Tuolsung
JPO kuoma ngaidam an inhni: JPO in an pawmpek
CCPur: August 14, 2015 nia Imphal Airport bul  laia Inner Line Permit System (ILPS) ngentu volunteers thenkhatin KKL Ambulance an suksiet bakah a khaltu (driver) an vauna le inzawmin Aug. 24, 2015, 11:00AM khan  KKL Office, IB Road, CCPur­ah Joint Philanthropic Organisation (JPO) le Joint Committee on Inner Line Permit  System (JCILPS) thuoitu, Meitei Youth Org./CCPur le Meitei  Society/CCPur han inbiekna an nei. Hi huna hin JCILPS volunteers han KKL Ambulance an vuoksietna le inzawmin Malom Area JCILPS chun JPO kuoma ngaidam an hni a, JPO chun an ngaidam inhnina hi an pawm bakah   Ambulance driver vau a nina chu JCILPS chun nasa takin an dem a, ILP movement le inzawmin JCILPS agitators hai an control ding, thil ditumlo a tlung nawk chun JCILPS in mawphurna an lak ding tiin an ngaidam inhninaa hin an ziek a, hi taka hin P.Arjun Tenheiba (Co­convenor, JCILPS); Ksh. Somorendro (Co­Convenor, JCILPS); L. Nganbi (Convenor, JCILPS Womens’ Wings le  Oinam Nandababu, Convenor, CJILPS Students’ Wing  han hming an ziek (signed).



Manipur sawrkar kuoma report peklut
CCPur: Churachandpur District sunga tuilien le mimkei in thil a suksiet zat hai  report chu zanikhan O. Leimaton Devi, Addl. DC, CCPur in Secretary (Relief & DM), Govt. of Manipur kuomah a peklut. Hi dungzui hin Tuilienin a tawk buoi khuo 104, tuilien leia harsatna tuok sungkuo 896, tuilien leia harsatna tuor mipui 4480; lampui a suksiet zat 7, tuilien leia thi 1, Tuilien leia Culvert sie zat 3, tuilien in suspension bridge (leilak) a suksiet zat 13,  Lo a chim zat 329.25 Hac.; thlai a suksiet zat 38.08 Hac. a lien le Thlanmuol panna leilak a suksiet zat 2 an nih.

Disabled Certificate pelut dingin
CCPur: Kum 15­18 inkar mi Disabled Certificate (Mild & Moderate) nei hai chun August 26, 2015 chenin ZEO/CCPur Office­ah disabled Certificate pelut dingin DIC/IED chun an hriettir a, thuchieng lem ZEO Office­a indawn thei ning a tih.

State Level Workshop
CCPur: August 25 & 26, 2015 hai khin State Family Welfare Hq., Conference Hall, Imphal­ah  Director of Health  Services, Manipur huoihawtnain State Level Workshop­cum­Training on Induction of Pentavalent Vaccine & IPV” um a tih. Hi huna hin CCPur a inthawk Seiboi Mate, Dist. Program Manager & DDM; Baryas, Dist. Finance Manager; Chinkhanzam, Dist. Extension & Media Officer/CCPur;  V. Vumzalian, CO/DIO, CCPur le Kamlian, CO,  DFWO/CCPur hai va thang an tih.

Relief material an pek
CCPur: ZYA Tangnuam Unit chun tuilien le mimkei tuortuhai thangpuina dinga relief material tum tum an dawlkhawm hai zani 10:00AM khan Zomi Relief Committee (ZoREC) kuomah an inhlan. Relief material an  pek hai lai Bufai bag 4, Puon bag 4, steel plate 3 le Rs. 2350/­ a thang.

Attendence report pelut dingin
CCPur: Zonal Education Officer (ZEO), CCPur hnuoia  Schools Headmasters/Headmistress hai chu thla tin pay bills leh Teaching le Non­teaching staff hai Attendance list  pelut zie hlak dingin ZEO, CCPur chun an hriettir. Attendance  Report hi DC kuoma countersignature thaw dinga peklut a ni hmain head of school in signature a pek ngei ding le D.I. of  Schools in countersigned a thaw ngei ding a nih. Tuta thla (August) a mi Attendence list chu August 26, 2015 chena pelut dingin ZEO chun an hriettir.

