Bills 3 hai dodalna ni 300 tlingna ursun taka hmang
CCPUR: June 26, 2016 khan JAC (Against Anti­Tribal Bills) le Outer Manipur Tribal Forum (OMTF) hmalaknain Hiangtam Lamka, YPA GHQ Hall­ah  Anti­Tribal Bills 3 hai dodalna ni 300 tlingna ni ursun taka hmang a nih. Hill district tum tuma Tribe leaders le Civil society organisation: United Naga Council, Thadou Women Association, Naga Women Union, Chandel Naga Peoples’ Organization Anal Naga Union, Chiru Union, Chothe Tribe Union, Monsang Naga Tribe Union, Naga Students’ Union chandel District, Lamkang Naga Kver Kumpun, Maring Uparap Assembly Machi Area Chief/Chairman Association, Khoibu Tribe Union, Moyon Tribe Union, Tarao Tribe Union, Naga Peoples’ Movement for Human Rights, Zeliangrong Baudi, Zeliangrong Youth Front le Autonomous District Council, Tamenglong  hai khawm an hung thang.



Hi huna hin H. Mangchinkhup, Chief Convener JAC (Against Anti­Tribal Bills) in keynote address a hril a, Joseph Lalrothang, President, Hmar Inpui, Lalrinliana, President, Mizo People Convention, Vahchin, President, Thadou Women Association, B. Dongzalian Simte, Chairman, Zomi Council, Romeo Hmar, Convener MTFD le Gaidon Kamei, Convener OMTF & President, UNC han thuhrilna hun an hmang.

H. Mangchinkhup chun, Pathien zarin PMP Bill chu President in Constitution kal a nih tiin a cheltang a, Bill dang pahni hai en that dingin a ti bawk a. Tribal hai lungawina tawka inbiekremna a um hma khat chu nuorna hi fepui pei a ni ding thu hrilin July 9, 2016 khin hmatienga hmalak pei dan ding thuah Consultative meeting um a tih tiin a hril.

Romeo Hmar chun, ei ni sunga inremnawna ral ei do zo hun huna Manipur sawrkar do chu a harsa naw ding thu a hril a. Vahchin, President, TWA chun khawvel um sunga thangruol thei lo ding hai 3 Bills in pumkhatin a mi siem a nih tiin a hril.

Pu Joseph Lalrothang chun, thangruol a pawimaw thu hrilin, Ei hmaa Assembly election hmabak ei ni leiin ei inthuruolna sukse dingin muscle power le money power nasa taka hmang khawm a hung ni el thei, ei ram le leilung sanhimna dingin mi 9 in hringna an lo inhlan ta a, cheng singkhat/singhni a ei ram le leilung hi zawr tum nawng ei tiu tiin a hril.

Gaidon Kamei chun, Tribal movment hi tu community theidana le hmusitna khawm a ninaw a, communal govt. dona a nih tiin a hril. Ei ram zawrtu han sawtnawte hnungah sum le pai hmangin mi hung inchawk an tum ding a ni  leiin mitin ei fimkhur a tul tiin a hril.

Hi hun hmangnaa hin Rev. Dr. S. Lalpi Vaiphei, President, Tribal Churches Leaders Forum Manipur, Chairman, Evangelical Organization Church ECCI in exhortation speech le Rev. T. Ding Gin Lian, Youth Secy. CBA in Tribal Movement Ni 300 hrietzingna dinga siem Tribal Movement Flag hawngna le inhlanna a nei a, All Manipur Tribal Women Union inrawinain mipui tawngtairuolna hun hmang niin Rev. Huolthangsei Thiek, Executive Director, EAC in hun khar tawngtainain hun a khar.  

CDEEU Conference nei
CCPUR: June 27, 2016, 1:00PM khan CCPur Dist. Education Employees’ Union (CDEEU)   hmalaknain Vimala Raina H/S­ah Principal/Headmaster/Headmistress han 1st Conference an nei a, CDEEU constitution amended, 2015 chu member hai hmang thei dinga semdawk a nih.


T. Goukhomang, ZEO, CCPur chun, sawrkarin school function­na dingin hma a lak a, thawktu hai khawmin thaw ding le mawphurna ei nei. Teacher han mani nau hai school thaa inkaitir ei nuom ang bawkin tlangrama nu le pa hai khawmin an nauhai school thaa inkaitir an nuom ti teacher han hre seng ei tiu tiin a hril.

