Tuolsung
Lungin a malpui le ke ru a del tliek
PARBUNG: Date 26th/Aug/2015 zing dar 10Am vel khan Mr. Lalrorel  (29) H/O Mrs. Jenney of Parbung (s/o Mr. Zairemthang) of Lungthulien chu Parbung­a Tawng­taina thlang hnuoia an lung lakna a lung lien deu in a hung del a, a malru le a ke ru dang dang hai a del tliek. Ama hi Parbunga um 80RCC­ BRTF hnuoia sinthaw, an lung (quarry) laknaa changsuola lungin a del a nih. ICDP Gypsy in tuoksiet a tuoknaa inthawk Parbung Hospitalah phurtlung a ni a. Parbung dortors han theitawpa an buoipui hnungin Tuithaphai/CCPur tieng hung panpui a nih. Thisen a suok rawn leiin a chau hle tiin ei thu dawngna chun a hril. (Input:Lalnunthang Songate,Parbung)


Hmar Inpui Executive Council
CCPUR: August 28, 2015( vawisun) 11:00AM hin HL Daka Memorial Hall, HSA Campus,  Rengkai, CCPur­ah Hmar Inpui (HI) Executive Council inkhawm um a tih. Hi huna thang ding hin Region tum tum­ Meghalaya, N.C. Hills, Barak Valley; Jiribam le Mizoram haia inthawk palai hai khawm Tui­thaphai an hung tlung tawl tah. Council inthung huna hin Hnam ropui pawimaw tak tak hai hriltlang le rel ning a tih. Member hai chu a hun bituka um huna Council in­thungna hmun tlung seng dingin Hmar Inpui GHQ chun inhriettirna a siem.

Sungkhaw le Sentut natna an leng
CCPUR: Thanlon sub­division sunga Bungpilon khuoa chun tulai hin Sungkhaw (diarrhoea) le Sentut (measles) natna hri an leng a. Damnaw hai enfel dingin August 28, 2015 hin Medical Team khatin Bungpilon pan an tih. Medical Team a hin Dr Samuel L.Singson, Medical Officer/ Thanlon PHC inrawinain T.Chinzakham,MHW,Doungaihkim,Staff Nurse, Chiinneihching, Staff Nurse le Awnzakap, Driver hai an thang a, 6:00AM in CMO office - a inthawk suok an tih.

Dist. Level Committee on Recovery
CCPUR: May 23, 2015 nia DCC/DLCC meeting thutlukna dungzuiin Bank tum tum haia Bank loan thuah zanikhan District Level Committee on Recovery indin a nih. Hi Committee chun  PMEGP loan bakah bank loan tum tum thung lova um hai an buoipui ding ti a na, an zawmpui  Bank han Sept. 10, 2015 chenin DC kuomah detail report pelut an tih. Dist Level Committee on Recovery ­a Chairman in DC/CCPur; Co­Convenor in BO HQ, DC’s office le Lead Dist Manger; Member in GM/DIC/CCPur; DDM/NABARD/CCPur;CEO/KVIB, Imphal; Asst Director/KVIC, Imphal bakah Member in CCpur Dist sunga um Banks 14 haia Manager le SBI/HEPA, Loktak  hai an nih.

Staff Nurse Traning on TB care
CCPUR: August 27, 2015 - Sept. 9, 2015 chen aw ding Medical Directorate huoihawtnain Imphal­a College Of Nursing, Lamphelpat­ah GNM hai ta dingin batch thuma the “3 Days Staff Nurse training on TB Care and Control under the GFATM Project Strengthening Institutional Capacity for Nurses Training on HIV/AIDS in India  um a tih. 1st batch Aug 27­29, 2nd batch Sept 1­3, 2015 le 3rd batch Sept 7­9, 2015 haia nei ning a tih. CCPur Dist a inthawk batch 1­ah mi 3 pei thang an tih.
   
