Responsive Ad Slot

Hmasawnna Thar | 02 September, 2016

Friday, September 2, 2016

/ Published by VIRTHLI
Bethesda College of Nursing hawng a nih
­JOSEPH JOUTE,  Freelance Journalist.
CCPUR: Manipur hill district­a hmasatak ding, Bethesda College of Nursing (BCN), Independent Church of India project pakhat Muolvaiphei Rural Health and Research Centre (MRH & RC) hnuoia mi chu Sept. 1, 2016, 1:30PM khan Rev. ZathangsingZate, Executive Secretary and Secretary Development chun Pathien kuomah inhlânin a hawng.

Hawngna hunser hi Upa HT Vela­in a kei thuoi a. Rev Lalneikhup Hmar­in Opening Prayer neiin Ms Grace Rodingpui, Principal, BCN­in Welcome Address a hril a. Upa Dr HL Liensang, Chairman, Governing Board­in Report a pêk a. ICI Central Choir, BSN Choir le Nk Rebecca Darhmingmawi haia inthawkin hla ngaithlâk a ni bawk. Dr C.Lalbieksang, Vice­Chairman, in Vote of Thanks a hril zovin Rev. Lalramlawm Inbuon­in ruoi inhlânna a nei zovin ruoi ropui tak kîl tlâng a nih.

MRH & RC hnuoiah April 5, 1995 a inthawk khan Bethesda School of Nursing (BSN) seat 20 chauvin tan a lo nih a. Kum 2002 khan 30­a upgrade a ni a, 2004 khan seat 40­a upgraded nâwkin, tuchen hinNurse 707 an lo passed/graduate tah a. Foreign chen le India ram hmun hran hranah sin tha tak tak thawin an um tâwl tah, tiin chairman chun a hril.
 
“A compassionate soul reaching to the afflicted” ti thupui angin BSN hnuoia Nurse inchûkhai chun taksa le thlaraua rawngbawlna sunzawm peiin Churachandpur le hmun hran hrana mihai ta dinga malsâwmna an nih tung pei tah a nih.

Tuhin Indian Nursing Council (INC) hnuoiah Bethesda College of Nursing chu institution hran lieu dingin approved a hung nih nâwk tah a. Bachelor of Science (Nursing)inchûk theina ding seat 30 pêk a nih. Hawng tan ni hin B. Sc. (Nursing) inchûk dinghai khawm an lo um thap tah a. India rama chuh B. Sc (Nursing) inchûk theina man tlâwm pâwl tak, social service nei tha vieu bawk si a nih.

Upa Dr HL Liensang chun, “BSN le BCN hung pieng dân hih khawvêl thiemna le varnain a tlin leia pieng ni  lovin, Pathien lunginsietna le thatna zâra hnam tlâwm le hnuoihnung hai dawmkangna dinga Pathien indin niin an lang. Chuleiin, inchûkna man khawm hih hmun danga chuh kum khata nuoi khat nêka tlâwm a um nawh a. BCN­a hin chu sing kuo le ti met chauh a nih ding a nih” tiin a hril.

Thil mak ve tak chu, BCN hi khawvêl thiemna le fitness dân nih lovin, chung tienga inthawka ditsakna zâra tlinglo ding tlinga puong a nih theina dinga thil um hih a nih.  INC­a application pêkna ding thu ah hun inhnuk hnungin danglam takin application la pêklût thei a nih a. Indian Nursing Council (approve) na dinga Manipur Nursing Council recommendation thawna dinga evaluation ah Point 16 zet ah a fit naw vawnga chu, INC­in tribal­haidawmkângna ding a nih ti a hriet leiin, a hung approve tho a nih.

Hi lei hin admission ah khawm Manipur­a tribal hnam tum tum 12 hai chanvo (quota) siempêk seng an ni thu chairman chun a hril bawk. Khawvêla Nursing School, damnawhai enkawl chau ni lova Pathien hla saka rawngbâwltu Choir nei umsun a nih. Nursing School tamtakin taksa natna chauh an buoipui laiinBSN le BCN chun taksa le thlarau damna dinga râwngbâwlin inchûktirna a pêka, a danglamna a nih.