CDEEU Conference chun resolution tum tum an pass a, chu hai lai chun­ CCPur district­a Govt. High School haia inthawk HSLC Exam­a first three ( top 1­3) hai kum tin Award pek ding; Subject tina toppers hai kuomah kum tin award pek ding; Education Department Pay Bill a DC in countersigned a thaw hlak suktawp ding ti hai a thangsa.

Training on Piggery and Poultry
CCPUR: NABARD, CCPur thangpuinain Rural Aids Service (RAS) chun zani zingkar khan RAS Resource Centre, Tuibuong­ah “7 Days Training on Bokashi Piggery and Poultry” tan a nih. Training­a hin khuo/veng 8 haia inthawk mi 30 an thang.

HSA Rengkai Unit
CCPUR: June 27, 2016, 7AM khan HYA GHQ Office, Meeting hall­ah HSA JHQ, CCPur hrietpuinain kum 2016­18 sunga HSA Rengkai Unit thuoitu ding thlangna nei a ni a, President ­Gulith Laltlinthang, Vice President Darthansang, Secy. ­Lungruolpui, Asst. Secy. ­Robert Joute, Fin. Secy. ­ Rebecca Lalhlimzing le Treasurer­ Roselyn hai thlangtling an nih.

Thingkak a thlawna lak thei  ning a tih
CCPUR: July 1st week  hi  kum tin Vanamahotsava Week­a hmang hlak a ni a, hi le inzawm hin July 1, 2016, 7:00AM khin Southern Forest Division, CCPur Office chun Thingkak dit hai ta dingin Tuibuong Forest Gate; Saikawt/Muolvaiphei Centre le Singngat Range haiah a thlawnin sem a tih. Thingkak dita hnina pe hai ta dingin hieng centre haia hin lak thei ning a tih tiin Kham Suanmung Tawmbing, IFS, Divisional Forest Officer, Southern Divn. CCPur chun inhriettirna a siem.

Thuro Magazine
CCPUR: Hmar Literature Society (HLS), Churachandpur in thla thum dan peia a suksuok Thuro Magazine June ­August, 2016 issue a suok nawk tah. Tuithaphai kuola cheng hai ta dingin  1. H. Zaneisang Building, Rengkai Vengpui; 2. T.K. Medico, Opposite UBI, Churachandpur; 3. Zamkhanthang Joute, Hmarveng; 4. Zokung Ralsun, Bible Hill, Rengkai le 5. Pine Hill Agency, Near CCPur Police Station haia inchawk thei ning a tih.

Intl.  Day Against Drugs Abuse & Illicit Trafficking
CCPUR: June 26, 2016, 1:30AM khan Hmarveng Community Hall, CCPur­ah Churachandpur District Legal Services Authority le HYC, Hmarveng hai thangruola huoihawtnain International Day Against Drugs Abuse & Illicit Trafficking hun hmang a nih.

Rev. Vanlalhlan in tawng­tainaa hun a hawng zoin Mr Letkho Kipgen, CJM, CCPur, Secy. CDSLA) in keynote address a hril a, Mrs Jocilyn Lalhrietzing, Counselor, MSF, CCPur  inrawinain interaction hun hmang a ni a, Nk. Margret Traite, Advocate chu resource person in a thang.

Hi huna hin damdawi inruithei haiin  khawvel la mimal sungkuo tin a sukbuoi zie hriltlang a nih. Inruithei sukbo a, dan loa drugs zawrna hai sukbo a hung ni theina dinga inhrilhrietna dinga kum tina hi ni hi hmang hlak a nih.

Nk. Margreth Traite chun, Free Legal Aid services a um a, hi hnuoia hin sawrkar sum sengin (state expense) Advocate ruoi thei a ni a, Free legal aid mamaw hai chun CCPur Legal Services Authority kuomah hnina pek thei a nih. Chun, CCPur Govt. College­a khin  Legal Clinic hawng a ni bawk a, hi taka khawm hin thangpuina ngen thei a ni a, Scheduled Tribe (ST) ei ninaah thil iengkimah free legal aid hmu thei vawng a nih tiin Nk. Margreth Traite chun a hril.

