Hill Top School, Sielmat in Annual Day an hmang
CCPur: Khawpui risie in a sukbuoi phak lo Sielmat, CCPur a um Hill Top School chun zanikhan an school Campus-ah Annual Day an hmang.
    
Hill Top School hi kum 2011-a kha indin le hawng \an a ni a, Pi Lal-\hamawi, w/o Rev James Lalrobul, Administrator, Mount Carmel School, Muolvaiphei in a enkawl a nih.
    
Tuhin Play Group a inthawk Class IV chen a um ta a, students 300 vel an um ta bawk. Kum tin class pakhat upgrade pei a nih.
           
Pu (Rev) James Lalrobul le Pi Lal\hamawi hai hi education tieng chau ni lova hnam invawi em em le inpezo takel, an theina zawnga kut kei ngailo, ei chanchinbu ta dinga nu le pa an ni bawk a nih. Hmatieng hung in\hanglien peia, insang tak chen phak dingin ei Chanchinbu chun ditsakna an hlan.

DTO in Oct. thla sung motor 137 an registered
CCPur: District Transport Office (DTO), CCPur chun October, 2016 thla sung khan motor  137 an registered a, hi lai hin Truck (Heavy ) 2, Truck (LGV) 1, Bus 1, Auto 13, Van 2, Car 8, Jeep 4, two whelers 103, Maxi Cab 1 le Others 2 a \hang. October, 2016 thla sungin Revenue Rs. 8,16,223/- an hmu bawk.
    
Chun, April – October, 2016 inkar khan DTO CCPur Truck (Heavy) 3, Truck (LGV) 44, Bus 1, Auto 54, Van 23, Car 80, Jeep 27, Two wheeler 602, Maxi Cab 2 le Others 6 an registered a,  April-October, 2016 inkar sunga DTO CCPur in motor an registered chu  842 a tling phak a, hi hun sunga Revenue an hmu chu Rs. 53,38,465/- a nih.

A umna chin hriet lova inhmang inkhaihlum saa hmu
CCPur: November 1, 2016 (Thawleni) a inthawk a umna chin hriet lova inhmang Ms Chingmuan @Muanching w/o Langlam chu ZYA inrawinaa mipuiin ni 4 sung zet an zawng hnungin zanikhan Singngat le Sumchinvum khuo inkara Paldai vadung kamah inkhaihlum saa hmu a nih.
    
Ei thu dawngnain a hril danin Ms Muanching hi November 1, 2016 nia Bazar kai dinga In-a inthawka suok, In inlawi ta lova um niin a hril.

Free Medical camp sung mi 1663 en
CCPur:  Sielmat Christian Hospital & Research Centre, Sielmat, CCPur huoihawtna hnuoia October 31, 2016 a inthawk zani (Nov. 4, 2016) chen khan Sielmat Hospital campus-ah Free Medical Camp nei a ni a. Zanikhan damnaw mi 312 an inen a, ni 5 sunga damnaw inen chu mi 1663 an tling phak. Free Medical Camp sung hin Doctor thiem tak tak han natna dang dang nei hai an en a nih.

Annual Day –cum-Cultural Meet an hmang
CCPur: SSPP Residential School chun zanikhan an school campus-ah Annual Day-Cum-Cultural Meet an hmang. SSPP Residential School hin Ministry a inthawk kum 2 sung \hangpuina a hmu hnungin tuhin ministry a inthawk \hangpuina a hmu tanaw leiin harsatna tam tak kharah School Managing Committee, Headmistress le staff hai inpekzona le nu le pa le student hai \awng-\aina Pathienin a dawn leia la fepei thei a nih.

Restoration Convention
CCPur: November 5&6, 2016 sung hin YPA GHQ Hall, Hiangtam Lamka-ah Team Shillong huoihawtnain Restoration Convention um a tih. Hi takading hin Shillong-a inthawk Chinkhenthang, IAS (retd), Pastor Brian, T. John Simte hai an hung. CCPur khawpui sunga suolna le corruption nasa taka a hluor le inzawma Pathien thua intuoitharna a um theina dinga hi thil hi an buotsai tum a nih.  Kohran pawl bik um loa buotsai a ni leiin inhnikna nei taphawt \hang thei ning a tih.

