Responsive Ad Slot

Hmarkhawlien-ah khawtlang huopin bungheia tawngtaina nei

Tuesday, February 6, 2018

/ Posted by Simon L Infimate
Hmarkhawlien, Feb. 6, 2018, Virthli (ONP): Hmarkhawlien khawtlang le hnam harsatna leiin khawtlang mipui po po huopa bunghei tawngtaina Hmarkhawlien playground-ah nei a nih.
Hmarkhawlien Joint Organisation hran hran in 29 January, 2018 khan meeting an nei a, khawtlang huopin bungheia Tawngtaina nei dingin an rel a, a bawzuitu dingin Hmarkhawlien Joint Churches chu mawphurna pek an ni a. An mawphurna bawzuiin February 3 khan Foursquare biek-in programme hmang dan ding an induong a. Kohran tina inhriettirna siemin chanvo ruotna an nei bawk a nih.

Sunnitlaka bunghei tawngtaia thang ding hin Hmarkhawlien khawsung mipui chu zingtieng anthawkin Hmarkhawlien playground-ah an pungkhawm tan a. Wesleyan Methodist Church biek-ina Bible tiemsuokna fe mek khawm chu an chawl hri a. Zantieng dar 4:00 ah bunghei tawngtaina hun hmang zo a ni hnung hin an bible tiem an sunzawm nawk a.

Biek-in 16 umna Hmarkhawlien khawsung mipui bunghei tawngtaia Thang hai inthungna ding daw a ni naw a. Chanvo nei hai hun hmangna ding lecture stand pakhat an daw bakah thuhriltuhai hmang ding public address system an hmang bawk a.

Hun hi darkar tina Thuoitu inthlak a ni a. Zing dar 7: 00 am ah Pastor Zahninglo, Chairman, Hmarkhawien Joint Kristien Thalai Pawl in hun hawngna a nei zovin hun hmang tan a ni a. Darbi tina thuoituhai inthlakin rawngbawltuhai anthawk 20 min sung Gospel Message ngaithlak hlak a ni bawk a. Ruota an um angin Nk. Vangtharlawm, Upa Sanglien Pi Ramchullo haiin hla sakna hun an hmang bawk a. Nk Quilyn Lalrovel, Rev Thangngur Awardee anthawk khawmin Pathien hla ngaithlak a nih. Pastor Songrokhum, Pastor Vanlalhriet, Pastor Zokamlien, Pastor Lalzuimawi, Pastor Lalringmawi Lungtau, Rev. E Lallawmlien, Pastor Laldingliana le Pastor Sakhuolien hai Thuoina hnuoiah tawngtaina hun hi an hmang a. Thuoitu dinga ruota um hai lai ah Evan VL Rawna in a hun a hung hmang thei naw leiin a aiah Upa K Lalsamlien, Chairman, Hmarkhawlien Joint Churches Rev. Lallienthil Selate, Rev Timothy Lalzuimawi, Pu Gideon Lalthomlien, Rev Lalhninglo, Capt Lalthakimi, Rev Laldinglien le Rev Lalremthang haiin Gospel Message hrilna an nei a. Mipui pungkhawm hai hi pilvut chungah inthungin Tawngtaina hun an hmang a. A then dingthathuona Tawngtai an um bawk a. Ngir puma tawngtai khawm an um bawk a nih.


Hmarkhawlien playground ah khawtlang huopa bunghei tawngtaina hi a vawikhatna a ni a. Mi 400 vel an fekhawm a. A tawp takah Rev. Lalhuoplien in tawngtaina bawkin hun a suktawp a nih. (Input: THT)
Don't Miss
© all rights reserved
made with by Simon L Infimate