Hmasawnna Thar | 26 July, 2015

Tuolsung

BSI Annual Conference 2015

CCPUR: July 25, 2015, khan Bible Society of India (BSI), CCPur Branch chun Hill Town­a ECA­Central Church­ah Annual Conference­2015 an hmang. Zanikhan business session nei a ni a, 2015­16 budget ding, Collector Fellowship 2015­16 nei ding thu le thu pawimaw tum tum hai hriltlang a nih. Conference hi July 26, 2015 hin tumtiek a ta, conference sunga thuhriltu ding hai chu Rev. Thangkhosiem Gangte, Executive Secy,ESC;Rev.L.Kham Kho Lun, Director of Mission,EBC le Rev.LB Angam,General Director,ECCI hai ning an tih.

Kargil Vijay Diwas hmang

CCPUR: India le Pakistan indo huna India in hnena a chang hrietzingna dinga India rama kum tin July 26 a hmang hlak Kargil Vijay Diwas chu tukum hin Pathienni leh an tuok leiin zani zantieng khan DC Office­a BRGF Resource Centre­ah DC/CCPur inrawinain DC Office staff han Kargil Vijay Diwas an hmang.

UNLF cadre AR han a man

CCPUR: July 24, 2015, 2:00AM vel khan 7­Assam Rifles­a ‘D’Coy han UNLF cadre ni dinga ring Army No. 4947 S/S Pvt. Angom Basanta Singh @ Sananda (32) s/o A.Churachandra Singh of Khumujamba Leikai an man a, hi zan ma hin Police kuta an peklut niin Police thusuok chun a hril. Police chun Chief Judicial Magister, CCPur hmaah an inlangtir a, CJM chun July 29, 2015 chen Police Custody­a la um phawt dingin a rel.

BJP in Mega enrolment workshop

CCPUR: Zanikhan Imphal­a inthawk BJP hotu pathum­ Babu Singh, State Saha Pramu Sampark Abhiyan, Sarda Devi, State i/c Maha Sampark, National Vice President, Mahila Morcha le Shanti Kumar Sharma, Former State Predent, Mahila Manipur State hai chu CCPur­ah an hung a, zanikhan BJP, CCPur district Office­ah Mega Membership Enrolment Program 2015­2020 thuah workshop an buotsai. Hi huna hin BJP­CCP district member hlui han enrolment an thaw.

Lions Club in installation le induction

CCPUR: July 25, 2015, 11:00AM khan Lions Club of CCPur Greater, (Dist. 322­D) chun Tuibuong­a ADC Hall­ah Board of  Director, Lionistic Year 2015­16 installation le induction of New Members hun an hmang. Hi huna hin Lion H. Manikumar Singh, MJF­IPDG Lions Club International 322D khuollienin a thang a, guest of honour in Lion Dr P.Rajmani Singh, Dist Coordinator, 322D a thang.

    

Khuollien chun Lions Club of CCPur Greater 322D a kum 2015­16 sung Board of Directors ding mi 8­ Lion Langkhapau Guite, President; Lion James Doungel, Gen Secy; Lion T. Goukhomang, Treasurer; T.Gouzadou, Vice President; Lion N. Lhungdim, Vice President; Lion Dr LF Tusing, Committee Chairman; Lion Dr Kim Simte, Lion Tamer le  Lion Dr Zuii Hauzel, Tail Tuister hai namdetna a nei bakah Lions Club of CCpur Greater(Dist 322­D) member thar dingin mi 6 - H. Mangchinkhup;M. Gouzamang Guite;Kamsuanlun; Lal Hossan; T.Thienkhomang Haokip le Lunminthang Haokip hai laklutna hun a hmang nghal bawk.

ILP thlawpnain LPG Agencies hai an inkhar ding

CCPUR: Manipur phairam biela Inner Line Permit (ILP) hmang nawk dinga nawrna fe mek le inzawmin Manipur­a LPG outlets and distributors/ LPG Agencies hai chun ILP ngenna fe mek thlawpnain July 27, 2015 (Thawtanni) hin an office hai an khar ding niin ei thu dawngna chun a hril.

Tipaimukh MLA Dr Amo in a hung ral ve

CCPUR: Upa Ngursangluoi Pudaite (75) Retd.Headmaster, Govt. School of Rengkai, Churachandpur chu Diabetes natna leia iemanichen a damnaw hnungin July 25, 2015 zing dar 3 AM vel khan a thi a, a ruong hi zanikhan Rengkai Thlanmuol­ah vuiliem a nih. Upa Ngursangluoi Pudaite hi Pu, Dr. Chaltonlien Amo Chairman, HAC, le MLA Tipaimukh A/C; Pu Ngursanglur Sanate Ex­Minister/Ex­MLA Tipaimukh A/C; Pu Lalhrillien MDC Saikot, ADCC; Rev. & Dr. Rochunga Pudaite Founder President, Bibles for the World (BFW) le milien milal tam takin an ral tawl.

