Responsive Ad Slot

Hmasawnna Thar | 27 August, 2015

Thursday, August 27, 2015

/ Published by VIRTHLI
Tuolsung
Damdiei le Taithu inkarah mimkei
CCPur: Tipaimukh Sub­Division huop sunga Damdiei le Taithu inkarah mimkei rapthlak tak takel hmun 5 velah a tlung leiin Damdiei bak motor a lut thei ta nawh. Mimkei hi JCB pahni khawmin inthielfaina sin thaw hai sienla haptakar hni sungin an inthielfai zo naw el thei niin ei thu dawngna chun a hril. Mipuiin bufai thuah harsatna an tuok tan niin Parbung­a inthawka ei thu dawngna chun a hril.

UNOAC hnuoiah thlalak dan training
CCPur: UN Alliance of Civilization (UNAOC) hnuoia Standing Together to Enable Peace  Trust (STEP­Trust) chun August 29, 2015 chen aw ding IGNOU Room, CCPur College­ah ‘I’m not a stereotype­ A journey through photography’ ti thupui hmangin hnam tum tum haia inthawk thlalak dan mi 15 inchuktirna hun zanikhan tan a nih. Hi huna hin Kh. Samuel Paomei, Coordinator, STEP,Trust in Stereotype (Neurological, social, political and economic perspective) thuah training a pek a, Ajay Noronha, Cinematographyer, Boolywood chun thlalak dan training a pek. Chun Shreya Jani, Managing Trustee, STEP­Trust khawmin training a pek bawk.
   

UN Alliance of Civilization (UNAOC) hnuoia Standing Together to Enable Peace Trust (STEP­Trust) hin Kashmir le Delhi haia khawm thalai mi 30 hai training a lo pek ta a, Manipur ah mi 15 thlalak dan an inchuktir zo pha Delhi le Kashmir a training an pek hai leh mi 45 han September 27­29, 2015 sung International Youth Hostel, Chanakyapuri, Delhi ah Peace Camp nei an tih. Hi huna hin STEP team le photography trainers hai facilitators in thang an tih. State 3 (Delhi, Kashmir le Manipur) ah participants mi 45 hai hin hmun tum tuma an thlalak hai lakhawmin coffee table book­cum­handbook siem an ta, state sunga inchuknain le Organisation tum tum hai kuomah semdar an tih. Participants hai hi training an zo pha STEP­Trust in Certificate an hlan bawk ding a nih.

Rapid Response Team Sangaikot ­ah
CCPur: Churachandpur district sunga Sangaikot area­a tuta hma meta tuilienin a sukbuoina hmuna thil umdan en fel dingin CMO CCPur chun Rapid Response Team/CCPur a tir a. Rapid Response team hin tuilien in a sukbuoina hmun le a se vela cheng hai laia natna hri (vector borne disease) inleng ding laka inveng lawknaa thil um dan enfela fe an nih. Hi team a fe hai chu S. Thangthianmuan, DVB Consultant inrawinain H. Thangkhanlian, Lianbiakthang Songput, DEO le Lianzamuan Tonsing, MHW hai an nih.

CMO in joint meeting a neipui
CCPur: Dr Thangchinkhup Guite, CMO/CCPur chun zani zantieng 2:00PM khan a office chamber­ah Manipur Pollution Control Board, Shija Bio­Medical Waste Managment Team,    District Hospital/CCPur le CCPur district sunga Privae Hospital/Clinic representative hai joint meeting a neipui. Hi huna hin District le Private Hospital/Clinic haia waste materials Syringes le a dang dang hai sukriral (dispose) dan ding chungthu an hriltlang.


Winger le Auto an inbaw; hliem inrik um lo
CCPur: Zani sun dar 12:30 vel khan Imphal pana tlan Diesel Autorickshaw MN03H­0599 le CCPur pana hung tlan Winger MN07D­1880 chu Monglenphai/Boljol khuoah an inbaw fuk leiin Diesel Autorickshaw a chuong passenger 5 an hliem a, hliem hai hi District Hospital panpui an ni a, sienkhawm hliem inrik an umnaw leiin Doctor le nurses han dressing an thaw hnungin admit lovin an insuoktir nawk vawng. Winger le Autorickshaw hai hi zani zantieng 1:30PM khan CCPur Police han va lain Police station­ah an sie.

