Tuolsung:
VDF han an duty an chawlsan ding
CCPUR: VDF nuor pawl han CM inbiekpui dinga an hnina ngaisak lo a ni leiin District 9 a um le duty VDF hai po po  vawisun hin an duty­na hmun suoksanin an In pan tang an tih. Mani duty­na hmun suoksan lo hai chu thil iengpo khawm tlung sienla anni seng mawphurna ning a tih tiin Publicity Secretary, AMVFWA chun thusuok an siem.

Puitlingna ti film tlangzar a nih
TUITHAPHAI:  Sielmat ICI Kristien Thalai Pawl in Hmar Feature Film an siem “Puitlingna” ti chu April 21, 2014, 7:30PM khan Rev. Lalneikhup Hmar,  Secretary Finance, ICI in  Sielmat ICI  Naupang Sunday School Hall, Sielmat­ah mitin  en thei dinga inchawk thei dingin tlangzarna neiin Pathien kuoma inhlanna a nei nghal. Film tlangzarna huna hin Nk. Maria Darngawn (a film­a Puitlingna ti hla saktu), Nk. Lawmnakim ( a film a Aw Thalai ti hla saktu) le Zomi Idol, 2015 a runner­up, Nk. Gloria Khawlhring  (Semikah band vocalist),  Nk. Daisy Khawbung haia inthawk Pathien inpakna hla ngaithlak a ni bawk.

Mi pawisa bag inrutu nupui 2 man
CCPUR:  Zani  zantieng khan Tuibuong Bazar­a Sumkong Kaimun­a Dawr siemtu pakhat pawisa bag (purse) inrutu nupui pahni man a ni a, SEDO kuta pek an ni hnungin SEDO chun  CCPur Police kuta an peksawng nawk.

RES in coaching an huoihawt ding
CCPUR: Ruonglevaisuo Educational Society (RES), CCPur, Manipur chun April 27, 2015 a inthawk khin zing dar 6­8AM inkar haiah Staff Selection Commission (SSC) le Competitive Exam dang danga thang ding hai ta dingin  thla 3 sung aw ding Free  Coaching buotsai a tum.  Inhnikna neihai chun  Rs. 1000/­ pein   PVS, Bethel, CCPur; Gee Gee Medicos, Lighthouse Lane; A tha bek bek store, Rengkai, Senvon Drugs House,  Hmingthanglien Pharmacy, Phaiveng, Muolvaiphei le Blessed Pharmacy, Saikawt haiah  lak thei ning a tih. Form hi April 24, 2015 chenin peklut thei ning a tih. Coaching neina ding hmun chu Rengkai Govt. Hr. Sec. School, Rengkai, CCPur ning a tih.

Album release ding
CCPUR: Tv Boris Ramnghakmawi in Gospel Music video a siem ‘Hmangaina ka hril seng nawh” ti chu April 23, 2015, 6:30PM hin Pu Darsanglien Ruolngul in khuollien ni pumin Saidan HYA Hall­ah tlangzar a tih. Hu huna hin  Pu Lalhmunsang le Pu Rohminglien hai chu guest of honour le functional president in thang an tih. Album release­na huna hin  Hmar Artistes Association (HAA) hnuoia hlasakthiem tum tum han hla sak bawk an tih. Album inhlanna chu  Rev. Thangroliana in nei a tih. Mitin thang dinga fiel ei nih.

Bank PO an ziek tling
CCPUR: Nk. Zeneth Lalhlimpui Varte d/o Upa Phirthangsei Varte (Meshangarh/Rengkai, CCPur) chun State Bank of Patiala hnuoia Probationary Officer (PO) an ziek tling. Ama hi HSA Jt. Hqrts.  Delhi­a Finance Secretary sin chel lai mek a nih. (Virthli)

67th Israel Independence Day 2015
CCPUR:  Vawisun, 10:00AM hin  B. Vengnom Community Hall­ah  67th Israel Independence  Day, 2015 hmangna um a ta, Chief Guest in T.K. Avihu  Singsit, Chairman BMC(I) le Guest of honour in T. Zebulun Haokip, Chairman, B/S B. Vengnom hai thang an tih.

