Chavang Kut 2015 report bu tlangzar: Ginsuanhau a hung nawh
CCPUR: July 2, 2016, 11:00AM khan M. Songgel Community Hall­ah Celebration of Brotherhood Chavang Kut 2015 committee huoihawtnain ‘Chavang Kut 2015 (Celebration of Brotherhood) report bu official­a hawng a nih. Hi huna hin  P.S. Haokip, President, KNO in keynote address a hril a, Mr Lunminthang Haokip, IAS, DC, CCPur chun Ginsuanhau MLA aiawin khuolliena thangin report bu hi a tlangzar.



Chavang Kut report lekhabu hi Singngat MLA Ginsuanhau in Chief Guest­a thanga a hawng dinga ti a ni a, sienkhawm ama hung thang lovin telephone hmangin thucha point 3­ a hung thawn a, chuong hai chu ama aiawa a tir DC, CCPur in a tiemlang a, hieng a thucha hung thawn hai thuah iengkhawm hrietpuina a neinaw thu le a ieng le inzawm le tuma a hung thaw am ti khawm a hrietpuinaw thu a hril.

Thucha a hung thawn hai chu­T.N. Haokip, MLA, Saikawt le President, MPCC le T. Manga VAiphei han an nuom dan danin CCPur district an lut thei a, iengleia JAC (Against Anti­Tribal Bills) inrawinaa mipuiin ama an dodal am? President in Bills 3 a hnawl ta a, JAC­ATB inrawi mipui han ieng leia nuorna an la sunzawm am ti le Brotherhood Celebration committee hmalakna a lawmpui thu hai a nih.

P.S. Haokip chun, Manaseh thla han Israel ram thangin khawvel ram tum tum 20 a Pathien sukdamna thu hril dingin Pathienin vawisun hin a mi ko a nih. Naga hnam hi tlawmte chau an ni a, Kuki neka tlawm lem an ni a, North east a hnam lien 4 an um a, chuonghai chu Khasi, Jaintia, Garo le Kuki hai an nih tiin a hril.

Zanita hi hun hmangnaa khuollien dinga fiel Singngat MLA Ginsuanhau chu JAC in MLA an boycott hai laia thangve a ni leia nuhmei pawl han CCPur district a hung lut remti lovin Kangvai­ah an duty leiin a hung nawh. Hi lai hmuna Ginsuanhau hung ding lo dang tumtu Nuhmei pawl hai chun “Go back Ginsuanhau” ti inziekna banner Lampuiah an tar a nih.

HSA State Coordinating Comm. meeting hmasatak nei
CCPUR: Hmar Students’ Association (HSA) hnuoia indin thar State Coordinating Committee (SCC) meeting hmasatak zanikhan HSA Office, Rengkai, CCPur­ah SCC Coordinator Mr Lalrobul Pudaite le Secretary Malsawmthang Ralsun hai inrawinain nei a nih. Hi huna hin Jiri­Vangai, Imphal, CCPur le Hmarram Jt. Hqrts tina executives hai an thang a, resolutions iemanizat passed an passed. Tuta inthawk Organisation le inzawma state level issues hai chu State Coordination Committee in mawphurna a lak ta dingin an rel. Chun, HSA JHQ CCPur le KSO, CCPur han June 25, 2016 nia Joint Press Release an insuo chu an hrietpui thu zanita Asst. Gen. Secy, HSA GHQ in thusuok a siema chun an ziek.

Justice S. Serto lawmpuina
CCPUR: CCPur District Bar Association chun zani 11:00AM khan Khuga Dam, IB, CCPur­ah Justice S. Serto Kom, Justice Manipur High Court dinga ruot a ni lawmpuina hun an hamng. Hi huna hin Kimneinieng Shoute, Judge, Dist. & Session Court bakah Letkho Kipgen, Chief Judicial Magistrate hai khawmin an uop a, presentation le Memento an pek. Lawmpuina hun an hmang zo hin Justice S. Serto Kom chun Tuibong­a CJM le District & Session Court a va kan a, hi zo hin Imphal tieng a kir nawk.


Financial Literacy Awareness camp
CCPUR: Zani 11AM khan State Bank of India, Lead Bank Office, CCPur, Thoubal & Chandel hai huoihawtnain N. Lamka EBCC Dorcas Jubilee Guest House Mini Auditorium­ah  EBC worker hai ta dingin Financial Literacy Awareness camp nei a nih. Thangchinkhup Guite, AGM & DDM, NABARD/CCPur le Pauneihthang Valte, Chief Manager, SBI/CCpur  hai resource person in an thang.