Ladies Grace Camp
CCPur:  Ladies Prayer Fellowship (LPF) huoihawtnain October 12­15, 2015 inkar sung khin Gilead Prayer Mountain, Kawnpui­ah nunghak kum 30 le a chungtieng hai ta dingin Ladies  Grace Camp um a tih. Application la pelut lo han September, 2015 sung po mani umna Kohran a Nuhmei pawl annawleh LPF hotuhai kuoma peklut thei ning a tih tiin Secretary, LPF chun inhriettirna a siem.

Headline
State sawrkarin ILPS Bill August 31, 2015 a pasi dingin riruong a siem
Imphal:  August 25, 2015 zantieng dar 4 a inthawk zanril chen, darkar 9 sung zet el State sawrkar le JCILPS thuoitu han ILPS Bill thuah inbiekna an nei a, points 7 ah Agreement an ziek. State sawrkar aiawin Manipur Chief Secretary P.C. Lawmkunga in Agreement­a hin suoi a thaw a, JCILPS aiawin JCILPS thuoitu 8 in suoi an thaw. Inbiekna hi Chief Minister’s Secretariat, Imphal Conference Hall­a nei a ni a, State sawrkar tieng CM O.Ibobi Singh in an rawi a, Dy. CM le Home Minister Gaikhangam khawm a thang. Hi inbieknaa hin State sawrkar chun Bill pathum, The Protection of Manipur People’s  Bill, 2015; The Manipur Land Revenue and Land  Reforms (7th Amendment) Bill, 2015 le The Manipur Shop and Establishment (Second Amendment) Bill, 2015 Assembly­a putlut le pasi ding; Manipur State Population Commission indin; Manipur State Land  Reform Commission indin; Population thuah White paper siem le insuo ding; July 22, 1980 le August 5, 1980 haia State sawrkar, AMSU le AMSCOC hai inkara Agreement siema um a taka sukpuitling ding; Manipur mipuihai venghimna ding Acts & Rules siem dingin state sawrkarin sawrkar thlungpui nawr raw seh ti le Bill thara JCILPS in points 5 thangsa raw seh tin tihai in­thangsatir ding  ti hai a thang.
   

CM, O.Ibobi Singh chun zanikhan Imphal­ah Chanchinbumihai an hmupui a, JCILPS le an inbiekna thu le State sawrkar hmalak dan hai a hril. Hi huna hin Cabinet minister­hai an thangkim seng. Bills 3 putlut ding tihai hi Manipur Governor Syed Ahmad khawma a remti ta a, State sawrkar chun Manipur Assembly Session chu August 28 & 29, 2015 haia nei a, Bill 3 hai hi  August 31, 2015 a Assembly a pasi dingin State sawrkarin riruong a siem tiin ei thu dawngna chun a hril.

Petrol ni 6, Diesel ni 20 le LPG ni 3 dai
Imphal: NH­2 (Imphal­-Dimapur Road) a Phesama, Nagaland­a mimkei in August 19, 2015 nia lamlien a keichim a inthawk  fe thleng thei lova um chu tuchen hin a fe thleng thei a la ninaw zing a, Manipur mamaw phurtu motor zatel Nagaland­ah an intang mek. Hieng laizing hin zani hmasaa inthawk khan NH­37 (Imphal­Jiribam Road) a Tuiruong (Barak) leilak siet leiin motor fe thleng thei lovin a hung um nawk ta leiin Manipur mipui hmabak chu Fak le dawn bakah thil dang dangah harsatna a nih. Zanita official stock report dungzui chun sekkhawlsa Petrol ni 6 dai, Diesel ni 20 dai le LPG ni 3 dai a um tiin a hril.
   
Lampui sietna hai siem thatna ding hin ni 7 (light vehicle) le ni 20 (heavy vehicle) a tul ding niin BRTF authority thusuok chun a hril. Indian Oil Corporation (IOC) Imphal Depot,  Chingmeirong chun tuhin Petrol 740KL, Diesel 3920 KL le Khawnvartui 2049KL a nei niin IOC thusuok chun a hril. Sekmai Bottling Plant a LPG sekkhawlsa chu 263.421 MT nia hril a nih.

Bomb puokah pasal 1 a hliem
Imphal: Zani zingkar khan Assam Rifles Outpost, Chingarel, Imphal East District bula bomb a puok leiin Thokchom Kumar Singh (50) a hliem niin Senior Police official thusuok chun a hril.  Bomb hi helpawl han Assam Rifles patrolling a fe hai beina dinga an kam ni dinga ring a nih.

