JPO in Tribal Martyrs sungkuo 9 hai Rs. 3.5 lakh seng an hlan
CCPUR: Joint Philanthropic Organisation (KKL, HYA, YMA, ZYA) thuoitu hai chun zani 11:00AM khan Hmuia Veng­a YMA Office­ah Joint meeting an nei a, JPO kuta tribal martyrs hai ralna lut po le sum hmangna (expenditure) bakah tuomna puon lut hai an enfel. Hi huna hin JPO chun Tribal Martyrs 9 sungkuo hai kuomah 3rd instalment Rs. 3.5 lakh seng inhlanna a nei nghal bawk. 
         
JPO in District Hospital­a office an hawng sunga ralna sum an hmu po chu ­ Rs 77,00,0851.00 a nih. Hi taka hin JAC in in tina ralna sum Rs. 100/­ seng an dawl kha a thang sa nawh. 
         
Tuta hma 1st instalment in martyrs sungkuo hai kuomah Rs. 50,000/­ seng le 2nd instalment in Rs. 1,00,000/­ seng pek an lo ni ta a, tuchena martyrs sungkuo han ralna sum an dawng chu a rengin Rs. 5,00,000/­ (Rs. 5 lakh) seng  a ni tah.  
         
JPO financial report dungzuiin pawisa hmu po Rs. 77,00,851; Medical reimbursement in Rs. Rs 3,89,849/­; Morgue ­ Rs 2,49,995/­; Victims family 1st and 2nd instalment ­ Rs 13,54,500/­; Medical Fin Asst­ Rs 3,04,000/­; Stationaries­Rs 7,202/­; KCC hospital Imphal­a hliem hai enkawlnaa seng Rs 3,04,550/­; Transportation  Rs 11,100/­; MTF  (Delhi) kuoma pek Rs 2,00,000/; Misc Rs 1,58,350/­ ; Office Exp Rs 13,841/­; Victim Families Rs 31,50,000/­ a ni a, Total expenditures Rs 61,43,417/­ a nih. Tuta JPO kuta sum la um po chu Rs. Rs 15,57,131/­ a nih. 
         
Balance la um po hi hliem operation la thaw tul an um leh hmang ning a ta, a bang la um po Martyrs hai ruong vuinaa hmang dinga pek dawk dingin JPO meeting chun an rel.  

HSSLC (Class XII) Exam tan a nih
CCPUR: Council of Higher Secondary Education Manipur (CoHSEM) huoihawtnain zanikhan Higher Secondary (Class XII) Examination­ 2016 tan a nih. CCPur District­a inthawk science students 847, Arts 1310 le Commerce student 45, an rengin candidates 2202 an um.
         
CCPur District­ah Exam centre 3 hawng a ni a, Centre ‘A’  Don Bosco Hr.Sec.school ah Don Bosco Hr Sec School le VK Tawna college a inthawk Science student 374,Commerce 20,Arts 339 an inthung a, Exam centre ‘B’ Rayburn College ah Rayburn, Ebenezar Academy, Blue Star Academy,Vungzagen Hr.Sec. School le Lamka college haia Science student 135, Commerce 25 le Arts 527 an inthung a, Centre ‘C’Rengkai Hr.Sec.school ah Sielmat Christian Hr.Sec.School, Rengkai Hr. Sec.School, Young Pillar College,Vision Academy le Bethany Christian College haia Science student 338 le Arts student 444  an inthung.

YLS in Valedictory programme
CCPUR: Young Learners’ School (YLS) chun Feb. 24, 2016, 12:30PM khin an school campus­ah Valedictory programme ­2016 hmang an tih. Hi huna hin Rev. Rohminglien Pakhuongte, Vice President (Education) Partnership Mission Society chu Guest Speaker­a thangin commencement speech nei a ta, Rev. B.L. Sandam, Local Pastor, Lamka ICI Church in student hai ta dinga tawng­taipekna nei a ta, Award semna le item dang dang neiin hun khar tawngtaina Rev. (Dr)  Zolienkhum Joute, Board Member, YLS Managing Board in nei a tih. 

