Tuolsung:
INC Candidate Tongkhokai Baite in tling le tlingnaw khawma kap dingin an vau niin a hril
CCPUR: Zani zantieng 5:00PM khan 21Sangaikot DCC a INC candidate Tongkhokai Baite chun Sauliim Restaurant ah tuolsung chanchinbumi hai an hmupui. Hi huna hin Mr Baite chun, zani hmasa 9:00PM vel khan a chengna khuo T. Lailoiphaiah Independent Candidate volunteer Gypsy 1 a chuong mi 5 vel han INC a Chairman, Central Election Committee an vuok hrawn a, a nakru le a hnungzangru hai a tliek leiin hospitala enkawl a nih tiin a hril.
A hril peinaa chun zalen taka a biel a sir theinaw thu, banner le flag hai khawm Independent candidate han an suksiet pei thu, hi thua hin Election Commission, Manipur; DGP; Dy. CM le Home minister Gaikhangam hai kuoma report a pek ta thu le a biel sunga zalen taka an vakvel theina dinga venghimna pe dinga hma lapui dinga a ngen thu a hril. MDC election zoah MDC a tling khawma kap ding le a tlingnaw khawma kap dingin candidate volunteer han an vau niin a hril bawk.
Hnam kala thilthaw a ninaw thu, Politics khel a ni thu hrilin hnam ta dinga thaw suol le hril suol a lo nei a ni khawmin ngaidam kan hni tiin a hril. Security ngen sienkhawm tuchena hin VDF personnel 5 chau pek a ni thu, security thuoia vote ka lo zawng a ni khawmin Volunteer han silaia kap dingin an mi vau bakah inpe(surrender) dinga vauna khawm an pek niin a hril bawk.
Hills Today Daily news hawng a nih
CCPUR: Zani 8:00AM khan Sumkong Kaimun, Tuibuong Bazar, CCPurah Pu L. Mangkhogin Haokip, IPS, SP/CCPUr chun khuolliena thangin CCPur thangsana suok ding Hills Today daily news paper a hawng a, Pastor Seiboi Doungel in tawngtainain an hlan. Hi huna hin Guest of honour in Letzamang Haokip, APO/DRDA le functional president in Thangkhohem, SO/Tuibuong BDO a thang.
Pu Mangkhogin chun, Journalist ethics tha taka zui dingin Hills Today thawktu hai infuiin society hmasawnna ding le thatna ding tiengpang editoriala ziek hlak dingin an fui bawk. Mr Letjamang chun, newspaper hi society hmasawnna intanna a ni thu a hril a, Thangkhohem chun, Hills Today hawnga um chu society ta dinga chempui tathriem ang a ni thu a hril.
Congress in May 29 ah public meeting
CCPUR: May 29, 2015, 11:00AM khin District Congress Committee huoihawtnain MDC election hung um ding le inzawma CCPur Districta INC candidate mi 7 hai ta dinga Public Meeting/campaign um a tih. Hi huna hin Manipur CM O.Ibobi Singh le Dy. CM Gaikhangam hai thangin Cabinet minister le MLA hai khawm hung thang an ta, CM le midang dang han INC candidate hai ta dingin vote campaign an tih.
Ganja Rs. 5 lakh manhu raw hmang a nih
CCPUR: Kum 1989 a inthawka CCPur District Police le Army han hmun tum tuma an man Ganja Rs. 5 lakh manhu vel ding hai chu L. Mangkhogin Haokip, IPS, SP, CCPUr le Inspector N. Thangzamuan, OC/CCPur PS hai inrawinain zani zingkar 9:30AM khan Sielmat khawbul lai an raw hmang. Ganja raw hmanga um hai hi 407 Trucka phur khawp zeta tam a nih.
DC rawiin Security Coord. Meeting nei
CCPUR: June 1, 2015 nia MDC election hung um ding le inzawmin zani sun dar 12 khan BRGF Resource Centre, DC Officeah Mr Lunminthang Haokip, IAS, DC, CCPur inrawinain Security Coordination Committee meeting nei a nih. Hi huna hin SP/CCpur; Brig. 27Sector,A/R; CO 1st IRB; CO 25 Madras Regt.; CO7A/R; CO 34 A/R; CO 26 A/R; CO,2 JKLI; CO 54 Bn BSF, CCpur, Loktak; CO 32 CRPF Loktak Project le sectoral magistrate hai an thang.
