5th CDPSA Toppers Award semna nei
CCPUR:  Zani zantieng 1:00PM khan Salt Brook School Auditorium­ah 5th Churachandpur District Private School Assn. (CDPSA) Toppers Award semna prog. nei a nih. Hi huna hin  Mr Lunminthang Hoakip, IAS, DC, CCPur Chief Guest in a thang a, Chief Host in ZEO CCPur  a thang.

Hi huna hin BSEM hnuoia Class X topper mi 4­1st Chawnglemmawi Khaute d/o Kamlalmuan Khaute, The Dawn School 2nd Ruby Hatneihoi d/o Ngamkholen Touthang, Sielmat Christian Hr. Sec. School, 3rd Chingmuanvung d/o Nengdouthang Guite, Young Learners School & 3rd Thanggoulal Haokip s/o Letlhun Haokip, Salt Brook School hai kuomah lawmman Rs 10,000, Rs 8000, Rs 6000, + citation inhlan an nih.



Chun, CoHSEM hnuoia Arts stream topper 3­ Chinggoulun Buansing d/o B. Kh. Khankhup, Rayburn College, H. Joshua Kamsuan s/o H. Thiangzagin, Rayburn College le Lalmuankhup Zou s/o Kapginthang, Ebenezer Academy, Science Stream topper mi 3: Judith Ramtharmawi d/o Lalsiemlien, Sielmat Christian Hr. Sec. School, Joy Vahsi d/o Samuel Kipgen, Sielmat Christian Hr. Sec. School le Doudikthang s/o T. Zammang, Rayburn College le Commerce Topper mi 3: Lalngailian s/o Thiansawi, VK. Tawnna College, Fimlunthang s/o Laltuokrem, VK. Tawnna College le Ginsuankhup Tonsing s/o Khamlianthang Tonsing, Rayburn College hai kuomah lawmman Rs 5000, Rs 3000, Rs 2000, + citation  inhlan an ni bawk.

Anni baka hin CBSE hnuoia Class X topper 3: Joshua Khupmuanlian Tunglut s/o Tunson Tunglut, St. Paul’s Institute, L. Lianmuansang s/o L. Velson, St. Paul’s Institute, Moirangthem Daniel Singh s/o Moirangthem Dinamani Singh, Rayburn High hai kuomah lawmman Rs 3000, + citation inhlan an ni a, CBSE hnuoia Science Stream Topper E. Tuanchinmang s/o E. Thiankholal, Rayburn High,Commerce Stream Topper Ngamminsat Haokip s/o Thangmang Haokip, St. Paul’s Institute le Arts stream Topper Seiminlen Haokip s/o Lamlet Haokip, St. Paul’s Institute hai kuoma lawmman Rs.3000, + citation inhlan an ni bawk.

Science Exhibition le Maths competition
CCPUR: July 8, 2016 khin Vimala Raina H/S­ah Govt. School­a kai Class VIII inchuklai hai ta dingin District  Level science Exhibition and Mathematics Competition, 2016 um a tih. Inhnikna nei student han mani headmaster/headmistress hai recommend­nain thang thei le June 25, 2016 chenin ZEO office­ah inhnina peklut thei ning a tih. Science competition theme chu­ Science: Water harvesting le Mathematics competition theme chu ­Daily Mathematics ti ning a tih.

ADC in thupawimaw tum tum an rel
CCPUR: ADC/ CCPur –a MDCs hai chun zanikhan Mr Langkhanpau Guite Chairman, ADCC inrawinain District Council Hall­ah sitting an nei a, hi huna hin agenda tum tum hriltlangin an rel. An thu rel hai lai Village 9 hai laia village 8 recognised dinga recommend ding; Bazar­a Vawksa zawr ding hai a hmul tha taka an sukfai ding; Grocery store le Arsa zawr kawp hai trade licence kansel pek ding; Arsa zawr han an Sa zawr ding hai thienghlim takin glass sunga an sie ding ti hai a thang.



Chun, tuta inthawk thlakhat sungin khawpui sunga dawr siem han manual weighing scale hmang ta lova electronic weighing machine/scale an hmang ta ding le student hai ta dingin District Library indin thara tha taka in function tir ding ti hai ADC sitting chun an hriltlang bawk. Garbage Management chu concerned EM/ haileh study thaw a Executive meeting in a hriltlang dingin an rel bawk.

