CCPUR | Virthli News: March 5, 2016 zingkar dar 7:50 AM khan HSA Buonzawl, HSA Campus, Rengkai, CCPur hmunah HSA JHQ CCPur chun hun sawttaka inthawka resolution-a an lo thlak tah Manipur-a Hmar MDC hai Chawimawina Thuziek an inhlan. Hi hun hi Mr. Joshua L. Amo Info. Secy., HSA JHQ CCPur in a kei thuoia 1 Korinth 10:31-na a tiem zovin hun hawng tawngtaina Pu Timothy Z. Zote Adviser in a nei a. Lawmlutna Tv. Lalthanzau President, HSA JHQ CCPur in a nei zovin Pu Gospel Hrangchal in Activities Report a pek a, chuzo chun Secy., Education Nk. Lalhlimum in MDC hai kuomah Chawimawina Thuziek hai tiemsuokna a nei zovin Tv. lalthanzau Interim Prez, HSA JHQ CCPur, Pu Solomon Joute le Pu Timothy Z. Zote Adviser hai pahni in MDC hai hi an inhlan.

Hi huna Chawimawina thuziek peka umhai chu Pu Lal Hossan MDC Vangai (Vice Chairman, ADCC); Pu Lalhmangpui Fimate MDC, Pherzawl/Parbung le Pu Lalhrillien MDC, Saikot hai an nih. Pu Lalditsang  MDC, Senvon ruokchu hi huna hin remchangnawna leiin a'nlang thei nawh. Anni hai tawngtai pekna hi Rev. T. Remthang Hrangchal (Retd. Pastor, ICI) in a neia Lawmthu hrilna Pu Timothy Z. Zote in a nei a. Hunkhar tawngtaina Pu Jeffrey Saihmang  Committee Member in a nei.

Hi huna MDC le midang dang ha'n thuhrilna hun an neinaa chun Hmar hai chu kawng iengkima bul tan tu tak ei lo ni hlak thu, HSA chu hnam pumpui huop a mi keikhawm theitu tak a lo ni zie, belchieng chun hmun hran hrana hai HSA neka pawl lien an lo um naw zie, HSA in thaw thei a hau zie, Inchuklaihai hmakhuo ngainaa hmalakna ding tam zie le ei rama inchuklai mekhai hma an sawnna dinga hmatienga hai HSA le inthlawpa hmalak pei an inhuom thu, Pastor hai khawm HSA inrawl a tul zie, Mani tawng ngai hlut a pawimaw zie le Hmar hnam le tawng a hring zing theina dinga inchuknain hran hran haia Hmar Vernicular inchuk a ni theina dinga nasalema hmalak dan ding hai an hril.

HSA JHQ CCPur hin tuta hma khan Joumuol, Chandel Dist., Manipur a siettuok hai chu Rs. 21,060/-, Bufai Bag 9 le sil-le-bil iemanizat dawlsuokin an lo pek tah a nih. HSA thuoituhai chun hmatienga  hai thil tha thaw a hmalakna ding tamtak a um zing baka a changa hming sietna le hming thatna an zat rawnga an dawng hlakna thu ah hmatienga hai thil fellema thaw a ni ding thu hai an hrillang bawk.

-LRS Puruolte | Photo: Jeffrey Saihmang




Post a Comment

Powered by Blogger.