~ Dr. Lal Dena
Hmar Biel Seminar kha Hmar Literature Society, HSA Gen.Hqtrs. le Hmar hnam sunga Kohran po po thuoituhai uopna le huoihawtnaa “Thawro, hrilsiet ei ni ta nawna dingin inngir thar nawk ei tiu" Nehemia 2:18 ti thupuia hmangin Senvawn khuo Chanchintha mansapui inbangna hmun ngeiah 5-8 October, 1984 khan nei a nih a. Kohrana ei thuoitu lienhai, sawrkara ei officer lienhai, HSA thuoituhai le Hmar Biel le Vangai tlanga Village Authority member po po deu thawin an uop a. A khuo sung mi tiem sa lovin, khaw danga inthawka mipui fe khawm kha mi sangkhat an hnai khuot. Khang anga inthuruola Seminar ropui kha ei nei nawk thei dim chu! Kha Seminar zo țin tieng khan unaupa Prof. Dr. L. Fimate leh Thanlonah Pu Chana inah kan tlunga, naute thar nuhmeite hmeltha deu hming la phuok lo an nei hlauh a; Seminar Rorelpui tiin hming kan phuok nghal a, tuhin pasal khawm a nei ta nghe nghe.
Hi Seminar-a hin thupui lien tak tak pathum: Education tienga ei sietna sanhai le thawidam dan ding Pu Lalzarlien Darngawn-in in a hril a; Back to the Bible & Christian Family (Bible le Kristien sungkuo hmang dik dan ding) Rev. H.K. Khawlkung le Rev. C.C. Rema’an an hril bawk a; Fak le dawn thua Hmarram harsatna keiin ka ziek ve thunga. Hieng thupui hai hi nithum sung chaih an nih a, thutlukna siemhai le seminar proceeding chu a hnungin L & R Printing Press-in a sut nghe nghe. Thupui pathum hmanga thurelhai kha vawisun chen khawmin an la pawimaw zing. Abikin tlangram sikul siemthatna ding lem chun Pu Lalzarlien seminar paper kha angiel anganin hmang inla thatpui ngawt ei tih.
Seminar thutlukna po po chu hril nawn ta nawng ei ta. Chu laia sakhuo tienga thutlukna pakhat chun “ei rama Chanchintha hung lut ni fie nawk zuola hriet nuom a um a, hi thu buoipui ding hin Dr. Lal Dena ni sien tha kan tih a, a hmu dan chu October thla bo hma ngeiin Follow-up committee kutah hung pe lut sien la; Follow-up committee thutlukna hi Seminar thutlukna anga ngai ning a tih” ti a nih. Seminar thurelhai bawzuitu dingin a hnuoia hming ziek hai khu thlang an nih nghal bawk: Lalzarlien Darngawn, Dr. Lalnghawrlien, Kh. Thangdailo, Darlienthang, Lalremthang Tusing, Rev.Dr. Lalthankhum Sinate (ama hi follow-up committee chairman a nih nghal), Rev. Darsanglien Ruolngul, Rev. Lalkhawmawi Tuolte, Rev. Dr. H.K. Khawlkung, Rev. J Khuma, Rev. T.T. Rochung, Rev. Sienglienkung, Upa Kiemlo Pulamte, Dr. Lal Dena, R.Th. Varte, Rev. Dr. Lalhmuoklien, Upa Darliensung, Rev. Dr. Ruolneikhum Pakhuongte, Thangsawihmang Songate, Dr. Lalzakung F. Tusing, Prof. Dr. L. Fimate, Upa Ngursangluoi Pudaite, Thangkhawsiem, Dr. H.L. Liensang, Laltleilien, Zolienkung le L. Tlana. Hieng memberhai hi ei hnam sunga thibe pawl laia mi vawng an nih a, hnam dang laia va the dawk ding khawmin suong an um em em.
Hnamin mawphurna lientak a mi pek chu thaw thei ngei dingin Pathienin lungvar le theina mi pe dingin ka ngen a. Kum 1982 khan Pathien le India sawrkar zar zoin, UK-ah thla thum research thawna dingin fellowship pekin ka um hlauh a. National Library of Wales, Aberystwyth, Wales-ah thal khat le a chan ve ka um a. India hmar saka a bikin Welsh missionary hunghai po po le muol lo liem tah le la dam haiin an private paper po po hi library-ah hin an sie tawl. Dr. Peter Fraser le Watkin R. Roberts (Toronto tienga a fe hmaa) file hai chu hmun khata sie a nih. Hi file ka hawng ni chun “Ei vela bu sik ding tamtak a hmin tah ie” ti Mizo tawng a inziek a lo um a. Chubakah thuthlung thar (Hmar) inlet hmasatak kha thar hlawkin an lo sie bawk a. Ka hei phawka, a rim kan hnam veng venga; zirtirbu ka suo hlima Chanchintha Johan bung khat chang khatna kha ka hei tiem a, thawkkhat lovin Pherzawl tlanga thuoi kaiin ka um a, khuo a sawt vawng vawng kher el. Hi taka document pawimaw ka ti hai po chu photocopy ka thaw vawng a. Thla khat le a chan ve dang chu Baptist Missionary Archives, Gluocester Palace, Baker Street, London; School of Oriental & African Studies, London Univ. le India Office Library-hai kar tawnin hun ka hmang zova. Sherlock Holmes chet tlatna hmun Baker Street-ah thla khat lai zet um zingin, a tienami Sherlock Holmes umna building tak le Madame Tussaud (mi ropui lim siena hmun) sir lova ka um kha kan sirna’n van a ur.
