Responsive Ad Slot

Hmasawnna Thar | 24 May, 2015

Sunday, May 24, 2015

/ Posted by VIRTHLI HMAR
Tuolsung:
Liensangvung  Award inhlanna hun  hmang
CCPUR: Zani (May 23, 2015), 2:00PM khan Liensangvung Villa, Churachandpur­ah Manipur Board hnuoia HSLC Exam­a mark hmu insang tak HSA member hai kuoma pek hlak Liensangvung Award semna hunser hmang a nih. Award semna programme hi Hmar Literature Society (HLS) Manipur huoihawtnaa nei a nih.
     


Liensangvung Award, 2015 chu pasalah J.C. Zolientluong s/o J.C. Pawltinkhuma/ Lalvarzo (87.2%) of Young Learners’ School le nuhmei­a mark hmu insang tak Lienthangkim Pulamte d/o Lalsiemlien Hmar/ Nemkhanvung (85%) of Douglas Memorial H/S hai kuoma inhlan an nih. Award hai hi Pu Joseph Lalrothang (Retd. ZEO, CCPur) in an hlan. HLS Manipur Treasurer Pu H. Zaneisang chun awardee hai infuina thucha a hril a, Rev. Dr Lalhmuoklien, Executive Member, HLS chun awardee hai ta dinga tawngtaipekna a nei. Hi huna hin award dawngtu hai khawmin thuhrilna an nei ve.
     
Liensangvung Award hi Dr Lalzakung Tusing hai unauin inchukna ngaipawimaw em emtu famtah an pa Liensangvung hrietzingna dinga kum 1990­a an lo indin ta a ni a, tukum hi vawi 25 semna a ni ta a, tuchena hin mi 28 in Award hi an dawng tah. A hma chun mark hmu insang tak pakhat chau pek hlak a ni a, kum 2014 a inthawk khan nuhmei le pasala mark hmu insang tak hai kuoma Award hi pek tan a nih. Award hin sumfai Rs. 15,000/­ le Memento a sawm.

HSLC pass hai lawmpuina hun an hmang
CCPUR: Zani 7:30AM khan St. Peter’s School, N. Lamka chun an School Auditorium hawngna le HSLC Exam, 2015­a hlawtlingna chang hai lawmpuina hunser an hmang. Class X pass hai Pastor H. Ginkhochin, Local Pastor, EBCC Pethuel in tawngtaipekna a nei. Hi huna hin School principal, L. Nenglianlal chun an school­a inthawka subject tum tuma topper mi iemanizat kuoma lawmman an hlan bawk.

PTC CWC member ding 7 ruot
CCPUR: Zani 11:00AM khan PTC Central Working Committee chun Hiangtam Lamka PTC GHQ Office­ah CWC member ding 7 an ruot a, chuonghai chu­ C.Hangshing, MCS (retd); Upa G. Thangchinlian, SDC (retd); G. Thiauzakhup, IRS (retd); Dr R. Sanga; V.Tualzakhup; Thangzamuan Tombing le K. Paukhansuan hai an nih. Hi huna hin executive post tum tum hluotu ding hai khawm sukfel nghal a ni a, General Secretary in John K.Ngaihte; Secretary (Custom & Culture) in T.Khupzadou; Secretary (Organisation) in Chinkhanmang Ngaihte le Secretary (Internal) in Thangzamuan Tombing hai ruot an nih.

Zogal Memorial Shield Tourney tan
CCPUR: UZO GHQ le CDSA huoihawtnaa May 23­June 20,2015 chen aw ding “Zogal Memorial Shield 2015 Football Tournament” chu zani zantieng 1:00PM khan Pu  Ginsuanhau, MLA/Singngat chun khuolliena thangin a hawng. Hi huna hin L.B. Sona, Chairman, ZC; Chinlunthang, President, UZO GHQ hai guest of honour le chief host in an thang. Opening Ceremony huna hin Zogal sat thuoitu lo thi tah 48 hai inzana hun minute khat sung totawka hun hmang a nih.
   

Khuollien chun, tournament hin inhmangaituona, inremna le hmasawnna a hung intlun ngei a beisei thu a hril. Zanita Opening Ceremony­a hin Zoheisa Football Club (ZOFC) le Zenhang Lamka Youth Club (ZLYC) an inkhel a, ZOFC chun ZLYC chu 3­2 in an hne.