AR han KYKL cadre 1 an man
CCPUR: May 25, 2015, 12:30PM khan 7Assam Rifles han Thingkangphai areaah KYKL cadre Pukhrambam Dinesh @ Inao (30) s/o P. Depen Singh of Thingkangphai an man a, Police kutah an pekluta Police chun FIR No. 48 (5) 2015 CCPPS U/S 20 UA(P) Act an registered. Zanikhan CJM/CCPur hmaah an inlangtir a, CJM chun June 2, 2015 chen Police Custodya la um phawt dingin a chungthu a rel.
Election ding thua briefing
CCPUR: Mr T.K. Simte, AC to DC/CCPur inrawinain zanikhan DC Officea BRGF Resource Centreah Sectoral Magistrate han June 1, 2015 nia MDC election um ding le inzawmin briefing nei a nih. Election huna buoina um lova hmalak dan ding le Security hai le inbiekpaw dan ding hai hi huna hin inhrilhrietna nei a nih.
Chun, H. Balram Singh, MPS, Addl. SP CCPur in zani zingkar khan SP Office campusah District Police le VDF hai kuomah MDC election huna security thaw dan ding hrilhrietna a nei. Election duty thaw dan ding, security hai mawphurna le an sinthaw dan ding hai a hril.
Election campaign le Press Conference
CCPUR: Vawisun 12noon hin Lok Janshakti Party Manipur State chun 18Zenhang Lamka ADCC a LJP candidate Mr Ginkhozam ta dinga Election Campaign/Public meeting huoihawt an ta, hi zo hin Press Conference in zui nghal a tih. Hi huna thang dingin 18Zenhang Lamka ADC biel mipui le inhnikna neihai thang dingin Zohmingliana, General Secretary, Lok Janshakti Party chun fielna a siem.
CMO rawiin review meeting nei
CCPUR: Zani 11:30AM khan Dr Thangchinkhup Guite, CMO CCPur office chamberah District Health Society/CCPur inrawinain Private Accredited Hospital/Clinic/Nursing Home haia Managing Director han National Health Programmes hnuoia sinthawna hai ennawnna (review meeting) an nei. Hi huna hin Seiboi Mate, Dist. Programme Manager, NHM in agenda tum tum a putlut a, Central Govt. in Health Program a siem hai hrillangna a nei a, hi dungzui hin Private Accredited han an zui a pawimawna hai hrillangin hmalak pei dan ding hai an hriltlang bawk.
Ladies Grace Camp, 2015
CCPUR: Ladies Prayer Fellowship, CCPur chun October 1215, 2015 inkar sung khin Gilead Prayer Mountain, Konpui hmuna ‘Ladies Grace Camp 2015” (nunghak camp) buotsai an tum. Hi Camp buotsai tumna san chu, Kohran tum tuma Thalai camp nei huna thalai hai laia va thang remchang chie lo, nupui campa khawm thang remchang lo deu nunghak hai ta ding bika buotsai tum a ni a, camp a thang thei ding hai chu nunghak kum 30 le a chungtieng ning a ta, kohran bik umlo ding a nih. Registration fee Rs. 100 ning a ta, form submit huna peklut ding ning a tih. Application form chu Kohran tina Nuhmei Pawl hai kuoma hmu thei ning a ta LPF Secretary, Nk. Liankhoman, Dorcas CoOrdinator EBC) kuoma khawm hmu thei ni bawk a tih. Camp sunga thu hriltu ding chu Rev. Dr Kh. Khaizakham le Nu Chingngaihlun hai ning an tih tiin LPF chun inhriettirna a siem.
