Tuolsung
ZNP thuoitu han Tribal martyrs 9 hai ralna an hung nei
CCPur: Zoram National Party (ZNP)­ a President Lalduhawma le Treasurer C. Lakbiakliana hai chu zanikhan Mizoram­a inthawk vuongnain Imphal airport an hung vuonglut a. Imphal­a inthawk CCPur hung panin zani zantieng 4:00PM khan CCPur an hungtlung a. District Hospital­a Tribal martyrs 9 hai tuomna le ralnain Rs. 5,000/­ JPO kutah an inhlan.
   

Hi huna Pu Lalduhawma in thu a hrilnaa chun, Manipur Assembly in Bill 3 hai discussion um lova a passed chu Meitei han tlangmi hai hnuoisiena an lang a, tuta tuma ei buoina tuok in tlangmi hai lai inpumkhatna (unity) a hung inumtir pha a, ei inpumkhatna (unity) hi ei enkawl thiem naw chun ei inthuruolna hi awlsam taka se nawk el thei a ni; ei buoina hi govt. le buoi ei ni a, communal thila tukhawmin la nawng ei tiu tiin ngenna a siem. Society tum tum hai khawmin mani mimal interest a demand siem lo a, tlangmi popo zalenna ngenna fepui dingin a ngen bawk.

Separate Administration an thlawp thu
CCPur: United Peoples Front (UPF) hnuoia ZRO le HPC (D) chun zani zantieng 5:00PM khan Press conference an ko a, tulaia ei buoina le inzawma anni tienga inthawk mipui hriet ding thil hai an puong.
   

UPF le KNO han Central Govt. leh kum 2008 khan SoO an ziek a, Central –a UPA in  sawrkarna chelin, Manipur­ah Congress in rorelna an chel a, Political dialogue a um theina dinga rawtna siem a ni a, vawisun chen hin political talk a la um theinaw thu an hril. Pathienin tlangmi hai ta dingin huntawk a titah ning a ta, Manipur Assembly in Bill 3 a hung passed a inthawk Manipur tlangmi hai popo  inthuruolin Separate Administration an phut a, hi thil hi UPF le KNO khawmin an thlawp thu an hril. UNC khawmin Alternative Arrangement, KNO in Kuki State le UPF in Autonomous Hill State an ngen a, hienghai po po inthlung khawmna chu Separate Administration a ni vawng a nih tiin an hril. Vawi khat thil thuin thil ngen hmunkhat neithei naw inla khawm ei thiltum (goal) chu Separate Administration a ni vawng. Tuta tum ei political movement –a Tribal Martyrs hai inpekna a ropuiin an sang em em; Central Govt.­ah demand tum tum nei inla khawm ei goal chu an ang vawng a nih tiin an hril.

ACCDDAOA in rally an nei, Rs. 20,000  an pek
CCPur: Manipur Assembly in Bill 3 an passed  dodalnaa  Manipur tlangram biela buoina suoka security force hai silai kap leia mi 9 zet an thi le mi tam tak an hliemna le inzawma JAC indina um thlawpnain zani  sun dar 12 khan All CCpur Dist. Diesel Auto Owners Association (ACCDDAOA) chun CCPur khawpui sunga mass rally an nei. Rally hi Kawnpui playground­a inthawk Kangvai chen an fe a, Kangvai a inthawk an hung kir nawk hnung Tipaimukh Road zuiin District Hospital,CCPur­ah mithi hai ralna le hliem hai kanna an nei. Hi huna hin ACCDDAOA chun mithi hai ralna le hliem hai ennain Rs. 20,000/­ JPO kutah an inhlan.


Saikawt Nuhmei Pawlin TN Haokip lim an raw
CCPur: Government Bills 3 passed leia Manipur tlangram biela helna nasa tak fe mek le inzawma nuorna le helna chu hrat takin a la fe zing a. Zani zantieng 2:30PM khan Saikawt a nuhmei Pawl han Saikawt A/C MLA T.N. Haokip lim (effigy) an raw. MLA hai inban dinga phut an ni lai ieng leia T.N. Haokip tuchena inban naw am a ni a? tiin Saikawt Nuhmei Pawl chun indawnna an siem a. Inban dinga phut a ni hnung khawma zani zantieng chena an ban naw demnaa a lim hi an raw a nih.


