Pu Lal Hossan inrawinain Vangai an pan
CCPUR: March 13, 2016 khin Vangai TD Block hnuoia Kangreng village­ah Autonomous District Council, CCPur hnuoia Medical Department chun ni 2 sung aw ding Free Medical Camp an buotsai ding a nih. Hi Free Medical Camp­a thang dingin Pu Lal Hossan, Vice Chairman, ADCC bakah Dist. Council Medical Officer, Doctors  le District Malaria official han zanikhan Tuithaphai suok sanin Vangai an pan.

HI Executive meeting thul
CCPUR: March 12, 2016, 11:00AM­a Hmar Inpui Gen. Hqrts. Executive Members meeting Hmar Secretariat, HSA Campus, Rengkai, CCPur hmuna nei dinga March 9, 2016­a meeting kona semsuoka u m chu Executive member hai m kim theinaw ding leiin remchang huna nei lem dinga thul le la sawn hri a nih tiin Francis Songate, Gen. Secy, HI, GHQ chun inhriettirna a siem.

Ralthuom leh pasal pakhat man
CCPUR: March 9, 2016, 5:15PM vel khan 7­Assam Rifles han Tuibuong, CCPur­ah Mr Lunkhohao @ Haopu (29) s/o Jamhem of Nabil Village chu ralthuom leh an man. A kuta inthawk 9mm Pistol 1le magazine 1 man a ni a, zani hmasa zan khan CCPur Police Stationah a kuta ralthuom mana um haileh an peklut. CCPur Police chun zanikhan Chief Judicial Magistrate (CJM) CCPur hmaah an inlangtir a,CJM chun March 15, 2016 chen Police Custody­a la um phawt dingin a rel. Hi thua hin Police chun  FIR No. 14 (3) 2016 CCP­PS U/S 25 (1­C) A.Act an registered.

Monitoring & Evaluation
CCPUR: March 11­16, 2016 inkar sung khin Dr Liankhawjam Guite, DMO/DNO, NVBDCP inrawinain Thangthianmuan, Consultant le B. Joy Kumar, Male Health Supervisor, Patpuihmun han Vangai Range hnuoia MHW/ hai le thangruolin Monitoring & Evaluation nei an ta, sentitization program khawm neisa nghal bawk an tih.Hi huna hin LLIN (long lasting insecticide net) distribution & sensitization of ASHA nei nghal bawk an tih.

Mother to Child Tracking system training
CCPUR:  March 10, 2016, 11:00AM khan District Health Society/CCPur hmalaknain CMO Conference Hall­ah ASHA Facilitator hai ta dingin Mother to Child Tracking System thuah training nei a nih. Hi huna hin Seiboi Mate, DPM le Vung Mary, Community Mobilizer hai resource person in an thang a,Pregnant women registration le children immunization chungthuah Block 5 ­Samulamlan, Singngat, Henglep, Thanlon & Tipaimukh hnuoia ASHA Facilitator hai an thang.


Total Sanitation thuah inrawntlangna an nei
CCPUR: FNS/ Development Department,Reformed Presbyterian Church,NEI hmalaknain Community Leaders le CCPur PHE Division, PHED/CCPur hai leh zanikhan Total Sanitation scheme chungthuah inrawntlangna nei a nih. Hi huna hin Paulungmuan AE. CCPur PHE Div. div.No.6; Dev. Dept. RPC NEI aiawin Mr. S. Muana bakah Saidan, Thingchom le Joljam khuo haia Lal/VA/Youth Club leaders hai an thang.



Hi huna hin Total Sanitation scheme hnuoia sinthawna fe mek le hmun tum tum haia Public Toilet siem tulna hmun hai hriltlang a ni a, Community leaders han hi thua ngenna an peklut hai chu  Paulungmuan, AE, PHED in a tul le pawimaw anga a hung bawzui ding thu hrilin sin tha taka thaw a ni theina dinga thawtlang pei dingin an rel.

