BSNL cable tam tak JCB in a sukbawng
CCPUR: Tuilawng (pipe) phumna dinga JCB in Tipaimukh Road, CCPur College bul lampui sira hnuoi a cho naah  BSNL cable tam tak a huot bawng. BSNLTelephone hrui JCB in a huotbawng hai  siem­thatna ding hin ni 5/6 bek hun a lak ding niin BSNL thawktu hai chun an hril. Pipe phumna ding hnuoi an cho ding hi inhriettir hmasa hai sienla chu hieng ang em hin a suksiet naw ding thu an hril. BSNL cable suktan lei hi CCPur khawpui sunga BSNL hmangtu tam takin harsatna an tuok pha ding a nih.

48th EFCI Saikawt  Presby. khawmpui
CCPUR: “Krista ta dinga thi chena ringum” (Thupuon 2:10) ti thupuia hmangin Evangelical Free Church of India (EFCI) Saikawt 48th Presbytery khawmpui 2016 chu  Feb. 5­7, 2016 inkar sungin  Rengkai EFCI Biekin­ah nei ning a tih. Khawmpui sunga thuhriltu ding hai chu­ Pastor C. Thanglur; Pastor Fimthasang Infimate; Rev. V. Lalthalien Zote le Pastor Lalrohlu Puruolte hai ning an tih.

CDSVSA meeting nei
CCPUR: Zani 10:00AM khan CCPur Dist. School Vehicles Service Association (CDSVSA)  in  Chiengkonpang Community hall­ah general body meeting an nei a, kum 2016 sunga thil thaw dan ding hai an hriltlang bakah Student phur man (fare) hriltlangna neiin Association in a siem Number Plates semna nei a ni bawk. CDSVSA a hin registered members 174 an um a, hieng hai laia 150 an la service. Member han Rs. 500/­ a membership renew ding le zawm thar ding han Rs. 2500 an pek ding tiin an rel.

3 Bills thuah joint meeting nei
CCPUR: Kuki Inpi Manipur (KIM) inrawinain zani 11:00AM khan Tuibuong­a KIC Office­ah  Protection of Manipur Peoples Bills 2015 chungthuah joint meeting nei a nih. Hi huna hin KIM a inthawk President, Thangkhosei Haokip; Khaimang Chongloi, Gen. Secy; Hoazakhup Lupho Vice President le Tongmang Haokip, IRS (Retd.) member KIM hai an thang a, CCPur Dist. a inthawk KIC le Kuki hnam sunga pawl tum tuma thuoituhai; MPC, STC le UZO thuoituhai an thang.


Tribal martyrs hai sunna le inzana pek a ni a, Bills 3 hai chungthuah iengtia thaw dim ti chungthu an hriltlang a, hi thu ei sut chena resolution lak a ni le ninaw hrietna ei nei nawh.

Parbung­ah Bank building an enfel
PARBUNG: Tipaimukh A/C sunga Parbung khuoa Bank building bawlzo ta chu zanikhan Parbung Police hai venghimna hnuoiah Axis Bank official han an enfel. Bank building hi Manipur Rural Bank ding deua bawl a ni a, sienkhawm mipui han Nationalized bank ngei inthut nisien an nuom leia bieltu MLA hmalakna hnuoia Nationalised Axis  Bank pek a ni ta a, hawng vat ni ta dingin ei thu dawngna chun a hril. (Virthli)

PM in 12th SAG a hawng: FIFA World Cup Under 17 Guwahati-ah an nghat ding
IMPHAL: Zani zantieng dar 5 khan PM Narendra Modi in Indira Gandhi Athletics Stadium, Guwahati­ah 12th South Asian Games (SAG) a hawng. Hi Games a hin SAARC rambung tum tum hieng, India, Afghanistan, Bangladesh, Bhutan, Maldives, Nepal, Pakistan le Sri Lanka haia inthawk inkhelmi 2500 chuong an thang. India rama inthawk inkhelmi 703 an thang a, a tam tak an nih. SAG hi India in a mikhuol a tum thumna a ni ta a, tu ta tum hin disciplines 23 ah inkhel ning a tih. SAG hawngna hunsera hin Union Sports & Youth Affairs minister Sarbananda Sonowal, Union Petroleum & Natural Gas Minister Dharmendra Pradhan, Assam CM Tarun Gogoi, Meghalaya CM Dr Mukul  Sangma, Assam le Meghalaya Governor hai khawm an thang ve.

