PB SINGH LE MANIPUR HMAR POLITICS

Constitutional Monarchy

India in independence a hmu hma 1946 khan Manipur Maharaja Bodhchandra khan Manipur State Constitution siemtu ding Constitution Drafting Committee a lo indina. Hi Committee hin July 26, 1947 khan Manipur Maharaja Bodhchandra kuoma Draft a lo thelut. Manipur State Constitution Draft chu Maharaja hin a pawm le inruolin Manipur state chu Maharaja Bodhchandra hnuoiah Constitutional Monarchy a hung ni ta a nih, tia ngaidan nei thenkhat an um.

Instrument of Accession 1947

Independence ei hmu hma August 8, 1947 khan British sawrkar le Manipur Maharaja Bodhchandra hai chun Instrument of Accession an lo sign-a. Chu Instrument dungzui chun subject pathum (External affairs, defence le communication) tilo subject dang popo chu Manipur Maharaja thuneina hnuoia sie an nih

. 

August 15, 1947 a India Independence puong a ni char khan, India Independence Act 1947 a Sec 7(1)(b) dungzuiin, Manipur state chu technically in independent state a lo ni ve tah, an tih. August 16, 1947 khan British Governor General office in Home Dept File No. A-1/1/947 hmangin Instrument of Accession kha a lo namdet-a. August 22, 1947 khan Manipur State Council in Memo No. 383 PTI Reference Council Minutes Part I of 11.8.1947 hmangin a lo namdet ta bawk. Chun August 27, 1947 khan Manipur State Gazette ah mipui hriet thei dingin kha Instrument kha tlangzar a nih. Chuleiin Manipur hi September 21, 1949 hma popo kha India hnuoia um an nawh, an ti hlak. 

MLA Election 1948

Independence hmu hma a Manipur Maharaja Bodhchandra hrietpui Manipur State Constitution 1947 chu sirsanin Manipur state hi biel 53 in an lo the-a. Manipur state sunga Hmar delna khuo tamtak chu Senvon biel sunga rinlut an lo nih. 

June 1948 khan hieng biel 53 a hai hin council election nei a nih. Hmar mipui chun June 1948 a Manipur election kha ei lo boycott. Ei i boycott election a khan Senvon biel ah Paite haiin Pu TC Tiankham an inngir tira. Kuki haiin Pu T. Kipgen an lo inngirtir ve. Mizo sawrkar ditlo Pu Sandam Hmar, Pherzawl khuo chu a ngir vea. A tling nawh. Senvon bielah Paite hai candidate Pu TC Tiankham chu a hung tling ta a nih. Kha tum khan Hills Disticts a inthawkin mi 18 an tling. Manipur pumpuia total seats kha 53 a nih. 

Thlangtlinga um hai popo chun Manipur CM ding an thlanga. October 18, 1948 khan Maharaja Bodhchandra inhmupuiin sawrkar an siem ta a nih. Member pasari umna Council of Ministers chu Manipur ah a hung ngir thei ta a nih. Pu PB Singh chu CM a hung nia. Hills Areas a inthawk mi pahni Ministers in hlangkai an nih. Hills Areas Dept le Forest Dept an chel. Senvon biel awptu Pu TC Tiankham chu Manipur State Council Speaker dingin an thlangtling bawk. CCP malik an ni tah. 

Mizo Sawrkar 

Kum 1947-1948 sung khan Manipur a Hmar mipuiin an khuo lal Thadou-Kuki hai an dit nawzie an lo sopui nasa hle. Amiruokchu, Manipur CM PB Singh le a sawrkar chun khuo lal hai kha an lo support lema. Territorial integrity humhimtu angin an lo ngai a nih. 

Mizo sawrkar a ngir chun Manipur a Thadou-Kuki lal thuneina popo tawp a ta, lal sadar, lal busung le phurrik popo bo tang a tih, an hang ti lem khan chu Mizo rorelna kha thlumte thlirin ei lo thlir ta a nih. Chuleiin Manipur state sunga Hmar hai lai Mizo Union supporter an hung punga. Assam state sunga Lushai Hills District ah inrinlut ei hung tum ta a nih. 

Manipur state sunga umsawng ei nuom nawzie khanga council election boycott movement (June 1948) zawngin ei hei tarlang ta phing khan Manipur CM PB Singh a lu ei sukhai ta bek bek a nih. Maharaja Bodhchandra lalram sunga Senvon biel chu Lushai Hills District tienga inrinluttir an nuom nawa. Manipur a Naga biel chu Naga Hills a rinlut ding an phal bawk nawh. Manipur state sunga Hmar haiin Assam sunga Lushai Hills district (tuta Mizoram) hi ei lo zawm tum ve lei khan Manipur politics chu ei lo sukhning nasa hle a nih.

Tuivai ral tienga min pemluttir an nuom naw leiin Manipur state sawrkar chun Hmarbiel a Mizo Union thuoitu hai chu inbiekpui a hung tum ta a nih. Chuleiin Manipur a Mizo movement chu Manipur state sawrkar chun ieng le khawle dang a hung tum ta pei a nih. Hihi kum 1997-2006 chena valley helpawl Hmarbiel a an hung lutna san a hung ni ta pei a nih. Kum 1986-1997 hun sunga Vangaitlang dunga Naga hai intawmna san laia point pawimawtak pakhat chu Nagalim a nih. Thenum hai inselna ah vuok tuor pawl ni tum ta naw mani.

Manipur Maharaja Bodhchandra chun a CM PB Singh chu inrangtakin Parbung le Senvon khuo ah a tirlut ta a nih. 

1948 or 1949?

Manipur Hmar haiin Manipur sunga Regional Council ei lo hnawl tuma Parbung le Senvon khuoa Manipur CM Pu PB Singh hung lut kum le inzawmin ngaidan pahni a um tah.

1. 1949 Group

Prof Lal Dena chun Manipur CM Pu PB Singh Parbung a lutni kha Feb 2, 1949 a nih, a tih. Page 98, 13th line, In Search of Identity, 2008 Edition lekhabu ah hmu thei a nih. Dr Hrilrokhum Thiek khawma Pu PB Singh Parbung a lutni kha Feb 2, 1949 a nih, a tih. Page 193, 24th line, History of Hmars, 2013 Edition ah hmu thei a nih. Prof Darliensung Hmar chun Pu  PB Singh Parbung lut ni kha Feb 9, 1949 a nih, a tih. Page 121, The Hmars, 2013 Edition ah hmu thei a nih.

2. 1948 Group

Amiruokchu, Manipur CM Pu PB Singh chun Parbung a zu sir kum kha 1948 angin a lo hrila. Chu chu HSA haiin kum 1980 laia sawrkar a memorandum an lo thelutna a khan 1948 ti kha an lo zepsa ta a nih. Dr Rosiem Pudaite khawma a lekhabu ah kum 1980 a HSA haiin memorandum an thelut huna Pu PB Singh in 1948 khan Parbung a zu sir ti an ziek kha a hung sirsan ta a nih. Dr Vanlallien Pulamte khawma kum 1948 hi Pu PB Singh in Parbung a sir kum angin a hung zieklang ta pei a nih. 

Hi article ziektu hin a hnuoia ang hin Manipur CM hlui PB Singh a Senvon sir dan chanchin zuk tarlang ka tih

Parbung

Manipur CM Pu PB Singh chun January 1949 lai bawr khan Manipur Hills Areas Minister Pu R. Kathing le CO, 4th Assam Rifle Sipai thuoitu hai thuoisa in Hmarbiel sir a lo tuma. February 2, 1949 khan Parbung a lut phawta. A sirna taphawtah, khuo lal popovin an lo welcome-a. Amiruokchu, Pu PB Singh lutna taphawtah Mizo Union leader hai an lo tlansie pei.  

Parbung VA Secretary Pu Ruia Infimate inah a tlung hmasataka. Zankhat a riek. Anachu a cham sungin public meeting chu a ko thei nawh. MU supporter an lo tam leiin Parbung VA thuoitu hai chu an hmupuia. Regional Council peng ka ti cheu a lo tih. Tawng inlettu chu Pu Bela, Rovakawt mi a nih. Pu Rangkhum, Patpuihmun khuo mi in a tawiawm bawk. Pu Ruia hin kel a lo that peka. Pu PB Singh chun arpui dum a pek nghe nghe, an tih. 

Senvon

Manipur CM Pu PB Singh chu February 4, 1949 khan Senvon a lut. Sapintlang ah MU leader hai public meeting a nei puia. Mizo sawrkar in zawm naw chun vawisun hin Regional Council ka pek nghal cheu ni raw seh a hei tia. A thu hril zing lai chun Mizo Union leader Pu L. Tawna chun zawna a siema. Regional Council chu ieng sawrkar hnuoi am ning a ta? a zuk tia. Manipur CM Pu PB Singh chun Manipur sawrkar hnuoia um a tih, a tih. Khuongpu Pu Santen chun khuong vawithum a hei vuoka. Mipui hai an tindar ta a nih. Senvon nunghak Darchawng chu ramri vaitan zawnga lama hmathuoitu a nih.

Manipur a Mizo Union leader hai chu man tumin a zawng ta nghala. Chuong chun Lungthulien khuo ah AR camp an nghat bawk. Manipur ramri vaitan zawng ngawtin hei lam ei tih, an lo ti hlak leiin Hmar laia Mizo Union thuoitu hieng Pu L. Tawna, Lalsungkim, Tawia, Khuongsunlien, Thanga, Pu HV Tawnga, Pu Kunga, Pu Hmunthang Infimate, Pu Chala le Pu Sieka hai chu man an hung nih. Imphal jail ah thun an nih. 

Merger

Kum 1948 a inthawk khan Manipur ah Manipur State Council sawrkar a ngir ta leiin Manipur in India sawrkar a zawm ding le ding naw chu thlangtlinga um Manipur State Council hrietpuina la lovin Manipur Maharaja Bodhchandra chun a nuom thu thuin India sawrkar a lo inrempui thei ta nawh, titu an um. 

Amiruokchu, September 21, 1949 khan India sawrkar chun force in Maharaja chu lekha a lo insign tira, Manipur State Council hrietpuina um der lovin Manipur state chu India in a lo laklut, titu an um. Chu nia inthawk chun Manipur chu Indian Dominion hnuoia a hung um ta a nih. Automatically-in 53 member umna Manipur CM Pu R. Amar Singh a thuoi Manipur Assembly chu thaibo a hung nia. Manipur sunga Hmarbiel khawm Manipur state sungah permanently a rinlut a hung ni tah. Hmar delna khuo Senvon biel sunga um hai popo khawm India ah rinlut an lo ni tah.

Lushai Hills District

Kum 1952 a Assam rama Lushai Hills district huomsung popo Sixth Schedule an zamkhum khan Manipur a Senvon biel chu Lushai Hills District Council huom sungah rinlut a ni ve nawh. Mizo Union leader haiin Lushai Hills District huomsung boundary an ziek lai khan Tuivai ral ah ei lo kokai hne ta nawh. 

PLRC

Manipur a boycott movement ei thaw lai April 15, 1948 khan Assam state a Lushai Hills District sungah Lushai Hills Advisory Council election an ei vea. Chu taka chun Pawi Lakher thuoitu hai chun candidate an lo siem ve. Pu Z. Hengmang chu Sagau ah an thlangtlinga. Pu Vako chu Pawi-Lakher area ah an suktling bawk. Lushai Advisory Council ah an luta, kum 1953 khan Pawi Lakher Regional Council (PLRC) an hung nawrdawk ta lem a nih.  

Hmar Regional Council under Mizo ADC

Lushai Hills ah kum 1961 khan Mizo 2,13,061 an uma. Pawi 4587 chau an nih. Lakher khawm 8790 chau an nih. Hmar 3118 ei nih. Khang hun laia Mizoram Hmar hai khan Mizo ADC sunga PLRC ang deu Hmar Regional Council lo hni ve hai sien chu, vawisun hin ADC a hlangkai a ni ta hmel, titu ei um. 

Thil hrim hrim chu a hun lai tak ti a lo uma. Sap haiin, "An idea whose time has come", ti le, "An idea whose time has crossed", ti dam an nei. "For everything there is a time", an lo ti bawk.

Manipur Hmar Regional Council

Manipur tienga Hmar hai khawma Manipur State Council election June 1948 khan ei lo intuokpui ve. Senvon bielah Hmar mi inngirtir-in, Mizo Union leader hai khan Hmar candidate lo support tling hai sien chu, khang hun laia politics kha an hemdanglam thei ring a um. Hmar Autonomous District Council khawm an lo hmu el thei an tah, titu ei um.

Kum 1949 lai khan Manipur sunga Sixth Schedule Autonomous District Council a la um nawh. Pu PB Singh khan Autonomous District Council dam lo sopui nisien chu Manipur state thangpuina sirsanin India sawrkar chun District Council a mi pek thei. 

Hnam dang khawma ADC chu an lo sopui tawl tah. Lushai Hills District sunga Regional Council an lo demand kha thil thei a lo nih, a san chu majority Mizo haiin ADC an demand ve zing leiin. Amiruokchu, Regional Council hi Autonomous Council um hmasa zetna biela um hlak a nih. Khang hun lai khan Manipur sunga ADC a um nawh. Chuleiin Regional Council ngirdawk pui thei Sixth Schedule District a um nawh. 