Mr Guite chun, service nei han pension hnunga khawsakna ding sum inren thiem a pawimaw thu, bank fethlenga interest tlawmte te lo hmu tangkaina a hril bawk.

ZYO L.Block election
CCPUR: Zanikhan Zogal Memorial Hall Complex, Zouveng­ah kum 2016­19 sunga ZYO Lamka block thuoitu ding thlangna nei a ni a, President in  ML Thanghau, V. President in S. Paugenthang, Secretary in Stephen Lamzamuantang, Asst. Secy. in David Goukhanmuan, Fin. Secy. in Englian, Treasurer in Jamkhanthang, Secy. Inf&Publ. In Thathang, Secy. Art & Culture in Dr Robert Ginlungmang hai thlangtling an nih.

Retaining wall a suksiet
CCPUR: July 1, 2016 zantienga ruosur leia Chiengkon vadung tuilien khan retaining wall iemanizat a suksiet. Vadung tui hi kiem hrat hle sienkhawm zanikhan ruo a sur nawk leiin Chiengkon vadung kama um sungkuo thenkhat hai chun an thuomhnaw hai lasuokin hmun himnaah an insawn tawl.

Ruotui tam leiin Manipur vadunghai tium inchikna pelin an luong tawl mek
IMPHAL:  Manipur­ah ni 2 sung a zawna ruo a sur inzawm leiin Manipur vadung­hai chu tium inchikna pelin an luong tawl mek. Ruo a la sur zawm pei chun vadunghai hi luong liemin tui a la hung let el thei ding niin an lang. Imphal vadung, Nambul Vadung, Kongba Vadung, Iril Vadung, Ithai Vadung le vadung dang dang haia chun tui an thang hrat hle a, vadung bul hnaia um hai chu lo inveng dingin IFCD chun an hriettir. Ithai Barrage a Gates 5 um hai laia gates pahnihai chu hawnga tui inluong the tir a nih tiin IFCD thusuok chun a hril.

Imphal khawpui sunga hmun tam lem chu tuihawkin a sip a, Uripok flyover bul, Uripok Chirap Court Complex, Leikurembi Leirak le hmun thenkhat lem chu khup chen chena pal tul khawpin a um a, inlirthei le kelawnga inlawn hai ta dingin harsatna nasa tak an tlun pha niin ei thu dawngna chun a hril. Chun, hmun inhnuoina deuva um In haiah tui a luong lut tan a, mihriem khawsakna a sukharsa  pha hle. Mi thenkhat chu nuom anga tuolsuok thei loin an um pha.

Ruotui tam taluo leiin NH­37 (Imphal­Jiribam Road) a hmun tam takah mimkei a tlung leiin motor­hai an fe tlang thei tanaw a, Manipur mamaw chi tum tum phurtu Trucks 100 chuong lamlakah an intang mek. Nungdolan area a lem chu lamlien a se nasa zuol a, lamlien lai taka laklaw deua motor intang a tam hle niin ei thu dawngna chun a hril bawk.

IAS topper Manipur­ah a hung inzin
IMPHAL: Union Public Service Commission (UPSC) huoihawtna hnuoia Civil Services Examination, 2015 a topper Ms Tina Dabi chu Manipur­a ni 2 sung cham dingin zanikhan Imphal a hungtlung. Ama hi All India Confederation of SC/ST Organisations, Manipur Branch fielna leia Manipur­a hung inzin a nih. Vawisun hin Library & Information Centre, Kakching­ah IAS topper a ni lawmpuina le chawimawina hunser hmang ning a tih. Ms Tina Dabi hi India rama Schedule Caste hai laia Civil Services Examination Topper hmasa tak a nih.


Zangnadawmna Rs. 10 lakh pek ding
IMPHAL: Zanikhan Manipur State sawrkar le Md. Arif Khan thinale inzawma JAC indina um thuoitu han inbiekremna an nei tah. Hi inbiekremna dungzui chun Thoubal District­a Nungei Meitei Village le Nungei Meitei Muslim Village hai inkara buoina suok leia hliem hai zangnadawmna Rs. 10 lakh pek ding, thina tuok sunghai zangnadawmna Rs. 10 lakh  pek bakah a sunghai laia mi pakhat sawrkar sin pek ding ti le Md. Arif Khan hmingin Thoubal Nungei­ah Memorial Library bawl ding tihai a thangsa.