Headline
Manipur Assembly Speaker in TMC MLA 3 a disqualified
IMPHAL: Zanikhan Manipur Legislative Assembly Speaker Th. Lokeshwar Singh in Manipura Trinamool Congress MLAs 3 a disqualified. Trinamool Congress MLA 3 hai hi India Constitution 10th Scheduled hnuoia disqualified an nih tiin Speaker chun zanikhan Manipur Legislative Assemblya a office hmuna a puonglang. Trinamool Congress MLA 3 disqualifieda um hai chu Khumukcham Joykishan of Thangmeiband Assembly Constituency, O. Lukhoi of Wangoi Assembly Constituency le Th. Bishwajit of Thongju Assembly Constituency hai an nih.
Kh. Joykishan disqualify dinga case filetuhai chu Oinam Kabi, MLA; W. Nganglentombi Meetei, MLA le Th. Shyamkumar, MLA hai an nih. O.Lukhoi le Th. Bishwajit hai MLA an ninaa inthawka disqualify dinga case filetu chu Th. Shyamkumar a nih. An case hai hi October, 2014 a hearing neia um, a result puonglang lova sie, zanita puonglang a nih. March 26, 2015 khan Trinamool Congress, Manipur chun hieng MLAs 3 hai suspendedna Order lakkir le an chunga disqualification case file a um khawm hnukkir a nih tiin Order an suo a, sienkhawm a tangkai tanaw a nih.
Manipur Legislative Assembly Speaker Th. Lokeshwar Singh chun disqualified a um mi 3 hai tlingna biel Thangmeiband A/C, Wangoi A/C le Thongju A/C hai chu seat ruok an nih tiin zanikhan a puonglang sa nghal. India danpui (Consititution) dungzui chun seat ruoka puong hieng Assembly Constituencies 3 haia hin tuta inthawka thla 6 sungin inthlangthatna (byelection) a hung um ding a nih.
Kh. Joykishan chun, MLA a ninaa inthawka disqualified a nina thu hi Court ah khinglet lova byelection hung um huna a tlingna biel ma Thangmeiband A/C a ngir nawk lem dinga thutlukna a siem ta thu zanikhang a puong. Amiruokchu, ieng party ticket in am a ngir ding ti a la hril thei naw a, byelection hun ding a hungtlung pha leh a hril thei chau ding nin Kh. Joykishan chun a hril.
Central Parliamentary Standing Committee team
IMPHAL: Central Parliamentary Standing Committee on Home Affairs team, P. Bhattacharya inrawina hnuoia members 6 hai chu Imphala ni 3 sung cham dingin zanikhan Imphal an hungtlung. Tulihal Airport, Imphal an hungtlung hnungin Tulihal Airport ngirhmun an en nghal a. Tulihal Airport, Imphal hi International Airporta pung a ni ta a, chu leia iengang ngirhmuna um a nia ti an enfel nghal a nih. HI zo hin Old Secretariat, Imphalah Central team hin Manipur Chief Secretary Pu P.C. Lawmkunga le high officials hai meeting an neipui a, Dr Suresh Babu, Principal Secretary (Planning) chun sawrkar hmalakna tlangpui report a pek.
Congress candidate silai, motor le phone lakpek
IMPHAL: Ukhrul ADC hnuoia Chingai A/C sunga Helang ADC Constituency a Congress candidate, Ngasonmi Chanroy chu a licence silai, a mobile phone le a motor hai bakah a workers 5 hai Mobile phones chu NSCN(IM) ni dinga ringhla han an lakpek nia hril a nih. Hi thu hi Chingai Police stationah report a nih.
ADC Election duty a inthangtir lo
IMPHAL: June 1, 2015 a ADC election hung um dinga hin Heirok, Thoubal District a um VDFhai chu election dutya inthangtir lo dingin thuneituhai an ngen. Heirok mihai chun VDF an ti nuom naw a, SPIO tiin an ko a, Heirok vengtu an nih tiin election dutya inthangtir lo dingin zanita intahwk khan mi 100 vel entry points haiah an duty a, motor po po khawm an check vawng.