MRH & RC hih 1990s lai khan famtah Pu Daineikung Puidaite le Pi Sailienkim hai hmalâkna hnuoiah, Muolvaipheilalpa (chief) Upa Lalzarlien­in famtah Pu Buonglienkunghai in khêl meta ram hnuoi tlâng thut lai hmun lien tak a pêka inthawka hung intan a nih a. Tuhin chu hmun pawimaw tak, chêng vaibêlsie têl man, mi tamtak dinga thlarau le taksa damna hmun a hung ni tah a nih.

November thla chena document pelut dingin
CCPUR:Churachandpur District sunga National Food Security Act (NFSA) hnuoia hamthatna  dawng nuom hai chun tuta inthawk November, 2016 thla chen(sung) ngeia District Supply Officer (DSO), CCPur Office­ah document tul hai pelut dingin DSO, CCPur M. Ginzasuan chun inhriettirna a siem. Hi thila dinga document peklut tul hai chu Aadhar Card Xerox Copy; Income Certificate; Domicile Certiricate, Voter Identity Card, Mobile Number le Bank Account number hai an nih.

Khawnvartui man
CCPUR: Manipur Govt. Order No. 15/6/91­FCS(Pt­I), Dt. 21st July, 2016 dungzuia Khawnvartui (S.K.Oil) man sukpung a ni le inzawmin Khawnvartui man (selling price) chu September, 2016 a inthawk litre 1­ah Rs. 17/­ a bituk (fixed) a nih tiin Mr Lunminthang Haokip, IAS, DC, CCPur chun inhriettirna a siem.

August thla sung Malaria Positive 13
CCPUR: District Malaria Department chun August, 2016 thla sung khan damnaw mi 1953 hai thisen lain an enfel a. Hi laia 13 hai chu Malaria Positive an nih ti hmusuok an nih. Malaria positive hmusuoka um 13 hai laia 9 chu Malaria PF an nih.

Activa inrukhmang
CCPUR: August 31, 2016 khan Mr S. Letminthang of Happy Valley, Tuibong Activa MN02A­7707, Chasis No. NE4JF501BO1BD8077358 le Engine No. JF50E80076713  chu tu ti hrietlo rukru han an inrukhmang. S. Letminthang hi mithi rala a fenaa Activa hi lampui sira an nghat a nih. Police­ah report a pek a, Police han an suizui mek.

Inspire Award Conference ah ZEOs 11
CCPUR: August 29­30, 2016 inkar sung khan IIT Guwahati hmunah Inspire Award le inzawmin Conference nei a ni a, hi huna hin India hmarsak state haia inthawk le West Bengal le Orissa haia inthawk official hai an thang tawl a, Manipur­a inthawk khawmin ZEOs 11 an zu thang.

Inspire Award hi Department of Technology and Science le National Innovation Foundation­India in a buotsai a ni a. State tum tuma Schools haia Class VI­X inkar han Science and technology hmanga innovative ideas le hmasawnna an nei thei ding ditnaa Inspire Award hi thaw a ni a, online a registration thaw ding a ni a, tuchena hin CCPur district­a inthawk Schools 20 an in registered ta a, in register lo schools 165 an la um mek. In register nuom hai ta dingin ZEO CCPur fethlenga thaw thei zing a ni thu ZEO/CCPur chun a hril.

HI Prez. le Jt. Secy (Inf.& Media) hai an inzinsuok
CCPUR: September 3, 2016 a Silchar HSA Freshers Meet hmang ding le inzawma khuolliena thang dinga fiel a ni angin Pu Joseph Lalrothang, President, Hmar Inpui GHQ chun zanikhan Tuithaphai suoksanin Silchar, Assam a pan. Pu Joseph Lalrothang hi Hmar Inpui­a Jt. Secy (Inf& Media), le HT Special Correspondent le Virthli Admin ni bawk Tv. LRS Puruolte bakah EC member Pu Laltlanlien le Pu Sanhim Sanate, HYA GHQ hai khawmin an zui ve. A tul le pawimaw angin Assam ram sunga hmun tum tum khawm an hung sirkuol ding niin ei thu dawngna chun a hril.

SSDC hmalakna hma a sawn pei; Gazette Order insuo vat a nita beisei a nih
CCPUR: Saikot Sub Division Office Demand Committee (SDDC) hmalakna chu hma a sawn pei a, Gazette Order insuo tep a nita le inzawmin September 1, 2016 khan HYA Saikot Branch Office­ah emergency meeting neiin Manipur CM kuoma Memorandum peklut ding le Gazette Order zu lak ding chungthu an rel.