Chairman, NC ST an inhmupui
CCPur: Central­a thuoitu hai inhmupui dinga New Delhi­a inzin ADC/CCPur Chairman Mr Langkhanpau Guite le ADC/CCPur MDCs hai chun zani zantieng 2:00PM khan Dr Rameshwar Oraon, Chairman, National Commission for Schedule Tribes an inhmupui a, Manipur­a tulaia harsatna le buoina ei tuok mek chungthu an intlun bakah a hmuna hunga thil umdan hung enfel dingin an fiel niin ei thu dawngna chun a hril. 

 EBCC Zion veng in Rs. 9000/­ JPO kutah
CCPur:  Zani zingkar khan EBCC Zion Veng, New Lamka chun Tribal Martyrs 9 hai ralna le an ruong tuomna hun an hmang a, ralnain JPO kutah Rs. 9,000/­ an inhlan. Chun Organisation tum tum hai khawmin martyrs hai ralna an pek tawl bawk.

DC in essential service suk zalen dingin a ngen
CCPur: Mr Lunminthang Haokip, IAS, DC, CCPur chun mipui hmakhuo ngainain essential services thil hai suk zalen (exempt) dingin Chief Coordinator, JAC/CCPur kuoma ngenna a siem. Hi dungzui hin DC Office staff hai office fe le tin hun haia zalen taka inlawntir dingin  JAC/CCPur a ngen a, mipui ta dinga pawimaw le Govt. transaction lo thei lo, state puotienga um hai sum thawnna ding, damnaw enkawl mek le a dang dang han sum transaction an thaw theina dinga curfew hun sunga khawm inthlazal ding; PHED Water tanker le medical ambulance hai an sin inthaw tir ding; bakah communication services hieng BSNL, NIC, Airtel le service providers dang dang hai thu inpeksawngnaa pawinaw anni leiin pangngai taka an sin inthawtir ding le mipuiin fak le dawn thila harsatna ei tuok nawna dingin CAF & PD (civil supply) staff hai pangngai taka bandh sung sin inthawtir dingin a ngen.

Headline
JD(U) Manipur in Pappu Yadav chungah case an siem
Imphal: M. Tombi, President, Janata Dal (United), Manipur chun Manipur High Court ah case a siem (registered) khum niin zanita Imphal­a Chanchinbumihai an hmupui huna a hril. Pappu Yadav hi Bihar a MP ni lai, Jan Adhikar Party (JAP) President a nih. A hma chun Bihar State a inthawka JD(U) ticket a Member of Parliament (Lok Sabha) a thlangtling a ni a, sienkhawm an party kalzawnga a chet leia JD(U) in an Party a intahwka an hnawtdawk a nih. A hnungin Party thar Jan Adhikar Party hi an din a nih.
   
Tuta hma deu khan Pappu Yadav chun Manipur­a Bihari chenghai suknawmnat an nih tiin a rawihai chu Bihar­a Rail station thenkhatah an duty tir a, Manipur mihai zawng a, an hmu chun el sunga inthawk intumtir a, Manipur tieng thawnkir dingin hma an lak tir nia intum a nih. Hi leia JD(U) Manipur in Manipur High Court a hekna (case an registered) an siem pha niin M. Tombi chun a hril.
           
Hieng laizing hin Telipati, Imphal East District a cheng Behari­hai chun vauna, hnawchepna le sukduda an ninaw thu an puonglang. September 10, 2015 khan Telipati President hlui Manoj Kumar Gupta le an General Secretary Chitarman Sahu han Chanchinbumihai an inhmupui a, Manipur a ILPS movement leiin tukhawma vauna an pek naw a, inthina an tuok naw bakah sukduda an ninaw thu an puonglang.
Trucks 100 vel an hungtlung
Imphal: Zani zan khan Imphal­Jiribam a inthawka Trucks hung hai laia Trucks 100 vel Imphal an hungtlung nawk. Truck­hai lai hin Petrol, Diesel le thil dang dang phur an thang niin ei thu dawngna chun a hril. Chun, zanikhan Truck ruok 401 in Imphal suoksanin Jiribam an pan. Zani hmasaa Petrol le Diesel hungtlung hai chu zanikhan Imphal­a Oil pump thenkhat haiah semsuok tan an nih.

RDX Kg. 5 vel chodawk
Imphal: Zani zantieng dar 3:30 vel khan Konthoujam Leikai, Tera Sayang Lambi, Imphal West District a in bawlna ding hnuoi cho ruoltu han RDX kg. 5 vel dign an chodawk a, Police ku tah an pek.