Sinlung Express in hla ruoi
CCPUR: April 25, 2015 zantieng dar 5 a inthawk khin VTI/VET, Muolhlum, Rengkai­ah Band tharlam hlawk Sinlung Express han hla ruoi huoihawt an tih. H huna hin Pu Damkung thangpuina dingin “Charity Dinner” buotsai ni bawk a tih. Hi huna hin fiel bik hai thang thei an tih.

Handloom Mela nei a ni ding
CCPUR: April 27­29, 2015 inkar sung khin YPA Hall, Upper Lamka,  CCPur­ah ADC, CCPur huoihawtnain Handloom Mela nei ning a tih. A nuom taphawt thang  dingin CEO, ADC, CCPur chun fielna a siem.

ZYO Annual Assembly­cum­Election
CCPUR: May 1, 2015, 10:00AM khin Simte Inn, Simveng­ah 17th Zomi Youth Association (ZYA) Annual Assembly­cum­Election, 2015 um a tih. Session thuma hmang ning a ta, 1st session­ah reporting & business,  session­II ah  ZYA GHQ election le Session 3 chu 6:30PM in  17th  Raising Day Celebration­cum­Musical Nite a hmang ning a tih. Hi huna hin Ginsuanhau Zou, MLA (Singngat A/C)  khuollien ning a ta, , Chief Host in Langkhanpau Guite, Chairman ADC/CCPur,   Guest of Honour in EM/ADC­te  hai le Special Guest in MDC hai thang an tih.

Headline:
AAP Rally­ah loneitu pakhat an khai hlum; Congress in PM Modi le CM Kejriwal hai chungah  FIR registered dingin an ngen
NEW DELHI: Land Acquisition Bill thar ditnaw le dodalnain zanikhan Aam Aadmi Party (AAP) pawlin  Jantar Mantar, Delhi­ah rally an nei a, hi rally­a thang dinga Rajasthan­a inthawka hung  loneitu pakhat, Gajender Singh of Dausa District, Rajasthan chu rally neina hmuna thingkung pakhatah lawnkaiin  ama le ama an khai hlum. Rally­a thang han sansuok tumin an khaina thinglera inthawk  va la tlain  Hospital an panpui a, sienkhawm  san thei a ni tanaw leiin a thia puong a nih. Hi Rally­a hin Delhi Chief Minister Arvind Kejriwal le AAP thuoituhai khawm an thang.
 
Gajender Singh Rajput (41) hi a tir chun thinglera inthawk hmunphi chawiin a khek a, a hmunphi chawi a vai vel a,  a hnungin inkhai hlum a tum a,  AAP  thuoituhai le midanghai chu thingkungah lawn vein inkhai hlum lo ding le hung tum dingin an ngen a. Sienkhawm thingkungah ama le ama an khai a, mipui chun makti le thlaphangin an en. Gajender hi  lak  tlak le , RML Hospital panpui   nisienkhawm san thei ta lovin a thia puong a nih. A lei a sede tut chu hmu theiin a um. Gajender  Singh Rajput hin lekhaziek (suicide note) a maksan a, chu taka chun, “ ka nau pathumhai ka chawm zo ta nawh. Ka bu le thlai ching a hlawsam leiin ka pa’n kan ina inthawk a mi hnawtdawk ta a. Iengtin am kan in kir nawk ka ta, tiin a ziek. Mithi hi  Kejriwal, Rahul  Gandhi, Union Minsiter JP Nadda le Left party thuoitu Sitaram Yechury han Hospital­ah an va en.
 
Hi thil tlung le inzawm hin Union Home Minister Rajnath  Singh chun B.S. Bassi, Delhi Police Commissioner a biek  a, loneitu inkhai hlumna thua hin Inquiry thaw dingin thu a pek  nghal. Joint Commissioner, Delhi Police chu Inquiry thaw dinga inhriettir a nih.
         
Congress Party chun hi thil tlunga mawphurtu chu PM Narendra Modi le Delhi Chief Minister  Arvind Kejriwl  hai an nih tia intumin an chungah  FIR register ni raw seh tiin ngenna an siem.

