seng dingin, tiemtuhai po po chungah Lalpân malsawm raw se.

PUONVAR SILIN AMI BIEK

~ Jami Darngawn.

Oct 4, 2019 khan kan ruolhai pakhat Hospitala um operation ding leiin kan va fe a, kan ruolnu zo chara operation ding nuhmei pakhat chun ka lungril a va tawk ngei de!

Kum 29 a upa nuhmei pakhat chun nau nuhmei pahni a nei taha nau pasal a dit lei chun nau a vawn nawka a nauvawn mek chu thla 7 a tling chauva akdawk/operation ding ti a nih. Doctorin ama nu kuomah a hril nawa chu mi dang kuomah a nu'n naute a vawn mek chu mihriem tlingzo lo ding a ni thu a hril lei chun ka lunginsiet hle, nau vawnnu kuomah chun ka va fe a ka thei tawkin  Pathien thu leh ka tawnhriet hai chu ka va hril mawl mawl a nih.

Nau pasal a dit em em hung piengsuok ding chun a vawntu a sukțap el ding a ni leiin ka lo tuorpui em ema, ka lungril chun ramtin ka ngaituo vela kei ngei khawm ka nau lutir hung piengsuok nia ka beidawng dan leh ka hrilhai ziet dam kha ka hriet suok vawng vawng el a nih.

Kum 17 liem ta a khan (Hospital ah) kei khawm ka nau lutir ka phingsunga um kha a chang ta naw lei khan ka bei a dawng em ema ka beidawngin Lalpa kuomah zal pum chun ka țawngțai tah a chuonga ka țawngțai lai chun, tak ang deu, mang ang deu chun ka kuomah puonvar sil mi pakhat a hung ngira naute pasalte a pawma "Hi naute hi i tading a nih amiruokchu a chungah thuneina ingkhawm i nei nawh Lalpa thu thu a nih" a hung tia, a bo nawk el a nih. Ka kuoma um kuomah chun "Tuta hung ngir kha i hmu am?" Ka tia, a hmu naw thu a mi hrila mak ka ti hle a nih. 

Chuongchun, kan ngaituo tah a "Aw kei hi Lalpa kuomah nau pasal ka hnia Lalpa chun nau pasal a mi pek ngei ding a ni hih, ka nauvawn mek hi a hung piengpha pasal a ni chun Lalpa'n ka țawngțaina ami dawna nau pasal a mi pek a nih ting ka ta, mi hai kuomah ka hril ding a nih" tiin ka ngaituo a nih. Sienkhawm ka naulutir chu pasalte a ni ngeia chu keiin ka hriet thiem zawngin Lalpa'n ami pek naw lei khan ka lungrila ka lo ngaituo hai khawm hrilsuok thei lovin ka um tah a nih.

Sienkhawm tu tieng tienga ka ngaituo kir changchun Lalpa vântirko-in ka naunei/enkawl ding chu ami hung hril hriet ngei a nih ti chu ka chieng hle a nih. Ka naulutir chung a hin thuneina iengkhawm ka/kan nei nawh a Lalpa Pathien thu thu a nih. Tuhin ka naulutir Alex Darzakai (Valbuongte) chun Lalpa zar chauvin Oct 12, 2019 khin kum 17 hmel a hmu ve ding an ta a, hi ni hin  kum 17 sunga kan naupa kan enkawlna leh kan rawngbawlna, thlarau malsawmna ka dawnghai chu "Lalpa mi pawlna" ti hming chawiin lekhabuah kan siema, Lalpa zara dam chun "Lalpa mi pawlna" lekhabu chu Pathien ropuina ding leh ka naulutir hmingin mitin a tiem nuomhai tiem thei dingin tlângzar ning a tih. 

Mihriem hin harsatna, beidawngna, thina hai chen tuok hlak inla khawm ei kuomah Lalpa Vântirko in a mi umpui zing a nih. Iengkim ei tuok taphawt hi Lalpa ropuina ding ni pei sienla chu chu ei Pathien lawmna khawm ning a tih.

Sâm 34:7
Ama țituhai chu an vêla chun LALPA vântirko chun a umngha a, A sansuok hlak.

LALPA ROPUI RAW SEH.