Helpawl han AR 2 an kap hliem
Imphal: August 21, 2015 khan Molanghat bul, Chandel District­ah helpawl han Assam Rifles hai an lo lambun a, Assam Rifles sipai 2 an hliem a, Military Hospital, Leimakhong panpui an nih tiin PRO, IGAR (South) thusuok chun a hril. Hi lai hmuna AR han dappui an thawnaah IEDs 8 an dapdawk bawk.

AR han helpawl 3 le ralthuom an man
Imphal: Aug. 24 & 25, 2015 hai khan 2­Assam Rifles le Thoubal Police Commando thangruol han KYKL Overground worker L. Umakanta @ Ibomcha le PLA Lady cadre Anita Devi @ Linthoibi Devi (31) w/o M. Rockey @ Pammuba of Heirok Part II hai an man a, Thoubal Police station­ah an peklut. Aug. 25, 2015 ma khan Pangei Bazar ah 45­Assam Rifles le Heigang Police thangruol han PLA cadre SS L/Cpl S. Birechandra @ Ibungo (46), s/o (L) S. Nitaov Zoveng, CCPur an man a, Heingang PS ah an peklut. Chun, Aug. 25, 2015 bawk khan Urup Arapti Komla Ingkhol ah 40 Assam Rifles le Imphal East Police Commando thangruol han Lethod Gun 1 le Lethod shells 2 an dapdawk a, Irilbung PS ah an peklut.

Moreh ah dawr la hawng lo
Imphal: August 18, 2015 a Moreh buoi huna Dawr, motor le thil dang dang suksieta um neihai kuomah state sawrkarin zangnadawmna a la pek naw leiin Moreh a dawrhai hawng a la ni nawh tiin N. Inaocha, General Secretary, Meitei Committee, Moreh chun zanita Manipur Press  Club, Imphal­a Chanchinbumihai an hmupui huna a hril.

AR han rangkachak grams 1336 an man
Imphal: August 25, 2015 nia 24­Assam Rifles han Sita Road lamthe, Chandel district, Tengnoupal PS huop sunga Vehicle checkpost a Maruti Van, Imphal pana tlan sukchawla an dapnaah mi pakhata inthawk rangkachak grams 1336, Rs. 39,97,317/­ manhu, Driving LIcence 1, SBI ATM Card 2 le Amway Business Owner Card 1 leh an man a, Custom Department, Moreh kutah an peklut niin AR thusuok chun a hril.

Scholarship hni thei hun suksei
New Delhi: Minority student­hai ta dinga Pre­Matric Scholarship Offline Application hmanga hni thei hun chu October 15, 2015 chena dinga suksei a nih tiin Ministry of Minority Affairs thusuok chun a hril. Scholarship hni theina hun hi  Fresh applicant­hai ta ding a ni a, States le Union Territories hai a huomsa vawng a nih tiin Union Minister for Minority Affairs  Dr Najma Heptulla chun a hril.

Rahul Gandhi in LoC a va sir
Srinagar: Zanikhan AICC Vice President Rahul Gandhi in J&K a Poonch District a Balakote sector a Line of Control (LoC) a va sir a, Pakistan sipai han an hung kapna hmuna cheng hai inhmupuiin a va thlamuong tawl. Hi lai biela chenghai ta dinga Special Insurance Policy siem a tul thu Chanchinbumihai an hmupui huna a hril. Rahul Gandhi hi J&K ah ni 3 sung cham a ta, Kashmir le Ladakh hai khawm sir a tih.  Pakistan sipai han August 15, 2015 khan J&K an hung kap leiin civil mi 6 an thi a, midang 20 an hliem a nih.

PM in buoina siem lo dingin a ngen
New Delhi: Gujarat state a chun Patel Community han sawrkar sin laknaah an hnam ta dinga seat huol pek dinga ngennain nuorna an nei a, buoina nasa tak a suok leiin Union Home Ministry chun Gujarat ah State Reserve Police Force, Rapid Action Force hai Ahmedabad, Surat le Mehsana haiah a tirut belsa. Chun, Union Home Minister Rajnath Singh chun CM Nanandiben Patel phone in an biekpui a, Law & Order tha taka thunun dingin a hril. Patidar Anamat Anelalon Samiti (PAAS) Convener, Hardik Patel, bungheia nuorna nei chu Police han an man a, Patel  hnam han insuo dingin an ngen a, insuo a ninaw leia buoina hi an siem a nih. PM Narendra Modi chun, buoina le tharum insuona han buoina hi chingfel naw nih tiin zanikhan Gujarat mipuihai hrilin buoina siem lo dingin a ngen.

