Parbung, Feb. 6, 2018, Virthli (ONP): Parbung Sieli Association(PSA) in “Inthuruola Inchawimawituo’n Hmatieng Pan ei tiu” ti thupui hmanga a huoihawt -The 2nd Bungkhawpui Awitu 2018-Cum - (L) Pu Hmingchawithang Night chu  Feb. 5, 2018 zan dar 6;30 PM khan Parbung Community Hall ah Rev. Chawngrosiem in tawngtainain hawngna neiin Opening Ceremony ropui takin nei a nih. Hun hmangna hi Tv. Muona Infimate le Nk. Linda Khawbung han hnesaw takin an keithouia, Chief Guest le Guest of Honour in Dr.Lalmalsawm, MO, Parbung CHC le Tv.Lalchunghnung Songate Pharmacist, Parbung CHC hai an thang.

Hi huna hin Parbung VA , Parbung Val-Upa  le Khuollien hai anthawk thu tha tak tak ngaithlak a ni a, Nk. Thangneichawng, Convener, PSA in lawmlutna thucha hrilna hun a hmang zoin  Bungkhawpui Awitu 2018 a  Contestant mi 20 han 1st Audition Round fethleng ngei tumin an rawl mawina le an theina popo suoin hla ngainuom um tak tak sakna an nei. Bungkhawpui Awitu 2018 a hin Judge in Pu Hrangkaithang, Pi Grace Lalhmangai le Tv Simon Barjohn hai thang a nih.

Bungkhawpui Awitu hi Pu Sumlamrawn Hmar in a sangnu a ngai em em famtah (L) Nk. Ramsiempui hrietzingna dinga a sponser hlak a ni a, Pu Sumlamrawn Hmar a sung-le-kuo hai anthawk thuhril ngaithlak a ni a, PSA Convener- Nk. Thangneichawng in (L) Nk. Ramsiempui a phuok khum “Ngailai Ramsiempui” ti hla Nk. Hrangzahnieng in thiem le mawi em em in sakna a nei. Hi huna hin December 30, 2017 a muol lo liem tah – Veteran artiste (L) Pu Hmingchawithang a sungha’n thuhrilna hun an hmang ve. (L)  Pu Hmingchawithang hi Group ‘A’ Artiste niin AIR Aizawl le Imphal a hai hla tam tak lo khum ta le Album khawm Vol-III hai chen lo siem ta a nih.


Bungkhawpui Awitu 2018 hawngna hunser hmang huna hin hun kar lakah Parbung khuosuok hlaphuok thiem le hlasak thiem lo fam tah hai- (L) Pu Laltlansang Songate ‘Ei Chung Siar’, ‘Chung Sawrthlapui’ phuoktu , A rawl mi run nat leia Paul Anka tia ko hiel -(L) Pu Pawlsiemlien a hla hai, Pu Lalramthang Mihriemate ‘Kei anga mihang Zun’ le Pi Nghakkhawhnem ‘ hai hla phuok Parbung khuosunga Artiste han sakna an nei a, hun hlimum takel hmang a nih. Bungkhawipui Awitu 2018 2nd Audition Round chu hungtlung ding February 9, 2018 khin Parbung Community Hall ah  dar 6:00PM hin nei ni nawk a tih.

Post a Comment

Powered by Blogger.