UPF in ‘Autonomous Hill State’ bawk an fepui ding
CCPUR: June 20, 2016 zantieng 1:20 PM khan UPF Convenor Calvin H le UPF thuoitu L. Sanga Hmar han Chanchinbumihai an inhmupui a, United Peoples Front (UPF) chun Autonomous Hill State bawk an fepui ding (standpoint) thu an hril.

UPF le KNO palai han June 15, 2016 khan New Delhi­ah Ministry of Home Affairs inrawinain Govt. of India le Govt. of Manipur hail eh ‘Tripartite Political Dialogue’ hmasa tak an nei a. Hi inbiekna hi Satyendra Garg, IPS, Joint Secretary, Ministryof Home Affairs, Govt. of India in an rawi a, UPF spokesperson Aaron Kipgen inrawinain UPF palai mi 6 le KNO spokesperson Seilen Haokip inrawinain KNO palai mi 6 an thang bawk.

Hi huna hin KNO le UPF team haia Spokesperson hai pahni suoi keina Indian Constitution Article 3­na thang­sanin Kuki State ngenna ‘Memorandum’ an pek a nih tiin an hril.

Kuki State ngenna Memorandum pek a ni thua UPF thuoituhai hril dan chun, September 26, 2016 khan UPF le KNO in joint meeting an nei a, chu huna chun ‘Joint State Demand’ nei dingin thutlukna an siem a, hi thil hi pawl pahni han inbiekna nei nawk a, thutlukna siem ding ti a nih. UPF chun ‘issue base’ a fe ding, nomenclature a fepui lo ding ti chu a thil tum le a fepui nuom dan a nih.
 
Hi thua hin June 15, 2016 a UPF le KNO palai han ‘Joint Memorandum’ an pek chu UPF in a hrietpui naw a, hi lei hin June 16, 2016 khan UPF palai han Delhi­ah ‘emergency meeting’ neiin UPF ‘standpoint’, Indian Constitution Article 244 hnuoiah ‘Autonomous Hill State’ ngenna ‘memorandum’ ziek tharin Satyendra Garg, IPS, Joint Secretary, Ministry of Home Affairs kuomah  pein in tieng an hung kirsan a nih tiin an hril.

An hril peinaah, ‘Political Dialoge’ neina ding le inzawmin Central Govt. chun UPF le KNO hai a kawpin inbiekna nei ding thu SP/CID fethlengin June 8, 2016 khan a hung inhriettir a, sienkhawm SP/CID chun UPF le KNO hai a hran ve vein an hriettir a. Hi dungzui hin UPF le KNO khawmin a hrana inbiekna nei dingin a lo beisei a, sienkhawm inbiekna nei hunah, a hrana inbiekna um lovin a ruolin inbiekna nei a ni a. Hi huna hin KNO chun Memorandum ziek saa an chawi a, Memorandum entlang a ni hnungin UPF palaihai chu an lungawinaw leiin Memorandum ziek that dingin an ngen a; Memorandum ziek thain siemrem tha pei nisien khawm UPF palaihai an lungawi theinaw leiin UPF chun a hranin Memorandum a pek a nih tiin an hril.

PRO, Defence Wing a hung inzin
CCPUR: Zanikhan Col. Ajay Sharma, Public Relation Officer (PRO), Defence Wing chu Churachandpur­ah a hung inzin a. Press Club, Headquarters Veng­ah Chanchinbumihai anhmupui. Churachandpur town sunga Chanchinbumihai inhmelhrietpui le a tul anga sin thaw tlangpui a nuom leia Churachandpur hung inzin a ni thu a hril. Manipur Hill Journalists Union (MHJU) enkawlna hnuoia Press Club thil tul le mamaw hai pek dan ding lampui a hung bawzui ding thu Chanchinbumihai kuomah a hril. Defence Correspondent’s Course a thang nuom hai chu a thangpui thei ding niin a hril bawk. Defence Correspondent’s Course hi August 18, 2016 a inthawka tan ding a nih.