HSLC CCPur Exam Centre ding hai
CCPUR:  Board of Secondary Education Manipur (BSEM) huoihawtnain March 1­19, 2016 inkar sung khin HSLC Examination, 2016 a um ding a ni a. CCPur District Private Centre hnuoiah Exam Centre 2 ruot a ni a, chuonghai chu­ Ebenezar Academy le Don Bosco Hr. Sec. School hai an nih.  Ebenezer Academy­ a hin HSLC candidates 1204 inthung an ta, Don Bosco Hr. Sec. School - ah candidates 1889 inthung an tih.
         
HSLC Exam hung um ding le inzawm hin zani 10:00AM a inthawk khan Phungkhothang  Govt. H/S­ah Candidates hai Admit Card ding semdawk tan a ni a,  School thuneitu han mani students hai Admit Card an lak tawl. Feb. 27, 2016, sun dar 12 khin Invigilators le official ding han rehearsal nei an tih. Exam huna hin student hai chu mani uniform inbel seng ding; mobile phone le electronic device hrim hrim exam hall­a chawilut phal ninaw nih.

Special Meritorious Award semna
CCPUR: Vawisun 11AM hin Seilal Upper Primary  School, Seilal Village a chun an school hmunah Seilal Meritorious Award, 2015 semna nei an tih. Hi huna hin W.L. Hangshing, IAS, Additional Chief Secretary; Langkhanpau Guite, Chairman, ADCC; Ngamhao Touthang, circle MDC le Mannuamching, IAS, CEO, ADCC hai khawm thang an tih.

Khousabung Sub­Divn. Committee in T. Manga an hniel
CCPUR: Khousabung Sub­Division Demand Committee (KSDDC) chun zanikhan thusuok siemin Thangting chungthuah Kangvai Sub­Divsion dinga division hming inbuk a ni thuah Henglep MLA T. Manga Vaiphei thuhril Eimi Times Feb. 22, 2016 issue­a zieklang chu an hnielkal. 
         
Gothol hmuna Chief Assn. in Thangting tlang hausa han hi chungthuah mawphurna an mi pek a ti chu thukhel a ni thu; hi meeting­a hin mi tlawmte chau an thang a, Thangting/Thangjing thua Meitei hai buoina hung chingfel sien an ti chau lem a ni a, Sub­Division siena ding hmun mipui le lal tamlem remtina a ni ding ti a ni a, mawphurna pek a ni nawh; Khousabung DCC Hqrts chu hmun inlaina tak ani leiin Sub­Divn. hqrts ni sien ti chu mipui le lal hai dit dan a nih. Mipui dit dan le thathnempuina ding hmuna sie dinga Sub­ Division siem a nih ti sia, an kilna taka a hung sie chu an hrietthiem naw thu; KSDDC chun Kangvai chu Dist. Hqr. a inthawk km. 8 chaua hla; a changkang tasa a ni leiin a ni leiin Sub­ Div. HQ Kangvai um chu tul an tinaw thu hrilin kum 2014­a Thangting Sub­Divion a um ding Notification insuo ta iengleia puong dawk loa um am? Mipui le lal 125 laia 177 in Khousabung hi Sub­Divn. HQ dinga an dit ti hrie zing a, iengleia sawrkar in hriettir naw? Lal 20 chau fekhawm in inrang taka dawnna i pek thei chun iengleia lal 117 hai ditna le ngenna ngaisak thlaka i ruot naw a ni? tiin T. Manga Vaiphei chu indawnna an pek. KSDDC chun hi thua hin Feb. 11, 2016 a inthawk khan nuorna an tan a, indik taka thil thaw a ni hma po nuorna nei pei ning a tih tiin KSDDC thusuok chun a hril.

