Responsive Ad Slot

Hmasawnna Thar | 23 May, 2015

Saturday, May 23, 2015

/ Posted by VIRTHLI HMAR
Tuolsung:Headline
BJP thlanglal an ni chun Block tina Skill Devpt. Institution le Football Stadium siem ning a tih ­ - Sonowal , Union Sport minister
CCPUR: June 1, 2015 nia MDC election hung um ding le inzawmin zani zantieng 2:00PM khan BJP chun YPA Hall, N. Lamka hmuna Public meeting/campaign an nei. Hi huna hin Sarbananda Sonowal, Union Minister i/c for Youth Affairs & Sports, Govt of India Chief Guest in a thang a, Functional President in Th Chaoba Singh, State President, Tapir Gao, National Executive Member bakah Guest of Honour in Sh Premananda Sharma, State Gen Secy (Org); M.Asnikumar Singh, State Gen Secy (Adm); L.Bashanta Sharma, State Gen Secy (Media); V. Hangkhanlian, Former Minister; T.Gouzadou, FormerMinister;Chungkhosei Haokip, Former Minister; TT Haokip, Former Dy Speaker; Ngursanglur, Former Minister le Lalboi Lhungdim hai an thang. Hi huna hin CCPur district­a BJP candidate hai an thang kim vawng a, M.Asnikurmar Singh, State Gen Secy (Adm); S.Premananda Shamra, State Gen Secy (Orgn); L.Bashanta Sharma, State Gen Secy (Media); Tapir Gao, National Executive Member le Sarbananda Sonowal, Union Minister han thuhrilna an nei.


Mr Sarbananda Sonowal chun, sawrkar siemna ding mipui kuta innghat a nih ti chu mipui han in hriet chieng hle ka ring a, ADC election a hin BJP in hlawtlingna an chang chun Block tina Skill Development Institution sie/hawng ning a tih tiin an tiemkam (promised). Prime Minister inrawinaa BJP thuoitu hai chun NE (hmarsakbiel) hi an ngaisak a ‘top priority’ an pek bakah MP/Minister hai khawmin thlatin NE sir ding le an department hnuoia scheme le project hai thaw dinga ti an nih. MDC election huna hlawtlingna changa sawrkar an siem chun ama department hnuoiah CCPur district­ah football stadium 1 siem ning a tih tiin an tiem bawk.

Tapir Gao chun, ADC eletiona thlangtling BJP MDC hai central le inkara palai ding an ni thu, tukum ADC election­ah SoO group hnuoia um party le Organisation hai inrawl lo dinga ngenin, vangduoi thua Army han an lo kap hlum chun BJP in mawphur naw nih. Tutum ADC election­a mipuiin BJP power an pek naw chun kum 5 sung mipuiin harsatna an tuor ding thu, BJP in sawrkarna an chel chun tlangmi hai ta dinga inthlakdanglamna a hung intlun ding a nih tiin a hril.


HSA Muolvaiphei in candidate hai common platform an siem pek
Sela Darngawn
CCPUR: HSA Muolvaiphei Unit chun Zawlbuk Today Weekly newspaper leh thangruolin May 21, 2015, 7:30PM khan “Know your candidate” ti thupui hmangin HSA CCPur Jt. Hqrts. hrietpuinain MDC Election hung u m ding le inzawma 19­Saikawt MDC biela candidate Pu Lalhrillien (Ind.) le Pu Darsiemlien Ruolngul (Ind.) hai common platform a buotsai pek a.


Hi huna hin HSA CCPur Jt. Hqrts hotu president Lal­tanpui le Vice President Pu Zaua hai bakah HSA Manipur Education represent in Pu Robert L. Hmar; HYA Gen. Secy. Pu Francis Songneilien Songate le Muolvaiphei VA han an huop ve.

Tv. Immanuel Ramngailien Lungtau, HSA Muolvaiphei President in fekhawm hai lawmlutna a nei a, hi huna hin Pu Hrila le Pu Darsiemlien han thuhrilna an nei.