EAC CKNP thuoitu ding hai
CCPUR: Zanikhan EAC Council Hall, Rengkai Road, CCPur­ah Missions Chairman Upa  Lalthangvung le Missions Director Rev. Lamkhamlien hai inrawinain kum 2015­2019 sunga EAC CNKP thuoitu thar ding thlangna nei a nih. Chairperson in Mrs Lalthathieng; Secretary Miss Sharonparmawi; Committee members­ Mrs Lalramliani, Mrs Lalsiemvel; Miss Roneihlu; Mrs Rengkpui le Mrs Nemching hai thlang an nih. Thlang thar hai hi Rev. Challienkung in tawngtaipekna a nei.

DCC/DLRC meeting nei
CCPUR: Mr Lunminthang Haokip, IAS, DC, CCPur inrawinain zani 11:00AM khan DC Office­a BRGF Resource Hall­ah Bank thuah District Consultative Committee (DCC)/ District Level Review Committee (DLRC) meeting nei a nih. Hi huna hin March 31, 2015 chena CD Ratio, Dist. ACP achievement, Govt. sponsored schemes hai; Loan recovery, branch thar hawng chungthu le CCPur District­a Cyber crime case thangin agendas 11 hriltlang a ni a, meeting­a hin Bank tum tuma Manager hai khawm an thang.

Headline:
Hmun pahnia inkaptuonaah helpawl 8 kap hlum an nih
IMPHAL: Zani hmasa le zanita Tamenglong District le Ukhrul District sunga hmun pahniah inkaptuona a tlung a, helpawl 8 kap hlum an nih tiin ei thu dawngna chun a hril.
     
Zani zing dar 6 vela inthawk khan Ukhrul district­a Bongbal Khullen area, Keithelmanbi a inthawka hla rak lo, Yairipok Police Station huopsa si, Seijang khuoah 2­Assam Rifles le Thoubal Police Commando thangruol hai le KNF(N) ni dinga ringhla hai nasa takin an inkaptuo a, inkaptuonaa silai ri hi zani chawhnungtieng chen khan hriet a ni a, helpawl 3 kap hlum an nih tiin ei thu dawngna chun a hril. Zani sun dar 12 vel khan SDPO, Yairipok le a rawi han inkaptuona hmun hi an va pan a, thu chieng lem nghak mek a nih.
           
Chun, zani hmsa (22­5­2015) khan Tamenglong district, Nungba  Sub­Division huop sung Khoupum Valley­a Lunsamai village an tiah NSCN(K) le NSCN(IM) pawl an inkaptuo a, NSCN(K) cadre 5 kap hlum an nih tiin ei thu dawngna chun a hril. NSCN(K) cadres han vadung pakhat kan an tum laia inkaptuona hi tlung nia hril a nih. Hieng helpawl group hni hai inkaptuona hi chawhnung dar 2 vel a ni a, hun sawt rei an inkaptuo niin ei thu dawngna chun a hril.

Thlise hrangin thil tam tak a suksiet
IMPHAL: Zani chawhnun g dar 2 vel khan Imphal East District sunga Pourabi Area sungah thlise a hrang a, In, Dawr le thil dang tam tak a mut siet a, Pourabi Umang Lai Area hmuna thingkung lien takel a muttluk a, High Tension electric wires a suksiet pha niin ei thu dawngna chun a hril. Khurai Kongpal area sunga khawm thingkung tam tak a mut kar. CCPur town le a sevela khawm zani zantieng dar 5 vel khan thlipui hrat takin a hrang a, mipui a sukthlabar hman hle.

Bandh in nundan pangngai a sukbuoi
IMPHAL: May 22, 2015 zanrila intahwka Manipur a Civil Society Organisation tum tum han darkar 24 sung Manipur bandh an thaw chun nundan pangngai a sukbuoi pha hle. Imphal le Thoubal haia chun dawr, bazar le sumdawngna hmun hai khar vawng anni a, Police le Security Forces motor ti lo motor dang an tlan nawh. Bandh le inzawma buoina suok a um thu hriet a ni nawh. Mao Council khawmin an bandh thaw an hlip naw a, Mao area sunga khawm bandh a khau hle. Mipui hrietpui lova bandh hnukkir a nih a ti leiin Mao Council President khawm hi Council thupekin an ban niin ei thu dawngna chun a hril.

Police Constable Drugs leh man
IMPHAL: Zanikhan Minuthong Mayai Leikai Development Organisation Volunteers han Hatta Golapati bula Police Constable No. 0915769 Md. Julfikar ali (25), s/o Anjab Ali of Lilong Urup Arapti chu SP mum 280 le N10 mum 2 leh an man. Julfikar Ali hi Maphou Dam a posting lai a ni a, drugs hi Amzad Ali of Lilong Makha Leikai kuoma inthawka an chawk niin a hril.

