Responsive Ad Slot

Mizoram Sawrkar High Court ah Hek a nih

Wednesday, May 25, 2016

/ Published by VIRTHLI
Aizawl, May 25, 2016 (VIRTHLI): HPC leh Mizoram sawrkar, tuta sawrkar lai mek Pu Lalthanhawla keihruoi congress party hai le kum 22 lai liem tah, 27th July 1994 kuma remna thuthlung an lo ziek tah, vawisunni chena fel lo thubuoi (case) chu vawisun khan Gauhati High Court rel dinga inhlan fel alo ni tah thu Pu Vanlalsiama, Chairman, Sinlung Hills Accord Implementation Demand Committee (SHAIDC) chun a hril.

Sinlung Hills Accord Implementation Demand Committee (SHAIDC) chun, 12 February 2016 khan, Sinlung Hills Development Council (SHDC) accord chungchangah Pu Lalthanhawla Mizoram CM chu a lo dawr taa. Chu huna chun, SHDC Accord sukpuitlingna ding chungchanga hin court a inkhing buoi ngai kher lovin, sukpuitling dinga phut a ni a. Hi phutna hi a sukpuitling ngei ding le ding naw, thlakhat sunga thuchieng hril dinga ngen a ni bawk a. Amiruokchu, iengkhawm dawnna hmu ani naw leiin 25th May 2016 hin mipui ditdan ang ngeiin Court rel dinga inhlan ani thu chu Pu Vanlalsiama chun a hril a nih.


A hril peina a chun hi chungchanga hin, Mizoram mipui hai bakah Zohnahthlak hmuntina chenghai hriet ding tul le makmaw chu, Mizoram sawrkar-in, "Hmar hnam hi Mizoram neitu ani bakah hnam bil ang zawng chun a tam tak inni bawka, hnam hming zawnga District pek in ni chun, Ralte Lusei etc. khawmin hung ngen ve pei an ta, Mizoram hi neitu bik um lovin hnam dang han an mi chimral el ding a nih" ti a, HPC thuoitu hai an ngenna chu, HPC thuoituhai chun pawmin, Hmar District aiah SHDC sawrkar phuok pek ngei chu, an lo thlang ta lem a nih. Chuleiin SHDC Accord sukpuitling hi Mizoram thedar/kiemna ding ang zawng le hnambil politics ang zawnga ngaina hi, Zonauhai thanghmabawk laia pakhat a nih, ti hi ei hriet tlat a tul a nih tiin Pu Vanlalsiama chun a hril.

Pu Vanlalsiama chun Christian zaa za intina ram ngei a, khawvel politics inhlemna tirdakum tak le lien tak pawl, political accord interim period kumhni ding a ti chu, kum 22 lai zet a tling ta hi, chingfel a ni chun, Zonauhau insuikhawmna dinga rabi pakhatna ei chuongkaina hun ding a ni, ti khawm hi hriet seng ei tiu tiin a hrila, chun SHDC remna thuthlung hi chingfel a ni ngeina dingin Zoram mipui po po kuoma lo tawngtai pek dingin fielin an ngen thu a hril bawk a nih.


Don't Miss
© all rights reserved
made with by Simon L Infimate