ITI Application form 
CCPUR: Industrial Training Institute (ITI) Saikawt, CCPur­a kum 2016­17 academic session­a trade tum tum inchuk nuomhai ta dingin Application form  Office kai hun sungin lak thei a nih. Fill up zo sa Application Form peklut theina hun nuhnung tak chu June 30, 2016 a nih.

RPCNEI KTP in insukhlimna
CCPUR: RPCNEI, Kristien Thalai Pawl, Phairam Presbytery chun June 18  ­ 25, 2016 sung aw ding insukhlimna an nei mek a, an Unit tum tum hai chu Football League System a inkhelin, hieng Khawpuibung, Saikawt, Muolvaiphei le Thingchom Playground a hai hin inkhel hlak an tih. Chun, June 24 & 25, 2016 hin Saikot Playground ah umni khamin programme phuisui taka buotsaiin Pathien thu le inmilin an hmang bawk ding a nih.

Ni khat tha hlaw pe dingin
CCPUR: MGNREGS hnuoia Job Card hlaw, ni 7 a mi chu March, 2016 khan Manipur sawrkarin a pek ta a. Amiruokchu, Tipaimukh Block SDO/BDO chun ni 6 hlaw V/A hai kutah a pek a, ni khat hlaw chu tuchen hin a la peknaw a. Hi ni khat hlaw hi June 24, 2016 chena a pek nawna san a hrilfie naw chun an ngaimaw hle ding niin Solomon, Action Commander, HPC­D (President), HQRTS Sinlung in Press Release a siema chun a zieklang.

Khuga Canal a sie; tui te leia Ngadil tuilienin In a chîm
CCPUR: June 19, 2016 zana ruo sur khan Muolbem le Dumsau inkar Khuga Right Side Canal saktiengpang a chim a. Canal chim leia canal­a inthawk tui nasa taka a tedawk leiin Canal bula um Ngadil tui hung tam chun Pu Hranglienkhum s/o Phaihluothang of Muolbem In a chim bakah Ar le ran in hai khawm tui hin a chîm vawng. Hi taka hin Canal hi chim el thei ding ngirhmuna a um leiin Canal thlang tienga In 10 vel hai tawkbuoi el thei ding ngirhmuna a um bawk leiin, sungkuo thenkhat hai chu an in haia um ngam lovin an inthak dawk tawl. Canal hi a hung chim sap chun Govt. Primary School, playground le Leilet tam tak a suksiet thei dinga ngai a nih. Hi lai hmuna Canal chim lei hin tui a luong tla huou huou zing a, Canal chim hin Ngadil­a tui luongsuokna ding a um sinaw leiin tui hi an dil pum el a nih.


Zani hmasa khan department official le MDC thenkhat han a hmuna thil umdan an va enfel bakah zani khawm khan official thenkhatin an va enfel a, Iengtia hma lak ding am ti ruok chu hrietna ei nei nawh. Khuga Right Side canal hi tuta hma khawmin vawi tam tak a lo chim ta hlak a, Canal chim leia tui tedawk leiin hi lai biela um khuo hai chun harsatna an lo tuok rawp ta hlak a nih. Canal chim leia harsatna tuok nasa tak hlaktu chu Muolbem khuo hi an nih.

Tawngtairuolna a um ding
CCPUR:  June 25, 2016, 10AM­1:00PM) inkar sung khin Rengkai Community Hall­ah “Hieng ang huna ding hin a ni el nawm a nih Lal nina i chang hi?” ti thupuia hmangin ram le hnam ta dinga tawngtairuolna a um ding a ni a, hnam ta dinga darkar thum bek hi tawngtainaa thang ve dingin inhnikna nei taphawt thang dingin Miss May Rose le Rev Lalpienglawm han fielna an siem. Tawngtairuolna inrawitu ding hai chu Session­I ah  Rev. Lalpienglawm, EAL, AGEI; session­II Rev Lalngailien, EAL, RPC le Session III Rev. Benjamin Shakum, EAL, EFCI hai ning an tih.