B.F.Sc. inchuk nuomhai ta dingin
IMPHAL: Directorate of Fisheries, Govt. of Manipur tira kum 2015­16 Academic Session sunga Bachelor of Fishery Science (BFSc.) course College of Fisheries Science, Lembucherra, Tripura­a training nuomhai ta dingin May 25, 2015­June 6, 2015 inkar sungin Application Form hi Directorae a lak le June 9, 2015 chena peklut thei a nih.

Others:
Kelkang harna a la fe pei
AIZAWL: Kelkang khuo, Mizorama harna chu a la fe pei a, tuta kar sunga hi harna sîm dinga mikhuol fe zat chu 15,000 an tling niin ei thu dawngna chun a hril. Aizawla inthawk khawmin tuta kar sung khan Bus 60, Maxicab 50, Commercial motor le private motor 150 velin Aizawl suoksanin Kelkang an pan a hril a nih. Kelkang fe dinga City Bus le Maxicab hire­tu an tam leiin Aizawla chun City Bus fe an khat pha hle bakah Maxicab thlangrama service a tlawm pha leiin passengers han harsatna an tuok pha niin ei thu dawngna chun a hril.

Civil Services Examination, 2015
NEW DELHI: Union Public Service Commission (UPSC) chun Civil Services (Preliminary) Examination, 2015 chu August 23 a nei dingin Notification an suo. Preliminary Examination hi Civil Services Examination le Indian Forest Service Examination a thang dinghai a huomsa ve ve ding a nih. Exam Centres 71 hawng ning a ta, thu chieng lem www.upsconline.nic.in ah hmu thei ning a tih. June 19, 2015 a inthawk online application fill up tan thei ning a tih.

J.Jayalalitha in Tamil Nadu CM
CHENNAI: AIADMK General Secretary, Ms J. Jayalalitha (67) chun zanikhan an Governor K. Rosaiah hmaah Tamil Nadu Chief Minister thar dingin sesamna a nei. Ama ruol hin ministers 28 in sesamna an nei ve. J. Jayalalitha hin zanita inthawk khan a office kaiin Tamil Nadu CM a chel tan nghal.Thla 8 zet chu MLA khawm ni lovin a um a, thla 8 liem hnunga mipui hmaa an lang nawkna hmasa tak chu May 22, 2015 kha a nih.
           
Tamil Nadu Chief Minister hlui O. Pannerselvam chu Finance le Works minister chanvo hai pek a nih. Cabinet ministers dang 27 hai chanvo (portfolios) khawm siem le pek fel nghal an nih. CM le ministers 20 hai hin sesamnain hun minutes 30 neka tlawm an hmang.

Nupui nau 8 nei ta suollui
GUWAHATI: May 17, 2015 khan Ngwalwa village, Peren district, Nagaland ah nupui nau 8 nei ta le lungril buoi ta chu Kiedai Dwasang an tipain a suollui hnungin a tlan hmang a, man tumin Police han an zawng mek. Hi thil tlung le inzawmin Police han case an registered.

Defence Minister J&K­ah an zin
JAMMU: Union Defence Minister, Manohar Parrikar chu ni 2 sung chamin Jammu & Kashmir ah an zin a, zani zingkar khan Jammu a tlung a, Jammu a inthawk Rajouri district a Line of Control (LoC) a va sir. Defence minister hi Army Chief General Dalbir Singh Suhag le General Officer Commanding­in­Chief of Northern Command le Lt. Gen. D.S. Hooda han an zui.

Nagaland­ah Cabinet minister rank Advisor 5
KOHIMA: T.R. Zeliang Chief Minister nina hnuoia Nagaland a NPF thuoina a Democratic Alliance of Nagaland (DAN) ministry a chun May 22, 2015 khan Cabinet minister rank Advisor 5 laklut belsa an nih. Nagaland a DAN sawrkar hnuoia hin CM thangsain Cabinet minister 12 le Parliamentary Secretaries 24 an um bawk. Advisors a lakluthai chu, NPF a inthawk Thongwang Konyak le Naiba Konyak; BJP a inthawk Imtilemba Sangtam le Dr T.M. Lotha; Congress a inthawk S.I.Jamir hai an nih. TR Zeliang CM nina hnuoia DAN sawrkar hi vawisun hi kum khat a tlingna a nih.

Defence Minister J&K­ah an zin
JAMMU: Union Defence Minister, Manohar Parrikar chu ni 2 sung chamin Jammu & Kashmir ah an zin a, zani zingkar khan Jammu a tlung a, Jammu a inthawk  Rajouri district a Line of Control (LoC) a va sir. Defence minister hi Army Chief General Dalbir Singh Suhag le General Officer Commanding­in­Chief of Northern Command le Lt. Gen. D.S. Hooda han an zui.