Valley hai lai India sunga merger nuom le nuomlo an inkatnuka. Naga haiin Naga Hills an lo zawm tum ve. Kuki haiin a hranin autonomy an lo buoipui vea. Pu PB Singh in Regional Council a sopui kha Manipur sawrkar hnuoia mi ning a tih, a ti lei khan Manipur MU thuoitu hai khan inhlemna angin an lo ngai khawm a ni thei. Kuki, Naga le Hmar hai Autonomous District Council pek ning in ta, a hran sengin Regional Council in nei ding a nih, lo ti dam nisien chu, ei thuoitu hai khan second thought an nei nuom ring a um. 

Chun Manipur a Mizo Union leader hai khan ADC hnawt Lushai Hills leader hai kuoma khan Hmar Regional Council lo hni lem hai sien chu an hlawtling lem ka ring. 

Kum 1952 a pieng Lushai District Council (1952-1970) hnuoia khan Hmar Regional Council indin thei a nih. Kum 1953 khan Lawngtlai, Saiha le Chawngte a Pawi-Lakher hai ta ding Regional Council (PLRC) indin a nih. Chu regional council chu Mizo District Council hnuoiah kum 1953-1972 chen khan a lo ngira. Kum 1972 a Mizo District Council UT a hlangkai a hung ni khan PLRC kha kha kum ma khan ADC pathumin the a hung nih. Chakma chen an hung vangnei pha ta a nih. 

Manipur a Regional Council ei sopui ang khan Mizo Union a thang Lushai Hills a Hmar leader hai khan Lushai Hills ADC a pieng hnung khan an buoipui rak ta nawh. A san chu Cachar ah HMF, Manipur ah HNC le HNU haiin Hmar District ti an hung sopui ta lei khan Lushai Hills politics a khan Hmar hai kha ringhlel ei hung kai ta pei khawm a hawi. Amiruokchu, Manipur le Lushai Hills a MU thuoitu Hmar hai kha an phak ang level peia varna nei an lo nia. An movement kha khang hun laia a tamlem hai pawm a nih.

Kuki le Thadou lal hnamna khan Manipur a Hmar mipui lungril a lo hne taluo lei khan Mizo Union thuoitu hai khan khang hun laia administrative realities le historical current kha an lo sui chet chet hman ta naw khawm ni mei a tih. Natural boundary, feasibility thil le Sixth Schedule kalhmang le sawrkar chinchang ngaituona hun tha an lo nei hman naw khawm kha pawi ei tih. Chawp le chil thil vawng an lo tuoka. Inhmaw deuva dawn chi vawng an lo tawng a nih. First generation leader an ni leiin a bul tantu an ni vawng. Political dictionary zuk phet nghal thei ding an nei nawh. Chuleiin khang hun laia an wisdom kha hmangin hnam rawng an lo bawl a nih. 

Thukharna

Kum 1948 a Hmar Boycott Movement khan ei thuoitu hai thil tam tak an chuktir. Amiruokchu a hnunga HNC (1953) le HNU thuoitu (1958-1997) second generation leadership hai khan an hma a Mizo Union thuoitu (1946-1952) hai hlawsamna san kha an lo study tha rak naw angin an lang tlat. 

Second batch Hmar leaders hai hin state puitling pathum Manipur, Assam le Mizoram a um ei ni tah ti kha man harsa an lo ti hle. Lobby le number pawimawzie an lo manthel deuvin ka hmu. Administrative boundary inza a tula. Hi kawnga hin an fail metin ka hriet. Hmar delna ram popo khitkawpa "Hmar Hills District" nawr ti tak kha political vision ang chauva hmang thei a lo nia. Chengna state sengah political apparatus puitling nei a tulzie hrie hmasa sa haiin political realism sirsanin, an chengna state, khuo le vengah hnam angin hma an sawn thei dan ding lampui an ngaituo dawk peia. Amiruokchu, Manipur a Hmar District Movement kha Tipaimukh MLA movement le an lo khitkawp tal tala. HNU chu thangpuitu tha nei lovin kum tam a lo um pha ta a nih. Vawisun hin Hmarram in HNU thuoitu hai a maksan tah. Hnam anga daksuok intak ei hung ti ta a nih. Chuleiin Manipur a Hmar hai hi ei intuoithar thei nawk naw chun, politically a ngirdawk thei ta lo ei ni tah. 

In bawlna hmun ei inchawk ngun tah. Riekna ding building khawm ei bawl rawn tah. Lekhathiem ei tam tah. Biekin khawm ei phun rawn tah. Insekhek khawp kohran ei um ta bawk. Amiruokchu, Hmarram tia uongpui khawp Hmardesh inchi khat khawm Manipur ah ei la nawr dawk nawh. Pherzawl district hi Hmar district a ni nawh. Thanlon a bielsa. Hmarram hmathlir neia intuoithar tum HAADDCo (1997) hai hmalakna kha a sunzawm theitu ei um nawk pha Manipur a Hmar hnam harsatna le beidawngna popo la kieng a tih. 

-Lakhawmtu

Dada le Jojo Pa

27.7.2020

HMAR HILLS DISTRICT MOVEMENT (1946-2000)

Kum 1944 khan Indian nationalist leader Pu Subhash Chandra Bose in Saikot lal Pu Kawlvelthang Hmar an hmupuia. Saikot haiin INA sipai hai chu thla nga vel an lo chawm.

Mizo Union

Kum 1946 khan Assam ram sunga Lushai Hills district huomsunga Aizawl khuo ah Mizo Union (MU) a pienga. Pu Pachhunga Hmar chu President hmasatak a nih. Tuta Mizoram tlangdung, Manipur Hmarbiel le Vangaitlang, Assam a Cachar phai a lo hrut nasa. 

Manipur state-a MU President hmasatak chu Pu Thanga Hrangchal, Sipuikawn khuo a nih. October 11, 1947 khan Thanglung chu President a hung nia. Kum 1948 a Senvon khuoa MU Assembly a khan Pu L. Tawna chu President thar dingin thlangtling a nih. 

Assam state-a Cachar a ruok chu Pu HK Bawichhuaka kha Lakhipur biel Divisional Councillor a nih. Kum 1949-1952 chen General Secretary a ni bawk. Dr Rosiama khawm Lakhipur MU ah laklut a nih. Assam a district Lushai Hills District ah Pu Pachhunga Hmar le Thangler in MU an thuoi ve.

Hmar nau a tamlemin MU kha ei lo inrui chil a nih. 1947 a zalenna ei hmu khan Mizo sawrkar rorelna um ding le inzawma a par chen ei lo lawm hman a nih. Paite in Khul Union (KNP) an indin vea. Kuki haiin Kuki Union (KNA) an lo sopui ve. Vaiphei hai khawma VNO an nei. Hmar haiin MU a thangruol dingin ei fiela. Ei beiseina le ringna popo MU a khan ei lo bang a nih. Lal thuneina popo tawp a ta, Lal sadar, lal busung le phurrik popo bo tang a tih, an hang ti lem khan chu Mizo rorelna kha thlumte thlirin ei lo thlir ta a nih. Amiruokchu, lal popo thangruolin lalpawl an siem vea. August 14, 1947 a inthawka October 1947 chena ngir Manipur interim sawrkar tieng an lo thang a nih. Kum 1948 a Manipur election a khan Senvon biela ah Paite haiin Pu TC Tiankham an inngirtira. Kuki haiin Pu T. Kipgen an inngirtir ve. Sandam Hmar, Pherzawl khawm a ngir ve. Amiruokchu, Paite hai candidate a tling. 1948 election kha MU in ei lo boycott. Paite hai chu KNP a inthawkin an suoka, kum 1949 khan PNC an indin. ST status an nawr ta a nih. 

Manipur chun Hmar haiin Mizo sawrkar an zawm tum chu dang an lo tum. Manipur Maharaja PB Singh chu January 1949 khan Assam Rifle sipai thuoiin Hmarbiel sir a tuma. February 2, 1949 khan Parbung a tlung. Khuo lal popovin an lo welcome. Chuong chun Manipur Maharaja PB Singh lutna taphawtah MU leader hai an lo tlansie peia. Aizawl a inthawkin Mizo Union General Secretary Pu HK Bawichhuaka, Pu Thanglera le Pu Sakawra hai chu inrangtakin Senvon an hung luta. Regional Council khawm ti sien hnawl dingin mipui hai an infui. PB singh chu February 4, 1949 khan Senvon a luta. Lampuia chun Hmar tlangval hai an lo zal sipa. Kea hung a nia. Fena ding lampuia tlangval zal hai chu sipai haiin an keitho peia. Hmatieng tlanin an lo zal nawk pei a nih. Senvon a chun MU hotuhai inbiekpui a tuma. Pu L. Tawna chun inkhawm hma metin mipui a lo meeting puia. Regional Council peng ka ti cheu a ti chun ieng sawrkar hnuoi am ting ei ta; Manipur a ti chun khuongpu in khuong vawithum vuong a ta. Intieng ei inlawisan vawng ding a nih tiin a rel pui ta a nih. An inbiekpui ta ngeia. Mizo sawrkar in zawm naw chun vawisun hin Regional Council ka pek nghal cheu ni raw seh a hei tia. A thu hril zing lai chun Mizo Union leader Pu L. Tawna chun zawna a siema. Regional Council chu ieng sawrkar hnuoi am ning a ta? a zuk tia. PB Singh chun Manipur sawrkar hnuoia um a tih, a tih. Khuongpu Pu Santen chun khuong vawithum a hei vuoka. Mipui hai an tindar ta a nih. Mizo leader hai chu man tumin a zawng tawla. Chuong chun Lungthulien khuo ah AR camp an nghat ta a nih. MU member tam tak chu union sazai an pek. Manipur ramri vaitan zawng ngawtin hei lam ei tih, an lo ti hlak leiin Hmar laia Mizo Union thuoitu hieng Pu L. Tawna, Lalsungkim, Tawia, Khuongsunlien, Thanga, Pu HV Tawnga, Pu Kunga, Pu Hmunthang Infimate, Pu Chala le Pu Sieka hai chu man an hung nia. A tamlem chu Imphal jail ah thun an nih. 

Kum 1952 a SRC sirsana Assam hnuoia district kha Lushai Hills District an tia. Chun Tuivai le Tuiruong in a mi thedan pangai bawkin an mi the ta a nih. Pu L. Tawna chun lungin a inthawkin an banna lekha a hung thawna. Beiseina popo chu an hmai mawkna in a hung inchang ta a nih. Amiruokchu, Lushai Hills chu Mizo Hills tiin kum 1954 khan an thlenga. MIzo Union leader Pu HK Bawichhuaka chu Secretary, MDC 1954-1962 dingin an ruot bawk. Kum 1965 a inthawka 1970 chen kha CEM an innitir a nih. Rosiama khawm Secretary, MDC dingin an ruota. Sienkhawm Manipur tienga Hmar hai lung a awi thei ta nawh.

Kum 1949 khan Lushai chu ST an ni tah. Kum 1950 khan Kuki hai ST an ni ta bawk. Kum 1952 khan Hmar chu Lushai sub-tribe ei la nih. Dulian tawng chu Mizo District Council thar a chun official language in an hung hmang khan Hmar thuoitu hai lung a hung na ta bek bek a nih. Mizo Union movement hlawsamna chu Hmar nina hrietna lungril lo thi ta hnung le Hmar tawng thi ta hnung sukhringna dinga tlawmngaina thar le thuoitu thar inpiengtirtu a hung ni ta lem.

Hmar Mongoloid Federation

Mizo Union a vul vanglai tak khan inhlemna um rawi pal a ti ti inlau leiin Pu Laltudai Roy (Harish Roy) le Pu Thangte Kuki haiin June 1, 1948 khan Hmarkhawlien ah meeting an lo neia. Dwarbond, Cachar ah Hmar Mongoloid Federation (HMF) office an indin. Cachar a tlangmi hai hamthatna ding an lo nawr ve tum. Pu L. Tawna in kum 1953 khan a join-a. Hmar district a demand-pui. Pu VL Ralsun le Pu Hrilrokhum Thiek hai khawma DC, Cachar fethlengin SRC 1953 kuoma Hmar District an lo demand ve. Amiruokchu Mizo Union leader le Mizo a inhnik mipui a tamlemin HMF hi an hlutsak nawh. Chuleiin party ang tak takin hma an lak thei nawh. Ieng tak tak thaw an nei hman nawh.