 Inruithei phurtu hai an permit le licence suktawp pek ta ding
Aizawl: Mizorama inruithei hluor taluo sukremna dingin iengang motor khawm nisienla inruithei an phur chun an permit le a khaltu driving licence suktawp pek pei ni tang a tih tiin Transport Department, Govt. of Mizoram chun Order an suo. Mizorama inruithei hung lut tamna tak chu Myanmar a nih. Zokhawthar le Aizawl inkarah Maxicab service 83 an um a, hieng Maxi Cab hai hi check uluk zuol dingin Transport Department, Mizoram chun Transport, Excise & Narcotic le Police department hnuoia thawktuhai an hriettir.

AR han helpawl 3 an man
Imphal: September 10 le 11, 2015 hai khan hmun hran hranah 2­Assam Rifles le 45­Assam Rifles han PREPAK (PRO) cadre 1, PREPAK (VC) cadre 1 le PREPAK cadre 1 (nuhmei) an man a, Police kutah an pek tawl. Mana um hai laia nuhmei cadre Chonchon (38) kuta inthawk  demand letters 4 le pawisafai Rs. 7,000/­ an hmu niin Assam Rifles thusuok chun a hril.

India sipai han kap hmasa naw nih: Rajnath
NEw Delhi: Major General Umar Farooq Burki, Director General, Pakistan Rangers inrawina hnuoia Pakistan Rangers team han zanikhan New Delhi­ah Union Home Minister Rajnath Singh an inhmupui. Hi huna hin Rajnath Singh chun, India chu a thenum ram hai leh inrem taka um a nuom a, hi lei hin India sipai han Pakistan hung kap hmasa ngai naw nih. Chun, India rama inthawk Pakistan a hung lutru tum um ngai bawk naw nihai tiin a hril tawl.

Tawng 250 zet a bohmang tah
Guwahati:  Kum 1961 khan India ramah tawng chi tum tum 1,100 a um a, hienghai laia tawng 250 hai chu a hmangtu um lovin an bohmang ta tiin People’s Linguistic  Survey of India thusuok chun a hril. Tuhin India ramah tawng chi tum tum 850 a la um niin Prof. Ganesh N. Devy, PLSI chun a hril. Tawng um ta lo, hmang ta lova bohmang tahai laia a tam lem hai chu tribal tawng an nih tiin Prof. Devy chun a hril.

Mi 12 MCOC Court in thiemnaw an changtir
Mumbai: November 7, 2006 a Mumbai khawpui huop sunga Rel sunga bomb hrat takel a puokna le inzawmin zanikhan Special Maharashtra Control of Orgnised Crimes Act (MCOCA) Court chun hi thil tlunga inrawlna neia intuma um 13 hai laia 12 hai chu thiemnaw an changtir a, mi pakhat chu thiem an changtir. Hrem anni dan ding ruok chu September 14, 2015 khin MCOCA Court in puong a tih. Hi bomb puoka hin mi 189 an thi a, mi 829 an hliem a nih.

J&K ah Army 2 le helpawl 2 kap hlum
Srinagar: Zanita Jammu & Kashmir a Kupwara district a Handwara biel, Laribal village huop sunga Zacheldara ramhnuoia Army le helpawlhai inkaptuonaah Army 2 le helpawl 2 kap hlum an nih. Inkaptuona hi Srinagar hmartieng, Srinagar a inthawka Km. 100 vela hla niin Army thusuok chun a hril.

Haptakar khatah puon vawihni bi dingin
Aizawl: Mizoram sawrkar hnuoia thawktuhai laia nuhmeihai chu haptakar khatah vawihni bek an office kai huna an hnam puon bi hlak dingin Mizoram state sawrkar chun inhriettirna an suo. Mizo Hmeichhe Inzawmkhawm Pawl (MHIP) General Assembly vawi 20­na chun hnam puon hi offie kainaa khawm bi nita raw seh tia an rel a ni a, hi leia an state sawrkarin MHIP thu rel hi inzaa Mizo hnam puon hi bi dinga inhriettirna an suo a nih.

Governor thuhril AGP le AASU in an dem
Guwahati: Assam Accord chungthua Assam Governor P.B. Acharya tawngbau chun Asom Gana Parishad (AGP) le All Assam Students Union (AASU) hai a suklungawinaw hle a,  Arharya hi nasa takin an dem. A tawngbau suok hi Assam mipui le martyrs mi 855 hai a suosalna le hmusitna a nih tiin an hril. Acharya chun “Asam Accord” hi sakhuo lekhabu thienghlim anga lak le ngai ding an nawh tiin a hril pek niin Agencies thusuok chun a hril.  AASU in foreigners chungchanga nuorna an nei huna khan mi 855 zetin Police le secuity hai kutah thina an tuok pha a nih.