EFCI Moderator dingin Rev. Dr J. Huoplien Neitham
SHILLONG: “Krista ta dinga thi chena ringum” ti thupui hmanga Shillong, Meghalaya­a EFCI 43rd General Assembly nei meka chun kum 2016­2017 sunga EFCI Full Fledge Moderator dingin Rev. Dr J. Huoplien Neitham thlangtling a nih. Chun, Pro­Pastor 7 lak thar  ni bakah tukum hin 6 Ordain ning an tih.

Vawisun hin EFCI President,Vice­Moderator le Assembly Secretaries ding hai thlang ning an tih.

Bat Rs. 9091 crore zet nei Mallya London­ah a tlan hmang;
Selkaltu Members­hai Lok Sabha a inthawk an suoktau
NEW DELHI: State Bank of India (SBI) a pawisa Rs. 9091 crore zet puk le bat nei UB Chairman Vijay Mallya chu London­ah a tlan hmang. Vijay Mallya chungthu hi zanikhan Lok Sabha­ah hriltlang a ni a, member­hai lai inseltuona nasa tak a suksuok pha. Vijay Mallya sum puk le bat hi November, 2015 chena mi a ni a, sawrkar le SBi chun a sum bat hi hmukir nawk ngei tumin hma an lak mek. Hi sum hi tuta sawrkar fe mek inbattir a ninaw a,UPA sawrkar huna inpuktir a nih tiin Union Finance Minister Arun Jaitley chun zanikhan Lok Sabha an hriettir. Mallya hi kei ni ta ding chun mi thienghlim a ninaw a,NDA sawrkarin chengkhat khawm an puktir nawh tiin Union Minister of State for Parliamentary Affairs Rajiv Pratap Rudy chun hi chungchanga thu a hrilna huna a hrillang.

Hi chungchanga sawrkarna cheltu, Union Minister­hai thu hril chun Selkaltu memberhai a suklungawi zo naw a, lungawi lovin Selkaltupawl hai chu Lok Sabha a intahwk an suoktau. Selkaltu members, Lok Sabha a intahwka suoktauhai lai hin Congress, NCP le Left Parties hai an thang. Congress chun hi thil tlung hi Criminal Conspirary a nih tiin an intum. Sawrkar phalna leia tlan hmang th ei a nih tiin an intum bawk. Hi sum bat chungchanga hin SBI Law Officer chun warning a siem a, sienkhawm sawrkar chun Mallya chungah action a lak nuom chuong naw a, March 2, 2016 daia kha Mallya hin India ram suoksana London khawpui lo pan ta a nih. Sawrkarin ngaimaw sienla chu ramdang pan thei lo dingin a passport khawm a man pek thei a nih tiin Rajya Sabha a Selkaltu Pawl thuoitu Ghulam Nabi Azad chun a hril.

Vijay Mallya hi sumdawngtu lien niin suktawp­a lo um tah Kingfisher Airlines hminga loan/sum hai hi a puk an nih.

Rel lien chi a hungtlung
IMPHAL: Zanikhan Rel lien passenger phur chi, passenger phurtu Jiribam a hungtlung. Zani 1PM vel khan Jiribam a hungtlung a, zantieng 4PM in a kir nawk. Hiengang Rel lien Jiribam a hungtlung vawikhatna a nih. Rel hi Arunachal Pradesh a intahwka hung a ni a, Rel a hin passenger an la chuong naw a, NF Railway Officers thenkhat an chuong a. Tuta hma deu khan Rel lien chi, thuomhnaw phur chi pakhat Jiribam a lo hungtlung ta bawk a nih.