Wanted-a puongna hlip a ninaw leh darkar 48 bandh; Counter blockade hlip
IMPHAL: JCILPS Convenor hlui Khomdram Ratan Manipur sawrkarin Wanted­a a pongna le inzawmin Singjamei hmuna cheng han a JAC an indin a. Hi JAC chun Singjamei Thongkhong­ah public meeting neiin, Khomdram Ratan Wanted­a puong a nina hlip a ninaw chun June 23, 2016 zingkara inthawk darkar 48 Bandh thaw dingin an rel. Chun, hi meeting hin Ministers le MLA­hai boycott ding, MLA­hai In hlukhum le khek khum ding, poster campaign le lamlien sira thungbuma nuorna nei ding tihai an rel sa bawk. Hi meeting­a hin Singjamei Civil Society Organisations, Local Clubs, UCM Vice Presieent Sunil Karam, MAPI Council President N. Bimol, JCILPS Assistant Convenor (Publicity Affiars Ng. Deba, AMUCO Vice President Gunindro, Nupi Samaj Secretary Ramani le JAC Singjamei  Convenor Th. Subashchandra hai an thang.

Chun, zanikhan Tiddim Road, Moirang area huop sunga Counter Blockade thawhai le Police han Khudekpi Community Hall, Moirang Lamkhai­ah meeting an nei a, an Counter blockade thaw chu tawpsana hlip ta dingin an rel. Hi meeting zova inthawkin an Counter blockade thaw khawm an chawlsan nghal. Amiruokchu, JAC Against Anti­Tribal Bills in National Highways haiah economic blockade an thaw nawk chun Counter blockade sunzawm nawk nghal dingin an rel niin ei thu dawngna chun a hril.

Paramedical&B.Sc. Nursing combine Entrance result
IMPHAL: BSc Nursing, BSc. MLT, BSc RIT, BSc OOT, B Pham le D Pham courses hai inchuk ding thlangsuokna dinga Manipur Paramedical and B.Sc. Nursing Combined Entrance Examination, 2016 result chu zanikhan  puong a nih. Course wise merit list hi State Health Directorate notice board ah en thei dinga tardawk a ni bakah website: www.manipurhealthdirectorate.in ah hmu thei ni bawk a tih.  Seats umzat hriet a ni hnungah merit dungzuiin selection list le wait list a hrana la siem nawk ni dingin ei thu dawngna chun a hril.

Bank Branch thar hawng
IMPHAL: Zanikhan Thoubal­ah Punjab National Bank Branch thar hawng a nih. Manipur state sunga Punjab National Bank Branch pathumna a nih. Hi huna hin T. Ranjit, IAS, DC, Thoubal chu khuollienin a thang a, S.K. Dash, Deputy General Manager, Circle Head, NE Circle chu functional President in a thang a, M. Bimol Singh, Branch Manager, Thoubal chu Guest of Honour in a thang. Punjab National Bank hin NE bielah branches 85 an nei tah.

Thoubal District Bandh thaw a nih
IMPHAL: Elangbam Kunan (21) d/o Panchmani of Khangbabok Part­II Khullakpam Leikai thina le inzawma JAC indina um chun zanita inthawk khan hun tiemchin um lovin Thoubal District bandh an thaw tan. Kanan hi mi phakzo lo, June 11, 2016 a inthawka a umna chin hriet lova inhmang, June 19, 2016 a kha a thisaa a ruong hmu a nih. Mi thenkhatin an suollui zo hnunga Canal sunga an pei ni dinga ring a nih.

