KRISMAS CHIBAI
Hmasawnna Thar Chanchinbu Editor, Publisher le Staff hai chun Chanchinbu tiemtu le latuhai po po Krismas Chibai Vochuom kan buk cheu.
   
Ei ta dinga sandamtu hung pieng hi ‘Remna Lal’ a ni ang ngeiin ei insung, ei khawtlang, ei kohran le hnam sunga inkhik inkhalna le inelrelna theinghil le thaibo in Remna Lal hung pieng hin inremna le hmangaina hung intlun ngei sien; chu dinga mitin lungril thar leh hi Krismas ni ropui tak hi hlim le lawm taka hmang seng dingin tiemtuhai po po ditsakna kan hung inhlan bawk cheu.
   
MHJU hnuoia Holiday list dungzuiin December 24, 25 &26, 2015 hai hi Christmas chawl a ni a. December 27, 2015 Pathienni a ni leiin Hmasawnna Thar Office chu December 28, 2015 (Thawtanni) in hawng nawk ning a ta, December 29, 2015 a inthawk Hmasawnna Thar hung suok nawk a tih.
           
Sd/­ Lalmalsawm Sellate
Editor & Publisher, Hmasawnna Thar Daily
--------------------------------------------------------------------------------------------------
Chrismas bazar kai kum dang a tluk nawh
CCPur: Sandamtu Isu Krista piengchampha ‘Christmas’ ei hmangna ding ni 1/ 2 chau um ta sienkhawm zani chena khan thuomhnaw inchaw dinga bazar kai kumdang angin mihriem an tam nawh. Kum dang khan Christmas hmain sawrkar thawktu hai hlaw pek an ni hlak a, tukum ruok chu sawrkar thawktu han hlaw an lak naw lei bakah Christmas Gift ti hiela Job Card holder hai ta dinga sinthawna ding sum sawrkarin a sanction Job Card Holder han tuchena sum an la hmunaw leia bazar kai hin kum dang a tluknaw ni dinga ring a nih. December thla hlaw sawrkar thawktu han an lak naw lei hin sum invirkuol a tlawm pha hle a hriet a nih. Chun, Assembly in Bills 3 a passed hai dodalna leia tribal movement fe mek leia Krismas boruok kum dang neka a re lei, bandh le buoina dang dang lei khawm ni dinga ring a ni bawk.


Krismas chibai an buk
CCPur: Hmar Students’ Association (HSA) Imphal Joint Headquarters chun Lalpa ditsak a kohranhai, Vanlalnau piengcham inser dinga inpuochahai po po  Krismas chibai a buk a,  kum 2015 Lal pieng champha ei inserna hin ei Lal Krista chu Kohran mihai lungrila mawi zuolin, mitin lai thlamuongna le inremna inleng zuol pei raw seh tiin ditsakna an inhlan.

Lailam vadungah pasal pakhat a thisaa hmu
CCPur: Zani sun dar 12:10 vel khan Central Lamka YPA Hall bul­a Lailam vadung sungah  pasal pakhat a thisaa hmu a ni a, Police inhrietir a ni hnungin zani 1:30PM khan Police han ruong hi an lakdawk a, mithi hi Rickshaw khal hlak Suankhanchin (30) s/o (L) Gindong of Tangnuam a nih ti hriet a ni a. Police han ruong hi Morgue­ah an sielut phawt a, sienkhawm mithi sung hai ngenna angin Police chun a ruong hi Tangnuam khuo an hang thak pek bakah hi thina thua hin case registered a ni nawh.

Bail­a insuo a nih
CCPur: December 16, 2015, 11:30PM  nia 7­Assam Rifles han ralthuoma sumdawngtu ni dinga ringhla Chongkhothang (53) s/o (L) Jamkhohen of B. Vengnuom chu a chengna ina inthawk 9mm Pistol 1, magazine 1 leh an man  chu  Police han  zani hmasa khan CJM Court hmaah an inlangtir a, Court chun Bail in an suo. Police chun hi le inzawm hin FIR No.97 (12) 2015 CCP­PS U/S 400 IPC & 25 (1­C) A.Act an registered a nih.

JPO Inf. Centre khar
CCPur: Chrismas 2015 ding leiin District Hospital­a JPO Information Centre chu zanita inthawk khan khar a ni a, January 5, 2015 a inthawk hawng nawk ning a tih.