Hieng laizing hin Nungei area­a cheng, a bikin Meetei hai chu him lova inngaina an nei leiin  an chengnain hai suksanin Lilong Social Service Community Hall, Lilong Chajing hmuna an raltlan tawl niin ei thu dawngna chun a hril.

ITI students han bungheia nuorna
IMPHAL: Manipur sawrkarin ITI, Takyelpat Imphal East District a sawn dinga a rel dodalna le sawrkar thlutlukna hlip dinga ngennain zanita inthawk khan ITI students 4 han thi chena bungheia nuorna nei dingin indefinite fast­unto­death an thaw tan. Bungheia nuorna hi ITI Complex sunga an nei. Nuorna neihai hi Th. Sainikumar, Th. Milan, M. Rabile H. Umakanta hai an nih.

MSCW member dingin mi 3
IMPHAL: Manipur State Commission for Women (MSCW) member dingin mi 3 ruot thar an ni a, chuonghai chu, Ranjita Golmei, Farida Shah le Nilima Devi hai an nih. Tuta hma deu khan Dr K. Sobita Devi chu hi Commission Chairperson dinga ruot a lo ni ta bawk. Nuhmei chunga suolna le nunrawngna tlung hai laia 100 ah 50 hai chu awareness tlaksam leia tlung a nih tiin Dr K. Sobita Devi chun a hril.

Truck pakhat kap a nih
IMPHAL: Zanikhan tu ti hrietlo han thuomhnaw phura Dimapur­a inthawk Imphal pana hung Truck pakhat Kangpokpi Police station­a inthawk km. 10 vela hlana hmuna an lo kap a, silaimu 11 in Truck hi a deng fuk. Truck driver le handyman ruok chu himin an suokdawk. Truck hi Kangpokpi Police station compound­ah sie a nih.

Nagaland pumpui AFSPA thla 6 sung
NEW DELHI: Sawrkar thlungpui chun Armed Forces (Special Powers) Act, 1958 hnuoiah Nagaland state pumpui tuta inthawk thla 6 sung “disturbed Area” thla 6 dang a keisei nawk. Hi thua notification hi zani hmasa khan insuo a nih. NSCN (IM) Chairman Isak Chishi Swu New Delhi­a Hospital­a a thi zo ni 3 hnunga hi thusuok hi Home Ministry in a hung siem a nih.

J&K MLA hai hlaw sukpung ding
SRINAGAR: Jammu & Kashmir­a MLAs hai hlaw sukpungna ding bill chu zanikhan Assembly in an passed. Hi bill dungzui hin MLAs le MLCs han tuta thla khatah hlaw le allowances Rs. 80,000 an lak hlak chu  Rs 1,60,000 an hung lak phak ta ding bakah tuta CM in thla khatah Rs. 90,000 a hlaw hlak chu  thla khatah Rs. 1,80,000 a hung hlaw ta ding a nih. Cabinet ministers han Rs. 85,000 an lak hlak chu Rs. 1,70,000 la tang an ta, Minister of state han Rs. 80,000 an lak hlak chu thla tin Rs. 1,60,000 an hung lak ta bawk ding a nih. Chun, MLAs/MLCs pensioner han thla khatah Rs. 50,000 an lak hlak chu Rs. 28,000 bakah medical allowance thlatin Rs. 5,000 an dawng ta bawk ding a nih. MLAs/MLCs hai hlaw sukpung ding lei hin state sawrkar chun kum khatah Rs. 12 crore vel a seng belsa ding a nih.

NFSA beneficiaries lai Govt. officials
SHILLONG: East Garo Hills district Deputy Commissioner (supply) chun National Food Security Act (NFSA) hnuoia hamthatna dawngtu ding beneficiaries hai lai sawrkar thawktu (govt. officials) an um ti a hmusuok a. Hieng Govt. officials hai chu an Ration card pekir vawng dingin an hreittir a, a hmuding awm han indik taka an dawng le an hamthatpui theina dingin fair price shops dealers le vigilant committee hai chu hiengang thila fimkhur le a kuoma report pe dingin an hriettir bawk.

BJP MLA naupa in mi 3 a baw hlum
JAIPUR: Rajasthan­a BJP MLA Nand Kishor naupa Siddharth Mehariya chun zanikhan Jaipur hmunah a BMW Car in Auto a baw a, mi 3 in thina an tuok. Mi baw hlumtu Siddarth Mehariya chu Police han an man tah. BMW motor hi MLA Nand Kishor ta niin Police chun an hril.