Tribal student­hai ta dingin Paramedical courses
IMPHAL:  Manipur a tribal student­hai ta dingin Paramedical Course a thlawna inchuk thei a nih. Paramedical Courses hran hran inchkna dinga sum seng chu Tribal Affairs and Hills, Govt. of Manipur in a tum ding a nih. Courses tum tum inchuk theihai chu, Diploma in Medical Laboratory Technology (seats 15); Diploma in Radiology Imaging Technology (seats 15); Diploma in Opthalmic Technology (seats 10) le Diploma in Operation Theatre Technology (seats 10) a nih. Thiemna Class XII (science) passed ni a tul. Hi thila dinga Application Form chu June 30, 2016 chenin Medical Officer, Directorate of Tribal Affairs & Hills, Near Kuki Inn, Imphal, DC Office, Chandel/ CCPur/Senapati/ Tamenglong/Ukhrul le CEO, ADC, Chandel/CCPur/Senapati/Sadar Hills/Tamenglong/Ukhrul haiah lak thei hung ning a tih tiin Joint Secretary (Tribal Affairs & Hills), Govt. of Manipur chun inhriettirna a siem.

B.Tech Courses inchuk thei
IMPHAL: Manipur Technical University a First Year B.Tech Course in Civil Engineering, Computer Science & Engineering, Electrical Engineering le Mechanical Engineering inchuk nuomhai ta dingin Rs. 200/­ (General) and Rs. 100/­ ST pein Manipur Technical University, Takyelpat, Imphal­ah Application form lak thei a nih. Fill up zoa Application form peklut theina hun nuhnung tak chu 02­07­2016, 4PM chen a nih. Thu chieng lem +91 8794382183 annawleh www.mtuadmission@gmail.com­ah ngaiven thei ning a tih.

Khawte 142 electric pek nawk
NEW DELHI: Haptakar khat liemta sung khan India ram states 11 haia electric la tlung nawna khawte 142 haiah Deen Dayal Upadhyaya Gram Jyoti Yojna hnuoiah electric pek nawk an ni a, hi scheme hnuoia electric pek ta chu khawte 8,384 an tling ta niin Union Power Ministry thusuok chun a hril.

2008 Ahmedabad serial blast accused man
AHMEDABAD: Gujarat Police­a Anti­Terrorist Squad pawl chun kum 2008­a Ahmedabad khawpuia a zawna bomb sukpuokna le inzawma mawphurtu taka intum Nasir Rangrez chu  Karnataka­a Balagavi hmuna an man. Zani hmasa zan sawt hnunga dappui an thaw huna Rangrez hi an man a ni a, Indian Mujahideen (IM) a thang ni dinga ringhla a nih. Tuta hma met khan hi case le inzawm hin Alamzeb Afrida chu Police han an lo man ta bawk. July 26, 2008­a Ahmedabad khawpuia minutes 70 sung chau­a a zawna bomb vawi 21 zet sukpuok a ni huna khan mi 56 zetin thina an tuok a nih.

Iraq­a India mi thuoihmanga um 39 hai an la dam:  Swaraj
NEW DELHI: External Affairs Minister Ms Sushma Swaraj chun, June, 2014­a Islamic State helpawl han Iraq rama an thuohmang le hrentang India mi 39 hai chu an la dam tiin zani hmasaa New Delhi hmuna annual press conference huna a hril. Hring le dama insuo vawng an ni theina dingin sawrkar chun theitawp suoin hma a lak zing a nih tiin Ms Swaraj chun a hril.

Samak pui pakhat kap hlum
JORHAT: Kaziranga National Park, Assam­a chun zani hmasa khan dan lova sapeltu han Samak pui pakhat an kap hlum a, a Ki an lakhmang hnungin an fesan. Tukum sunga Kaziranga National park­a Samak kap hlum a 12 na le, tuta thla sunga Samak kap hluma um a pahnina a ni tah. Samak kap hluma umna bula hin .303 Rifle mu 6 (kap ruok sa) hmu a nih.

Bihar topper scam­a mawphurtu taka intum BSEB Chief le a nuhmei man
NEW DELHI: Special Investigation Team (SIT) chun Bihar Board Exam merit scam­a mawphurtu taka intum Bihar School Examination Board (BSEB) Chairman hlui Lalkeshwar Prasad Singh le a nuhmei Ms Usha Singh hai chu zanikhan Varanasi hmuna an man a, Patna (Bihar) tieng thuoi ning an tih tiin Superintendent of Police, Patna Manu Maharaj chun a hril.  Ms Usha hi JD­U MLA hlui, tulai hnaia election­a JD­U ticket chang phak ta lo a nih. Bihar topper scam um thu hi Arts stream topper Ruby Roy interview nei a ni huna ‘political science’ ti ding kha ‘Prodigal science’ tia a lam el bakah thlaisuong dan chungthu a nih tia a hril leia hrietsuoka hung um a nih. Lalkeshwar le a nuhmei hai hi an inbihmang leia June 15, 2016 a kha Bihar Court in manna ding arrest warrant a lo insuo ta a nih.

