HMAR MIPUI KUOMA THUPUONG
Ṭobul (Background):
Hmarbiel Pastor Organisation (HPO) chun Hmarram hmasawnna ding ngaituoin, March 29 – 31, 2016 khan Parbung, Churachandpur-ah “A Sietnalai Siemthat” thupuia hmangin Seminar-cum- Consultation buotsai a ni a. Resource Person dingin HCLF, Hmar Inpui, HYA-GHQ ṭhuoitu le mithiem tam tak fiel an nih. Palai fekhawmhai dit dân angin Hmarbiel Pastor Organization hi HMARRAM KOHRAN INZAWMKHAWM (KHI) tia thlâk danglam a nih.
Kum 2016-2018 sûnga ṭhuoitu dingin a hnuoia hai hi lunginruol taka thlang an nih.
Chairman: Rev. Hrangchunghnung
Vice Chairman: Rev. Lalrohlu
Secretary: Rev. Chawngrosiem
Asst. Secretary: Rev. John Vanlalsan
Finance Secretary: Rev. Lalruotsang
Treasurer : Rev. Lalnghillo
Secretaries, Social Media, Networking and Information:
• Mr. Lalnunthang Songate
• Mr. LRS Puruolte
• Mr. Alan Famhoite
• Mr. Vanlallien Pulamte
Seminar-cum- Consultation nei huna mipui fekhawmhai chun Hmarram hmasawnna dingin thupuong (declaration) a siem a. Chuonghai chu Hmar Christian Leaders’ Forum huoihawtna hnuoiah, Hmar pum huopa pawl hran hran hrietpuina le remtina lâk a ni hnungin,(Sitting dt.18/6/16 at VTI, Rengkai) Hmar mipui hriet dingin thupuong a hnuoia ang hin siem a nih:
I. Ei ram le mipui hmakhuo ngaina leia ei thawtlâng ding hai:
1. Ei ram sûnga Central, State le Company a sinthawtuhai po po office le quarter-hai a ni dân ding ang taka a um theina dinga thei ang anga hma lâk tlâng.
2. Ei ram hmasawnna dinga Central Scheme, State le Company thilthawna dâltu le hluotuhai po po inthielfai le ṭhataka an thaw theina dinga ṭhangpui le lo sawmdawl.
3. Ei ram mipuihai indikna le chanvo humhim pêk a, ṭhangpui an ṭulna hai a thei ang tawka ṭhangpui ding. Ei ram mipuihai lo hmasuok le thing-le-ruohai zawrna kawnga hluotu ni loa ṭhangpuitu ni lem ding.
4. Ei ram (Kristien ram) sûnga suolna chi dang dang chîngtu, inruithei chi dang dang zawrtu le chîngtu, rûkrûkna, fakrûkna, thisen insuona le a dang dang dodâlna le khapna a hin inthuruol taka hma la tlâng ding.
5. Ei ram mipuihai inthuruolna dodâltu le hmusittuhai dolêtna kawnga inthuruol taka thaw tlâng ding.
6. Ei ram sûnga Kohran ṭhuoitu, hnam ṭhuoitu le hnam sipaihai ṭhangin, Pathien thu le ei hnam ta dinga thilṭha le hmasawnna ding inhriltuona kumtin a tam thei ang nei dinga hmalâk tlâng.
7. Ei ram sûnga inthlangna hrim hrim, felfâi le thienghlim taka nei a ni theina dinga hmalâk tlâng.
II. Ei ram le hnam hmakhuo ngaina leia thawlo ding hai:
1. Hmar ram sûnga sawrkar sinthawtuhai po po an umna hmun/sinthawna hmun senga uma sin an thawna ding hluotu nilo ding; mani umna hmuna um peilohai inbîkna le lo humtu ni lo ding.
2. Central Sawrkar / State Sawrkar / Company sinthawna hai hrim hrim an thaw dân ding ang taka sin an thawna ding dâltu nilo ding. Hieng ang sina contractor, sin thawṭha peilohai ta dinga inbîkna le humtu ni lo ding.
3. Sawrkar Office le Staff hieng- SDO Office, ADC, Medical, Education, Electricity, Communication, Bank, Road, PHE le a dang dang hai- ei ram sûng ngeia a ni ding ang le an sinthawna dinga dâltu le inbîkna dinga an hmangruo ni lo ding.
4. Ei ram aiawtu ding, sawrkara elected representative ding thlangna le hnam organisation ṭhuoitu ding thlangna haiah, mimal ditsak bîk nei leia vote dinga tharum (force) hmanga mipui nawrlui lo ding. Candidate-hai kuoma pawisa lâk ding bituk siempêk lo ding. Candidate tharum hmangnuomhai inbîknaa ṭhang lo ding. Thlangtlinga um, sinthaw ṭha lo hai humhimtu le inbîkna dinga um lo ding.
III. Election le inzawma zawm ding hai:
Candidate-hai ta ding bîkin
1. Pawisa sum/thuomhnaw hmanga vote inchawk/zawng lo ding.
2. Tharum hmanga mipui indikna le vote lak pêk lo ding.
3. Mani hmasiel le tling ngei tumna leia hnam sipaihai inthuruolpui lo ding.
4. Khawtinah candidate-haiin Hmarram Kohran Inzawmkhawm (HKI) in common platform a siem pek hmangin mipui kuomah campaign an tih.