Imphal:
Catholic  Schools tuol haiah  human  Chain
IMPHAL: Zanikhan AMSU Volunteer­hai chu Catholic Schools 4, Catholic School, Canchipur; Little Flower School, Nirmalabas High School le St. Joseph School haiah fein thil umdan an va enkai a, hieng Schools 4 tuol haiah AMSU Volunteers 40 peiin human chain an thaw. Zani hmasa nekin zanikhan school kai an thahnem tah. Zani hmasa zana Cabinet meeting chun  School hawng lo hai chu an recognition cancel ding ti le school motor tlan lo hai chu an  permit cancel ding tiin thutlukna a siem a nih.

Khongjom Day hmang ding
IMPHAL: Home Department, Govt. of Manipur hmalaknain vawisun 9AM a inthawk hin Khongjom War Memorial  Hall, Khebaching, Thoubal ah Khongjom Day hmang ning a tih. Hi huna hin CM O.Ibobi Singh khuollien ning a ta, Dy. CM le Home Minister Gaikhangam  functional President in thang a tih. Hi taka thang nuomhai ta dingin Transport Department in Bus 16 a hire a, zing dar 6:30 a inthawk MSRTC Complex, Moirangkhomg a inthawk hieng Bus haia chuongin Khongjom Day hmangnaa hin va thang thei ning a tih. Khongjom Day leiin vawisun hin Govt. offices  le Educational Institutions hai chawl an tih.

CBSE school tehlem an dapdawk
IMPHAL: Maoist  Communist Party of Manipur (MCP­M) chun Central Board of Secondary Education (CBSE) School tehlem an dapdawk nawk niin an hril. Hi School hi Ng. Mangi Higher Secondary School ti a ni a, Khurai a um a ni a, students 160 an admit a, student pakhatah fee  Rs. 20,000­25,000 an lak a, hi school authority chu ni 5 sunga hrilfiena pe dinga thu pek an nih tiin Comrade Nonglen Meitei, Secretary, MCP(M) chun thusuok a siem.

Bomb puokah mi 2 an hliem
IMPHAL: Zani zantieng dar 4 vel khan Imphal­Moreh  Road a Manipur University, Canchipur Gate pui tak bula lamlien sirah bomb hrat takel a puok a, mi 2 an  hliem.  Chun,  zani zantieng dar 5:30 vel khan  Thoubal District sunga Khangabok a In pakhat compound sungah hand Grenade  hmu a ni a, Police a bomb  squad han an va lak a,  pawitawk loin an sukpuok.

Thlipui  hrat takin a hrang
IMPHAL: Zani zantieng dar 5:30 vel khan  Thoubal District ah thlipui hrat takin a hrang a, thil chi tum tum a suksiet a, mihriem thi le hliem ruok chu an um nawh. Imphal khawpuia khawm thli hrang hi a na hle niin ei thu dawngna chun a hril.

Pallel ah bandh a khau hle
IMPHAL: All Manipur Hill District  Contract Basis Teachers Association pawlin an indin JAC in inter­State Road Transport  Service bandh an thaw chu an la sunzawm pei a, zanikhan hi bandh hi Pallel­a chun a khau hle niin ei thu dawngna chun a hril. Hi bandh hi darkar 72 aw ding ti a nih.

Others:
BDFM khawm inthangsatir ni rawhai seh
AIZAWL: Hmar Peoples Convention (HPC) Democrats outlaw a puong ding an ni chun, Bru Democratic Front of Mizoram (BDFM) khawm inthangsatir ni rawhai seh tiin Mizoram  Rajya Sabha member hlui le MNF Core Committee member, Lalhmingliana chun ngenna a siem. BDFM hi NLFT leh inthlawp a, mi thuoihmang, mi suom le thil suol chi tum tum  thawnaa thang ve an ni leiin danpuoa hnawl an ni nawna ding san a um nawh tiin Lalhmingliana chun a hril.

