Tuolsung:
Certificate lakna ding thua  meeting nei
CCPur:  Zani sun dar 11:00AM khan  Mr T.K. Simte, MCS, AC to DC/CCPur inrawinain DC Office­a BRGF Resource Centre­ah SDOs, Tribe Leaders le student leaders han joint meeting an nei.  Hi huna hin Electric permit  la nei lo hai  mass drive thawna dinga SDO­hai le DC Office­a certificate tum tum­ Tribe, Income, Domicile etc la ding hai ta dingin form siem ding, chu form hmangin Lal/Village Authority han Certificate la ding hai electric consumer number ziek a, verified an thaw ding chungthu hai an hriltlang. Student leader hai chun, Certificate tum tum lakna dinga electric consumer number zieksa ngei ngei dinga ti chu nasa takin an dodal a, sienkhawm Manipur­a Electric permit nei le nei lo hai suidawkna dinga Manipur sawrkarin DC tin kuoma an hriettir leia hieng thil hi hung um a nih.

Oriental  Xerox  rawk, a rawktu man
CCPur:  Zani zingkar inhmatak khan Vengnuam, Hiangtam Lamka, CCPur­a LIC Building bula Oriental Xerox & Computer dawr chu pasal pakhatin a chabi suksein  rawk a, Dawr sunga Iron chest 1 le battery 1 an a dawmdawk laiin Police duty han tuok fuin dawr rawktu Kamminlian Hangshing (32) s/o Thangchinmang of  Zoveng chu an man a. A kuta  inthawk battery le Iron chest hai an  mankir nawk. Hi thil tlung hun hi zani zingkar dar 2:00AM vel a nih. Mr Kamminlian hi lock­up­a  an inriektir hnungin zani khan a nu le pa kutah an inhlan tah.

6 Months Special Prog. in Elem. Edn.
CCPur: Directorate of Education (S) thusuok dungzuiin B.Ed. zo, IGNOU hnuoia 2­Year DEIEd Course inchuk lo hai ta dingin DIET Centre, SCERT/Manipur­ah “6 Months Special Programme in Elementary Education” chu July, 2015 a inthawk tan ning a tih. Education Department hnuoia B.Ed. zo, 2­Year DEIEd course inchuk lo hai chun May 20, 2015 chenin Service book thangin document pawimaw tum tum pelut dingin Director of  Education (S) N. Praveen Singh chun inhriettirna a siem. Thu chieng lem www.manipureducation.gov.in ah  en thei ning a tih.

May 18 in  Aadhar le EPIC linking Special  Drive
CCPur: Zani zantieng khan DC Office­ah  Election Commission of India (ECI), SDOs, AC to DC/CCPur le Election Department han Video Conferencing an nei. Hi huna hin  ECI thusuok dungzuiin Aadhar Card No. le Voter Identity Card  link (thlungzawmna) thuah May 18, 2015 in Churachandpur District­a  Assembly Constituency 6 haia Polling Station tinah Special Drive thaw dingin an rel.

Election Office hawngna
CCPur:  19th Saikawt ADCC biela Independent Candidate Pu Darsiemlien Ruolngul Election Office chu vawizan dar 7 hin Muolvaiphei, Churachandpur­ah hawng ning a tih. Office hi Rev. Ros Infimate in hawng a ta, candidate Pu Darsiemlien Ruolngul, Campaigner le Upa Lalzarlien Darngawn, Chief of Muolvaiphei han thu hril an tih. 

Dist. Level Inclusive Sports le lawmman semna nei
CCPur: SSA hnuoia IED/PO huoihawtnain zanikhan Vimala Raina H/S ah District Level Inclusive Sports nei a nih. Hi huna hin Govt. school tum tum haia regular students 68, Children With Special Needs mi 30 hai an thang a, zantieng ZEO/CCPur in lawmman semna a nei nghal.
    
Hi huna ZEO CCPur in thu a hrilnaa chun Children With Special Needs hai sawrkarin tha taka enkawl a tum thu, inngaisie lo a, lekha inchukna kawnga khawm midang neka an inhnuoi lem naw zie hrie thar a, tumru le taima taka lekha inchuk dingin  an fui.
    

Sports item chi tum tum Wheel chair­throw ball; long jump, soft ball throw, 50 metres race; musical chair, ballon breaking  hai nei a ni a.
    