Revival Camp a um ding

CCPUR: Revival Camp Committee huoihawtnain July 27, 2015 a inthawk August 1, 2015 inkar sung khin Saidan A.G. Campus­ah Revival Camp um a ta, hi huna hin thuhriltu (speaker) in John Robert thang a tih. Hi Camp­a hin Pathien thua hartharna le chatuon hringna chang nuom hai ta phawt thang dingin Committee chun an fiel. July 27, 2015, 6:30PM a lut ning a ta, a lut ding hai chun Puonthuo, Buthleng, Bucket le Bible hai chawi ding a nih.

Nationwide Gospel Music Festival

CCPUR: July 27, 2015, 6:30PM (sharp) khin ICI le EFCI Kristien Thalai Pawl, Sielmat Unit hai mikhuolnain Rev. Chawnga Memorial Chapel, Sielmat­ah Nationwide Gospel Music Festival 4th Motivational Program um a tih. Hi huna hin Pu Lunminthang Haokip, IAS, DC, CCPur chun Pathien thu hril a tih.

            

Hi  program hmangnaa hin EBC, KBP, MELC, Host Choir, ECA, RPC GBA, ZPCS, Manipur Area Choir Mizoram Synod, Rengkai ICI le EFCI KTP; EOC Central Church Choir le EFCI Central Choir hai bakah hlasakthiem dang dang han hla sak an tih. Hi huna thang ding hin mitin fiel ei nih.

Headline

July 27-ah NPF in darkar 24 sung Hill District Bandh thaw an tum

IMPHAL: Naga People’s Front (NPF) chun a hmaa an lo hrillawk ta angin July 27, 2015 nia darkar 24 sung total Hill District Bandh thaw an tum chu an fe thlengpui ngei ding thu  Awangbou Newmai, President, NPF Manipur chun zanikhan a hril nawn nawk. NPF chun July 25, 2015 chena Manipur­a Autonomous District Councils (ADCs) 6, ADC/CCPur; ADC/Ukhrul; ADC/Senapati; ADC/Sadar Hills; ADC/Tamenglong le ADC Chandel hai chu sawrkar insiemtir dingin Manipur sawrkar kuomah deadline  an pek a, an deadline siem hun chu zani July 25, 2015 khan a tawp ta a nih.

    

ADC, Ukhrul Chairman dinga NPF in an thlang Dr Yaronso Ngalung chun zanikhan Imphal­ah Press Conference a ko a, NPF in July 27, 2015 nia Manipur Hill Districts sunga darkar 24 sung total bandh NPF in thaw an tum chu thul a ninaw thu Chanchinbumihai kuoma a hril. India Constitution dungzuiin state sawrkar chun ADC Chairman thlangna ding le inzawmin Presiding Officer annawleh Protem Speaker ruotin a hun le ni ding a bituk ding a nih. ADCs han sawrkar an siem hun ding a sukhnu leiin MDCs a thlang thar hai State sawrkar chungah an lungawi tanaw a, democratic agitation chi tum tu m an la thaw pei ding a nih tiin a hril.

            

ADC tinah MDCs 24 pei an um bakah State sawrkarin ADC tinah nominated members 2 pei a ruot ding a ni a, sienkhawm tuchen hin sawrkar chun a la ruot tawl naw a nih. ADC­hai tuchena sarwkar insiemtir an la ni nawna san chu State sawrkar le Governor inkarah dit dan le ngaidan a lan tuok theinaw lei a ni a, hi leia sawrkar siem hun ding hi sukhnuka um pha niin ei thu dawngna chun a hril. Nominated MDCs han vote an nei thei ding le ding naw thua ngaidan le dit dan hi an tuok thei naw nia hril a ni bawk.

Health Minister in PHC a hawng

IMPHAL: Health & Family Welfare Minister Phungzathang Tonsing chun zanikhan PHC thar Komlathabi, Chandel District­ah a hawng. Hi hunsera hin 42­Tengnoupal A/C MLA D. Korungthang, Health Director Okram Ibomcha Singh, DC Chancel Robert Singh Kshtrimayum le District officers hai an thang. District Hospital 4, Chandel, Tamenglong, Ukhrul le Senapati haiah damnaw khum tuhin 50 pei a um a, hieng district hospitals haia hin damnaw khum 50 seng  belsain 100 beded hospital­a siem ning an tih tiin Phungzathang Tonsing chun hi huna hin a hril.