Sinzawl ­ah Flag­off prog. a um ding
CCPUR:  Manipur Tribal Movement Road Construction (MTMRC) inrawinain Feb 23, 2016 hin Sinzawl­Tuivai leilak inkar lampui siemthatna ding le inzawmin Sinzawl khuoah flag­off program um a ta, Mizoram –a inthawk Central YMA thuoitu han flag­off lampui siemtu ding hai hi flag off an tih. Hi huna hin G. Nengdouthang, Chairman, MTMRC; H.Mangchinkhup, Chief Convenor, JAC; Hmar Inpui, Kuki Inpi/CCpur; Mizo People’s Convention; Zomi Council; Gante Tribel Council, Mate Tribe Council; Thangkhal People’s Orgn.; Tedim Chin Union; Vaiphei People’s Council; Simte Tribe Council; United Zou Orgn.; Paite Tribe Council; Kuki Chiefs’ Assn. Zomi Chief Assn. ZRO; Mizo Students’ Union, Mizo Zirlai Pawl GHQ leh Central Young Mizo Assn. thuoitu han thuhrilna hun hmang an tih. Hi huna thang ding hai zani 8:30AM khan JAC Information Centre, KKL Complex­a inthawk Rev. Lian Benson, Executive Secy. Lutheran in tawngtainain an thlaliem. 

Churachandpur­a thil tlung chungthuah a tul chun Supreme Corut Judge ruoia in enfeltir ning a tih: O.Ibobi Singh
IMPHAL: Zanikhan Manipur Assembly­ah Sesion tan nia Governor thu hril members han hriltlangna an nei bakah Assembly Session neinaw hun sunga an member chanpui lo thi hai sunna hunser minutes 2 sung totawkin hun an hmang. Session an neinaw sunga an member chanpui, thina tuok an sun hai chu­ Territorial Council huna member lo ni hlak L. Ibomcha, State puitling hmu hnunga member lo ni hlak Atomba Ngainambamcha le L. Sarat hai an nih. Hi huna hin members han Lok Sabha Speaker hlui, Balram Jakhar le Manipur Governor hlui K.V. Krishna Rao hai thi sunna an nei bawk. 
         
Governor thuhril hi a kim tawk nawh tiin BJP MLA Kh. Joykishan, Trinamool Congress MLA I. Ibohalbi le NCP MLA L. Ibomcha han sawiselna an siem. Amiruokchu, O.Ibobi Singh Chief Minister in Governor thuhril an sawiselna hai hi hrilfiena a siem hnungin Governor thuhril hi zanikhan members han lungruol takin an pasi. 
         
BJP MLA, Th. Joykishan chun Hill Areas sunga Law & Order chungthu, Scheduled Tribe hnam hai sukhmasawnna ding, Fishery Department, Health Sector le Inter Village road chungthu hai a hril sa nawh tiin a sawisel. Trinamool Congress MLA I. Ibohalbi chun, January 4, 2016 a simkhawlei inhning leia harsatna tuok, a bikin Tamenglong district sunga Epicentre a chenghai sawmdawlna ding chungthu a hrillang sa nawh; Global Warming thu, environment chungchang, tui harsatna thu, inkhelmihai chungchang,Agriculture le Horticulture chungchang hai a hril sa nawh tiin a sawisel. NCP MLA L. Ibomcha chun, Manipur Human Rights Commission, Manipur Information Commission, Manipur Public Service Commission chungthu hai le tulaia Churachandpur district­a Law and Order ngirhmun hai Governor in a hrillang sa nawh tiin a sawisel.
         
Churachandpur buoina chungthu hi state sawrkar chun an hmatienga chingfel a nuom a, chingfel dingin hma a lak. ILP le inzawma Bills 3 Assembly in a lo passed ta chungthua hin, a tul chun Supreme Court Judge in enfeltir a, siemthat ngai lai a lo um a ni chun state sawrkar chun siemthat a hniel naw tiin zanikhan selkaltu pawla member­hai sawiselna hai hrilfiena a siem huna CM O.Ibobi Singh in Inpuiah a hril.