Manipur sawrkar hnuoiah sin ruok 28,504
IMPHAL: Manipur sawrkar hnuoia Department tum tum haia sin ruok post 28,504 a um a, sienkhawm sum harsatna leiin lak thei lovin a la um niin ei thu dawngna chun a hril. Sin ruok dan chu, Eduation (S) ah post 6039; Manipur Police­ah post 4884; Medical & Health  Service­ah post 2959; Manipur Rifles­ah post 2292; Power­ah post 2291; CID(Special Branch) ah post 1255; Vety & AH ah post 798; Education (University) ah post 703; PWD ah post 592;  Forest­ah post 450; Agriculture ah post 390; IFCD ah 386; GAD (Secretariat) ah post 337; Fisheries ah post 293; Excise ah post 263 le Social Welfare Department­ah post 218 a nih.

Pasal pakhat na taka kap hliem a nih
IMPHAL: Zani zing dar  8:30 vel khan Pallel Police station tuol zawna a motor (Ecco Van AS­28/1333) innghat sunga a thung laiin Ln.Rengneisiak Aimol @ Areng (47), s/op Neichung Aimol of Kumbirei Village, Tengnoupal, Chandel District a cheng chu tu ti hrietlo han an kap a, silaimu 4 kap suoka um hai laia silaimu pakhatin a vawitieng awm a deng fuk a, Jivan Hospital, Kakching panpui a ni a; sienkhawm a hliem inrik leiin Shija Hospital, Langol, Imphal­ah referred a nih. A ngirhmun hi a tha naw hle niin Doctor hai chun an hril. Hi thil tlung dodalnain zanikhan mipui han thungbuma dodalna an nei a, Pallel huop sunga Dawr hai khar an nih.

Saw Mill a kang siet
IMPHAL: Zani hmasa zan khan Thinungei Makha Leikai, Bishnupur District­a SAw Mill pakhat le Thing atsa hai a kang siet vawng. Thil a kangsiet hi Rs. 39 lakh manhu vel ning a tih tiin Saw Mill neitu Th. Raju chun a hril. Kangmei hi electric fesuol leia intan ni dinga ringhla a nih.

AR han Computer sets 2 an pek
IMPHAL: Feb. 16, 2016 khan St. Mary’s Chool, Behiang, Singngat Sub­Division chu 26­Assam Rifles han UPS thangsain a thlawnin Computer set 2 an pek niin znita IGAR(South) thusuok chun a hril. Chun, IGAR (South) hmalaknain Assam Rifles han March 12&13, 2016 hai khin Manipur pumpui huopin hmun hran hranah Cleanliness Campaign huoihawt an tum.

PREPAK(Pro) sukpuok niin
IMPHAL: Zani hmasa zan dar 7 vela Khoyathong, Imphal­a Honda motor cycle & Honda Scooters Showroom a bomb puok kha keini sukpuk a nih tiin PREPAK (Pro) chun thusuok an siem. Hi Bomb puoka h in mi 1 a hliem. Chun, March 9, 2016 zantieng­a RIMS, Imphal hmuna Grenade 2 hmua um kha Maoist Communist Party Manipur (MCPM) pawl va sie a nih tiin Comrade Nonglen Meitei chun thusuok a siem.

Online Treasury payment
IMPHAL: Zanikhan Manipur sawrkar le State  Bank of India (SBI) palai han Old Secretariat Conference Hall, Imphal­ah Online Treasury payment thaw tan dingin Memorandum of Understanding (MoU) an ziek. Online Treasury payment hi kum 2016­17 sunga tan le hmang hman ni dinga hril a nih.

Heroin Grams 111 leh mi 2 man
AIZAWL: Mizoram Excise and Narcotics department official hai chun zanikhan hmun pahni haia inthawk Heroin grams 11 leh mi pahni an man. Mizoram le Myanmar inrina Champhai­ah  Lalthanzuali (33) of  Kawlkulh village chu zani 11AM khan Heroin grams 14 leh an man a ni a; zani zantieng khan Aizawl­ah Vanlalmuana (22) of Zokhawthar chu Heroin grams 97 leh an man bawk. Heroin mana um hi tuolsung rate­a chun Rs. 3.6 lakh manhu vel ni dinga hisap a nih tiin department spokesperson Peter Zohmingthanga chun a hril. ND&PS Act hnuoia case siem khum an nih.

