Solar Water Heater hmang thei loin a la um
CCPUR: District Hospital, CCPur­a Labour Room le Operation Theatre (OT) haia ding tuilum lakna ding Terrace a sie Solar Water Heater chu technical failure leiin tuchen hin hmang thei lovin a la um tiin Medical Supdt. District, Hospital, CCPur chun a hril. Solar Water Heater­a inthawk tuilum lakna ding pipe le thil dang dang hai fit zo nita sienkhawm local level­ah technician umnaw leiin repairing thaw zo thei lova la um a ni thu a hril bawk.


Thienghlimna tiengpanga District Hospital in Rs. 50 lakh award a hmu hmangin hospital maintenance sin thaw mek a ni a, 300 MA X­Ray Room le CT Scan siena ding siem mek a ni a, X­Ray le CT Scan kawta inbuk ding Lead Plate 2 (Rs. 30,000 per plate) khawm hmang thei dinga um a nit a thu; X­Ray Focus Roller le Room tuong (floor) tile pha a ni ding bakah Eastern Block building kila patient le attendance hai hmang ding toilet siem mek a ni bawk. District Hospital chun emergency case a hmang dingin Medical Directorate, Imphal­a intahwk damdawi tumtum a ni ding ang takin a hmu zing a, hieng hai hi district hospital emergency case  um hun huna hmang hlak an nih tiin Medical Superintendent chun a hril bawk.

Land record hai SDO/BDO Tuibuong­ah 
CCPUR: SDO/BDO Office, Tuibuong full­fledge a hlangkai, hawng le a function hnungin Land Records tam tak SDO/BDO Office, CCPur­a inthawk transferred a nih. Land Records transfer­a um hai lai Saikawt Lourup area khawm Tuibuong SDO/BDO a dingin transfer a nih. Saikawt Lourup area hi constituency­ah Saikawt hnuoia um nisienkhawm SDO/BDO CCPur hnuoia um ding a ni a. Sienkhawm Tuibuong SDO/BDO Office, Tuibuong tieng transfer a nih. Hi chungtu hi  tha taka sukfel a ninaw chun  hmatieng peiah Land record thuah buoina  la hung um ding a nih tiin complaint tam tak dawng a nih tiin ei thu dawngna chun a hril.

Truck in pasal pakhat a sut hlum
CCPUR: Mr Khaikhomang Haokip @ Khaimang (37) s/o Hoikhonieng of JNV Road, Headquarter Veng, CCPur chu zani zingkar khan Teisieng rama lung an laknaah Truck in a sut hlum. Ei thu dawngnain a hril danin zani sun dar 11 vel khan Teisieng­ah Shaktiman Truck­a lung phur dingin an fe a, lamtung an kai laiin an motor hi an tang a, keidawk tuma an buoipui laiin Truck hi hnungtieng a hung intawl thut a, chu huna bang le a nawrde niin  a hril. Inrang takin hospital hung panpui a ni a, sienkhawm hospital tlungpui a ni hmain a hliemna tuorzo lovin a thi a nih.

Zanikhan motor neitu hai le mithi sung han ran thatin ngaidam an inhni iengangin am an inbiekrem hriet a ninaw a, a ruong hi vawisun hin vuiliem ning a tih. Mr Khaikhomang Haokip hi anni unaua pasal umsun le an insunga fakzawngtu tak nia hril a nih.

Dio motor pakhat raw
CCPUR: May 23, 2016 zan dar 7 pel  met vel khan tu ti hrietlo misuolin Pu Lalkhawthang of M. Ramthar Dio motor chu inkhawmah an fe karin an lo raw a, a kang siet hne hle. Motor hi iengleia an raw am ti hriet a ni thu motor neitu hin a hril. Dio Motor hi an in bula Kinetic Honda le an sie a ni a, Kinetic Honda seat khawm a kang siet nuol. An vengmi thenkhatin motor kang thu an hmu le inruolin an thel nghal a, thelmit vat  nawhai sienla chu an In khawm a kangkai  ring a nih.