Hi huna Modi in thu a hrilnaa chun, India ram ta dinga vision ka nei ang bawk South Asia ta dingin vision ka nei a nih tiin a hril. SAG hin inkhelna tieng chau ni lovin SAARC rambunghai ta dinga muongna, inremna, hmasawnna le inlaichinna tha lem a hung intlun ka beisei. Sports thang lo chun mimal, ram le hnamin hma a sawn thei nawh. Inkhelmi han games spirit neia in inkhel ka nuom. SAG hin Ts 3­ Talent, Teamwork le Togetherness hung rasuok ngei raw seh tiin Modi chun a hril. India rama a vawikhatna dingin hungtlung ding kum 2017 khin Guwahati­ah FIFA World  Cup Under 17 innghat a tih tiin Modi chun a hril.

SAG a hawng hma hin Pu Modi chun Brahmaputra Cracker and Polymer Limited (BCPL) le  Numaligarh Refineries Limited hai a hawng bakah Shriman Sangkar Dev Sangh Annual Conference­ah a thang. Hi huna thu a hrilnaa chun, India hmarsak sukhmasawn chu a sawrkar thiltum hai laia pakhat a ni thu Modi hin uor takin a hril. Kawng hran hrana India ramin hma a sawn theina dingin hmarsak tiengpangin hma a sawn a tul a, hi lei hin sawrkar thlungpui chun hmarsakbiel hmasawnna hi a ngaipawimaw a nih tiin a hril.

District Hospital CCPur in pakhatna
IMPHAL: Manipur pumpuia Hospital sukfai le thienghimna tiengpangah District Hospital, CCPur in pakhatna an lak a, lawmmanin Rs. 50 lakh dawng an tih. Hi lawmman hi Feb. 11, 2016 khin Health Minister in sem a tih. Kum thara chun District Hospital hai chau ni lovin PHC le PHSC hai khawm thang ve tang an tih tiin Dr O. Ibomcha Singh, Director (Health) chun a hril. Lawmman pahnina chu District Hospital, Thoubal in dawng a tih.

CM in Indoor Stadium a hawng
IMPHAL: Zanikhan Manipur CM O.Ibobi Singh in Pravabati College, Mayang Imphal­ah Indoor Stadium, Women’s Hostel le Swimming Pool hai a hawng. Education siem thatna ding chun sawrkar le mipuihai an thangruol a tul tiin O.Ibobi Singh chun a hril. Hi huna hin Education Minister M. Okendro khawm a thang a, quality education a hung um theina dingin Zirtirtuhai chu theitawp suo dingin an fui.

Pasal pakhat kap hlum a nih
IMPHAL: Zani hmasa zan dar 7:20 vel khan Sagolmang Police Station huop sunga Sadhu Yenkhuman Mayai Leikai a in pakhatah silai chawi, hmai intuom, pasal 3 an va lut a, Salam Sanajaoba (27) s/o S. Khomba of  Sadhu Yenkhom chu insunga inthawk keidawkin an kap hlum. Kap hlumna hmuna hin AK­4  Rifle silaimu pahni kap ruoksa hmu a nih. Silaimuhai hi a vawitieng awmah an lut ve ve.

Union Health Minister a hung inzin
IMPHAL: Union Health Minister, J.P. Nadda chu Imphal­a zan khat riek dingin zanikhan Imphal a hungtlung. National AIDS Control Organisation (NACO) Project le iznawma hung inzin a ni a, vawisun hin India hmarsak biela Health Ministers le official hai inhmupui a ta, NACO programme thaw dan ding hriltlang an tih. Chun, vawisun hin NACO Project thar “Project Sunrise” ti City Convention Centre, Imphal­ah hawng a tih. Hi project hi US a um Centre for Disease Control (CDC) in an sponsored le Family Health International 360 hmalaknaa sin thaw ding a nih. J.P. Nadda hi zanikhan BJP Office­ah BJP thuoitu han an lo hmuok a, lawmlutna an nei. Sawrkar thlungpui chun Manipur a Central Sponsored Scheme­hai a ngaipawimaw a, an hmatienga sukpuitling ning a tih tiin a hril. Union Health Minister hin meeting zoin RIMS va sir a ta, RIMS sinthaw dan a hmuna enfel a tih.