Hmar National Congress

Kum 1952 a Lushai Hills District chun Tuivai le Tuiruong a hung kan zo ta nawa. Ram hmangai ei ti pa Mizo Union leader Pu L. Tawna khawma lungin a inthawkin inbanna lekha a hung zieka. Mizo District Council hnuoia hai inzak an um hle ta a nih. Ruoi thena ina bu fa dinga fe ve si ngai pawimaw hlaw mang lova mi popo hmu hawia kawtkhar bula ngir zum duk laia bu le hme chang nawk ta lo hai inzak tuor le ngirhmun ang khat char Hmar in ei hung ngirpui ta a nih. Chuleiin Hmar mithiem hai lai ngaituona thar a hung pieng thei ta a nih. Pu Rochung Pudaite in kum 1953 khan India PM kuoma lekha a thawna. Sixth Schedule hnuoia Manipur, Lushai Hills le Cachar a Hmar delna popo khitkawpin Hmar Hills District a lo hni. 

Kum 1954 khan Lushai tawng chu Mizo District ah official language a hung nia. Hmar hai ST ei la ni bawk naw leiin sawrkar hriemhrei SRC 1954 hai kuoma memorandum petu ding Hmar lekhathiem an inzawng tan ta a nih. 

July 3, 1954 khan Parbung khuo ah inkhawm an rawta. Hmar National Congress (HNC) an indin. Chairman dingin Pu Rochunga Pudaite, President dingin Pu J. Lungawi an thlanga. Pu Thienga Nampui chu Secretary dingin an thlangtling. Pu Saia chu Treasurer in a thang. Pu J. lungawi a rawiin August 1954 khan SRC kuoma memorandum an peklut. Chu taka chun Hmar Hills District an hni. Lushai Hills, Cachar, Manipur le NC Hills a Hmar khuo hai khitkawp in rorelna khawl an lo demand a nih. ST status an hnisa bawk. 

HNU thuoitu pawimaw deu hai chu a hnuoia hin ei hung tarlang

1. Dolur, Pherzawl, Manipur

2. Hrangsing, Parbung, Hmarbiel

3. Suoka, Vaitin, Mozoram

4. Neia, Hmarkhawlien, Cachar

5. Khumthang, Thingpuikuol, Vangai

6. Rothuom, Cachar

7. Zathuoi, Ngurte, Churachandpur

8. Kawlvelthang, Saikot

9. Darlienthang, Boroarkap, NC Hills

10. Hrilrokhum Thiek

HNC Chairman Pu Rochung Pudaite chu Bible inchuk dingin Sapram tieng a pan ta leiin HNC chun sin an thaw mumal thei ta nawh. Chuong lai chun HNC chu siemtha nuom an hung suoka. Sukhrattu dingin Pu L. Tawna chu HNC Assembly ah HNC President dingin an thlang ta a nih. Pu L. Tawna thlawptu dingin Pu VL Bawia (Lungthulien) chu Secretary thar dingin an thlang. Treasurer dingin Pu LK Sata (Lungthulien) an thlang bawk. Amiruokchu, Pu L. Tawna in sawrkar sin a hung hmu khan a ngai bawkin HNC chu a mumalnaw zui ta pei a nih. Chuong chun Mizo Union movement tieng bawk sukhring nuomna a hung lien tiel tiel ta a nih. Pu Thanglora chu MU tienga thuoitu a hung ni ta pei a nih. 

Thuoitu hmasa hai zarin India sawrkarin kum 1956 khan Hmar hai chu ST list ah a mi ziektlar ta a nih. Kum 1956 khan NC Hills tieng politics ah hma ei hung sawn hle bawk. Pu CH Khotlang chu NCHAC ah CEM dingin thlangtling a hung nia. Pu CH Khotlang le Pu T. Nampui hai hmalakna zarin NC Hills ah Kuki and Hmar Defence Organisation khawm indin a nih. 

Cachar a Hmar hai hi kum 1956 a ST list a khan ziektlar an lo ni ve naw ti an hrietdawk charin kum 1957 khan Kumbha khuo mi Pu L. Thanthuom a rawiin Tribal Union an indina. Cachar a Hmar hai ta dingin ST status an demand ve ta a nih.

Hmar National Union

Politics tieng pawl pathum (Mizo Union, Hmar Mongoloid Federation le Hmar National Congress) a ei inthe hun kum 1958 lai chun Hmar laia business thawtha Pu Rokung Khawlum chun Senvon khuo a zu sira. Lekha sutna khawl typewriter a nei. HNC thuoitu Pu VL Bawia le Pu LK Sata haiin Pu Rokung chu an rawna. Hnam thuoitu mithiem zawng dingin rawtna an siem ta a nih. Lekha an suta, fielna an siem ta a nih. Mithiem tam tak an lo lo dawra. Hmar Political Conference nei dan ding an lo buoipui ta chur chur a nih.

Hmar Conference 1

A. Parbung ah 1st Hmar Political Conference an kova. September 20, 1958 khan an nei. Politics tienga ei hmalakdan ding an sopuia. Mipui ngaidan an lak.

Hmar Conference 2

B. 2nd Hmar Political Conference October 21, 1958 khan Lungthulien ah an kova. Chu taka chun political party thar indin an rem ti ta a nih.

Hmar Conference 3

C. 3rd Hmar Political Conference December 5, 1958 khan Senvon ah an kova. Hi taka hin Hmar National Union (HNU) an indin ta a nih. 

(HNU a "H" hi HMF a H a nih. HNU a "N" hi HNC a N a nih. HNU a "U" hi MU a U a nih)

Pu HK Khawlkung chu HNU President hmasatak dingin an thlanga. Amiruokchu, DM College ah Lecturer sin a hmu khan an ban. April 25, 1959 khan Parbung ah HNU Special Assembly an kova. Pu SK Hrangchal chu HNU President dingin an thlangtling. Pu VL Bawia chu HNU Secretary dingin an thlangtling bawk. Amiruokchu, Secretary sin chu Graduate zo char Pu Ruolneikhum Pakhuongte kuoma an hlan sawng ta lem a nih. 

Kum 1960 khan Pu Selkai Hrangchal a rawiin HNU chun Hmar District an hung nawr nawka. Amiruokchu, February 8, 1960 khan unau Kuki haiin Tamenglong biela Rawvazawl khuo an hung raw khan unau Kuki hai le ei hung buoi ta thut ela. Mizoram ah Hmar pathum an lo that khan Vangai laia 300 hai chu Zeikul ah an intawm ta a nih. Volunteer haiin an inhuolkhuma. Harsat beidawng tamtak an lo um. Thanlon SDO le Assam Rifle hai chu kea hung lawnin an hung sansuok ta a nih. Thla li laizet buoi hnungin KNA le HNU in inremna an siem. 

Kum 1960 a Kuki-Hmar Indo leia khuo ei lo rausan ta hai

MANIPUR

1. Suongsang

2. Zote

3. Vanchengphai

4. Phaiphenzawl

5. Doiheng

6. Daiderhmun

7. Avangthana

8  Ralienphai

9. Vangai phaipui

10. Rawvazawl

11. Ralsunzawl

12. Tuisenphai

ASSAM

1. Khawhmunlien

2. Tuikuol

3. Lungdai

4. Thenzo

5. Thingkap

6. Kherseutlang

7. Ramthalai

HNU President Pu SK Hrangchal chun Hmar District hmu theina ding a ni phawt chun tiin kum 1963 khan MLA a lo ngira. A tling nawh. Mipui ngaidan a lo ni naw leiin HNU President a nina thleng nuom an hung um ta a nih. November 14, 1963 khan Parbung Assembly ah MU thuoitu Pu Thanglor chu HNU President dingin thlang a hung nih. Ama khawm hin Hmar district a nawrkuo thei chuong naw leiin HNU chu a maksan. 

April 23, 1966 khan Lungthulien ah HNU General Assembly nei a nih. Chu taka chun Pu Ngurdinglien Sanate chu HNU President dingin thlangtling a nih. Kum 1968 khan Pu Ngurdinglien le TK Buongpui haiin sawrkar kuoma Hmar Autonomous District hnina memorandum an lo pek nawk. Mipui an phur em em a nih. Village Volunteers Force (VVF) hai chu HNU armed wing ang elin an hung um ta a nih. District Demand Day hai hmangin lam an lo hraw hlak. Manipur Assembly ah MLA nei lem chun Hmar District kha hmu nghal el ding angin HNU thuoitu hai khan mipui an lo hrila. MLA nei phawt chun Autonomous District chu mansapuia paisa angin an lo hril bawk. Education a lan hnuoia. Thil chinchang le Sixth Schedule hmu dan le nawrdan kawng lampui hrie kha an lo um mang nawh. Chu leiin MLA tling hai chauvin Hmar District an nawrdawk thei ti kha mipui lai a awitu an tamlem ta a nih. Chuleiin MLA nei chu thuoitu le mipui hai thil tum tak a hung ni tung ta pei a nih. April 15, 1968 a HNU President Pu Ngurdinglien le General Rolly hai Senvon ah Helicopter in an hung tum lem khan chu Hmar ADC hmusa angin mipui chun an lo ngai ta a nih. 

HNU President Pu Ngurdinglien chu Tipaimukh MLA a hung tling ta ngeia. HNU le Manipur Minister ni zinga mipui a hang thuoi chun sawrkar mi nizinga Hmar District thua sawrkar hang nawr rak kha a lo remchang nawzie a hung hrietdawk thei chau a nih. A beisei ang khan ADC a nawrdawk thei ta nawh. Mipui chu an hung re tiel tiel tan ta a nih. Chuong chun HNU President hai chun Hmar District nawrdawk nekin MLA tling an hung tum ta pei a nih. Chun Tipaimukh MLA hai popovin sum le pai le development an hung khel lem tah. Amiruokchu, HNU in a thil tum bawzuitu ding hriemhrei tha a nei naw leiin HNU Presidenship chu Tipaimukh MLA tling theina leilak anga hmangtu an hung um ta a nih. Chu chu Manipur a Hmar politics fe suolna bulpui a nih. 

HNU politics a ning intel beidawng thenkhat haiin kum 1977 lai khan Mizo Integration Council (MIC) an hnawta. Manipur a Hmar biel le Vangai chu Mizo sawrkar ah nawrlut an lo tum ve. Manipur territorial integrity humhal tumtu an hung so rak khan zawng tuor ai ngauvin a tuor ti ang kha ei hung ni ve ta a nih. Eini kara buoina a suoka. Chu khawvel chu kum 1985 a inthawka 2006 chen khan ei lo pal a nih. Mipui an suk beidawng em em a nih.

Hmar People's Federation

Hmar identity tuoithar nawk tum mithiem an hung suok nawka. Kum 1977 khan Rengkai ah Hmar People's Federation (HPF) an indin. Pu Lalbieklien Sungte chu President in an thlanga, Harvy Darsiemlien chu VP a nih. Pu Lalkhawthang Infimate chu Secretary dingin an thlang. EFCI le ICI hai area of operation thubuoi an lo chei meta. Hmar arts and Cultural society khawm an lo indin. HSA le inlaichinna tha takin kum sawttak el an lo nei a nih. AIR, Imphal ah Hmar programme an ngena. Amiruokchu, Pu Lalkhawthang chun Loktak Project ah sin a hmua. Dr HM Songate chu World Vision ah a luta. Dr Rosiem Pudaite College ah a luta. Pu Louis Keivom khawm Doordarshan ah a lut tah. 

Kum 1981 khan HPF chu sukhring nawk tumin thenkhatin hma an laka. HPF a F chu C in an thlenga. Hmar People's Congress (HPC) an hung ti ta a nih. HNU President hlui Pu SK Hrangchal in a hung indin thar nawka. Amiruokchu, Hmar District le khawtlang development tiengpang nekin Tipaimukh MLA an sopui ta lem leiin HPC chun muol a mi liemsan nawk tah. 

HNU politics a ning intel beidawng le Hmar identity a tui pawllo Mizoram tienga ei unau haiin kum 1986 a inthawk khan Mizoram sunga an hamthatna ding an zawng ta lem a nih. Kum 1991 a HPC le Mizoram sawrkar an inbiekna Peace talks a khan Peace Committee tieng Prof Lal Dena (Manipur), Pu Bieka Sungte (Manipur) hai baka Pu LK Neitham (Cachar) le Pu J. Ramthang (NC Hills) hai an thangve. An ni hai zarin kum 1994 khan HPC Accord ei hung sign thei chau a nih. State boundary in mi the sienkhawm Hmarram lampuiah tangkaina ei nei tawl seng a nih.

Kum 1960-1986 khan Assam tienga Hmar haiin HNU-Assam sirsanin a hranin sawrkar ah Hmar district le ST status an lo nawr ve tum hlak. Kum 1986 a inthawk khan Cachar a Hmar hai hamthatna ding an hung sopui ve ta a nih. Chu chu CHPF in a hung sunzawm peia. Kum 1996 khan BVHTDC indin a nih. NC Hills a Hmar hai khawma kum 1990 a inthawk khan Hmar People's Union (HPU) an indina. NCHAC hnuoia cheng Hmar hai hamthatna ding an zawng lem tah. Tuhin HPC-D Assam Region in Cachar le NC Hills, etc khitkawpa Assam a Hmar hai chanthatna ding a buoipui zing. 

Manipur a Hmar Hills District chu theitawpa rawl insuoa ko ve dingin hun dang danga mi tlawmngai ei inbuotsai hlak. Amiruokchu, February 13-14, 1997 khan HNU chun Hmarram ko ta lovin MLA politics tieng a kir nawk. MLA nina sirsanin Hmar District hmu ei tum nawk tah. 