Guite road­ah mimkei
CCPur: Zani hmasa zana ruo nasa taka a sur lei khan Guite Road­a  Singngat khaw pel met lai mimkei a tlung leiin motor an fethleng thei naw a, hi lei hin Mizoram pan ding le motor dang dang hai chun an hrawthlang thei nawh. Sipheng vadung  tuihawkin lampuiah chirdiek nasa taka a hung fenlut  nia hril a nih. Hi lai hmun inthielfaina sin BRTF han zanikhan an thaw nghal a, vawisun hin an zo hman beisei a nih tiin ei thu dawngna chun a hril.


Headline
Rani Gaidinliu kum 100 tling hmangna hun PM Narendra Modi in a hawng
New Delhi: Zanikhan Vigyan Bhavan, New Delhi­ah India hmarsak biela India ram ta dinga zalenna suoltuhai laia thang ve nuhmei  Rani Gaidinliu kum 100 tling hmangna  PM Narendra Modi in a hawng a, hi huna hin Narendra Modi chun Rani Gaidinliu hrietzingna ding a lim chuongna pawisa thir tlangzarna a nei. Hi huna hin Nagaland Governor P.B. Acharya, Nagaland Chief Minister T.R. Zeliang, Manipur CM O.Ibobi Singh, Union Home Minister Rajnath Singh, Union Minister of state for DoNER (Independent Charge) Dr Jitendra Singh, Union Minister of state for Culture, Tourism & Civil  Aviation (independent charge) Dr Mahesh Sharma le milien milal dang danghai an thang.
    

Hi huna PM Narendra Modi in thu a hrilnaa chun, India hi lalhai annawleh roreltuhai siem a ninaw a, mipui siem a nih. Sawrkar thlungpui le NSCN(IM) han Naga Peace Accord an ziek hin NE biel mipui ta dingin thiltha an tlun  ka beisei. India hmarsakbiel hai Rel lampuia an infepaw theina dinga hmalakna hi a hma neka sukhrat zuol sau ning a tih. Rani Gaidinliu thangsain India ram zalenna dinga hma lo latuhai hriezing ta lova thangthar  han ei theinghil pei el ta hi a pawi a, a vangduoi thlak a nih. Rani Gaidinliu hin India ram ta dingin a hringnun a lo inhlan  a, ngai ngainat thlak a nih tia hrilin “Rani ­ Maa” tiin a ko. Rani Maa hin Mahatma Gandhi chanchin a lo puongdar a nih. India in zalenna a hmu hnung khawma hun sawt takel a chengna khuo a tlung theinaw chu  pawi a ti thu a hril a. Naga mihai ta dinga British hai a lo dona hin India ta ding khawmin inthuruolna le inpumkhatna an tlun ka beisei tiin Modi chun a hril. Kawng iengkima NE biela hmasawnna dingin muongna le inremna a mamaw tiin a hril bawk.
    
Union Finance Minister Arun Jaitley in thu a hrilnaa chun, Naga Peace Accord le Bangladesh Land Boundary Agreement in NE bielah muongna le hlawtlingna hung intlun a tih tiin a hril. Union Home Minister Rajnath Singh chun, Rani Gaidinliu hmalakna hin India ram pumpui a tlung phak vawng a nih. NE biela muongna, inremna le hmasawnna a hung um theina dingin sawrkarin hma a lak zing a nih tiin a hril.  DoNER minister Dr Jitendra Singh chun, Rani  Gaidinliu hrietzingna dingin Kohima hmuna Rs. 9 crore sengin Library le Museum bawl  a ni ding thu a puong. Manipur CM O.Ibobi Singh in thu a hrilnaa chun, Rani Gaidinliu chanchin students han an hriet theina dingin NCERT in textbook an siem haiah Class I to X chenah a chanchin inthangsatir dinga PM Narendra Modi chu Union Human Resource Development Ministry chu recommendation inthaw tir dingin a ngen.
            
Rani Gaidinliu hi January 26, 1915 khan Tamenglong district­ah a pieng a, kum 13 mi a nia inthawka Manipura British hai hnawtdawk dinga a unaupa Haipou Jadonang hmalakna zui tan, kum 16 mi a ni  kum 1932 a man le British sarwkarin damsung lungin intang dinga lungina a khum tan, India in Independence a hmu hnunga Tura Jail, Meghalaya a inthawka insuo a nih. Lungin hran hranah kum 14 zet an tang a nih. A hmalakna leiin Padma  Bhushan inhlan a ni a, February 17, 1993 khan Longkao, Tamenglong District, Manipur­ah a thi ta a nih.