Lawmman latu hai chu­ Children With Special Needs (CWSN) category­a chun Wheel Chair throw ball ah 1st. Seikhochon of Kholmun JB school, 2nd Tyson of Kholmun JB school; Soft ball throw (girls) 1st Sophia of Saikot H/S, 2nd Hatneichong of Saikot H/S; Long Jump (boys); Lawrence of Saikot H/S; 2nd Michael of Saikot H/S.
    
Regular (primary) student­ah 50 metres race (boys) 1st. RK Meira of Phungkhothang H/S; 2nd. Kevin Mangmalsom of PhungkhothangH/S; 50 Metre race (upper Primary) 1st ah Thongginmang le Pauminlal of Phungkhothang H/S; 2nd. William of Saikot H/S.Painting Compettion Upper Primary (class VI­VIII), 1st Henminthang of Phungkhothang H/S; 2nd. Thongminlal Haokip of Vimala Raina H/S; 3rd. S.Naocha Singh of Bunglusi Upper Primary school. Lower Primary (class III­V);1st Lamchoihoih of Tuibuong Jr H/S; 2nd. Premananda of Bunglusi Upper Primary school;3rd Lalsandam of Saikot H/S;
    
Children with Special Needs, Upper Primary (class VI­VIII) 1st. Thonminlal of Vimala Raina H/S; 2nd Haominthang of St John School; 3rd Hatneihchong of Saikot H/S; Lower Primary (class III­V) 1st. Helminlien of Vimala Raina H/S; 2nd Kailallawm of Vimala Raina H/S;3rd Paugoumang of Phungkhothang H/S  hai an nih.

Martyrs Badminton Tourney 2015
CCPur: Sinlung  Badminton Association (SBA) huoihawtnain The 3rd Hmar Martyrs’ Badminton Tournament, 2015 chu vawisun (May 14, 2015), 3:00PM hin  Muolvaiphei Youth Club Hall­ah tan ni tang a tih. Inkhel dinghai le inhnikna nei taphawt hi huna thanga inkhel en dingin Secretary, SBA chun fielna a siem.

Headline:
Pasal 2 thatna le inzawmin NH­37 dang; Mi thattuhai zawngnaah KRF cadres 8 man
Imphal: May 10, 2015,10:30AM vela Senapati District, Sadar Hills a Gamnom Sapermeina Police station huop sunga um Maipou Khullen hmuna inthawka helpawl han an thuoihmang mi 3 hai laia pahni, Maibam Premananda (15) s/o M. Bihari of Haorang Keirang le Moirangthem Dayananda (19) s/o Birahari hai chu thu indawnnaa an vuoknaah an vuok hlum bakah Konthoujam Bishal (12) s/o K. Bikom of Haobam Marak Lourembam chu na taka an vuok hliem lein RIMS­ah enkawl mek a nih tiin an sung han an hril.
    
Hi thil tlung dodalna le an lungsenzie suklangnain zanikhan Patsoi ah a khaw mihai pungkhawmin NH­37 an dang (bandh) bakah AMUCO le UCM hmalaknain Patsoi­III Community Hall­ah Public meeting nei a nih. Pasal pahni thattuhai hi Kuki Revolutionary Front (KRF) niin an intum.
    
Premananda le Bihari hai hi Negi Home Academy, Maipou Khullen a inhlawfa anni a, Bishal hi Negi Home Academy­a Class­VI inchuklai a ni a, an pathum hin CID an nih tia intuma KRF han an man niin an sung le an khaw mi han an hril.
            
Hieng pasal pahni vuok hluma an umna le inzawm hin Imphal West District Police Commando han tuolthattuhai man tumin Senapati District­a Sapermeina Police station huop sunga Thingsat village­a dappui an thawnaah KRF cadres 8 an man a, hienghai lai hin mi 2 tuolthatnaa thang ve an thangsa tiin zanita Imphal hmuna Chanchin bumihai an hmupuinaah Dy. CM le Home Minister Gaikhangam chun a hril. Pawitawklo mi pahni thattu le students kum 12 mi nunrawng taka sawisaktuhai hi Gaikhangam chun demin an thiemnaw a, na taka hrem anni ding thu a hril.