HAADDCo

"TUIVAI IN MI RINKUOL SIEN KHAWM" ti le "IMPHAL AH HUNG UNLA SUKFEL NGHAL EI TIH" ti ringlo haiin March 7, 1997 khan Hmar Area Autonomous District Demand Committee (HAADDCo) an indina. Manipur a Hmar delna popo khitkawp theitu Hmar District an hung demand ta a nih. Pu Sailienkhup Pudaite le Pu Zuola Shunate haiin Manipur sawrkar kuoma memorandum an lo peklut tah. An file khawm ab barin a lo um ta hmel!

Kum 2016 khan Thanlon le Tipaimukh biel khitkawpin Pherzawl District a pieng. Amiruokchu, mipui hmanga Hmar ADC nawr dan ding lampui ei la hmu chuong nawh. Chuleiin HNU Assam (1960), HA (1983), HPC (1986), HPU (1990), CHPF (1991), HPC-D (1997), HAADCo (1997), etc hai kha an hung pieng a nih. 

-Lakhawmtu

Dada le Jojo Pa

27.7.2020

HMAR KOHRAN HISTORY (1910-1972)

Thuhmathuoi

Mizoram a ringtu hmasatak pahni hai kha Khuma le Khara an nih. Khuma kha Hmar a nih. Khara kha Ralte a nih. June 25, 1899 khan an piengthar veve a. Khuma hin a thi chenin Chanchintha a hril. Khara ruok chu a hnungkir nawk. Aizawl a Welsh Mission hai hin kum 1910 hma khan Manipur simthlang Hmarbiel an lo invawi nawh.

Kum 1894 khan American Baptist Mission haiin Imphal ah school an va hawnga. 1896 lai dai khan Ukhrul a Tangkhul Naga lai Baptist missionary William Petigrew chu sin an lo van thawtir tah. Ukhrul LP School a kai Thangneilal Ngurte chu Kristien ah laklut a nih. Amiruokchu, Baptist Mission hin Manipur simthlang tienga ringnawtu Hmar hai an lo uksak chuong nawh.

Pu Watkin Roberts char khan Manipur simthlang Hmarbiel a ringnawtu Hmar hai kha a lo hmangai a nih.

TKPM (1910-1919)

Kum 1910 khan Aizawl ah Welsh Prebyterian Mission chawmna hmuve phak Lalpau Vaiphei le Thangkai Vaiphei an uma. Chuong hai pahni chun January 31 khan Pu Watkin Roberts chu Senvon, Manipur tieng an thuoia. Vervek khuo, Mizoram a inthawk Parvachom, Manipur an lut phawta. Chu zova Hmunte (Senvon) ah February 5, 1910 khan an lutpui. Inrinni sun a nia. Watkin Roberts in Senvon lal Kamkholun an hmupui nghal. Lal hin a lo lawm hle. Sandamna Thu hril dingin a lo fiel nghala. School a hni bawk. Missionary hai hi Kawnzar a Pu Hrangthang pa inah an riek. A zing kha Pathienni a nia. Pu Tlangval hin khawlaidung ah Pathien Thu hrilna a nei ta a nih. 

Tirko pathum

Pu Tlangval le a rawi hai hi Aizawl tieng an kirnawk. An kir tieng chun Patpuihmun an sir malama. Sartuinek tieng fe kuolin Vervek khuo (Hnawka khuo/Biete khuo/Lal Hnawk Biete inlalna) an luta. Hi taka hin Thangkai le Lalpau hai an piengthar ta a nih. Manipur simthlanga ringtu hmasatak an hung nih. Hlim takin Aizawl an pan ta a nih.

Aizawl a Welsh Mission chun May 1910 khan a hnuoia tirko pathum hai khu Senvon ah an tirlut ta a nih.

1. Thangchhinpuia Chhangte (Phullen khuo)

2. Vanzika le 

3. Savawma

Suongpuilawn, Mizoram tieng hrawin May 7, 1910 inrinni zantieng khan Senvon an tlung. Senvon lal Kamkholun an inhmupuia. Ama chun Aizawl kir nawk nghal dingin a lo hril tawla. Anachu tirko pathum hai hi an kir nuom nawh. Pu Tlangval sin sunzawm dinga lut an ni thu an hril ta lem a nih. 

Kristien hmasa panga

Tirko pathum hai rawngbawlna zarin a hnuoia mi panga hai khu simthlang Hmarbiela Kristian hmasatak an hung nih

1. Kaithang le 

2. Thangneirum

Chu zova a hnuoia hai khu Kristien an hung nih.

3. Thangngur Joute (Senvon)

4. Chawnga Pudaite (Phulpui) le 

5. Taisena  

Kristien hmasa haiin Pathien Thu an hril dan chu simple deu a nih: Isu hi lo ring ve ta ro. In hming ziek ei tiu. Isu hi hnam dang Pathien an nawh. Sap hai Pathien an nawh. Pathien ei hriet naw hi a nih. Thangngur khawma Sandamtu hi ka hriet hma chun mi dang Pathien ka lo sawna. A chanchintha ka hang tiem chun ka pa kan hmangsan kha a nih, a ti hiel a nih.

Mautam 1910-11

Mautam lai khan Pu Tlangval chun Silchar a Vai Mahajon pakhat Mon Kumar Guha bufai a lo bata. Quintal tam tak Tuiruong dunga lawngin tawlin Hmarbiel ah an lo tawllut. 

Pu Roberts a thil thaw an hmu chun Sandamtu nau ni ve nuom an pung deu deuva. Pu HK Dohnuna rawiin Tripura, Burma le Bangladesh chen Pathien Sandamna Chanchintha an lo khekpui thei ta a nih.

Kum 1911 Mautam lei khan Mission thuoitu tamtak Tuithaphai ah an inpem. Parbung, Pherzawl, Leisen, Phuoibuong, Khawlien le Chiepui a inthawk mi tamtak an kaitung bawk. An pemlut lai hin Vunga, Taite, Dengrum le Luoia khawm an thang.

School

Mautam leiin Senvon lai fak zawng a hung harsa ta leiin school hmasatak Khawpuibung ah 1912 khan an indina. Vunga in a enkawl. Naupang pasari an lo chawm. Thangvang, Damsuok, Pausum hai khawm an thang. Kohran a hung inthanglien duok duok ta a nih. 

Kum 1912 khan Ukhrul a inthawkin Baptist Mission thuoitu Rev William Pettigrew in Senvon le Parbung a sira. Mizoram Welsh Mission tirko tirlut a um Taisena, Dengruma le Savawma an inhmupuia. Baptist kohran a lut dingin a fiel tawl. An hlaw khawm tuta an hlaw nekin an sanglem ding ti chen a lo hril. An zawm nawh. Chuleiin Pettigrew chu Ukhrul a kir nawk. An kirtieng Baptist thuoitu hai hin Pherzawl le Suongsang khuo an zuk sir malam.

Presbytery

Pu Tlangval chu kum 1912 khan Calcutta tieng a kira. R Dala a thuoive. Anachu Senvon a tirko pathum hai chu a chawm zing. Hieng hun laia tirko hai thlakhat hlaw chu Rs 3 chau a nih. 

Kum 1913 khan Pu Tlangval chun Senvon a mission chu TKPM (Thadou Kuki Pioneer Mission) a hung tia. Mizoram a kohran upa sawmpasari laia pakhat R. Dala (Ralzadala Khiengte) chu Chanchintha phurluttu ni ve dingin Senvon ah a tirlut ta a nih.

December 26, 1914 khan Senvon ah TPKM Prebytery hmasatak chu nei a nih. Pu Tlangval khawm a thang vea. Presbytery Chairman R. Dala chu pastor in an ordain nghala. Prebytery Secretary dingin Taisena an ruot. 

Biel bik neilovin mission thawktu haiin biel an fang hlaka. Bielfang programme thlaruk bek an nei hlak. Tirko ni nuom phawtin Pastor kuoma hnina an peka. Biel mipui tawng an thiem tum seng. 

Kum 1914 khan ringtu 1000 ei tling tah 

An lar bik deu hai zuk tarlang ei tih.

1. Dengruma, Hmunte, Senvon ah

2. Savawma, Senvonah 

3. Luoia, Parbung ah

4. Thuoma, Suongsang ah 

5. Lungpau, Maite ah

6. Thuamlun, Pherzawl ah

7. Thangchhingpuia, Khawpuibung ah 

8. Taite, Leisen ah 

9. Khuma, Tuisen ah 

10. Tawna, Khawbung ah.

Kum 1918 khan NEIGM in Senvon ah school an din vea. Chu chu Thangngur in a enkawl. R. Dala aiawtu NEIGM Superintendent Pu HK Dohnuna chu Tripura ramthim ah tirlut a nih.

NEIGM 1919-1930

Mission an zau khan NEIGM a pienga. Mission ah revival nasatakin a tlung. Hi harna lei hin mi 1018 zetin baptisma an chang pha a. Kum 1919 khan Hmar Bubul siem a nih. 

Amiruokchu, Mizorama a missionary chanpui Welsh Presbyterian Mission hai bawkin Pu Watkin Roberts chu thuneitu hai kuoma an lo heka. Bawrsapin Pu Tlangval chu Mizoram a inthawk a hnawtdawk ta a nih. Senvon khuo, Manipur a khawm an inluttir nuom ta nawh. 

Tinsuong

Kum 1920 khan NEIGM HQ chu Senvon a inthawkin Tinsuong ah sawn a nih. Pu Tlangval a rawi R. Dala, Taisena le Lienkeuvung hai khawm Tinsuong tieng an insawn ve. 

Mission (Hmarkhawlien)

Pu Tlangval a fielna chu pawmin kum 1920 khan Edwin Rowlands in NEIGM a hung join vea. Lakhipur ah Field Secretary sin a hung chel. Mission, Thingtinkim ah umin Meihawlkai, Saisel, Kuokluong, etc a lo sir hlak. Hieng hun lai hin Welsh missionary FJ Sandy zarin Marka ziek chu Hmar tawngin inlet a nih.

Manipur ah an hung buoi khan NEIGM in Hmarkhawlien, Lakhipur, Cachar ah ram an chawka. Cachar Land and Loan Corporation hai chu kumtin Rs 4 thung dingin June 21, 1921 khan an lo inrempui ta a nih. Hmarkhawlien a Mission Compound (Tuta WMCEI Biekin Compound hmun) hi kum 1922 a inthawka 1930 chen NEIGHM HQ in an lo hmang. Kum 1960 hma po kha Hmarkhawlien hi "Mission" annawle "Lakhipur" an lo ti hlak. 

Jakradhawr

Kum 1922 January 12 khan NEIGM Inkhawmpui Presbytery Vawikuo-na chu Tuiruongdung Jakradawr khuo ah nei a nih. Field Secretary Edwin Rolland le Pu Tlangval hai khawm Jakradawr ah an kaitunga. Mipuiin Saphai an lo tuokna hla chu: "Aw sualthim lungngaihthlak tak hian, chhumpui zing angin min tual" ti hla kha a nih.

Leisen khuo, Parbung le Parvachom khuo haiin hlapawl tha deu deu el an present. Leisen hlapawl sak chu: Khitah vanho thianghlimte nen hla i sa ho vang ti a nih. Leisen nunghak 40 lai zet an thang. Pu Hranglien Songate in a thuoi tawl. Parbung hlapawl chu: Isua kan lalber a ni, tiin hnam tin hril raw u a nih. Parvachom hlapawl chu: Khawvel zawng zawng zaia khat e ti a nih. Tripura Sakhan tlangdunga nunghak hlasak thiem Nk Kami chu an sawr em em. 

Pastor R. Dala khawm Tinsuong a inthawkin Jakradhawr a hung vea. Anachu nga a hme suola. Tuihri leiin Tupidawr ah a thi. Edwin Rowlands chu R. Dala vuitu in a thang ta a nih. Tirko Thilthawhai 5:18-2 hmangin ringtu hai lai infuina thu a hril. 

Kum 1922 a NEIGM Inkhawmpui khan HK Dohnuna chu Field Superintendent dingin ruot a nih. Lalthankhum Sellate (Taisena) chu pastor a ruot a nih. Lunglei mi Pastor Rohmingliana chu Manipur biel an inenkaitira. Tinsuong sub headquarters ah an tirlut. Tinsuong a hin school khawm a um. Exam centre khawm an siesa. Dispensary khawm a um. Lunglei mi tho Lianhmingthanga chu Tripura ah Field Superintendent in an tirlut. H. Dala chu Field Superintendent dingin Chittagong ah an tirlut ve a nih.  

HK Dohnuna

NEIGM Field Secretary Edwin Rowlands chu Burma tieng a fe ta leiin Pu HK Dohnuna chu NEIGM Field Secretary a hmang a nih. Khawbung khuo suok Aizawl a business thiem a nia. Tripura Tlangsang ah missionary dingin a luta. Jampui ah sin a zu thaw tha leiin Pu Tlangval chun hmang tangkai a hung tum ta a nih.