Exam Centre thlakthleng

IMPHAL: MPSC hmalaknain vawisun hin Executive Officer le Assistant Executive Offier sin lakna dinga Exam um a tih. Hi le inzawm hin Ananda Singh Higher Seconday Academy Exam Sub ­Centre (Roll Nos. 04254­04435 & 04437­04771) chu thlakthleng le sawn a ni a, hi lei hin hi Centre­a exam ding hai chu Modern Colelge, Porompat, Imphal­ah an exam lem ding a nih tiin Secretary, MPSC chun inhriettirna a siem.

AAP Manipur in Model Draft Bill

IMPHAL: ILP le inzawma Bill draft thar ding ti le inzawmin AAP, Manipur chun Model Draft Bill an siem a, a hmingin ‘The Manipur Natives/Indigenous Peoples Protection Regulation, 2015’ an inbuk a, July 27, 2015 khin state sawrkar kuomah peklut an tum. Tha le hmangtlaka an ngai points hai chu Draft Bill tharah inchuonsa dinga ngen ning a tih tiin Thoudam Manihar Singh, President, AAP Manipur chun a hril.

NH­37 ah darkar 24 bandh

IMPHAL: July 27, 2015 zanrila inthawk NH­37 (Imphal­Jiribam Road) ah Zeliangrong students Union, Jiri Area, KSO Tamenglong le Oinamlong Range students Union han darkar 24 bandh an thaw ding thu an ponglang. Barak leilak le Jiribam inkara lamien siet zuolna hai siem tha dinga ngennaa bandh hi thaw an tum a nih. July 28, 2015 chena an thil ngen hi sawrkarin a sukpuitling naw chun hun tiemchin um lova bandh thaw an tum bawk niin Joint Statement an siem. Bandh bawsehai chu Rs. 5,000 pei inchawitir anni ding thu an puong bawk.

Draft Committee inthung vawi 3­na

IMPHAL: Inner Line Permit System (ILPS) le inzawma Bill thar siemna dinga sawrkarin Drafting Committee an ding chun zanikhan hi Committee­a Chairman le Law & Legislative Affairs Minister Th. Devendro office chamber­ah meeting vawi thumna an nei. Meeting­a hin High Court Bar Association le All Manipur Bar Association member hai an thang tawl.

Man le inchawitir anni ding

IMPHAL: Manipur sawrkar chun Myanmar a inthawka hun fakthei le dawn thei chi tum tum, manufacturing date le expiry date inzieklo hai chu laklut lo le zawr lo dingin a khap. Hi dungzui hin, hieng thil zawrtuhai le an thil zawr hai man le dan anga fine inchawitir pei ni tang an tih tiin Food Safety Officer, Manipur chun thusuok a siem.

Rangkachak tlang 20 leh man a nih

IMPHAL: July 24, 2015 khan Moreh a intahwka Imphal pana hung Maruti Van pakhat Khudengthabi hmuna 27 Assam Rifles han sukchawlin an dap a, hi Van a chuong S. Subash (29) of Naranseina Mamang Leikai, Bishnupur District chu rangkachak tlang 20, Rs. 83,00,000 manhu leh an man.

MP sawrkarin World Record Certificate

BHOPAL: Madhya Pradesh sawrkar chu World Handwashing Day le inzawmin Guiness Book of World Records Certificate inhlan a nih. October 15, 2014 a World Handwashing Day hmangnaa khan Madhya Pradesh state a districts 51 sunga hmun 13,196 haiah students 12,76,425 zetin a ruolin kut an sawpfai a nih. Hi Certificate hi a hma chun Argentina, Peru le Mexico han  joint in an lo dawng a nih.

PS le IR haiah CCTV inthut dingin

NEW DELHI: Supreme Court chun sawrkar thlungpui le state sawrkar hai chu Police Statin (PS) le Interrogation Room (IR) haiah CCTV inthut seng dingin le Police  Station po poah nuhmei constables sie ngei dingin thu a pek. Chun, State Human Rights Commission la nei lo, Delhi, Arunachal Pradesh, Mizoram, Meghalaya, Triapura le Nagaland hai chu an hmatienga State Human Rights Commission indin dingin thu a pek tawl bawk.

Myanmar Army Chief a hung inzin ding

NEW DELHI: Myanmar Army Chief senior General Min Auang Hlaing chu New Delhi­a ni 4 sung cham dingin vawisun hin New Delhi hungtlung a tih. New Delhi­a a cham sungin National Security Adviser, Ajit Doval, Indian Army Chief General Darbir Singh, Security le intelligence officials hai inhmupui a tih. India rama a hung inzinna hin security thuah India ram le sawrkar ta dinga thil tangkai tak a hung intlun ngei beisei a nih.