N. Mangi le a rawi han BJP an zawm
IMPHAL: CPI, Manipur a inthawka hnawtdawk N. Mangi le a rawi han zanikhan BJP an zawm. N. Mangi hi Minister lo ni  hlak, an party kalzawngin a um ti leia CPI a inthawka hnawtdawka um a nih.

Nagaland mi nuhmei a thisaa hmu
NEW DELHI: February 5, 2016, zingkar 1:45AM vel khan Netaji Subhas Marg, Darya Ganj, Delhi­a Parda Bagh footpath lai nuhmei pakhat a thisaa hmu a nih. Nuhmei thisaa hmu hi a hnungin  Nagaland­a Dimapur mi  Mrs. Tzukdirenla Imsong w/o Watienba of Dimapur, Nagaland a nih ti  hriet a nih. A pasal hi CRPF 26 Bn. a  um mek le Bokara, Jharkhand­a posting   niin kum 2 liemtaa kha innei an nih. Zani hmasa zan dar 7:30 vel khan chu a nu Obangtila leh an phone in an lan biek niin ei thu dawngna chun a hril. A ruong hi saiip sunga thun niin ei thu dawngna chun a hril bawk.

Mizoram BJP hotu 8 suspended
AIZAWL: BJP Mizoram Unit chun an Vice President Chalngura Zahau thangin BJP leaders 8 hai chu party kal zawnga thil an thaw leiin an suspended bakah Mizoram state sunga district Committees hai an thiek vawng. Suspension order hi state party President thar dinga ruot Prof. John V. Hluna in zani hmasa zana kha an suo a ni a, hi chungthu hi national party leaders hai kuoma khawm intlun a ni ta thu Prof. John V. Hluna chun a hril. Chalngura Zahau hi John V. Hluna ngeiin party Vice president dinga tulai hnai ela kha a ruot a nih.

Minister hlui in bungheia nuorna
HYDERABAD: Andhra  Pradesh­a minister hlui le Kapu leader Mudragada Padmanabham chun,  Kapu hnam (community) hai Backward Classes category­a zieklut dinga ngennain zanita inthawk khan East Godavari district­a a chengna Kirlampudi village hmuna tiemchin um lovin bungheia nuorna a nei tan. Mr Mudragada Padmanabhan chun thla 3 sunga Kapu reservation chungthu sukfel ding bakah Kapu hnam hai ngirhmun dawmsangna dinga Rs. 1,000 crore pe dingin a ngen a nih. Bungheia nuorna hi a nuhmei khawmin a zawm ve.

Kejriwal kuomah pheikawk man ding Rs. 364 a thawn
NEW DELHI: Vishakhapatnam­a sumdawngtu Sumit Agrawal chun Delhi Chief Minister Arvind Kejriwal kuomah a pheikawk (formal shoes) man dingin Rs. 364 a thawn. President Pranab Mukherjee in January 26, 2016 nia French President Francois Hollande chawimawinaa Rashtrapati Bhavan­a state banquet a buotsai hunah dress code bawsiein pheikawk pum bun loa Chapal a bun hmu a ni a, chu thilin a lungril a suknat leia hi thil hi a thaw niin Mr Sumit Agrawal chun a hril. Rs. 364 hi demand draft­a hmanga  February 1, 2016 nia kha speed post­a a thawn a nih. A hun le hmun izira um dingin Mr Kejriwal chu thurawn a pek bawk.