A hnuoia ziektlara um hai khun Hmarkhawlien, Lakhipur ah Pu HK Dohnuna thuoi NEIGM Evangelist Department an lo chel ve

1. Pastor Kambuong

2. Pastor Khuma

3. Pathuama

4. Taitea

5. Pastor Tlurpu 

6. Sumro

Lera , Nghalruala le Rova hai khawm Hmarkhawlien ah an lut ve.

Kum 1924 khan NEIGM in Tinsuong ah presbytery a kova. Rohmingliana, Lalnghinglova, Khuma le Lungpau Vaiphei hai chu pastor a namdet an nih. Hi kum hin NEIGM chun Biekin 66, Member 7160, Faitham Rs 508 le Ramlienna Rs 4540 a nei tah.

Manipur ah NEIGM in kohran a nei rawn taka. Thawlawm ruok chu Tripura bielin an khawn rawn tak. Tripura bielin thawlawm Rs 1603 a sung khan Manipur biel thawlawm chu Rs 567 chau a nih. NEIGM Field Secretary Pu Dohnuna in thlatin Rs 125 a hlawa. Chu chu khang laia SDO hlawzat a nih. A hnuoia thawktu Field Superintendent in Rs 45 a hlaw phak. Tinsuong a ME School Headmaster in Rs 30 a hlawa. Compounder in Rs 20 a hlaw. Tirko ruok chun Rs 10 chau a hmu. 

Kum khata worker budget chu Rs 56,105 dam a kai phak. Lamdawk kha a la tlawma. Chuleiin Mission Field inthanglienna ding sum le pai zawng dingin kum 1924 khan Pu Tlangval chu saprama an zin ta a nih. 

NEIGM chun kum 1926 khan Kristien Hlabu a siema. An hmang tangkai hle.

Bible College

Kum 1928 khan Mukam kawla Bimu Tlang, Hmarkhawlien ah Dinwiddie Bible Training Institute indin a nih. Principal hmasatak chu Paul Rostad a nih. A nuhmei Ella Rostad khawm zirtirtu in a thang. Lushai tawngin Rostad hai lecture chu Lianhawla in an leta. School naupang 22 an nih. Chawnga Pudaite, Chungzalien Gangte, Zamkai Vaiphei le Thangvel Hmar hai khawm an thang. 1930 khan Manipur ah sawnkai a nih. English in lecture an thaw tah. 1932 khan an graduate tawl. Pathien rama hmang an nih. 

Hmar tawng

HK Dohnuna in Field Secretary sin a chel kha Lunglei tienga kohran thuoitu Lushai tawng hmang Manipur a hung lut hai khan an fak thei der nawh. Dohnuna khan Hmar tawng a lo ngaina a. Hmar hla sak a hung uor ta a nih. Lushai Hills a hotu hai mit a sukkham hle a nih. Mani biel sunga hnam hai tawng thiem tum nekin tirko haiin an tawng an hung uor ta lem kha HK Dohnuna hin a theida hle a nih. Chuleiin 1927 a Senvon Inkhawmpui tum khan Hmar tawng uor em em Pu HK Dohnuna chu peithlak an tum ta a nih. Nuhmei-pasal inneitirna thua hrilchier ding an hung zawng tana. A tawpa Pu HK Dohnuna chu Police case an inawrtir ta a nih. Sum thua inringhlelna thu le a hung inmat ta pei khan NEIGM sunga inhrietthiemnawna a suok tan ta a nih. 

Watkin R. Roberts

Pu Tlangval chun Hmarkhawlien ah tanin Tuiruongdung popo rengthei le serthlum bila suksip a tuma. Rengthei chi, serthlum le ziza an ching tira. An fakzawngna hmangruo dingin a lo hril tawl. Tuivai dung, tuiruong dung le tuibum dunga hai hin thingat ding le thingal ding a tam ema. Ruo khawm a tam. Lekhapuon siemna dinga hmang thei an nih. Taiting a tama. Thrungna, dawkan, chair le table siem theina a nih. Kohran intodela mani kea ngir theina sumhnar a lo zawng pui a nih. Sumdawng dan ding ngaituoin sai dam a lo inchawk puia. Fruit factory le thing atna khawm sawmill lien khawm tuta Hmarkhawlien a Douglas Hostel (DMCH) hai ram a hin a lo inthrut tum a nih. Hmarkhawlien Mukam tlang Bimu tilla ah printing press sie a tum leiin HL Sela le mi dang pathum printing training dingin Calcutta tieng a lo tir. Pu Thanglung khawm Silchar ah a lo chawm a nih. Mission chu an thang hrat khawp ela.

HH Coleman

HK Dohnuna hnuoia NEIGM inthanglien bek bek hi Lushai Hills a Lushai tawng hmang hai mit sukkhamtu a nih. America tieng lekha an lo thawna. Kum 1928 a inthawk khan Pu Tlangval chu sapram tienga haiin an hung ringhlel ta a nih. Sum hmangna chu charter accountant audited financial statement naw chu an hung pawm pek ta nawh. 

NEIGM kohran a hung hrat tan char khan NEIGM General Secretary H. Coleman in NEIGM Field Director Pu Tlangval chu sum thuah a hung ringhlel ta nghala. Watkin Roberts chu sum chingpentu angin hekin a hung um ta a nih. 

Kum 1928-1929 khan NEIGM thuoitu lien haiin Calcutta, Tripura, Lakhipur, Tipaimukh, Senvon, Lungthulien, Parbung, Tinsuong, Pherzawl le Tuisuolien an hung sira. Enquiry an hung thaw ta a nih. Pu Tlangval in NEIGM sum indiklo takin a hmang tiin khawlai dunga an sopuia. Kohran Census report an diknawzie an suklangsa bawk. Aizawl a inthawkin 300 mile a lawn hlak a ti khawm an dik nawh tiin an Pu Tlangval hming chu an suksiet ta pei a nih. Kohran ngaisak lovin Calcutta ah a um rawn lem an ti bawk. 

Paul Rostad

Hienga NEIGM sunga inhrietthiemnawna a tlung lai hin Pu Tlangval a tienga thang chu 4892 an nih. Cachar a 500 haiin Pu Tlangval an support ve. NEIGM General Secretary HH Coleman a tienga thang chu 4420 chau an nih. Khang lai khan Manipur American Baptist Mission kohran khawm 10,000 neka tam an ni tah. NEIGM member 9312 nekin an tam met chau a nih. 

NEIGM inthe lai hin thawktu Mission thawktu 65 an um. Hmar 16 an nih. HH Coleman in Hmar mi 10/16 hai chu HK Dohnuna tienga kawp an nih, a lo tih. Coleman hin Pu Tlangval tienga kawp anga a ringhlel HK Dohnuna chu sawrkar ah a hek ta a nih. May 30, 1929 khan Pu Tlangval chu an hung bana. A aiin Paul Rostad an hung sie ta a nih. 

NEIGM biel sunga khuo 132 a kohran thuoitu le thawktu khawm an inthe vea. Sum hnar kawltu NEIGM General Secretary HH Coleman tienga lut an tam lem. Manipur sawrkarin Coleman a hung tana. Calcutta a Pu Tlangval a bank account an char pek ta a nih. Coleman in NEIGM chu a changa. Old Churachandpur HQ in a hmang ta pei a nih.

IBPM, Hmarkhawlien, 1930

NEIGM thuoitu HH Coleman in Lakhipur le Manipur a hung sir khan Pu HK Dohnuna hin a lo mikhuola. Pherzawl chen a hang zuive a nih. Amiruokchu, Pu Tlangval a tienga thang HK Dohnuna le a rawihai bei a dawng hman. Anachu ringumtakin Pu Tlangval an zui. Chu zar chun ei la hung ngirsuok a nih. 

NEIGM hnuoia Pu Tlangval tantu Cachar a um haiin April 4, 1930 khan IBPM (Indo Burma Pioneer Mission) an indina. Lakhipur hi HQ in an lo hmang. Chuong chun IBPM hmingin rawng an bawla. Amiruokchu, NEIGM zawm lova pawl dang zawmtu hai chunga action la dingin NEIGM thuoitu Coleman chun sawrkar a hrila. Hril ding inzen an zawng char chara. A tawpa Pu HK Dohnuna chu man a nih. Pathienin a thuoisuok nawk.

Kum 1931 khan HK Dohnuna chun van tieng a min lawisana. A naupa HK Thanglura in IBPM Field Secretary sin a sunzawm ta a nih. Sum harsatna leiin IBPM Field le Mission Compound chu Welsh Mission hai kuoma a lo zawrthlawng tuma. 

Sienkhawm Cachar tienga IBPM chu a hnuoia ei tarlang hai zarin a hung daksuok thei ta a nih

1. HK Bawichhuaka

2. Pastor Tlurpa

3. Pastor Kambuong

4. Tirko Sunro

5. Tirko Zonu

6. Zirtirtu Thanglung

7. Zirtirtu Thanga

8. Zirtirtu Thawma

9. LMP RK Khuala

Lakhipur IBPM Superintendent dingin Dr Thanglung ruot a nih. IBPM Coordinator dingin Rev Chawnga ruot a ni bawk. 

Independent Church, Senvon, 1930

Manipur a Pu Tlangval a tantu le mania inenkawl tum Pastor Lalnghinglova le a rawi hai chun October 24, 1930 khan Pherzawl khuo ah inkhawmpui an neia. Senvon chu HQ dingin an rem tih. Chuong chun IBPM an inti thei hma po chu Independent Church hmingin rawng an bawl ta a nih. Amiruokchu, an nuom ang anga Pathien an biek ding le biekin an bawl ding chu khap tlat a nih. 

Kum 1930 laia lusa pawl pasari Pu Tlangval le HK Dohnuna tienga thang Khothlang hai hming zuk tarlang ei tih.

1. Taisena (Senvon)-Mizoram a pieng. A ma hi Independent Church leader a nih.

2. Chawnga (Senvon)

3. Thangngur (Tinsuong)-Mizoram a pieng

4. Thanglera (Rovakot)-Mizoram a pieng

5. Lienrum (Suongsang)

6. Rova (Tuisuolien)

7. Vaka (Rovakot)

Sum harsatna leiin Independent Church President Pastor Lalnghinglova le Vice President Chawnga hai khawm NEIGM tieng an lut nawka. Amiruokchu, kum 1940 khan Pastor Taisena le Pastor Thangngur haiin Independent Church kohran chu an la keihring tawk tawk a nih. Kohran mi le sa 5000 bawr an ni tah. Sawrkar titna leiin Pastor Taisen chu Manipur a inthawk Lakhipur tieng a tlanhmanga, lut nawk dan ngaituoin Assam sawrkar chu a bel ta char char a nih. 

Kum 1942 khan Parbung khuo ah Independent Church Presbytery nei a nia. Hi tum hin Pu Rochunga Pudaite, Executive Director, IBPM chu Independent Church Constitution ziektu dingin ruot a nih. 

Pastor Lianhmingthanga 1943

Kum 1943 khan Independent Church Kohran Constitution chu Pherzawl Inkhawmpuiin a a lo pawma.  Amiruokchu, Constitution a chun IBPM an zepsa nawh. 

A hnuoia hai khu Independent Church thuoitu thar hai an nih:

1. President: HK Bawichhuaka, Lakhipur, Cachar

2. Vice President: Pastor Taisena, Manipur

3. Manipur Field Superintendent Pastor Thangngur 

Amiruokchu, Pastor Lianhmingthanga, Tripura a IPBM Field Superintendent nilai chu Lakhipur a hung suoka. Independent Church le IBPM sungah buoina a hung siem ta a nih. IBPM le Independent Church Pawl an hung inti tana. Thuneina inchu, hotu ni nuom, buoina siemtu, pawisa sukbuoi, mani ta ding chauva tanghma siel le inhrilsietna chi tum tumin an inhek tuoa. Chuong chun HK Bawichhuaka le Lianhmingthanga pawl an hung um ta a nih. Pu Tlangval a kuoma an lo inlawttuo char char. Pu Tlangval a lu an sukhai hle. 

Kum 1943 khan IBPM le Independent Church thuoitu Pu HK Bawichhuaka chu Indian National Congress tienga thang ve anga ringhlel a hung nia. Sap haiin Police an inmantira. Jorhat jail ah an khum. Chuong lai chun Pu Rochung Pudaite chu Jorhat ah a kaia. Kartin a lo va sir hlak.

December 23, 1943 khan Independent Church Field Superintendent Pastor Thangngur chun van tieng a min lawi sana. A aiin Pastor H. Daia thlang a nih. Pu Daia hi Pastor Lianhmingthanga ditlo pawl a nih.

Indopui pahnina a suok leiin NEIGM HQ chu kum 1944 khan Patpuihmun ah sawn a hung nia. Mission sunga buoina a la re chuong nawh. Pu Tlangval chun kohran thuoitu Dr RZ Khuma chu Pastor Lianhmingthanga in hmupui dingin an hriettir a. Pastor Lianhmimgthanga chun Pastor Taisena le Pu Zorum hai chu a hung ban ta a nih. Buoina chu a hung sosang ta pei a nih. Pu Tlangval chun Pastor Lianhmingthanga (IBPM Field Secretary) le Taisena (Asstt President, Independent Church) hai chu inrem vat dingin a zuk hril nawka. Pu Lianhmingthanga chun Taisena chu Joint Director ni dingin a va fiel bawk. Pastor Taisena chun a lo nuom ta nawh. Pastor Taisena chu a hung changpar lem angin a um ta a nih. 