THINGPUI DAWR AH

~ Jami Darngawn

August 12, 2019 tûk mak takin zing ṭawngṭaina a chun ka naupa a naupang lem kum 10 mi chu a hung ṭhang thei chu kan lawm hle ni ding ana, ṭawngṭai zo chun a Pa'n puri inchawk pek a tuma, chuongchun thingpui dawr a chun puri inchaw ding chun kan fe tah a.

Thingpui dawr neitu chun "I naupa chu a va lien ta de" a tih a, chu hotel sunga kil khata putar lo inṭhunghai chu an vanglai leh hratlai nia chun pa rawnkai tak an ni ding ti chu an hmela khawm hriet thei dingin an um a, chuonghai chun "I naupa mawh a nih i la naupang vei le chun" an mi tih a, kei  chun induthaw tak chun "Aw ! Pabung, ka naupa a upa lem khawm kum 17 a tling vang tah" ka hang tih a, chu putarhai chun mak an ti hle a, nau tlangval nei ding chun naupang an mi ti a ni chuh !!
(Kan ti upat taknak lai ah he he)

Puri zeu kan nghak malam chun putarhai leh chun kan titi ta peia, an ni chu ringnawtu an nih. An ni bawk chun "Lungril sawlna i nei ngai naw a nih maw?" an mi ti nawka kei chun "Pabung ! Ka nei taluo ie, ka lungril sawlna chu tamtak a um, amiruokchu Pathien kuomah ka lungril sawlnahai kan tlun hlaka Pathien lunginsietna zara hadam taka um thei ka nih" ka tih a.

Hienghin an hung hril nawka, ka lungrilah a cham zinga ropui ka ti hle a nih. "in Pastorhai leh in Kohran Upahai/ṭhuoituhai hi chu an upat hmel awl a nih" an hang ti nawk a, kei chun "Iem a ta?" Ka tia, an ni chun "An phur a rik ning a ta, chun an lungril po pova an inpek lei ning a tih" an hung ti nawka, ka lungril ruktak chun ka lawm khawp el a nih.

Ani ngei, a bikin ringnawtu laia khawsak hi ei bauvin thu va hril hehu thei naw inla khawm ei changzie leh ei hmelput hmangin a lo inlang hlaka, chu lei chun fimkhur a ṭul reng a nih. Ringtulaia fimkhur lo ding tina ni chuong lovin. Kristien haihi khawlai hmun a khawm ei hmel a hin Krista hmel inlangpei sien ti chu ei hriet tasa nisien khawm ka tawnhriet a'nthawkin ka la hung suklang a nih.

1Korinth 4:1
Keinirawi hi Krista rawngbawltuhai le Pathien thurûk enkawltuhaiah mîn mi ngai raw hai se.

EI HMEL AH KRISTA HMEL INLANG PEI RAW SEN IE.

KA LUNGRIL KA PHAWR LEM A NIH

~ Jami Darngawn

Bible-a Hanna chanchin chu a tlangpui ei hriet ka ringa, nau a vawn theinaw leiin a lungngai em ema Lalpa kuomah lungril leh titak zetin a ṭawngṭai a nih. Amiruokchu a ṭawngṭai lai chun Thiempu Eli khan zurui a lo sawn tlat el a nih.

1Samuel 1:
13. Hanna chun a lungrilin a hril a, a hmûr chauh a châng a, a rawl chu hriet an naw a; chuleiin Eli chun zu an rui niin a ring a.

14. Chuongchun Eli chun a kuomah, “Ieng chen am inrui zingin i um ding a na? I uoin chu siehmang raw khai!” a ta.

15. Hanna chun a dawn a, “Ni lo, ka lalpa, nuhmei lungril lungngai tawpkhawk ka nih. Uoin khawm, zupui khawm ka dawn dêr naw a, LALPA hmaa chun ka lungril ka phawr lem a nih.

Kei khawm ka naulutir ka nei hma khan Hanna angin Lalpa kuomah nau pasal ka lo hni hlaka, Lalpa'n ka ṭawngṭaina dawnin nau pasal ditumtak a mi pek a nih. Ka naulutir chu Lalpa'n a ropuina ding leh ka ṭhatna dingin Ami pek hi ka ngaituo chang mak ka ti'n ropui ka ti hle bawk a nih.