Krismas Album tlangzar a nih
CCPur: C. Lalvenhawi Vaiphei in “Ei di’n Hukdampa apiangtai, Bethlehem ah” ti thupui hmanga Krismas hla Music Video Album a siem chu zani zantieng 1:30PM khan Rev. Khamkhosiem Hangnung in Dorcas Jubilee Guest House Auditorium­ah a tlangzar. Hi Album hi Paulunthang Vaiphei, IAS, Commissioner, Higher & Technical Education, Govt. of Manipur in a produced a nih. Hla ngaina mi tak a ni thu hrilin Internet/YouTube haia Chrismas hla tha tak tak a um laiin Vaiphei tawnga a um naw leia Vaiphei tawnga mi tamlemin Christmas hla an ngai thei ding ditnaa album hi a produced a ni thu Pu Paulunthang Vaiphei chun a hril. Film le Album dang ang ni lovin mitinin Pathien sin thawnaa ngaia social networking site haia thedar dingin a ngen bawk.


Website thar hawng
CCPur: Rev. S. Vung Min Thang, General Secretary, EBC chun zani 10:00AM khan Tiddim Road, Hebron Veng, New lamka hmuna Website thar ‘ www.lamkaprint.com’ a hawng a, website thar hawnga um hi ei ram le khawtlangin a sawr tangkai ngei a beisei thu hrilin, agency tum tum hai le thangruola website hmanga thil zawr ding a ni leiin Agency tum tum hai kara indikna, ringumna le huna ringum a pawimaw ding thu a hril.
   
Website neitu  Lianzamung Tonsing chun, sum hmuna ding ringwt ni lovin kut themthiem hai thil siem khawvel pumpuia zawrdawk a ni theina ding beiseia website hi hawng a ni thu,  hnam puon, nectie, lekhabu le thil dang dang zawr a ni ding thu a hril. India rama service provider tha   CCAVENUE hmang a ni leiin ring tlak tak an ni thu a hril.

Parliament Winter Session zo  a ni tah:
Rajya Sabha­ah bills 9 le Lok Sabha­ah Bills 14 passed a nih
New Delhi: November 26, 2015 a inthawka Parliament Winter Session tana um chu zanikhan zo a ni a, Rajya Sabha le Lok Sabha inthung hai chu tiemchin um lova khar a ni tah. Rajya Sabha sitting vawi 20 a um a, hi hun sung hin Congress in issue dang dang haia rorelna um thei lova risie an siem leiin Rajya Sabha chun darkar 47 zet an hmang pha.
   
Rajya Sabha chun Lok Sabha­a lo passed tasa Bills pathum­ Commercial Courts, Commercial Division and Commercial Appellate Division of High Courts Bill; Arbitration and Conciliation (Amendment) Bill le Atomic Energy (Amendment) Bill hai hriltlangna um lovin zanikhan an pass belsa nawk leiin sitting vawi 20 nei sungin Negotiable Instruments (Amendment) Bill;Scheduled Castes and Scheduled Tribes (Prevention of Atrocities) Amendment Bill le Juvenile Justice (Care and Protection of Children) Bill hai thangin Bills 9 an passed a, Goods and Services  Tax (GST) ruok chu la siethat phawt a nih. GST Bill hi Lok Sabha­a passed tasa, Congress in siemthat an ngieta an dang tlat leia hma sawn thei lo a nih.
   
Lok Sabha a chun, Congress han issue dang dang haia  rise siem siemin rorelna sukbuoi hai sienkhawm thilman kaisang chungthu, tuilien chungthu hai hriltlang a ni bakah Bureau of Indian Standards Bill, the High Court and Supreme Court Judges (Salaries and Conditions of Service) Bill le National Waterways Bill hai thangin Bills 14 an passed. Zanikhan actory workers hai hlaw sukpungna ding Payment of Bonus (Amendment) Bill, 2015 an passed bawk a nih.
   
Rajya Sabha le Lok Sabha hai inthung man hi minute khatah Rs. 29,000 a ni a, Rajya Sabh inthung nasa taka sukbuoi a ni leia sawrkarin sum an hmang chu Rs. 10 crore vela hisap a nih. Parliament Winter Sesion hi Opposition han risie siemin sukbuoi hai sienkhawm Session nuhnung tak nek khan a hlawtling lema ngai a nih.

Assam­ah IARI indin ning a tih: Dr Chauhan
Imphal: Dr Jitendra Chauhan, (Scientific Adviser to Union Minister of Agriculture  Radhamohan) chun, India hmarsak  (NE) biela a hmasa tak dingin Rashtriya Krishi Vikas Yojana (RKVY) hnuoia Assam state­ah Indian Agriculture Research Institute (IARI) National Development Council hnuoiah indin a ni ding thu a hril. India hmarsak biela loneitu han thlai thar tamlem an tharsuok theina dinga thaw dan le ching dan tha lem an dawng theina dinga indin tum a nih. Union Agriculture Minister Radhamohan enkaina hnuoia hi Institute hi indin a ni ding thu Dr Jitendra Chauhan chun zanikhan a hril.

