Imphal/CCPur, Virthli (ONP): November 5, 2016 zantieng dar 2-5pm inkara GM Hall, Imphal hmuna Manipur Idol 2016 Stage Round a chun 'Rocker Lânu' tia ei hrietlâr Platinum Star ni bawk Nk. Christina Shakum chu a thaw țha hle niin thu ei dawng. Manipur Idol Season 1 hi thla hmasak Changer (October) khan District Headquarters tinah țan niin vawisun hin Top 16 thlangsuok an nih. Nk. Christina Shakum khawm vawisuna Stage Round a hin a thaw țha hle a, Top Performance a hmu phâk hiel anih. Ama hi a hriltlang met leia practice tiengpang khawm ansûm a țul pha hiel ti thu ei dawng lai zingin performance țha tawk tak a pek thei hi lawmpui a um hle. Hi huna hin zakuofuol pawl mawitak hain "Blue Kentucky Girl" ti hla a sak a, mipui anawi hne hle leiin Top Performer a kai pha hiel anih.
Hi programme hi Imphal khawpui sunga umhai entheiin ISTV ah live a pek a nih a, a hmun ngei ah abikin eini mi Imphal a um haiin an uop țha hle a, hienghai lai hin Upa Laldawnlien Varte Gen. President, HYA Gen. Hqrs. hai sungkuo le Pi Thangțhatling President, HYA Jt. Hqr., Imphal le țhuoitu le mi dang dang an țhang a, HSA Imphal Jt. Hqr. Members tamtawktak an fekhawm bawk. Hi huna hin Contestant mi 16 laiah mi 2 an tla (drop) a nih. November 12, (Inrinni) hin Battle Round nei ning a ta, hi huna hin a kawp kawpa insiemin kawp khata a thiemnaw lem lem chu thaibo an ni ta ding a nih. Ei thuneina ninaw sienlakhawm Manipur Idol 2016 hung ni thei ngei dingin Nk. Christina Shakum hi hmatieng ah ditsakna insangtak ei inhlan.
Next Round-a an thuomna ding hi Pi Thangthatling, President, HYA JHQ, Imphal in a tum/sponsor ding a nih. A sponsor ve nuom hai ta dingin kawt lientak hawng a nih.
-LRS Puruolte