Pastor Taisena 1945

IBPM le Independent Church Kohran mawphurna popo chu Taisena kuta inhlan nuomtu an hung pung ta peia. Kum 1945 khan Pastor Lianhmingthanga chu lo chawl el ta dingin Pu Tlangval in a hung inhriettira. Tripura biela IBPM khawm New Zealand Baptist Mission kutah inhlan a nih. NEIGM khawma 1943 khan an lo inhlan der tah. 

Thuthlung Thar 1946

Chuonga buoi lai zing chun kum 1946 khan Thuthlung thar ei nei ve tah.

Kailam

Kum 1947 Senvon Presbytery chun Independent Church biel chu biel thumin a siema. Chuong hai chu

1. Kailam chung Presbytery (Pastor Khaivung)

2. Kailam hnuoi Presbytery (Pastor H. Daia)

3. Vangai Presbytery (Pastor Laldo)

1948 a Independent Church thuoitu hai chu a hnuoia hin ei tarlang

1. Kailam Chungah (S. Rala, Asstt Field Superintendent)

2. Kailam hnuoiah (Rev H. Daia, Field Superintendent)

3. Vangai ah (Pastor Kunga, Asstt Field Superintendent)

Manipur Independent Church Full Liberation Jubilee Programme 1950

Kum 1947 khan independence ei hmua. Chuong chun Independent Church thuoitu Pastor Taisena chu India sawrkarin an suo zalen ta a nih. Chuong chun Independent Church khawm British sawrkar khuopna a inthawkin a zalen pumhlum ta a nih. Manipur Independent Church Full Liberation Jubilee Programme chu February 10, 1950 khan Senvon ah hmang a nih. Pastor Taisena le Pastor H. Daia inrawina hnuoiah hlawtling taka hmang a nih.

Kum 1950 khan IBPM le Independent Church mission thawktu popo 50 an tling tah. Kohran Census ah member 9538 an zieklut. School 18 ei nei tah. Kailam hnuoiah thawktu 18 an uma. Kohran Census chu 3223 a nih. Burma ah thawktu 4. Kohran Census 2976. Vangai ah thawktu 10. Kohran Census 1340. Kailam chungah thawktu 10. Kohran Census 1217. Cachar ah thawktu 7. Kohran Census 682. Tamenglong ah thawktu 1. Kohran Census 200. 

EAC 1953

Kum 1947 hma po kha NEIGM hin presbytery pakhat cho a lo nei hlaka. Lushai tawng an hmanga. Bible tiem le rorelna khawm Lushai tawng tho an lo hmang hlak a nih. 

Amiruokchu, hnam tinin mani tawnga Bible tiem, hlabu le sande sikul inchuklai nei le school lekhabu mani tawng ngeia nei an hung tum khan Lushai tawng chu a hung inlar thei ta naw a nih. Lungthulien Presbytey 1948 chun NEIGM kohran chu prebytery panga in a hung the ta a nih. Mani hmazawn senga rawng an hung bawl thei ta a nih.

1. Simsak-Vuite-Guite Biel (Chairman Gokhawlian). 

2. Hmarsak (Pastor KS Luoia le Dr Thanglung). Lushai tawng hmang povin Tuithaphai Presbytery an indin tuma. Mizoram a Welsh Presbyterian an zawm tah. 

3. Simthlang (Pastor Kunga)

4. Hmarthlang (Pastor Lungpau Vaiphei)

5. Vangai (Pastor H. Chawnga)

1953 khan NEIGM chun hieng hin an hung inti ve tah

1  Hmar-EAC (Assembly)

2. Paite-ECC (Convention)

3  Vaiphei-EOC (Organisation)

4. Kuki-KCA (Association)

5. Gangte-ESC (Synod)

A chunga pawl hai khin an ni tawng sengin inkhawmna le rorelna an nei ta a nih. Amiruokchu, kumtin inkhawmpuilien vawikhat Leaders' Conference an nei hlak. Chu chu inpumkhatna hriemhrei angin an hung nei tung pei a nih. NEIGM ti kha kum 1986 khan ECCI tiin an thlenga. 1996 khan khuo 522 ah kohran an nei. Pastor 152 an nei bawk. 

Rochung Pudaite 1956

NEIGM buoi laia Pu Tlangval tienga thang ve chu Pu Rochung Pudaite kha a nih. IBPM ah Organising Secretary sin an lo in thawtira. Amiruokchu, IBPM le Independent Church an ngir zing lai kum 1956 khan IBPM (New Development) a phuna. Sielmat, Manipur ah ram an chawka. Office, Quarters, ME School le Bible College a bawla. Mi tamtakin ei hlawkpui a nih.

IBPM (New Development) thuoitu thar hai chu

1. Field Superintendent: Dr Thanglung

2. Asstt Field Superintendent: H. Daia

3. Treasurer: S. Rala

4. Principal, Bible School: Chawnga Pudaite

5. ME School Headmaster: VL Ringa

Lakhipur a IBPM Secretary Lalchanlien chu Lakhipur a inthawkin Churachandpur thuoikai a nih.

Dr Thanglung 1957

Kum 1957 khan Pu Tlangval chu ei rama a hung lut nawka. Hmarkhawlien, Lakhipur ah a hung lut hmasataka. Hmarkhawlien ah IBPM (New) Assembly a neipui nghal. IBPM Assembly a chun Dr Thanglung Chairman a nih. Pu HL Bana Secretary in a thang. Assembly chun tuta inthawk chu Pu Tlangval a tienga kawp hai kohran chu Independent Church ti ning a tih, tiin a rela. HQ khawm Lakhipur a inthawk Sielmat ah sawnkai a hung nih. Dr Thanglung chu Field Superintendent a hung nia. Pastor H. Daia (Manipur) le Lalchanlien (Cachar) hai chu Assistant Superintendent dinga thlang an nih. Kailam hnuoi enkawltu dingin HL Bana chu Supervisor dingin a ruot. Vangai chu Pastor Kunga in enkawl a tih. S. Rala chu Assembly Treasurer a ruot a nih. 

Pu Watkin Roberts hung kir nawk chu IBPM le Independent Church thuoitu haiin an lo lawm ve hlea. Pu Tlangval a kuoma IBPM (New) le inkawpa annual budget khata luong an lo rawt ta a nih. 

Hmarkhawlien ah Independent Church thuoitu haiin Assembly an kova. Chu taka chun IBPM (New) Superintendent Dr Thanglung chu Independent Church chun Field Superintendent dingin an hung pawm ta a nih. IBPM (New) Coordinator Rev Chawnga chu Coordinator dingin an pawm bawk. Draft Constitution ziektu dingin IBPM (New) Organising Secretary Pu Rochung Pudaite chu an ruot. 

IBPM (New) 1958

Amiruokchu, kum 1958 April khan IBPM Organising Secretary Pu Rochung Pudaite in IBPM Constitution a zieka. Chu chu IBPM chun an lo pawm ta a nih. Chu zo char chun IBPM Founder President Pu Watkin R. Roberts in Pu Rochung Pudaite chu IBPM (New) Executive Director dingin a hung namdet ta a nih. IBPM in office thar an hawnga. IBPM chu an register ta a nih. August 1958 khan IBPM thuoitu hai chu tlangram kilkhawr an inzin ta a nih. Education tienga hmalakdan ding an zu hmua. Kum 1959 khan IBPM chun Pu Thanglor sirsanin Sielmat Christian High School an dina. Kumtin matric exam ding 1000 bek nei an lo tum a nih. Chanchintha puongdartu ni an tum leiin Bible College khawm an buoipui ta peia. Kum 1958 sungin IBPM chun thawktu 67 an nei hmana. Chun school 26 an indin hmanh.

Hieng lai zing hin Kailam Biel le NC Hills Biel chu independent Church sunga lawmlut an nih.

May 1959 khan IBPM thuoitu Pu Rochung Pudaite chu USA tieng a pan. London ah Hmar New Testament suttu hai a zuk sir malama. Sielmat High School enkaitu Pu Thanglora chu PG thawsa dingin America ah thuoi a nih. Lalngaisang chu London ah Bible training dingin thuoi a nih. Dr Laltuoklien Sinate khawm chawm a nih. Lalthankhum Sinate khawm Pune ah BD an lo inthawtira. Pu Darsanglien Ruolngul khawm Bible training a fe dingin an lo sukthluk a nih. 

Kum 1960 a IBPM Field Superintendent Dr Thanglung a pension khan Darsanglien in a ai chu awng a tih tia rel a nih. Inhrietthiemnawna a suok met hnungin Dr Thanglung chu an compensate ta a nih.

Kum 1960 laia IBPM le Independent Church thuoitu hai

1. Founder President: Watkin R. Roberts

2. Executive Director: Rochung Pudaite

3. Executive Committee Members: Darsanglien Ruolngul (Vice Principal, SCHS), H. Daia, Chawnga Pudaite, K. Luoia, H. Thanglora, etc.

Hi kum hin Independent Church kohran ah mi 12,376 ei tling tah. Sum hmusuok popo khawm Rs 1,02,307 (IBPM) le Rs 12,480 (Independent Church) an nih. 

ICI 1961

Kum 1961 khan IBPM thuoitu Pu Rochung Pudaite in Independent Church chu ICI tiin a phuoka. Hieng lai hin kohran member mi 40,000 bawr ei tling tah. Sielmat Christian High School chu Pu Rochung Pudaite in Ruolneikhum Pakhuongte an enkaitir. 

IBPM le Independent Church chun pheikhai inruolin sin an thaw ta peia. Kum 1962 khan district paruk chu District Superintendent in an enkawl thei ta a nih. Kum 1961 a thawlawm khawm Rs 20,988 a nia. 1966 khan Rs 1,51,471 a tling tah. Kum 1961 khan kohran member 13,752 an nih. 1967 khan 18,575 an tling. School khawm 1961 khan 30 indin an nih. 1962 khan 68 an ni tah.

ICI Directors 1962

Kum 1962 khan ICI Director ding thlang an nih.

1  General Director: Rochung Pudaite

2. Home Director: Darsanglien Ruolngul (IBPM Field Superintendent-1961-1962)

3. Education Director: Ruolneikhum Pakhuongte

4. Finance Director: Lalthankhum Sinate

Amiruokchu, Independent Church le IBPM chungthua ngaidan le ditdan a hung inang ta naw leiin kum 1964 khan ICI Executive Committee chun ICI Assembly hrietpuina um der lovin ICI General Director Pu Rochunga Pudaite chu an lo inchawltira. ICI le IBPM inzawmna khawm an lo suktawp ta a nih. Chuong chun kum 1965 khan Senvon Inkhawmpuiah ah ICI le IBPM chun thuomhnaw insemna an rawt. ICI chun Sielmat hmun, ram le building tha popo a chang ta a nih. Anachu Assembly chun ICI (Home Director Darsanglien Ruolngul le Moderator Hrangtawnlien) le IBPM (General Director Rochung Pudaite le Education Director Ruolneikhum Pakhuongte) inkawp zing kha tha an la ti leiin Pu Rochung Pudaite chun General Director nina chu a chel zawm ta pei a nih. 

Holy Bible 1968

Hieng lai zing hin mi thahnemngai hai zarin Hmar Holy Bible chu kum 1968 khan ei lo nei ve ta a nih. Sielmat, Hmarkhawlien, Muolhoi, Kangreng le Senvon ah tlangzar a nia. Chu zar pei chun kum 1969 khan Hmar tawng hi LP level chen medium of instruction a hmang phalna Assam sawrkarin a mi pek ta a nih. Pu VL Joute hmalakna ei theinghil thei nawh.  

Kum 1968 khan IBPM chu Partnership Mission tiin Sapram tieng an lo thlenga. Hi kum ma hin Sielmat Inkhawmpui ah ICI kohran sunga inthena a suok ta a nih. Ram, building le thuomhnaw inchu leiin sawrkar court ah thubuoi 12 thelut a hung nia. Manipur Minister Pu Goukhenpau, Hmar National Union, Pu JC Nampui, Pu L. Keivom, Pu Lalthanzau Pudaite hai chen an hung inrawl ta a nih. Kum li lai ei lo buoi a nih.

Watkin Roberts ei lo the tah!

Kohran sunga ei insekhek lai tak April 20, 1969 khan Pu Tlangval chu ei lo the ta a nih.

EFCI 1972

Chuong chun Pu Rochung Pudaite chun IBPM (New Development) le mission school enkawltu ding a hung mamaw tana. Clinic, college le charitable sin a i buoipui ta hai popo sunzawm a nuoma. Mission hmun, school, college, hospital le project hai trust property innitir a tum ta a nih. Chuong tienga lo bawzuitu dingin kum 1969 khan PMS an dina. PMS Board ah member paruk a thun. Hi board a hin Pu Rochung Pudaite Chairman, Pu Ruolneikhum Pakhuongte, Vice Chairman, Lalthankhum Sinate, Secretary hai chu thuoitu an nih. 