Army le helpawl an inkaptuo
Imphal: Zani zingkar 6:30AM vel khan Tamenglong district­a Khoupum area­ah helpawl ni dinga ringhla hai le 2/5 Garhwal Rifles hai an inkaptuo niin ei thu dawngna chun a hril a, inkaptuonaa hin NNC cadre pakhat kap hlum nia hril a ni bawk a, thu chieng tak ruok chu hrietna ei nei naw a, Security forces tieng chu thi le hliemna tuok an um thu hriet a ni nawh.

Manipur­ah Political party thar a pieng
Imphal: Manipur a chun zanikhan Sagolband Tera Lourakpam Leikai­ah Political party thar “North East India Development Party (NEIDP) indin a nih. Hi party thara an president chu Narendra Samarjit Singh a nih. India hmarsakbiel hi mini India niin ram sq. Kms. 2,54,956 huom sungah tribal le non­tribals  hnam tum tum 200 chuong umna a ni thu  Mr  Samarjit Singh chun zanita chanchinbumihai an hmupuina huna a hril.NEIDP hi Election Commission of India (ECI) hrietpui la ni lo a nih.

Police han thamna an lak tiin an intum
Imphal: Namdialong Baptist Church, Dewlaland a Kohran hotu Chingjaopou Phaomei chun zanikhan Manipur Pres Club, Imphal hmuna chanchinbumihai an hmupui a, Krismas hmangna dinga bawng tawl naah Police han thamna an lak tiin an tum. Dec. 23, 2015, 9AM khan Krismas hmangna ding a ni zie sukchiengna documents an entir hnung khawmin Lamsang hmuna Police personnel han Rs. 2000/­ hniin an lakpek niin a hril.

PCI in report pe dingin an hriettir
New Delhi/Imphal: Tulai hnaia helpawl thenkhatin Manipur Chanchinbumi hai an vauna chu Press Council of India (PCI) chun a ngaimaw hle a, hi chungthua hin Manipur sawrkar chu report pe dingin an hriettir. Hi baka hin PCI chun thil umdan enfel dingin PCI chun Sub­Committee hung tir a tum.

Telephone service um lona khuo 55,669
New Delhi: India rama villages 5,97,608 um hai laia 5,41,939 haia chun mobile phone service a la tlung nawh tiin Communication and Information Technology minister Ravi Shankar Prasad in zanikhan question hour hunah Lok Sabha hmuna a hril. Rural areaa tele­density 48.79 percent le urban area­ah 152.36 percent a ni a; rural area­ah kum 2017 chena tele­density 70 percent le  kum 2020­ah 100 percent intlingtir tumnain sawrkar chun National Telecom Policy an din thu a hril.

Indo­Pak ramri­ah civil mi hai himna dingin bunkers
New Delhi: Pakistan in an khattawka  ceasefire bawsea silai a hung kap vet leiin sawrkar thlungpui chun  India le Pakistan ramri international border­ah civil mi hai inhumhimna dingin  bunkers bawl a tum tiin Union minister of state for home, Kiren Rijiju chun zani hmasa khan Parliament­ah a hril. Pilot project­a bunkers 60 bawlna dingin Rs. 3 crore sanction a ni a, bunker pakhat siemnain Rs. 5 lakh pei hmang ning a tih.  May, 2014­ October, 2015 inkar sung khan Pakistan in  ceasefire bawsiein  Jammu and Kashmir tieng  vawi 677  a hung kap a,  civil mi 27 le BSF jawan 19 in thina an tuok tiin Rijiju chun a hril.

Clerk chengna ina khum hnuoiah Rs. 7 lakh
Neemuch: Madhya Pradesh­a Collectorate office­a Clerk sinthaw Narendra Gangwal chengnain zanikhan Lokayukta Inspector Basant Shrivastava inrawinain anti­corruption  Lokayukta Police han an dap a,  khum hnuoia thupruk sumfai Rs. 7 lakh le thilhlu dang dang Rs. 60 lakh manhu ding an dapdawk. Incheina thil Jewellery Rs. 10 lakh manhu, ram (lekha) Rs. 55 lakh manhu a thangsa niin Lokayukta Inspector Basant Shrivastava chun a hril. Thil an dapdawk hai lai hin imported watches 20, iPhones 5 le bank locker details hai a thangsa bawk.