ULFA(I) le NDFB(S) hai inbiekpui tum lo
NEW DELHI: Paresh Barush thuoina hnuoia ULFA (Independent) le NDFB(S) pawlhai chu sawrkar thlungpuiin inbiekpui a tum  nawh tiin zanikhan Union Minister of state for Home Affairs Kiren Rijiju chun Bijoya Chakravarty  indawnna dawnin Lok Sabha an hriettir Suolna chi tum tum le tharum insuona an thaw zing leiin sawrkar ta ding chun inbiekpui chu thil harsa a nih tiin Kiren Rijiju chun a hril.

Ruo le thlipui leiin mi 32 an thi
PURNIA: Zani hmasa zan khan Bihar state a Purnia, Madhepura, Saharsa, Madhubani, Samastipur le  Dharbhanga district hai chu ruopui vanawn le thlipui hrat takel inthuoin a nuoi a, mi 32 an thi a, mi 80  na takin an hliem bakah  thingkung sangtel a mut thluk a, power lines, In, Vaimim, Wheat, be le thlai dang dang nasa takin a suksiet niin Principal Secretary, Disaster Management Department Vyasji chun zanikhan a hril.

DG, RPR dingin Rajiv Ranjan Verma
NEW DELHI: Senior IPS Officer Rajiv Ranjan Verma chu   Director General (DG) of Railway Protection Force (RPF) dingin zanikhan ruot a nih. Verma hi 1978 batch IPS Officer,  Bihar cadre a ni a, tuhin Director General of National Crime Records Bureau (NCRB) a chel mek a nih.  RPF hi Rel passengers hai venghimna sinthawtu tak an nih.

Tamil Nadu ah DA sukpung a nih
CHENNAI: Zanikhan Tamil Nadu sawrkar chun a hnuoia thawk sawrkar thawktuhai DA chu 6% in a sukpung. DA pung hi January 1, 2015 a inthawka hmang tan ning a ta, sawrkar thawktu le pensioners nuoi 18 velin an sawr tangkai pha ding a nih. Hi lei hin Tamil Nadu sawrkarin kum khatah Rs. 1,222.76 crore a seng belsa pha ding a nih.

Building chimin mi 1 a del hlum
NEW DELHI: Zani zingkar dar 7:44 vel khan Moti Nagar, West Delhi­ah building pakhat a chim a, mi pakhat a del hlum a, naupang 4 le nupui 2 na takin an hliem a, Acharya Bikshu Hospital panpui an nih. Gas Cylinder puok leia building hi a sukchim nia hril a nih. Building chim hin mi 3/4 vel a vur khum nia hriet a ni leiin zawngna sin thaw a la nih.

Kal a inthawk thil inbawk 2.75 kg
NEW DELHI: Tulai hnai el khan Sir Ganga Ram Hospital­ah pasal pakhat, kum 45  Kal chu an vung leiin an at (Operation thaw ) a,  thil inbawk 2.75 kg a rik an at thlak niin Dr Manu Gupta chun a hril. Mihriem Kal hi a tlangpuiin 130 grams a rik a ni hlak. Hienganga rik Kal­a inthawka at thlaka a um  a vawikhatna niin Dr Manu  Gupta chun a hril.

NDFB(S) cadres 5 ralthuom leh man
GUWAHATI: April 21, 2015 khan Army le Police thangruol han Kokrajhar district, Assam state sunga Ripu Reserve Forest ah joint operation an thaw a,NDFB (S) cadres 5,Dilip Basumatary, Ananto Swargairy, Philip Nazaary, Phukan Goyari le Sanjoka Brahma hai chu Pistols 2, Hand grenades 4, silaimu 9 le thil dang dang leh an man niin Defence Spokesman chun a hril.

PAN Card apply a inthawk darkar 48 sungin
NEW DELHI:  India sawrkar chun PAN Card apply­a inthawk darkar 48 sunga hmu theina ding online facility hawng vat a tum tah. Hi baka hin hmun kilkhawr deuva um PAN Card dit hai ta dingin India ram pumpui huopin Special Camp huoihawt a tum bawk. Permanent Account Number (PAN) hi number digit 10 nei, Income Tax Department in a pek a nih. PAN card hi  income tax chungthu, motor zawr le inchawkna le thil dang dang haia a tul  a,  Finance Act, 2015 chun incheina thil hlu  Rs. 1 lakh le a chungtieng manhu inchawkna dingah PAN card lo thei loa hmang dingin rawtna a lo siem ta a nih.

