YPA indin champha vawi 63­na hmang
CCPUR: Zani 7AM khan Hiangtam Lamka YPA GHQ Hall­ah Young Paite Assn. (YPA) GHQ hmalaknain YPA kum 63 tling lawmna nei a nih. Hi huna hin Chin Ngaih Pau, President, YPA GHQ in YPA Flag keipharna le presidential message a hril a. Paukhanmawi Guite, Gen Secy YPA GHQ in term fe mek sunga YPA GHQ activities report, V.Chinkhenpau, Finance Secy. YPA GHQ in 2015­16, kum 1 sung a YPA GHQ hmu le hmangna report a pek bawk. Kum 1 sung in YPA GHQ chun Rs. 4,86,101 a hmusuok a, hi laia sum hmang tapo Rs. 303268 le zanita prog. hmangnaa seng  tiemsa lovin Rs. 182833 balance a nei.



Tunglut Thuamkhopau, Ex­Gen. Secy. YPA GHQ inrawinain member hlui lo thi ta hai le tribal martyrs hai sunna hun hmang a ni a, Upa V.Vungzathang, Chairman, CEC YPA GHQ in YPA Danbu a tlangzar.

Prepaid electric chungthu­a hriet ding pawimaw
CCPUR: Electric prepaid thaw mek le inzawmin MSPDCL Director chun mipui hriet dingin thusuok a siem. Hi dungzui hin Prepaid connection le meter inbuk man um naw nih. Activate thaw hunah first time recharge man Rs. 200/­ pek ngai a ta, sum pek hunah receipt lak ngei ding le metre­ah balance Rs. 204/­ lut a tih. Chun, consumer tinin pre­paid meter inbuk hunah Application Form No. MA0000005 fill­up seng ding. Prepaid le inzawma indiklo taka thaw annawleh thamna la an um chun Phone no. 7085055672­ah SMS thawna inhriettir ding a nih. Electric consumer hai chu hi chungthua hin Rs. 200/­ pek el thei dinga inringsaa um dingin Director chun mipui hai an hriettir bawk.

BSF motor le Car an inbawtuo
CCPUR:  Zani sun dar 11:30 vel khan Imphal tieng pana tlan Hyundai Eon Car MN01S­4325 le Koirengei a inthawk Tuithaphai pana hung tlan BSF bulletproof No. AP23H­4697 chu Bethel­Khawmawi hmuna Tiddim Road­ah an inbawtuo a, thi le hliemna tuok an um nawh. Motor haia hin mi pahni ve ve an chuong a, motor hai hi a hmatieng a se ve ve a, an tlan theinaw leiin SP/CCPur hmalaknain Army hai recovery motor hmangin kei le Tuibuong peace ground bula workshop­ah siem dinga sie an nih. Police case um lova a siet dan izira siemthat dingin an inbiekrem.


One Day Awareness
CCPUR: Socio­Economic Development Organisation hmalaknain March 5, 2016, 11:00AM khin DT Hall, Tuibuong (Near DC Office) ah ‘One Day Awareness Campaign on ever relevant Disaster Management for all walks of lives and specially to Masons, builders, Village Authorities, Church leaders etc. um a tih. Mr Lunminthang Haokip, IAS, DC CCPur le L. Mangkhogin Haokip, IPS, SP/CCPur hai chief guest le guest of honour in thang an tih. Hi huna hin Imphal­a inthawk expert hung hai resource person in thang an tih.

Street preaching thaw dingin Miz. hlasakthiem 3 
CCPUR:  Mizoram­a Operation Kingdom Ministry, Aizawl­a inthawk hlasakthiem pathum Lalruatpuii, Chairman bakah Lalbiakhlimi le Lalremthanga Pautung, Treasurer hai chu CCPur­ah an hung a, March 4, 2016 a inthawk khin sun hun haiah khawpui sung hmun tum tumah Street preaching nei an ta, donation box daw ni bawk a tih. Hieng hun haia sum hmusuok hai chu an Ministry hnuoia naufara enkawl hai le inruithei chingzawngsak hai enkawlna dinga hmang ning a tih.