Delhi Court­ah police constable kap hlum
New Delhi: Zanikhan Delhi­a Karkardooma District Court a chun a chungthu rel lai mek Chenu Phelwan sunghai mi 4 in court a duty hai an beihrawn a,  Police constable pakhat an kap hlum bakah midang 2 an sukhliem. Hi thil hi zani 11:15AM­a Court room no. 73 a tlung a nih. Police kap hluma um taksaah silaimu 3 a lut. Hliem dang hai chu Court clerk le constable dang pakhat an nih.

An ramsuoknaah an inkap pal, a thi
Aizawl: December 21, 2015 khan Vanlalbela, Khankawn chun am ram suok naah Mr Laltlanenga s/o Sangtawna, Khawbung ‘S’ chu silaiin a kap pal a, Laltlanenga hi a hliemna tuorzo lovin December 21, 2015 zan dar 7 vel khan a thi. Laltlanenga le a ruol hai hi Khawbung le Zawlsei ram inrina Chawr rama sa inchan dinga fe an ni a, an sa inchanna ding hmun seng an pan hnungah Laltlanenga hi thingkunga kaiin sa an chan a, chu huna  Vanlalbela hin thingkunga thil chang a hmu a, silai hin a kap el nia hril a nih.

Assam Assembly Election­ah model PS 250
Guwahati: Kum 2016­a Assam Assembly seats 126 haia inthlangna hung um dinga khin  Election Commission of India (ECI) chun model polling stations 250 siem a tum a,  Constituency pakhatah hiengang model polling station hi pahni bek siem tum a nih tiin   Chief Election Commissioner (CEC) Nasim Zaidi chun a hril.  Model PS haia hin disable hai ta dingin ramp facilities, drinking water facility, wash rooms, electricity etc hai um a tih.  ECI chun Assam Assembly election 2016 hi June 5, 2016 chena zofel vawng a tum a nih.

Maharashtra­ah Naxalites 6 an inpe
Mumbai: Maharashtra­a Gadchiroli District Police Headquaters­a zani hmasaa special function nei huna Deputy Commander thangin Naxalites cadres 6 an inpe. Naxalites hai inpekna hun hi state Home minister Ram Shinde le district Guardian minister Ambarisharaje Atram hai khawm an thang. Naxals inpe hai lai hin nuhmei pahni an thangsa a, tukum sunga Gadchiroli district sunga Naxalites inpe chu 52 an tling tah.

BSF le Police han Heroin kg. 22.5 an man
Ferozpur:  Zanikhan Police le Border Security Force (BSF) thangruol han  Gatti  Rajo Ke village  bul lai dappui an thawnaah  Heroin kg. 22.5, bazar rate­ah Rs. 110 crores manhu ding dapdawkin  mi 3 hai leh an man niin Amar Singh Chahal, DIG, Ferozpur Range chun a hril.

Indian Railways hnuoia sin ruok
New Delhi: Indian Railways hnuoiah zones hran hrana thawk ding post tum tum 18,252 a ruok. Post ruok hai chu Commercial Apprentice (CA) post 73; Traffic Apprentice (TA)  post 1645; Enquiry­cum­Reservaton Clerk (ECRC) post 127;  Goods  Guard post 7591; Junior Accountant­cum­Amanuensis (Typist)  (JAA) post 1205; Senior Clerk cum typist post 869; Assistant Station Master (ASM) post 5942; Transport Assistant post 166; Senior Time Keeper post 4 a nih.
   
Hieng sin hai lakna dinga thu chienglem chu Indian Railways website­ah December 26, 2015 a inthawk en thei dinga sie ning a tih.Application hi online chau pawm ning a ta, online application chu January 25, 2016 chenin peklut thei ning a ta, Online exam March­May, 2016 inkar sung um a tih.

IRS Officer in le hmun dap, cheng vaibelse tel dapdawk a nih
New Delhi: CBI chun corruption­a inhnamhnawia intum Indian Revenue Service (IRS) officer Sanjay Kumar chengna in le official residence hai zani hmasa khan an dap a, sumfaiin Rs. 20 crores bakah rothil le investment hiengang zat ding manhu an dapdawk bawk niin official thusuok chun a hril. Sanjay Kumar hi Employees Provident Fund Organisation (EPFO) a financial adviser le Chief Account officer ni lai mek a ni a, a sum lamsuokna le inphu lova a hausa leia a chengna le hmun hai hi Central Bureau of Investigation (CBI) in an dap a nih.