UP­a ruosur leia sietna tlunga thi mi 16
PITHORAGRAPH: Uttarakhand­a Pithoragarh le Chamoli district haia ruosur leia sietna dang dang tlung leia mihriem thina tuok chu 17 an tling tah. Bastari thangin khuo tum tum 7 haia inthawk mi 13 dama sansuok an ni a, an hliem leiin hospital­a enkawl an ni a, mi 10 an thi a nih. Chun, Chamoli district­ah mi 6 an thi a, midang 3 an lan hmang mek. NDRF le security forces han sansuokna le sawmdawlna sin an thaw zing a, mithi hi tuta nek hin an la hung tamlem ring a nih.

India mi 1 a thangsa
DHAKA: Zanita Bangladesh ram khawpui Dhaka high security diplomatic Zone­a Restaurant pakhata ISIS terrorists han mi 20 an that hai lai  India mi pakhat, Italy mi 8, Sri Lanka mi 2, South Korea le Japan mi pakhat ve ve an thang. India mi thata um hi Tarushi a nih. Mi 20 thatna thanghai laia mi 6 chu Commando han an kap hlum a, pakhat damin an man. Mi 20 thata um hai laia a tam lem an ringa at hlum an nih.

Thil tha lem ding a ni chun inphahnuoi pawi kan ti nawh: Lalzirliana
AIZAWL: Mizoram Home Minister R. Lalzirliana chun, thil tha lem tlungna ding a ni phawt chun Mizoram sawrkarin inphanuoi lem pawi a ti nawh tiin June 30, 2016 nia YMA huoihawtnaa Thingsulthliah khelmuola ‘Remna Ni’ hmangnaa mipui hmaa thu a hrilna huna a hril. Tuta inthawk sawtnawte hnungah Mizoram sawrkar le HPC (D) an inbiek ding a ni a, inbiekna a hung hlawtling ngei theina dingin Mizo mipui hai tawngtaipuina kan mamaw. Sawrkar chun mi tin le inrem tlang taka um a nuom a, thil tha lem a hung um theina ding a ni phawt chun inphahnuoi lema thang khawm pawi a ti nawh tiin a hril.

Kum 30 liemtaa Mizoramin zalenna a hmu zo sawtnawte hnunga HPC (D) demand area china cheng hai chun kum 4 vel chau remna le muongna an chen a, harsatna le inhrietthiemnawna leiin mi iemanizat ramhnuoiah an lut a, kum 26 sung mipui han harsatna an tuor ta a nih. Tuhin khawtlang thuoituhai le Kohran thuoituhai hmalaknain inremna lampui dap mek a nih.

Mipui han inremna hlutzie an hrietthiemnaw inlau um a ti thu hrilin “Zurui buoi le mi um tha nuomlo thenkhat leia veng le veng, khuo le khuo inepna a tlung hlak khawm pawi a ti thu hrilin, thil indiknaw thawtu chu humhim kher tum lovin indikna ngaipawimaw chun hiengang harsatna hi pumpel thei a ni thu Lalzirliana chun a hril bawk.

VAWISUN THUPUI
Nang chu kan bikhmangna hmun i na, nang chun lunginzingnaa inthawk mi humhim i ta, Sanhimna hlahaiin min huolveltir i tih. ­ Sam 32:7

Editorial: Malsawmna am ansie?

Furpui a hungtlung a, India rama State hran hrana chenghai chun van ruotui tam taluo lei dam, tek tla, mimkei le tuilienhai leiin harsatna nasa tak ei tuok mek bakah thenkhatin thina, thenkhatin hliemna ei tuok a, thenkhatin ei in le lo, bu le thlai, ei ran vai, ei sil le bil, ei bur le bel, ei thuomhnaw chi hran hran hai ei chan pha bawk. Hieng thil hai po po hi pel lova kum tin furpui huna ei tuok hlak le ei dam chun ei la tuok pei ding a nih. Khuonu chung Pathien siem le ruot anni leiin hieng thil hai hi pumpel hmak, dang le lo invenghim hmak chu mihriemhai thil thaw theina khel tieng a nih. Ei thaw thei tawk chu hiengang thil hai  a hungtlung changa siet tuok lo dinga lo inveng a ni el. Khuorel sietna hlak chu a la hungtlung  pei ding a ni leiin mani thei dan ang anga lo inveng chu ei mawphurna seng a nih.