Hieng laizing hin Police chun merit case­a inrawlna neia intum ve tho Bishun Rai College­a Bachcha Rai office­a inthawk Pistol 1 le a mu 5 dapdawkin an man a, Arms Act hnuoia case an registered. Bachcha Rai hi Bishun Rai College­a Secretary­cum­Principal sin chel, merit scam­a inrawlna nei vea intum a nih.

Afghanistan­a thichil bomb puokah mi 14 an thi
KABUL: Afghanistan rama Kabul khawpuia chun zani zingkar khan Nepali security Guard hai chuongna minibus a inthawk thichil bomb puok leiin Nepali security guard personnel 14 an thi a, civil mi thangin mi iemanizatin hliemna an tuok  niin Interior ministry thusuok chun a hril. Taliban helpawl hai chun bomb hi anni sukpuok a ni thu an puong. India PM Narendra Modi chun hi thil tlung hi a dem thu a puong a, Nepal le Afghanistan sawrkar le mipui hai a sunpui thu a puong.

Police le teachers hai inbeituonaah mi 4 an thi
MEXICO CITY: Mexico­a chun zani hmasa khan Police le nuorna nei teachers hai inbeituonaah mi 4 in thina an tuok. Mexico sawrkarin education siemthatna dinga teachers hai lo thei lova test thaw dinga rawtna a siem dodaltu pawl han lampui an dang bakah motor hai an raw leia inbeituona hi tlung niin ei thu dawngna chun a hril. Thina tuok hai laia 3 hai chu protest a thang hai an ni a, pakhat dang chu Oaxaca state Police officer a nih.

VAWISUN THUPUI
I naupangna tukhawmin ngainep naw raw hai seh, thu hril kawnga dam, changzie kawnga dam, ringna kawnga dam, inthiengna kawnga dam, ringtuhai sukhmutu ni lem raw khai.  ­ 1 Timothy 4:12

Editorial: A sungah lutchil hai sienla

Pulpit tlang a inthawk dam, vantlang dawsang a inthawk dam, tlawmngai pawl rawla inthawk dam, research, seminar, workshop, symposium a inthawk dam hin politics hi thienghlim taka buoipui le thaw a that thu hi ei hrilin ei hriet rawp hlak. Mi ram politics dam ei hril a, ei el phak hrim hrim lo ding America politics dam ei hril a, an politicianhai ram hmangai dan dam, an policy­a an chieng thu dam, mi hmingtha an ditzie dam le mi ringum lo an theidazie dam ei hril a. America President chu team khat sung chau khawmin upat hmel an put nghal a, an thau inmum ve tuol tuol naw a, an ram ta dingin ngaituona an seng nasa lei a nih ei ti hlak. Indik khawm indik a tih. Nisienlakhawm ei ni rawi le chu inkhaikhin chi a ni nawh.

Ei ni rawi hi mi ram le hnam hai ngaituo chun mi tlawmte ei nih. Indik takin hang hril inla, a thiem, a var, a tlin le a ngaina hrie hai hin politics ah ei inrawl nuom nawh. Tlawmte a lo inrawl ve ruok chu an um. A lum tawka inthawkin politics hi ei awi a, a sungril tak takah ruok chun a thiem, a var, a tlin ding le a ngaina hrie hai hi an inrawl nuom naw a, politics­a hin contribution an nei tlawm hle. Hieng a ni lei hin ei ram politics fe dan le a kalhmang a hung indik theina dingin a thiem, a var, a tlin dinghai le a ngaina hrie hai hi ei ram politics­a hin a puoleng chauah ni lovin a sungrilah inrawlin lutchil ve hai sienla nuom a um hle. Chuonga thil a hung fe thei chun ei politics fe dan hi a hung indik thei beisei a um.