VAWISUN THUPUI
Chun, vantirko chun an kuomah, “Ti naw unla, ngai ro,  mi tin ta dingin chanchintha lawmum bek bek ka hung intlun cheu a nih. Vawisun hin in ta dingin David khuoah Sandamtu a pieng tah, Lal Krista chu.  ­ Luka 2:10­11

Editorial
Urlawk zan; Zan Thienghlim

Kumpui lingleta ei lo thlir Sandamtu Isu Krista Piengchampha urlawk ni ei lo tlung nawk der ta a. Kohran tin chun hi Urlawk zan, Zan Thienghlim hmang dan ding programme khawm ei induong fel vawng ta ngei ring a um. Hiengang bawk hin mi thenkhat a bik takin thalai hai khawmin Urlawk zan hmang dan ding, nunghak annawleh tlangval hai le hun hmang dan ding; Arsa zeu, Chao zeu le thil dang danga insukhlim le hun hmang tumin insingsatna khawm ei nei tawl ngei ring a um. Inhawi tak le hlimum taka hmang seng dingin Urlawk zan hmangtu hai po po ei inditsak a nih. Hieng laizing hin ‘Zan Thienghlim’ Urlawk zan hi zan tirdakum, zan lungngaium, sawtnawte hnunga ei insirna dingin hmang hlau rawi ei tih ti hi inlau a um takzet.  
   
Khawvel changkang pei le khawsakna indang pei leiin ei khawsak dan le nunphung tam tak hnawlin, nunphung tharah chuongkai ta inla khawm eini tlangmi han inhawi ei ti tak le ei la tawpsan thei lo chu inpawl khawm a, thil thaw tlang hi a ni a, hieng huna hin umdan chintawk ei hrietnaw rawp hlak. Inpawl tlang a, thil hang thaw tlang vel hi inhawi ei ti a, ei hmangsuol naw phawt chun thil tha tak, thaw zawm pei dinga tha a nih. Hieng laizing hin inpawlkhawm le thil thaw tlang hun hih, ei thil thaw ngai lo le ching lo tam tak thaw sin na hunin ei hmang rawp hlak a, a tha tieng nekin a thanaw tieng thaw sin ei ching rawp hlak leiin ei fimkhur a tul. Krismas le Kum Thar lawm bakah a bik takin Urlawk zan le Kumhlui inthla zan hun hai hi nu le pa hai khawma a thei chinah thalai hai an min suo zalen hun;  mi tam takin nuhmei­pasal thil le khawvel thila inhawi chen naa hmang ei tum rawp hun; thalai hai chau ni lo, nu le pa ni tah, pawmlai nei hai le Pathien thua hrat le piengthar tha taka ngaihai khawm an changsuol rawp hun a ni leiin hi hun zalen hi ei hmang thiem a tul.
   
Hun zalen hi  hlimum le an hawi thei ang taka hmang khawm chu thil  tha tak a ni lai zingin Urlawk zan annawleh Kumhlui inthla zan hmangsuol leia insir iengzam um tang ei ti aw!  kar khat hnunga insir dam, thla khat hnunga insir dam; annawleh hi hun ei hmangsuol leia damsung nun rinum taka hmang tah iengzam um ei ti aw! Mi tam takin thlarau malsawmna an dawng lai thenkhat Krismas le Kum Thar lawm hmang zova ngaitha lo nenga hun hmang dam khawm ei um el thei. Mi thenkhat chun hi hun hlimum tak hi suol thil thawnain ei hmang rawp hlak a, hi huna lu sukhai met naw chu ‘Pa’ lo le changkang lonaa ngai tawk dam ei hung um ta pei hi thil pawi tak a nih.
           
Mi tam takin Urlawk zan hi inrui ngei ngei zan damin ei hmang rawp hlak, Urlawk zan hmang nasa taluo leia Inkhawm thei lo khawm ei kat nuk hlak ngei ring a um bawk. Hienganga hun ei hmang a ni chun a piengchampha ei i lawm Isu Krista hin iengtin am mi ngai a ti aw! Krismas inrinni (urlawk zan), Zan Thienghlim hi, a thienghlim ang ngeia thieng hlim taka hmang dingin thalai, nu le pa le mitin insingsa inla nuom a um takzet. A bik takin thalai nunghak­tlangval hai, hi zan hmang suol leia damsunga insirna ei chawksuok nawna dingin fimkhur in, insumtheina nei tum ei tiu. Zan Thienghlim takel Zan pawrche a hmangtu ei lo ni chun hnuoia chau ni lovin nakie thiemnaw changin ei la um ding a ni leiin Zan thienghlim hi thienghlim taka hmang seng dingin ditsakna ei inhlan a nih.

Post a Comment

Powered by Blogger.