JNV Entrance Test 2016
CCPUR: January 9, 2016, 11:30AM a inthawk khin CCPur District sunga Block Headquarters tinah JNV/Tuinom a Class VI inchuk ding thlangsuokna dinga Entrance Test­ 2016 nei ning a tih. Hi le inzawma candidate Admit Card la lalo han an rang thei anga la dinga inhriettir an nih.

CCPur block sunga student 504 hai Phungkhothang Govt. H/S­ah Entrance Exam nei an ta; Henglep Block­a mi 74 han Vumhao H/S, Tuilaphai; Singngat Block­a student 31 han Singngat H/S; Thanlon Block­a student 61 han Thanlon H/S ; Tipaimukh Block­a student 175 han Parbung H/S le Samulamlan Block­a student 110 han INA Memorial H/S­ah Entrance Exam nei an tih.

MDM Cook Bank Account
CCPUR: ZEO le District Council/CCPur hnuoia Mid Day Meal (MDM) dawng School Headmaster/Headmistres le Principals hai chu an School hming chitin UBI/SBI/UCO/HDFC/Vijaya Bank haiah Mid  Day Meal Cook Bank Account an hmatienga hawng seng ding le January 9, 2016 chena Bank Account pelut seng dingin Kaikhanlian Guite, Asst. Zonal Nodal Officer, MDM/CCPur chun inhriettirna a siem.

DLCC Meeting Jan. 12­ah
CCPUR: January 12, 2016, 1:00PM khin Mr Lunminthang Haokip, IAS, DC, CCPur inrawinain DC Office­a BRGF Resource Centre­ah District Level Coordination Committee (DLCC) meeting um a ta,  Dist level Officers hai thang an tih. DLCC Meeting huna hin January 26, 2016 a India Republic Day hmangna ding chungthu le thil thaw dan ding hai rel an tih.

K. Ranjit MLA khuollienin
CCPUR:January 6, 2016, 2:00PM hin Ngamjathang Memorial playground, L. Thinglhangphai hmunah 1st (L) Tongkholun Haokip Memorial Football Tournament (main event) um a ta, Chief  Guest in K. Ranjit Singh, MLA thang a ta, Guest of Honour in Yamthong Haokip, MLA thang a tih.

Tournament hi Sporting Alliance for L. Thinglhangphai (SALT) huoihawtnaa nei ding a ni a, back­block rural area­a games & sports promote na dinga thaw tum a nih. Thinghlangphai hi DC/CCPur lalna khuo a nih.

Tuisuolien EFCI Biekin sipzum khawm a sukchim
CCPUR: January 4, 2016 zingkara Manipur thanga India hmarsak biel state haia simkhawlei richter scale 6.7 a hrat an hning khan Tuisuolien­a EFCI Biekin sipzum khawm a sawichim ve niin ei thu dawngna chun a hril. Hi lei hin Biekin khawm thiek niin ei thu dawngna chun a hril bawk.

Exel Foundation Academy hawng
CCPUR: Mr S. Thienlaljoy Gangte, MCS, SDO/CCPur chun zani 10:00AM khan Belam Veng, HQ­a Excel Foundation Academy hmuna Spoken English and Phonetic Course­cum­Teachers’ Orientation a hawng a, Upa Lienlal Kipgen of Tuinom in tawngtainain an hlan.

S. Thienlaljoy Gangte chun, School thar a ni lei le teacher nuom mi 300 hai laia inthawka thlangsuok an nit awl leia qualify tak tak an ninaah student hai lekha inchuktirna kawnga role model ni ding le hmangai taka inchuktir dingin an fui a; mani subject senga master ding; student hai teacher hai chunga innghat an ni leiin an thiemna inro lo a, student hai pe dingin a ngen tawl. School campus sung chau ni lovin society a khawm student hai entawn tlaka um dingin a ngen bawk.

Spoken English and Phonetic Course­cum­Teachers Orientation hi thla 1 sung aw ding a ni a, Sir Suonkholam; Miss Khumi; Miss Mary le Miss Patricia han inchuktir an ta, Excel Foundation Academy­a teacher 11 thang an tih.

Mani posting­na hmun join dingin
CCPUR: Medical Officer (Doctor) tulai hnaia transfer (sawn) hai chu an hmatienga an posting­na ding hmun join seng dinga inhriettir an ni a, mani posting thar zawm lo hai chunga Director of Health Services, Manipur in action lang a tih tiin CMO/CCPur chun a hril.