Demand area sunga motor nei po poin khawmawi/Ramthar lai Gazette Order latuhai lo tuoka Saikawt playground­ah Pathien kuoma inhlanna hunser tawite hmang dinga remti a ni bawk. Hi le inzawm hin sum le pai tam tak mamaw a ni leiin mimal thahnemngai thawlawm pe nuom hai ta dingin Mr. Lalramsiem Zote, Finance Secretary (9089866134) kuomah ienglai khawm pek thei ning a tih tiin SSDC chun zanikhan thusuok a siem. Programme hmang ding ni le hun hril thei la ninaw sienkhawm biel mipui : Village Authority, HYA, HSA, YMA, KSO, ZSF le a dang dang hai moral support pe dingin SSDC chun a ngen.

Manipur sawrkar chun Saikawt SDO area harsatna le SDO an pawimawna hriethiema Sept. 15, 2016 bo hma ngeiin SDO Posting order, Financial Concurrent cum full­fledged order insuo hman sien ti chu Committee nuom dan a ni a. Chun, Saikawt SDO biel pieng dan chanchin lekhabu a siem mek a ni a, documentation, infrastructure, socio­development etc. nasa taka sukhmasawnna dinga hmalak tung pei chu Committee thiltum a nih tiin SSDC thusuok chun a hril.

Chun, SSDC chun Committee hmalakna thlawptu (1)Hmar Inpui (2)Zomi Council (3) Mizo People Convention: Manipur (4) Vaiphei Peoples’ Council (5) Kuki Inpi,CCpur (6) Hmar National Union (Block No.5) hai supportna le Biel mipui inthuruolna, Political pressure petu Dr. H.T.Sangliana, Vice Chairman, Minority Affairs, Govt. of India, Honourable, Shri O Ibobi Singh, Dr. Chaltonlien Amo, Chairman, HAC, Govt. of Manipur. Bieltu MLA, TN Haokip, Bieltu MDC Lalhrillien le adang dang. Ziek tienga mi tangkai. Dr. Lalkhawlien Pulamte, L.Keivom, L.Ruoivel Pangamte, Prof. Lal Dena, Thangsawihmang, Elim RR Hmar, David L. Lung­tau, Student bodies: HSA, Churachandpur Jt. Hqrs & HSA Gen.Hqrs, HSA, Saikot Unit, KSO, CCpur, ZSF, CCPur, CDSU etc.  hai chunga lawmthu a hril a. Chairman Pu Timothy Z. Zote, Chairman, Saikot Sub Division Office Demand Committee­in Date 30 August, 2016 khan H. Balkrisna Singh, Under Secretary (Revenue), Govt. of Manipur kuoma inthawkin Saikot Sub Division Office umna dinga Order No. 30/3/2016­R chu Secretariat­a inthawk hung lain, hi le inzawm hin, J.C. Ramthanga,IAS, Principal Secretary, RD & PR, Govt. of Manipur, Saikot SDO area sunga dingin Block thar siem nghal dingin process a mi lo tan pek nghalna chungchangah Pu J.C.Ramthang a kuomah committee chun lawmthu a hril bawk.

Khawvel hriet a Manipuri Culture tarlangtu chu Manipuri Cinema a nih: O.Ibobi Singh
IMPHAL: Hun sawt takel khar a ni hnungin Paona Bazar, Imphal­a Usha Cinema Hall chu hawng nawk a ni tah. Hi huna hin CM O.Ibobi Singh, Manipur Assembly Speaker Th. Lokeshore Singh, Commerce & Industries, Vety & AH Minister Govindas Konthoujam; Works, CAF &PD minister Ksh. Biren; Meghachandra Ingbam, Director, I&PR le L. Surjakanta Sharma, Chairman, Film Forum Manipur hai khawm an thang.

Usha Cinema Hall hi kum 1961 a hawng tan, kum 1970 a inthawka film insuo tan le November, 2015 a inthawka khar lo nita a ni a, September 6, 2016 a inthawk a hma ang bawka film insuo tan nawk tum a nih.

Khawvel hriet le hmua Manipuri Culture tarlangtu chu Manipuri Cinema a ni a, hi lei hin ei culture le custom sukhmasawn le humhim ei mawphurna seng a nih. Manipur University of Culture hawng thara um hin ei state Culture hausa takel hi humhim le sukhmasawn a tum a, Manipur State Film & Television Institute hawng thara um leh khawm hma la tlang an tih. Social Reformation a ding khawmin Cinema hin mawphurna lien tak a nei a nih tiin CM O.Ibobi Singh in hi huna thu a hrilnaah a hril.