Chun, College of Nursing, Lamphelpat hmun maah ANM hai ta dingin Sept 4­15, 2015 sung batch 3 in ‘2 Days training on TB Care and Control under GFATM project Strengthening Institutional Capacity for Nurses training on HIV/AIDS in India um a tih. 1st batch Sept 4­5, 2015, 2nd batch 10 ­11, 2015 le 3rd batch ning a ta, CCPur district a inthawk batch 1­ah mi 5 pei va thang an tih.

PTC Miz. thuoituhai
CCPUR: Paite Tribe Council (PTC) Mizoram HQ President H. Dalkhenkhai, Gen. Secy. Liandal, Area Finance Dalkam, Adviser Dampau Guite le member dang 2 hai chu zani hmasa khan CCPur­ah an hung inzin a, zani 11:30AM khan Hiangtam Lamka PTC Office­ah PTC Gen. HQ President le PTC hotu han lawmlutna an nei a, PTC Mizoram hmalak dan report an pek. 

Tuilien thangpuina dawl zing
CCPUR: Tuilien le mimkei tuortu hai thangpuina ding thawlawm dawl zing a ni a, Pangzawl Village Authority chun zanikhan ZoREC kuomah Rs Rs. 3195/­, thuomhnaw Bag 3, Bufai Kg 20, etc; Simveng Village Authority in Rs 3850/­, Bufai Bag 5, thuomhnaw Bag 3, pheikawk kawp 5, Bel 1 etc; Gouchinkhup Veng Village thuomhnaw Bag 10, pheikawk Bag 1, bur le bel Bag 1, b ufai Bag 7, Rs. 20,020/­ an inhlan. ZoREC le ZAA in Relief Concert a ding Ticket zawr mek a ni bawk. Thangpuina thil hi 29/8/2015 chen dawlkhawm an tum.

Headline
Ni 2 sung aw ding Manipur Assembly Emergency Session vawisun 11AM ah tan ding
IMPHAL: Zanikhan Manipur Legislative Assembly Business Advisory Committee (BAC) Meeting nei a ni a, Tenth Manipur Legislative Assembly 11th Sessions part (III) sunga thu putlut le rel ding hai ngaituona an nei. Special/Emergency sitting hi ni 2 sung, August 28 & 31, 2015 haiah nei ning a tih. August 29, 2015 (Inrinni) le August 30, 2015 (Pathienni) haiah sitting u m naw nih. Sitting hmasa tak ni, vawisun hin Government Bills 3, The Protection of Manipur People’s Bill, 2015 (Bill No. 16 of 2015, The Manipur Land Revenue and Land Reformed (Second Amendment) Bill, 2015 Bill No. 17 of 2015) le The Manipur Shops and Establishment (Second Amendment) Bill, 2015 (Bill No. 18 of 2015) hai putlut ning a tih.
           
Sitting a ni hnina August 31, 2015 in sitting hmasa tak nia Government Bills 3 putluta um hai hriltlang le passed ning an tih. Mipui nawrna nasa takel a um leia Manipur Assembly Second emergency sitting hi  ko a um a nih. Hieng laizing hin ILPS ngenna le inzawma mipuiin lampui hrawna July 8, 2015 nia an nei tuma Police hai silai hmetpuoknaa th Sapam Robinhood ruong chu JNIMS Morgue ah lak lovin a la um zing.

ST pek a nuom niin a hril
IMPHAL: Meitei han Scheduled Tribe a i nzieklut dinga an hnina chu sawrkar thlungpuiin a ngaiven a, pek a nuom leiin thil tul hai chu thla 6 sunga sawrkar kuta pelut dingin sawrkar thlungpui chun Manipur sawrkar a hung inhriettir niin Th. Chaoba, President, BJP Manipur in zanita Imphal­a Chanchinbumihai an hmupui huna a hril.