Kum 15 vel liem ta khan zankhat chu ka naute inthei lo ka mengpui malam khan Magazine pakhat  ka tiema, ka Magazine tiem a khan pasal pakhatin Lal Isu'n A hmangaihai lekha a hung thawn ni awm taka a ziek chu ka tiem fuka ka va lawm ngei de !!

Khang hun lai khan lekhaziek/thuziek hi ka lo tum ngai nawha thawkhawm ka thawsin naw bawk. Vawisun ramtin ka ngaituoa khang hun laia inngaisie em em le ka mihriem chanpuihai khawm hmu ngam lova ka lo um kha turuok hin chu Lalpa'n kei ah thiltum a nei lei a nih ti ka chieng hle a nih.

Hanna chun a lungril sawlna leh a chansietna kha Lalpa kuomah an tlun mawl mawla, amiruokchu Thiempu Eli hmu/en a chun zurui ang chauh a lo ni angin. Nang leh kei  khawm Lalpa ei Pathien hmaa ei saruokna/chansietna hai ei intlun/ṭawngṭai chang hin mi ṭhenkhat mi hmu/en dan chun mawinaw hle khawm a ni thei ie. Sienkhawm mihriem mi en/hmu dan el nilova Lalpa hma ei lungril ei phawr lem a ni leiin ei mihriem chanpuihai hmu/en leia buoi ding ei ni nawh.

Lalpa hmaa lungril phawrhai chu an hlawsam ngai nawh.

LALPA'N MALSAWM RAW SEN CHE.

NUOM CHIN RAM KHEL TIENG

~ Jami Darngawn

Ruthi 1:
5. Chun ama chun, “Ngaita, i mochanpuinu chu a chihai kuoma le a pathienhai kuoma chun a kîr nawk ta a; nang khawm i mochanpuinu ang bawkin kîr nawk el rawh,” a ta.

16. Nisienlakhawm Ruthi chun: “Nangma ṭhe ding le nangma zui lova kîr nawk dingin mi thlêm naw rawh; I fena taphawtah fêng ka ta, I riekna taphawtah chun riek ka ta, I chihai chu ka chihai nîng an ta, I Pathien chu ka Pathien nîng a tih.

17. I thinaa chun thîng ka ta, Chutaka chun an mi phûm ve el ding an nawm. LALPAN a lawlaw mi law raw se, chu nêka nasa khawma, Nang le kei hi thina chauh naw chun thil dangin a mi ṭhe ding chun, ”a ta.

Awleh, Lal Isu  hnung ei zuina a hin nuom chin ram chen chauh zui/thaw a awl em ema, chu chu mihriem nina tlangpui ti inla inkhel bek naw nih. Ruthi leh Orpa khawm kha an Hnam dan chun in tienga fe/kir ding hrim a nih. Orpa kha kei chun kan thiemnaw chuong nawh. Sienkhawm Ruthi khan chu a tarpinu Naomi kha an Hnam dan khel tieng pangin a zui/umpui a nih.

Chuongang bawk chun nang leh kei khawm Lal Isu hnung ei zuina a hin a huntawk char, a mawi chin char zui hi a awl em em. Amiruokchu a mawi chin chara Lal Isu ei zui a ni chun Thlarau malsawmna dawng zing chu intak deu a tih.

Kei khawm ka nuom chin char chauva Lalpa ka zui/hmangai chang a um hlak, amiruokchu nuom chin char chauva Lal Isu ka zui pha chun ka nun thuruk tak hi ka hlim ngai naw a nih. Pathien Thlarau malsawmna dawng ding chun taksa ditdan/nuom dan khel tieng met a lo ṭul hlak a nih.

Lalpa ei Pathien ei hmangai tak taka, a thupekhai ei thaw/zui a ni chun Ama chun Ruthi malsawmna dawng angin ei phu lovin Thlarau malsawmna leh chawimawina Amin hlan hlak a nih.

LALPA'N MALSAWM RAW SEN CHE.

ÊKDÛR A'NTHAWKIN

~ Jami Darngawn

Bâr thla (Beiruol thla) favâng nisa innêm hieu khawsâwt um tak boruok inthieng tak chu Lalpa zârin ei chuongkai nawk ta leiin Lalpa kuomah ei lawmthu um raw seh.