Tar hnungin Old Age Home­ah an innei
GUWAHATI: Old Age Home, Guwahati a um ve ve Shantanu Kumar Das (73) le Manju Sinha Roy (63) hai chu tar hnungin May 20, 2015 khan nupa tuok ni dingin an innei a, May 25, 2015 khin Guwahati suoksanin Honeymoon hmang dingin Shillong pan an tum. An inneina hi Old Age Home neitu han an buotsai a, an inneina hunsera hin mi 2,200 lai zet an fekhawm niin Monica Sharma, Secretary, Old Age Home, Guwahati chun a hril. Das hi Engineer pension ta le a nuhmeiin a thisan ta a ni a, Karimganj district, Assam mi a nih. Manju hi Lalganesh, Guwahati a um, pasal la nei der lo, a sung han an thisan vawng ta a nih. ‘Ka damsunga pasal nei ta lo dinga kan ngai hnunga pasal nei theia ka um hi ka lawm hle’ ti in Manju chun a hril. Das hin a nuhmei sil le bil le rangkachak incheina hai a tum a, an inneinaa hin Rs. 1,00,000 seng a ni a, hi sum hi Home neitu le hmangaituhai thawkhawm a nih tiin Monika chun a hril.

Pasal pakhat rangkachak kg. 2.99 leh man
AHMEDABAD: Zani hmasa zingkar inhma tak khan Directorate of Revenue Intelligence (DRI) hnuoia Air Intelligence Unit, Customs Department han Sadar Vallabhai Patel International Airport­ah Sadruddin Ansari Safiyullah, Qatar Airways Flight, Doha a inthawka hung vuong chu rangkachak kg. 2.99 leh an man. Rangkachak hi Rs. 82.79 lakh manhu vel nia hril a nih. Rangkachak hi Microwave Oven sunga a thup a nih.

Rel eksiden­ah mi 4 an hliem
GUWAHATI: Zani zingkar khan Assam State a Kokrajhar District sunga Salakati le Basugaon inkarah Sifung passenger Relin a lampui a hraw thel a, a Engine le pindan 5 a tlu a, passenger 4 an hliem bakah a driver khawm na takin a hliem tiin Jayanta Sarma, PRO, NE Frontier Railway chun a hril. Rel engine lem chu vadungah a tla lut. Rel lampuiah thingbak a lo tla thla leia Rel hi eksiden nia hril a nih.

Thla 3 sung TB natna in mi 21 an thi
AIZAWL: January 1, 2015­March 31, 2015 inkar, thla 3 sung khan Mizoramah TB natna leiin mi 21 an thi. Mi 2,703 hai thisen test a ni a, hienghai laia 540 hai chu TB natna invawi an nih ti hmusuok le mi 44 hai chu enkawl dam an ni ta tiin Health Department, Govt. of Mizoram thusuok chun a hril. Mizorama AIDS invawi a tam lem hai chu TB natnain an thi hlak ti hrietsuok a ni bawk tiin May 22, 2015 nia Health Department, Govt. of Mizoram thusuok chun a hril.

Boruok lum leia thi mi 153 an tling tah
HYDERABAD: Telangana le Andhra Pradesh haia chun tulaia boruok lum nasa taka a zuolkai leiin boruok lum tuorzo lova thi mi 153 an tling tah. Boruok lum leia thi mi 153 hai laia 73 hai chu Telangana a thi le 80 hai chu Andhra Pradesh­a thi an nih. Hyderabad­a chun zanita a lum dan chu 44 degree Celsius a nih.

Nepal simkhawlei inhninga thi mi 8,635
KATHMANDU: April 25, 2015 a Nepal­a Simkhawlei 7.9 richter scale a hrata an hning leia mihriem thina tuok chu 8,635 an tling ta a, mi 300 an umna chin hriet lovin an inhmang a; India mi 49 thangsain ramdangmi (foreigners) 89 an thi a, mi inhmang hai lai Nepal mi 240 le ramdangmi 89 an thang tiin Nepal Police thusuok chun a hril.