Sadar Hills Bandh thaw an tum
IMPHAL: Kuki Innpi, Sadar Hills le KISG, SWU, KWOHR, KSO, TSA le local bodies hai chun thangruolin May 30, 2015 zanrila inthawk darkar 48 sung Sadar Hills Bandh an thaw ding niin Seikhomang Khongsai, President, Kuki Innpi, Sadar Hills chun a hril. State sawrkarin an thil ngen ch tum tum a sukpuitling pek nawzing leia lungawi lova bandh hi thaw an tum niin an hril.
NH37 ah Economic Blockade
IMPHAL: Moidangpok Keithelmanbi Land Protection pawl chun zanita inthawk khan NH37 ah hun tiemchin um lo Economic blockade an thaw tan. Hi blockade hi Moidangpok Apunba Lup chun an thlawp thu an puong. Hi lai ram buoina um chingfel vat dinga state sawrkar an nawrnaa economic blockade hi an thaw niin Moidangpok Keithelmanbi Land Protection chun an hril.
Others:
Tripura sawrkarin AFSPA a hlip
AGARTALA: Zanikhan Tripura sawrkar chun an state a inthawk Armed Forces (Special Powers) Act (AFSPA) a hlip. Tripura state a inthawk AFSPA hlip a ni thu hi zanikhan an CM Manik Sarkar in a puong. AFSPA hlip ding thu hi zanita Cabinet meeting an neinaa an rel a nih. Kum 1977 a inthawka kha Tripuraa hin AFSPA hi hmang tana lo um ta a nih.
Jharkhandah lum leiin mi 11 an thi tah
RANCHI: Jharkhand statea khawm ni 5 liemta sung khan boruok lum tuorzo lovin mi 11 zet an thi ta niin ei thu dawngna chun a hril Jharkhand statea Daltonganj a zanita boruok lum dan chu 46.6 degree Celsius a nih. Hmun dang haia chun 42 le 45 degree Celsius an ni a, Ranchi a chun 40 degree Celsius a nih tiin P.K. Mandal, Director, Meteorological Department, Ranchi chun a hril.
J&Kah helpawl han mi 1 an kap hlum
SOPORE: Zanikhan Jammu and Kashmira Sopore town hmuna helpawl han pasal pakhat an kap hlum. Hi thil tlungna hmun hi BSNL mobile tower inthutna hmun a ni a, tulai hnaia silaichawi pawl han telecom business an bei vawihnina a nih. May 25, 2015 khan BSNL hnuoia sinthawtu pakhat an lo kap hlum ta bawk.
Turaa IED puokah mi 6 an hliem
TURA: Zanikhan Meghalaya state a Tura Super market complexah IED a puok a, nuhmei 3 thangsain mi 6 an hliem pha. IED hi sun dar 11 vela puok a ni a, hliem 6 hai laia pahni an hliem inrik deu leiin Tura District Hospital panpui an nih tiin G.H.P. Raju, Inspector General of Police chun a hril. Tu pawl khawma IED hi an sukpuok a ni thu an la puonglang nawh.
HM zankhat CRPF campah
NEW DELHI: Naxalites/Maoists helpawlhai hratna biel ngei, Sukma district, Chhattisgarh ah Union Home Minister Rajnath Singh chu May 31, 2015 khin inzin a ta, CRPF campah zankhat riek a ta, CRPF jawan le local forces hai leh tititlangna an nei ding niin ei thu dawngna chun a hril. Tuta thla bul khan PM Narendra Modi khawm Dantewada bielah a lo inzin ta a nih.
Tihuah NE Mega Food Park
GUWAHATI: Assam state a Nalbari district sunga Tihu hmua North East Mega Food Park indin tum a nih. May 28, 2015 hin North East Mega Food Park hi Union Minister for Food Processing Industries, Harsimrat Kaur Badal in hawng a tih. Tihu hmuna NE Mega Food Park hin processing units 3035 a nei thei le Rs. 250 crore senga investment thaw a, kum khatah Rs. 450500 crore a hmusuok zo le sin neilo mi 30,000 vel sin a pek thei pha beisei a nih.