Nuhmei naupang kum 11 mi suollui hnunga that
Imphal: May 11, 2015 zing dar 8 vel khan Bishnupur District a Moirang Police station huop sunga Chandrapur Mayai Leikaia um, tleirawl pasal pakhat chun nuhmeite kum 11 mi a suollui hnungin a that nia intum a nih. Mipui lungsen chun nuhmei naupang suollui le thattua intum chengna In an raw pek. Nuhmei naupang suollui le thattua intum hi May 12, 2015 khan Moirang Police station­ah an pe a, Juvenile Justice Board hmaa inlangtir a ni hnungin Observation Home ah sielut a ni tah.

MPP in an dem thu an puonglang
Imphal:  May 10, 2015 zana Manipur Assembly Speaker Th. Lokeshwor escort han Police Sub­Inspector Arambam Amitabh an vuok na chu suizui le a thawtuhai chu hrem dingin MPP chun an phut bakah mi vawtuhai an dem thu an puonglang. Hi thil tlunga hin state sawrkar chu totawkin a u m el ding an nawh tiin MPP thusuok chun a hril.

Escort Commander suspended
Imphal:  May 10, 2015 zana Police Sub­Inspector Arambam Amitabh Manipur Assembly Speaker Th. Lokeshwor escort han an vuokna le inzawmin Escort Commander Havildar M. Shanta of 8 Manipur  Rifles chu a sina inthawk suspended a nih.

Others:
ACS Final result suokah eini  mi  pahni an tling
Guwahati: Assam Public Service Commission (APSC) huoihawtna hnuoia Combined Competitive Examination, 2013 final result chu zani hmasa khan puong a ni a. Hlawtlingna chang hai lai eini tlangmi pahni an thang. Hlawtlingna chang po hi 241 an ni a, ST­H ruok chu 6 chau a nih (APS­3, Employment Officer­1, Labour Inspector­1 le Tax Inspector­1).  Eini  mi hlawtlingna chang hai chu - James  A. Songate s/o (L) Songlienthang Songate le Satkhokai Changsan hai an nih. James  A.  Songate hi ACS exam­a lo inziek tling tah, tuta Inspector of  Excise, Govt. of Assam sin chel lai mek a ni a, tuta tum hin Assistant  Employment Officer a hmu a, Satkhokai Changsan hin Assam Police Service (Jr. Grade) a hmu. (Virthli)

Police han pawisa lem siemtu mi 2 an man
Sangrur: Police chun zanikhan motorcycle hung tlan sukchawla an dapnaah mi 2 hai chu pawisa lem Rs. 6,54,900/­ anghu leh an man a, an ruol dang pakhat chu a tlan hmang hman. Mana um hai chu  Saraj Singh le Harpreet Singh hai an ni a, Harpreet Singh hi Patiala College­a Post­graduate inchuklai a ni a, midang pakhat man lova tlan hmang hman chu Karamveer Singh niin SSP Mandeep Singh Sidhu chun a hril. Hieng mi pathum hai hi kum 3 liemtaa inthawka kha India pawisa lem siema sumdawngna hi an lo thaw tan ta nia hril a nih. Police chun an kuta inthawk Scanner 2, Ink, pawisa lem siemnaa hmang paper, side khat print sa pawisa lem le pawisa lem siemnaa hmang hmangruo tum tu m an man sa bawk.

Parliament Budget Session zo
New Delhi:Parliament Budget Session chu zanikhan a tawp tah. Zanikhan Lok Sabha in Whistleblowers Protection (Amendment) Bill, 2015 an passed bakah Rajya Sabha in Black Money (Undisclosed  Foreign Income and  Assets) and Imposition of Tax Bill, 2015 an passed.

Land  Bill Committee member 10
New Delhi: Rajya Sabha chun Land Acquisition Bill le inzawma Joint Parliament Committee indina members 10 ruota um hai hming a puonglang tah. Member­hai chu, BJP a inthawk Prabhat Jha le Ram Narain Dudi; Congress a inthawk Digvijaya Singh, Jairam  Ramesh le P.L. Punia; Samajwadi Party a inthawk Ram Gopal Yadav; Sharad Yadav, JD(U); Derek O’ Brien, TMC; Rajpal Singh Saini, BSP le Sharad Pawar, NCP hai an nih.