Ei rama Cinema Hall hai khara a um hi a pawi a, thil inzakum takel a ni bawk. Cinema film hin ei society­ah inthlakthlengna a siem thei a, hi lei hin ngaipawimaw  ding ei nih. Manipuri film haiah English sub­title sie sa a pawimaw dan le Hindi film insuo khap (ban) a hung ni chu pawi a ti thu hai a hril a. Hindi Film insuo khaptu helpawlhai khawm an khapna thupek chu ennawn nawk a, Hindi Film insuo phal ta dingin a ngen. Chun, Manipur film Policy zo tep a nih tiin a hril.

Manipur­ah Cinema Halls 58 a um hlak a, chu  hai laia 10 chu Imphal khawpui sunga um an nih. Tulai taka ei rama Cinema Hall­a khar lova Cinema lan suo zing chu 10 chau a ni tah. UNESCO dit dan chun mi 1000 umna peiah Cinema Hall a um ding ti a ni a. Hi dungzui chun a tlawmtakah Manipur­a Cinema Hall um ding zat chu 150 a nih tiin Meghachandra Kongbam chun a hril.

Vawisun Manipur Assembly Session tan ding
IMPHAL: 10th Manipur Legislative Assembly 14th Session chu vawisun 11AM hin Imphal­ah tan ning a ta, Sitting vawihni um a ta, Session sung hin Bills 3, DM College University Bill, 2016; Manipur Technical University Bill, 2016 le Manipur Higher Education Bill, 2016 hai putlut ning a ta, The Manipur Regulation of Non­Local Bill, 2016 ruok chu putlut ni tanaw nih tiin State sawrkar thusuok chun a hril. Sept. 3&4 hai Inrinni le Pathienni a ni leiin Sitting um naw ni a, Sept. 5, 2016 ah sitting um nawk a tih.

NAB in cass 38 an registered
IMPHAL: January, 2016­June, 2016 inkar sung khan Drugs le Smuggling le inzawmin Narcotics and Affairs of Border (NAB) chun cases 38 an registered a, Ganja 118.5 kgs; Heroin 1.364 kgs; Nitrosun (N­10) strips 8 le mum 466; Amphetamine mum 140; Cough Syrup cartons 18 le bottles 533; SP strips 298 le Capsules 15,333; Brown Sugar 96.6 grams; Bseudo­Epe mum 20,000; WY mum 2,575; Halontrec mum 20 le Drugs capsules 18 an man niin SP, NAB chun a hril.

Ramri buoina thua inbiekna
IMPHAL: September 5­7, 2016 inkar sung hin India le Myanmar sawrkar palai hai chun ramri buoina chungthuah Hyderabad khawpuiah inbiekna nei an tih tiin Ministry of External Affairs, Govt. of India thusuok chun a hril. Hi inbieknaa hin Manipur State sawrkar khawm fiel a ni a, State sawrkar chun palai tir a tum. Hi inbieknaa hin Survey of India palaihai khawm thang dinga fiel an nih.

Oil Feed Depot hawng ding
IMPHAL: Malom hmuna Rail Head ding bawl meka chun Oil Feed Deport hawng ning a ta, Oil Feed Deport hi November, 2016 vela zo le hawng theia a um beisei a nih. Hi Oil Feed Depot hawng a ni pha chun Petrol, Diesel le Khawnvartui haia ei harsatna a hung sawkzangkhai beisei a nih tiin IOC thusuok chun a hril.

AITU in an sinthaw chawlsana nuorna
IMPHAL: All India Trade Union (AITU) hnuoia thawktuhai chun vawisun hin Indai ram pumpui huopin an sinthaw chawlsana nuorna nei an tih. Hi nuorna hi Manipur­a AMTUC le AMGEO hnuoia thawktuhai khawma an zawm ve ding niin JAC, AMTUC & AMGEO thusuok chun a hril.