Ka office ka hmang suol nawh:Dr Singh
NEW DELHI: India Prime Minister hlui Dr Manmohan Singh chun ‘PM ka ni lai khan ka mimal, ka sungkuo le ka ruoltha hai sukhausakna dingin PM ka nina annawleh ka office ka hmang suol nawh’ tiin zanita New Delhia National Students Union of India (NSUI) Convention a hmangpuina huna a hril. UPA sawrkar thilthaw that hai ropui le hlu a ti bakah Congress party chu mi naran hai dawmkangna dinga sinthawtu a ni thu a hril a, BJP intumna le hrilsietna hai chu thudiklo a nih tiin a hril bawk.
Thla 5 sungin NDFB cadres 10 that, 343 man
GUWAHATI: Thla 5 liemta sung khan Assam State a Security Operation thawnaah NDFB(S) cadres 10 that le 343 man anni bakah ralthuom 100 chuong le thilpuokthei kg. 62.5 man a nih tiin Khagen Sarma, Director General of Police, Assam chun a hril. Mana u m NDFB(S) cadres 343 hai laia 204 hai chu active cadres an ni a, 139 hai chu overground workers le a thlawptu an nih tiin Sarma chun a hril.
Nehru thi champha vawi 51na
NEW DELHI: Zani kha India PM hmasa tak Pandit Jawaharlal Nehru thi champha a vawi 51na a ni a, President Pranab Mukherjee, Vice President Hamid Ansari, PM Narendra Modi, AICC President Sonia Gandhi, PM hlui Dr Manmohan Singh le Party thuoituhai chu a thlan hmun Samadhi, Shanti Vanah fein sunna an va nei. Sunna le inzanain a thlan chungah par an inhlan tawl.
Indian Forest Service Examination
NEW DELHI: Union Public Service Commission chun Indian Forest Service (IFS) post 110 lakna dingin August 28, 2015 a inthawk khin Indian Forest Service Examination, 2015 (Preliminary) huoihawt tan a tih. Hi exama thang nuomhai chun application form le thu chieng lem UPSC website: www.upsc.gov.in/exams/notifications/2015/IFS_2015/IFS_2015eng. pdf ah hmu thei ning a tih. Application form hi online in 19062015 chenin peklut thei ning a tih.
Khawlum tuorzo lova thi mi 1127
HYDERABAD: Andhra Pradesh le Telangana state a khawlum chun zieum tieng a pan thei naw a, zani hmasa khawm khan Telanganaah mi 76 le Andhra Pradesh ah mi 332 an thi belsa nawk a, tuchena hieng state pahni haia khawlum taluo tuorzo lova mihriem thina tuok chu 1127 an tling ta niin ei thu dawngna chun a hril. Telanganaah mi 243 le Andhra Pradesh ah mi 884 an thi ta nia hril a nih. Met official thusuok chun ni 2/3 sung chu boruok a la lum zuol pei ding a nih tiin an hril. Sawrkar chun town le khawpui haiah zing dar 10 a inthawk zantieng dar 4 chen Home Guards duty in a sie.
Nepal Army kutah Mobile Hospital 2 le motor 24
KATHMANDU: Nepal rama simkhawlei rapthlak tak inhning le inzawmin China chun thangpuina le Gift in Nepal kuomah Mobile Field Hospitals 2 le motors 24 a pek. Hieng thil hai hi zani hmasa khan China Ambassador to Nepal Wu Chutai chun Nepal Army Chief General Gaurav Shumsher Rana kuoma inhlanna a nei niin Nepal Army Headquarters Press release chun a hril. Motor peka um hai lai hin Truck 8 a thangsa.
June 16 ah Obama le Park Geunhye
WASHINGTON: Hungtlung ding June 16, 2015 khin Washington ah US President Barack Obama le South Korea President Park Geunhye hai chun inbiekna nei an ta, South Korea Security ngirhmun, khawvel pumpui huopa economic, environment, health le cyber security chungthu hai hriltlang an tih tiin ei thu dawngna chun a hril.