Imphal­Dimapur Road fe thleng thei lo
Imphal: NH­2 (Imphal­Dimapur Road) a Nagaland state sunga Phesama hmuna lamlien mimkei leia metres 100 vel a chim chu siem that zo a la ninaw leiin Kohima bulah Manipur pana hung motor chi tum tum 200 vel an lan tang zing niin ei thu dawngna chun a hril. BRO in lampui chimsietna hi an siem zing a, an zo hun ding hriet a la ni nawh.

AR han  ralthuom an man
Imphal: August 24, 2015 khan 9­Sector Assam Rifles hnuoia 12 Bihar battalion le Imphal Wes Police Commandos han Uchhiwa hmuna dappui an thaw a, Thingbul hnuoia ralthuom tam tak an dapdawk.   Ralthuom an dapdawk hai lai 9mm Pistol 1, 9mm Carbine machine Gun 1 le magazine (local made), China siem Hand Grenade, 12mm mu 27, IED delay fuse 3, IED circuit 2, metres 10 a sei Chinese Cordtex le Kg. 10 a rik IED flexible wire a thang. Hieng ralthuom hai hi Mayang Imphal Police station­ah an peklut niin  Assam Rifles thusuok chun a hril.



Sawrkar doctors han enkawl an tih
Imphal: JCILPS inrawina hnuoia ILPS ngenna le inzawma nuorna nei pawl han Police chetna leia hliemna an lo tuok khawmin sawrkar doctor han enkawl an tih tiin Dr O.Ibomcha, Director, Health Services, Govt. of Manipur chun a hril. Amiruokchu, nuorna nei han medical staff hai chu an dangchat naw le an intuortir ding a ni nawh tiin a hril.

Counselling Aug. 27 a nei ding
Imphal: All India Pre­Medical, Dental  Test (AIPMT) , 2015 a Manipur­a inthawka hlawtling hai ta dingin August 27, 2015, 10AM a inthawk  RIMS Jubilee Hall­ah Counselling nei tan ning a tih. August 24­26, 2015 inkar hnina lekha lak le peklut thei a nih. Thu chieng lem Directorate of Health Sevices, Imphal or www.manipurhealthdirectorate.in ah hriet thei ning a tih.

Thoubal District­ah Cr.P.C 144
Imphal: ILPS le inzawma JCILPS thlawptu han bandh, blockade le buoina lien lem an siem ding laka  invenglawknain zanikhan District Magistrate, Thoubal District chun tiemchin um lovin Thoubal district  pumpuiah Cr.P.C. 144 a puong.

Economic Blockade sukchawl nawk
Silchar: Zani zingkar dar 5 a inthawka North East People’s Organisation (NEPO) in Jirighat, Cachar district, Assam a hun tiemchin um lova Economic Blockade an thaw chu DC, Silchar le Blockade thaw han inbiekremna an nei thei leiin an economic blockade thaw hi an chawlsan nawk tah. Non­Manipuri hai ta dinga ILP ngena um chu hrietthiem a um. Amiruokchu, Mayang Curfew thawa  Ina inkhum lui, taksa le lungril IPLS ngentu han an suknat ruok hi chu hrietthiem a harsa  ti leia  blockade hi thaw a nih tiin Pradip Kumar Dey, Chief Convenor, NEPO chun a hril.

Naufahrahai enkawlna  Rs. 30 lakh ngen
Shillong: Meghalaya le Assam inrina zul, Meghalaya state tiengpanga Kuralbanga, West  Garo Hills a naufahrahai enkawlna, Ramakrishna Mission­a Affiliated chun Rs. 30 lakh ngenna demand letter a dawng.  Demand letter petu hi ieng pawl am an na ti hril chieng thei a ninaw a, Police han an suizui mek a nih tiin Pravin  Bakshi, DC, West  Garo Hills chun chanchinbumihai kuoma a hril.