Politics­a lut ding hai hi lekhathiemna tiengpangah (educational qualification) siem le bitukna um naw de sienkhawm ei rama roreltu le dan siemtu ding hai hi ei nilaia a thiem, a var, a tlin hai le a ngaina hrie hai, a puotienga inthawk chau ni lovin a sungah lut ve hai sienla chu tuta ei ngirhmun nek hin a hung tha lem ngei ring a um. Thiemna le varna hai a hung insang ang peiin thluok tha lem neihai, ram le hnam ta dinga piengthar indik hai, mi ringum le mi fel hai chu ei rama thuoitu ding le roreltu ding hin ei mamaw ngawi ngawi a nih. Ram rorelna fel le tha ei dit si chun a puotienga inthawka rel fel tum chu thil harsa tak ning a tih.

Ei rama politics fe dan hi a thienghlim  tawk naw a, indikna le ringumna hai hmanga ro rel a ni ngai naw lei le thil thaw a ni ngainaw leiin a thiem, a var, a tling le a ngaina hrie, a bikin sakhuona tienga rawngbawltu le sakhuo mi deua inngai hai chun politics hi inhnik le inrawlna chiah ei ngai naw niin anlang. Amiruokchu, khawvela cheng ei la ni a, politics thang lo chun ei khawsa thei si nawh. Hi lei hin ei ram politics fe laizing siem thatna ding hin ei inrawl ve a tul a. Inthlang huna a candidate, a agent le party worker va ni kher naw inlakhawm politics fe indikna ding chun mawphurna ei nei a nih. Kohran thuoitu le kohran member­hai hi politics fe dan a hung indik a, a hung thienghlim theina dingin kut ei rawl ngam tak tak a tulna chin a um ta niin an lang. Thlasik dei lai mei lum ei awi a, a lum tawkna china ei awi naw chun umzie a nei ngai nawh. Hiengang bawk hin a lumna ding tawk chena bek ei va um chu a tulin an lang.

Lungsenna le theidaah la naw inla. Politics lutchil a, party office inhnikpui le a va thang ve hai chu en dan pakhatin ei en a. Khawtlangah khawm ieng em ema ei ngai lo hai fekhawmna dingah ei ngai a, contract le hamthatna hnawt kuol vel mei meiah ei sie a.Amiruokchu, hienghai hin ei ram thuoituhai chu an khal tlat a nih. Ram keithuoina dinga thil tul le manifesto thawkhawm hlaktu chu hieng party worker ei ngaisang raklo hai hi an nih. Chuleiin, ngun takin ngaituo inla, party worker ei ngainephai le ei nuizat rukhai hin ram thuoinaah lekhathiem, a var, a tling le a ngaina hrie hai, politics a lut ngam si lo hai nekin an rawl a lienin an ring lem hlak ti hi hriet ding a nih.

Party politics a ring leader­hai ngaituo tak chu ram ngirsuokna a ni tak naw a, an party damsuokna le hlawtling theina chu an ngaituo tak. Hi an party dam khawsuokna ding hin party worker, block, unit thuoituhai an tangkai a nih ti an hriet. Chuleiin an rawl a lienin an ring a, an proposal le agenda chu party thuoituhai chun an zawm naw thei nawh. Hiengang hi ei fe dan phung a ni leiin politics thienghlim lo ei dit naw chun lekhathiem, a var, a tlin dinghai le a ngaina hrie hai hin lutchil inla, a sunga inthawk siem thatna sin hi thaw a ngai a nih. Puotieng a inthawka politics siem that tum chu thil harsa tak a nih. Ram hmasawnna hi politics fe thanga invir vel a ni mieu leiin, puotienga inthawka sai el lova lutchila siem that a ngai a nih.


Post a Comment

Powered by Blogger.