Sit-­in-Protest tan a nih
CCPUR: JAC Against Anti­Tribal Bills inrawinain zanita inthawk khan Hiangtam Lamka­a pasaltha hai pumbuk­ah sit­in­protest/Dharna nei tan a nih. Hi huna hin Rev Hangpi Manlun; Rev Dr Lalkholien Pulamte; D.Angam Gangte hai inrawinain Pearsonmun, B.Vengnuom, Hill town, Nehru Marg hai an thang. June 28, 2016 in Pearsonmun,Khominthang, Gangpimual le Apollo Veng hai inthung an tih.


Zanita sit­in­protest inthung tan huna hin H. Mangchinkhup, Chief Convenor, JAC­AATB, Mr Romeo Hmar, Convenor, Manipur Tribal Forum, Delhi hai khawma uopin thuhrilna hun an hmang. Mr Romeo Hmar chun Delhi­a MTFD inrawinaa Jantar Mantar­a protest fe mek report pein Bills 3 hai le inzawma nuorna fe mek hi JAC hai chau mawphurna a ninaw a, mitin mawphurna a nih; Movement­ah pawl le Assn. tam tak um inla khawm sawrkar le inbiek hunah JAC­AATB hminga fe le inbiek a pawimawh, pawl 2/3 ei fe pha sawrkar khawm a buoi hlak a nih. Bills 3 hai ei dang zonaw chun ei thla la hung um pei ding han  an mi mawsiet ding a nih tiin a hril.

H. Mangchinkhup chun, Bills 3 hai dodalnaa hin tribe leaders le hnam sipai hai thangin mitin ei thangruol a pawimaw a nih tiin a hril.

Workshop on peace building
CCPUR:  June 29, 2016, 11:00AM khin TKSU, GHQ le Indo­Global Social service Society (IGSSS) huoihawtnain KKL Complex, CCPur­ahOne Day Workshop on Peace building prog. um a tih. Hi huna hin Rev. Dr. Kh. Khaizakham, Retd. Principal, ECT in “Religious perspective on peace and reconcilation (Factors that Hinder Peace Building) le Lalramsang Infimate, MCS/ADC Bishnupur in “Peace without justice is only a mirage” ti thupui hai hmangin thu hril an tih.

HSA le KSO in thusuok an siem
CCPUR: June 26, 2016 khan HSA CCPur JHQ le KSO/CCPur chun thusuok (joint statement) an siem a, Bills pathum hai laia 1 President in a cheltang bakah pahni dang hai constitutional experts hai ennawn/enthat dinga pek a ni ta leiin movement sunzawm pei tula an hriet tanaw thu, Bills 3 hai dodalna le inzawma indin JAC chun a bulin mipui thlawp hlaw sienkhawm mipui in an ringzo ta naw deu deu a, mi thenkhat tlawmte tu hrietpui lo hai inrawina hnuoia um a ni tah. JAC hmalakna leia state sunga unau inkara inhrietthiemnawna intlun thei dinga an lang chun HSA/CCPur le KSO/CCPur chun en liem mei mei naw nih ti hai an zieklang.

Kum 2017 a States 5 haia Assembly Election nei dan ding Election Commission in a buoipui tan
NEW DELHI: Zanita inthawk khan Election Commission of India chun States 5, Uttar Pradesh, Punjab, Manipur, Goa le Uttarakhand haia Assembly election kum 2017 a nei dan ding a buoipui tan. Hieng Assembly­haia election chu an hun (term) a bona ding thla 6 hmaa inthawka election nei dan ding hi Election Commission of India chun a lo buoipui a tul a nih. Deputy Election Commissioner chun a hmasa takin note siem hmasang a ta, a hnungah State 5 haia Chief Electoral Officer­hai kuomah thawndar a tih. Assembly Election neina dinga inbuotsai tak takna chu July, 2016 thla lailung vela tan ning a ta, zanikhan chu a bul tanna dingin Deputy Election Commissioner level a bul tan phawt a nih tiin ei thu dawngna chun a hril.