Ngaibuoi lo dingin a ngen
CCPUR: Tulai hin District Hospital, CCPur­ah ICU ward ang deu Sick Newborn Care Unit (SNCU) siemna sin thaw mek a ni a. Hi lei hin damnaw thenkhat chu  hospital veranda ah temporary in an insawn dawk tawl niin MS Dist. Hospital chun a hril a, mipui tukhawm lo ngaibuoi lo dingin a ngen.

JAC in Victims family hai an hmupui
CCPUR: JAC Against Anti­Tribal Bills chun zani sun dar 11 khan JAC Information Centre, KKL Complex, CCPur­ah Anti Tribal Bills le inzawma Victim families hai meeting a neipui. Hi huna hin June 26, 2016 nia Tribal Movement ni 300 a tling ding le inzawma JAC in victim family hai le Village chief hai Delhi­a protest buotsai an tumna chungthu an hriltlang. Delhi­a protest a thang ding hin victic family a inthawk nu annawleh pa pakhat seng Delhi fe dinga remti a ni a, an inzinna ding sum seng chu JAC fund­raising Cell kuta sie a nih.


NEHU hnuoia tlangmi UG top 10 a thang phak hai
CCPUR/SHILLONG: North Eastern Hills University (NEHU) Shillong hnuoia B.Sc le BA result eini tlangmi iemanizat zet top 10 lai an thang phak. HSA member bik­a top 10­a thangphai hai chu – Sociology­ah Songthiengpui, d/o Lalringum Songate, Nehru Marg ( Sociology)  of Women’s College 2nd position; Darthahnieng, d/o Lakhawmawi Songate, Lamka of St. Edmund’s College 4th Position, St. Emdund’s College; Environmental Science­ah  Calvin Lalhmingtha s/o PC Lalngailiana, Rengkai  4th Position;  Environmental Science –ah Celia Lalsanhim d/o Pu Lalnunsang, Rengkai 6th Position (St. Edmund’s College); Physics­ah Immanuel Malsawmlien, s/o Lalramhlan, Muolvaiphei, 5th Position ( St. Emdund’s College); Edwin D Zote, s/o Zarzolien Zote, Ngurte 10th Position (St. Emdund’s College);  Zoology­ah Solomon Rorellien 4th Position, of Union Christian College hai an nih.

Eini tlangmi dang top 10 a thang phak hai chu­ Biochemistry­ah  Kim Rose Hauneikim (St. Edmunds college) 8th position;Clinical Nutr & Dietictics­ah Ching Hau Vung of St. Mary’s College, Shillong 1st position a ni a, Neikhokim Kipgen of St. Marys College  chu 8th position a nih. Electronics ah Hollunlen Manchong of St. Edmund;s College chun 9th position a lak. Environmental Science­ah M. Khaiminlun of St. Edmunds college in 1st position;St. Edmunds college a inthawk vawng Elizabeth Nemhoikim in 3rd position; Solomon Haokip 10th position a nih. Chun, Statistics (hons) ah Lalrinawmi Hrahsel of St. Anthony College in 1st position a lak bawk. Arts (BA) ah khawm eini tlangmi top 10 chena thang phak thahnemtawk tak an um bawk.

AMTWU team an hung tlungkir nawk tah
CCPUR: June 11, 2016 a inthawk Tlangram biel hmun tum tum haia Anti Tribal Bills thua mipui laia awareness thaw dinga inzinsuok All Manipur Tribal Women Union (AMTWU) team chu June 13, 2016 khan CCPur an hungkir nawk tah. AMTWU team hin Thanlon Sub digvision sunga hmun tum tum haiah Bills chungthuah awareness hlawtling takin an hang nei zo a nih.

NERP thuah training an nei
CCPUR: Dist. Election Officer/DC/CCPur inrawinain zani 11:00AM khan Tuibuong a Dist. Training Centre Hall –ah 55­Tipaimukh, 56­Thanlon, 57­Henglep, 58­CCpur, 59­Saikot le 60­Singngat haia Booth Level Officer han National Electoralroll Purification Program (NERP) thuah training an nei. Hi huna hin AERO/SDO han Electoral Roll indiklo hai sukdik dan ding hrilhrietna an nei.