DC CCPur in a vailiem ding; mi 300 chuong an in  zieklut
CCPur: November 5, 2016 (vawisun)a Imphal hmuna Khuman Lampak Main Stadium hmunah  Grand Free Hearing Aids Distribution function a um ding a ni a. Hi taka Churachandpur District-a inthawk hearing Aids dawngtu ding (beneficiaries) hai chu vawituk 6:00AM hin Pu Lunminthang Haokip, IAS, DC/ Chairman, DHS in Youth Hostel a inthawk vailiem a tih. Churachandpur district hmun hran hrana inthawka beneficiaries mi 300 chuong in hming an peklut tah. Grand  Hearing Aid distribution function huna hin mi 6000 chuong kuomah hearing aids a thlawna sem tum a ni a, world rerord siem tum a nih. Beneficiaries hai hi Bus 10, official motor 3 le Ambulance 1 a chuongin Imphal pan an tih. Hi programme ding lei hin state sawrkar chun Nov. 5, 2016 hi State holiday in a puong a nih. (with input from Lalhmangai)

Behiang line bus vailiem
CCPur:  Behiang Line Mini Bus (FORCE) 17 seater daily service chu zani zingkar 8:30AM khan bieltu 24-Singngat MDC M. Hausuanthang in a vailiem a, Pastor Muankhup, BCM in \awng\ainain an hlan. Behiang area mipui harsatna ngaimawna leia Liansuahngam @ Lianboi s/o Rangpu, Tangnuam in Bus hi Guwahati hmuna an chawk a nih.

Essay & Painting Competition
CCPur:  Nation-Wide Campaign on “Rastriya Ekta Saptah” le inzawmin November 5, 2016, 11AM hin Phungkhothang H/S, CCPur hmuna Essay, Creative slogan, story writing le painting competition um a tih. Story writing a hin Clas IX & X, Painting ah Elementary Class VI-VIII le secondary (Class IX-X) hai \hang an tih.

National Sports University indinna dinga rawtna hmun hi hmun \ha leremchang  a ni nawh: Vijay Goel
Imphal: Union Youth Affairs and Sports Minister (Independent Charge) Vijay Goel chu zanikhan Imphal-ah a hung inzin. Imphal a hungtlung hnungin Manipur Chief Minister O.Ibobi Singh leh Imphal suoksanin National Sports University indinna dinga Manipur sawrkarin a rawtna hmun 44-Yaithibi Loukol, Thoubal District an pan a, a hmun ngeiah an va enfel.
    
Union Youth Affairs and Sports Minister Vijay Goel le  CM O.Ibobi Singh hai hi Wangjing Tentha A/C MLA, Paonam Brojen Singh, Manipur Chief Secretary O. Nabakishore le State Government Officials han an va \awiawm.
    
Vijay Goel Yaithibi Loukol a inthawk hung kira, Imphal a hungtlung hnungin BJP Manipur Pradesh Office, Imphal-ah Chanchinbumihai an hmupui a, hieng thu hai hi a hril:
      
National Sports Univeristy indinna dinga Manipur sawrkarin hmun a rawtna hi an dam bakah an hnuoi a, hmun buoi, a ram neitu han an phal nawna hmun a ni a, law & order  thua harsatna le security chungchanga buoina hung suok theina ding hmun a ni leiin National Sports University indinna dinga hmun \ha le rem a ni nawh. Hmun \ha le remchang lem zawng a \ul ding niin an lang. Engineers le Technical team han an la enfel \ul a tih. Hi University indin le bawlna hmun zawng le ruot chu State sawrkar mawphurna a nih tihai a hril.
    
National Sports University bawlna ding hmuna rawtna hmun hi Lamphel Area, Imphal West District a National Institute of Technology (NIT) bawlna neka hmun insang lem, building bawlna dinga \ha lema ngai a nih tiin CM O.Ibobi Singh chun Vijay Goel kuomah hin hrilfiena a siem a, sienkhawm Vijay Goel ngaidan le \ha tizawng chu niin an lang nawh.
    
Wangjing Tentha A/C le Khangabok A/C mipui chun Union Youth Affairs and Sports Minister Vijay Goel hi Khongjom Bazar-ah hlim le lawm takin an lo hmuok a, Paonam Brojen Singh, MLA fe thlengin Memorandum an lo pek. An memorandum a chun, National Sports University hi an hmatienga indin dinga an ngenna le National Sports University indinna hmun dinga riruonga um hi hmun danga sawn  dinga thlutlukna siem lo hram dinga an ngenna thu hai an zieklang.
           
Hieng laizing hin Yaithibi Loukol-a National Sports University indin ding ditnaw pawl chun Union Youth Affairs and Sports Minister le a hnungzuituhai hi lo dangchat a, an thiltum inhlawsamtir tumin zani dar 9 vel khan mipuiin Sora hmuna lampui an hraw a. Nisienlakhawm Thoubal Police han an lo dang a, Sora area bak fe pel thei loin an dangchat. Mipui hnawtdarna dingin Police han tear gas an kap khum leiin lampui lo dangtuhai laia \hang mi 20 velin hliemna an tuok bakah Rifleman pakhat a hliem. Rifleman hi Saihlia per hliem nia hril a nih.