NIA in lawmmanin Rs.10 lakh pek dingin

NEW DELHI: SIMI members ni dinga ringhla leia man, Khandwa Jail, Madhya Pradesh a khum, October, 2013 a lungina intahwka tlan hmang Zakir Hussain @ Sidiq Badril Hussain, Mehboob @ Guddu Ismail Khan le Salik Hakim @ Amzad Ramzan Khan hai man theitu annawleh man anni theina dinga an umna hril theituhai chu lawmman Rs.10 lakh pek ning an tih tiin National Investigation Agency (NIA) chun zani  hmasa khan a puonglang.

PM in NDA programme a hawng

PATNA: Zanikhan Bihar state khawpui Patna­ah NDA sawrkar programme Deen Dayal Upadhya Gram Jyoti Yojana PM Narendra Modi in a hawng. Hi programme dungzui chun Rural area sunga cheng hai po po kum 2022 chenah electric thi lo dinga meivar pek ding ti a nih. Hi programme a sum hmang dinga riruong chu Rs. 76,000 crore a nih.

A nuhmei le naupa thatin a tlan hmang

DIMAPUR: July 23, 2015 khan Vikas Kaichari of Kirha village, Airport lam­the bul, Dimapur chun a nuhmei Laxmi le a naupa Tunu (9) hai an ringah chemin a at hlum bakah a naupa bawk kum 5 mi chu a ringa a at hliem zovin a tlan hmang niin Dimapur Police han an hril. Vikas Kachari hi a umna khuo tak chu Merapani, Assam a ni a, Kirha village­a hi teklei siema inhlawfa a nih.

Thluok buoi natna nei maktaduoi 50

NEW DELHI: Nun beidawng (depression) thangsain India rama hin thluok buoi natna invawi mi maktaduoi 50 vel an um a, hienghai laia mi 7,000 hai chu kum 2014 khan anni le anni an inthat niin National Commission on Mocroeconomics and Health  report, 2015 chun a hril. Thluok buoi leia mani le mani inthat kum 2012 in mi 7,769; 2013 in 8008 le 2014 in 7,104 an um tiin National Crime Records a inthawk hriet a nih tiin Union Health Minister JP Nadda chun zani hmasa khan Lok Sabha an hriettir.

Loneituhai inthatna sanhai

NEW DELHI: Tu kum sunga India rama loneitu 1400 lai zet hai inkhaihlum nasan hai chu, sungkuo harsatna, damnawna, drugs, mo thilsawm le a dang dang hai lei niin National Crime  Records Bureau (NCRB) thusuok chun a hril tiin Union Agriculture Minister Radha Mohan  Singh in zani hmasa khan Rajya Sabha an hriettir. Kum 2014 sung khan loneitu 5,650 an inthat niin a hril bawk.

Kum 3 sungin IAF vuongna 20 in tuoksiet

NEW DELHI: Kum 3 liemta sung khan Sukhois 3 thangsain Indian Air Force (IAF) indona vuongna 20 in tuoksiet an tuok a, hi leia sawrkar sum inhmang chu Rs. 386 crore le civil mi han an inhmang thil chi tum tum Rs. 4.43 lakh vela riruong a nih tiin Defence Minister Manohar Parrikar chun zani hmasa khan Lok Sabha an hriettir.

EMPLOYMENT NEWS

UNION PUBLIC SERVICES COMMISSION (UPSC) chun November 1, 2015 khin Combined Defence Services Examination (II), 2015 huoihawt a tum. Inhnikna nei hai chun thu chieng lem Employment news July 25­31, 2015 issue le SSC website: www.upsc.gov.in ah hmu thei ni bawk a tih. Application hi online in www.upsconline.nic.in ah August 14, 2015, 11:59PM chenin peklut thei ning a tih.

Name of the Course & vacancy

1. Indian Military Academy-200 ,: 2. Indian Naval Academy -45, 3. Air Force Academy, Hyderabad-32 , 4. Officers Training Academy-175 , 5. Officers Training Academy -11.

IMA le Officers Training Academy a ding hin thiemna Graduate ni a tul a, Indian Naval Academy a ding hin Degree in Engineering le Air Force Academy­a dingin Degree with Physics an Mathematics at +2 annawleh Bachelor of Engineering ni a tul.