JPO Inf. Centre hawng nawk tah
CCPUR: Krismas 2015 le Kum Thar­ 2016 lawmna le inzawma December 24, 2015 a inthawk District Hospital­a JPO Information Centre khara um chu January 5, 2016 khan hawng nawk a nita a. Zanikhan EBCC Mualnuam, Thanlon Sub­Divn in martyrs hai ralna dingin Rs. 1500/­ le ZYA Lungchin Unit, Singngat Sub­Divn. in Rs. 3,664/­ JPO kutah an inhlan.

Sin hmu thar
CCPUR: Mr Malsawmthang Infimate s/o Pensionlien, Rengkai Bridge Street, CCPur chun Ministry of External Affairs hnuoia Central Passport Office, Guwahati hmuna Assistant sin a hmu thar a, January 4, 2016 khan a join  tah. Ama hi Co­ordinator, Ruonglevaisuo Education Society (RES), CCPur Circle le President, Bungkhawpui Education Upliftment Society (BEUS) baka Education line a mi thahnemngai thei tak el a nih. Jan. 2, 2016 zantieng khan sung le kuo le ruoltha hai ko khawmin  lawmthu hrilna hun hmang a ni a, Rev. Fimthasang Infimate in Pathien kuoma lawmthu hril tawngtaina hun a hmang.

Chun, Food Corporation of India (FCI) Assistant Grade­ III (AG III) (General/Accounts/Technical/Depot) final result suokah  General­ah  Jonathan Lalruotsang Pena s/o Thansung,  Hrangkhol, Muolhoi  le Technical ah  Nk. Margreth Lalramhlun Mihriemate d/o L. Ringum Mihriemate, Shillong hai an hlawtling bawk. (Virthli)

Spoken English Training for Teachers
CCPUR: Zani zantieng 1:00PM khan Soikholal Ideal High School (SIHS)­ah One Month Intensive Spoken English Training for Teachers chu hawng a nih. Upa M. Holkhothang, Principal SIHS chun training sungin teachers hai thatho taka um dingin a ngen. Training sung hin S. Khuma Thangzawm, Proprietor, Excelxior Spoken English chu instructor in thang a tih.

NE a simkhawlei inhning chungthuah NCMC meeting nei;
NDMA in  a hmuna thil umdan enfel dingin NE ah Expert team a hung tir ding
NEW DELHI/IMPHAL: January 4, 2016, 4:35AM vela Manipur thanga India hmarsakbiel (NE) a simkhawlei richter scale 6.7 a hrat an hning leia Manipur state sung hmun tum tuma thil a suksiet hai report a la lut zing a. Manipur Legislative Assembly building khawm a ban le beam thenkhat a sawikak niin ei thu dawngnain a hril a, zanikhan Works minister Kh. Ratan inrawinain official thenkhat han Assembly complex hi an va enfel. Manipur­a Simkhawlei inhning leia mihriem thina tuok 8 hai laia 4 hai chu Imphal West an ni a, Imphal East­ah 2 le  Senapati district­ah mi 2 an nih tiin State Relief and Disaster Management (SRDM) department  thusuok chun a hril.

Manipur­a simkhawlei inhning leia sietna nasa tlung le inzawmin zanikhan New Delhi hmuna Cabinet Secretary PK Sinha inrawinain National Crisis Management Committee (NCMC) meeting nei a ni a, simkhawlei inhning le inzawma sawmdawlna sin thaw dan hai hriltlang a nih. Hi meeting­a hin Manipur Chief Secretary bakah Uttar Pradesh, Bihar, Sikkim le West BengalChief Secretaries hai khawm Video Conferencing fethlengin a thang ve. Simkhawlei inhning leia harsatna tuortu hai a tul anga sawmdawlna kawngah Union Home Ministry chun NDMA, State sawrkar le an zawmpui Central sawrkar hnuoia Department hai an rawnpui zing bawk.

National Disaster Management Authority (NDMA) chun India hmarsak biela simkhawlei inhningin building iemanizat a suksiet hai a him le himnaw a hmuna enfeltu dingin experts team hung tir a tum. Experts team­a mithiem hai chun simkhawlei inhningin building a sawikak le suksiet hai siemthat dan ding thuah state sawrkar hai thurawn peng a tih.

Hieng laizing hin sansuokna le sawmdawlna sin thawtu dinga NDRF team 2 Imphal hung pan hai laia team khat chu zani hmasa khan Imphal an hungtlung a, Tamenglong District­ah sie an ni bakah a tul le pawimawna hmuna tlansuok dingin Silchar hmuna NDRF team 1 sie an ni bawk bakah IAF team khawm a tul huna suok thei dingin inring zinga sie an ni bawk. Senapati le Tamenglong district haiah simkhawlei inhning khan power supply sukbuoi sien khawm siem­that nawk an ni ta bawk.