Helpawl camp hlukhum, ralthuom tam tak man
Srinagar: Zani hmasa khan Jammu & Kashmir a Baramula district­a Sagipora forest area sunga Bomai Sopore an ti hmuna J&K Police le 27th Rashtirya Rifles thangruol han helpawl hai camp an hlukhum a, mihriem an tlan hmang hman a, ralthuom tam tak  hmu le man a nih tiin Police thusuok chun a hril. Ralthuom an man hai lai AK Rifles 6, IED 3, Grenades 43, AK magazines 50 le Pistol 3 a thangsa.

Shillong­ah Bangladesh MP hlui man
Shillong:  May 12, 2015 khan Bangladesh MP hlui le Bangladesh selkaltu pawl, Bangladesh Nationalist Party (BNP) General Secretary, Salahuddin Ahmed chu passport le Visa a neinaw leiin Foreigners Act, 1946 dungzuia man le Police Custody­ah sie a nih tiin S.K. Jain, Additional Director  General of Police, Meghalaya chun a hril. Ahmed hi thla 2 liemta a kha Dhaka a inthawka a umna hriet lova inhmang, a nuhmei Sheikh Hasina in nasa taka a zawng nia hril a nih. March 10, 2015 a Uttara, Dhaka a intahwka thuoihmang le ienganga Shillong hungtlung am a nia ti a hriet thei tanaw thu  Ahmed hin Chanchinbumihai a hril.

PM  China, Mongolia le S.Korea haiah
New Delhi: Zani zan khan India PM Narendra Modi chun New Delhi suoksanin China ram khawpui Beijing tlung a tih. Beijing a inthawk Shanghai pan a ta, May 16, 2015 khin Shanghai a inthawk Mongolia pan a ta,Mongolia a inthawk South Korea pan nawk a tih. Make in India sukpuitling le a hung hlawtling theina dingin South Korea neka thawtlangpui ding tha an um nawh tiin Modi chun a hril.

China ramri ah lamlien 73 siem that ding
New Delhi:  China ram le inrina zula lamlien (roads) 73 hai chu siem that ning an tih tiin Union Defence Minister Manohar Parrikar chun zanikhan Rajya Sabha an hriettir. China le inrina zula  Roads 73 hai hi Indo­China Border Roads (ICBRs) tia ko an ni a, Border Road Organisation (BRO)  chu lampui siem thatna sin hi thaw tan dinga inhriettir an ni tah. ICBRs 40 hai chu kum 2018 chena zo fel ding le a danghai chu kum 2018 hnungtienga zo fel dinga beisei an nih.

Parliament Joint Committee kutah
New Delhi:  Lok Sabha chun zani hmasa khan Land Bill chu Parliament Joint Committee ngaituo dinga thawn dingin a rel. Political Parties tum tum hai leh hriltlang a ni hnunga Land Acquisition Bill hi Parliament Joint Committee kuta thawn remtitlang a nih. Sawrkar khawma Parliament Joint Committee kuta thawn chu tha le rem a tisa a nih tiin Union Parliamentary Affairs Minister Venkaiah Naidu chun Rajya Sabha­ah a hril.

NDA sawrkarin a thaw tha lem
New Delhi:  Zani hamsa khan BJP Parliamentary Party meeting New Delhi­ah nei a nih. Hi huna hin BJP members han PM Narendra Modi chu sinthaw tha tiin an chawimawi. Kum 10 sunga UPA sawrkarin sin a thaw nekin thla 10 sunga NDA sawrkar sinthaw chu a thain a tam lem tiin Pm Narendra Modi chun hi huna thu a hrilnaah a hrillang. Foreign relations chungthuah khawm NDA sawrkarin sin a thaw tha lem bawk tiin a hril.

GST Bill Select Committee kutah
New Delhi: Good and Service Tax (GST) le inzawma Constitution Amendment Bill chu Rajya Sabha a Select Committee ngaituo dinga peksuok a nih. Select Committee a hin members 21 an um a, ngun taka an ngaituo zova inpui inthungnaah report an pek ding ti a nih. Hi Bill hi Lok Sabha a chun Voice vote a pasi a ni tah.

