Pathien ṭhuoina zar chau in Hmar ṭawng a magazine “Sikhawvar” hi insuotheia ei um leiin ei Pathien kuomah lawm thu ei hril a nih.
Hmar ṭawnga Magazine suok tahai an ṭha in ei lawm hle hlaka, nisien khawm an dam sawt rak ngainaw leiin pawi titak in ei thlir liem nawk el hlak anih, ti chu a hre tuhai vawng ei nih. Chuleiin tuta Sikhavar khawm hi ahmel ei hmu chara inthawka mi lungrila hung suok hmasatak ding chu “ieng chen am a dam rek ding aw?” ti chu ni ngei atih. Chuleiin aṭha tam asie tam dam sawt in puitling sien nuom a uma, Chuleiin ei theitawp suoin ṭhangla tlangseng a suk hring ngei tum chu ei renga ei maw phurna ah ngai inla nuom a um hle anih.
AHMING: Ahming hi “Sikhawvar” (Morning Star) tia in buk a nih. Asan chu Zanthim satak hnuoia inthawka khuo ahung var ding huna hung varhlak ana, Am a ahung inlangpha chun khuo avar tading anih, ti chu mitin in ei hriet ang bawkin Sikhawvar magazine a hung suok tahin chu Hmar hai lai khuo var tak tak tasien ti lungrila inbuk anih, ama nina a thil indiksa um anga ei duthusam a puitling beiseina a ahming khawm ei phuok anih.Kum 1980 vel laikhan Missionary Pakhat Riang (Tuikuk) hai lai sin a thawa, Sungkhat chu naupasal an in dam thei reng reng dala, an bei adawng hle hnungin an nule pa tartieng naupasal pakhat an neia, ahminga Chintarai an saka, aum zie chu “Lungngaipa” amanih eini phuok chu nisien “Rienga” ti nithei atih. Ala hriselnaw hle nawk nghala, Anu le pa hai Kristiena an inpe ta bawk “Naupasal pakhat kau neisun hi damsuok zo hmel aput naw khawpel a mi ṭawngtai pekla, Ahming khawm mitleng pek nghal rawh” anti taha, Pastor pa chun a ṭawngtai peka, Ahmingkhawm an thleng peka “Lalsandam tiin. Pathien in mal sawm ningei atih, Ahung hrisela tlangval piengṭhatak le hrat takel a hung na, anu le pa vuihlumtu niin kohran a khawm mi tangkaitak a hung nita pei anih, Ei magazine khawm hi chuong ang chu nisien ei nuom hle anih.
A THILTUM: Magazine thil tum hi chu ziek tam ngailo in mitin hrietah ngaiel thei anih.
Apakhatna a chun chachinbu thla tina suok ei nei mumal ta naw leiin nei ve hrim hrim inla ti ania, Tlawm ngai thil thu khawm, einei ve hrim hrim theina dingin ṭhang la tlang inla ti anih.
Apahina a chun ei mi thiem hai le Ram le hnam in vawitu hai lungrila mipui ta ding le mimal ta dinga thil ṭha le thil hlutaktak ngaituona a ankhawl, uṭawk tur vawna in ṭhat hnempui hai sien, chu semdara ding chun Magazine nei aṭul anih, Semdarna loh a um chun aṭawpel dingkha semdara aum chun thil nasatak a thaw ding ani leiin ei tul tak meu anih ti anibawk.
Apathumna a dingchun hi magazine hmanghin Mithriem, Mivar, Ngaituonanei hai le lekha ziekthiem haiin inphal taka mipui vantlang, Kohran,organization hrang hrang, students hai, nunghak tlangval, khawsung sungkuo le mimal chen ta dinga thil ṭha an nuom hun huna an tarlang a an semdar theina ding a buotsaih ani bawk.
Apalina a ding chun inhriet tuona ṭhatak a um theina ding le mipui tadinga thilṭha intluntu nia (Social evil) thil thalo hai suk retu dinga hmangruo ṭhatak nibawk sien ti anih.
HLAMZUIA THI (Premature death) A THI NAW NADING: Hmar ṭawng hlamzuia thi (Premature death) ti umzie chu kumkhat khawm tling hmanloa naute thi hai kha an kodan ṭawng kam ahmang hlak chu anih. Chuong anga ei magazine a thi el nawna ding a thil pawimaw hai chu hieng hi anih:
Editorial Board: haiin nasatakin ṭhang anlak a tula, business oriented el niloa, Mipui ta dinga ṭhahnem ngaitak a an thaw atul anih.
Contributing Article ziektu le thu thawtuhaiin taimatak le inphal taka an thuziek hai le an ngaidan hai athlawna an thawlawm aṭul hle in ngen an ninghal bawk ani (Ramchangkang a hai chun Articles hai hi inchawk amani aziektuhai lawm man pek hlak an na, eini ruok chu hre ve bawk inla khawm ei la theinaw leiin kut ei la daw anih).
Agents hai popo in mani area sunga ṭhahnem ngaitaka semdara aman lakkhawna thuah taimataka mani ta ngei ani ti hrea ṭhang la a, thil atlungna ding indik takah a hun taka intlungtir dinga ṭhang lak seng ding anih.
Mipui tiemtuhai: Mipui tiemtuhai ei ṭawnga magazine umsun hai hi (asiet athat thu chu thudang nisien) lak ve le inchawka tiem ve hrim hrim ding anih. Ram hnaina deua hai tading chun sale ningata, aman peka lak el dingin, Ram hla deu hun rem chang naw huna (Communication gap) thaw theilo thut um theina a chun (subscribe system) kum khata lakman pek chia sem ningata, Advance in amanih kumtawpa mani indik taka ei lak man ei pekseng nuom a um. Chuonga ei thawseng chun ei Magazine hi hlam zuiin thi naw nih.
---------------------------------------------------------------------------------------------------------------------------------
Sikhawvar Magazine dit hai chun karthara inthawk'n ahnuoia hming tarlanga umhai kuoma khun hmu thei ning atih.
Delhi: William R Darngawn (91 9811357049)
Shillong: Simon L Infimate (91 9436729100)
Bangalore: Robert L Sungte (91 9900911963)
Aizawl: Darsanglien Khawbung (91 9612521404)
Silchar: Lalramsan Hmar (91 9508992960)