Assam PS pakhat an ban
Guwahati: Assam state a Tarun Gogoi Chief Minister nina hnuoia Congress sawrkara Parliamentary Secretary (PS) sin chel lai mek Pradhan Baruah chun August 23, 2015 khan Parliamentary Secretary a ninaa inthawka inbanna Tarun Gogoi kuomah a peklut. Baruah hi parliamentary Secretary (Revenue) chanvo chel, Congress Minister hlui Himanta Biswa Sarma thlawp le tantu a nih. Sarma hin  BJP a zawm ding thu a puonglang leia Baruah hi a ninaa inthawka inban nia hril a nih. Baruah inbanna hin Congress party sungah kakhawk neinaw nih tiin APCC President Anjan Dutta chun a hril.

Nagaland MLAs 60 le NSCN(IM)  member­hai
Dimapur: Nagaland Legislative Assembly members 60 le NSCN(IM) member­hai chun August 26, 2015 khin Chumukedima Police Complex­ah meeting  nei an ta,  August 3, 2015 a Naga Peace  Accord zieka um chungchang an hriltlang ding nia hril a nih.

Rel tuoksietah MLA 1 thangin mi 5 an thi
Hyderabad: Zani zingkar dar 2:23 vel khan Andhra Pradesh a  Rangapalli le Penugonda inkarah Rel thil phurtu le Nanded  Express Rel an inbaw a, Rel pindan 4 a tlu a, Karnataka State a Devadurga A/C a Congress MLA, A. Venkatesh Naik thangsain mi 5 an thi a, midang 20 an hliem. Rel hi  Bangalore a inthawka Nanded pan, Anantpur hmuna tuoksiet tuok a nih.

Seychelles President a hung inzin ding
New Delhi: Seychelles President  James Alix Michel chu New Delhi­a ni 3 sung cham dingin vawisun hin New Delhi hungtlung a tih. Seychelles President hi an ram Foreign Affairs & Transport minister Joel Morgan;  Finance, Trade and Blue Economy minister Jean Paul Adam le high level officials han hung zui an tih. Michel hin India President, PM le Minister dang dang  bakah high official­hai inhmupui a ta, Mumbai khawm sir a ta, Maharashtra Governor C.Vidyasagar  Rao inhmupui a ta, Seychelles Tourism  Board in inkhawm an buotsaiah thang bawk a tih.

Arunachal CM chungah CBI case
Itanagar: Arunachal Pradesh Chief Minister Nabam Tuki chu dan kala a sung le kuo hai contract sin  petua intum a nih. Gauhati High Court chun Nabam Tuki chungthu hi suizui a, case siemkhum dingin Central Bureau of Investigation (CBI) an hriettir. Nabam Tuki hi a nuhmei chen contract sin pea intum a nih. Chun, hi thila inrawlna neia intum Kendra Vidyalaya Sangathan, New Delhi le Director of State Sports Council,  Govt. of Arunachal Pradesh hai chungthu khawm Gauhati High Court chun suizui dingin CBI an hrietir.

Naupang 3 tuiah an tla hlum
Aizawl: August 23, 2015 (Pathienni) chawhnung tieng khan Tlungvel le Khumtung inkarah Phulmawi khaw mi, naupang 3, Hmingthanpuia (9), s/o Laltlankima; Lalmuanpuia (8) s/o Lalnunmawia le Joel Lalhriatzuala (8) s/o Lalhlimpuia hai chu Nga vaina Dil­ah an tla hlum. Hla le chang inchuka fe, in pana an hung kir tienga Nga dila an insukdeinaa changsuola tuia tla hlum an nih tiin Lalrova Hmar, YMA, Phulmawi Branch chun a hril.

State hran ngennain lampui hrawna
Agartala: Tripura state a Tribal party, Indigenous Peoples  Front of Tripura (IPFT) chun August 23, 2015 khan State hran ngennain lampui hrawna an nei. Lampui hrawnaa hin mi 15,000 vel an thanga hril a nih. Tripura Tribal Area Autonomous District Council  (TTAADC) seats 28 umnaa inthlangna um a khan IPFT hin seats 16 an lak a nih. Tripura state ah CPI(M) in kum 22 zet sawrkarna an chel ta a, sienkhawm tribal area sungah hmasawnna sin hrim hrim thaw a ninaw a, water supply, education, ram le hriselna tiengpang haia khawm tribal area chu a la hnufuol hle a nih tiin IPFT President N.C. Debbarma chun a hril. State hran, tribal state ngenaa IPFT hi kum 7 liemtaa kha indin a nih.

