Responsive Ad Slot

INTHLAK DANGLAM… EI HNAM TA DINGIN CHANNA NING A TIHHMABAK SUNZAWM PEI DINGIN THANG LAK A TUL.

Friday, September 2, 2016

/ Published by VIRTHLI
INTHLAK DANGLAM… EI HNAM TA
DINGIN CHANNA NING A TIHHMABAK SUNZAWM
PEI DINGIN THANG LAK A TUL.
(Prof. Dr.Lal Dena lekha insuo dawnletna)
-L.R.Infimate

Prof. Dr. Laldena’n May 25, 2016a lekha insuoa, Tipaimukh biel, Vangai biel, Churachandpur le Haflong biel chena a thedar ka lo tiem vea. Hmar mithiem vawrtawp tia ka lo ngaisang em em hlakin hieng ang thil invet thlak tak lekha hi a ma ziek ni thei dingin ka ring naw hrim hrima. Midang tu in-amani a ziek pek ni dingin ka ring lema. Asan chu, ei ram Tipaimukh biela inzina a sir kuol hmel ka hriet si nawha, midangin an ziekpek annawleh a ringthua a ziek ding hlak chun ziek huoisen ka ti bawk si.

Thudik le thil umzie ka hriet vehai tlawm-a-zawng hang hril ve’ng ka ti ie-
1.“Mi ramahai chu lamlien Blacktopin a sun zeizuoi…..ei pasietna hi a nasain ei khawsakna a van hnuoi thlawr thlawr ta de aw” a ti hi ka pawm nawh. Ei ram a ti hi khawlai am a nia ? Manipur mipuihai ta dinga hringna lampui(Life line) NH-37 Imphal-Jiri Road, Lamlien kumtluona sie taluo zing, Motor/Truct nitin deuthawa 200/400lai tlan hlakna, Chir-hak le tui intlingna, a chang pova motor intang zing el hlak, repair ngai zing zing hi a mani, Hmarkhawlien le Fulertol inkar NH-lamlien Lawi inbuolna ang ela chir-hak le tuihawk intling kumkhuo le Silchar lampui sie taluohai hi a zu hmu hlak am ? annawleh Imphal khawpui sung –Hmarhai le Tribalhai chengna bik Lamphel-Langol-New Lambulane-Game village lamlien sie taluohai dam ? Churachandpur biel Hmarhai chengna ama khuo Saidan road dam, Muolvaiphei-Saikot-Khopuibung-Muolbem-Thenmuol-Ngurte road se taluohai dam hi a ngaituo hlak dim !! Churachandpur-Tipaimukh road a tina a ni ka ringa. Ei hril khawpui sunghai hman hieng ang hi a ni chun ei Tipaimukh biel ram kilkhawr chu a nam dawk dawk bik naw chu mak ti dal ei ta. Ka hriet dan, lo hre ve sienla ka nuom chu- NH lamlien hi Central sawrkar thu hnuoia BROhaiin an siem a nia, Manipur sawrkarin mawphurna a lak phak nawh. Iengpo khawm nisien, Lamlien siem ding chun a bula inthawka siema, sunzawmpeia, a tawp tieng a nuhnungah an siem phak chau hlak a ni hrima. Churachandpura inthawka tanin BRO/BRTF haiin an sunzawm peia. Tuhin kum tam fet an thaw hnungah Km. 0-185 (Thanlon A/C sung) chen an tlung phak ta a. Tipaimukh A/C sung an tlungna ding Kms.30 vel a la bak na hmunah sum Central sawrkar (Ministry of Rd. Transport & Highways, Govt. of India)in a la hung pek(sanction) thei naw leiin sin la sunzawm lo a niha. Tuhin BRO/BRTF haiin Km.185 – Km.235 (Km.50 ) sung siemna ding sum Central Govt. ah an hnawt mek a nih. A hmawr tienga um ei ni leiin thaw nuhnung ei chang hi ei vangduoina a ngai chu ni el ta nawnim. An la siem sunzawmpei tho dingah ngai ei ta.

2. NH-150 nihlak NH-2 a thlak tihi ka hriet ve dan chun a ngaisaktu thatnawleia ei Tipaimukh biel sung chau a hming thleng nilovin, Kohima-Jesami-Ukhrul-Imphal-CCpur-Tipaimukh - Aizawl Rd. NH-150 ti hlak khah, Aizawl ‘0’ pointa intanin Aizawl-Tipmukh-CCpur-Imphal-Dimapur fepei hi Administrative convenience ang dungzuia NH-2 tiin a thlak a nih. Ministry in a remchang ang peiin NH hming chu a thlengin an buk hlak hrima. NH-2 intanna chu Kolkata-Delhi a nih.