KYKL cadres 2 man an nih
IMPHAL: August 26, 2015 khan Yairipok BAzar ah 2­Assam Rifles le Thoubal Police Commando thangruol han KYKL Cadre pakhat SS Pvt. H. Roshan Singh @ SP @ Abungcha (22) s/o (L) H. Itoba Singh of Leirongthel Pitra an man a, Yairipok PS ah an peklut. Hi ni ma hin 22­Assam Rifles han Pangaltabi Chingkha, Thoubal District ah KYKL cadre bawk SS Pvt. Th. Sunil @ Hera (25) s/o Th. Inaocha of Pangaltabi Mayai Leikai, Thoubal District an man a, Kakching PS ah an peklut.

Sports University bawlna ding ram
IMPHAL: Zani zing dar 10 khan National Sports University bawlna ding ram 336.93 acres zeta lien, Village No. 44­Yaithabi Khunou, Thoubal District a mi chu Manipur sawrkarin Ministry of Youth Affairs and Sports kutah an hlan. Hi hunsera hin CM O.Ibobi Singh; Prithviraj Singh, Parliamentary Secretary,YAS & Tourism; P. Brojen, MLA; P.C. Lawmkunga, Chief Secretary le Ministry of YAS a Official hai an thang.

NH­37 siemthatna dingin Rs. 111.62 crore
IMPHAL: National Highway No. 37 (Imphal­Jiribam Road) siem thatna dingin Union Ministry of Transport & Highways in Rs. 111.62 crore (first phase) in a sanctioned. NH­37 hi Prime Minister Narendra Modi 100 Days programme list a thang a nih. Second phase ah Rs. 213 crore sanction nawk vat ning a tih. NH­2 (Imphal­Dimapur Road) a dingin Rs. 47.64 crore, NH­102 (Imphal­Moreh Road) Lokchao leilak zo felna dingin Rs. 37.18 crore kum 2015­16 sunga dingin a sanctioned tiin Moirangthem Asnikumar, General Secretary (Administration), BJP, Manipur chun Chanchinbumihai kuoma a hril.

Computer Operator sin 9 a ruok
IMPHAL: High Court of Manipur, Imphal hnuoia Computer Operator post 9 a ruok. Pay scale Rs. 5,200­20210+Grade pay Rs. 2,400 per month Plus other allowances a nih. Online a apply ding le September 10, 2015, 11:00PM chenin online application peklut thei ning a tih. Exam chu Sept. 26, 2015 a inthawk tan ning a tih. Thu chieng lem official website:http://hcmimphal.nic.in ah hmu thei ning a tih.

Aizawl­ah mimkeiin In 3 a keichim; thlan 70 vel a suksiet bawk
AIZAWL: Tulaia ruo nasa taka a sur leiin zani hmasa zan khan Mizoram khawpui Aizawl­ah In 3 a chim bakah thlan 70 vel a suksiet bakah  Mimkei hin motor 4 a suksiet bawk niin zanita District Disaster Management Authority official thusuok chun a hril. Thlan a suksiet hai laia 50 chu Chaltlang; 20 hai chu Ramhlun Vengthar thlanmuol a mi niin ei thu dawngna chun a hril. Chawlkarkhat deuthaw ruo nasa taka a sur leiin Mizoram state sunga Lunglei, Saiha, Lawngtlai le Serchhip district haia chun thil tam tak a suksiet bakah Myanmar le Mizoram inrina Champhai district le Aizawl chu mimkei leiin infepaw thei lovin an um mek a. Lunglei district­a Khawthlangtuipui liensang in in tam tak a chim leiin sungkuo 100 chuong hai chu chengna ding in nei lovin an um bawk.