HYA Saikot Branch in thisen an pek
CCPUR: Pu Singlienkhum @Khuma (81) h/o Pi Chawngsawnzo of Parbung chu Kal natna leiin hun iemani chena inthawkin Dist. Hospital, CCPur ah enkawlin a um a, thisen a mamaw leiin HYA Saikot Branch chun chanchin an hriet le inruolin an bawzui nghal a, thisen Unit hni May 24, 2016 khan an pek a nih. Tlawmngaia thisen petuhai chu Mr. Manthlalien s/o (L) Sana Leader, Manmasi Sec., HYA Saikot Br. le Mr. Buonhmingthang s/o Upa Ramhluothang, Member, HYA Saikot Br. an nih.

Chun, May 12, 2016 khawm khan Mr. Lalrosiem Sanate (48) s/o Mr. Ramhlun Sanate of Santing (Kawnpui) Kal natna bawka na chu Mr. Kaigoulien s/o Mr. S. Hangshing Member, HYA Saikot Br. in a lo pek ta bawk. Hienganga tlawmngai insuo a thisen petuhai chunga hin HYA GHQ chun lawmum a ti thu Info & Pub Dept fethlengin thusuok a siem .

Mobile phone 3 inrukhmang
CCPUR: Zanikhan Sielmat Christian Higher Secondary School, Lower Section tienga Teacher’s Common Room­ah rukru an lut a, Zirtirtuhai umnaw Karin Zirtirtuhai Mobile phone an inrukhmang. Hiengang hi thil la tlung zen zen ngailo a nih.

Mail Service tan nawk 
CCPUR: Bandh/Strike leia Post Office, Tuibuong­a ni 3/ 4 vel mail service chawlsana um ta chu zanita inthawk khan a pangngaia thaw tan nawk a nit ah. Mail service tan a ni le inzawm hin zanikhan speed post tam tak thawndawk a nih.  Post office in Mail service an chawlsan sung khan nikhat peiah revenue Rs. 7000/­ vel pei an inhmang phak niin Manager chun a hril.

WPF inrawinain tawngtairuolna nei
CCPUR: Women Prayer Fellowship, CCPur hmalaknain zani zingkar 10AM­2:00PM inkar sung khan Hiangtam Lamka a EBCC Biekin­ah tawngtairuolna hun hmang a nih. Tawngtairuolna hun hi Ms May Rose, Rev Lalpienglawm, Mrs Ngaihnem le Miss Kimkhonei han an inrawi a, program zoin Pastor D. Kamchinmang, Local Pastor EBCC Hiangtam Lamka in tawngtainain hun a khar.


Dist. Employment Exchange dawrtu an tam
CCPUR: Manipur sawrkar in Education (S), Medical Department le Police Department hnuoia sin hran hran lak a tum le inzawmin apply nuom han District Employment Exchange Office­a an in registered (sponsor) a tul leiin tulai hin Headquarter Veng, CCPur­a District Employment Exchange chu a lunin dawrtu an tam hle a, a hmuna hin Police khawm an duty bawk.


Form tam tak semdawk a nitah
CCPUR: Manipur Police Department hnuoia Police Constable (Male) post 2052, Follower post 564 le Manipur Rifles a Riflemen post 441 lakna dinga Tuibuong­a SP Office hmuna Application form semdawkna a fe mek a. Zani chen khan Forms 2282 semdawk a nitah. Application form semdawka um hai lai hin Police constable a ding 960, MR a ding 612 le Followers a ding 710 a thang.

Singngat­ah Awareness le Monitoring
CCPUR: Dr Liankhawzam Guite, DMO inrawinain District Malaria Department Staff hai chun May 26, 2016 khin  Singngat PHC le Sinzawm PHC hnuoia  PHSC tum tum (Suangdoh, Bualjkang, Kangkap, Tuikuimuallum, Mualnuam Songtal, Aibulon le Sumtuh PHSC) hai kanna nei an ta, LLIN semna neiin Monitoring & Evaluation program le inzawmin awareness  program hmangpui bawk an tih.