Environment, Forest & Climate Change team in Loktak Dil an hung enfel ding
Imphal: Ministry of Environment, Forest and Climate Change team  hai chu  November 7-9, 2016 inkar sung khin Manipur-ah hung inzin an ta, Loktak Lake venghim le enkawl dan ding thuah State sawrkar, concern agencies le stakeholders hai meeting neipui an tih tiin Press Information Bureau (PIB), Govt. of India thusuok chun a hril.
    
Ministry team chun Central le state sawrkar in financial assistance a pek hai hmanga Loktak Lake venghim le enkawlna dan ennawnna, Loktak Lake (Dil) vawnghimna dinga  thaw \ul, Loktak Lake  ‘UNESCO World Heritage Site’ a puong a ni theina dinga thaw \ul hai, Loktak Lake in khuolzinmi tamlem a hip theina dinga thil \ul  hai enfel an tih. 
    
Ministry team hung ding hai hin November 15, 2016 chenin Ministry-a report pelut dinga inhriettir an nih tiin PIB, Govt. of India thusuok chun a hril.

Ennnawn le action lak ding
Imphal:  Manipur-a Congress sawrkarin Department tum tum hnuoia thawk ding sin lakna a nei mek Finance Concurrance a lak a, dan kala a thaw am ti hai chu BJP an hung sawrkar huna ennawn ning a ta, dankala sin hi lak a lo ni chun a suksuoltu le mawphurtuhai chungah action lak a la hung ni ding a nih tiin K. Bhabananda, President, BJP Manipur Pradesh chun zanikhan a hril.

Aadhaar boin online Scholarship apply thei
Imphal:  Directorate of Minorities and Other Backward Classes, Govt. of Manipur in Nov. 3, 2016 nia notification an suo dungzuiin Ministry of Minority Affairs, Govt. of India in a hung inhriettir dungzuiin National Scholarship Portal (NSP 2.0) hnuoia Minority Pre-Matric, Minority Post-Matric and Minority MCM scholarships: 2016-17 chu Aadhaar Number/Card \hang lo khawmin online application peklut thei ning a tih. Online Application peklut thei hun hi November 30, 2016 chena dinga (fresh & renewal) hun suksei a ni bawk a nih.
    
Online Application hi www.scholarships.gov.in annawleh Ministry website www.minorityaffairs.gov.in fethlenga peklut thei ning a tih. Ministry thusuok dungzuiin National Scholarship Portal (NSP 2.0) fethlenga online application pelut students hai chu Aadhaar number/Card an neinaw leiin hnawl thei ni naw nihai ti a nih. Thu chieng lem MOBC, Manpur Office annawleh mail:mobc-scholarships@googlegroups.com ah kan thei ning a tih.

Blocakde sunzawm pei a ni ding: ATSUM
Imphal: October 28, 2016 a inthawka \an National Highway haia economic blockade chu Manipur University a admission reservation thubuoi chingfel a ni hmakhat a la fe pei ding  a nih tiin All Tribal Students Union Manipur (ATSUM) thusuok chun a hril. UNC in bandh le economic blockade an thaw chu a hran a ni a, ATSUM in a thlawp naw a, a dem bawk nawh tiin ATSUm thusuok chun a hril.

VAWISUN THUPUI
Mihriem inhriettirna hman ei pawm chun Pathien inhriettirna chu a ropui lem si a; Pathien inhriettirna chu  hihi a nih, “ A Naupa chanchin an hriettir tah,” ti hi a ni si a.
- 1 John 5:9

Editorial: Helicopter Service

October 3, 2016 a Manipur sawrkar, sawrkar thlungpui le Airport Authority of India han Manipur Chief Minister Office a Helicopter service ei state sunga a hung um theina dinga Regional Connectivity Scheme (RCS) chungthua Memorandum of Understanding (MoU) an ziek thei ta hi  mipui ta ding chun thu lawmum le thil \ha takel a nih. Sawrkar ta ding khawma achievement ropui tak pakhat a hung ni ding a nih. Hi memorandum of Understanding hi a thu chau ni lovin an hmatiengin a takngeia sukpuitling hung ni ngei sienla lawmum zuol a tih. MoU inzaum hung ni ngei bawk sienla nuom a um. Sawrkar hin MoU, agreement le accord tihai hi a ziek rawn ta hle a,sienkhawm a taka sukpuitling a ni vawng ngainaw leiin mipui lungril a sukhnuol pha hlak. Mipui lungril sukhnuoltu ding MoU hung ninaw hram sienla nuom a um.
    