Pasal pakhat  Rs. 8 lakh leh man
MANGALURU: Zani hmasa zingkar inhma tak khan Railway Protection  Force (RPF) constables pahni han Vadakara le Thalassery Railway station inkara tlan 22637­ Chennai­Central­Mangaluru Central West Coast Express rela chuong Sandeep Singh chu ringhla leiin a bag an dap a, pawisafai Rs. 8,00,000 an dapdawk a, a pawisa hmuna indik taka a hril theinaw leiin an man.  Pawisa hi Income Tax Office, Kannur ah an peklut a,Sandeep Singh (25), Gaya District, Bihar chu RPF han an hrentang.

NDMA adviser dingin B Pradhan
NEW DELHI: Senior IAS Officer B. Pradhan chu zanikhan National Disaster Management Authority (NDMA)  Adviser dinga ruot a nih. Mr Pradhan hi 1987 batch IAS Officer Bihar Cadre a nih. Pradhan hi January 20, 2015 a lo pension tah 1985 batch IAS officer Uttar Pradesh Cadre Anita Bhatnagar Jain hmun ruok hluotu dinga ruot a nih. Pradhan hi tuta a cadre state Bihar a thawk lai mek a nih.

BTC in direct funding an ngen
GUWAHATI: Bodoland Territorial Council (BTC) chun, assam sawrkar in council fund a pekdawk inhnuk hlak leia harsatna a um leiin sawrkar thlungpui  (centre) a inthawk direct­a fund pe dingin an ngen. BTC thar chun  Bodoland Territorial Autonomous district (BTAD) huom sunga cheng  mipui hai duthusam suktpuitling dingin hma lang a tih tiin Khampa Borgoyari,  Deputy Chief, BTC chun zani hmasa khan a hril.

Pakistan­ah mi 17 khai hlum nawk
ISLAMBAD:  Zani hmasa khan Pakistan Court  in thi dinga thiemnaw an changtir ta sa mi 17 zet, Pakistan rama Jail hran hran haiah khai hlum nawk an nih. Mi 17 hai hi Punjab le Balochistan Province sunga Gujranwala Jail, Faisalabad Jail,  Sialkot Jail, Multan Jail, Sahwal Jail,  Gujrat Jail, Lahore Jail haia khai hlum an nih tiin ei thu dawngna chun a hril.  Tuhin Pakistan rama Jail tum tum haiah thi dinga  Court in thiemnaw an changtir tasa mi 8,000 vel an la um a hril a nih. Ni khat sunga mi khai hlum tam tum tak chu April 21, 2015 a mi 17 an khai hlum kha a la nih.

Nepal a Bus eksiden ah mi 17 an thi
KATHMANDU: Zani zingkar khan Nepal rama  Pashupatinath Temple, Kathmandu a pathien biea fe,  Gujarat state mihai chuongna Bus chu a hungkir tieng Prithvi Highway ah a eksiden a, lamthlang tienga rawl Ft. 1000 (metres 300) vela insangah a tla thla a, mi 17 an thi a, midang 27 an hliem. Hliem hai laia 5 hai chu an hliem inrik  hle tiin Police offier, Tejendra chun a hril. Thi le hliem hai hi India mi vawng niin Indian Embassy, Kathmandu thusuok chun a hril.
-------------------------------------------------------------------------------------------------
VAWISUN THUPUI
Lalpa, nangin ritlonahai in chik chun,   Aw Lalpa, tu am ngi an ti leh? Nisienlakhawm, i kuomah ngaidamna a um a nih, Tiha i um theina dingin.  ­Sâm 130:3­4

Editorial:
Sawrkar khawlam a um a?