Sakhuo hran hran umzat
New Delhi: Kum 2011 intiempui dungzuiin India rama mihriem umzat chu 121.09 crore a nih. Sakhuo hran hran umzat nia Registrar General and Census Commissioner in a record danin Hindu 96.63 crore (79.8%), Muslim 17.22 crore (14.2%), Christian 2.78 crore (2.3%); Sikh 2.08 crore (1.7%); Buddhist 0.84 crore (1.7%); Jain 0.45 crore (0.4%); Other Religion & Persuasions (ORP) 0.79 crore (0.7%); Religion not stated 0.29 crore (0.2%) a nih. Kum 2001­2011 inkar sunga mihriem pung dan 17.7% le sakhuo hran hran pung dan chu Hindu 6.8%; Muslim 24.6%; Christian 15.5%; Sikh 8.4%; Buddhist 6.1% le Jain 5.4% niin a hril. Kum 2001 a intiempuia India rama mihriem umzat chu 102 crore a nih.

Lalthanhawla chunga action la dingin
Aizawl: Australia rama Mizo um hai laia Laltanpuia Pachuau an ti chun Mizoram CM Lalthanhawla chunga khawm action la dingin Mizoram Governor Lt. General (Retd) Nirbhay  Sharma kuomah email hmangin August 25, 2015 khan ngenna a siem. August 19, 2015 nia Lalthanhawla in Press Conference a buotsai huna MNF Youth President K. Vanlalvena chu Mizoram Assembly election nuhnung tak khan a ngenna angin election campaignnaa a hmang dingin Rs. 2,00,000 a pek niin a hril a. Hi thil hin Section 77 of the Representation of the People Act, 1951 a kal a, hi lei hin Lalthanhawla chungah action lak ve ding a nih tiin Laltanpuia Pachuau in Governor kuoma email a hung thawnah zieklang a nih. Laltanpuia Pachuau in Facebook hmanga a bei leia Lalthanhawla sangpa Lalthanzara khawm Health Minister a ninaa inthawka inban pha nia hril a nih.

J&K ah Army JCO le helpawl 1 kap hlum
Srinagar: Zani hmasa chawhnung dar 1 vel khan Pakistan sipai han Jammu & Kashmir state a Kupwara district sunga Nowgam Sector, LOC a Lackmani post an va kap a, bunker a inthawka hung suok Junior Commission Officer (JCO) Krishna Singh chu an kap hlum. JCO Krishna Singh hi 3 Kamao Regiment a mi a nih. June 2, 2015 le July 9, 2015 hai khawm khan hi lai hmuna hin BSF constable 2 kap hlum an lo ni tah. Chun, zani khawm khan Kashmir district, Uri sector a LoC ah helpawl le security forces hai an inkaptuo a, helpawl pakhat kap hlum a ni a, a kuta inthawk AK Rifle 1, ralthuom dang dang le silaimu hmu a nih tiin Colonel N.N. Joshi chun a hril.

Anthurium Festival Lengpuiah
Aizawl: Tourism Department, Govt. of Mizoram chun October 1­3, 2015 inkar sung khin Lengpui Mini Sports complex ah Anthurium Festival buotsai a tum. Kum danga Anthurium Festival hmangna Reiek chu a hmun an ep deu leiin mipui a dawlzo naw deu a hriet a ni leia Lengpui Mini Sports Complex hmuna hmang dinga  ti a nih tiin Mizoram Tourism Minister John Rotluangliana chun a hril.

September thla tawpah report a pek ding
New Delhi: Sawrkarin an din Seventh Pay Commission chun September thla tawp tieng khin hlaw sukpung ding thua an report chu sawrkar thlungpui kutah an peklut ta ding niin an hril.  Seventh Pay Commission hi February, 2014 a kha UPA sawrkarin an din a nih. Sawrkar thlungpui chun kum 10 dan peiah thawktuhai hlaw a sukpung hlak a nih. Sawrkar thlungpui hnuoia thawktu nuoi 48 le Pensioners nuoi 55 lai zet an um mek niin Justice A.K. Mathur, Chairman, 7th Pay  Commission chun a hril.