Chun, Street preaching huna hin “Van Jubilee Dar” ti  Album an siem zawr ni nghal bawk a tih.Operation Kingdom Ministry, Aizawl chun tuhin nau fahra, rethei le inruithei chingzawngsak mi 20 an enkawl mek. Hmatieng peiah Myanmar­a khawm fe an tum.

ZC Executive meeting  nei
CCPUR: March 2, 2016, 7AM  khan  Dr Neng Ngaih Lian In, New Lamka­ah Zomi Council  Executive meeting a vawi 4­na nei a nih. Hi huna resolution a siem hai lai­ Interim period March 15, 2016 chena ding ti chu Constitution review zo hman a ninaw chun Jan. 30, 2016­a Simte Inn, Simveng­a consultative meeting huna rawtna um dungzuiin March 15, 2016 a inthawk September 15, 2016 chena keisei ding; Manipur Tribal Bill thuah JAC hmalaknaa Road Construction Committee hnuoia lampui siemna sin thaw mek ZC in lawmum a ti a, Kohran, Pawl, Organisation le mimal tinin thangpuina a tam thei ang an pek theina dinga local paper le cable haia sukphurna thu insuo ding;  Thuthar um hmapo a dingin ZC speaker dingin Pu Thangzamang, Gen. Secy. UZO ruot  le ZC Constitution Draft Tribe tinin March 31, 2016 chena an zo fel ding ti hai a thang.

Talent Search/Merit Scholarship exam result
CCPUR: National Level Talent Search (NLTS); State Talent Search Examination (STSE) le National Means­cum­Merit Scholarship (NMMS) 2015 puong a nita a. CCPur District­a inthawk Mimi Lamboithem of Koite, St. Mary’s School in NLTS (Class X reading) ah consolation hmuin state level­ah 25 nain a thang.Mimi Lamboithem hi May 8, 2016 nia 2nd round NLTS exam­ah thang a tih. STSE­ah Krish Srivastava of JNV, Tuinom in class IX reading­ah consolation a hmu a, NMMS (class VIII) reading Govt. Schools only) ah mi 5 in consolation an dawng a, chuonghai lai Vimala Raina H/S a inthawk students 4: Dina Vaiphei of D. Phailen, Kaplunmang of D. Phailen, Ngaineihat of D. Phailen le Nemngaithiam of D. Phailen bakah Bijang Loubuk JB School a inthawk Andrew Laltanpui of Bijang hai an ni a, thla tin scholarship Rs. 500/­ dawng an tih.

HI GHQ le affiliated body meeting
CCPUR:  March 5, 2016, 11:00AM khin Hmar Inpui Office, HSA Campus, Rengkai, CCPur­ah Hmar Inpui Executive Member le Affiliated Body joint meeting um a tih. Hmar Inpui GHQ inthlang zova joint meeting hmasa tak a ni leiin an zawmpui member hai chu kim taka thang seng dingin LRS Puruolte, Jt. secy. (Inf. & Media), HI GHQ chun a ngen. Hi huna hin Region tina member siem dan ding le thu pawimaw dang dang hai hriltlang ning a tih.

Assam Hmar Political issue thuah Central thuoituhai an inhmupui
NEW DELHI/CCPUR: HPC (D), Assam Region, Central le State sawrkar hai thanga Tripartite Agreement neia  kum 2012 laia silai an intung hnungah Assam­a Hmar Political Issue sukfel thei lova a la umna le inzawma hmalakna fe peiin Hmar hnam aiaw Dr John Pulamte, Ex­President, Hmar Inpui; Mr Lalbeisei Hmar, Ms. Lalropui Hmar, Ms Lalramhnem Buongpui le Coordinator in Delhi Mr Romeo Hmar hai chun March 1, 2016 khan Central Sawrkar thuoitu Jt. Secy., (NE) Satyendar Garg le Dy. Secy. Ajay Kanoujia  hai an inhmupui.