5. Candidate-in mimal in lût lawra campaign (door to door campaign) a thaw nuom chun HKI palai 2 bêk ṭhang ve hlak an tih.
Thlang tlinga umhai hriet ding le thaw ding:
1. Thlangtlinga umhai chu mipui ta ning an tih.
2. Thlangtlinga umhai chun an biel sûngah development thil rêng rêng a ni dân ding ang takin sin thawng a tih.
3. Thalngtlinga umhai chun an term sûng a tam thei ang an biel sûngah umin sin thawng an tih.
4. Thlangtlinga umhai, sin thaw ṭhanawtu chu an term bo hma khawma biel mipuiin ensan (boycott) an tih.
Mipui ta ding:
1. Mi tukhawm vote zawr, candidate-hai kuoma pawisa/thuomhnaw lâk, pawisa sum le inruithei hmanga mi zawr lo ding.
2. Indiklo taka mani ditnaw hai hrilsiet le demsiet lo ding.
3. Laibung, kohran, pawl le a khuo bing zawnga inlâk hran lo ding.
Ordained Minister- Pastor le Kohran Upa-hai ta ding:
1. Pastor le Upa-hai vote zawr le candidate ta dinga vote zawng khap a nih. Hi thu pawisa lova thawluihai chu an umna Kohran Headquarters le Presbytery kuomah "Kohrana rawngbawltu dinga tlak lo an nih" tia inhriettirna lekha pêk ding.(A bik takin Tipaimukh biel )
IV. Hieng anga Thupuong siem a nina sanhai:
1. Hmarram mipui haiin sawrkara palai (elected representative) mani dit dân ang taka ei thlang theina dingin
2. Sawrkara palai (elected representative) in mipui le hnam ta dinga sin tam lem a thaw ngei theina dingin.
3. Mipui thuneina humhalna dingin.
4. Candidate-haiin pawisa tamtak tak an sêng hlak sukbona dingin.
5. Ram le hnam hmasawnna dingin sin ṭha taka thaw a ni theina dingin.
6. Central le State sawrkar lakah mipuihai chanvo indik taka hmu a ni theina dingin.
7. Hmar-Ram sûngah sawrkar thil hrim hrim a ni dân ding anga sukpuitling a ni theina dingin.
8. Thlangtlinga um, sawrkara palai (elected representative) haiin a vote petu le penawtu thlier hran loa angkhata mipui rawng an bawl theina dingin.
9. Hmar-Ram sûnga mipuihai pawimaw – (1) Inchûkna (Institution) (2) Medical (3) Bank (4) SDO Office & Staff (5) Electric (7) Lampui le a dang dang ṭha taka a um theina dingin.
10. Hmarram sûnga contract sinthawhai popoin sawrkar le company-in thaw dân dinga a ruot anga thaw a ni ngei theina dingin biel mipui aiaw ṭhuoituhaiin blueprint ngiet thei an tih.
11. Hmarram sûnga Hnam hminga organisation um hai a ni dân ding ang taka mipui ditthlangna hmanga indin le siem a ni theina dingin.
12. Kristien ram a ni ang hrima thilṭha, Pathienthu le inmila a um theina ding le hnam dang hai entawn tlâk a ni theina dingin.
13. Ei Ram hi Pathienin malsawmna tinrênga a vûr theina ding le Krista inlalna ram a ni theina dingin.
14. Ei ram le mipui ṭhatna dinga hieng a chunga hmalâk dân ding thupuong siema um hai hi ṭha kan tiin, kan pawmpuiin, kan thlawp ti suklangna dingin a hnuoia hin suoi (signature) kan kei.
Sd/- Sd/-
(Rev.Ros Infimate) {Rev.(Dr.) Lalhmuoklien}
Chairman Secretary
HCLF HCLF
Sd/- Sd/-
(Joseph Lalrothang) (Francis Songate)
President Secretary
HI HI
Sd/- Sd/-
(Rev.Hrangchunghnung) (Rev.Chawngrosiem)
Chairman Secretary
HKI HKI
Sd/- Sd/-
(J L Sawmi) (Chongtuozing)
President Secretary
HWA HWA
Sd/- Sd/-
(Upa Laldawnlien Varte) (Hmangkhum Songate)
President Secretary
HYA HYA
Sd/- Sd/-
(L Rothanglien Khawbung) (Joseph V Tuolor)
President Secretary
HSA HAS
Note:
1. A chunga hming tarlang a um hai khin Suoi/Signature an pek vawng. Scan copy duthusam a tling naw leiiin an signature hai ei bel naw a nih.
2. Date 18.6.16 Ni a HCLF inrawina hnuoi a Organization dang danga leaders thanghai mimal takin thupuong hi ei in pek thei naw ding an leiin News a hung suok hi pek ang a mi lo ngai pek el dingin ei in ngen. Org. hming chun hung pek vawng chu ning ei tih.
By:
Lalnunthang Songate
Inf. & Media & Networking Secy.
HKI
 |
| June 18, 2016 nia hnam sunga pawl hai inrawnkhawmna @VTI Auditorium, Rengkai, CCPur |