Regular Chief Justices neilo HC 6 an um
NEW DELHI: India rama chun tuhin regular Chief Justices (JC) nei lo 6 an um mek a, Judges post ruok 475 a um mek bawk. Tura regular Chief Justices neilo state hai chu­ Andhra Pradesh/Telangana, Kerala, Madhya Pradesh, Manipur, Sikkim le Tripura hai an nih. High Courts 24 hai Judges um ding zat sanction post chu 1079 a ni a, tuhin hieng high courts haia hin judges 601 an um mek a, 478 in a baksam mek.

Odisha in GST a pawmpui; President kuoma thawn thei a nita ding
BHUBANESWAR: Odisha state Assembly chun zanikhan Goods and Services Tax (GST) Constitutional Amendment Bill a pawmpui (ratify) ta leiin  tuchena GST bill pawmpui State umzat chu 16 a tling ta leiin President in pawmpuia suoi a thaw theina dingin President kuoma thawn thei a nit a ding a nih.

GST Bill hi Lok Sabha le Rajya Sabha haiah pass nita sienkhawm President in a pawmpui theina dingin India rama states 29 le UT 7 um laia states 50% bekin an pawmpui phawt a tul a, tuhin State 16 in an pawmpui ta leiin President kuoma a pawmpui dinga thawn thei a hung nit a ding a nih. Tuchena GST Bill pawmpui tah state hai chu­ Assam, Bihar, Chhaisgarh, Delhi,Goa, Gujarat, Haryana, Himachal Pradesh, Jharkhand, Madhya Pradesh, Mizoram, Maharashtra, Nagaland, Sikkim le Telengana hai an nih.

Subsidised LPG man sukpung
NEW DELHI: Sawrkar chun zanita inthawk khan thlaisuongna subsidised cooking gas (LPG) man cylinder pakhatah Rs. 2 peiin a sukpung. Tuta tum hi July thlaa inthawk Subsidised LPG man sukpunga a um vawithumna a ni tah. Hi dungzui hin Delhi­a chun 14.2 kg LPG cylinder man chu Rs. 426.06 hung ni tang a tih. A hma chun Rs. 423.09 a nih.  LPG man hi August 16, 2016 khan Rs. 1.93 a sukpung a lo ni ta bakah July 1, 2016 khan Rs. 1.98 a sukpung a nih.

Manipur enkaitu dingin Javadekar
NEW DELHI: Manipur Assembly Election hung um ding le inzawma Election chungchanga Manipur­a mawphurtu le enkaitu (incharge) dingin zani hmasa khan BJP National President, Amit Shah chun Union Human Resource Development Minister Prakash Javadekar a ruot. Chun, Uttarakhand a election tiengpang thil enkaitu le mawphurtu dingin Union Health & Family Welfare  Minister Dr J.P. Nadda le Union Petroleum minister Dharmendra Pradhan hai a ruot bawk. Manipur a MLA 60 umnaah BJP in MLA 2 le Uttarakhand a MLA 70 umnaa chun BJP in MLA 27 an nei mek a nih.

Petrol le Diesel man a kaisang
NEW DELHI: August 31, 2016 zanrila inthawk khan Petrol le Diesel man a kaisang. Petrol litre khatah Rs. 3.38 le Diesel litre khatah Rs. 2.67 in a kaisang. Thautui man kaisang dungzui hin New Delhi­ah Petrol litre khatah Rs. 63.47 a ni ta a, a hmain Rs. 50.27 a nih. Diesel chu litre khatah Rs. 52.94 a ni ta a, a hmain Rs. 50.27 a ni hlak. Imphal­a chun petrol litre khatah Rs. 61.61 le Diesel Rs. 51.57 a ni ta tiin ei thu dawngna chun a hril.

VAWISUN THUPUI
Tina thut chu ti naw la, Mi khawhlo suktitna  a hung pha khawm ti bawk  naw rawh. Lalpa chu i ringsan ning a ta, I ke chu lakhmangnaa inthawkin a veng ding a ni sih a. ­Thuvarhai 3:25­26

Editorial: Siemfawm harsatna

Hri le hrai lei dam, inlirthei eksiden lei dam, khuorel sietna lei dam, indona lei dam, hnam buoina lei dam, changsuol lei dam haia thina, hliemna, lusunna le harsatna chi tum tum ei tuok hlak hai hi ei nuom thua tlung le ei nuom thua ei tuok an ni nawh. Hi khawvela mihriemhai ei cheng sunga ei tuok ding khuonu lo rel sa an nih. Mihriem han pumpel tum inlakhawm ei pumpel thei  ruol ding a ni nawh. Mihriem thina lem hi chu ma thei lova mitin tuok ding a nih. Hieng thil hai po po hi mihriem siemfawm harsatna  an ni nawh a, khuonu rel leia tlung an ni lem. Khuonu rel leia  harsatna chi tum tum ei tuok hlak haia hman ieng ei hril thei naw laia siemfawm harsatna ei tuok hi chu thil pawi tak a nih.