Vantlang hmuna inzun le inhnawm a khap
AGARTALA: South Tripura district­a Police hai chun Swachh Bharat Abhiyan hnuoiah vantlang hmuna inzun le inhnawm a khap. Hi baka hin indiklo taka motor innghat (parking) le in bawlna hmangruo  le hmunhnawk lampui sira sie le dehawn a khap bawk. Hi thil hi mipui himna ding dit leia thaw a nih tiin District SP Bhanupada Chakraborty chun a hril.

Siachen­a vur intawlin sipai 10 a vur hlum
JAMMU: January 3, 2016 zingkar inhma tak khan Jammu and Kashmir­a Siachen Glaciers­ah vur nasa taka an tawl leiin sipai 10 a vur hlum. Vur intawlin sipai a vur hlum hai hi 19­Madras battalion a mi niin Satoro ridge­a feet 19,600 vela insanga um an nih. Vur in a vurkhum sipai hai hi nasa taka zawng an ni a, sienkhawm hmuzo an la ninaw leiin sawrkar chun thi in a puong ta a nih. Prime Minister Narendra Modi le Defence minister Manohar Parrikar hai chun sipai thi sunghai an sunpui thu an puong.

Sushma Swaraj Sri Lanka­ah an zin
NEW DELHI:  External Affairs Minister Ms Sushma Swaraj chu Sri Lanka­a ni 2 sung cham dingin zanikhan Colombo a tlung. India Ngamantu hai Sri Lanka Navy han an man rawpna le inzawm bakah minority Tamils hai ngirhmun chungthua Sri Lanka ram thuoitu hai inhmupui dinga inzin a nih.

MBKHP in bungheia tawngtaina  
AIZAWL: Mizoram Baptist Kohran Hmeichhe Pawl (MBKHP) chun zani hmasa khan Tlabung, Lunglei district­ah annual conference an nei a, Mizoram sarwkarin a state sunga Zu zawr phalna dan a siem le inzawma Zu zawrna dawr hawng a ni dodalna in  bungheia tawngtairuolna nei dingin an rel.  Chun, Zu zawr phalna suktawp dinga ngen dingin an rel bawk.

ISIS le inzawm pasal pakhat man
NEW DELHI: Delhi Police chun zani hmasa zan khan ISIS terrorist hai le inzawmna nei dinga ringhla pasal kum 28 mi Ibrahim Sayyed chu Kashmere Gate ISBT hmuna an man. Sayyed hi Malad, Mumbai hmuna a mi inthlawpui hai inhmupui dinga hung niin Special Commissioner of Police (Special CP) Arvind Deep chun a hril. Thla hmasa laia ISIS thangpuitu Delhi Police in mi 4 an man hai kuoma Rs. 50,000 petu ni dinga ringhla a nih.

Police 3 suspended
BANGALORE: January 31, 2016 zana Bengaluru hmuna Tanzania nunghak pasal thenkhatin a silfen hlip peka an sawisak nia intumna le inzawmin Inspector pakhat thangin Police 3 hai chu mani sin le mawphurna ngaitha tia intumin  Karnataka sawrkarin an sina inthawk a suspended. Hi thil tlung le inzawm hin Police chun mi 4 an man belsa nawk leiin tuchena  hi nunghak sawisakna le inzawma mi mana um chu 9 an ni tah. Thil umdan enfel dingin Ministry of External Affairs a Central team chu zanikhan Bengaluru an tlung.

VAWISUN THUPUI
“Chuleiin, aw Israel, i chungah hieng ang hin ka thaw ding a nih; i chungah hi hi ka thaw ding a ni leiin, aw Israel, i Pathien chu tuok dingin insiem zo rawh”  ­Amos 4:12

Editorial
Ei um dan

Ei hnam nun le mizie hi a tlabal nasa ta em em a. Pathien mi hriet ei nina le Kohran le thlarau mihai rawngbawlna leiin ei tluse vawng naw chau a nih ti inla ei hril suol taluo ring a um nawh. Tlawmngaina le Chanchin tha leiin, Voluntary Organisation hran hran han ei khawtlang nunah rawng an bawl a, chu zara chun ei la um tawk tawk thei a nih. Ram le hnam ngaituoa inlalna, sum le pai ei inchu nuoi nuoi pum khawma ei la tluse vawng el nawna san hi Kohran le thlarau mihai zar ei zo lei a ni ngei ring a um. Lalpa zawng suok ram le hnam chu ei nih. Nisienlakhawm, mipuihai hi ei inthlada a, a zawng suok san ram le hnam anga um lova, ei kristien nun fase zawnga ei fe pei chun la tluse ei ta, kawidar vawng ei ta, ei la tham ral el thei a nih.