March 2, 2016 zan khan MoS (Home) Kiren Rijiju an inhmupui a, hun iemanichen an inbiekpui zovin Jt. Secretary (NE) an inhmupui nawn nawk. Assam­a Assembly Election zo pha Tripartite Political talk a um vat theina dinga nasa taka nawr zawm a ngai ding thu le chu hmain Assam Home Commissioner leh fumfe taka hohlimna nei puia, Hmar han Assam­a a hmu thei ding  thil hai hriltlangpui tum a ni thu  hnam aiawa thang hai chun an hril.

Tuta hma khan Dr Pulamte, Pu RC Tryte, Pu Lalbeisei, David Hmar, Chawnghmunlur Varte le Lalawmpui Hmar han Assam CM khawm an lo inhmupui ta bakah HSA, HI le  hnam sunga pawl dang dang hai khawmin Assam­a Hmar Political issue thuah hin Assam Governor kuomah joint memorandum an lo pek ta a nih. (LRS)

Parliament rorel sukbuoi rawp a ni pha leh ram le hnamin a tuor pha hlak: Narendra Modi
NEW DELHI: Prime Minister Narendra Modi chun zanikhan Lok Sabha­ah thu a hril a, Congress party chu nasa taka demin a sawisel. Parliament rorel sukbuoi rawpa a u m pha leh ei ram le hnamin nasa takin a tuor pha hlak. Parliament Session sukbuoi le rorelna sukbahlatu chu Congress an nih tiin an tum. Parliament rorelna sukbuoi a ni pha sawrkar nekin Selkaltu pawl a tawkbuoi a, an hril nuom hril thei lovin an um hlak tiin Modi chun a hril. Rorelna  tluong taka a fe theina dingin ei rengin ei thangruol a tul  thu, Goods & Services Tax Bill, Waterways bill le Consumer Protection bill hai thangin Parliament­a Bills pawimaw hai passed a ni theina dingin selkaltu pawl han an thlawp a pawimaw thu a hril.

Congress party chun ei ram hi kum 60 sung indiklo takin an lo thuoi ta a, tha tak le i ndik taka rorel le sawrkarna chel nihai sienla chu ei ramah loneituhai anni le anni inthatna hi umnaw nih tiin Modi chun Congress party demin a hrilsiet. Congress member­hai chu an thuoitu hmasa Nehru, Indira Gandhi hai entawn dingin an fui. Hieng Congress party thuoitu hmasa hai khawm hin Parliament Session tluong taka nei kha an thiltum le dit a lo ni h lak tiin a hril.

Chun, Lok Sabha le Rajya Sabha member thar, a bikin member vawikhat la ni chau haiin an dit, an nuom le an ngaidan hai an hrillang ve theina dingin a hranpa lieuin hun hawng pek ei tiu ti le March 7, 2017 khi International Women’s Day a ni leiin hi ni hin Parliament ah nuhmeihai chau thu hrilna hun peng ei tiu tiin Narendra Modi chun zanikhan Lok Sabha­ah rawtna a siem. Modi hin direct takin JNU buoina chungthu chu a hril nawh.

Film siemtu na taka vuok hliem
IMPHAL: Film siemtu inlar le Film Forum Manipur a General Secretary hlui Mayanglambam Raghumani (50) s/o (L) M. Nimaichand chu zani zingkar dar 1:30 vel khan Lamphel­a a chengnaina inthawk mi 6 vel, inlirthei ke pali nei pahnia chuong, State Security personnel anga inthuom han an va thuoisuok a, Ngaina Louching hmuna thuoiin an vuok hrep zovin a thi maksanin ana maksan. A hliemna an rik leiin Advance Hospital­ah enkawl mek a nih tiin L.Surjakanta Sharma, Chairman, Film Forum, Manipur chun zanita Imphal­a Chanchinbumihai an hmupui huna a hril.