Saikhawpui Games & Sport ­cum­ Award Ceremony an hmang
CCPUR: June 13, 2016 sun le zan khan Saidan khuo­a Joint Philanthropic Organisation­ HSA, HWA & HYA/Val­Upa hai huoihawtnain Saikhawpui Games & Sport ­cum­ Award Ceremony & Entertainment Nite 2016 hmang a nih. Sun huna sports le competition item dang danga inruolsiekna le infiemna nei a ni a, zan huna award semna hun hmang a nih a, tukum Clas X le XII passed hai lawmpuina  le chawimawina certificate inhlan an ni a, Rev. Challienkung in student hlawtlingna chang hai tawng­taipekna a nei. Hi huna hin Chief Guest in Pu Lalhrillien bieltu MDC, Saikot; Guest of Honour in Pu Lalrohim V/A Saidan, Functional President in Pu Rohminglien Chief of Saidan hai an thang.

Pu Lalhrillien chun, thalaihai hi ei ram dawmsangtu ding ei nih; inferiority complex ei nei hi tawpsan ei tiu, class X le XII pass lawmman pek ding ei tam, mi thaw thei chu ei ni khawmin ei thaw thei ding a nih. Economic, political education future ei nei, Manipur­a Chanchintha mansapui bangna ei nih; Krisienna, Political movement Hmar haia inthawk tribal laia intan a nih. Hratnawa ei inngai lai khawm  Pathien zarin Political movement nei hmasa tak ei ni a, education a khawm ei inhnuoi nawh. Saikawt Sub­Divsion, Tipaimukh Sub­Division, Vangai Sub­Division, Pherzawl ADC ei nei ta a, Mizorama SHDC interim kum 23 lai zet a um ta bawk a, Hmar haiin World record ei siemna a ni awm. Assam, Tripura, Meghalaya, Manipur le Mizoram haia Hmar hai chengna infukzie hi student han ngaituo ro; inthuruol takin kal pen inla state khawm nei thei ei nih. MLA/MDC/Infrastructure ei ngaituo phak  tanaw chun assimilate in um ei ta, mi sirdein um ei ta, ei inthuruol chun hnam danghai inhnar ei ni ding a nih tiin a hril.

Saidan JB school building puitling nei dan ding buoipui mek a ni a, sawrkar a buoi thut naw chun tuta thla sung sukfel hman beisei a ni a, Saidan khuo tui lakna  ding proposal siem a nih; mipui aiaw, palaina sin thaw ka ni leiin kan duthaw hle a nih tiin program huoihawttu hai ditsakna le thilpek an hlan. (input LRS Puruolte /photo: Muona Infimate)

Tribal Peace and Harmony Award 2014­15 sem a nih
IMPHAL: Tribal Research Institute (TRI), Manipur huoihawtnain zanikhan Tribal Research Institute Conference Hall, Chingmeirong, Imphal­ah Tribal Peace and Harmony Award, 2014­15 sem a nih. Hi huna hin CM O.Ibobi Singh; Deputy CM Gaikhangam; Ministers, MLAs le sawrkar officer lienhai an thang tawl.  Hi Award hi mi pahni kuomah inhlan a ni a, Award dawngtuhai hi Rs. 50,000/­ ve ve le Citation inhlan an nih. Hi Award dawngtuhai laia pakhat chu Rev.  S. Prim Vaiphei a nih.

Hi huna CM O.Ibobi Singh in thu a hrilnaa chun, Manipur­a chenghai chu inngei diel diela um tlang dingin a ngen. Nangni Kuki, nangni Naga inti hi a tul kher kher nawh. Unau seng le Manipur mi seng ei nih. Nangni chu hnam, keini chu hnam tia inlakhran hi a thatna hrim hrim a um nawh. Lungril chiterek ei put hi bansanin lungril lien put seng ei tiu. Inlungruol diel diela ei um phawt chun ei ram le hnam hi a hung inthanglien ding a nih tiin a hril. CM O.Ibobi Singh chun, hnam tum tum le sakhuo hran hran zui ei ni leiin midanghai sakhuo in­thuoidan hriein inzatuo seng ei tiu tiin ngenna a siem bawk.

Ei inpumkhatna hung sietna chu ei state a mi thenkhatin hmasielna lungril an put lei a nih. Hnam tum tum hai nundan le sakhuo hai inzatuo pek seng ei tiu a, ei thu hril le ei thil thawin hnam dang hai lungril a sukna dim ti le a suklawm dim ti hai hi ngaituo nawn rawp ei tiu tiin Gaikhangam in thu a hrilna huna mipui hai a ngen.