Mi taima nekin mi zawmthaw, thudik nekin khel thu leng vel, mi ringum nekin lemchang thiem, mi fel nekin mi hlem thiem, indikna nekin indiknawna, sum le pai, iengkim el hi a letling zo tah. Mipui lungril sukthlek dan hi an dik ta naw a, ei hotuhai lungril puthmang le an mi thuoi dan khawm an dik hlei thei ta bik nawh. Mi tha le mi indikhai ei intim a, ei nekchep a, thil mi pe  theitu thuthlungah ei lut a, ei nina le ei thlarau nun ei thup hmang a, ditsakna luong liem hnawtin ei inlap rak rak el a nih.

Ei thlarau nun tieng khawm hiengang deu tho hi a nih. Pathien thutak le inthuoina dan le thupek tieng ngaituoin, sandamna hlimna puotieng thlum ei thlakhla a. Nina inhriet chieng hlimna zawngin pawl thar a pieng pei a nih. Sungril tieng thatna thanglo ‘Lemchang nun’ a tam. Ringtu puitling nun, mani le midanghai ta dinga thatna le malsawmna ni dinga inpekna le selna ei tlasam a, ei chieng tawk naw a, ei nun a del indul. Kristienna le  Zohnathlakhai nunzie mawi hmangaina hrui chel a, lungril hmunkhat ei put thei nawk hun hi a la hung um nawk dim? An umtir theitu chu ei ni seng hi ei nih.

Party politics ei invetchil a, thil tha lem le mani unauhai ngei khawm thlauthlak nuom khawpin  mani tieng thang ding ei zawng a. Ei sie le tha hrietna ei hmang ngil thei nawh. Ei varna hai chu midanghai thatna dinga hmang phal lovin, mani hmasielna ding chauva hmang tumin ei khekkhawl niin an lang. Chuong chun ei hlim tlang thei naw a, khawtlang nun a ngui a, inpumkhatna le thangruolna a kawi se mek. Thaw ding mumal nei lo ei pung pei a, a tlachawp hlawkna ei hnawt ta seng a nih. Sungkuo inthuoina khawm a mumal thei ta nawh. Hi thil hin ei thalaihai nun a fak siet a, hril seng lo harsatnain a mi tlakbuok ta a nih.

Thenum khawveng inhmangaina chenin a tlahnuoi a; hme ding thlaihna ei inpek hlak aiin hmunhnawk le tuihawk dam ei inpek phal ta tawk el hi chu thil pawi takel a nih. Hlawtlingna le malsawmna ei dawng haiah lungril takin ei inlawmpui thei ta naw a, mihai chetsuolna, vangduoina, harsatna le a dang dang hai chu ei diriem ta hlak an naw mani? Ei um dan hi a tha zawng nekin a tha nawzawng a kawk ta tlat el a nih.

Hotuhai  le mipuihai inkara indikna le inlawmtawn vel chu ei hratna thahrui tak a nih. Amiruokchu, hieng thil hai hi ei thaw khawmin a hming mei mei, a mawi zawng chauva thaw ei ni tain an lang. Thil dang po po nekin inditsakna le inlawmpuina hai hi malsawmna a ni vei leh, ieng dinga ei thaw nuom naw el hlak am ning a ta? Hi thil hin a mi suksiet a nih. Mi keikhawmtu dinga pawisa ei chelek a, chu chun hmangaina a thangsa si naw a; misuol le mi thahai, unau le hmelmahai khawm a thlier chuong nawh. Ei um nuom dan hi chu bansan le inthlakthleng a, nun dan tha le dituma ei khawsa nuom a um.

Post a Comment

Powered by Blogger.