IRNSS­1F satellite hlawtling taka kapsuok
SRIHARIKOTA: Indian Space Research Organisation (ISRO) chun zanikhan Spaceport, Sriharikota, Andhra Pradesh­a inthawk PSLV­C32 phurtu Indian Regional Navigation Satellite System (IRNSS­1F) hlawtling takin a kapsuok. Tuta tum hi ISRO in Navigation Satellite hlawtling taka a kapsuok 6­na a nitah. Hi Satellite hi kg. 1,425 a rik a nih.  PM Narendra Modi chun satellite hlawtling taka kapsuok a nina thuah ISRO scientist hai a lawmpui thu a puong.

BJP in candidate list an puong; Gogoi khingtu dingin Himanta ruot
GUWAHATI:  April 4 le 11, 2016 haia Assam­a Assembly Election hung um dingah political party tum tum hai chun an candidate ding hai an buoipui mek a, BJP chun zanikhan an candidate ding mi 88 (first list) an puonglang. Hi dungzui hin BJP in Chief Ministerial candidate dinga an ruot Union Minister Sarbananda Sonowal chu Majuli A/C a ngir dinga ti a nih. Nikum laia BJP zawm Himanta  Biswa Sharma chu Assam Chief Minister Tarun Gogoi inkhingpui dingin Jakukbari A/C­a ngir a tih. Chun, Jorhat Parliamentary constituency­a inthawk Lok Sabha MP ni lai mek Kamakhya Tasha chu Titabor constituency­ah ngir a tih. Candidate first list hi BJP National President Amit Shah inrawinaa party Central Election Committee in meeting an nei huna an sukfel a nih.

BJP Central Election Committee chun West Bengal Assembly election hung um dinga first 52 candidate list zani hmasa zan khan an lo puong ta a, chu lai chun Bhabanipur biela CM Ms Mamata Banerjee inkhingpuitu dingin Netaji Subhas Chandra Bose tupa Chandra Bose a thangsa. Candidate ding 52 an puong lai hin nuhmei 5 an thangsa. Actor le party leader Joy Bandhopdhyay chun Suri , Locket Chatterje chu Mayureswar le BJP state President Diliop Ghos chu Kharagpur Sadar biel­ah ngir a tih.

Case thaibo a ninaw chun nuorna tan nawk an tum
CHANDIGARH:  Haryana­a Jat hnam han OBC status pe dinga ngennaa February 17­ 22, 2016 inkar sunga helna nasa tak an nei huna Jat thalai iemanizat hai chunga criminal case siema um hai hlip/thaibo an ninaw chun sawrkar chungah helna nasa tak an thaw nawk ding thu All India Jat Aarakshan Sangharsh Samiti ­a an hotu Yashpal Malik chun zanikhan a puong. Jat han nuorna an nei le inzawm khan mi 1,117 chunga criminal case file a ni a, Feb. 29, 2016 chenah khan mi 147 man an ni tah. Chun, Jat protest sung khan mi 30 an thi bakah midang 324 an hliem a nih.

Kum 3 sung Chhattisgarh­ah loneitu 310 an inthat
RAIPUR: Chhattisgarh state­a chun January, 2013 a inthawk January 31, 2016, kum 3 sung khan loneitu mani le mani inthat 310 an um tiin Revenue Minister Prem Prakash Prandy chun zanikhan Chhattisgarh Legislative Assembly­ah a hril. Loneitu mani inthat tamna tak chu Surguja district a ni a, kum 3 sung khan loneitu 102 anni le anni an inthat. Bemetara­ah 65 Kabeerdham­ah 42, Jangir­Chappaah 33 le Raigarh district­ah loneitu 24 an inthat tiin Prem Prakash Prandy chun a hril a, tuchena hin loneitu mani inthat hai laia sungkuo 3 hai kuoma chau zangnadawmna pek an la nih tiin a hril.