Manipur a chun mihriem siemfawm harsatna hi a tlung rawp hlak a, a la hungtlung pei ding niin anlang. Bandh, Economic Blockade, general strike, Public curfew le total shutdown leia harsatna chi tum tum ei tuokhai hi siemfawm harsatna an nih. Hiengang harsatnahai hi midang le hnam danghai mi siem pek an ninaw a, Manipur mi indik takhai siemfawm harsatna an nih. Ei ni ngei siemfawm harsatna lei hin fak le dawn, lekha inchukna, sumdawngna le thil dang dang haiah hmasawn nekin hnungtawl ei ta, mihai hnung hnawtin ei la tlase pei ding chu a ni hi!

Bandh annawleh general strike thaw dinga puonglang tasa thula um nawk hlak hi lawm  um de sienkhawm harsatna hlipkiengtu chu a ninaw a, mi tam tak ta dinga harsatna intluntu a la ni tho tho hlak. Bandh ding leiin mimal le pawl tum tumin programme an lo induong tasa an thul pha a, chu hnunga bandh annawleh general strike thul nawk a hung ni hin harsatna nasa lem, sum le pai, tha le zung seng dabawlna a hung intlun hlak. Mihai laklaw tak le lungawpinkaiin a siem pha hlak. Hieng a ni lei hin bandh annawleh general strike thaw tumhai hrim hrimin an thilthaw tum mipui hriet dinga an puonglang hma ngeia ngunthluk tak le kiltin en le ngaituona neia thil anthaw hlak nuom a um. Hi thil khawm hi mihriem siemfawm harsatna tho a nih.

Manipur mihai laia inremnawna, inthuruolnawna, buoina le harsatna chi tum tum tlung hai khawm hi state  dang  le ramdanga mihai hunga an mi hung siem pek a ninaw a, a rammihai siem ma an nih. Sawrkar suksuol annawleh sawrkar siem harsatna hi um ve hlak sienkhawm harsatna ei tuokhai laia a tamlem hi chu ei ni siemfawm harsatna a nih ti inla ei hril suol ring a um nawh. Siemfawm harsatna hi ei tuorhla hle ta bakah sietpui khawm ei hau tah. Mani siemfawm harsatna hi ei la tuok pei ding niin an lang a, lungzing a sukum khawp el. Hi lei hin siemfawm harsatna hi insiem ta lo dinga ei ingaituona ei tuoi thar nuom a um hle.

Mimal, pawl le sawrkar thuneituhai khawm ni raw seh, thil thaw dinga thutlukna ei siem ding hin ngunthluk takin, kil hran hran ngaituo le hrut kuolin, titak zetin ngaituona seng hlak inla chu khuonu rel ni lo, mihriemhai siemfawm harsatna chi tum tum ei tuor tasa le ei la tuok dinghai lakah ei fihlim thei  ngei ring a um. Siemfawm harsatna hai hi ei thil ngen le nawr hmuna ding a ni chuong si naw leiin siemfawm harsatna hi siem lo hram hram dinga ei ngaituona ei hmang nuom a um.

A hmaa ei hril ta angin hri le hrai lei dam, indona lei dam, khuorel sietna lei dam, inlirthei eksiden lei dam, changsuol lei dam haia thina, hliemna le harsatna ei tuok hlak hai hi chu ei nuom thu le ei dit leia ei tuok an ni der nawh. Amiruokchu, mihriem siemfawm harsatna ei tuokhai hi chu ei hreit saa ei thaw le ei nuomna leia ei thaw a nina lai a um. Hi lei hin hi kawnga harsatna ei tuokna thuah hin chu sawrkar le midanghai van tum, va dem le va hrilsietna chi niin an lang nawh. Mipui harsatna siem zawnga nuorna le nawrna hai hi chu bansan thei inla nuom a um. A tha ding ti ei hriet a, ei thaw si naw chun a dawk ding chu ei ni tho ei nih.


Don't Miss
© all rights reserved
made with by Simon L Infimate