ADCs 6 han meeting an nei nawk
IMPHAL/CCPUR: Manipur­a Autonomous District Councils (ADCs) 6 haia Chairman le Coordination Committee chun Feb. 22, 2016 khan a vawihnina dingin Hotel Imphal­ah meeting an nei nawk. JAC Consultative meeting in Tribal movement hrat lema fepui a ni theina dinga MDCs hai mawphurna an pek le inzawma ADCs hai hin hma an lak tan a ni a, Feb. 16, 2016 khan ADCs 6 haia Chairman han meeting hmasa neiin Movement sukhratna dinga pressure group indin tha ti a ni angin Coordination Committee hi an lo indin a nih. 
         
Zanita meeting a chun tribal movement hrat lema fepui dan ding bakah MDC Power Evolution chungthu khawm an hriltlang sa a, March 3, 2016 khin  CCPur­ah Executive level meeting um nawk ding; chu huna district tina MDC tamlem hai le inhmukhawmna a um thei dan ding hriltlangna nei ding tiin zanita meeting chun an rel. 
           
Co­ordination Committee a Convernor chu Genneikhup Vaiphei, EM/ADC, CCPur a ni a, Co­Convenor N. Wungreiyp, Ukhrul ADC le members Kh. Morong, ADC/Chandel, L. Rangpungjohn, ADC/Senapati le Lunthang Haokip, Sadar Hills hai ADCs haia Chairman hai an nih.

Exam Centre­a CCTV suksiet
IMPHAL: Zanikhan Council of Higher Secondary Education, Manipur hnuoia Class XII Examination, 2016 tan a ni a, Exam Centres 18 haiah CCTV Camera inthut a nih. Zani zing dar 8:15 vel khan misuol thenkhat, student ni dinga ringhla hai chu Biramongol College, Sawombung exam Centre­ah an va lut a, CCTV cameras inthuta um hai an va suksiet. Hi thil tlung le i nzawm hin thuneitu han Lamlai Police Station­ah case an filed.  Exam Centre dang haia chun buoina suok um lovin Exam tluong taka nei a nih.

Rel lien chi Jiribam a hungtlung
IMPHAL:  Feb. 20, 2016 khan Commercial Broad Gauge Freight Train Jiribam a hungtlung. Hiengang Rel lien chi Manipur ram a hung tlung vawikhatna a nih. Hi Rel hi thil MT 12­­ vela rik phur thei niin ei thu dawngna chun a hril.

Indopui pahnina huna bomb 87 chodawk
IMPHAL:  Chandel District a Moreh Ward No. 9 huop sunga N. Chanou khawsunga 132/33 KVA Power Sub Station bawlna ding Excavator hmangin Feb. 20, 2016 khan  hnuoi cho a ni hunah  la puoklo, Indopui pahnina hun laia bombs 87 zet chodawk a nih. Feb. 20, 2016 khan bombs 19 chodawk a ni a, Feb. 21, 2016 khan bombs 68 chodawk nawk a ni a, a reng hin Moreh Police han an va phur a, hi Police Station complex­ah sie a nih tiin Moreh Police station thusuok chun a h ril.

NERIST Entrance Exam, 2016­17
IMPHAL: North East Regional Institute of Science and Technology (NERIST), Arunachal Pradesh hnuoia technical course tum tum inchuk nuom, NERIST Entrance Test Examination, 2016­17 a thang nuom hai chun thu chieng lem NERIST website: nerist.ac.in or www.manipureducation.govin ah en le hriet thei a nih tiin Directorate of  Education (S), Govt. of Manipur chun inhriettirna a siem.