“Namami Gange” scheme a dingin Rs. 20,000 crore
New Delhi: PM Narendra Modi inrawina hnuoia Union Cabinet meeting chun Ganga vadung inthielfai le venghimna ding ‘Namami Gange’ programme -a Rs. 20,000 crore hmang dingin an remti. Hi thil hi kum 5 sunga ding a ni a, Ganga vadung inthielfai le venghimna kawnga sinthawnaa sumseng 100% chu hi programme hnuoiah tuta inthawk Centre in a tum ta ding niin ei thu dawngna chun a hril. Hi programme hi National Mission for Clean Ganga (NMCG) in State Programme Management Groups (SPMGs) hai leh thangruolin an fepui ding a nih.

Badal in Rs. 5,00,000 a pek ding
Shillong:  May 12, 2015 khan Punjab Chief Minister Parkash Singh Badal chu Shillong­ah an zin a, Orchid Lake a va en hnungin tlangram khawte a hmu nuom leiin Ribhoi district a Bhoi Rymbong village­ah official han an fepui a, Bhoi Rymbaong Primary School thangpuina dingin Rs. 5,00,000 a hung pek ding thu a hril.

A fiena an pek thei leh inban ka tih: Gadkari
New Delhi: Selkaltu pawl han Union Roads, Highways and Transport Minister, Nitin Gadkari chu fakrukna nasa taka thawin an intum. Hi thua hin, Selkaltu Pawlin a fiena an pek thei a  ni phawt chun Minister  le MP ka nina haia inthawkin inban  ka tih tiin Nitin Gadkari chun Lok  Sabha­ah zani hmasa khan a hril.

North Korea Defence minister that
Pyongyang:  North Korea Defence Minister Hyon Yong­chol chu North Korea ram phatsantua intumin April 30, 2015 khan Norh Korea sawrkar thupek dungzuiin Anti­Aircraft han entu mi zatelhai hmaah an kap hlum niin Media report chun a hril. Hi thu hi North Korea sawrkar chun a puonglang naw a, sienkhawm  South Korea Spy Agency report a inthawka hriet niin  media report chun a hril.

Luxembourg PM in  a Gay chanpui
Luxembourg:Kum 40 chauva la umpa Luxembourg Prime Minister Xavier Bettel chun haptakar thar tieng khin a ngaizawngnu (Gay, pasal tho) chu nuhmeia a nei ding thu a hril. Xavier Bettel ngaizawngnu hming chu Gauthier Destenay ti a ni a, kum 2010 a inthawka lo inzui le inngaizawng tan ta an ni thu Gauthier Destennay chun a hril. Xavier Bettel hi kum 2013 a inthawka Luxembourg PM sin chel tan a nih.

Nepal­ah mi 65 le India­ah mi 44 an thi
New Delhi:  Zani hmasaa Nepal le India ram hmun thenkhat haia simkhawlei richter scale 7.3 a hrata an hning nawk leia Nepal rama mihriem thina tuok chu 65 le India rama thina tuok chu mi 44 an tling  ta a, hliem 1200 chuong an um a, building  tam tak a suksiet niin ei thu dangna chun a hril.  Bihar­ah mi 42 an thi a, mi 100 chuong an hliem. Midang 2 thina tuok hai chu Uttar Pradesh a thi an nih a; Tibet khawm a sawi ve a, nupui 1 in thina a tuok  tiin National Disaster Management Authority thusuok chun a hril.

ED in Shah Rukh Khan a ko
Mumbai: Indian Premier League le inzawma Foreign Exchange Management Act (FEMA) rules bawsea intumin Enforcement Directorate (ED) chun Bollywood superstar Shah Rukh Khan chu an hmaa inlang dingin an ko. Shah Rukh Khan hi Indian Premier League - a Kolkata Knight Riders team  neitu a ni a, ED chun thu indawn dingin May thla tawp chena an hmaa inlang dingin an ko a nih. Chun, KKR co­owners actress Juhi Chawla le a pasal Jay Mehta hai khawm ED chun  an hmaa inlang dingin a ko bawk.