IAF vuongna tuoksiet a tuok
Srinagar: Zani zingkar dar 10:59 vel khan Indian Air Force (IAF) Vuongna MiG­21 Bison chu Jammu & Kashmir state a Budgam district sunga Soibugh hmuna tuoksiet a tuok a, hnuoia a tla thla. A Pilot ruok chu dam le himin an chawmdawk hman tiin Defence Spokesman Colonel S.D. Goswami chun a hril. Pilot hi Army Helicopter hmangin an chawmthlakna hmuna inthawk va phur a nih. Hi thil tlung le inzawm hin  Court of inquiry thaw dinga order insuo a nih.

Assam­a tuilien leiin mi 13 an thi tah
Guwhati:  Assam state a Districts 19 haia tuilien chun kiem tieng a la pan thei chuong naw a, tuilien leia thi mi 13 an tling tah.  Assam Chief Minister Tarun  Gogoi chun zani hmasa khan Helicopter a chuongin tuiliensangna hmun hai a va thlir. Tuilien hin khuo 1,291 vel a chim a, Relief camps 260 hawng a ni a, mi 1.79 lakh vel enkawl mek an nih. Army le NDRF pawlin sansuokna sin an thaw zing a, mi 6.16 lakh velin tuilien leia harsatna an tuok mek. Tuilien leia harsatna tuorhai chu sawmdawlna tha taka pe dingin Tarun  Gogoi chun Deputy  Commissioner­hai an hriettir.

J&K ah helpawl 3 kap hlum
Kupwara: Zani hmasa khan Jammu & Kashmir a Kupwara district sunga Handwara an ti hmuna helpawl le Army le Police thangruolhai an inkaptuo a, hun iemanichen an inkaptuo hnungin inkaptuonaa hin an hming hrietlo helpawl 3 kap hlum an ni a, inkaptuona hmuna hin silai le a mu tam tak hmu a nih. Chun, hi inkaptuonaa hin Army officer pakhat a hliem a, kap hluma um helpawl 3 hai ruong hi Police kutah pek an nih tiin Army Spokesman chun a hril.

Israel Navy Chief a hung inzin
New Delhi: Israel Navy Chief Vice Admiral  Ram  Rutberg chu New Delhi­ah a hung inzin a, zanikhan Union Defence Minister Manohar Parrikar; Devence Secretary G. Mohan Kumar le India Navy Chief  Admiral R.K. Dhawan hai an hmupui. India le Israel Navy hai chun hnuoia inthawka boruok kap theina BArak Missle thangruolin an siem bakah indona Lawng tiengpangah an in­thangpuituo a nih.

NDA CM candidate ni tum lo
Hyderabad: Union Minister for Consumer Affairs, Food & Public  Distribution bakah Lok Jhanshakti President ni bawk Ram Vilas Paswan chun Bihar Assembly election hung um dinga hin National Democratic Alliance (NDA) Chief Ministerial candidate ni a tu mnaw thu hrilin National politics ah a um zing ding thu a hril. BJP Lok Sabha  MP le film star a inthawka politics a inlet  Shatrughan Sinha chu NDA Chief Ministerial candidate a hung ni el theia hril a nih.
---------------------------------------------------------------------------------------------------------------------
VAWISUN THUPUI
Lalpa no le khawhri no dâwn kaw thei naw ti niu, Lalpa dâwkana  le khawhri dawkâna chu fa kawp thei  naw bawk in tih.    ­ 1 Korinth 10:21

Editorial
Sin thaw hi inzak a um nawh

Thabona leia ruk inruk dam, kutdaw dam, mi hlem le khel hril hai dam hi inzak a um a. Sin thaw ruok hi chu ieng sin  khawm nisienla inzapui a um naw a, mihai lunginsiet hlawna el khelah fak hmuna a nih. Hi lei hin sin insang, sin hnuoihnung, sin lien le chin tia hmusit ding a ni nawh. A tlawm am, a tam am, regular taka hlaw nei hi a tangkai em em leiin mihai chun regular taka sum hmuna ding sin an zawng sup sup a, an chuin an inchu a ni deu tak. Hi lei hin sin hmu le nei hi a harsa ta hle a nih. |hangpuitu tha le ditsaktu tha neinaw hai ta ding lem chun private le kohran pawl tum tum hai lai khawm thawkna hi hmu a awlsam ta nawh. Sin thaw ding annawleh thawkna hmuna ding  chun mi tha, mi indik le mi taima ni a tul.
    