Tuilien changa sietna ei tuok thenkhat hi chu ei duam taluo leia ei tuok amani ding aw ti theiin a um. Kum tina furpui huna tuilienin a chim phakna hlak hmun haia dam in ei bawl a, ei duam taluo leiin vadung, ruom le kawrte hai chu ei va hneng tawt tawt a, thenkhat lem chun vadung chungah chen in ei bawl a, ei vadung, ei ruom le kawrte hai chu ei nekchep taluo ta leiin tuiin luongna ding an vai hiel hlak. Vadung ruom le kawrte hai ram ei lakpek leiin rawbawhawk a hung sur changin ei vadungte, ruom le kawrte hai an luong liem a, ei insungah chen tui a lut a, harsatna namen lo takel ei tuok pha hlak.

Churachandpur town sunga ei in bawl dan an dik nawzie chu, July 1, 2016 zantieng dar 3 vela  ruo nasa tak a sur a, kha huna tuilien, a bikin ei town sunga vadungte ruom le kawrte haia inthawka tuihawk hung luong liem dan local cable networt han TV hmanga an hung insuo haia inthawk khan chieng taka hmu theiin an lang. Tuilienin a suksiet le In sung thenkhata tuihawk luong lut hai kha chu vadungte ruom le kawrte hnai taluo le an ramri pel zaka in an va bawl lei niin an lang. Hieng a ni lei hin mani siemfawm sietna ei tuok an naw mani ti theiin a um. Ei town laili lai tak khawm a chuong a liem a ni bik nawh. Ei town sunga lamlienpui (main road) sira nullah­hai a that kawknaw lei le dustbin a ei hmang leiin ruo a hung sur changin ei lamlienpui chu vadungte­hai ang elin tuiin a sip a, inhlieu theina khawpin tuihawk a luong dum dum hlak. Ei lamlienpui a lo tha tawk naw a, hmun thenkhat chu an khur lien taluo a, Nga dil ang elin hun sawt tak tak tui an tling puou el hlak. Hi khawm hi mihriemhai siemfawm harsatna min tluntu pakhat a nih.

Chun, Tuithapui vadung tui a luong liem changa tuiin a chim ngei ngeina hlak hmun haiah khawm in bawla cheng pawiti naw pawl khawm ei um. Tuilien changa a chimna hmun hlak hai hi inhmuna theta zawr khawm um an tih. Hi lei hin inhmun inchawkna kawngah khawm ei fimkhur hle nuom a um. Hmun him nawna le ram him nawna ei inchawk a ni chun tu dang mawphurna a ninaw a, an chawtu mawphurna a nih. Inhmun theta zawrtuhai hin thawluina hmangin inhmun an zawr ngai nawh. Ram le hmun him lo chu a lo inman deu a ni khawma inchawk lo el ding a nih. Chuong a ninaw chun siemfawm sietna hi ei tuok rawp ding niin an lang.

Dit dan, ngaidan le tha ti dan an ang naw a. Hmun le ram him lo inchawtu thenkhat hi chu tuilien changa in le thil dang dang a suksiet changa sawrkara thangpuina an dit leia Tuithapui  vadung kam hnaia in an bawl am a ni ding ti theina chin a um hlak. A san chu Tuithapui vadung kam hnaite, kum tina tuilienin a chim ngei ngeina hlak hmun le ramah hai hin in tha bawl (pucca building) hmu ding a la um meu nawh. Sawrkar thangpuina beiseia hiengang hmun le rama in bawla cheng ei lo ni pal chun ei ngaituona le remruot dan chu ngaituona indiklo le remruotna tha lo a nih. Hiengang lungril hi chu kutdaw lungril a nih.

Ei thil thaw nuom dan, ei um nuom dan le ei chet dan hai hi chik takin ngaituo chet chet ei tiu. Khawvel sietna a hungtlung changa ei thil tuokhai hi Pathien malsawmna am annawleh Pathien ansie? ngaituo chet chet a va tul  ngei de! Van ruotui bova um thei lo, mihriem, thlai le ranhai makmaw chu van ruotui hi a nih. Chun, van ruotui hi Pathien malsawmna khawm a nih.Pathien malsawmna ni si iengleia ei ta dinga sietna a hung inchang hlak am? Ei suksuolna leia Pathien ansie a ni ding? Ansie ni lova ei ta dinga malsawmna a hung ni lem theina dinga mihriemhai hi ei khawsa a, thil ei thaw a tul a nih.

Post a Comment

Powered by Blogger.