President zirtirtuin a thang ding
New Delhi: September 5, 2015 a Teacher’s Day hmangna ding le inzawmin President Pranab Mukherjee chun September 4, 2015 khin Dr Rajendra Prasad Sarvodaya Vidyalaya,  President Estate­a Class XI & XII stduent hai joint class ah zirtirtua thangin inchuktir a tih. Hi zo hin zirtirtu 100 vel hai hmaa thu hril bawk a tih. Hi thil hi Delhi CM Arvind Kejriwal le Delhi Dy.  CM Manish Sisodia hai ngaituo dawk le remruotna a nih.

Odisha ah BSF 3 kap hlum
Bhubaneswar: Zani zingkar khan Maoist helpawl han Odisha state a Malkangiri district­a Balimela Reservior hmuna BSF hai an lo lambun leiin BSF personnel 3 an kap hlum a, BSF personnel 6 an hliem niin Police thusuok chun a hril. BSF hai khawmin a lo lambuntuhai hi an kap let ve a, Security forces tam lem inlambunna hmuna hin tirlut an ni bakah dappui nasa takin an thaw.

Naupang kum 4 mi awmah thil inbawk kg. 4
Kolkata: August 20, 2015 khan SSKM Hospital­ah Arabinda Mahaldar (4) chu operation thaw a ni a, Doctors han a awma thil inbawk kg. 4 zet an at thlak pek. July, 2015 a inthawk khan Arabinda Mahaldar hin inthuok harsa tiin a khawsik a hung insang a, Doctor panpui a ni a, chu taka operation thaw dinga an ti dungzuia operation hi thaw a nih. Naupang hi hospital ah enkawl a la ni a, bu a fak thain a hriselna khawm a tha pei. Operation thaw a ni huna hin kg. 12 chaua rik niin Doctors han an hril.

Assam tuilien thangpuina dingin Rs. 207 crore
Dhaligaon: Zani hmasa khan Union Minister of state for Development of North Eastern Region (DoNER), Dr Jitendra Singh chun Assam state a tuilien thangpuina dingin sawrkar thlungpuiin Rs. 207 crore a peksuok nawk ta niin a hril. Hi thil hi second instalment a nih tiin a hril. Tuilienin thil a suksiet dan enfel le a tuortu mi iengzat chie am anni a ti enfel a ni hnungah thangpuina sum chu pek belsa la ning an tih tiin Dr Jitendra Singh chun reporter­hai an hmupui huna a hril.

BBMP election­ah BJP in seat 10 an lak
Bengaluru: Karnataka state a Bruhat Bengaluru Mahanagana Palika (BBMP) Council election seats 198 umnaa inthlangna result puong a ni ta a, BJP in seats 100 lain an hrat filawr  zak. Congress in seats 76 le JD(S) in seats 14 an lak a, party dang candidate­hai a tlingzo an u m nawh. Election hi August 22, 2015 a nei a nih.

TADA Court in a la sie tha
Mumbai: Kum 1993 a Mumbai khawpuia a zawna bomb puoknaa inrawl vea intum, tuta lungina intang mek Abu Salem Mumbra a nunghak kum 25 mi Kausar Sayed in inneipui dinga   Special Permission a ngenna chu Terrorist and Disruptive Actyivities (Prevention) Act (TADA) Court chun phal pek a ni ding le ding naw thu puonglang lovin August 31, 2015 chena dingin a la sie tha.
-----------------------------------------------------------------------------------------------------------
VAWISUN THUPUI
“Chuleiin, aw Israel, i chungah hieng ang hin ka thaw ding a nih; i chungah hi hi ka thaw ding a ni leiin, aw Israel, i Pathien chu tuok dingin insiem zo rawh”   Amos 4:12

Editorial
Intodel hi
Ram changkang, hnam changkang le sungkuo changkang nina ding chun mani phutawk ang peia intodel ni a tul. Hi lei hin rambung tin, hnam tin le sungkuo tin hai chun intodel ngei tumin hma an lak sup sup hlak.  Ram changkang le hnam changkang ei tihai hi ram intodel le hnam intodel anni hlak. Mihai thangpuina beiseia lan vir lan vir hlak hai chu ram changkang le hnam changkang anni ngai nawh. Ei ram, India khawmin changkang le hmasawn a nuom leiin a ram mipuihai chu taimak insuo dingin a min fui bakah development scheme le projects hai an duong a, chuongang scheme le project induonga um hai sukpuitlingtu state annawleh Union Territory hai chu an changkang a, bu le bal an fak seng lo an tharsuok a, state dang haiah an zawrsuok hlak.
   
