Responsive Ad Slot

HLING NGHAWK UM!!­ Part I

Sunday, July 26, 2015

/ by VIRTHLI HMAR
 HT Sunday Sermon

~ Rev. Mansang Songate

“Kan ngaihlu taluo nawna dingin ka taksa ah hling ami pek a nih” 2Cor 12:7

I hringna ah an naw leh I taksa ah thil um lo dinga I dit emem le nghawk em em I nei el thei. Natna amani, ruol ang nawna amani, I ning suktel tu che le rinum taka in umtir hlaktu che thil a um thei. Tulai nunghak tamtakhai  hi indu deu âlin um hai sienkhawm an hmel pienken ah lungawinawna an nei deu fur an tih! Darthlalang ah an in en zat in chierpui ding le inhmurpui ding an nei tina a nih! Bawrsawmna mani, piengken infuk nawna mani, harsatna dang dang sukbo thei nisienla sum tamtak senga sukbo khawm ei nuom ding hi ei kawl deu fur el thei. I hringnun a khan iem I nghawk tak a? I taksa penga khan iengin am a suk lungzing hlak che a? Iengin am a suk lungninaw tak hlak che a? I khat chau a I um chang ienginam a suk lungngai hlak che a? Hollywood film star upa deu hai le mi hausa tam takin hmai vuoi theinawna (Buttox) an injection hlak. A thawfuk an um a. A thawsawl khawm an um nuol. Pienkena lungawi lo mihriem ei tam em em a nih. Hieng ang ‘hling’ tamtak hi Pathien mi sie pek ani nuom vieu. Thenkhat ruok chu, ei suol lei le ei lulul leia ei tuok khawm thil um thei chu a nih.
   
Kum 2000 October lai khan, Arunachal khuo Pasighat an ti ah Kan nu le Pathien thu hrilin Adi Baptist Christian Union haiin an mi fiela. Guwahati a inthawk khawmin a hla em em. Chu inkhawmpui tuma Praise and Worship team member nunghak pakhat chu a Mit (eye) a pakhat lem kha a var (white) tlat el a. Mit a suk khamin a en khawm inphalam a um em em. MA Final inchuklai a la ni nawk nghal a. Ka lungrilin sum nei lang chu thangpui ka va nuom de aw ka ti a. Kha nunghaknu tading chun A mitdel kha hling nghawkum em em, darthlalang (mirror)­a an en chang a sukna hlaktu le suk lungngai rawp hlaktu ani ka ring. Hieng ang ‘Hling’ Pathienin ami pekhai hi a lak hmang el ngainaw a nih. Nang khawma chuong ang ‘Hling’chu I taksa ah I nei el thei. A bona ding le a damna dingin Pathien kuomah vawitam tak I ngen khawmin, a dawnna I hmu naw ani thei. Pathienin ami pek hling hrim hrim a lak hmang el ngai nawh. Eini rawi chu Pathien mi pek nilo, mani siemfawm hling ei kawl deu fur lem hlak! Pathienin Ama hmangruo dingin ‘Hling’ a mi pek hlaka Paul khawm khan a nei ve a nih. Bible thiem thenkhat chun ‘String’ (thirzai) an ti ve thung. “Pathienin ‘thirzai’ in ami khit a, ei invakhmang ding phat dam, ei chapo deu ding phat dam leh kha ‘thirzai’ khan a mi hung kei zau hlak a nih”, an tih. Awi a um em em.
   
Paul khawm kha, khang khawpa Pathienin a hmang le ‘sukdam theina’ hai dam a pek a ropui taka a hmang pa kha, a ‘Hling’ pek kha a sukdam pek nuom der nawh. Mak tak chu a nih. George Matheson chu a tlangval thatlai tak, nunghak le an inhuol zo deu chauin a Mit (eye) danglam takin a hung na a. A pawng dawka, ti um khawpa a nat zo hnungin a mit chu an del ta nghe nghe a. Chu chau chu ni lovin a Ngaizawngnu an huolpuinu khan a the nawk nghal a. Bible scholar ropui tak hung nisienkhawm Pathienin ‘Hling’ rapthlak tak a pek kha a lakhmang pek naw tlat. A nunghaknu in a the el kha tuor harsa a ti ni ding ana, Pathien in hla ropui tak el “O, Love that will not let me go” (O, Hmangaitu mi maksan lo ding) ti kha a hung phuok nghe nghe a nih. A nuhmei huol laiin lo the el sienkhawm, Pathien chu hmangaina a sip ani leiin a thlathlam naw ding zie chieng takin a hmu a nih. (Hmar tawngin “Aw, hmangaitu mi maksan naw” tia inlet kha siemtha ta awm tak an na). Dr. William Barclay chu Pathien thu thiem emem, mi tamtak thik khawp le Greek tawng lem chu a tluk um ngailo dinga ring hiel pa khawm Pathienin ‘Hling’ a pek ve tlat ela. A lak hmang pek der nawh! Naset (deaf) a nih. Dr. Barclay chun “Ami hrilsietuhai tawngbau Pathienin ka hriet a phal naw leiin Naset in ami siem a nih” a tih! Lungawi takin a pawm hmak el a nih. Fanny Crosby kha naupangte ani lai a mit lo indel naw sien chu Kristien han hla 7000 neka tam ei neinaw pha ding a na! Biekina hlasak ding a vang awm! Taksa le pienkena ruol ei ban zo nawna hai hi Pathiena inthawka hmuchieng hi a lo va hlu de! Zakai khawm kha a dung tawi kha an khawkpui ve hle hlak ka ring. Kho bawk insang deu ngirna ding remchang a hmu naw leiin Theichang kungah a kai tawp el ani kha! Thei sien chu a dung kha ‘suksang met’ a nuom ka ring! 
   