Pu Lalhrillien chun, thlangtlinga a um nawk chun a hma neka hrat lem le a thiemna le varna hai po po hmanga mipui ta dinga sin a thaw ding thu a hril a. Pu Darsiemlien Ruolngul chun thlangtling a ni chun sawrkar a inthawk hamthatna mipui han an dawng ding ang an dawng theina dinga hma a lak ding thu a hril.

Hienang programe hi tuta hmain la buotsai ngai lo a ni leiin fekhawm hai chun an hlawkpui in hmatieng thaw nawk pei tha an ti thu an hril. Hi hun hmang kar lakah Nk. Christina Sakum in mipui hai hlain an awi a, Upa Thuomkap in tawngtainain hun a khar.

Truck eksiden­ah Driver a hliem
CCPUR: Zani hmasa zan dar 9:00 vel khan Thanlon Sub­Division sunga Khajang le Aibulon khuo inkarah Cement phur Truck pahni inzui hai laia Shaktiman Truck pakhat chu changsuolin­a eksiden a, a driver Thanghlun s/o (L) Thansang of Vengnuam, N. Lamka chu Truck­a inthawk an chawmdawk hman a, sienkhawm a lu le hmai haiah a hliem a, zani zingkar 9AM khan District Hospital hung phurtlung a ni a, doctor han X­ray lain iemanichen an enkawl zoin In tieng infetir a nih. Shaktiman hi Cement bag 120 vel phura May 21, 2015 khan Aibulon pan a nih.

Election Campaign flag­off le campaign nei
CCPUR: ADC Election hung um ding le inzawmin zani 7:00AM khan Lamjang lal Suankhogin chengnain­ah 22­Haopi Range MDC biela Independent candidate P. Kamkholal ta dinga campaign nei a ni a, hi huna hin 10­Tuivai ADC a Independent candiate Langkhanpau Guite in thuhrilna a nei.
Kamkholal chun development fund tum tum a ni ding ang taka infetir a nuom leia ngir a ni thu a hril . Langkhanpau Guite chun, Congress thlazar hnuoia kum 5 sung MDC dinga thlangtling nisienkhawm tlangmi hai thil ngiet tum tum ngaisak a ninaw lei, DCC election­a UPF/KNO election a pawlp­ui ditna anga candidate tam lem Independent candidate­a ngir an ni thu, a hril.

Chun, zani 11:00AM khan 21­Sangaikot DCC­a INC candidate le sitting MDC Tongkhokai Baite chengnainah Election campaign kick­off le Flag keipharna nei a nih. Hi huna hin Singngat MLA Ginsuanhau le 39­Sugnu A/C MLA K. Ranjit han an uop a, mipui tam tak an fekhawm.
Tongkhokai chun a term hmasaa a sinthawna hai report a pek. Election huna mipui han an dit tak candidate seng an vote theina dingin venghimna khau taka thaw a ni ding thu a hril. Ginsuanhau chun, tukum MDC election ding hi pawl le mimal bakah Kuki Inpi Manipur khawmin thienghlim le fel taka nei an nuom thu an puong ta thu a hril.

Election huna hmang ding motor man
CCPUR: June 1, 2015 nia MDC election hung um ding le inzawmin Police, DRDA staff le District Transport Office thangruolin zanita inthawk khan motor an man tan. Motor man hai hi an motor lekha (documents) hai lakpek an ni a, May 25, 2015 nia in report dinga inthlasuok nawk an nih. Zanikhan Peace Ground, Tiddim Road le Phailian haia motor man khawm an nih.

ECT Graduation
CCPUR: Evangelical Theology, Nehru Marg, CCPur chun zani 10:30AM khan Graduation­cum­Commissioning Ceremony an hmang. Hi huna hin Rev. Huolthangsei Thiek, Executive Director, EAC,(ECCI) chun mi 9 hai Master of Divinity (M.Div); Mi 18 hai Bachelor of Theology (B.Th) le mi 2 hai Diploma in Theology an hlan.