Smart Cities 98 siemna ding hai puonglang
NEW DELHI: Zanikhan Union Urban Development, Housing & Urban Poverty Alleviation and Parliamentary Affairs Minister M. Venkaiah Naidu in India ram states 24 haia Smart Cities 98 siemna dinga riruongna hai a puonglang. NE bielah smart cities siem ding 8 a thangsa a, hienghai lai hin Manipur capital Imphal khawm a thangsa. Smart City pakaht siemna ding hin Rs. 100 crore pei, kum 5 sunga pek ni dingin M. Venkaiah Naidu chun a hril. Smart cities a siem ding tamna tak chu Uttar pradesh niin khawpui 13 hai chu smart cities a siem ning an tih. A dawttu chu Tamil Nadu 12; Maharashtra 10, Madhya Praqdesh 7; Bihar le Andhra Pradesh haiah 3 ve ve a thang.

Samak pel tum 3 forest guard han an kap hlum
GUWAHATI: Assam rama Kaziranga National Park­a chun zani zingkar inhma tak khan Park­a Samak kap tumtu mi 3 Forest Guard han an kap hlum. Sapeltu hai hi tuilien remchanga laa Samak kap dinga Park­a lutruk an nih tiin Park thuneitu hai chun an hril a. Forest Guard han an tuokfuk leiin an inkaptuo a, chu huna hieng sapeltu 3 hai hi kap hlum an nih. Hi thil tlungna hmun hi Bogori range­a Burhapahar hmun a nih. Samak kap tum midang 2 hai chu dam in an inrel hmang ring a nih. Inkaptuona hmuna hin Forest guard hai chun Rifle 2 dapdawkin an man.  Tukum January thlaa inthawk khan Kaziranga National park­a hin Sapeltu han Samak 10 an kap hlum ta a, Samak kaptu mi 18 kap hlum an nita bawk tiin official thusuok chun a hril.

Trade Union in strike fethlengpui an tum
NEW DELHI: Central Trade Union leaders hai chun September 2, 2015 nia India ram pumpui huopa strike thaw an tum chu zanita Union leaders le Labour minister Bandaru Dattatreya han darkar 2 lai zet inbiekna an nei hnunga inbiekremna an nei theinaw leiin strike thaw an tum chu fethlengpui an tum thu reporters hai kuomah an hril. Finance Minister Arun Jaitley inrawinain ministers hai leh vawisun hin Trade Union leaders han inbiekna nei nawk an ta, Charter of demands points 12 an nei hai hriltlang nawk an tih.
   
Co­ordinating Body of Trade Union, Manipur a Chairman, L. Sotinkumar chun Trade Union in Sept. 2 a nationwide strike an nei ding hi Manipur a Trade Union khawmin an thlawp ve ding thu zanikhan a hril.        

Bijoy Hrangkhawl in Interlocutor ni a nuom
AGARTALA: Helpawl thuoitu hlui le politician hung nitah Bijoy Hrangkhawl chun, danpuoa hnawl National Liberation Front of Tripura (NLFT), Tripura sawrkar le sawrkar thlungpui han tripartite talks an nei dingah ‘interlocutor’ a thang a nuom thu zanikhan a hril. Tripura state sunga inremna le muongna a hung um theina dinga sawrkar inbiekna dingah NLFT annawleh helpawl dang hai kara dawrtu dinga interlocutor a thang an pei zing chu Mr Hrangkhawl chun a  hril. Sienkhawm Tripura CM Manik Sarkar chun Hrangkhawl hi NLFT le inzawmna nei nia intumin interlocutor dingin a ditnaw nia hril a nih. Thla 6 liemta sung khan Delhi le Shillong haiah NLFT chun sawrkar leh tripartite talks tumhni an lo nei ta a nih.

Post Office thawktu Rs. 15 lakh le a tlan hmang
SHILLONG: Meghalaya­a Sub­ Postmaster sinthaw Chandra B. Prasad chu zani hmasa khan  NEIGRIHMS Post Office­a saving deposit Rs. 15 lakh chuong zet a tlan hmangpui tiin ei thu dawngna chun a hril. Chandra B Prasad in sum a tlanhmangpui hi Rs. 15,20,806 a ni a, Police chun thil umdan an suizui mek.