Manipur a hin sawrkar sin le thawkna, a bik takin regular post a tam tanaw a, a tlangpuiin contract basis a lak anni tlangpui tah.  Contract basis khawm nisienla awlsam taka hmu el thei an tanaw a, mihai neka thiem a tul a, written test examination a inziek tling bek a tul ta a nih. |hangpui theitu ding Ministers, MLA le Officer lien  khawm nei la, written test exam a tlingzo lo hai ta ding chun  thangpui a harsa hlak. Mihai neka thiemhai chau exam­a hin an hlawtling hlak. Mi hlawtling  le mihai neka thiemna neihai chu mi taima hai an nih. Thiemna ding chun taimak a tul a, mi thabohai ta dingin hmun a um ta nawh.
    
Mihai kuomah kutdaw lova fak ei hmu theina ding chun taimak chu a lampui  umsun a nih. Hi lei hin sin hi an sang, an hnuoi tia hnawl ding a ni nawh. Rickshaw khal a tul chun khal el ding, hmunphita inhlaw a tul chun  thaw el ding a nih. Sammet le pheikawk tha lo siemtu sin dam hi ei ni rawi chun ei lan zapui a hawi a, vaihai thaw ding ang  deuin ngaina ei nei a, hi ngaidan hi ngaidan indiklo a nih. Ei rama Vai hung um hai hin sin thaw rin an nei naw a, sin hnuoihnung taka inthawka an sang tak chenin an thaw a nih. Hi kawnga hin entawntlak an nih.  Ei ramah sin a tam leia an in le lo, an ram maksana Manipur­a hung an nih.
    
Mani ram (state) maksana Manipur­a Kuli sin thawa bul hung intan Mahajon iengzat am an um ta ding? Ngaituo tham tak a tling a nih. Churachandpur town sunga ngei khawm Kuli sinthawa bul hung intan Mahajon lien ni ta an inkat nuk el ta a nih. Nisienlakhawm kuli sin chu Manipur mihai chun tuchen hin thaw ding tinah  khawm ei la tin nawh. Kuli sin hi inzapui a, thaw ding tina ei tin da el niin an lang. Kulihai ku hin ei ram pawisa a nuoitel thla tinin an ram tieng an thawn a, an nau le tehai lekhathiem tak tak, officer lien tak tak an nei bakah an ramah building tha tak tak an  bawl tawl ta a nih. Babu le sap an mi ti dam hi lawma innui elna ding a ni nawh. Ei chunga leng anni tawl ta ti hi hriet ding a nih.
    
Vaihai thaw thei le thaw nuom po po sin hi Manipur mi han thaw pein thaw inla chu Vai  ei tihai hi Manipur tlangram kilkhawr tak le ramnelumlo a hin an hung ring a um nawh.  Vaihai thaw nuom ang sin insang le sin inhnuoi hai hi thaw nuom vawng inla tulaia Manipur  buoina tak ILPS ei ti khawm hi tul kher naw nih.   Vai iemanizat  that, vau le hnawt dawkin an um ta a, sienkhawm Manipur an suoksan nuom chuong nawh. A san ding awma inlang chu an ram tieng nekin pawisa hmusuokna, fak hmuna le sin a tam lei a ni ring a um.
            
Zohnathlak le a ram neitu taka insal  Chalrang ei tihai hin chawngpu lungril ei put a, sin hrim hrim inzapui le thaw rin nei lova ei um pha pha Vai ei tihai ku hi Manipura hin hung nuom tanaw nihai.  Sin thaw ding a um naw chun Manipur­ah an hungna ding san a um nawh. Chun, Vaihai thaw thei po po ei thaw thei ve a tul.  Chuong a ninaw chun Vai hi ei ramah an umzing a tul. Sumdawngna hlak anni control a ni a, Vai mahajon lien hai hin mi maksan vawng tahai sienla chu ei ramah thil man to le kaisang dan ding hi hrilin a siek nawh.


Post a Comment

Powered by Blogger.