Kum 2017­a Assembly election nei hmabak state 5 hai hun (term) tawp hun ding chu, Goa, Manipur le Punjab hai March 18, 2017; Uttarakhand March 26, 2017 le Uttar Pradesh May 27, 2017 an nih. Election Commission chun Election ni ding, paramilitary Forces hmang tulzat ding, inthlangna thienghlim le zalen taka nei thei dan ding, Assembly Election hi phase iengzata nei ding ding am ti hai chu a hmaa ithawka a lo ngaituo le siem fel a tul a nih.  Election Commission chun hieng states 5 haia Assembly Election a ruola nei dan a ngaituo el thei niin ei thu dawngna chun a hril.

Nungei hmuna Curfew zam a nih
IMPHAL: Thoubal District a Lilong Police station huop sunga Nungei Meitei village le Nungei Muslim village hai inkarah zani hmasa khan inbeituona a tlung a, zani sun lai khawm khan lungin an lan dengtuo. Chun, hi inbeituonaa hin silai khawm hmetpuok a nih. Hi lei hin Md. arif Makak (16)  s/o  Md. Rirajuddin of Lilong Nungei Idiga road chu a hliem a, Shija Hospital & Research Centre, Lilong panpui a ni a, sienkhawm a hliemna tuorzo lovin zani 1:30PM  vel khan a thi. Chun, Nuhirbur Rahman (25), s/o Habibur @ Hemam khawm a hliem. Polcie han mipui hnawtdarna dingin tear gas shells le Mock bombs hai an kap. Khuo pahnihai inkara inngirnghona boruok a la tang hle a, sienkhawm Police han buoina suok ding hi an control tah. Khuo pahnihai inkara buoina suok lei hin zani zantieng dar 5 a inthawk khan Nungei area sunga hin sawrkarin curfew a zam.

JAC in Govt. offices 3 an khar
IMPHAL: JCILPS Convenor hlui Kh. Ratan Manipur sawrkarin ‘Wanted’–a a puong dodaltu pawl JAC chun zani zantieng khan Imphal East District sunga Government Offices 3 an khar. Kh. Ratan Wanted­a puong a nina sukbo/hlip dinga an ngenna le inzawma hi thil hi an thaw a nih. Govt. offices an khar hai chu NIELIT Akampat (a hmaa DOEACC); SDC Office, Basikhong le Sericulture Office, Sangaipat hai an nih. Imphal East district huom sunga govt. offices hai chu an thil ngen sukpuitling pek a ni hma khat khar an khar vawng dingin sawrkar an vau bawk.

Lecture on Employment in Defence forces
IMPHAL: Red Shield division hnuoia Noney Battalion of Loktak Brigade chun zanikhan Kangchup hmunah Employment opportunities in Defence Forces’ ti thupui hmangin lecture an buotsai. Hi huna nuhmei le pasal thalai 235 vel an thang a, Army a lut thei dan le lampui hai hrilhrietna nei an ni bakah pre­recruitment training le recruitment nei hun ding hai le neina hmun ding hai hrilhriet an nih. (PIB Defence)

M/s P.C. Jain & Co dawr khar
IMPHAL: Kangleipak Students Association (KSA) in M/s P.C. Jain & Co. dawr thla khat sunga dinga an khar leiin Manipur mihai chun National Newspaper, regional newspaper le News magazine hai ei hmu theinaw el thei. M/S P.C. Jain & Co hi Manipur­a agent pui tak a nih. R. Gupta in a siem Manipur GK Book­ah an dik loa ziek a um tia lungawi lova KSA hin M/s P.C. Jain & Co dawr hi a hremna dinga thla khat sung khar dinga thu an pek a nih. Hi lekhabu sut le insuotu Ramesh Publishing House ruok chun ngaidam inhnina le an diknaw um hai a sukdik ding thu bakah hi G.K. Book zawr dinga peksuoka um ta hai po po khawm a lakkir nawk vawng ding thu a lo hril ta a nih.

 Akhilesh in ministry a suklien
LUCKNOW: Uttar Pradech Chief Minister Akhilesh Yadav chun ministry a suklien vawisarina dingin zanikhan mi thar 3 le bana um tah minister Balram Yadav hai chu a ministry a lalutin a cabinet a suklien nawk. Minister dinga laklut thar hai hin Raj Bhawan­ah Governor Ram Naik hmaah zanikhan sesamna an nei nghal. Balram Yadav hi June 21, 2016 nia cabinet sawidanglam a ni huna bana lo um ta a nih. Minister 4 laklut hai le hin Uttar Pradesh Assembly a minister um thei  zat 60 an tling tah. UP ministry­a hin Cabinet minisers 26, MoS (Independent charge)12 le MoS 22 an um a nih.