Pakistanah mi 7 khai hlum
ISLAMABAD: Pakistan Court in thi dinga thiemnaw an changtir tahai laia mi 7 hai chu zanikhan Pakistan a lungin hran hran haiah khai hlum an nih. Lahore Central Jailah mi 2, Gujarat district jailah mi 2, Vehari district jailah mi 1, an rengin mi 7 khai hlum an nih. Khai hluma um hai hi tuolthattu le nuhmei suolluitu anni tlangpui.
VAWISUN THUPUI
Hlemin um naw ro; Pathien chu hmusit zie a ni nawh; miin a ithe ang ang, chu bawk chu a sîk ding a ni sih a. Galati 6:7
Editorial:
Mipui sawrkar
Democracy ram ei ni a, mipuiin ei aiaw ding ei thlang a, chuongang mihai chun mipui aiawin ro an rel a, chu chu mipui sawrkar ti a nih. Tukhawm hin mipui sawrkar siem dingin ADC election hung um dinga hin ei vote ei thlak ding a nih. Vote tla hai tiemzo a ni pha leh mipui aiawa roreltu dinghai hriet theiin a hung um ding a nih. Ieng party amani, annawleh party hran hran thangruol hai in amani rorelna chang hai sienkhawm, party sawrkar ni lovin, mipui sawrkar a ni tho tho ding a nih tiah hin ei chieng thar a tul hle.
Sawrkarna siemtu partyhai hin party mi le sa ditsak bik an ching hle a, hi thil hi mipui tiengpang khawmin a ni dan dingah ei ngai liem el ta niin an lang. Hienganga party mi le sa hai inditsak bikna hi ieng party khawm hung sawrkar hai sienla, a um naw thei naw a, a awm tawk chu mipui tiengpang khawmin ei hrietthiem ta hle niin an lang.
Hieng laizing hin a taluoa party mi le sa hai inditsak bikna tlung hlak hin mipui inpumkhatna le thangruolna a suksiet a, hi thil hin khawtlanga thawtlangna chenin a sukchau pha hlak. Ieng level a khawm party feeling a hung lut vat a, sin thaw ding thlang kawngah khawm, a thiem, a tlin le a tlak, thaw tha thei ding tieng nekin, party mi le sa inditsaknaa ei hmang hlak leiin, thaw tha thei lo, a thiem naw le a tling lo han an thaw a, a tuortu chu tu dang ni loin ei ni mipuihai tho ei nih.
Veng sunga hmasawnna sin thawna chungchangah khawm, party mi le sa inditsak bikna a lien hlak a, sin a tha naw khawmin mipui tieng sawiselna chun ngaisak a hlaw ngai naw a, mipui nekin mimal pakhatin ngaipawimaw a hlaw rawp hlak. Hiengang thil infawnkhawm hin ei ram hi a tuom a, chuleiin tuchen hin hmasawn hrat thei lo chau ni lovin hmasawn hlei thei lovin ei um a nih ti inla ei hril suol taluo ring a um nawh.
Sawrkar thar hung pieng nawk huna khawm, party mi le sa hai chun inthlang laia tum le beisei nei rana an thaw sawl man intel ngei tumin thuoitu thar hai an baw nawk rui rui ding a nih. Hiengang hri ei invawi laklaw ta leiin sawrkar thar a hung pieng hnung hi chu party sawrkar hun “period” angin a liem el hlak. Hi thil hi ei fesan le bansan a hun ta hle.
Thaw dan le fe dan lampui tha lo le indiklo hai hi mipui han thlir liem el lovin, sawrkar siem theitu ei ni ang bawkin, sawrkar um sa khawm peithla theitu ei nih ti hriein, hiengang thil tha lo, thil indiklo, thaw dan tha lo, thil indiklo, thaw dan tha lo ang chi hai hi ei do ngam a tul a nih. Mipui sawrkar um nawna ram inrelbawl dan thawpik thlak tak ei hril hlak changin democracy rama um ei ni leia vangnei ei intizie hahipa ei hril lai hin, a tak chun ei vangneina chu ei chang chie am ti hi sut hlak ei tiu. Sawrkar thar hung um ding hi mipui sawrkar ani dim ti hi mipui han ngaituong ei tiu.