Headline
Vawisun 11 AM hin Ms J. Jayalalitha in Tamil Nadu CM dinga sesamna a nei ding
CHENNAI: Zani zingkar dar 7 a inthawk khan AIADMK Headquarters, Chennai­ah AIADMK Legislature party meeting nei tan a ni a, minutes 10 sungin an Party Legislature Party Leader dingin Ms J. Jayalalitha lungruol takin an thlang. Hi meeting a hin an party MLAs pahni, pakhat damnawna lei le pakhat lunginah an tang leiin an thang thei naw a, an Party MLAs 148 hai an thangkim vawng. An Legislature party leader ding hming hi an CM ni lai O. Panneerselvam in a proposed a, an power minister Natham Vishwanathan in a seconded. An CM thar ding an thlang zo hin Panneerselvam chun CM a inthawk an ban ding thu a puong nghal a, hi zo hin J. Jayalalitha chengna inah fein an resolution copy a pek a, hi zo hin an Governor K. Rosaiah chengna in a pan a, zing dar 8:15 velin CM a inthawka an banna Governor kuomah a pek a, Governor khawmin ama le a minister­hai inbanna hi a pawm nghal thu a lo hril.

Ms J. Jayalitha (67) chun zani chawhnungtieng dar 2 khan an Governor, K. Rosaiah a van hmupui a, sawrkar a siem thei thu le sawrkar insiemtir dingin a ngen a, a ngenna chu pawmin K. Rosaiah chun Ms J. Jayalalitha chu sawrkar siem dingin a fiel nghal. Hi dungzui hin Ms J. Jayalalitha chu vawisun 11AM hin Madras University Centenary Hall­ah Tamil Nadu Chief Minister dingin sesamna nei a tih.
Vawisuna Ms J. Jayalitha in Tamil Nadu CM dinga sesamna a nei huna hin Ministers 28 in sesamna an nei ve nghal ding a nih. Ministers dinga sesamna nei dinghai laia pahni chu a thar ning an ta, 26 hai chu Ministry hmasaa minister lo ni tahai anni ding a nih. Ministry hmasaa Minister lo ni tah tuta tuma thang ta lo ding hai chu Mr M.S.M. Anandan le Mr Senthur Pandiyan hai an nih. Ms J. Jayalalitha hin Tamil Nadu Chief Minister sin a chel a vawingana ding a ni tah.

Imphal
Global Youth Icon Award, 2015 dawng ding hai lai Manipur mi
IMPHAL: Global Youth Icon Award, 2015 dawng dinga thlangsuok mi 3 hai lai Manipur mi, Kangujam Karnajit Singh (24) of Basikhong khawm a thang sa. Karnajit hi Nepal­a Simkhawlei inhning leia harsatna tuortuhai sawmdawl dinga Manipur a inthawka Nepal­a zu fe mi 15 (Youth Disaster Response Team) Chef­de­Mission a nih. Hi Award dawng dinga thlanga um danghai chu Nobel Peace prize dawngtu Malala Yousafzai le Felix Finkbeinen (13) hai an nih. Felix hin kum 9 a nia inthawk thing maktaduoi iemanizat a phun ta nia hril a nih. Hi Award hi July 25, 2015 khin Marg Swarnabhoomi, Chennai­ah India President hlui Dr APJ Abdul Kalam in inhlanna nei a tih.

Thu indawnchieng dingin mi 32 thuoi
IMPHAL: Zani 11AM­12:00Noon inkar sung khan Imphal West District Police Commando te4am in Mahajid Road, Paona Bazar, Imphal area sungah dappui an thaw a, thu indawn chieng dingin mi 32 Imphal Police Station­ah an thuoi.
Darkar 24 Manipur Bandh tan
IMPHAL: Zani zanrila inthawk khan Mao Council chun darkar 24 sung aw ding Manipur Bandh an thaw tan a, hi bandh hin May 23, 2015 zanril chen huom a tih. Hi bandh hi Manpur a Civil Society Organisation tum tum han an thlawp thu an puong. Dzuko Valley, Senapati District, Manipur huop sunga ramri buoi chingfel dinga sawrkar an ngennaa bandh hi an thaw a nih.