Jat protest leia thi 16 an tling tah
HISSAR/ROHTAK: Haryana­a  Jat hnam han OBC a zieklut dinga ngennaa protest an la fepui zing a, zani khawm khan Ambala­Delhi Highway le Rohtak­Jhajjar Road hai thangin Rel lampui dang dang an dang nawk. Sonepat a chun zanikhan lampui dangtu hai hnawtdarna dingin security han silai an hmetpuok a, sienkhawm thina tuok an la um naw a, hliemna tuok ruok chu iemanizat an um. 
         
Haryana Education Minister Ram Bilas Sharma chun, Jat protest leia mihriem thina tuok 16 an tling tah tiin zanikhan a hril. Sawrkar thlngpui chun an thil ngen hi bawzui pek dingin a hril a,  lampui an dangna iemanichen an chawlsan hnungin ziek ngeia an thil ngen pek dinga intiemna sawrkar an phutnaa lampui an dang hi an sunzawm nawk niin ei thu dawngna chun a hril. Quota or Reservation pek kan ninaw chun Quota/Reservation hi sukbo hmak ni raw seh tiin Jat hnam hai hin thang an lak a nih.
         
Haryana sawrkar chun hi protest a thi sunghai kuomah zangnadawmna Rs. 10 lakh seng pek an ni ding thu le sawrkar sin pakhat seng pek an ni dign thu Agriculture minister OP Dhankar in zanikhan a puong. 
            
BJP General Secretary le state party incharge Anil Jain chun, Haryana Assembly session hung um dinga hin Jat hnam hai special backward category­a inthangtir an ni theina ding bill putlut ning a tih tiin a hril. Zani hmasa zantienga Union Home Minister Rajnath Singh le Jat thuoituhai an hmupui zoa hi thu hi Anil Jain in a hril a nih. Jat hnam hai thil ngen enfel tu dingin sawrkar tlungpui chun Union minister Venkaiah Naidu inrawi Committee an din bawk. Hi Committee chun Jat hnam hai thil ngen le an hmudan kim chang takin sawrkar thlungpui kuoma an peklut ding thu Home Minister Rajnath Singh chun a hril a,  protest nei mek Jat hnam hai chu  nundan pangngai a um nawk theina dinga sawrkar thlawp dingin a ngen.

Parampore inkaptuonaah helpawl 3 kap hlum
SRINAGAR: Helpawl tu ti hrietlo han Feb. 20, 2016 nia Jammu and Kashmir­a Parampore hmuna Entrepreneurship Development Institute (EDI) bul laia CRPF patrolling­a fe hai an lambunna le inzawma inkaptuona fe peiin zanikhan EDI building sunga inbiru helpawl 3 hai chu kaphlum an nita a, hi lei hin CRPF lambuntu hai beinaa inkaptuona chu darkar 48 hnungin zo fel a nitah. 
         
Parampore hmuna inkaptuonaa hin tuta hma khan mi 6 in thina an lo tuok ta a, chu hai lai chun 10th Para Rebiment­a Captain Pawan Kumar; 9th Para Regiment­a Lance Naik Commando Om Prakash; 9th Para Regiment­a Captain Tushar Mahajan le CRPF Head constable pahni R.K. Rana, Bhola Singh le hi institute a thawktu civil mi Abdul Gani Mir hai an  thang. 
         
EDI building hi sawng 5 a insang a ni a, helpawl hai hin CRPF hai an lambun zova building sunga tlanlut an nih.

Inruithei Rs. 27,94,200 manhu an raw hmang
AIZAWL:  Central YMA hnuoia Supply Reduction Service (SRS) chun inruithei chi tum tum an man hai Rs. 27,94,200 manhu ding chu Feb. 20, 2016 khan CYMA office tuol lai an raw hmang. Inruithei hai hi Law & Judicial minister Lalsawta in a raw hmang. CYMA Gen. Secy. Lalhmachhuana chun, Heroin hi thalai le tleirawl hai lai a hluor hle niin a hril.  SRS hin April 11, 2015 a inthawk Feb. 19, 2016 inkar sung khan inruithei Heroin, Methamphetamine, Ganja le a dang dang Rs. 9,00,50,600/­ manhu ding zet an man ta a nih. 