Maternity leave hun suksei dingin
NEW DELHI: Union Women and Child Development (WCD) minister Maneka Gandhi chun sawrkar thawktu nuhmei hai ta dinga Maternity leave thla 3 ni hlak chu thla 8 a suksei dingin Union Labor Minister, Bandaru Dattareya kuomha rawtna a siem. Union Labour Ministry chun hi hma khawm hin Maternity Leave hi thla 3 a inthawk thla 6 a suksei dingin rawtna a lo siem ta nia hril a nih.

HP CM in cabinet a suklien
SHIMLA: Himachal Pradesh CM Virbhadra Singh chun zanikhan Banjar A/C a senior Congress MLA Karan Singh chu minister thar dinga lalutin a cabinet a suklien. Karan singh hi  Cooperative & Ayurveda portfolio pek a ni a, zanikhan Shimla­a Raj Bhavan hmuna Himachal Pradesh Governor Acharya Dev Vrat hmaah  minister dinga intiemkamna a nei.

Pakistan in mi pakhat a khai hlum nawk
ISLAMABAD: Pakistan chun kum 1996 a mi 6 thattu thi dinga thiemnaw anchangtir Maqbool Hussain chu zani zingkar khan Punjab province­a Multan central Jail­ah a khaihlum nawk leiin  tukum March thlaa moratorium hlip a nia inthawk thiemnaw inchangtir mi 212 a khai hlum tah. Maqbool Hussain hin a unaupa that a ni leia phuba laknaa mi 6 hai hi a that a nih. Pakistan rama chun thi dinga thiemnaw inchangtir 8,000 chuong an um a, Nawaz Sharif sawrkarin moratorium on death penalty a hlip a inthawk mi 160 a khai hlum tah.

US reporter le cameraman kap hlum
WASHINGTON: Zani hmasa khan United States­a nuhmei TV Presenter Alison parker le  Cameraman Adam Ward hai chu silai chawi pakhatin Virginia state­a Moneta hmuna Shopping Mall­a live television report an pek laiin a kap hlum. TV reporter le cameraman kap hlumtu hi Vester Lee Flanagan niin WDBJ7 TV a lo thawk hlak a nih. Vester Lee hin hi thil a thaw zo hin a tlan hmang a, sienkhawm a hnungin Police han a car sungah a thisain an hmu a, a taksaah silaimu lutna be hmu a ni leiin ama le ama inkap hlum ni dinga ring a nih. Hi thil tlung le inzawm hin US Congress chun White House chu gun control laws pass dingin an phut. 

VAWISUN THUPUI
Tangka ngainatu chu tangkaah lungawi naw nih a; hausakna ngainatu khawm hlawknaa chun lungawi bawk naw nih: hi khawm hi teplo el a nih.   ­Thuhriltu 5:10

Editorial
Bandh le blockade chau ni lo mimkei leiin harsatna

Furpui ei tlung a, tuilien, mimkei le thlipui hai ei thu le hla lovin ei tuor mek. Nuomin nuom naw inlakhawm hieng thil hai hi ei inkhel der lova kum tina ei tuok le tuor hlak an nih. Siemtu Pathienin tha le rem a ti ang dungzuia hiengang thilhai hi a hung um le a hungtlung a ni leiin nuor le lungsen thei ding ei ni nawh. Lungawi tak le thiem taka ei tuor el naw chun hadamna ding a um nawh. Lungawi lovin chier inhruoi inlakhawm a tangkaina a um nawh. Mani le mani ei sawl thlawn el chau a nih. Khawvel le a sunga um hai siemtu Pathien thilthaw theizie le a ropuizie tarlangtu a nih. Mihriem han van ruotui, mimkei le tuilien hai hi ei intlungtir ding nisienla chu sum seng tam taluong a ta, mihriemhai thaw thei ruollo ding an nih.
   