Ralthuom tam tak dapdawk
IMPHAL: Zani hmasa khan 13 Assam Rifles han Tamenglong District sunga Mukti Khullen­ah ralthuom tam tak an dapdawk. Ralthuom an dapdawk hai lai M­16 Rifle mu 885, Mortal Shells 6, Lethode bombs 2, Hand Grenades 4 le IED siemna hmangruo kg. 1 a thangsa niin AR thusuok chun a hril. Chun, May 21, 2015 zan khan Tamenglong District a Nungba Police Station huop sungah NSCN (IM) le ZUF pawl an inkaptuo a, a tu tieng tieng khawm thi le hliem an um naw niin ei thu dawngna chun a hril.

Nodal Officer in L. Kailun
IMPHAL: June 1, 2015 a ADCs 6 haia inthlangna hung um dinga venghimna sin tienga mawphurna cheltu dingin (Nodal Officer) in ADGP, L. Kailun, IPS ruot a ni a. Inthlangna ralmuong, zalen le thienghlim taka nei ngei a ni theina dingin Nodal Officer le a thangruolpui han theitawp suoin hma an lak mek a nih tiin Th. Chitra Devi, Secretary, State Election Commission chun a hril.

Typing Test hun siem danglam
IMPHAL: May 22, 2015 zanrila inthawka darkar 24 sung Manipur bandh um leiin High Court of Manipur hnuoia LDA/LDC sin lakna dinga Computer Typing Test May 23, 2015 a nei dinga ti chu May 25, 2015 nia nei lem dinga siem danglam le May 24, 2015 nia Computer typing test nei dinga tihai ruok chu a pangngaiin nei ning a tih tiin Dy. Registrar, High Court of Manipur chun inhriettirna a siem.

Others:
Home Ministry in Notification an suo
NEW DELHI: Delhi CM, Arvind Kejriwal le Delhi Lt. Governor Najeeb Jung han Power an inchu buoina le inzawmin zanikhan Union Home Ministry in Notification an suo. National Capital Territory, Delhi sunga hin Services, Public Order, Police le land chungchang haiah Delhi Lt. Governor chun thuneina a nei ngei a, sienkhawm Delhi CM ngaidan le a thu khawm a lak a tul. Chun, Central Government hnuoia Officers le thawktuhai chungah Anti­Corruption Branch, Delhi in thu a nei khum ding an nawh ti thu hai hi Notification a hin zieklang a nih.

J&K ah Heroin Rs. 12.5 crore manhu man
JAMMU: Zani hmasa khan Police han Ajeet Kumar of Khour village, Jammu district chengna in an dap a, heroin kg. 2.5, international market rate­ah Rs. 2.5 crore manhu dapdawkin an man. In neitu Ajeet Kumar chu a lo tlanhmang hman. Heroin hi Preeto Devi inpuongnaa inthawka man a nih. Preeto Devi hi Police han May 8, 2015 a kha Heroin kg. 4.15, pawisa fai Rs. 8,94,500 le rangkachak thi leh an man a nih tiin Naresh Singh, SDPO, Akhnoor chun a hril.

Mon district­ah zan curfew zam
KOHIMA: Kum 14 sung zet India sawrkar le NSCN(K) han inkapchawl (ceasefire agreement) an nei hnungin NSCN(K) in March 28, 2015 a inthawk Ceasefire Agreement hi an hnukkir bakah hmun hran hran haiah Security Forces hai an lambun leiin Nagaland le Arunachal Pradesh, Assam le Myanmar inrina zula um Mon District sunga District Magistrate, Mon District chun zan Curfew (6PM­5AM) a zam. Chun, Mon district sungah civil mi han army uniform ang annawleh an hak le an zawr khap a ni bakah sipai le Police hai khawm an chawl sung chu hiengang sil le bil hi hak lo dinga ti an nih. Zan curfew hi Order thar um nawk hmakhata hmang dinga ti a nih.

Bawngsa fa lova in thi ding chun Pak. ah fe ro: Naqvi
NEW DELHI: Inhmang le a hlawk thu a ni nawh. Bawng that le a sa fak hi Hindu sakhuo zuihai ta ding chun theida um takel, an ringna le sakhuo thil a nih. Bawngsa fa lova in thi ding a lo ni leh Pakistan ah fe el ro tiin Union Minister of state for Parliamentary Affairs, Mukhtar Abbas Naqvi in zani hmasaa “Manthan” Conclave a thu a hrilna huna a hrillang.

