Aizawl, September 2, 2016, Virthli (ONP): Kum 63 mi Upa Pu Lalringlien (Ringa), Mauchar, Aizawl district chu zani Ningani khan a makpa le ram vâka fe chu tu ti hriet loin silaiin an kapa, Pu Ringa hi a hmunah a thi nghal a nih. (www.virthli.in)

Mauchar anthawka thu ei dawng danin Pu Ringa hi a makpa Hmingthangsang leh zani khan an châng kam ve dingin ramah an fea, châng pakhatna an tlung chun Pu Ringa hin va vein a makpa Hmingthangsang hin a sak tieng, muol hranah châng dang a lo hang ve thunga. An inthe sawtnawte hnungah Pu Ringa umna tieng silai ri a makpa Hmingthangsang chun a hrieta, vawithum lai vel a ko khawma an hawi naw phing leh a hmunah enfie dinga a zu fe chu Pu Ringa hi a thisa’n a zu hmu tah a nih.

Pu Ringa hi a lu ah kap a nia, a bek changtieng silaimu hi a thlang a nih. A kaptu hi hrietchieng a ni nawa, sa a sawn leia kap am ti khawm iengkhawm hriet a ni nawh. Hienga Pu Ringa kap a ni phing hin a kaptu pa khawm hi an rel hmang dei ni dingin ei thulakna chun a hril.

Chuonga a tarpu pa thisa a zal a hmu phing chun a makpa Hmingthangsang chu thlalau taluo lei le ama khawm kap veng an ti ti inlau leiin ramhnuoi tieng a tlan hmanga Burma mi thingat hai bûk ah a zu tlan lût tawpa, thangko dingin mi pahni khuo tieng tir nghalin hi hnunga hin Pu Ringa ruong hi Mauchar khuo mi haiin an hung inhlawm a nih.

Pu Ringa ruong hi Sakawrdai police station ah postmortem dingin phur phei a nia, vawisun hin postmortem a nih. Hi inkapna hi police hai chun thil umzie an sui mek a nih.(www.virthli.in)

Post a Comment

Powered by Blogger.