Dr Ambedkar Natl. Merit Award
CCPUR: Churachandpur District­a inthawk Dr Ambedkar National Merit Award to Students  (Class XII)  dawng ding mi 2 an um a, May 28, 2016, 1:00PM khin DC Office­ah lawmman Rs. 20,000 cheque le certificate inhlanna nei ning an tih. Hi award dawng ding hai chu Km.Ningthoujam Keflyn Devi d/o N.Ibomcha Singh of Chiengkawnpang le Ms. M.Baby Devi d/o M.Inao Singh of Zion Veng, Tuibuong hai an nih.

Manipur HSLC Examination 2016 result insuo; a pumpuia pass perecentage 65.37 (regular) le 62.00 (External) a nih
Hmar MIL a mark hmu insang tak Nk. Sylvia Lalnunmawi of Mt. Carmel School
IMPHAL: Board of Secondary Education, Manipur (BSEM) chun zanikhan HSLC Examination, 2016 result an suo a, regular canidates a chun a pumpuia pass percentage 65.37 a nih. Mi 32033 in exam form an fillup a, mi 31749 an exam a, first division­ah mi 6827 an passed a, second­ah mi 12987 le Third­ah mi 939 an passed a, a pass po po mi 20753 an nih. Kum 10 sunga  pass percentage chu, 2007 in 52; kum 2008 in 58%; 2009 in 57%; 2010 in 61%; 2011 in 71%;  2012 in 70%; 2013 in 73%; 2014 in 68%; 2015 in 61.5% le 2016 in 65.37% a nih. District wise pass percentage chu­ Tamenglong 82.54; Thoubal 75.39; CCPur 68.49; Bishnupur 63.36; Imphal East 62.54; Chandel 61.14; Ukhrul 60.55; Imphal West 60.10;  le Senapati 59.45 a nih.

HSLC (External) Examination, 2016 a chun mi 4550 in form an fillup a, mi 4520 an exam a, first division­ah mi 32, Second divisionah 1700; Third ah 1078, an rengin mi 2810 an passed a, a pumpuia pass percentage chu 62.00 a nih. A pasi hai Combined Certificate 06­06­2016 le Provisional Certificate cum Marksheet chu Rs. 550/­ pein 30­06­2016 a inthawk Board Office­ah lak tan thei ning a tih. Answer Script ennawn nuom han Rs. 400/­ pein result suoka inthawk ni 20 sungin form fill up a en thei ning a tih. Subject po po exam, subject pakhat chauva failed hai ta dingin July, 2016 haptakar khatnaa Compartmental examination (Regular & External) haiah thang thei ning a tih. Regular student a failed hai, HSLC Examination, 2017 a thang nuom nawkhai chu result suoka inthawk ni 25 sungin an school sengah admission anthaw nawk tul a tih. Compartmental Exam a thang ding han Application form an peklut a ngai naw a, mani school chitah exam fee peng an ta, an school in Board­ah an peklut el ding a nih.

A pumpuia pakhatna Sohara Laishram le pahnina Naorem Suzana Devi hai chu Nirmalabas School a kai ve ve an ni a, pathumna chu Maibram Vasundhrara Devi, Little Flower School a nih.Top 25 rank holder­hai lai Mangvung Lunkhomang Haokip, Eureka Academy le Thangkhochon Joyson Haokip, Heritage Convent hai sawmpahnina le Emmy Nengngainem Haokip, of Tiny Tots Unique School hai chu sawmparietna a nih.

Hmar MIL a mark hmu insang tak chu Mt. Carmel School­a kai Sylvia Lalnunmawi, d/o Lalsiemvel |hiek  le Darneizo of Saikawt niin marks 100­ah 93 a hmu a, Mizo­ah Maria Lalmuanpuii of Young Learner’s School niin marks 88 a hmu a, Paite ah Damsangmuan le Samuel Khual, marks 99 ve ve; Thadou­Kuki ah Niengpihoi Haokip, Green Wood Academy, Mark 98; Zou ah Vungdeiniang, Don Bosco H/S, CCPur marks 95; Vaiphei ah Paulalminthang, Mt. Olive School, CCPur marks 99 le Kom ahK. Hoineirose Kom, Loktak Christian Model H/S le S. Khupneihoi Kom, Little Flower School han marks 96 an hmuh.