Harsatna nei hai ta dingin NDMA Toll free disaster Helpline No. 011­1078 ah iengtik lai khawm thei dinga hawng a nih.

Works Minister in a hrilfie
IMPHAL: Simkhawlei inhning in Khwairamband Keithel nasa taka a suksietna thuah Works Minister Kh. Ratan chun zanikhan a Office chamber­ah Chanchinbumihai an hmupui a, hi building bawlnaah state PWD in kutrawlna an neinaw thu hrilin Central sawrkara thuneitu han an inhlan hnunga National Building Construction Company Limited (NBSS) in an bawl a ni thu a hril. Thil umdan enfeltu dingin state sawrkar chun IIT Roorkee a inthawk geo­technical expert thangin experts pathum  incha a ni thu le Geo­technicl expert han Manipur ram leilung ngirhmun khawm an ennawn ding thu Ratan chun a hril. Expert pathum hai hi January 7, 2016 khin Manipur hung tlung an ta, Jan. 11, 2016 in kir nawk an tih. Expert incha hai chu Dr Yogendra Singh, Prof. Of structural earthquake engineering, IIT Roorkee; Dr Manish Shrikhande, Prof. Of structural earthquake engineering IIT Roorkee le BK Maheshwari, Prof. Geo technical IIT Roorkee hai an nih.

JNIMS Director gate­ah bomb sie
IMPHAL: Zani zingkar 5:00AM vel khan  Elite  Senior Secondary School Gate bul lai Lathod bomb (shell) hmu a ni a, zingkar dar 8 vel khan Singjamei Police team han puok thei lo dingin an siem.  Bomb siena hmun hi JNIMS Director Laishram Deben le hi school a Chairperson ni bawk a nuhmei L. Sumitra Devi hai chengna gate a ni bawk a nih. Hi thil tlung dodalnain zanikhan students, teachers le tuolsung nuhmei pawl han school tuolah sit in­protest an nei. Maoist Communist Party Manipur chun Ladhod bomb hi anni sie a ni thu an hril a, School vaunaa an sie a ninaw thu hrilin JNIMS Director L. Deben warning an pekna a ni thu an hril. Maoist Communisty Party Manipur chun Deben hi fund indiklo taka hmangin an intum a nih.

BJP in suizui dingin an phut
IMPHAL: Simkhawlei inhning in Khwairamban Ima Keithel building hmun thenkhat a sukchimna hai zanikhan BJP Manipur Pradesh  President Th. Chaoba in a va enfel a, building bawl danah sawrkar chu quality control tiengpang a ngaitha tia intumin suizui dingin a ngen. Building ban le beam thenkhat a chim h in contractor han quality an ngaitha ti a suk chieng a, a bawlnaa thil hmang hai a that tawknaw zie simkhawlei inhning in a sukchima inthawk hin hmu theiin a um a nih tiin a hril.
 
Keitheil Phambi Apunba Lup le Manipur Keithel Nupi khawmin CBI annawleh NIA insuitir dingin an phut bawk.

JNIMS a hliem 14 hai insuoktir an ni tah
IMPHAL: January 4, 2015 zingkara simkhawlei inhning leia hliemna tuok JNIMS hospital­a admit 15 hai laia 14 hai chu zanikhan Hospital­a inthawk insuoktir an ni ta a, a lua hliemna tuok pakhat ruok chu Shija Hospital tieng sawn a nih.

MP Th. Meinya in Rs. 10 lakh
IMPHAL: Manipur Inner Lok Sabha MP Th. Meinya chun Imphal East district sunga simkhawlei inhning leia harsatna tuortu hai sawmdawlnaa hmang dingin a MPLAD Fund a inthawk Rs. 10 lakh a pek ding thu a hril.

Mizoram­ah Heroin man
AIZAWL:  December 3, 2015 khan Central YMA le SRS duty han  Heroin No. 4  hawng 2 le can 8, tuolsung rate­ah Rs. 1 lakh chuong manhu ding an man. Hi le inzawm hin Lalzawmthangi of Zemabawk le Lalthansanga of Tuirial Airfield inti hai an man. SRS pawl hin Krismas le Kum thar inkar sung khan Heroin Hawng 2, Can 82 bakah inruithei Alprozolam strip 8 le inruithei dang thenkhat an man. Inruithei an man po po hi Rs. 3 lakh chuong manhu a nih.