A.K. Antony le V. Kumar in nomination a file
THIRUVANANTHAPURAM: States 6 haia Rajya Sabha seats 13 haia March 21, 2016 nia Biennial election um ding le inzawmin Kerala­a chun senior congress leader le Defence minister hlui A.K. Antony le JDU state President MP Veerendra Kumar han zanikhan Nomination paper an file. Mr Kumar hin UDF hminga nomination file a nih. Mr Antony le Kumar hai hin State legislature secretary PD Sarangadharam kuoma an nomination paper an peklut. Kerala­a hin Mr Antony, CPI(M) leader TN Seema le KN Valagopal hai term tuta thla hin a bo ding leiin  Rajya Sabha seat 3 –ah inthlangna a um ding a nih.

Bangladesh­a Vuongna tuoksietah mi 3 an thi
DHAKA: Zani hmasa khan Bangladesh­ah thuomhnaw phurtu Vuongna chu Cox Bazar district, Bangladesh a Bay of Bengal tuipuiah tuoksiet tuokin a tla thla a, tuipui sunga a tla lut leiin a pilot le a sunga thawktu pahni, an rengin mi 3 an thi. Hi vuongna sunga mi 4 an chuong a, a sunga thawktu pakhat chu damin a suok. Vuongna hi Ukraine siem An­26 a ni a, Pilot le a sunga thawktu 3 thi hai hi Ukraine mi vawng an ni a, Vuongna sunga thawktu pakhat chu damin a suok.

N.Korea in Missile pahni a ensin nawk: S. Korea
SEOUL: North Korea chun zani zingkar khan Wonson­a tuipuia inthawk short range ballistic missile pahni a ensin nawk niin South Korea military thusuok chun a hril. N. Korea in missile a ensin hai hi km. 500 a hla kap phak ding an nih. Kar hmasa sung ringawt khan North Korea chun missile/rockets 6 a lo ensin ta bawk a nih. South Korea le US han joint military exercise an nei chu N. Korea hin a theida hle a, nuclear hmanga kap el thei dinga inringsaa um dingin an leader Kim Jong Un chun a sipai hai thu a lo pek ta nghe nghe a nih.

VAWISUN THUPUI
Varna tamtak umnaa chun lungngaina tamtak a um veh a; Hrietna insukpungtu khawm chun lungngaina an sukpung bawk a nih.  ­ Thuhriltu 1:18

Editorial: Hmunhnawk hi

Thingtlang a chun hmunhnawk dehawnna ding  remchang a tam leiin iengah ngai a ni naw a. Amiruokchu, town le city haia ruok chun hmunhnawk peihmangna ding a vang a, mi In hluo a um, hmunhnawk dehawnna ding remchang neinaw hai ta ding chun nghawk a um el chau ni lovin harsatna nasa tak an tlun pha ta a nih. Hi lei hin In hluo ding bawlhai chun an inhluo hai hmunhnawk peihmangna ding hmun hi lo thei lova an siem sa a tul ta a nih. Ei inhmun hai a chin a, an tep ta hle leiin hmunhnawk peina ding khur hang cho ding khawma thil thei lo a hung ni ta leiin mi in hluo a cheng hai ta ding chun hmunhnawk peina ding a vang hle a, hmunhnawk pei hi sin pakhat a hung ni ta a nih.

Mihriem ei ni sung le hi khawvela ei cheng sung hlak chun hmunhnawk nei lova  khawsa le um thei ei ninaw a. Hmunhnawk peina ding hmun hi ngaipawimaw a hung tul ta a nih. Hmunhnawk bawm chu ei nei thei seng a. Amiruokchu, hmunhnawk bawm a sip huna peina ding um lo hi a buoithlak ta hle. Hmunhnawk dit hlak chu ei um naw a, a nghawktu seng ei ni leiin hmunhnawk peihawnna ding hmun tha tak ei ram sawrkarin hung siem sienla chu mipui lawm hleng an tih.