Tulai hin Manipur mipui han harsatna chi tum tum ei tuok a, ei harsatna tuokhai hi chi hran hran an nih. Tuta hma deu khan  Swine Flu natna hri leiin mi thenkhatin harsatna an tuok a, a ram a phekin harsatpui em em naw inlakhawm a tuorhai ta ding chun harsatna lien takel a nih. Sungkuo pahni lem chun thina hiel an tuok pha a nih. Tulai hnai hin Bird Flu natna hri a hung inleng nawk a. Manipur pumpuia cheng hai chun ei harsatpui bek nawh. Amiruokchu, infected Zone/Surveilance Zone a chenghai ta ding chun harsatna lien tak an tlun  mek. Hieng natna hri inlengna le inzawm hin sawrkarin hma a lak nghal leiin lawm a um.
 
Tulaia Manipur state a cheng mipuihai harsatna tam tak laia a langsar zuol bikhai chu thautui harsatna le Greater Imphal Area  sunga Catholic School 5 han helpawl thenkhat vauna leia an school an khar hai hi a nih. Hieng harsatna ei tuok mekhai hlipkieng a hung ni theina ding hin state sawrkar le a ram mipui hai ei thangruol chu a tul takzet. Amiruokchu, ei state sawrkar mawphurna a lien bik ti inla ei hril suol taluo ring a um nawh. Sawrkar hrat le felin indik tak le huoisen taka ro a rel  a hun hle.
 
Ei state le a mipui han rorelna indik ei mamaw em em ti chu a hretu seng ei nih. Rorelna indik hi ei invawi a, ei dit a; sienkhawm ei state­a sawrkarna chela roreltuhai hin  rorelna indik an hmang ngam naw mani ding aw? ti theiin a um. Rorelna indiklovin a rasuok chu ram buoi a ni rawp hlak ti history a khawm hmu le hriet theiin a um hlak. Chuleiin rorelna indik fepui ding chun iemani tak ei state sawrkarin a thaw makmaw a nih. Action lak a tul leh a chet ngam le dan khau deu hmang a tul leh a hmang ngam a tul a nih.
 
Ei state le thenum stae haia bandh le economic blockade hun sawt tak takel a um hlak leiin thautui (Petrol le Diesel) thuah Manipur mipui han harsatna nasa tak ei tuok rawp hlak. Amiruokchu, tulai hin chuongang chu ei state le ei thenum state haiah a um nawh.  Amiruokchu, tulai hin Manipur mipui han thautui thuah harsatna namenlo takel ei tuok mek hi a san ienglei am ning a ta? Mipuihai hriet nuom a nih. Manipur a Oil Pumps tam lem khar an ni a, black market­a ruok chun dit zat zat  thautui inchawk thei ding a um zing. Oil Pumps haiah thautui a um naw laia black ah nuom  zat zat inchawk theia a um hin thil indiknaw chu a um a nih. Thil indiklo chu sukfel a tul a, an leh a sukfeltu ding sawrkar khawlam a um a? ti indawnna chu mipui ta ding chun indawnna siem lo thei lo a hung  ni ta a nih.
 
Kum chanve a liem tep ta a,  sienkhawm  Greater Imphal areas sunga Catholic Schools 5 hai chu helpawl thenkhat vauna leiin khar an la ni zing a, students 17,000 vel chu an inchukna sunzawm thei lovin an um ta a, hieng laizing khawm hin thuneituhai totawka  an um zing el chu thil indik niin an lang nawh. Hi chungthua hin cabinet meeting­a ro a rel anga state sawrkarin hma a lak ngam a tul a nih.
     
Sawrkar thuneituhai hin thutlukna an siem ding hin ngunthluk takin, kiltin ngaituoin, titak zetin ngaituona seng hlak sienla, Order chu Order a ni anga thaw le hmang ngam ngei dingin Order insuo annawleh rel hlak sienla nuom a um. Ei state sawrkar hin  Order inzaum lo dam, Notification insuo sia zui lo le hmang ngam lo hi  a hau taluo a, ei sietpui an naw mani ding aw ti theiin a um hlak. Order le Notification hmang lo ding hi chu insuo lo el ding a nih.



Post a Comment

Powered by Blogger.