Prof. Laldena hin ei lamlien siemthatna dinga thahnemngai a ni chun Delhi a thuneituhai kuomah lekha ziekin vawikhat bek a thawn ta dim chu aw ? BROhai an biekpui ta am ? Chunekhmanin ei representative MLA, MDChai hmalak dan a hriet dim, thurawn vawikhat bek a pek ta am ?. Mihai sawisel ve ding ni inla ama Pu Lal Dena khawm Manipur Universitya kum 30 chuong zet Prof. sin lo chel ta chun Hmar Student Universitya admission chang zolohai a lo admit vawng thei hlak am leh !! Ei ram le hnam chuong ang lawma a hung invawi ta chu lawm a um. Candidate pakhat ta dinga vote zawngpuia Parbung khuoa a lecturelai tumani in Tipaimukh biela ram le hnam i hung hmangai ding leh i nu le pa……. chengna le i seilienna Saidan khuo hang hmangai hmasa phawt rawh tia a lo khek khum an ti kha ka hriet suok vawng vawng el.

3. Manipur sawrkar thuneina hnuoia um Lamlien siemna chu Tipaimukh biel sungah MLA mi 2 an insawk hlak a tihai Pu Dr.Chalton le Pu Sanglurhai hun sung khan Vangaitlangdung Motor hmel la hmungailona bielah motor a tlan zut zut ta a, Tuolbung khuo, Rawl kawkara ke a fena lampui, Motor tlung dinga ring phaklona khuodam Motor tlan tlungin an lo hmasuok Aithing, Hmarcha, Bu le bal, Thing-at le Bufai an tawl lutin an tawl suok zut zut el tahai le Pherzawl le Leisen khuo kara thingtum Truct motora an phursuok tuk tukna lamhai dam hi an hmalakna, ei ram hmasawnna a ni naw am a ni ?

4.“ei pasietna an sangin ei khawsakna an hnuoi thlawr thlawr” a ti khawmhi ka pawm nawh. Tuta hma a ei khawsakdan nekin tuhin ei khawsak an sang taluo tah. Nidanga ke ruoka ei fenahai kha tuhin Motor chi hran hran, Truct, Passenger motor, Bolero, Scorpio, Safari, DI motor, Gypsy, Car, Bike, Bull Dozer, JCB, Road Roller, Stone Crusher chenin ei ramah sin an thaw mup mup zing. Tulem hin chu Electrict ei beisei phaklo a Ban, a Hrui, a Khawlhai Parbung bielah le Vangai bielah a hung tlung remrum ta hi. Vangaitlangdung lem chu a var tan zing. Tipaimukh biel khawtinah TV, Video Player, Tape Record, Mobile phone a sipin a sip zak el ta haihi. Ei hausa hratin ei khawsak ei unau thenkhathai nek daiin an sang lem. Pu Lal Dena hin a mit-in hung hmu sien chu a lekha ziek hi an suo ngam ka ring der nawh.

5. Thanlawn biela Rangva mitamtakin an dawngna thu le Tipaimukh biel mipuihaiin an dawng tlawm lem thu a hung hril hi Pu Lal Dena hin asan a hrietnaw lei a ni reka. Thanlawn biela ei unau Paitehai, Unau Kukihai le inhriet thiemnawna lei le Paite le Meiteihai kara buoina leia mi tamtak In-le-Lo a kanga, mi tamtakin an hringna an chana, In-le-lo la kanglohai khawm khuo hluo ngam lovin ramhnuoiahai a then khawpui panin an tlandara. Chuongang raltlanhai thangpuina, Zangna dawmna dinga Central sawrkarin special package kum 2011 lai daia a hung sunction tah a nih a. Kei chu chuonganghai popo rimsikna le thlaphang-beidawngna tuora rangva-In ei ram mipuihaiin tam tak ei hmu nekin, chuong anghai chu tuok lova Rangva tamtak dawnglo ka thlang lem dai. Unauhai, nangni iengtin am in ngai ve a ? Chuong ang zat zat dawng phak naw inla khawm ei MLA pahni inthlak hlak a tihai hun sung khan mi a za-tel Rangva in an indawngtir ve tho an nawm.

6. Prof. Dr Lal Dena, hin Tipaimukh A/C a MLA incandidate tum mi pakhat a tan leia ei MLA lonitah pahnihai (Pu Chalton le Pu Sanglur) sin thaw zozaihai hmufu lova, ei ram le hnam harsatna, ei nina bak baka unau hnam dang, mi hmangai nawtuhai chen tiem thei dinga lekha zieka a tlangzar hin ei hnam le ram mawng a hlimna ah ka ngaia, tiemtuhaiin an hlawkpui duok ka ring bawk nawh. MLA lonita le nilai zinghai thurawn tha le infuina thu an ni hriet dingin vawikhat bek lo hril lem sien a tangkai lem dai ka ring. Mi thiltha thaw hrepek lova indem le inhrilsiet hi ei hnam nunphung a hawi tlat bawksi !!

7. Hratlai hun popo sawrkar sin thawa Pension raka hun lo hmangzo ta hnunga ram le hnam hmangai tan chauhai nek chun an hratlai huna Ram le hnam ta dinga inpehai mama hi kei chu ka ngaisang lema, kei ang bawkin mi tam takin ngaisang lem an ta, ditsak phu ti lem bawk an tih.

Chuleiin, Inthlak danglama mitharin a thara hma a put nek chun thawlai mekhaiin an sin hmabak an la sunzawm pei chu nang le kei le ei ram le hnam le mipuihai ta dingin tha lem dai a tih.
Don't Miss
© all rights reserved
made with by Simon L Infimate