Dung inhnuoi rinum ding zie chu practical in Germany ah 1999 June thla khan ka hang hriet suok. International Peace Keeping Force ha’n Security training an mi pek a. An sipai hai lai ka hang umve chu ka dung inhnuoi zie practical in ka hang hmu! Mi liengko chen chau kani ka zun man dawk! Kei khawmin ‘Hling’ ka lo nei ve zing el! A chang chu pakhat chau ni lovin iemani zat ‘hling’ ami pek amani aw dam ka ti hlak! Ei ‘hling hai’ hi chauna ding ni lovin, ami sukhrattu ding an ni lem. Ieng ‘Hling’ am I kawl a? Natna hling, pasietna hling, nuhmei­pasal chungchanga hling, nauhai chunga hling, piengzie dang danga hling ienga ding khawma ei thahnempui lo ding ei kawl ferfur el a nih! Setan kut thak nulna kha Setan chaldar a hemna dinga hmang tangkai lem ding a nih. Hieng ‘hlinghai’ hi lo kawl naw pal inla chu ‘Chapona dam’, ‘Uongthuongna dam’, ‘Khuo le venghai hmusitna dam’ in hmang ei ta tuormaw umtak eini ding anih! ‘Hling’ ei kawl fer fur hmanin tuorzo intak ngiel ngiel khawm ei tam vei leh!! Paula khawm kha ‘hling’ kha nei naw sien chu ‘Thawhla khawp’ ning a tih! A tuor an tak fu el thei ani aw! Eini rawi khawm zantieng fak ding nei lo khawma ‘Zu inrui pumin’ kawtthler ah ei lan hrosa ngam hlak a na! Pathienin ami pekhai hrim hrimin ami suksiet ngai nawh. Ami pekna san chiengtaka ena, indawna, hmang tangkai ding a nih. Pathien mipek nilo sum le thil ei lakhai hin ei hringna, ei insung le hnam ami suksiet pek lem hlak a nih. Solomon khan Pathien thilpekhai –Hausakna, hming inthangna le varna kha a tlukpui nawh a. Pathienin a peksa lo a laklut teu­ nuhmei 300 le thaikem 700 kha a tlukpui a nih.
   
Chuleiin, unau, Pathien kuomah ieng tak am I nuor puiin I kur inkuk pui a? Pathienin ieng ‘Hling’ am an kawl tir che a? I ‘hling hai’ kha Ama inhnaitirtu ding che in hmang tangkai rawh. I hmangthiem phawt chun “Pathien thilthawtheina” suklangtu ani ding a nih. Khawvela Hla ropui tak takhai le organization lientak takhai hi Pathienin a mihai ‘Hling chi dang dang’ a peka inthawka suok deu vawng an nih. Hnawksak deua I ngai rawp hlak kha tuta tum chu hang hmang tangkai tum ta le! Paula khawma a hang hrietthiem meu chu “Ka hratnawna hai hi suong lem tang ka tih” ati tawp el a nih. Eini rawi ingaitlawm hi chu “Inngaitlawm chapo” bek ei la ni tho tho hlak! Hratna suong hlakhai hi hnaam an uma, Paul chun a piengsuolna mani, ruol a ban zo nawna, le rinum ati puitak kha a suong chau ni lovin Pathien thilthawtheina suklangtu in ahmang a nih. Tukuma 2015 Civil services (IAS, IFS, IPS) examna a, a pakhatna nu chu piengsuol, awmpawng ang deu a nih. Pathienin a siem dan kha a hriet thiem hle ani ka ring. Eini rawi nunghak tlangval intuoi petputin an pienga, ieng inziek kai theilo hai! Mi’n an hratna an suong pha ‘chapo’ an hlawa, an hratnawna hrethiem taka an dawng pha leh mihai inza um an kai a nih. I ‘Hling’ kha iem law’ng I ta ? I lung a awi thei am le? A petu che kha indawn la, hmang tangkai ngei I tih! Amen.



Don't Miss
© all rights reserved
made with by Simon L Infimate