Jail­a intang 599 IGNOU ah an in registered
Nagpur:  Nagpur hmuna Indira Gandhi National Open University (IGNOU) Centre­a chun Nagpur le Amravati Central Jails haia intang mek mi 599 zet an in registered. Hienghai lai hin nuhmei 44 an thang tiin Director Dr P. Sivaswaroop chun IGNOU centre 6th Foundation day hmangna huna a hril.

Israel a inthawk Missiles 10 inchawk ding
New Delhi: India sarkar chun dollar 400 million sengin Israel rama inthawk missiles (Armed missiles) inchawk dingin thutlukna a siem. Israel siem Missile hi a hming chu Heron ti a ni a, Indian Air Force (IAF) hai hmang dinga ti a nih. Heron Missile hin indona hmangruo (bomb) 1,000 kg a rik a phur thei ding a nih.

Chandigarh Airport PM in a hawng
Chandigarh: Zanikhan PM Narendra Modi chun Mohdi hmunah Chandigarh International Aiport a hawng. Hi huna hin Punjab CM Prakash Singh Badal, Haryana CM Manohar Lal Khattar, Punjab & Haryana Governor Kaptan Singh Solanki, Chandigarh MP Karan Kher, mimlien milal dang dang hai an thang. Hi Airport hi 60,591 square metre a lien, Rs. 452 crore senga bawl, tumkhata passengers 1600 inleng theina, thla 30 sunga bawlzo a nih.

PGIMER 34th Convocation
Chandigarh: Zanikhan Post Graduate Institute of Medical Education and Research (PGIMER), Chandigarh Convocation a vawi 34­na hmang a ni a, PM Narendra Modi khuollienin a thang. Thienghlimna, hriselna le natna hri laka inveng a tulzie hai uor takin a hril. Natna hri laka invengna dinga Yoga tangkai dan le thatna hai hrillangin uor zuol sau sau ei tiu tiin mipuihai a ngen. Damdawiin side effects a nei nawna dinga hmalak a tul thu a hrillang bawk.

ISIS in an mi hrentanghai zawr dingin
Beirut: Islamic State of Iraq and Syria (ISIS) terrorist han tuta hma khan chu an mi hrentanghai lu an tanbawng lai thlalak video ah an suklang hlak a, tulai ruok hin chu zawr dinga an sie thu (for sale) ziekin an tarlang thung. Norway mi pasal pakhat le China mi pasal pakhat  an hrentang mek hai thlalak an tarlang a, an thlalak hnuoiah “FOR SALE” ti ziekin an tarlang. (Agencies)

NDFB(S) cadre 2 ralthuom leh man
Chirang: Zani hmasa khan Chirang district, Assam ah NDFB(S) cadres 2 ralthuom leh hmun hran hranah man an nih. Police han Patabari forest­ah Biron Narzary @ N. Bapeibai (29) chu HK­33 Rifle 1, HK­33 Rifle magazines 1 le a mu 228 bakah Mobile Handset 1 leh an man a, Sishubari an ti hmuna Sumkur Basumatary @ Sukao (23), Selft style Lance Corporal, NDFB(S) chu 7.65 Pistol 1, magazine 1, a mu 2, AK series Rifle mu 212, .303  Rifle mu 25 le HE 36  Grenades 4 le detonator leh an man tiin L.R. Bishnoi, IGP chun a hril.
---------------------------------------------------------------------------------------------------------------------
VAWISUN THUPUI
Chuongchun, a kuomah, “Ei chan a sietzie hi in hmu a, Jerusalem a ram ti tam, a kawtkharhai  khawm a kang ti khawm in hriet a; thaw ro, hrilsiet ei ni ta nawna dingin Jerusalem kul hi inngir nawk ei tiu,” ka tih a, ­
-Nehemia 2:17
Editorial
Kohran thuoitu han hma hung la tak tak ve hai sienla
August 31, 2015 a Manipur Legislative Assembly in Inner Line Permit System (ILPS) le inzawma Government Bills 3 a passed dodalnain Naga Peoples Front (NPF) MLA 4 han inbanna Manipur Legislative Assembly Speaker kuomah an pek ngei ti chu thudik a ni a, Secretary Manipur Assembly khawma thudik a ni thu a hrillang tah.Amiruokchu, Churachandpur district a MLAs 6 um hai laia MLAs 4 hai inbanna ruok chu official­a sukchiengna (confirm) a la um naw a, mipui lungril a la sukhimaw ang reng hle. Amiruokchu, Manipur tribal­hai hmalakna le Kohran pawl tum tum a member­hai tawngtaina hung rasuok a nih ti inla ei hril suol taluo ring a um nawh.
   