DA case­a man DIG jail­a thun
BHOPAL: Madhya Pradesh­a chun suspended­a um Deputy Inspector General (Prisons) Umesh Gandhi chu jail­a thun a ni tah. Mr Umesh Gandhi hi a sum hmusuokna le inphu lova a hausak (disproportionate asset case) leia man a ni a, bail­a ngenna Court in a hnawl pek leia jail­a thun a nih. Ama ruok hin a nuhmei Archana le a unaupa Ajay Gandhi hai khawm Central Jail­a thun nghal an nih. Umesh Gandhi hi kum 1992­1995 inkar sung khan Bhopal Central Jail­a Superintendent sin lo chel a ni a, Ajay Gandhi hi Sehore district jail­a guard sin lo thaw hlak a nih.  

Orissa HC CJ thar dingin Justice Vineet Saran
CUTTACK: Justice Vineet Saran chu Orissa High Court Chief Justice thar dinga ruot a ni a, Feb. 26, 2016 khin Chief Justice of Orissa High Court dinga intiemkamna nei a tih. Justice Saran hi Karnataka High Court­a senior judge sin thaw lai a nih. Justice DH Waghela in  Feb. 15, 2016 nia Bombay High Court Chief Justice dinga intiemkamna a neia inthawka Orissa HC Chief Justice sin hi ruok ta a  ni a, Justice Pradeep K. Mohanty in Acting CJ sin hi a lo chel a nih. 

Modi in doctorate degree a hnawl
NEW DELHI: PM Narendra Modi chun a Lok Sabha Constituency sunga Vanarasi hmuna zanikhan Banaras Hindu University (BHU) Convocation hmangna va uopin khuollienina thang. BHU chun Modi hi Doctor of Law (LLD) (honorary Doctorate of Law) inhlan a tum a, sienkhawm Modi chun nuom lovin Doctorate degree hi a hnawl. Hiengang degree dawng hi a policy an naw thu a hril niin official thusuok chun a hril. BHU chun hi degree hi India ram ta dinga a sin thaw that leia inhlan an tum niin an hril.

VAWISUN THUPUI
Mi tinin mani thilthaw infie seng lem raw hai se, chu hnunga chun, mi dang chungah ni loin, mani chung chauah suong ding nei an tih.~ Galati 6:4

Editorial
Pi le puhai hniekhnung zui tlat ei tiu

Mihriem sungkuo hrim an todel naw chun a tlabalin mihai kuomah thangpuina a hni a ngai hlak. Chuongang chu thil fe dan a ni leiin puipung ni khuo haia khawm inphalam dawr dawr le inthlahrung taka um a ngai hlak. Chuongang peiin ram khawm an todel naw chun thenum ram haia inthawk pur phur a tul hlak. Hi thil hin a ram mi le sa hai inzaumna a sukboin mihai hmusit hlawna a nih. Hi lei hin rambung tin elin intodel tumin thang an lak sup sup el a nih. Hi lei hin intodel dinga thang lak zuol sau sau chu ei thaw ding makmaw a nih.  Hi thil hi hrie in ei pi le pu hai khan intodel ngei tumin thang nasa takin an lo lak hlak a, a tlangpuiin sungkuo intodel, kum khat fakkhawp nei an lo ni hlak. Hi thil hi an tumruna leia nei le chang thei an lo nih. Pi le pu hai huna khan kutdaw an um ngai nawh.
         
Ei pi le pu hai nunphung kha hang sut ta inla. Tienlaia ei pi le puhai chu mi tumru, mi taima, midang  ban buoi lova khawsak thei tum tlat hnam an nih. Fak le dawnah thenumhai bantu ni chu muolpho le chau thlak an tiin an thil nuom lo tak a ni hlak. Hieng a ni lei hin khawtlang huopa puipungna hmun haia khawm inthlahrung le intim bikna an nei ngai nawh. A nei deu han hang ti deu hai sienkhawm huoisen takin “i thawsuok sa ka fak nawh” an ti el ngam hlak. Hiengang tawngbau saksuok le hmang thei ding khawpa an umna tak hi ngaisang an um zuolna a nih.
         