Tulai internet khawvela umhai chun hrie seng ei ta, a țhen lem chun an ngawk rak tah ka ring hiel. Pi Ranu Mondal chanchin hi a nih. A rawl mawi danglam tak chun India khawpui a fangsuoka mi tin deu thâwn ei ngaisakin ei ngaihlut el hi thilmak chu a tling ve a ni hih !!! 

Ka naupa kum 10 mi chun "Nu nu, kha hlasakthiem nu a'nthawk khan sermon i dawng naw maw ?" Ami ti ve khiet a, kei khawm chun "Tawi ! Ka dawng an nâwm!" tiin ka dawn. Ani ngei, sermon ti dîm a nih kawng tinreng a hin Pathien ropui ziet an lang niin ka hriet tak a nih.

Pi Ranu Mondal chanchin hi hril kher lo khawmin hmusit thu nilovin ekdûr a'nthawkin Lalpa'n a kei suok tak meu meu niin ka hriet, a ropui hle a nih. Pathien naupa Lal Isu chu tlawm takin Mary lairila hung insiengin bawng in tlawm taka a hung pienga, chu chu Pathien naupa nang leh kei Sandamtu ding a nih ti hrienawhai laia A thu puongsuoktu dingin kutdaw a'nthawkin a hung inlar a nih ei ti nuom a ni chuh !

Pi Ranu Mondal hi Kristien a nina hin lungril a tâwk em ema, ei ni Lalpa Ringtuhai ta ding chun Vântirko hung inlar ang el a nih. Asan chu ei lo hriet ta angin India sawrkar chun Kristien hai suknawmnat an tum thu le an ni Hindu sakhuo nasataka sukhmasâwn an tum laia hiengang Kristien nuhmei râwl mawi em em in Hindu sakhuo le sakhuo dang dang lai a Lal Isu hmel a hung suklang hi kei daikilkara um nu hi ka lo lawm em em a nih.

Kei ve bawk khawm ka chengna ram India ta dingin Lalpa kuomah ka lo țawngțai ve bawk hlaka, thla hmasak lai khawm theitawp ka lo insuo ve a nih. Lalpa kuoma ka lo hni dan chu hieng ang hin a nih. "Lalpa, India ram țhuoitu hai hin, I Chanchin Țha an hriet theina dingin hung inlar rawh" ti hi ka țawngțaina hla a nih.

Ani ngei kei ka nuom dan chun an mang tieng amanih, a tak am a nih, inlârna hmu tâwl hai sien ti chu ka lo nuom dan a nih. Ani ngei țawngțai pei ei ta Lalpa'n A nauhai țawngțaina mi dawn a ta, thilmak tak tak Ama ropuina dingin hung suklang pei ngei a tih.

Pi Ranu Mondal a'nthawka thilmak hung tlung hi nang le kei khawn nakie phat chu ei Lalpa'n hmun a mi siempek ei tlung pha ei umdan ding leh tekhi thei tak a nih. Kutdaw a'nthawka mi ropui laia tiemsa a a hung um el ta hi a i biek hlak Pathienin a chawisang a nih.

Ei unaunu Pi Ranu Mondal hi lndia ta dinga Missionary ropui tak a hung ni ngei theina dingin leh hmatieng peia a hringnun a Lalpa hmel an langzuol pei theina dingin nang leh keiin țawngțaina lo san mawl mawl dingin Lal Isu hmingin ei hung infiel tak zet a nih.

Eini khawm, êkdûr neka tirdakum lem, setan sala khuawpbeta ei umna a'nthawkin Lalpa'n a mi sansuok a, A nau dinga a mi hlângkaina hi a va ropui de aw !!!

Ei Lalpa Isu chun hienghin a lo hril ;

Johan 14:
1. “In lungril lunginzîng naw raw se; Pathien inring, kei khawm mi ring ve ro.

2. Ka Pa inah chêngna hmun tamtak a um a; a um naw chun ka hril ta ding cheu a nih. In ta dingin hmun siemin ka fe ding a nih.

3. Chun in ta dinga hmun ka hang siem chun hung kîrnawk ka ta, ka kuomah lâng ka ti cheu; ka umnaah nangni khawm in um theina dingin.

Lalpa'n ei ta dinga hmun Ami siempeka ei chengtlang pha chun a va ropui awm de aw !!!

LALPA RAM LIEN PEI A TIH.