Bandh, General strike le economic blockade hai chu mihriem hai thaw thei umsun an nih. Khawvelin a hung phursuok khawm ni lo, ei Pathienin a thaw khawm ni lo, mihiemhai siemfawm bandh, general strike le economic blockade leia harsatna ei tuok ang bawk khan furpui huna hin ruosur tam lei, mimkei lei, tuilien lei le thlipui hai leiin harsatna ei tuok ve ding a nih ti chu  tulai tak hin ei lungril le ngaituona haiah a lien hle ring a um. Bandh, General strike le economic blockade that nawzie min hrietsuoktirtu niin, thaw ta ngai lo dingin lungril min puttir tawl sienla nuom a um.
   
Furpui huna tuilien, mimkei, riel, tek le thlipui hung um ding le thil a suksiet dinghai hi ei Pathien chau ni lovin khawvel mipui, state sawrkar le sawrkar thlungpui hai khawmin an hrietlawksa vawng a nih. Amiruokchu, thal huna  furpui hun sunga ei thil mamaw tawk ding sekkhawl tumna ei nei chuong ngai der nawh. Furpui hungtlung leia harsatna tuor ding awm hrim ei nih. Thal huna lamlien le leilak tha naw le leilak awngrawp tahai siem lova furpui huna siem tha dinga hma ei put rak hin tangkaina a nei ngai nawh. Umzie bovin sum le pai, tha le zung ei seng thlawn mei mei a nih.
   
Thilhring chiterek le hmusitum takel phaivang hai hman an furpui huna thil mamaw dinghai thal hun laiin an lo sekkhawl a, Pathien thil siem hai laia a ropui tak le a chunghnung tak mihriemhai ruok chun sekkhawlna chang ei hriet naw a, harsatna tuok awm hrim ei nih.
   
Furpui leia ruotui tam lei le mimkei tlung leiin Manipur le state dang hai infepawna lampui NH­2 (Imphal­Dimapur Road), NH­37 (Imphal­Jiribam Road); NH­150 (Tipaimukh Road) hai a ping vawng bakah NH­102 (Imphal­Moreh Road) a hun tiemchin um lo bandh a um bakah state dang le infepaw theina umsun Guite Road hlak chu inlirthei tlan thei tawk tawk, Aizawl tlungna ding ringawt khawmin ni 3 deuthaw hun a lak a, Manipur mipuihai hmakhuo ding hi an thim map el a nih. Ieng tak am ei la chang ding, beidawng um takel a nih. Vuongna hlak chun ei mamaw po po a mi hung phur pek awm si nawh!
   
Bu nghei chun thi em tawl nawng ei ta, ei harsatna ruok chu namen ninaw nih. Upa han ‘kan harsatnain van a tawng’ ti le ‘kan ta dingin vanpui a chim’ tipo ei hmabak niin an lang. Milien le milal, mi hausa le a khawsa thei hai chun an kum khat fak ding sekkhawlsa nei an tih. Amiruokchu, harsatna tawpkhawk tuor dinghai chu nitina inhlawfaa fakzawngtuhai anni ding a nih.
           
Fak le dawn ding chu thu dang lo nisienla, lo thei lova damnawhai mamaw damdawi chi tum tum, oxygen le khawl hmangruo dang dang han bo le tlaksam hun a hung um ding a ni a, chu huna ei mangang dan ding hi hrilin a siek nawh. Hieng a ni lei hin state sawrkarin damdawi le Oxygen hai bek hi chu vuongna hmanga phur le sekkhawl dan ding lampui ngaituoin hma la nghal sienla nuom a um. ILPS chau hi tu taka ei mamaw a ni nawh. Hi chungthua hin Manipur mipui han rawl insuo a, ei mamaw zuol thil hai hi state danga inthawka Manipur­a phurlut dinga state sawrkar ei nawrtlang a hun lai a nih.



Post a Comment

Powered by Blogger.