Pathankot operation sunzawm: Punjab sawrkarin Rs. 25 lakh  a pek ding
NEW DELHI: Terrorist han  Pathankot­a Indian Air  Force hmunpui an beina le inzawma a beitu hai tukdawlna dinga beipui thlak a ni 4­na zanikhan sunzawm nawk a ni a, Air  Force hmunpui beitu terrorist 6 hai chu kap hlum vawng an ni ta a, dappui thawna hi Jan. 6, 2015 hin zo fel beisei a nih tiin Defence Minister Manohar Parrikar chun zanikhan a hril a, tuchena hin chu terrorist um ding awm hmu an ni ta nawh; a tawpna dinga dappui chu National Security Guard (NSG) han thawng an tih tiin a hril. Air Force hmunpui beina chungthu hi National Investigation Agency in suizuina sin an thaw mek thu a hril bawk.

Punjab sawrkar chun Pathankot terrorist attack leia thi Shaheed Havaldar Kulwant Singh le Shaheed Hon. Capt. Fateh Singh sunghai kuomah zangnadawmna Rs. 25 lakh ve ve a pek anni ding thu Punjab Chief Minister Parkash Singh Badal in zanikhan a puong. Hi baka hin terrorist donaa thi sipai sunghai  sawrkar sin pek an ni ding thu a hril bawk.

1st Singju Festival
IMPHAL: Ni 11 sung aw ding  Singju (Manipuri salad) festival ‘ Singju Festival’ chu April 3­13, 2016 inkar sung khin Nungshikol Park, Chana, Imphal East hmuna nei tum a nih. Hi huna hin Singju a thil hai thatna food experts han hril an ta, kut themthiem thil le thil dang dang man tlawm tak takin hi huna hin zawr ni dinga hril a ni bawk.

Mizoram BJP President dingin Dr JV Hluna
AIZAWL: Zani hmasa khan Aizawl Ramhlun Indoor Stadium­ah BJP Mizoram thuoitu thar ding thlangna nei a nih. Hi huna hin Dr J.V. Hluna chu BJP Mizoram President dinga ruot a ni a, a sin hi kum 3 sung chel a tih. BJP inthuoi dan dungzui chun State thuoitu ding hai hi inthlangna nei lova BJP mipui tam lem hai ditdan anga a ruota ruot an ni hlak a. Tuta tuma inthlangna dinga hin President ni nuom mi 2 in hming an pek a, sienkhawm Central tienga thuoitu hai ngenna angin pakhat lem chu an hnukdawk a, Dr JV Hluna President dinga ruot a hung ni ta a nih. President thar hin Central thuoitu hai le inberawnin State BJP Office bearer le sin dang dang cheltu ding hai ruot a tih. Mizoram BJP President thlangna huna hin Central BJP Office a inthawk BJP National spokesperson le Meghalaya State BJP In­charge Nalin Kohli, BJP North East Coordinator  Ranjit Majumder le Sampark Pramukh hai khawm an thang.

VAWISUN THUPUI
“Kei a mi kalzawnga in um a, ka thu in pawm naw chun, in suolhai zirin a let sariin in chungah hremna intlungtir ka tih.  ­ Leviticus 26:21

Editorial
Simkhawlei inhning

Khawvel mithiem han mihriem hai ta dinga sietna chi dang dang intlun thei ding thil hai lo hriet lawk thei chin nei hai sienkhawm tuchena a tlung hun ding an la hrillawk thei lo pakhat chu  Simkhawlei/lirinhning um ding le dingnaw le a tlung hun ding hi a nih. January 4, 2016 zingkar dar 4:35 vel khan ei inringnaw kar takin richter scale 6.7 zeta hratin Manipur thangin India hmarsakbiel le Bangladesh ram hai a hung sawihning thut a. Manipur­a chun mi iemanizat zetin thina an tuok pha bakah Biekin thangin In tam tak a sukchim bakah a suksiet a ni kha. Simkhawlei hrat tak an hning zo hin a hnungzuitu ti el inla ‘after shock’ chu a um hlak ngei a, hi lei hin mithiem hai chun inveng fimkhur dingin an mi hril hlak. Sienkhawm an hning ding le dingnaw ruok chu khawvel mithiem khawmin an hrillawk thei chuong nawh. Mi thenkhatin dar chu zat­kha zatah an hning nawk ding a nih, tiin thu an thedar rawp hlak. Sienkhawm Simkhawlei inhning ding hi Khawvel mithiem hai khawmin tuchena an la hrillawk thei lo a ni leiin ring ngai lo ding a ni a, Pathien naupa hung nawk hun ding ei hrietnaw leia inring zinga um ding ei ni ang bawka inring zinga ei um ruok chu ei thaw ding makmaw a nih.