Hiengang tawngbau an hmang el hi an uong lei le an intitheina lei a ninaw a, an ni phaktawk sengah an intodel fir fer lei a nih. Thenum han ban buoi lova an intodel tlat leiin midang han an hmusit le chungtlak taka an tawng khum chun an lungril a khei a, hi lei tak hin ‘i thawsuok sa le i nei ka fak nawh’ an ti ngam ngat hlak a nih. Hi lei hin kawla nisa suok zuiin lova an fe a, sin thaw an rin ngai naw a, taima takin a sur a sa hnuoiah sin an lo thaw hlak. An sin thawna haiah an inhlem ngai naw a, mi inhlem hmang hai chun lawm zui ding khawm an hmu zo ngai nawh. Mi thabo le mi zawmthaw hai chu an chuong inleng a, mihai hmusit le endawng an hlaw hlak leiin dawngda taka sin thaw an um ngam ngai nawh.
         
Tulai ruok hin chu puipung ni khuo haia khawm an hlem thiem thiem chu a sawl hadam le hamtha an ni ta el niin an lang. Var, thiem le changkang inti lem ta inla khawm hi thila hin chu pi le pu hai kha ei tlukzo nawh. Hi lei hin tulaia thangtharhai khawm hin khawtlang sin thawna haia mi thabo, mi zawmthaw le inhlem hmang hai hi an inhriet suok theina khawp inchuktirna ei pek ngam a hun  ta  anih. Mi inhlem hmang hai hi pawl ban ngam inla chu tuta an inhlem hmang ang hin chu an khawsa ngam ring a um nawh. Ei pi le pu hai khan chu mi inhlem hmanghai chu lawm ding khawmin an dit naw a, an hnawl ngam hmak a nih. Hi thil hi an suol lei a ninaw a, mi thabo an ditnaw lei a nih. Mi inhlem hmang le thabohai chun hrem an phu hrim a nih.
         
A ni takluo, ei pi le pu hai kha chu hlo thlo a fakzawngna bak fakzawngna an nei naw a, sienkhawm an fakzawngnaa khan an thang nasain fakkhawp thlo suok lo kha an ti em em a, an kum khat fakkhawp chu an tharsuok ngei ngei hlak a nih. Hriselnawna le vangduoina lei a ni ngawt naw chun sin thaw lova um kha an nuom naw a, in a um awl mei mei le thaw nei si lova leng puot puot kha chu thil inzakumah an ngai a, awllen lai ti lova chu in a um mei mei kha hmu ding an um ngai nawh. Hausa talo naw hai sienkhawm an fakkhawp an nei chun an thla a muongin tukhawm an inhnar bik naw a, an ti bik bawk ngai nawh.
         
Ei pi le pu hai kha tulai angin thiemna le varna lo neinaw hai sienkhawm an ni tawka an intodelna kha inhnar an umna, ngaisang an umna le entawntlak an nina a nih. Tulai thangthar huna ruok hin chu ei khawsak dan hi a delindul a, entawntlak ding nekin entawntlak lo, nu le pa hai thawsuok sa ringa um hi a tam lem ei ni ta an naw mani ti thei ding khawpin a um niin an lang. Hi lei hin thangtharhai hi ei harsuok a, thabona hi ei hmelma anga ngai a, mani thawsuk sa ring ve thei ding khawpa intodelna ding tiengpanga hma ei lak thar nuom a um. Ei pi le pu hai hniekhnung zui tlat tum ei tiu. An um dan tha, an taimakna le tumruna hai hi ei zui ve tlat chun sungkuo intodel ei hung ni seng ring a um.

Post a Comment

Powered by Blogger.