JCILPS Volunteers 10 vel an hliem
IMPHAL: Zani 12:30PM vel khan JCILPS Volunters han Nitaypet Chuthek, Imphal hlukhum an tum a, Police han mipui dangna le hnawtdarna dingin Lathi­charge an thaw bakah tear gas an kap khum. Police le mipui inbeituonaa hin Volunteers 10 vel an hliem niin ei thu dawngna chun a hril

MPSC Office an khek khum
IMPHAL: Question paper chungchangah thil indiklo a um tia intum le Manipur Civil Services     Examination nei that dinga nawrnain zanikhan Kangleipak Student’s Association (KSA) in MPSC Office an va khek khum. Hi thil hi zani 10AM vela tlung a nih.

AR 6 hai an ram tieng phur
IMPHAL: May 22, 2016 a Chandel District a Joupi bula helpawl  han JCO pakhat thanga Assam Rifles 6 an kap hlum hai ruong chu zanikhan Vuongnain Tulihal Airport, Imphala inthawk an ram tieng phur an ni tah. Tulihal Airport­a hin inzana le chawimawina ropui tak leh mithiruonghai inthla liem an nih. Hi hunsera hin  CM O.Ibobi Singh; Dy. CM Gaikhangam; DGP LM Khaute, GOC of Indian Army, Sphera Core Lt. General Abhay Krishna, Civil le Military tienga Officer lienhai an thang tawl.

Sonowal in Assam CM dingin  sesamna a nei
GUWAHATI: Sarbananda Sonowal chun zani zantieng dar 4 khan an Governor P.B. Acharya hmaah Assam CM dingin sesamna a nei. Ama le inruol hin Cabinet ministers 8 le Minister of State 2 han minister dinga sesamna annei. Minister 10 hai laia 6 chu BJP le AGP le BPF a intahwk 2 ve ve an nih. Hi hunsera hin PM Narendra Modi; BJP President Amit Shah; Assam CM hlui Tarun Gogoi le BJP rorelna states 15 haia Chief  Minister­hai an thang tawl.

Smart Cities list  thar ah Imphal khawpui a thangsa
NEW DELHI:  Sawrkar thlungpuiin ‘Smart City Mission’ hnuoia Smart Cities a siem ding 2nd phase list a puong hai laia Manipur­ah Imphal khawpui khawm a thangsa.

Second phase –a dinga puong  khawpui 13 hai chu­ Warangal (Telangana); Lucknow, New Town Kolkata, Panaji, Pasighat (Arunachal Pradesh), Dharmashala (Himachal Pradesh), Faridabad (Haryana), Raipur (Chattisgarh), Bhagalpur (Bihar), Shillong (Meghalaya), Namchi (Sikkim), Port Blair (Andaman & Nicobar Islands), Diu (Daman & Diu), Oulgaret (Puducherry), Silvassa (Dadra & Nagar Haveli), Imphal (Manipur), Ranchi (Jharkhand), Agartala (Tripura), Kohima (Nagaland), Aizawl (Mizoram), Kavaratti (Lakshadweep), Dehradun (Uttarakhand) le Chandigarh hai an nih.


Air ­Ambulance tuoksiet a tuok
NEW DELHI: Zani 2:17PM vel khan Patna, Bihar­a intahwka Delhi pana fe Air Ambulance, a sunga mi 7 chuongna chu a tumna hmun ding a tlung hmain lo lai a tla thla a, a sunga chuong mi 7 hai laia 2 an hliem a, mi 5 himin an suok. A pilot chun a khawl siet leia vuongna hi tuoksiet tuok niin a hril.

