Aizawl, September 24, 2016, Virthli (ONP): Tv. Ngurrivung in a buotsai "Hnam Rolung 2015-2016 Rochunga Pudaite" ti lekhabu chu Rev. Lalhmunsang In, Ramhlun Venglai, Aizawl, Mizoram ah Rev. Lalhmunsang in Bible chang tiemin tlangzarna le Pathien kuoma inhlanna a nei.


Rev. Lalhmunsang chun "Ka Hringnun" Pu Rochung in a ziek leh a tekhi a, "Ka Hringnun" ti lekhabu a chuong naw iemnanizat tiem ding a um chu ropui le hlu a ti hle a. Pu Rochung a chanchin bak a hin Pu G.B. Niropui-in "Ei Hnam mawina chu" ti hla a phuok nasan le Pi Lalremsiem in "Hung ro Lalpa Kuomah" ti hla a phuok nasan hai ziek suoka um chu thil inchik tlak tak a ni thu a hril. Hienghai bak a hin ei hnam inthanglienna dinga pawimaw em em, "Thangtharhai le inchukna, Rebuilding Education System" ti Tv. Rothanglien Khawbung in a ziek chu tha a ti hle bawk. Tv. Ngurrivung chun Hnam Rolung 2015-2016 hi a hming "Rochunga Pudaite" ti chungchang hi January 2015 khan lekha thawn le phone a inthawkin Pu Rochung leh an inbiek a, ama remtina ngei a thaw a ni thu le a bikin ama chanchin hi ama ngeiin USA ah proof reading a thaw laiin Chatuon ram a mi lo inlawi san tah a nih, tiin a hril. Hi lekhabu tlangzar a um "Hnam Rolung 2015-2016 Rochunga Pudaite" hi Pu Rochunga Pudaite a thi champha October 10 ah zawr suok tan a ni ding thu le a man chu Rs. 80/- a ni ding thu Tv. Ngurrivung chun a hril. Tv. Ngurrivung hin Hnam Rolung ti lekhabu hi edition pali lai a lo buotsai tah a, chuonghai chu "Hnam Rolung 2012 Pu Thangngur", "Hnam Rolung 2013 Damlai Tuipui Chungah" (Rev. Thangngur a semron), "Hnam Rolung 2014 Ruonglevaisuo" le tuta mi hih an nih.



Post a Comment

Powered by Blogger.