Sa peltu 1 kap hlum, 2 man
MORIGAON: Assam rama Morigaon district­a Pobitora Wildlife Sanctuary a chun zani hmasa zan khan dan lova sa peltu mi 1 kap hlum a ni a, midang 2 man an nih tiin zanita forest official thusuok chun a hril. Hieng mi pathum hai hi Samak kap dinga sahuona lut tum an ni a, Pagladuba forest camp bul lai forest guard hai leh intuok fua an inkaptuonaa mi 1 hi kap hlum le 2 dang hai man an nih tiin Sanctuary Ranger Ashok Das chun a hril. An kuta inthawk Rifle 1 le a mu iemanizat zet man a ni a, Nagaland­a inthawka hung an ni ringhla a nih tiin an hril.

Boruok lum leia thi mi 100 chuong
NEW DELHI: India ram hmun hran hrana tulaia boruok lum taluor tuorzo lova mihriem thina tuok chu an pung pei a, tuchena thina tuok chu 100 an chuong ta niin ei thu dawngna chun a hril. Andhra Pradesh le Telangana ah mi 65 le Odisha ah mi 23 an thi ta a, a danghai chu State dang danga thi an nih.

Telangana in Bus thar 500 inchawk a tum
HYDERABAD: Andhra Pradesh State Road Transport Corporation (APSRTC) chu May 28, 2015 khin Corporations pahniin an inthe ta ding a nih. Hi umzie chu Telangana state in Telangana State Road Transport Corporation (TSRTC) a hranin an nei ta ding tina a nih. Telangana State sawrkar chun TSRTC hmang ding Bus thar 500 inchawk ning a ta, Bus thar 500 inchawkna dingin Rs. 150 crore sie (allocated) a nih tiin Telangana Transport Minister, P. Mahender Rao chun a hril.

Namrup ah Ammonia­Urea Plant indin
NEW DELHI: Zani hmasaa Union Cabinet meeting chun Namrup, Asam­ah Ammonia­Urea Plant indin a remtih. Hi thil hi Brahmaputra Valley Fertilizer Corporation Limited (BVFCL) suk hmasawnna dinga thaw a nih. Chun, Union Cabinet meeting chun Public Private Partnership (PPP) basis in Namrup, Assam ah Ammonia­Urea Complex thar indin dingin a rel bawk.

Shillong mi in Mrs India Asia Int. Global title
SHILLONG: May 17, 2015 nia Residency Club, Pune hmuna Mrs India Asia International Global 2015 beauty pageant neia chun Shillong mi Mrs Nupur Saigal, Manasi Gulati of Mumbai le Anu Bansi of Delhi hai chun Mrs India­Asia International Global, All Nations le Planet 2015 title hai an lak. Nupur Saigal hin subtitles pahni Mrs Finesse le Mrs Talented hai a dawng sa bawk. Hieng winners pathum hai hi June 15, 2015 a Malaysia hmuna international level pageant­ah India ram aiawin hang thang an tih.

Japan le China hai thangpuinain Bullet Train
NEW DELHI: Japan le China hai thangpuinain India ramah Bullet Train pahni intlantir dinga hma lak a ni a, a hung puitlingna ding ruok chun hun la awsawt met a tih tiin Union Railway Minister Suresh Prabhu chun a hril. Japran thangpuinain Ahmednagar­Mumbai inkar le China thangpuinain Delhi­Chennai inkar haiah Bullet Train hi in service tir tum a nih. Chun, Express train­hai speed khawm tuta neka suk hrat tum a nih tiin Suresh Prabhu chun a hril.

Rijiju in Congress thuoinaa UPA an tum
NEW DELHI: India hmarsak biela helpawl group tum tum an pung peina san chu Congress thuoina hnuoia UPA sawrkar rorel suol, a sukrimsi le a ngaitha lei a nih tiin Union Minister of State for Home, Kiren Rijiju chun UPA sawrkar chu intumin maw an phurtir. Hi thu hi zani hmasaa BJP Youth Wing worker­hai hmaa thu a hrilna huna a hril a nih.