India chu MTCR full member a ni tah
NEW DELHI:  India chu Missile Technology Control Regime (MTCR) member dinga laklut a ni hnungin zanita inthawk khan MTCR full member a ni tah. Hi thil hin ralthuom tiengpanga intlansiekna kawngah nasa takin hma a sawn pha beisei a nih. MTCR member hai chau ta dinga inchawk phal ralthuom inhnar um tak tak iemanizat a um a, hi lei hin India chun nikuma inthawk khan MTCR member ni tumin nasa takin hma a lak a, tuhin full member a hung ni ta a nih. India MTCR full member nina dinga hin Foreign Secretary S. Jaishankar chun New Delhi­ah France’s Ambassador­designate Alexandre Ziegler, The Netherlands’ Ambassador Alphonsus Stoelinga le Luxembourg’s Charg√© d’Affaires Laure Huberty hai hrietpui le hmuin hming a ziek a nih.

BSEB Secretary hlui man a nih
PATNA:Bihar Class XII exam topper scam le inzawmin Bihar School Examination Board (BESB) Secretary hlui Harihar Nath Jha chu zanikhan man nawk a nih. Tukum Class XII topper scam­ah inrawlvena a nei ti Special Investigation Team (SIT) in an hmu leia an man niin Patna senior Superintendent of Police (SSP) Manu Maharaj chun a hril. Tuchenah Bihar topper scam le inzawma mi mana um chu 20 an tling tah tiin Maharaj chun a hril. Mana um ta hai lai hin BSEB Chairman hlui Lalkeshwar Singh, a nuhmei le JD(U) MLA hlui Usha Singh, College principal Bachcha Rai le Arts Topper Rubi Rai hai an thang.

Myanmar­ah drugs $ 60 million manhu
YANGON: Myanmar Police han hmun hran hrana drugs an man dollar 60 million manhu vel chu hmun hran hranah an raw ut vawng. Drugs raw uta um hai lai hin Heroin kg. 80, Methamphetamines 768 kg le drugs chi hran hran mum maktaduoi 10 a thang tiin Police official thusuok chun a hril. Myanmar ram hi khawvela Opium tharsuok rawn tiengpanga a pahnina niin UN chun a hril. Zani hmasa kha International Day Against Drugs Abuse and Illicit Trafficking a hmang a ni a, hi Day le inzawma Drugs hai hi raw hmanga um a nih. Myanmar khawpui Naypyidaw a drugs rawna hunsera hin an ram Vice Presient Myint Swe a thang a, drugs dona le sukre dinga nasa lema a sunzawm pei ding thu a hril.

Chile in COPA America 2016 a lak: 
Messi in Intl. Football a chawlsan ta ding thu a puong
NEW JERSEY: June 3, 2016 a inthawka tan Copa America, 2016 football final chu zani zingkar khan Chile le Argentina han Metlife Stadium, East Rutherford, New Jersey, USA­ah an inkhel a, full time zoa extra time inkhel chena a tu tieng tieng khawm goal thun an umnaw leiin penalty pet a ni a, Chile chun Argentina chu 4­2 a hnein Copa America­2016 Champion Cup an dawm. Argentina chu pahnina niin Colombia le USA hai chu pathumna le palina an nih.

Hieng laizing hin Argentina in tuta tum Copa America Final­a hratna an chang zo naw leiin Lionel Messi chunInternational football khel a chawlsan ta ding thu a puong.

Lionel Messi hin kum 18 mi a niin August 17, 2005 khan Argentina le Hungary han friendly match an khel tumin international football a khel tan a, March 1, 2006 khan Croatia leh an inkhel tumin international footbal­a a hmasa takna dingin goal a thun a, kum 2008 khan ama inrawinaa Argentina team chun Beijing Olympics ah Gold medal an lak a nih. Messi hi FIFA Player of the year vawi 5 lo la ta, Champions League title 4, Spanish La Liga vawi 8 lo la ta a nih.

Post a Comment

Powered by Blogger.