IMC Corporators han sesamna annei
IMPHAL:Zani 1:05PM khan IMC Conference Hall,Imphal­ah Imphal Municipal Corporators a thlangtling han Ningthoujam Geoffrey, Deputy Commissioner, Imphal West hmaah  Councilor  dingin sesamna annei. Seats 27 umna IMC election­a khan Congress in seats 12, BJP in seat 10 le Independednt in seat 5 an lak a nih. Independent­a thlangtling mi 5 hai laia mi 3 in Congress an zawm leiin Congress chun Corporators 15 an  hung nei ta leiin IMC­a hin sawrkarna siem an tum a, sienkhawm IMC Mayor sin chel ding an la puonglang nawh.

Police han Phensidyl bur 500 leh mi 2 an man
IMPHAL: Victoria Yengkhom, Additional SP, Bishnupur (Ops) le a rawi han zani 8:30AM vel khan Western gate, Kangla bulah Md. Wahidur Rahaman (28), s/o Md. Amu of Waithou Sangomsang le Md. Amir Khan (43), s/o Md. Abdul Garib of Lilong Chaobok Lamkhai hai chu an chuongna Maruti Van MN04A­8763 le Phensidyl bottles 500 leh an man. An hnawt zek hnunga an man a nih.

Counselling proforma lak thei
IMPHAL: Academic Session 2016­17 sunga Manipur sawrkar tira B.Sc (Hort) inchuk nuoma ICAR hnuoia 21st All India Entrace Examination (AIEEA­UG­2016) a thang hai ta dingin Rs. 300/­ (UR) le Rs. 200/­ ST/SC/OBC pein June 15­30, 2016 inkar sung khin Counselling proforma Directorate of Horticulture & Soil Conservation, Sanjenthong, Imphal­ah lak thei ning a tih. Hi Counselling proforma hi fill up zoin June 30, 2016 chenin hi Directorate a hin peklut thei ning a tih. Hun tiemchin liem hnunga chun peklut phal ni tanaw nih tiin Director, Horticulture & Soil Conservation, Govt.of Manipur chun inhriettirna a siem.

Entrance Exam hun sawnhnai
IMPHAL: Medical Directorate, Govt. of Manipur hnuoia Manipur Para­Medical & B.Sc (Nursing) Entrance  Examination, 2016 June 26, 2016 (2PM­3PM) inkar sunga nei dinga ti chu June 19, 2016 (10AM­11AM) inkar sunga nei lem dinga sawnhnai a nih tiin Dr O.Ibomcha Singh, Director, Health Services, Manipur chun inhriettirna a siem.

Career Guidance le Health awareness
IMPHAL: Red Shield Division hnuoia Maram Battalion, Senapati Brigade chun June 13, 2016 khan Chawainu village­ah Career Guidance discussion an buotsai.

Chun, June 14, 2016 (zani) khan Red Shield Division hnuoia N. Khunou Battalion, Loktak Brigade chun SDO Complex, Gaidimjang, Khoupum valley ah water borne disease le Malaria laka inveng dan ding thuah health awareness lecture an buotsai. Hi huna hin All Zeliangrong Students Union (Khoupum area) le khawsung thuoitu hai khawm an thang (PIB Defence, Imphal).

Darkar 66 General strike
IMPHAL: All Manipur United Clubs Organisation (AMUCO) chun June 15, 2016 zanrila inthawk darkar 66 sung Manipur pumpui huopin General Strike an thaw ding niin Chanchinbu thenkhat chun an zieklang.

Annual GPF e­statement 30 zo fel
IMPHAL: Grade­IV thang lovin Manipur sawrkar hnuoia thawktuhai Annual GPF e­statement, 2015­16 chu zo fel ta le official website:http://agmpr.cag.gov.in ah download thei a ni ta tiin Account officer (EDP), Accountant General (A&E) office, Manipur, Imphal chun inhriettirna a siem. Mobile number pelut lo hai chun download thei naw nihai. Hi lei hin thawktuhai mani mobile number pelut lo hai chun download thei naw nihai. Hi lei hin thawktuhai chu an mobile number pelut dinga inhriettir an nih.