Hieng hun lai hin IBPM le Independent Church biel chu biel saria the a nih. 

IBPM Sielmat HQ a thuoitu hai chu 

1. Field Superintendent: Darsanglien Ruolngul

2. Treasurer: S. Rala

IBPM le Independent Church sunga a lut le suok an um zinga. Chuong chun kum 1970 khan ICI thuoitu haiin IBPM chu DC, Churachandpur kuoma an hek ta a nih. IBPM hi foreign mission a ni leiin India rama hmun nei thei naw nih, an lo tih. IBPM thuoitu Pu Rochung Pudaite chu Police inmantir an lo tum bawk. Mizo le Naga helpawl support-tu angin an lo intum ta peia. An rihau an sang hle a nih. Pu Rochung chu Sapram tieng a fe thla tum ta a nih.

Amiruokchu, kum 1972 khan ICI thuoitu (Rev Darsanglien, CC Rema, HK Khawlkung le Hrangtawnlien) le PMS thuoitu (Rev Rochunga Pudaite le Challienkung Hranngul) hai chun Pathien hminga tlawmna nun hmangin unau thil insem an hung nuoma, ICI le IBPM hai chun Sielmat ah inremna tluontling an lo siem ta a nih. ICI ti chu pawl pakhatin a changa. IBPM thuoitu Pu Rochung Pudaite a tieng hai chun an pawl hming ding  an la sak ve nawh. 

Chun ICI thuoitu le PMS thuoitu hai chunga criminal case popo chu thaibo a hung nia. February 14, 1972 khan inremna ruoi chu Sielmat ah the a nih. Chanvo an sukfela. Ramri an khang tha-a. Inthlengtuo ding hai an inthlengtuo zo thei ta a nih. Court case popo an lakkir ta leiin June 21, 1972 khan Sielmat ah EFCI kohran a pieng thei ta a nih. 

Thukharna

HH Coleman le Watkin Roberts pawlin NEIGM kohran le Mission leadership an inchu khan kohran a hung buoi tana. IBPM le Independent Church an hung sopui ta a nih. ICI pawl hniin a hung kawidar nawka. EAC, AG, PCI, RPC, Methodist, UPC, Foursquare, Salvation Army le Seventh Day Adventist an hung um tana. Hmar mipui 1,50,000 bawr chu pawl inchuna in a mi chawkbuoi ta nget nget a nih. Thlaurau ramin a tuor hmasataka. Khawtlang in a tuor nawka. Education, politics le social life chenin an hung tuor ta pei a nih. 

NEIGM, Independent Church, IBPM le ICI thuoitu hai khan inremna an lo rawt ngun el. Sienkhawm "Kohran sum hnar" kha chan inlauna an nei tawl seng leiin kohran hmunkhatah um dingin an lo inrem thei nawh. Chuleiin HCLF, HKI le Joint KTP indin an nih. 

Vawisun hin Kohran pakhatah inlawi nawk vawng chu ei thei ta nawh. Amiruokchu, "Kohran inpumkhatna" hi thupuia hmangin Pathien ei ko nawk tah. 

-Lakhawmtu 

Dada le Jojo Pa

26.7.202

Tar Pension, Hmeithai Pension, Piengsuol Pension le Fahra Thangpuina

-Tar Pension, etc hai hi beneficiary hai kuta pek ngei ning a tih. Pek a nih ti hrietu pakhat um a tih.

-Bank annawle post office savings account ah beneficiary in ladawk a tih. Annaw khawma public meetingna ah beneficiary hai sem ning an tih. Aadhaar card neilo suonlam in pension sum pek naw thei an nawh.

-Tukhawma tar pension lak pek leiin sum an lo cut thei nawh.

-Tar pension, etc. lut le lut naw BDO/District Social Welfare Office/DC office ah indawn thei a nih. An hril nuom naw chun DC kuoma complain thei a nih.

-Tar pension a hlawpin thla hni thla thuma mi dam a hung thei. Amiruokchu, election tawm vote zawngna a tar pension le hmeithai thangpuina sem thei an nawh. A semtu chu a ma le a candidate man thei an nih. FIR file khum thei an ni bawk

-A thi ta hminga tar pension lak thei an nawh.

-Thla thum dan dan ah tar pension list an reverify hlak. A thara lut nuom haiin an apply thei.

Var tum pei ei tiu.

Tar Pension, Hmeithai Pension, Piengsuol thangpuina, Fahra thangpuina dawngtu ding beneficiary list identification list siemtu chu VA a nih. Politician or bieltu political marawi hai an ni thei nawh. A dawnglo ding haiin an dawng thei nawh. BPL card nei a tul a, SECC list a pasie bik an ni ngei ding a nih. Sawrkar thawktu in an dawng thei nawh.

TAR PENSION

-Thlatin Rs 200 kum sawmruk a inthawka 79 chen

-Thla khata Rs 500 kum sawmriet le ti tling huna

-Tuhin sawrkarin rate hi a sukpung tum.

 HMEITHAI PENSION

-Thlatin Rs 300 kum sawmli a inthawka 79 chen

-Thla khata Rs 500 kum sawmriet le ti tling huna

 PIENGSUOL PENSION

-Thlatin Rs 300 pek ning an tih kum sawmpariet a inthawka chungtieng hai

 FAHRA THANGPUINA

-Inkhatpa annawle inkhatnu kum sawmpariet le sawrruk kar a lo um ta naw chun fahra thangpuina dawng thei a nih

-A telin vawikhat Rs 20,000 pek ning an tih.

Beneficiary list verification hi sawrkar officer in public meeting or VA rawnin nei a tih. List hi vangtlang hmu theiin VA in tardawk zing a tih.

Beneficiary demand allotment bank or Post office ah a lut hun khawm office ah ngaiven thei a nih. Tukhawma commission an lak thei nawh.

Election vote zawng lai tar pension, etc sem thei an nawh. Tar pension passbook hi bieltu marawi hai kawl ding an nawh. FIR thelut thei a nih.

Tar pension, hmeithai thangpuina, piengsuol thangpuina le fahra thangpuina  apply ve beneficiary list a lut lo haiin an dawng nawna san an hriet thei. BDO/Social Welfare Officer/DC in ziek ngeiin an zieklut nawna san peng a tih.

A dawng ding ngei ngei politics leia dawnglo haiin FIR an file thei a. Court ah petition an thelut ve thei.

FIR or Court sirsanin beneficiary list VA lo identified chu reverify thei a nih.

NSAP SCHEME a hin sawrkarin kumtin 9000 Crore bawr a sengzie hlak.

A dawng ding haiin an dawng ngei ding a nih. Thla hni thla thum a lo inhnu met chang a um zeu zeu. Anachu a hlawpin hmu vawng an tih. Tuhin chu NSAP-MIS ei nei tah.

Bihar a khuo tamlem a chu tar, hmeithai, fahra le piengsuol hai thangpuina passbook hai hi BIELTU marawi haiin an kawl ngai ta nawh. Election tawm ruoiin thangpuina an sem ngam ta bawk nawh. FIR file ngam an um ta leiin.

-Ziektu

Dada le Jojo Pa

15.5.2020

TIPAIMUKH ROAD LE JT ROAD HI IENGLEIA AN SIEMZO THEI NAWM A NA?

Tipaimukh biel ah lampui pawimaw em em pahni ei nei a. Chuong hai chu Tipaimukh Road le JT Road hai hi an nih.

1. TIPAIMUKH ROAD 

Churachandpur Town a inthawka Tipaimukh khuo chen infepawna lampui hi Tipaimukh Road a nih. Chu chu 262 km a sei a nih.

CCP town a inthawka Thanlon biela Bukpi khuo hi 185 km a sei a nih. Bukpi khuo a inthawka Tipaimukh khuo hi 185 km to 262 km=77 km a sei a nih.

Kum 1999 khan Tipaimukh lampui hi National Highway a ziektlar a lo nih. Kum 2005 khan BRTF in sin an thaw tan a. Amiruokchu, kum 2017 a inthawk khan sawrkar le NHIDCL in Tipaimukh lampui hi siemthat tumin hma an lak a. Tender an lo siem. Contractor Nidhi Creative Infrastructure Company haiin lampui siem theina power an chang. Tipaimukh Road hi Rs 3,930 crores senga siemthat tumin an lo inpuocha ta a nih. Sei tak an lo siem tah. July 10, 2020 khi an siemzo ni ding an tah. Tuhin 56% physical progress angin an zieklut. Chun 44% finance an lak tah.

Bukpi khuo chen hi 7.5.2019 chen khan NDS Construction haiin an lo buoipui ve. An zo tah, an tih.

2. JT ROAD 

Jiribam-Tipaimukh Road hi Taithu khuo a NH 150 Bypass a inthawka Jiribam Town chen a lampui 105 km a sei hi a nih. Hihi State Road a ni a. January 2, 2017 khan Contractor M/S LN Malviya haiin 2 laning with paved shoulders lampui siem dingin contract an lo lak a. Sengso chu Rs 1,140 crores bawr an ring. July 9, 2017 kha an zo ni dinga an lo hril chu a nih.

3. SINZAWL ROAD 

CCP-Singhat-Sinzawl Road NH 102B hi Contractor Bharti Infra Project haiin February thla 2018 khan an tan a. June 2018 khan an lo zo tah, an tih.

 Zawna pathum 

A. Tipaimukh Road siemna dinga NHIDCL hnuoia Nidhi Creative Contractor hai deadline kha July 2020 khi an ta naw maw? Lampui quality hi a tha chi am?

B. 77 km a sei Bukpi khuo a inthawka Tipaimukh khuo chen tlung=262-185 km huomsunga 46% physical progress an la zo nawh ti hi an dik am?

C. Tipaimukh Road hi Nidhi Creative haiin September thla 2018 a inthawka May 2020 sung=20 months sung popo siemtha zo thei ta lo hai hi iem a san ning a ta?

D. NHIDCL hai kuoma felfai taka lampui quality thua complaint theluttu ei um ta am? Ei bawzui tha am?

CCP to Bukpi chen hlak May 6, 2019 khan an zo tah, an ti awmtakin ka hriet si. Ka lo hrietsuol el am aw?

E. Taithu NH 150 Bypass a inthawka Jiribam chen 105 km a sei lampui khawm hi Rs 1,140 crores a LN Malviya Contractor hai siem zo thei lo an naw maw? July 7, 2017 daia lo siemzo tum hai khan an la siemzo naw zing hi iem a san?

4. LAMPUI 

Lampui an siemzo tah ei ti chun a hnuoia Bituminous Road khu ei tina a ni naw maw?

A. Earth Road
(JCB, etc in lampui siemna hmun ding chu a nawrzawla, pil khawm a sukruol vawng tah tina)

B. WMB Road
(JCB, etc in lampui a nawrdawk hnung tieulung le lung tha sukphit 275 mm a sa an phul zo tah tina a nih)

C. Bituminous Road
(JCB, etc nawrdawk, tieulung le lung tha 275 mm a sa phul hnung, lampui chunga alkatara tha 20 mm beka sa vur ta hnung tina a nih)

D. Concrete Road
(Cement a siem lampui a nih)

5. WORK 

Work ti hin lampui siemtu contractor le an siemtirtu sawrkarpa kara agreement lekha a ziektlar a um sin thaw ding, siem ding, phun ding, hmang ding, chawkpawlzat ding, enkawl dan ding ti hai hi an nih. Chu chu contract agreement ei tih. Detailed Project Report (DPR) a um bawk. Chu chu EE, PIU, CCP kuomah hmu thei ning a tih.

DPR ang charin contract sin contractor in a zo fel vawng hma khat contractor in a sin (work) chu sawrkar a pek suok ngai nawh. Amiruokchu, contractor in a sin indiklo takin a lo thaw chun sawrkarin contract a sukchawl thei ve.

Kum 2017 khan Damdei le Tuolbung kara 10 km lampui sin work thawna ding Rs 360 lakhs PMGSY in a lo sanction tah.

Lampui thatnawna a um chun Engineer in Contractor hril a ta. Contractor in siemtha pei a tih. Defect Free Condition an thupui hlak.

NHIDCL hnuoia tlangram lampui Tipaimukh Road le JT Road siemna ding khawm sanction a lo ni tah. Siem zo a la ni nawh.

6. MAINTENANCE 

Maintenance aj ti ruok hi chu routine maintenance tina a nih. Chu chu contract sin zo hnung kum nga sung lampui enkawlna sin tina a nih.

Lampui sietna hmun pothole siemthat, culvert siemthat, culvert hnuoia tui luongna hmun inthielfai, lampui rawng nal, traffic sign phun, lampuia chirhak le tui sukfai, ruosur le thlihrang leia lampuia thingkung tlu hai sawnhmang sin popo kum nga sung lampui siemtu contractor in maw la phur a tih.

Kum 2017 khan Damdei le Tuolbung kara 10 km lampui sin maintainna ding Rs 36 lakhs PMGSY in a lo sanction tah.