Manipur Assembly in Demands 7 an passed
IMPHAL:  Zanikhan Manipur Assembly in Demands 7 le Demand for excess grants 2 an passed. Demands for grants passed­hai chu­ Tribal Affairs, Hills and Schedule Caste Devpt. Rs 470,65,60,000/­; Consumer Affairs, Food and  Public Distribution Rs 52,74,44,000/­; Co ­Operation Rs. 20,40,52,000/­; Agriculture Rs. Rs 217,02,15,000/­; Animal Husbandary and Vety including Dairy Farming Rs 81,73,30,000/­; Administration and Justice Rs. 58,50,61,000/­ le  Fisheries Rs 29,25,42,000/­ hai an nih.

Demand for excess grants  2012­13 passed hai chu  Sericulture Rs. 67,43,990/­; Irrigation and Flood Control Department Rs. 82,16,530/­ hai an nih. Manipur CM le Finance chelas O.Ibobi Singh chun zanikhan Manipur Appropriation (No.2) Bill, 2016 le Manipur Appropriation (No.3) Bill, 2016 hai Assembly­ah a phar bawk.

April a inthawk NSFA hmang tan ding
IMPHAL: Thla thar April, 2016 a inthawk Manipur­ah National Food Security Act (NFSA) hmang tan ni tang a tih. Hi Act hmng a ni pha leh hamthatna dawngtu dinghai chun bufai kg. 1 ah Rs. 3 le Gehu Rs. 2 in inchaw thei an tih tiin CAF &PD minister M. Okendro chun  zanikhan Manipur Assemlby­ah a h ril. Hi hamthatna dawng thei dinga ti chu mi nuoi 24 chuong an ni a, a bul tannain mi nuoi 21 hai kuomah pek phawt ning a tih tiin a hril bawk.

URF Chingkheinganba group camp run
IMPHAL: Zani hmasa zan dar 11 vel khan Lamlai Police Station huop sunga United  Revolutionary Frondt (URF)Chingkheinganba group temporary designated camp chu helpawl ni dinga ringhla group khatin an va run a, thi le hliem ruok chu an um nawh. Hi thil tlungna hmuna hin Police han Safety pin bo Hand Grenade 1, Silaimu  kapsa 40, AK­47 projectiles 7, Plastic a siem AK­47 magazine 1, silaimu 8 le M­16 Projectiles 3 an hmu. Hi thil tlunga hin Honda Dio 1, Refrigerator 1, Washing Machine pakhat, Rs. 1.5 lakh manhu vel a suksiet.

Tuiruong leilak siemthat mek
IMPHAL:  NH­37 (Imphal­Jiribam Road) a Tuiruong (Barak) leilak chu cement ton nes 300 vela rik phurtu  Truck in a hraw laiin  leilak hi a sir siet a, Truck hi leilakah an tang leiin leilak siemthatna sin thaw mek a ni a, siemthat zona ding hin haptakar khat vel hun a lut ding niin ei thu dawngna chun a  hril.

Elective Subject­ah Thangta
IMPHAL: Academic Session, 2016­17 a inthawk Class XI & XII haiah Thangta chu Elective Subject pakhata inthangsatir ni tang a tih tin Manipur sawrkar thusuok chun a hril.

Govt. Aided Schools 604
IMPHAL: Manipur­ah Govt. Aided Schools 604 a um a, hienghai laia 10 hai chu High School an nih tiin anikhan Education Minister M. Okendro chun Manipur Assembly an hriettir.

Rajiv thattu hai insuo ding le dingnaw ngaituo mek
NEW DELHI:  Tamil Nadu sawrkarin India PM hlui  Rajiv Gandhi thattua intum jail­a intang mek  hai chu insuo zalen dingin a ngen a, hi thu hi sawrkar thlungpui chun a ngaituo mek a nih tiin Home Minister Rajnath Singh chun zanikhan Lok Sabha hmuna a hril. Supreme Court chun, sawrkar thlungpui inrawnpui hmasa lovin thiemnaw inchangtir hai an suo zalen theinaw thu tuta hma khan a lo hril ta a nih. Rajiv thattu jail­a intang mek Murugan, Santhan, Perarivalan, Jayakumar, Robert Payas le Nalini hai chun kum 24 sung zet jail­ah an intang ta leiin insuo zalen dinga ngenna an pek a, Tamil Nadu sawrkar chun insuo a lo remti tasa an nih. PM hlui Rajiv Gandhi kha May 21, 1991­a LTTE helpawl han Tamil Nadu­a election campaign a nei huna bomb sukpuoka an that a nih.