Kum 8 miin PM kuomah thangpuina
AGRA: Kum 4/5 lai zet lung natna leia bawrsawmna le harsatna nasa tak lo tuor tah, nuhmei naupang kum 8 mi, Class­II inchuklai, Tayyaba chun PM Narendra Modi lekha a thawn a, a natna laka a hung dam suok nawkna dinga thangpuina pe dingin a ngen. PM chun hi ngenna hi a ngaisak nghal a, Delhi sawrkar chu hi naupang enkawlna sin hi thaw dingin an hriettir. Hi dungzui hin Delhi sawrkar chun Guru Teg Bahadur Hospital chu Taiyyaba enkawlna sin lo thaw tan nghal dingin thu a pek. Tayyaba enkawl damna dinga sum seng zat ding hi Rs. 15­20 lakh vel a tul ding niin doctor han an hril. ‘TV ah PM thu hril ka en a, mihai a thangpui nuom ti a tawngbaua inthawk ka hriet leia thangpui dinga ngenna lekha ka thawn a nih’ tiin Tayyaba chun a hril.

Jindal, Rao le Koda hai bail­a suok remti
NEW DELHI: Zanikhan Jharkhand state a Coal Block allocation case­a lungina khum Industrialist Naveen Jindal, Union Minister hlui Dasari Narayan Rao le Jharkhand CM hlui Madhu Koda hai chu Delhi­a Special Court in personal bond Rs. 1,00,000 seng thawa bail­a an suok a remti pek. Amiruokchu, hieng mi 3 hai hi phalna bovin India ram an suoksan phal a ninaw a, case le inzawma hearing chu June 1, 2015 ah nei nawk ning a tih. Coal Secretary hlui H.C. Gupta thangsain midang 12 hai khawm bail­a an suok phal pek an nih.

Pistol leh pasal 1 man a nih
DIMAPUR: May 20, 2015 chawhnung dar 2:20 vel khan Dimapur, Nagaland khawpui sugna Overbridge bulah Puluto V. Shohe (29) s/o Viyito Shohe of Hokhezhe village, tuta Burma Camp, Dimapur a cheng chu Police han .32 Pistol (B/Arsenal No. 08523) pakhat leh an man a, Dimapur East Police Station­ah case registered khum a nih tiin Police thusuok chun a hril.

Tourist Spot lien haiah Wi­Fi service
NEW DELHI: India ram pumpuia tourist spots lien zuol haia chun sawrkarin internet hmang theina Wi­Fi facility sie vat a tum tiin Information technology minister Ravi Shankar chun zani hmasa khan a hril. Wi­Fi facility siena ding tourist spot hai lai Taj Mahal, Sarnath, Bodh Gaya hai khawm a thang. Varanasi ghat­a chun free Wi­fi service sie a ni ta tiin Mr Shankar chun a hril.

Chhattisgarh ah ministers 3 laklut
RAIPUR: Thla 18 a upa Chhattisgarh a Raman Singh CM nina hnuoia BJP sawrkar chu zanikhan Cabinet minister 3 lakluta suklien a nih. Minister thara laklut hai chu, Bhaiyalal Rajwade, Dayaldas Baghel le Mahesh Gagda hai an ni a, an rengin minister 13 an tling tah. Sesamna chu an Governor Balramji Das Tandon hmaah an nei. Hi hunsera hin CM Raman Singh, Assembly Speaker Gaurishankar Agrawal, Ministers, Chief Secretary, Vivek Dhand le officials hai an thang.
------------------------------------------------------------------------------------------------------------------
VAWISUN THUPUI
Hi thu hi ring a um a nih; “Ama leh ei thi ta si chun, Ama leh hring bawk ei tih. ­ 2 Timothe 2:11