NHIDCL hnuoia tlangram lampui khawm sanction a lo ni a. Zona khawm a um. Tha taka zo lo khawm a um. JT Road khawm chu tho.

 7. QUALITY CONTROL 

Contractor Nidhi Creative le LN Malviya haiin register pawimaw deu pahni an nei a. Chu laia pakhat chu SITE QUALITY CONTROL REGISTER a nih. An work manage dan le material laklut a thatzie zieklutna lekhabu a nih.

AE khawma register book pawimaw deu el pakhat a nei a. Chu chu NON-CONFORMATION REPORT REGISTER a nih. Contractor chinglettu AE/JE/EE an indik a tul.

Contractor in alkatara a dawngna register a um bawk. Chu chu ORIGINAL CONSIGNEE RECEIPT CHALLAN an tih. Hi lekhabu a hin thautui company in alkatara tha chi ngat an pekdawk zat an zieklut hlak. An sign nghal bawk. Thautui company in contractor a kuta alkatara tha-pa a pek kha hmang le hmangnaw check theina lekha a nih. Engineer le Monitor hai an var a tul. Contractor leh a nawzawnga inthukawp an lo ni chun lampui quality ZERO hlak a tih.

 8. INSPECTION 

EE le Bieltu MLA haiin an nuomna hmun hmun ah lampui that le thatnaw checking an thaw ve hlak. Inspection Register a um. Khawm chu check thei a nih. Hi hi lampui quality thalo le zolo tha le siemzo angin an lo zieklut theina lekhabu a nih.

NHIDCL hnuoia contractor Nidhi Creative Infrastructure haiin Parbung, Lungthulien, etc laia lampui an siem hi an lo uluk der nawh ti mipuiin an sopui tan tah. Alkatara Test, Lungkawhrawt Chawkpawl Test le Lampui Sekdan Test an nuom ve tah.

AE/JE/Executive Engineer/MLA haiin an mawphurna an zo naw lei ning a ti? Bieltu endik hman naw lei a ni el dim?

 9. WHY THE DELAY? 

Tipaimukh Road le JT Road hi a deadline in an siemtha thei naw chun a san iem ning a ta?

A. Iengleia lampui hi an la siem zo naw zing am ning a ta?

B. An lampui siem ta po a hin ei lung a awi tawk am? A quality hi a tha tawk am? Deficiency in Services in carrying out DPR ei ti thei am? Poor performance which is in non-conformity with Contract Agreement ei ti thei ding?

C. Contractor-politician nexus

Lampui quality thalo annawle lampui siemzo theilo contractor chu sawrkarin an contract pui sawt pei ngai nawh. Complain thei a nih.

Delay thil le a san dang leia sengso a lo kaisang thut chun DPR kha ennawn pei a ni hlak. Sum an i hmu ding suk-pending pek thei an ni ve.

Politician-Contractor-Sub Contractor unholy nexus a um thei a. A level an sang taluo pha lampui quality zero tawp theina hmun an tlung thei bawk.

Nexus a hin einimi a lo thang dam ei um chun chuong ang mi hai chu khawtlang sin thawna le pulpit ah thrungna insang ei pek ta naw pha ei ramin hma sawn thei a tih.

Khi nexus a thang hai pulpit tlanga thuhriltu an ni zinga, pungkhawm nia hai a lu lien lienin ei la hmang pei chun mipui a telpui in tuor zing ei tih. Lampui tha nei intak hleng a tih.

Lampui siemna le siemthatna thuah indiknawna dam a lo um chun sukdikna sina tantu ding chu AE/JE/EE an nih. Contractor in siemthang a ta. A lulul viu chun VA in bieltu MLA kuomah complaint a thelut thei. Chu zova bieltu MLA in sawrkar ah complaint a thelut ve thei. Bieltu complaint in thu a fun tak.

10. THUKHARNA 

Tipaimukh Road le JT Road hai hi ei lampui an ni a. Vawisunnia an hung siem/siemthat bak hi iengtikam an hung siem/siemtha nawk ding ti ei hriet nawh. Khawtlanga a telpui hlawkna ding sawrkar lampui hi a ni ding ang taka siem/siemthat dan ding contractor le mawphurtu hai hril ngun ei tiu.

Lampui siem/siemthatna hmuna hma lo la pawl, bieltu lo mawrtu, contractor haiin an sin tha taka an thaw theina dinga lo sihalte zing le Whatsapp Tigers ei ti hai leh ei rengin ei thangruol chun mipuiin ei thil sopui a inthawk ngaituona tha siem thei an ta. Var phang an ta. Huoisen thei bawk an tih. An huoisen pha an dawng ding dawng thei an tih. An lampui ding khawm tha thei a tih.

Iengtikam ei khuo ah lampui an hung siem nawk ding ti ei hriet naw leiin an hung siem lai lai hin lampui quality ei lo sopui rak a tul a nih. Quality monitoring report mipuiin hriet ei nuom.

-Ziektu

Dada le Jojo-Pa

12.5.2020

THINGTLANG A POSTING DOCTOR LE NURSE HAI KHAWLAM AN UM ZO?

Kum 2008 lai khan thla li sungin naupang sawmli lai kum nga tlinglo ngawt "Strange disease" (Mautam hri) inleng leiin thingtlang khuo Hmarbiel ah ei lo chan a. RIMS doctor specialist pasari an hung a. Medical study an hung thaw. Report chen an siem.

A hnuoia hai khu medical team hai findings an naw maw?

A. Inrai lai haiin natna hri invengna damdawi injection an lo dawng naw lei a nih (No expectant mother in the affected village received TT injection/IFA tablets in the early stage)

B. Naute hai natna hri a inthawka inveng theina BCG le DPT injection an lo pek ngai naw lei a nih (No children administered vaccines upto 5 years).

C. Sub Centre hi an lo uksak bek nawh (No would-be mother going and registering at health centre for delivery).

D. Paracetomol le bandage tak ngiel khawm an sub centre ah hmu ding a um ngai nawh (Even a simple dose of life saving drugs is unavailable in the health centre).

Medical findings khi a lo indik chun, ei bawzui am? Ei sub centre hai ei tuoinam am? Duty ding dutyna hmuna umin sin an thaw naw leia naupang ei lo chan an naw maw?

Tum ei intum ding? Vawk thisa an lo faka, chu leia hri inleng a nih, an ti kha ei awi lem el ding a ni?

Ei ram hi malaria, diarrhoea, jaundice le natna dang dang ta dinga prone area a nih. Natna chitin chitang suok thut thut theina a nih. Chuleiin sub centre a hai iengtiklai khawm life saving drugs NHM hnuoia mi ei sie zing a tul a nih.

Doctor in Sub Centre hi thlakhatah vawikhat bek a sir ding a nih. PHC a LHV in vawikhat bek karkhatah sub centre a sir ding a nih.

Damnaw hai lo infielkhawmin doctor le nurse hung ding ni chu an lo tung hlak ding a nih. Chu ni chun doctor in mi sawmli bek a en ding a nih. Damdawi free hai an semdawk bawk ding a nih.

Thla tin Village Health and Nutrition Day vawikhat an nei ding a nih. Hi hunah hin PHC Doctor in damnaw checkup hlak a tih? Anganwadi Centre a Worker le Helper khawm thang an tih. Naupang hai fak ding ICDS thangpuina sem hlak an tih.

Zawna khu ei dawn thei am?

- Inrai thangpuina JSY le JSSK scheme hnuoia sum tunam a lo lak hlak? 

- Inrai thangpuina Rs 6,000 maternity benefit tunam a lo lak hlak? 


- TT/Booster injection le IFA tablet lak nupui iengzam ei sub centre hnuoia an um? 

- Naupang kum nga tlinglo iengzat inam BCG le DPT injection an dawng? 

-Naupang rikzie inkhina Sub Centre a ANM in a nei am? BP checkna a nei am?

- Naupang pieng hlim 2.5 kg tlinglo iengzam thlatin an zieklut hlak? Thla kimlo hai chu Anganwadi Centre sirsanin ICDS thangpuina faktha pek an ni hlak am?

-Health Sub Centre hminga RKS Committee in untied fund a hmu hai iengtinam an hmang?

-Health Sub Centre a MO ic/ANM le VA Chairman joint bank account ah damdawi in enkawlna ding khawrsaw iengzam a lut hlak?

Mipuiin ei hriet a tul.

Doctor le nurse/MPW/ASHA/Health worker thingtlanga posting reng hai chu an umna hmuna damdawi leh an um ngei ding a nih.

Bieltu in a biel a posting Doctor le Nurse, etc hai an postingna hmuna a tirlut ding a nih. A tirlut hne naw chun mipui ngaisaklo a ni ve.

-Ziektu

Dada le Jojo Pa

9.5.2020

PMGSY Scheme hnuoia Rovakawt, Damdiei le Tuolbung lampui siemna ding sum telpui kha khawlam a um ta?

Lampui tlung nawna mihriem 250 chengna hmun popo lampui inluttir tumin sawrkar thlungpui chun kum 2000 a inthawk khan hma a lo lak a. Chu zar chun kum 2017 khan tlangram a Hmar khuo pathum hieng Damdiei, Tuolbung le Rovakawt khawma malsawmna an lo dawng ve a nih.

1. Rovakawt

Rovakawt lampui siemna dingin sawrkarin PMGSY hnuoia Rs 687 lakhs a sietha. Kilometer sawmparuk a sei lampui siemna a hmang ding.

Lampui siemzo pha a enkawlna ding Rs 68 lakhs a sietha bawk.

2. Damdiei

Damdiei lampui siemna dingin PMGSY hnuoia Rs 360 lakhs siedawk a nih. Kilometer sawm a sei lampui siemna a hmang ding.

Siemzo pha a lampui enkawlna ding Rs 36 lakhs a sietha nghal.

3. Tuolbung

Tuolbung lampui siemna dingin PMGSY hnuoia Rs 322 lakhs siedawk a nih. Kilometer kuo a sei lampui siemna a hmang ding.

Siemzo pha lampui enkawlna ding Rs 32 lakhs a lo sietha bawk.

PMGSY hnuoia Damdei le Tuolbung kar lampui hi

1. Leveling sub base 200 mm ning a ta

2. Leveling material layer 75 mm ning a tih

3. Bituminous Alkatara leveling 20 mm ni bawk a tih

A rengin 295 mm.

-Width 6 metres

-Culvert 11 Nos. um a tih

-Zo ni 26.4.2020

PMGSY lampui siemna a hin Core Network an induong pha local MP/MLA comment an lak hlak. District Level Plan ah an inchuonsa hlak.

Congress sawrkar kha a lo tha a. PMGSY a lo tan a nih. Tuta sawrkar hin an la sunzawm zing. An fel.

NH 150 Project NHIDCL hnuoia Nidhi Creative Infrastructure Company hai contractor hai sin thaw quality mit ngeia hmutu ei ni seng.

PMGSY Lampui hin ei khawtlang Rovakawt, Damdiei le Tuolbung khuo hai kawng tambtakah a mi thangpui thei.

1. Agriculture tieng aithing le thil dang dang phurdawk le zawr a hung inhawi thei a. An thil nei hai inchaw theitu awlsam deuvin hmu tang an tih

2. Health tieng khawm Anganwadi worker, Sub Centre a ANM, PHC a doctor khawm an kai kim thei ta ding a nih, Rovakawt, Tuolbung le Damdiei a hin an posting chun

3. Sawrkar officer le thawktu tlangram a posting hai khawma office kai harsa ti ta naw ni hai

4. Sikul a naupang enrolment khawm pung an ta. Teacher khawma absent nuom ta naw ni hai

5. Motor ke pali, pathum le pahni nei nuom dam hung pung an ta. Fakzawng inhawi pek tang a tih.

6. Khawpui pan ei tam pha khuo le venga thil tha hawnluttu ei pung pei ding a nih

7. Khuo dang le inneipawl hi nekin hung pung ei ta. Daksuok ei pung ding a nih.

8. Durable community assets an ni bawk.

Amiruokchu, a hnuoia point pasari hai khu ngaituo thar dingin ei lungril zuk pe sin ei tiu

1. Ei rama Bank branch an la phun naw leia harsa titu ei tam.

2. Pasie hai thangpuina le sawrkar scheme sirsana sum hmu thei hai thingtlang ah ei la lakdawk thei nawh.

3. Sub Treasury office a um naw leiin sawrkar thawktu tamtakin thingtlanga khawsa hi harsa an la ti a. Phaiah camp office an hawng hlawl.

4. Ram in man a la nei nawh.

5. Small industry indin theitu ei la um nawh.

6. Intodel theina khawp bufai ei la tu thei nawh.

7. PMGSY le NHIDCL lampui siem hai quality hi a tha tawk am?

Alkatara, lungte, pil le phaiphin hai a ni ding ang taka an lo chawkpawl naw lei le fund indiktaka an lo hmang naw leia NH/PMGSY lampui hi a sie met met tan am an ta ding chu?

Public fund hi chingpen chi an nawh.

-Ziektu

Dada le Jojo Pa

8.5.2020