September 1, 2019.

SABENGTUNG ṬAWNG THEI

~ Jami Darngawn

Nambar 22:
23. Chun sabengtung chun LALPA vântirko, kawlhnâm chawia lampuia ngîr chu a hmu a, chuongchun sabengtung chu lampuia inthawk chu a pêt a, ram hnuoia chun a fe ta a. Chun Balaam chun sabengtung chu lampuia infekîrtir tum chun a vuok a.

28. Chuongchun LALPAN sabengtung chu ân ṭawngtir a, Balaam kuoma chun, “Ieng am ka law che a, hienga vawithum zet mi vaw am i na?” a ta.

31. Chun LALPAN Balaam mit chu a sukvar pêk a, chuongchun LALPA vântirko kawlhnâm chawia lampuia ngîr chu a hmu ta a; a kûn a, a hmaia hnuoi sikin a bawkkhup a.

Awleh Pathien siem mihriem seng seng khawm hi ei inangnaw em ema, a ṭhen chu ropui le thil thawthei em em an ni lai zingin, a ṭhen ruok hi chu sabengtung khawm tluk lo ei va tam awm de ! Chulai a chun kei khawm sabengtung ka tluok naw niin kan hriet a nih. Asan chu hi khawvel dan a hin ṭangkaina ka nei naw em a nih.

Amiruokchu Pathien hmangaina zarin Lal Isu thisen zar chauvin sabengtung ṭawng thei ang ei nih. Asan chu sabengtung chunga chuong Balaam khan Lalpa Vantilko a hmu thei naw a, sabengtung ruok chun a hmu thei ve thung a nih. Chu umzie chu khawvela mi lien le thil thawthei tak tak haiin Pathien an hmu/hriet naw laiin nang le kei chun Pathien thu/hmel ei hmu a nih. 

Kristienhai hang ti el inla Israelhai Pathien ei Pathien Ringtuhai hi, hi khawvel a hin hmusit le endawngna ei tuok nasa em ema, a bikin ka chengna ram a khawm hin kum 2021 hun ah ram rorelna khawlpuia an rel ding le an thaw tum chu Kristienhai suknawmnat ding ti a nih. Chu umzie chu sabengtung chunga chuong Balaam anga mitdelhaiin ro an rel tum lei a nih. Mihriemna a chun an mit var hle sienkhawm, thlarau rama ruok chun an mit an del chieng hle a nih.

Khawvel ram hrang hranga khawm Kristien dodalna chu pungpei ni dingin an langa, chu chu ei Bible a khawm ni hnuhnunga thil hung tlung ding a tihai sukdiktu an nih. Sienkhawm nang le kei khawvel ena sabengtung ang el a hmusitum ni inla khawm, Pathien nau duot ei ni leiin Lalpa'n A min hmutir le hriettirhai chu huoisen takin ei kheksuokpui hlak ding a nih. Lalpa ringsan a ei hmu le hriethai ei kheksuokpui chun Lalpa'n ei chunga chuong/thuneituhai khawm an mit A hung sukvar pek thei a nih ti chu ka lungrila um ka hung sipliem pui a nih.

LALPA'N A THU MALSAWM RAW SEH.

AKAN SUOLNA

~ Jami Darngawn

Israelhai chun Kanan ram an pan laiin lampui a chun Pathienin thil mak tak tak leh ropui tak tak an hne/ngam tir hnungin do ding a la um rawpa, chu chu Ai khuohai do ding ti a nih. Sienkhawm an ni lai a chun Pathien ditnaw zawng thaw mi pakhat a lo um tlat lei chun Ai khuo chite chu an hne/ngam ta naw a nih.

Joshua bung sari sung po ei tiem chun Israelha'n Ai khuo chite an hne naw thu ei hmu a, an hne naw nasan khawm Akan suollei/duam lei a nih.

Joshua 7 :
19.  Chun Joshuan Akan kuoma chun, “Ka naupa, LALPA Israelhai Pathien chu inpâk rawh, a kuoma chun inpuong raw khai; i thilthaw chu mi hang hril ta, ka kuoma chu ip naw raw khai,” a ta.