A Sana manto Speaker kutah 
BENGALURU: Karnataka Chief Minister K. Siddaramaiah chun, Sana mantam Rs. 70 lakh man zet nia hril a nei le inzawma sawiselna nasa tak um mek le inzawmin zani hmasa khan Speaker Kagodu Thimmappa kuomah a Sana mantam Hublot watch chu an hlan. Hienganga Sana mantam Gift­a a dawngna chungthu hi Inpuia hriltlang dinga opposition han nasa taka an ngen leia thawkhni zet inpui inthung sukchawl a ni hnunga CM hin a Sana hi speaker kuta an hlan a nih. Hi Hublot Big Bang 301M sana hi Dubai­based cardiac surgeon le a ruolpa ni bawk Dr Girish Chandra Verma in a pek a ni a; ram khuo le tui tha a nina angin a gift le inzawm hin  March 2, 2016 khan tax khawm a pek ta thu K. Siddaramaiah chun a hril.

A hun taka project zo ngai lovin an tum
NEW DELHI: India hmarsak biela state sawrkar hai chu a hun taka project tum tum hai zo hman ngailo, thenkhat lem chu Utilization Certificate khawm Centre­a pelut ngailo, Detailed Project Report (DPR) le lekha pawimaw chi tum tum pelut ngailo an ni a, hi lei hin project chi hran hran hai zo ding huna zo thei lova a um hlak bakah project sin thawna a suk inhnu pha hlak tiin zani hmasa khan Jitendra Singh, Union minister for development of North Eastern Region chun Lok Sabha an hriettir. Non­Lapsable Central Pool of Resources (NLCPR) hnuoiah projects 434 a um a, hienghai laia projects 193 hai chu la zo fel lova sukhnuk an nih. NEC hnuoiah projects 81 a um a, hienghai laia projets 46 hai chu zo lova sukhnuk an la nih tiin Mr Jitendra Singh chun a hril bawk.

VAWISUN THUPUI
Ti naw ro, kei in kuomah ka um sih a; lunginzing naw ro, kei in Pathien ka ni sih a; sukhrat ka ti cheu a, anih, thangpui ka ti cheu, anih, ka felna kut changtiengin chel zing ka ti cheu.   ­ Isai 41:10

Editorial: Affidavit indiklo

Election a ngir dinghai chun thuneitu le mawphurna cheltuhai kuomaah Election le inzawmin Affidavit an peklut hlak. Hi huna hin politician thenhatin affidavit indiklo (false affidavit) an peklut hlak ti chanchinbu tiemtu hai chun ei hriet seng ring a um. Affidavit indiklo peklut lei hin India ram hmun tum tum haiah Court a inhekna chen a tlung pha rawp hlak. Hi chungchanga Court rorel dan ruok chu an ang naw tawl hle. Hi chungchang hi Law Commission chun a ngaipawimaw hle a, affidavit indiklo chungchanga Court rorel dan le thutlukna a hung inang tlangpui theina dingin Law Commission chun dan le dun a siem a, sienkhawm zui le zawm a ninaw leiin hi thua Court rorelna le thutlukna chu a lan ang tlangpui theinaw zing a, Court thu tanna chu chitum tumin a fe pei a nih.