Odisha Governor in Maoist haia inthawk vauna
BHUBANESWAR: Odisha Governor Dr S.C. Jamir chun June 13, 2016 khan Maoist helpawl haia inthawk vauna lekha a dawng. Maoist han vauna lekha an peka chun Dr S.C. Jamir chu Governor a ninaa inthawk inban ding in an inhriettir bakah  Raj Bhawan bomb dar dingin an vau bawk a nih. Vauna lekhaa hming ziektu hi Ravinda Verma le Mantu inti hai an nih. Police hai khawmin vauna lekha hi a hmu ngei thu an sukchieng ta a, an suizui mek. Hienganga vauna lekha hi  hieng mi pahni hai hin VVIPs thenkhat kuoma khawm an thawn ta a, an lekhathawn hi Hindi tawnga ziek a nih tiin  Odisha Police chun an hril. Dr S.C. Jamir hi Nagaland Chief Minister khawm lo ni tah, that tuma beinaa vawi 5 zet lo tuok tah, sienkhawm hima suok dawk pei hlak a nih. Dr Jamir hi tuhin Z­Plus security pek zing a nih.

Assam Forest officer man
GUWAHATI: Assam­a Anti Corruption officials hai chun zani hmasa khan Divisional Forest Officer (DFO) in pahni hai an dap a, sumfai Rs. 2 crore bakah Sakei le Sakhi vun thangin ramsa dang dang vun dapdawkin an man. Mana um DFO chu Mahat Talukdar niin Dhemaji forest division DFO ni lai mek a ni a, a office­ah sumdawngtu pathum haia inthawk thamna Rs. 30,000 a lak lai taka an va man a nih. Ramsa vun le pawisa dang hai chu hi hnunga Dhemaji le Guwahati haia a in hai an dapnaa an dapdawk le man a nih.

Nuhmei phingsunga thil inbawk kg. 7 a rik
THIRUVANANTHAPURAM: Kerala­a Medical College hospital­a chun  nuhmei kum 45 mi phingsunga inthawk thil inbawk kg. 7 zeta rik ding hlawtling takin an at tawk. Hiengang case hi khawvel pumpuiah 186 chau a la um niin doctor hai chun an hril. A hmain hospital dang dang haia khawm doctor a lo pan ta hlak a, sienkhawm a phing sunga thil inbawk hi a hung inthang pei leiin June 2, 2016 khan hospital­a admit a ni a, Ultrasound laa tha taka enfel a ni hnungin June 11, 2016 khan operation thawa at dawk a nih.

Delhi Transport minister an ban
NEW DELHI: Corruption thawa intum Delhi Transpot minister Gopal Rai chu zanikhan minister a ninaa inthawk an ban a, Health and PWD minister Satyendra Jain chu transport ministry in chelsa tir a nih. Hieng laizing hin Mr Gopal Rai hi a hriselna thatnaw leia minister a ninaa inthawka inban niin ei thu dawngna thenkhat chun a hril. Mr Rai chun, app­based premium bus service scheme thua corruption thawa intuma a umna chu thudik le sukchiengna a um chun Jail intang dinga inpeisa a ni thu tuta hma khan a lo hril ta a nih.
........................................................................................................................................
VAWISUN THUPUI
Ngai ta ka hung vak ding a nih; mi tin an thilhtaw ang peia pek dingin ka lawmman ka kuomah a um a. Kei Alpha le Omega, a Hmasatak le a Nuhnungtak, a Bul le a Tawp ka nih.­ Thupuongsuo 22:12­13

Editorial: Ei tawpna chu inremna a hung ni tho tho ding

JAC Against Anti­Tribal Bills huoihawtnain June 9, 2016 zanrila inthawk ni 10 sung aw dingin Manipur­a National Highway haiah Economic blockade thaw tan a ni a. Economic Blockade leiin Manipur mipui chun harsatna chi tum tum ei tuok pha mek a. Hi thil hi ei tuok ding hrim a nih ti chu ei hriet sa a nih. Amiruokchu, sawrkar ei nawrna dingin bandh annawleh economic blockade ti lo thil dang le hmangruo dang ei hriet sinaw leiin ei thaw nawk el hlak. Ei lungawinawzie suklangna ding le sawrkar nawrna ding hin lampui dang annawleh hmangruo dang nei thei ta inla nuom a um ngei el. Hi kawngah hin phaimi le tlangmi hai indem le insawisel thei bik ding ei um nawh. Bandh le economic blockade hai hi Manipur state hming inlarna pakhat a nih. Ei state hming inlar vena ding chun ditum lo takel a nih. Nisienlakhawm ei thaw thei tawk umsun a ni ve tlat leiin ei phutawk, ei tuor ding le ei chan ding hrimah ei ngai le ei pawm thiem el a tul a nih.