Manipur le Sikkim han ‘no ­interview’
NEW DELHI:  India hmarsak state Manipur le Sikkim state sawrkar hai chun sawrkar thlungpui thupek/thurawn angin Junior level post sawrkar sin lakna haiah interview thaw hlak sukbo dingin hma an lak mek a, tuchena hin States 18 le Union Territories hai chun hiengang junior post lakna dinga interview thaw hlak chu an lo sukbo ta a nih tiin tulai hnaia Union Personnel Ministry  report chun a hril.

Hi thil hi sin lakna kawnga corruption/thamna bakah inditsakna sukbona dinga  PM Narendra Modi in a hung rawt le  nikum Independence Day hmang huna a thu hril huna a lo hrillang ta a nih.

Kum tlinglo motor khaltu hai hremna ding
JAIPUR: Empowered Group of Ministers (EgoM) chun India rama motor eksiden tlung rawn le eksiden leia mihriem thina tuok tam em em dangna dingin naupang kum tlinglo motor khaltu hai le traffic rule bawsetu hai hremna natak pek dingin a recommended. EgoM hi  sawrkar thlungpuiin an din niin Rajasthan Transport Minister Yunus Khan in an rawi a nih. Hi dungzui hin naupang kum tling lova motor khaltu hai chu an driving licence kansel ding le kum 2 sung jail intang ding   ti a thang.

Telangana­a lum leia thi mi 317 an tling tah
HYDERABAD:  Telangana a chun tukum sunga boruok lum  tuorzo lova mihriem thina tuok 317 an tling tah niin zanita state disaster management department thusuok chun a hril.  Lum leia thi tamna tak chu Nalgonda district niin mi 91 an thi ta a, Mahabubnagar­ah 44 an thi niin deparment control room thusuok chun a hril.  State sawrkar chun boruok lum tuorzo lova thi sunghai kuomah zangnadawmna Rs. 50,000/­ seng pek dingin a puong.

President in Ordinance­ah suoi a thaw
NEW DELHI: Zanikhan President Pranab Mukherje in Medical Entrance Test Examination le inzawma Ordinance siema umah suoi a thaw. Hi Ordinance hi hmang nghal dinga ti a nih. Ordinance dungzui hin National Eligibility­cum­Entrance Test (NEET) chu kum khat la zui lo annawleh la hmang lo thei ding ti a nih. NEET hi India rama states 24 um hai laia states 15 hai chun tha ti lovin an dodal a nih.

VAWISUN THUPUI
Lalpa chu kumkhuoin ring ro; Lalpa Jehovaa chun kumkhaw lungpui chu a um sih a. ­ Isai 26:4

Editorial: Addict seng seng

Addict ti hi ei tawng ninaw sienkhawm ei piengpui tawng ang ela ei hriet a nih. Ti ema chun hi thumal hi a thanaw tieng, hawp le hmuom, inruithei tienga ngawl invawi annawleh ching zawngsakna thilah eihmang rawn tak. A bikin drugs addict thilah eihmanglar em em a, drugs addict ti khawm hi ei tawng ni lo, sap tawng a ni a, nisienlakhawm mimawl tak chen khawma a umzie le a kawk ei hriet chieng em em el a nih. Zu ngawl invawihai hi Zu addict ti nekin Zu ngawl invawi ei ti kher hlak. Amiruokchu, Zu addict ti leh a umzie an ang tho a, Zu ngawl invawihai khawm hi drug addict hai ang bawkin Zu addict ti inla Zu ngawl invawihai hi an sim pha nuom deu dim maw? Addict ti tak nuom nawhai sienkhawm, addict anni tlat leiin Zu addict tiin ko ve inla, drugs addict hai ang deuin mihai dit lo le ni nuom lo an hung ni pal  chun addict ti thumal eihmang tangkaina a hung ni el rawi mawh.