Editorial
Ramri humhalna dingin thangruol a tul
Manipur chun ramri thuah buoina hmun pahniah ei nei a, chingfel lovin a la um ve ve leiin ramri buoina le inzawm hin ienganga harsatna le buoina am ei la tuok ding ti ngaituo tham tak a nih. Ramri buoina ei neihai chu Nagaland le Myanmar ram hai leh a nih. Nagaland le ei buoina chu inter­state Boundary a ni a, Myanmar le ei buoina ruok hi chu international boundary a nih. Ramri buoi chingfelna dinga hin Manipur mihai ei thangruol a tul a, ei thangruol naw chun ei ram iemanizat zet ei chan ding niin an lang. Thuvarin ‘thangruol hi hratna a nih’ a ti hi hriezinga thangruol dinga kal ei pentlang nuom a um. Ei thangruol leh dingchang ei ta, ei thangruol thei naw leh inro hle inlakhawm chân tawk ei nei ding niin an lang.

Ei ram humhalna dinga siem that ngai hmasa tak chu ei lungril putdan (morale) hi a ni ngei ring a um. Ram le hnam humhal ding chun ram le hnam hmangaina lungril (patriotism) nei hi a pawimaw hmasa a nih. Lungril taka ram le hnam hmangaina chun fakruk, hlemletna le indiklo taka thil thaw hai a do nghal. Thil chin taluo le a lien taluo a u m nawh. Mi naran a inthawka politician, sawrkar sinthaw a inthawka kutsinthawtu, mani zawn sengah mani mawphurna indik le ringum taka hlensuoktu chu ram le hnam hmangaitu a nih.

Tulai hnai hin ramri buoi leiin boruok a hung lum tan a, ieng ri ri amani hriet ding a hung suok nawk tah. Ramri hi tulai hnai ela buoi a ninaw a, a buoina hi a sawt ta a, tienatlanga buoi tan an ta a, tuchen hin chingfel a la ni nawh. Ei thenum state sung ramri hrula tuhai amani hmalakna lei ela ramri buoi hi invawi thar ding chau a ni nawh. Ramri khawm hril fel thei lo le chingfel thei lova tuchena ei la u m lai hin, ei ram thuoituhai le ei Politician­hai hin thil danga khawm ieng chen chie am ram hi an invawi a, an hmangai tihai hi ngaituo tham tak a tling a nih.

Dzuko Valley a ramri buoina leiin Mao Council chun May 22, 2015 zanrila inthawk Manipur pumpui huopin darkar 24 Bandh an thaw ding thu an puonglang a. Manipur a Civil society organisation tum tum, MPP le Maoist Communist Party Manipur hai chun hi Bandh hi an thlawp ding thu an puonglang tawl. Ramri humhalna ding hin thangruol a tul ei ti ta ang khan, hieng civil society organisation le MPP chau ni lovin Manipur a um Political party po po khawma an thlawp ve ngam a tulin an lang. Chu chau chu ni lovin a state mipui po po hai khawma lungril leh ti takzeta ei thlawp a tul a nih.

Ramri humhalna ding hin tuta Manipur a sawrkarna cheltu Congress Party chau ni lovin tuta Centra­a sawrkarna cheltu BJP le an inthlawppui party tum tum hai khawma mawphurna an nei ve a nih. Manipur­a sawrkarna cheltu Congress Party mawphurna bika an ngai le an sie a ni chun thil indik ni thei naw nih. Ei ram le hnam humhalna ding chun ei rengin mawphurna ei nei seng a nih.

Ramri buoina hi thil inhmaw, inchie sawt le nghak sawt chi a ninaw a, thaw nghal chi a nih. Ei CM in ADC election zo tienga hi ramri buoi chingfel dinga a hril hi chu thil indik le hmalak dan ding indik a ni ring a u m nawh. Hi nek hin hmalak tan nghal ni lem sienla thiltha le buoina lien lem ei pumpel theina lampui a ni ring a um. Ramri buoina hi chingfel vat a ninaw chun Kojiri and Dzuko Land Boundary Resolution chun June 1, 2015 a inthawk National Highways haiah hun tiemchin um lova economic blockade an thaw tan ding thu an hrillang a, an lo thaw tan tak tak a ni chun Manipur mipuihai harsat dan ding chu hrilin a siek naw ding a nih.
Don't Miss
© all rights reserved
made with by Simon L Infimate