Sungkuo khawm an todel naw chun a tlabal a, mihai thangpuina a ngen a tul hlak. Mihai thangpuina va ngen hi thil rinum a nih. Amiruokchu, ei intodel naw a, fak ding ei nei si naw chun a ngheia um thei ei ni si naw leiin rinum le inzak sa sain a neihai thangpuina ei va hni hlak. Hieng a ni lei hin puipung nikhuo haia khawm chang a par thei naw a, inzum dakin ei um hlak.  Sungkuo intodel khawm ni si lova puipung nikhuo a inla phek rak hai chu mi nuisaw le fiemthu thawna an ni hlak. Chuleiin, mihriem nuna hin intodel ni hi a pawimaw hle a nih.
   
Chuongang peiin ram khawm an todel naw chun a thenum ram haia inthawk pur a phur a tul hlak. Hi thil hin a ram mi le sahai inzaumna a sukboin mihai hmusit hlawna a nih. Hi lei hin rambung tin el hai chun intodel ngei tumin thang an lak sup sup hlak. Hi thil hi hriein ei ram le ei hnam thuoituhai chun vawi duoilo taima a, intodel dingin an mi hril rawp hlak. Nu le pa hai khawmin an theida lei ni lovin an nauhai, an tu le tehai  chu intodel dinga taimak insuo dingin an hril nawn rawp hlak. Hi lei hin intodel dinga thang lak zuol sau sau chu ei thaw ding makmaw a nih.
   
A bik takin fak le dawna intodel hi a pawimaw zuol bik. Fak ding nei lova bungheia um el chu khawvela thil inzakum takel a nih. Hi lei hin tiena ei pi le pu hai khan nitina Nisa suok zuiin an lo sengah an fe a, kum khat fakkhawp tharsuok ngei tumin taima takin sin an lo thawa a, damnaw le naupang ti lo chu sun hunah khawsunga um awl mei mei hmu ding an um ngai nawh. Damnaw ni si lo, thabona leia in a um awlhai chu mihai hmu teplo an nih. Nunghak le tlangval anni lek lem chun tukhawma makpa le mo dingin an dit ngai naw a, mi chuongleng anni hlak. Ka sawl ie, ka kham ie ti lova a sur a sa hnuoia taima taka lo sin thawhai chun kum khat fak an tharsuok nge nge hlak. In a um dinga an ngai hai chu damnawhai, piengsuolhai le sin la thaw thei lo naupang hai chau anni hlak.
   
Tulai ruok hin chu thaw ding mumal nei lova nunghak­tlangval khawlai leng mei mei ei tam ta hle. Inzakna chang khawm ei hriet ta nawh. Khauphar thawveng an hril ang ela thaw ding nei si lova khawlaia invak invak hai hi mi tha an um meu nawh. A tlangpuiin Zu annawleh drug addict an nih. Hiengang mihai hi nu le pa ta dinga hling an nih. Hiengang umna sungkuo hai hi hnuoi hremhmuna cheng ei nih ti inla ei hril suol ring a um nawh. Indodel le kar chu hnuoi le van kar anga hla a nih. Hiengang sungkuo a thangve lo hai chu hi hnuoi khawvela dingin mi inhnarum tawpkhawk an nih.
   
Indodel hril ta si si chun, pa inrep khip khap, nu fel hai insung hi entawntlak an nih. Hi thil hi hausak le pasiet thu lei a ni nawh. Sungkuo ni ta si chun, insunga thil tulhai an neikim dap hlak. Thil hlu le thil manto hai ti lo chu an insungah an nei kim vawng hlak. Pansak panthlanghai thil an haw mei mei ngai nawh. Entirna dingin thil mantlawm em em el Thim chenin indawt thlapin, a chin le a lien an nei kim vawng hlak. Mamaw hun chau a insung mamaw hi hrietfuk ding a ninaw a, intodel hi a tha ti hriet a, ngaipawimaw ding an nih. Mi thil haw hmang hai hi mi han an lawm ngai nawh. Sungkuo siem ta chun intodel khip khapa um ding a nih.


Don't Miss
© all rights reserved
made with by Simon L Infimate