-----------------------------------------------------------------------------------------------------

VAWISUN THUPUI

Ka hung tlai hin inphat ka ti cheh a “Lalpa chu tu am a na?” ti hlau rawi ka tih, Annawleh, ka hung pasiet hin inru rawi ka ta, Ka Pathien hming hi hrilsietnain hmang rawi ka tih.  ­ - Thuvarhai 30:9

Editorial: Nundan siem that le sukdanglam

Thangtharhai lai hin sie le tha hrietna tak tak neia nun puitling le inzaum nei nuomna hi ei  nei tawknaw amani ding aw ti theiin a um. Pathien tina tak tak le khawvel thilah khawm tum mumal neia principle felfai tak nei lemlo hi a tam lem ei ni ta an naw mani ti thei hiel a nih. Ei ram le a mipui hai hin moral reform el ni ta lovin moral transformation hi ei mamaw takzet ta niin an lang. Lungril taka Pathien tina nei lo, ram le hnam hmangaina tak tak nei lo, hi khawvela ei dam san le ei lekha inchuk nasan khawm ngaituo le invawi em em nei hran lo, a pawngpawa insuk changkang em em el hi tiem seng lo ei inkat nuk el ta niin an lang. Hi l;ei hin a chang chun nu le pa hai ta ding chun beiseina meiser hi a thi tep tep hlak.

  

Ienganga lekha thiem, hausa le inchuk sang khawm ni inla, ei nunah rigumna, indikna le inzaumna ei nei sinaw chun hlutna nei loin, mihai nui sukzatu el ei hung ni ding a nih. Chuleiin, indikna, ringumna le inza kaina ding a ni phawt chun tia chan a tul leh chan a, muolpho a lo tul khawma muolphopui ngam ei ni a tul. Thalaihai chau ni lovin thangthar, nu le pa intihai chen hin ei nun dan ei siem that le sukdanglam nuom a um takzet a nih.

  

Sap thuvarin, ‘If wealth is lost, nothing is lost; If health is lost, something is lost; But if character is lost, everything is lost” a lo ti angin ei mihriem nuna pawimaw tak chu ei nungchang le inzaumna inhmang hi a nih. Mihriemhai ei indittawkna, tha ve tawk le tling ve tawka ei inngaina le ei inhrietna hi ei inhmang a ni vai chun ei ta dingin hi khawvela hin beisei ding vang ta hleng a tih. Hi lei hin mi var hai chun an nun hi a tha le ditum zawngin an lo khal hlak a nih.

  

Mihriem inzaumna pawimawzie hre lovin mi tam tak chun hi khawvel parmawi tlanin an nun an lo chan ta hlak a, a pawi khawp el. A bik tain Vai ram khawpui lien a um mek hai lem chu ei fimkhur zuol a tul. Mani ram anga nu le pa uopna hnuoia khawsa ei ninaw leiin thil iengkim a zalen em em a, sum le pai hmanga inhawichenna chi tinreng a hung inlang ur ur hlak bawk si a. Mi tam tak chun Vai rama an um leiin Pathien an theinghil ringawt hlak. Thenkhat lem chu mani hnam le Society theinghilin; hnam le society thil thawna haiah an thang ngai nawh. Hiengang mihai hi mi hlawtling an um ngai meu nawh.

  

Ei moral ei siem thatna ding chun ei thil ngaisang tha lo tak takel, ei mimal, ei society ta dinga tha lo em em hai laka ei insukfihlim a tul. Mihai thaw lei ela thaw ve lo dinga ei fesan ngam a tul bek bek a nih. A bikin nunghakhai ei fimkhur zuol, ei insum hram hram le ei moral el chau ni lo, ei nun le ei society hming sukse thei ding thil hrim hrim thaw lo hram hram ding a nih.

          

Khawvel hmasawnna le changkangna thil hai khawm ei hmang thiem nuom a um. Tuta hmaa ei lo hmu ngai lo, ei la hriet ngai lo le ei la nei ngai lo hai a hung suok thar a, hmasawnna le changkangna chitin rengin a mi hung nuoi a, a mi la hung nuoi pei ding a nih. Amiruokchu, hieng laizinga thil pawimaw tak pakhat chu, khawvel hmasawnna ( meterialism) a ei inthang hrat  hle lai hin a pawimaw tak morality ah ei tlahnuoi pha em em niin an lang a. Chun, khawvel hmasawnnain a hung rasuok hai laia tha lo em em le ditum lo takel chu thabona le um awl nuomna hi a nih. Sawl taka thaw nekin awlsam le zangkhai thei ang taka thawsuok nuomna ;lungril a min puttir hlak a, thil thalo a hung rasuok ta hlak a nih.