Khawvela hin addict ding thil a tam taluo a, ei inveng seng naw leiin ei hriet naw kar le ei inring naw karin thil adict hi ei lo nei nawk el hlak. Addict seng seng ni inlakhawm thil tha tienga addict hi chu a tha a, a thanaw zawnga  addict nei ruok hi chu a tha naw a, addict lo hram hram ding a nih. Taimakna dam, indikna dam, ringumna dam, lungril thienghlimna dam, unau le mihai hmangaina le lunginsietna dam hi addict seng inla chu ei chengna khawvel hi tuta ei um dan pangngai nek hin chu an hawi lem ngei ring a um. Nu le pa, ram le hnam, khawtlang le kohran thuoituhai khawmin addict tha naw nekin addict tha lem nei dingin inchuktirna uor zuol sau sau inla nuom a um.

Nuomin nuomnaw inlakhawm mihriemhai hin addict ei nei seng a, addict nei seng ei nih. Addict nei seng seng ei ni tawl leiin  indem le insawisel thei ding ei ni naw a, addict  seng ei nih. Ei thil addict hi an ang tawl nawa chau a nih. Mi thenkhat chun midem, mi rel le khel hril an addict a, mi dem lo, mi rel lo le khel hril lovin anum thei bik der nawh. Drugs Addict le Zu addict han an thil du, an thil ngai le an thil ching zawngsak an hung  mamaw huna um tawk tawk  thei lova an invir vel a, an pang an huot vel ang tho hin mi dem hmang, mi rel hmang le khel hril hmang hai khawm hi an hun a hungtlung pha chun an inza zawk zawk a, pansak le panthlanghai inah lengin an thil addict­na chu an va thawin an va hril el hlak a nih.

Mi thenkhatin fakrukna, thamna an addict a. Fakrukna le thamna hai hi thil indiklo le suol a nih ti an hriet sa khawmin an thil addict a ni tlat leiin fakrukna le thamna lakna hun remchang a hung umpha pha chun an insum thei naw a, anni le anni inthunun thei lovin fakrukna an thawin thamna thil hai an lak nawk el hlak. Hiengang mihai hin thil addict neiin an inhriet ngai naw a, sienkhawm addict nei anni leiin thamna thil le fakrukna thil hai lain an thaw el hlak a nih. Thamna le fakrukna kha drugs addict le Zu addict ang tho a thil thanaw le suol a nih. Amiruokchu, ei ni rawi lai hin chu thamna le fakrukna ei ti hai chu suolah ei ngai naw mani ti dingin a um. A san chu drugs addict le Zungawl invawi hai chu a suol bikah ngaiin ei hmu lien hlur el a nih.

Drugs addict, Zu ngawl invawi, tuolthat, ruk ru, insuom, inthuoihmang, nuhmei pasal uire, nuhmei suollui le suol turu dang dang hai khawm ei hmu lien hlur a, thamna, fakrukna, mi hlem, khel hril; ringumawna,indiknawna le a dang dang hai chu ei ngainepin ei ngaina thiem a, hi lei hin hiengang thil hai hi ei lo chieng le thaw zawngsak a, ngaiah ei lo nei khawmin addict angin ei inngai naw tlat el hlak. A umzie taka chun addict tho tho ei nih. Hi taka hin addict ti thumal kha ei hmang indik naw a, ei hmang suol lui hram hram el hlak niin an lang. Addict umzie hi ei inlet dik nuom naw hlak bawk.

Lungsen, tawngbau tha naw, tawngbau zamaw, hrangsiet le nungchang tha lo ei tihai khawm ku hi addict thei a nih. Amiruokchu, ei addict a nih ti ei hriet nuom tlat naw leiin ei bansan nuom chuong nawh. Fe dan pangngai, hril dan pangngai le thaw dan pangngaiin ei nei  pei el a nih. Addict seng seng ei ni a, ei addict thil hai an ang naw a chau a ni a, addict nei seng ei nih. Kei le nangin iem addict thalo ei nei a ti hi ei ngaituo rawp hlak nuom a um. Addict seng seng lai khawm addict tha le thanaw ei um a nih. Iem ei addict tha naw a ni a ti hi hriet suok a, addict tha naw ei lo nei chun bansan tum ei tiu. Addict seng seng, iengang addict tha lo nei am ei ni a ti hi hriet suok a, bansan chu ei renga ta dinga thil tha a nih.

Post a Comment

Powered by Blogger.