Ei state hi a lien lem tlangram  a ni a. Motor  lampui le leilak hai a \ha tawk naw a, fur hun laiin mimkei rapthlak tak tak a um hlak bakah bandh, general strike, total  shutdown, public curfew le economic blockade tihai  inzing uta a um hlak leiin ei state mipui chun hiengang  thil a tlung hun haia hin harsatna nasa tak ei tuok hlak a nih. Helicopter service hi ei dit el chau ni lovin ei mamaw ngawi ngawi el a nih. Vuongna a infepawna a \hat tawk naw leiin Manipur mipuihai hin thil tum tum haiah harsatna  chi tum tum ei tuok hlak. Helicopter service a hung um thei chun ei harsatna chi tum tum hai hi hlipkiengin a hung um thei ngei beisei a um.
    
Ei state ah bandh, general strike le total shutdown inzinguta a um hlak leiin sin zawng, lekha inchuk, sumdawngtu, emergency thil, natna, thina le thil dang dang haiah ei fe tumna fe thei lo le a hun taka ei tlung thei ngai naw leiin chan annawleh inhmang pha hi ei hau ta hle. Sin zawng tam takin exam le interview hun an nang naw leiin an sin hmu ding an chan pha ta a, student admission thaw ding han an seat hmu ding an chan pha ta hlak bawk. Sumdawngtu tam takin a hun taka an tlungna ding hmun an tlung thei naw leiin an sum hmu ding an chan pha el bakah an sumdawngnaah an hlawsam pha el bakah sumdawngnaah an hlawsam pha hlak. Hienghai chau hi ni lovin damnawna le thina chungchang haia khawm fena ding le tlingna ding hmun a hun taka tlung hman naw leiin harsatna ei tuok rawp hlak a nih.
    
Sawrkarin riruong a siem dan chun Helicopter service hi Imphal-Moreh, Imphal-Thanlon, Imphal-Parbung, Imphal-Jiribam, Imphal-Silchar le Imphal-Dimapur inkar hai nia hril a ni a. Helicopter service hi \an a ni ding chun a huntawk naw hle ding niin an lang. Hi lei hin sawrkarin hi thil hi ennawn sienla, Imphal le Aizawl inkarah khawm Helicopter service hi infetir ngei ngei sienla nuom a um. Imphal-Silchar inkar ti lova chun Imphal-Aizawl inkara inzin nuom passenger an tam tak ring a um. Sawrkar ta ding khawma inhmangna um naw ni a, sum tam tak a hmu phana a ni lem ngei ring a um. Imphal-Aizawl inkarah hin Air India le private Airlines danghai direct in an service tanaw leiin, Vuongnaa Aizawl pan ding chun Guwahati  zu tlung hmasak phawt a \ul ta leiin inzinmihai ta dingin harsatna nasa tak an tlun pha ta a nih. Imphal-Aizawl direct flight hi sunzawm nawk a ni tanaw ding si chun Imphal-Aizawl inkara Helicopter service hi in\hangsatir ni ngei ngei sienla nuom a um.
    
Pawan Hans Limited le mimala \hahnemngai \henkhatin Churachandpur le Aizawl inkara Helicopter service a um theina dingin hma an lak ti thu hril le hrietin a um a. Hi thil khawm hi thu \ha, Churachandpur district a chenghai ta ding chun chanchin lawmum a nih. Hi hmalakna hi a hung hlawtling ngei theina dingin Churachandpur District mipuihai khawmin thlawp ve inla, ei theina sengah hma la inla nuom a um. Ei ditzie le ei mamaw dan hi Pawan Hans Limited kuomah mipui khawmin intlun ve inla hma latuhai \hangpuitu a hung ni ngei ring a um.
           

Helicopter Service hung um \an thei dinga an lang hi lawm a um el bakah ei ram hmasawnna pakhat a hung ni ve ding a nih. Amiruokchu, Helicopter service hi milien le milal, mi hausa, sumdawngtu le Govt. official hai chau sawr \angkai le hlawkpui ding ni lovin, mi naran le mi pasie hai khawma an hmang \angkai ve ngei theina dingin Helicopter service chuongman  hi a tlawm thei dan ding ang takin sawrkarin rem hung ruot thei ngei sienla nuom a um hle. Mi po po huopzo le hmang \angkai thei ding Helicopter service hi ei ram le a mipui han ei mamaw a nih. Sawrkarin hi thil hi hung ngaipawimaw ngei sienla ti chu mipui dit dan a ni ngei ring a um.




Post a Comment

Powered by Blogger.