Kohran thuoituhai hi ei Pathienin a hmang tangkai nuom hle a nih ti chu a taka hrietu le hmutuhai anni leiin tulaia Manipur a tribal mihai thil ngen le hmalakna a khawm hin Pathienin a hung hmang tangkai thei ngei beiseina lien takel a um. Manipur Chief Minister ngei khawmin tu laia ei buoina chungthua hin Manipur­a Kohran thuoituhai an hmupui a, Manipur a tribal­hai hmalakna le inzawma buoina le harsatna hung um hai hi chingfel a hung ni theina dinga hma lapui dingin a fiel. Hieng a ni lei hin Kohran pawl tum tuma thuoitu haiin hma nasa lemin hung la hai sienla nuom a um.
   
Kohran pawl tum tum thuoituhai khawm an to bik naw a, tha le zung, sum le pai hai an seng el bakah Pathien kuoma tawngtaina le press release hai chen an siem a, lawm a um khawp el. Amiruokchu, Kohran thuoitu thenkhat ei tulai boruok ngaisak lo an la um niin an lang a, hiengang mihai khawm hi an hung thanghar a, mawphurna an nei ve a nih ti an hriet theina dinga ei tawngtaipui nuom a um. Manipur a Kohran pawl tum tum hai khawma insuikhawmna pawl pakhat indinin hma hung la tlang hai sienla chu an hmalakna a hung hrat zuol sau ngei ring a um.
   
Mawlna lei le inhrietthiemnawna thenkhat leiin kum 1997 khan Churachandpur district ah Kuki­Paite(Zomi) insuolna (Ethnic clash) a hung suok pal hlau el a. In le lo hai inrawpektuona, inthattuuona le inthuoihmngna hai chen a hungtlung el a. Kha thil tlung kha pawi ei ti seng a ni kha! Kha hun laia Kohran thuoituhai hmalakna, an tangkaizie, an sawlna le inrimna hai po po kha theinghil chi an nawh. Inremna le muongna tluontling a hung um theina dingin Peace Committee indin a hung ni a, Kohran thuoituhai khawm member a ruot an hung ni a, a sulsutu tak an hung nih. Kha lai huna ei CM Rishang Keishing le Ministers hai khawmin hma nasa takin an lak. Kha huna inremna hung um theina kha kohran thuoituhai hmalakna lei a nih ti inlakhawm ei hril suol bek bek ring a um nawh.
   
Hieng a ni lei hin Manipur state sunga kohran pawl tum tum hai thangruolin hma hung la tak tak hai sienla chu tu laia ei buoina chungchanga khawm hin an thaw hlawk ngei beisei a um. Kan inrawlna ding an nawh an ti chun thil indik ni naw nih. Ram le hnam a buoi chun Kohran khawm a tawk buoiin a sukchau pha ding a nih. Tukhawm hin kum tina September thlaa beiruol ei nei hlak chu nei mumal thei lovin ei um pha a nih.
           
Kohran thuoituhai hi Kohran member­hai chau ni lovin sawrkar khawmin an za a, an thu hi a lak hle hlak. Hieng a ni lei hin Kohran thuoitu han hma hung la tak tak ve hai sienla nuom a um.  Kohran h i inza an um hrim a, an thu khawm a fe hle a nih. Khawvela ram ropui tak America ram President a ni laia White House (US President In le a office) a thawktu nunghak Monia Lewinsky le dangdai taka sex hmangtu Bill Clinton khawm an Kohran inlawina Arkansas Baptist Kohran member list a intahwka an pei tum khan Bill Clinton chu a ti nasa, ngaidam an hni a ni kha! Arkansas Baptist Kohran chun “Ngaidam inhnihai ngaidamtu ding chu Kohran anni an nawm” tiin an ngaidam a ni kha! Kohran hi a huoi chun a member­hai nun sukdiktu, sawrkar, MPs, MLAs etc hai nun le rorelna sukdiktu an ni thei. Hi lei hin ei Kohran thuoituhai hi ei phut ve an nih.


Post a Comment

Powered by Blogger.