Churachandpur town sunga chenghai hmunhnawk lakhawmtu le a phur hmangna motor chu ei nei ngei a. Amiruokchu, hiengang sin thawtuhai hin hmunhnawk lakkhawm lo an hau bakah hmunhnawk lakkhawm nawna hmun iemanizat an nei a, hieng hmuna chenghai ta ding hin hmunhnawk dehawnna ding a um ta mang si naw leiin harsatna nasa tak an tuok pha a nih. Hieng a ni leiin thuneitu le mawphurtu han hmunhnawk lakhawmtu le peihmangtuhai hi an sin thaw dana hin hung thunun (control) deu sienla nuom a um ngei el. Veng annawleh kawtthler thenkhata hmunhnawk lakhawmtu le peihmangtu um si a, veng le khawtthler thenkhat a hmunhnawk lakhawmtu le peihawntu an um ve naw hi chu thil indik niin an lang nawh. hi thil hi inthlier hran bikna a um am a ni aw ti chen ngaituona an umtir thei. Hieng a ni lei hin, hi lai chungchang hi thuneitu han hung enfel hai sienla nuom a um.

India rama khawpuilienhai khawm an harsatna pakhat chu hmunhnawk tam taluo le a peihmangna hmun hi a nih. Ei chengna State Manipur a khawm hmunhnawk tam taluo le a peihmangna hmun hi harsatna mi petu pakhat a hung ni ta a nih. A bikin Imphal khawpui le Churachandpur town sunga chenghai hin hmunhnawk hi ei hau bik zuol mani ding aw ti theiin a um. Ei khawpui le ei town sung suktawptu le sukhmelhemtu a ni leiin hmunhnawk tam le a peihawnna hi ngaitha chi a ni nawh. Hi thil hi sawrkar khat chau thaw ding le mawphurna a ni bik naw a, a sunga cheng mipuihai khawmin mawphurna ei nei ve a nih. Hi lei hin khawpui sung sukfaina kawngah hin theitawp suo tlang seng ei tiu.

Churachandpur town le Imphal khawpui haia hmunhnawk intieng hnerhnura um hai hi state danga inthawka hung han an hung hmu chang hin a state sawrkar le a sunga chenghai hi faina le thienghlimna kawngah baksam ei la hau hle a nih ti va hril kher tul lvoin an mi hriet thei nghal ring a um. Hi lei hin khawpui sunga chenghai le dawrkai hai hin ei Nulla le kawtthler hai hi hmunhnawk  dehawnna (dustbin/dumping site) a ei hmang leiin  ruo a hung sur pha leh tuihawkin luongna ding an invai a, lamlienah tuihawk a luong dum dum a, ei lamlien dung chu hmunhnawkin a hung sip a, a rim a hung se hle hlak. Nullah le lamlien dung dustbin a hmang hi tawpsan hmak tang ei tiu.

Khawpui sunga kawtthler le nullah sukfaina ding kawnga hin ei sawrkar khawmin hma chu a hung lak hlak. Amiruokchu, hunsawawt a sei an bawzui (monitor) ngainaw leiin an hmalakna hi tha hle sienkhawm hun sawtnawte hnungah umzie bovin a hung um nawk hlak niin an lang. Sawrkara thuneituhai hin thaw ding le thaw lo ding hi an siem a, a nina ang taka an bawzui chun mipui  tiengpang hin chu zawm harsa ei ti ngai bek bek nawh. Thaw ding ei thaw nawna san rawp chu a bawzuitu ding han an bawzui that tawk naw lei a ni rawp hlak. Thil hrim hrim hi a bawzuitu le a enkai zingtu an um naw chun iengma lovin a hung um el hlak. Hi lei hin bawzui zingtu ei nei a tul a nih.

Post a Comment

Powered by Blogger.