Simkhawlei inhning inumtirtu tam tak le nasa tak hai hi Tectonic Plate movement a ni a.  Manipur thangin India hmarsak biel state hai lem hi chu simkhawlei inhning um thut thut theina hmun, lirnghing tamna ‘Ring of Fire’ an ti el khawvela lirnghing tamna Zone –V huom sunga um ei ni leiin Simkhawlei inhning pumpel theinaw inla khawm an hning huna lo invenglawkna kawnga le an veng dan ding tiengpangah awareness tha tawk neia inring zinga ei um hi a pawimaw a nih. Mithiem hai sut dan chun India hmarsakbiel huom sunga hin kum 50­60 dan peia simkhawlei inhning nasa tak a tlung hlak niin an hril. Simkhawlei inh ning richter scale 3 le a hnuoitieng hi chu mihriem han ei hriet phak naw a, Richter scale 3­5 inkar chu ei hriet thei a, richter scale 5 chena inthawk hin chu an hning a nih ti chieng takin ei hriet thei hlak a, NE region a hin kum tin vawi 300 bawr vel simkhawlei an hning hlak anga hisap a nih.

Hiengang ngirhmuna um ei ni lei hin sawrkar khawmin sietrupna dang dang le a bikin Simkhawlei inhning huna um dan ding le thaw dan ding tiengpangah nasa nawk zuola mipui lai awareness a thaw hi a tul hle a nih. Simkhawlei inhning nuom/tamna hmuna cheng ei ni tlat leiin ieng huna khawm tlung le tuok thei ei ni a, hi lei hin In bawltu hai khawmin simkhawlei inhning tlung huna khawm ngir zo ding tawka mithiem hai rawn a, thaw dinga an ti dan ang anga in ei bawl hi sietna nasa tak laka ei him theina ding lampui pakhat a nih. Eini lai In bawl hai ei hang en hin simkhawlei inhning hrat tak tak dawl zo ding khawpa det indo hmu ding a vang hle, ei nuom dan le dit dan danin ei bawl bakah; a pil a nghet am ti khawm dawnsak loin sawng insang tak tak dam ei la hang bawl nawk nghal ti a um hle a nih. Ram changkang haia chun hiengang sietrupna laka himnading hi ngaipawimawa ni leiin remruotna fel tak le uluk taka siemin In hai khawm det indo taka bawl an ni hlak a, in bawl dan chen khuokhirna an siem hlak a nih. State sawrkar khawma hi kawnga hin hma la sien nuom a um takzet.

Ei hril ta ang khan simkhawlei inhning ding hi khawvel mithiem hai khawma an hrillawk thei lo, iengtik huna khawm tlung thei zing a ni leiin simkhawlei inhning huna um dan le chet dan ding fel tak ei nei a tul bawk. Simkhawlei a hung inhning thut a ni chun a thei chinah tuolzawl a tlansuok ding; tuol ei lo suok hman naw a ni khawmin himna dingin Dawkan amanih annawleh khum hnuoi a lut a him a, a thei chinah ei lu venghim tum tlat ding a ni a, kut khing khatin dawkan annawleh khum ke chel tlat ding; simkhawlei inhning huna electric le mei chawk thei hai hrim hrim hmang lo ding;  Thingkung, signboard, insawng, electric hrui le ban bul hnaia um lo ding, hmun ruok lienna hmun hmun pan ding a nih. Chun, Simkhawlei inhning huna inngaituo buoi lova lungril fim taka um tum hram hram ding a nih.

Simkhawlei inhning leia mihriem thi tamna tak chu an hning lei ni lovin ei In bawl hai detindonaw leia in chimin a del hlum an ni tlangpui hlak a, zani lai ela ei thil tuok khawm khan a sukchieng. State sawrkar khawmin hmasawnna sin chi tum tum a thaw hai hi mipui ta dinga thina le sietna rapthlak tak intlun thei a nizie hre thar a, sin a thaw hrim hrimah quality control ngaipawimaw a sin a thaw a tul a. Khuorel sietna ‘Natural disaster’ hi mihriem dang ruol a ninaw lai zingin inveng lawkna le remruotna tha tak nei chun sietna nasa tak tlung ding pumpel thei a ni leiin hi kawnga hin state sawrkarin nasa taka hma a lak a tul, chu chu sawrkar mawphurna a ni a, sietrupna pumpelna dinga khawvelin hma a lak dan tak khawm a nih.



Post a Comment

Powered by Blogger.