20. Chun Akan chun Joshua chu a dawn a, a kuomah, “LALPA Israelhai Pathien chunga chun thil ka lo suksuol ta ngei el, hiengang hin a nih ka lo thaw chu:

21. Râllâk laia mi Babulon ram puon ṭha tak le, tangka shekel zahni le, rângkachak tlang shekel sawmnga bûk ka hmu a, kân hnar êm a, ka lâk el a nih. Chun ngai ta, ka puon in sûngah hnuoiah thuphmang a na, tangka chu chu hnuoia chun a um,” a ta.

Awleh Israelha'n Ai khuo chite an hne naw nasan chu Akan thil suksuol lei a nih a, a duam leiin thaw lo ding a lo thaw/lak angin, nang leh kei Lalpa ringtu khawm hin ringna lampuia ei fe laiin hmatieng ei pan laihin lampui ah ral do ding tamtak a um a nih. Chulaizing a chun Akan angin Lalpa ditnaw zawng ei lo thawpal a ni chun ei hmelma chu hne ngai nawng ei tih.

Kei ngei khawm ka hringnun a hin Jeriko kul anga nghet tak tak leh ropui tak tak ka khata ka hnelo ding thil ka hmasawn hlaka, sienkhawm Israelha'n thu awi taka Lalpa thu an zawma vawi 7 an hel zo chun Jeriko kul a hung chim ang khan Lalpa thu ka zawm chun Lalpa'n ka hmaa kul nghet tak anga um hai khawm Ami hne pek hlak a nih. Sienkhawm Lalpa thu ka lo zawmnawna chite khawm nisien a lo um chun thil chite ienga ka lo ngailo hai khawm chu ka ta ding chun doral hmelma'n an chang hlaka chu thilhai chu ka tading chun hmelma ṭi um ang a lo ni hlak a nih.

Amiruokchu a chang tawp tieng ei en chun Akan kha Israel mipuihai chun a thil thawsuol lei chun  lungin an denga meia an rawhlum ti ei hmu a nih.

A va rapthlak ngei maw !

Awleh nang leh kei khawm Lalpa lak ah thil ei lo suksuol a ni chun ei taksa lunga denghlum le meia raw chu ni nawng a tih. Sienkhawm vawisun/vawizan hin nang leh kei ruok chu ei taksa nilovin ei lungril suol tirdakum duamna sip hi hang dehawn inla thlarau meiin rawhlum inla nuom ava um de !

Chuongchun Akan umnaw hnung chun Israelhai chun Lalpa thu zawmin Lalpa Pathien ṭhangpuina'n Ai khuo chu an va hne tah a nih. Lalpa ropui raw seh.

Awleh, ei hringnun a hin thilsuol chite mi hmu lo dinga ei lo thawhai hin kakawk nasa tak a nei a nih ti chu Akan a'nthawk hmu thei dingin a uma, Lalpa'n a nauhai nang leh kei hi thienghlim ding leh Ama ditdana um dingin Ami dita, chu ding chun ei ni tin kalchawina a hin Lalpa ditzawnga um dingin ei hung infiel mawl mawl a nih. Ei lungril tirdakum tak leh duamna sip hi sukhlum ei ta Lalpa hmaa inhlan fai ei tiu. Chuongchun Lalpa Thlarau mei chun hung kangfai a tih.

LALPA'N  MALSAWM RAW SEN CHE.

INKHAWM BÂNSAN LOVIN

~ Jami Darngawn

Hebraic 10:
25. Ṭhenkhat thaw dân angin inkhawm dâm bânsan lovin, infui tuo lem ei tiu, Ni chu a hung hnai deu deuva in hriet leiin infui tuo nawk zuol ro.

Awleh, tulai ei khawvel tawng mek hi internet khawvela um ei ni tak leiin iengkim thaw/hmu hi a awlsam zung zung tah a, Pathien thu ngei khawm hi a nuomhai ta ding chun awlsam taka hmu/tiem thei dingin a um tah a nih.

Kei ngei khawm ka thei ang angin internet fethlengin Pathien thu le ka testimony hai suksuok/puongdarna remchang tak a ni leiin ṭhahnemngai takin ka ziek/post hlak a nih.

Ani ngei, ka nau lutir hi zan sawt tak tak ka mengpui hun le inkhawm thei lova ka um chang hin kei ang anga harsatna neihai ta dingin ti'n ṭhahnem ngai nawk zuolin ṭhang ka lak hlak. Amiruokchu, mi ṭhenkhatin "Biekin inkhawm kher a ngai nawh internet fethlengin Pathien thu ngaithlak ding le tiem ding a tam" ti zawnga an hril ka hriet hin pawi ka ti em em!