National Highway haia economic blockade beiletna le thungrulna dingin Manipur phairam mihai chun Counter blockade an thaw tan a, an hmalak dan enin Counter blockade hi hmun dang dang haiah khawm an la thaw pei ding niin an lang. Tuta tuma Manipur tlangram district pangahai laia Counter blockade  tuor hmasa tak chu Ukhrul district  an nih.  Tlangram district danghai khawma counter blockade hi tuok ve nawng ei tih ti thei chi a ninaw a, ei la hmabak seng a nih. Amiruokchu, counter blockade hin ra tha an suo naw ding a ni leiin thaw zawngsak chi niin an lang nawh. Kakhawk thalo tak a la hung intlun ding a nih.

Tuolsung Chanchinbu thenkhata ei hmu danin All Manipur United Clubs Organisation (AMUCO) khawmin June 15, 2016 zanrila inthawk darkar 66 aw ding General strike thaw an tum niin an zieklang.Hi khawm hi JAC Against Anti­Tribal Bills in National Highway haia Economic blockade an thaw mek Counter ding tho niin an lang. Tlang takin Counter blockade niin hril naw hai sienkhawm, an thiltum chu tribal mihai thil thaw kalna, beiletna le thungrulna ding niin an lang. Chuong ninaw sienla tulai taka hi pawl hin general strike an thawna ding san a um nawh. June 14 Protest Day an hmang hlak chu kum 2001 a inthawka an lo hmang tan ta a ni leiin a ni ding hrima ngaina a um ta a nih. Darkar 66 zet general strike an zuk thaw elna ding san dang a umin an lang nawh.

Manipur a cheng, a bikin Manipur mi indik taka inngai le inhrilhai thil thaw dan le hmalak dan hi ei en vang vang a, hnam le hnam thila intheida theina ding a um hlak niin an lang. Hienganga thil ei thaw tawl pei a ni chun hnam le hnam, chi le chi intheidana el chau ni lovin inbeituona hiel a la hung intlun thei ding niin an lang. Hi lei hin ei thil thaw dan le ei tawngbau suok haiah ei fimkhur hle nuom a um. Counter blockade ei inthaw khuma, tawngbau thanaw le mawi lo tak tak ei hmang rawp chun intheidana le inhmelmakna chen la hung rasuok thei ding a nih. Ei hriet seng angin ei state sunga hin communal feeling hi a hrat hle a, communal clash a lo suok rawp ta hlak a nih.

Ei hriet seng angin tuta hma khan Meitei le meitei­pangal hai inkara dam, Kuki le Naga hai inkara ram, Kuki le Zomi hai inakra dam communal clash a lo suok ta hlak. Communal clash um hai lei khan thina le hliemna mi tam takin an tuok a, in le lo an chan a, naufahra lo ding an naufahra pha a, hmeithai lo ding an hmeithai pha a, parawl lo ding an parawl pha a, piengsuol lo ding an piengsuol pha bawk. Communal clash khan rasuok tha hrim hrim a neinaw a, a rasuok chu sietna tiengpang vawng a nih. Hi lei hin ei state a hin communal clash hi hung um nawn nawk (repeat) tanaw sienla nuom a um takzet.

ILPS le inzawma Bills 3 passed­a hung um ei fepui dan hi phaimi le tlangmi han ennawn inla nuom a um. Bills 3 hai hin sietna rapthlak tak a hung intlun pal inlau a um em em el a. Sietna rapthlak takel a hung intlun  naw hramna dinga ngaituona tha le lungril thienghlim ei puttlang seng hi nuom a um bek bek a nih. Manipur mihai inkara sietna intlun thei zawnga chetna le tawngkam nei hai hi chu a tu tieng tieng khawma thaw lo ding a nih. Iengpo khawm hungtlung sienla a tawpna taka pawimaw le tul chu inremna tho tho a hung ni ding a nih. Chuleiin, Bills pathumhai chungchanga hin phaimi le tlangmihai hin inremna siem thei hram inla nuom a um. Ei tawpna ding chu inremna tho tho a hung ni ding a nih.

Post a Comment

Powered by Blogger.