Ei hriet seng angin Delhi Law Minister lo ni hlak Jitender Singh Tomar chun a election affidavit­ah LLB passed niin a zieklang a. An khingpui han LLB a passed nawh, election huna affidavit a pekluta LLB passed nia an hril hi thukhel le affidavit indiklo a nih tiin  Court­ah an hung hek leiin Court chun a chungthu a rel a hung tul ta a. Court in lungin intang dinga thiemnaw a hung inchangtir leiin Jitender Singh Tomar hi lunginah an tang pha  ta a nih. False Affidavit leiin an party a inthawk hnawtdawk a ni bakah a political career a suksiet a, Jail bang a zut pha hiel a nih.

Centre­a  BJP thuoina hnuoia NDA sawrkar fe meka Union Human Resource Development minister Ms Smriti Irani  khawm Election  huna Affidavit indiklo a peklut ve tia intum a nih. Ama khawm a lekha inchukna tiengpanga a degree nei chu fake degree or fake certificate a nih tiin hek a ni a, iem a la hung ang pei ding ti chu hriet  a la ni nawh. Hek le intuma a umna laka inthawk hin a fihlim zo dim ti chu hun fe pei le Court in a la hung rel ding a nih. Hiengang case hi India ram hmun dang danga khawm a um a, Kerala State a khawm hiengang fake degree le fake affidavit thua hin politician thenkhat court case an nei mek a nih. False Affidavit case a hin thenkhat chun thla 6 lungin an intang pha a, thenkhat election nawka ngir thei lo dinga ti an ni a, thenkhat chu pawisa inchawitir an ni hlak.

Manipur khawm false affidavit case a hin ei fihlim bik nawh.Moirang Assembly Constituency a inthawk Congress ticket­a MLA dinga thlangtling le tuta Parliamentary Secretary (Tourism, Youth Affairs &Sports) chanvo chel mek Mairembam Prithviraj Singh chun false affidavit case a hmasuon mek a nih. Kum 2012 a 10th Manipur Assembly election a khan Prithviraj hin a educational qualification chu Master of Business Administration (MBA), Mysore a inthawka passed niin a peklut a. Amiruokchu an khingpui P. Saratchandra Singh chun Prithviraj in affidavit a peklut hi an diknaw a, false affidavit a nih tiin Manipur High Court­ah hekna a siem leiin harsatna a hung tuok pha ta a nih.

Feb. 29, 2016 khan Manipur High Court chun kum 2012 a Moirang A/C a inthawk  Prithviraj MLA a thlangtling a nih tia puonga a umna chu iengkhawm lo (null and void) tiin a puong a. Amiruokchu, Prithviraj  Singh chun Court thutanna hi Court insang lem, Supreme Court a appeal a thaw nuom leiin hun la pe dinga hnina a siem leiin  March 2, 2016 khan Manipur High Court bawkin a thutanna hi haptakar 4 sunga dingin a la cheltang nawk. Prithviraj ukil Sh. Poireiton chun, Prithviraj in affidavit a peklut hi suksuol pal (mistake or clerical error) a nih tiin Court hmaah a hril. MBA a pasi le pasi naw thu a hrillang naw a, PG  Programme in Service Industries Management chu kum 2014 khan ITFI, Chandidarh­ah an chuk ti ruok chu a hrillang.

Mipui aiawa roreltu ding, ram le hnam ta dinga sin thaw dinga kalpen suok ngam hai chun an lekha thiem dan annawleh an degree lak chieng takin an hriet ngei ring a um. Chun, affidavit an peklut huna khawm an fimkhur ngei ring a um. Hieng laizinga ka qualification zieklang kha sutsuol pal annawleh thawsuol pal a nih tia suonlam an siem hi chu thil awiumlo a nih. Thukhel an hril hnung khawma thukhel dang le phuokfawm an la hril ngam rawp el hi chu thil mak, thil awmlo taluo a nih. Mi fel le mi tha, ram le hnam hmangai tak takhai chun false affidavit hi an peklut ngam ring a um nawh. Fake degree annawleh false affidavit pe ngam hai hrim hrim chu ram le hnam thuoitu tlak an ni ring a um naw bawk. Ei rama chu hiengang thil hi tlung tanaw sienla nuom a um.

Post a Comment

Powered by Blogger.