Pathien zara ei dama inkhawm theia ei um chun inkhawm ngei ngei ding a nih, ei Lalpa Isu khawm  hi khawvela a um lai khan inkhawmna Biekin hai kha a ngaina hle, a naupang lai khawm a Nu le Pa'n a umna chin an hriet nawa an zawng lai khan Biekin sungah a lo um ti ei Bible ah ei hmu a nih.

Naupang, Ṭhalai, Nupui, Papui khawm ni inla inkhawm ṭhul raka in a uma TV leh mobile phone en a lo um mei mei hi ching lo dinga ṭha a nih. Chuonga ei thaw a ni chun ei thil nei haiin an mi ṭhuoi suol der tina ning a tih.

Inkhawm anhawi tam, anhawi naw tam, tuhril tu'n a hril ṭha tam, a hril ṭha naw tam, khang leia inkhawm pei lova um chu suol a nih.

Pathien ei hmangai tak tak a ni chun a IN a fe a, A thu le hlahai saka ngaihlak chu ei inhawk dawp dawp ding a nih. Ei ngaizawng hai in a fe ei inhawk hlak ang bawkin Biekin a fe hi inhawk dawp dawp ding a nih.

Chanchin Ṭha mi hung hriltuhai ram (Wales) khawm inkhawm ding mi an um tak naw leiin an Biekin hai an zawr hiel ang khan, ei ni hai khawm tuta inthawka eiin siemțha naw chun nakie chu ei hmabak ding tho a nih.

Pathien malsawmna ei dawnghai hi a hmang dan thiem a ṭul hle a nih. Malsawmna mi petu theinghil rak khawpin hmang naw hram ei tiu ti chu Lalpa Pathien Ram lien peina dinga ei hung infiel mawl mawl a nih.

LALPA'N A THU MALSAWM RAW SEH.

KA NINA CHIENG TAKIN

~ Jami Darngawn

Ahmasa'n hun ṭha mi petu ei Lalpa Pathien kuomah lawm thu ei hril a nih. 

Awleh, August 1, 2019 tûk chun Biekin ah ka ṭawngțai laiin ka taksa/hmel chu ka hmaa a chun chieng takin ka hmu theia "Mitthla angin" ka taksa lai a chun ka zaklai vel chu a pawr em ema tirdak a um hle, a um dan chu zakkha rimsie tak nei ang ka nih.

Ka ṭawngṭai zo chun thil umdan ka ngaituoa mak kan ti em ema, a tak a hlak zakkha ka nei si nawh tiin kan ngaituo zawm ta pei a, chuongchun in ka tlung chun kan hmudan chu chieng takin keia a hung fie tah a nih. 

July 31, 2019 khan thuziek ding anlanga a thupui khawm "A puon hmawr them khawm damna a nih" ti thu a nih. Kum 12 thiput nu khan Lal Isu puon hmawr a them ringawt khawma damna a chang thu kha a nih.
(Marka 5 : 25,30) 

Chun, kei khawm Lalpa'n ka natnahai Ami sukdam pek thu zieksa ding ti a ni bawk a nih. 

Sienkhawm zani khan ka pei naw tlat baka suol sinthaw am ka ti ding? Internet fethlenga ka testimony or Pathien thu, Bible thu ka puongsuokhai hi thaw ta lo dingin thuthlukna ka lo siem fel der an tah ! Ka siemna san chu tamtak a uma hrillang dal ka tih. Hienga ka thei ang anga mawltaka ka testimony le Pathien thu ka lo suksuok hi Lalpa'n rem a mi ruot pek a nih ti chu ka chieng hle lai zingin, a chang chun ka ngawk phut hlaka tawp veng veng ka nuom hlak a nih.  

Chu tûk chun kan hmu chieng hle el, Lalpa'n thaw dinga Ami tihai ka thaw nuom naw chun Lalpa Pathien mita/hmua chun tirdak um tak ning ka ta, zakkha rimsie em em anga rimsie ning ka tih ti chu ka chieng hle a nih. 