Iraq kuomah US in Anti­Tank 2,000
WASHINGTON: Iraq rama Islamic State (IS) terrorist­hai donaa hmang dingin US Defence Department in Anti­Tank ralthuom Iraq ramah thawn lut a ta, hieng Anti­Tank ralthuomhai hi haptakar thar khin a tlung hman beisei a nih tiin Steve Warren, Spokesman, US Defence Department chun a hril.
---------------------------------------------------------------------------------------------------------------
VAWISUN THUPUI
A mîn chuktuhai ni ro, kei khawm Krista inchuktu ka ni ang bawk hin.   ­1 Korinth 11:1

Editorial
Politics a chirhak inthekhumnain

June 1, 2015 a Manipur tlangram biela ADC election hung um ding hi candidates tin le political party hran hran hai ta dingin a pawimaw hle. A hmaa ei lo hril ta angin hi election hung um ding hi India rama National party lien pahni, Congress le BJP hai ta dingin a pawimaw zuol bik a, hi lei tak hin an thang a na ve ve ti chu mipuihai hi a hrietu seng ei nih. Manipur a chun Congress party in sawrkarna chelin ro an rel mek a. Sawrkarna chel mektu le roreltuhai hi election­a hin an hrat naw vai chun an sawrkar le an party ta dinga thil inzakum le muolphona hung ning a ta; kum 2017 a Assembly election huna an party hlimthla ding le an party ngirhmun a hung inlang ding a nih. Hi lei tak hin Congress party ta ding chun hi election hi a pawimaw bek bek a, an ta ding chun thang a na ding hrim a nih.
   
BJP ta ding khawmin Manipur tlangram biela ADC election hung um ding hi a pawimaw hle bawk. Hi eletion result hin Manipur­a an party ngirhmun hung tarlang a ta; chu baka chun kum 2016 a Manipur Assembly election hung um dinga BJP hlimthla ding a hung tarlang ding a nih. Hi lei hin BJP ta ding khawmin hi election hi a pawimaw bek bek el a nih. Centre a sawrkarna an chelzing laia hi election­a an lo hrat naw a ni chun an party ta dinga muolphona le inzakum hung ni veng a tih.
   
Tuchena ADC election boruoka chun, Political party hai laia an bei tak ding nia inlang hai chu Congress le BJP le NPF hai niin an inlang. Chun, ADC election lo um ta hlak hai naw ang takin Independent candidate khawmin ADC thenkhata chun rawl nei thei ding khawp ngirhmunah an hung um el thei bawk niin an lang. Manipur history a ding chun Independent candidates an tam tak tum le candidates han Political party hran hran an hnawl tam tak tum a ni ngei ring a um. Iengpo khawm nisienla a pawimaw tak chu thlangtlinga um a ni leiin candidate­hai ta dingin thang nasa taka lak a pawimaw a nih.
   
Political party hran hran le candidates tum tum hai vote zawng dan hi ei hriettlangpui awm ie. Vote campaign­na hi Congress le BJP thuoituhai chun Politics a chirhak inthekhumnain an hmang niin an lang. Hi thil hi ei ram, ei hnam le mipui ta dinga fak ding, hmasawnna ding le entawn ding um lo, thil tangkai lo takel, thatna neka ei sietpui ding nia an lang leiin Vote campaign­na hi tu pawl khawma indemna, insukmuolphona le politics a chirhak annawleh eka inthekhumnain hmang naw hai sienla nuom a um. Chu nek chun mipuihai fak thei zawng, an tangkaipui ding le ei hriet dinga tha hai campaign hlain hmang lem ngei hai sienla nuom a um.
   
Politics a chirhak inthekhumna nekin thu tha, thu lawmum le hmasawnna ei hmu theina ding tiengpang campaign hlain ei ram thuoituhai hin mi hmang pek lem hai sienla chu an thu hril ngaituhai hadam lem ei tih. Entirna’n Union Minister for Youth Affairs and Sports, Sarbananda  Sonawal CCPur­ah an party candidate hai ta dingin vote a hung campaign a, an party ngaipawimaw hmasa tak ding chu “Good Governance” a ni a, ADC election ah an party an hlawtling leh Block tinah Skill Development Institution le Football stadium indin le bawl ning a tih tia a hril chun mipui lawm a hlaw a, Congress party a dem le hril sietna chun mipui a suklawm naw el bakah Congress party mi le sa hai lungril a sukna a, a tangkaina a um nawh.
           
India ramin zalenna (Independence) a hmua intahwka Manipur­a Union Ministers le Central leaders hai Manipur­a an hung inzin rawnna tak kum chu, tuta kum fe mek hi a ni ngei ring a um. Union Minister­hai hung inzin tam leia hmasawn ding ei ni chun hma ei sawn pha hle ring a um. Amiruokchu, a ni ring a um nawh. Ei ram le mipui mamaw ngawi ngawi el chu GOOD GOVERNANCE a nih. Good Governance thaw thei ding chu tu party am a na? ti ngaituo zing puma voter han ei vote ei thlak chu ei thaw ding tak a nih.





Don't Miss
© all rights reserved
made with by Simon L Infimate