'Khawvel Hnena' by ICI Central Choir

CCPur, 9 May 2019, Virthli (ONP): ICI Central Choir in vawizan khan Music Video thar pahnih "Khawvel Hnena" le "Wylwn" chu Gospel Centenary Guest House, Sielmat ah an lo tlangzar tah.

An tlangzar hai laia Music Video pakhat "Khawvel Hnena" hi ICI Central Choir YouTube channel ah en thei nghal dingin Rev. Lalhmingthang, Secretary, Ministries in a tlangzar a, an hla dang "Wylwn" ruok hi chu kar 2 hnung vela en thei dinga hung upload ding ti a nih.

'Khawvel Hnena' hla hi Pu Solomon V. Hmar in a phuok a ni a, music video hi Pu Lalringnghet le Pi Lalramsang Amo haiin an sponsored ani a, Michael Chawnghau in a video hi mawi taka a siem a nih. Hi hla hi Serafim Voices hai khawmin an lo sak ta nghe nghe.

KHAWVEL HNENA

1. Ekdur anthawkin bul kan tan a
Beidawngna leiin mitthli tla hlak sienkhawm
Hieng chen chen i mi thuoi el ta hi Lalpa
Ringtlak le beltlak i lo nih.

_Chorus:
Hi hi a nih khawvel hnena chu
Khawvel hnetu Krista nei hi
A tul chun ka ta dingin Lalpa’n
Ni le thla hai khawm kei ngir a tih._

2. Hmusit le hnengde in ka um a
Vangduoina phurtu hiel a ngai ni lang khawm
Lalpa nang ka kuoma chun i um pei a
I ropuina’n ka sip zo tah.

3. Na theilo taksa lo nei ni lang
Harsatna le rinumna hai tuor naw lang
Lalpa hmangaina hi hmufie ngai naw ning
A chieng zuol hlak tuorna hmunah.

4. Malsawmna lei chaua lawm ni lang
Nuorna ngawtin hringnun hmang zo ngei ka tih
Sienkhawm ka thlarau in Lalpa a hmu tah
Lalpa a chun ka lawm a nih.

(Krista hi a nih khawvel hnena chu)

Hi hla lo ngaitu hai po po malsawmna tamtak dawng dingin ICI Central Choir chun ditsakna an hlan.

YouTube Link: https://www.youtube.com/watch?v=zxByxI0Dl84