Chuong a ni lei chun Lalpa thuzawm hi "Rim inhnik" a nih ti chu kei chauh nilovin tiemtu ditumtak nangkhawm Lalpa Pathien ta dinga i theina zawna ringum taka Rawng i lo bawl kha Lalpa ngaia chun rimsie nilova "Rim inhnik i nih" ti chu ei hung suklang a nih.  

LALPA TA DINGA RIM INHNIK NI TUM SENG EI TIH.

LALPA'N AMI PEKKIR THEI

~ Jami Darngawn

2019 May a'nthawk khan ka umdan andik naw em ema ka taksa chu a zawi vawnga ka iengkim khah a chau ngawi ngawi el a nih. Ka lung/heart khawm a nat em leiin ka pasal chun khawvel doctorhai kuomah a mi ṭhuoi a.

Chuongchun doctor chun a mi en vela ieng bek bek a hmu nawh, kei chun "Sir, Cancer kan vawi ka ring a nih" ka ti ṭhuoia,  doctor chun ka iengkim kha ensin/test dingin a mi ti taha, chuongchun ka taksa ramtin chu kan test baka ka thisen kan ro em em khawm chu ka taksaa natna um leh, um naw, hrietna ding chun ka kut vawitieng leh changtieng chun ka thisen an lak tah a nih. Ka thisen le kan test danghai result suok hma a kan ringdan chu cancer natna kan vawi ka ringa, ka nun a hlim bek naw a nih. Chu lai zing chun ka heart khawm ana em ema heart doctor khawm chun ka heart nasa takin a en bawk a nih.

A tawizawngin hril el inla :

Doctorhai chun ka taksaa natna ieng bek bek an hmu nawh a chu damdawi an min chaw ve a, ka ashtma lei a ni ziet an mi hril a, ka thisen result le result danghai khawm Lalpa zarin a ṭha vawng a nih. Amiruok chu damdawi an min chawhai ṭhataka ka fakna ding chun bu ṭha taka fak a lo ṭul a, chuongchun bu chu zing le zanin ka fak ṭeu ṭeua, anachu ka zawi deu deu ti thei a nih.

May 31, 2019 a hung inhersuoka ka naupa ta dinga ka ṭawngṭai laiin Lalpa rawl ka hriet tah, ka chengna ram (India) ta dinga ni 40 le zan 40 bu ngheia ṭawngṭai ding chun kei ah inhriettirna ka dawng tlat lei chun Lalpa hratna ringsangin 1st June a'nthawk khan ka du em em bu/rice chu ka nghei tah a nih. (Thingpui leh bei chu a khat tawkin ka fak a nih)

Ka du em em bu/rice fak chu ka thaw ta nawh a, doctorin damdawi a min chaw khawm ka fak ta naw bawk, mak ka ti em em chu bu ka nghei char a'nthawk chun ka zawi em em le ka lung/heart na em em khawm chu Lalpa'n Ami lakbo pek a nih.

Haleluiah. Lalpa ka lawm ie.

Ka ṭawngṭaina hla chu tamtak a nih, amiruok chu Lalpa'n mihai ta dinga ka ṭawngțai laiin kei a tieng taksa leh thlarauah mal A mi sawm a nih.

Zing leh zana bu ka lo fak ṭeu ṭeu lei chun ka taksa rikna khawm a lo pung deu deu a, ka zakuohai khawm kan tar tawl tah a, amiruok chu Lalpa'n tuhin ka ditdan angcharin ka taksa khawm Ami siem pek a, ka hriselna khawm pangai takin Ami pek nawk a nih.

Haleluiah !!!

Job 42 :10

Job chu a ruolhai ta dinga a ṭawngṭai lai chun, a thil inhmanghai kawnga chun LALPAN a tungding nawk ta a. Ngai ta, Job chu LALPA chun a hmaa a nei lêthni chu a pêk ta a.

Pathienin "Mi fel" a ti hiel fel em em le tuorsel em em le entawn tlak Job chu mihai ta dinga a ṭawngṭai laiin Pathienin mal a sawm angin. Nang leh kei khawm Lal Isu zara Pathien nau nitahai khawmin mihai ta dinga ei ṭawngṭai laiin Lalpa ei Pathien chun mal Ami sawm hlak a nih.

LALPA EI PATHIEN ROPUI TAK RAW SEH.