-----------------------------------------------------------------------------------------------
VAWISUN THUPUI
Tlang tiengahai khin ka mit hang inleng ka ta, Khawtienga inthawkin am a mi thangpuina ding hung tlung a ta? A mi thangpuina ding chu Lalpa, Hnuoi le van siemtu kuomah inthawkin hung tlung a tih.­ Sâm 121:1­2


Editorial:
Pakhat ekche  lawm ekche
May 10, 2015 zan dar 10 vela Manipur Legislative Assembly Speaker Th. Lokeshwar Escort han Kangla Fort, Imphal tuol zawna Manipur Police Department hnuoia Sub­Inspector Amitabh Arambam (35) of Sagolband Amudan Akham Leikai, Imphal an vuok hrepna  thu chu Manipur state a print media le electronic media haia zieklang le puong a ni el bakah National Newspapers hai chena zieklang a ni a. Hi thil hi Manipur Police le Manipur state sawrkar muolphona chau ni lovin Manipur mipui le a state muolphona a hung ni leiin a pawi takzet a nih. Hiengang thil hi a tlung nawk ta ngai nawna dinga Police Department le Manipur sawrkar han thang an lak nuom a um hle.
    
Amitabh Arambam in a thiem thu a hril thei ang bawkin Manipur Assembly SpeakerTh. Lokeshwar escort party khawmin an thiem thu an hril thei ve a. Hi thil tlung chungchanga hin an thiem thu hril hi a tu am an dik lem a ti thuneitu lien le insang han suizui hai sienla, an diknaw lem lem dan angin an chungah hremna pek nisienla thiltha le indik a ni lem ngei ring a um. Thiem thu chu ei hril thei seng. A pawimaw tak chu a thaw suoltu zawng dawka hrem hi thil tlung rel felna ding damdawi tha tak a ni ngei ring a um.
    
Manipur Police hai chau a nunrawng le thil suksuol hlak an ni naw a, India ram states le UTs tum tum haiah khawm nunrawngna le thil suksuolna hi a tlung rawp hlak. May 11, 2015  khawm khan  India ram khawpui tak New Delhi a khawm Traffic Police in thil suol a thaw ti  ei hriet seng. Dan kala suol le thil indiknaw a thaw leiin a sina inthawk ban a nih. Hremna a tuok hi a na em em el a ti ngei ring a um. Amiruokchu, a thuneina baka thil suol a thaw leia ban a nih ti ruok chu a hrietthiem a tul. Thil suksuoltuhai hi hremna na tak pek pei nihai sienla chu ei rama suolna hi a hung re thei el dim? Mihriemna thil ngaituo ruok chun thil suksuoltuhai hi insir le sim hun pek chu thil awm tak a ni nawk ang reng bawk si a, a thapa tak ding  hi ngaituo chieng dinga  thiltha a nih.
    
Police le Police hman inhrietthiemtuona le inngaidamna um lova nunrawng taka kut an inthlak ngam chun, mi naran (civil mi) hai  chungah lem chun iengang takin am Police hai hin nun an rawng ding ti chu ngaituo tham fe a tling a nih. Ei rama  Police hai chet dan a inthawk hin discipline bakah thaw ding le thaw lo ding thil an tlasam a, an hriet naw ni lovin an zui nuom naw niin an lang. Hi lei in Police nunrawngna hi ei ramah inzing utin a tlung hlak niin an lang. Discipline le inthunun theina an tlasam leiin muolphona an tuok el bakah inza le ngaisang anni ding angin inza le ngaisang hlaw lovin an um hlak.
    
Police po po an tha naw vawng tina a ni nawh. Police tha, fel, ringum le indik tak tak tam tak an um. Amiruokchu, Police pakhat annawleh thenkhat suolna le thaw suolna leiin Police po po an hming a siet pha a, pakhat ekche  lawm ekche an tipo an thaw hlak niin an lang. Police zu ngawlvawi, Police drugs addict, Police nunrawng le an hlaw baka pawisa dit ei ti ang chi hi an bo pha pha chu Police hmingsietna hlak hi a hung re thei ngei beisei a um.

            
Chun, VIP vengtuhai hi an uongthungin an inlaklien nuom deu hlak niin an lang. Hi thil hi iengleia hung um thei am a nia, ti khawm hi sui chet chet a tul hle. Hi thil hi VIP culture lei a ni el thei. VIP ei tihai hi milien le milal, mi theil thawthei tak tak anni leiin an vengtuhai hin an veng VIP­hai hi besana  neiin an inluling nuom vieu hlak. Hi lei hin VIP ei tihai khawmin an vengtuhai um dan le chet dan hai hi an suizui rawp thiltha a ni ngei ring a um.

Post a Comment

Powered by Blogger.