Chuonga hnamin mawphurna pawimawtak a mi pek ta si chun tiin thesis-a ka zieksa lo document tam tak ka lakkhawm hai chu hun tepter tak kar laka nasa nawk zuolin ka tiem nawn nawk a. Hi taka thil hmusuokhai baka, oral sources le Watkin Roberts Senvawna lo hmutu la damhai chu thu indawnna ka nei nawk bawk a. Chuonghaia inthawka thil hmusuok (findings) hai chu compile thawin Rev. Dr. Lalthankhum Sinate, Chairmanna hnuoia Follow-up Committee, PMS Office-ah inthungna hmasa takah October thla bo hma ngeiin pek lut a ni tah a. Committee khawm chun lungruol takin chu findings chu a lo pawm tah a nih. Hi lai thu hi ka lekhabu, In Search of Identity: Hmars of North East India, bung nganaa kan chuonsa nghe nghe.
Chu Seminar Follow-up Committee thutlukna chu thlawpin HSA Gen.Hqtrs., CCPur, General Assembly vawi 40-na chun, a kum nawk Tuolbul ni 12, 1985-in thupuong hieng ang hin a siem nghal a: “Ei ram, thim sa mupin a lo bawm zing lai chun, thlang tieng ram tuipui rala inthawkin sappui nun le sakhuona, Chanchintha thlifim chu a hung hrang tah a. Kum 1910 Thlavul ni 5 chun Senvawn khuoa Kristienna sakhuo chu a hung lut tan tah a nih” tiin. Chuleiin HSA Gen. Hqtrs., Jt.Hqtrs., branch le unit tin lem chun hi thupuongah le thutluknaah hin chanvo le mawphurna lien tak an nei a nih.
Sakhuona tieng bawka thutlukna inchik tlak pakhat nawk chu hi hi a nih: “Ei rama Kohran po po kara inthuruolna le inhrietthiemna tha lem aum theina dingin hming pakhat hnuoia Kohran tin in enkawla bingna (autonomy) le inawp dan (internal admin) tawkbuoi chuong loin inkhaikhawm ni ta sien tha kan tih; chu inkhaikhawmna hming ding chun “Hmar Christian Fellowship” ni sien tha kan tih. Chun, kum 1985 Diamond Jubilee hi hmun khata hmang kawp tlang tha kan tih” tiin. Chu thurel chu sukpuitling peia umin, ei rama Chanchintha hung lut kum 60-na chu “The Hmar Christian Diamond Jubilee,” Saturday, Dec.7, 1985 tuta Rev. Chawnga Pudaite Memorial Chapel tuolzawlah hall ropui taka bawlin hmang zo a ni kha. Mikhuol pawimaw hieng Rishang Keishing (CM), PA Sangma (Minister of States, GoI), Dr. C. Lalrema , L. Keivom, Acting High Commissioner to New Zealand le ram dang mi iemani zat khawm an hung thang nghe nghe. Kha taka Hmar Male Choir-haiin “Aw, kan hmar ram inthim tlang dum duoi” tia thiem em ema an sak kha a ropui hle. Hi hla hi chu hnam hla ni si, Pathien kuomah mani le ram inhlanna hla a ni a, ka thu ni sien chu Hmar National Anthem-a hlu lut chi niin ka hriet. Hi hla hi tha ka ti em leiin ka lekhabu In Search of Identity: Hmars of North East India-ah khawm Hmar tawng le saptawngin kan chuonsa ngat a nih. Hi Jubilee-ah hla ropui dang pahnihai chu Edwin Rowlands (Zosapthara) inlet ve ve “Aw Pathien, nangma Chanchintha zar a” ti le “Chanchintha’n hmatieng a pan pei, khawvel ram tinah” ti an nih. Krista hming lamtuhai, thu thei khata thuna Pahtien ei hei inpak khan chu Pathien khawm lawm zuol a tih.
Hmar Bible Seminar khan ei ram Kohran hai kara inhrietthiemna tha lem a hung siem pei. Hmar Christian Fellowship ti hung indin a ni a; Kohran thuoituha’n hma hung la peiin Inpakna Hlabu le Sunday Sikul common-a ei hung nei thei dam hi ei ram Kohran histawri fe meka mellung mi phunpektu a nih. A hming danglam met sienkhawm, Kohran thuoituha’n Hmar Christian Leaders’ Forum tiin hma an hung lak pei a. An thilthaw that tam tak hai laia, Hmar Biel Seminar thurel inzaa Senvawn Gospel Monument Committee-hai thurawn tha tak pe a, Senvawn khawpui laili lai taka lung phunin “Watkin R. Roberts-in Senvawn khuo a lut ni Feb. 5, 1910” tia ziekin an daw. Hi hi ei histawri mellung pawimaw takhai laia mi a hung ni nawk pei tah a nih. Hmar Christian Leaders’ Forum-a thuoitu inza um tak takhai hi taksa le thlarau tienga khawm ei thiempu tak an ni leiin, Israel-haiin Mosie kut an dawmkang ang khan an kut dawmkang le sukhrat hi pawl tin le mitin mawphurna a nih ti hre nawn zing ei tiu. Hmatieng peia khawm HCLF hin thiltha tak tak mi la hung thawpek pei raw hai seh.
"Khaw lai ram khawm mani le mani indo chu an ram hlak; khaw lai khuo le insung khawm mani indo taphawt chu an ngir suok ngai nawh.”(Mt. 12:25)
Hmar Biel Seminar kha Hmar Literature Society, HSA Gen.Hqtrs. le Hmar hnam sunga Kohran po po thuoituhai uopna le huoihawtnaa “Thawro, hrilsiet ei ni ta nawna dingin inngir thar nawk ei tiu" Nehemia 2:18 ti thupuia hmangin Senvawn khuo Chanchintha mansapui inbangna hmun ngeiah 5-8 October, 1984 khan nei a nih a. Kohrana ei thuoitu lienhai, sawrkara ei officer lienhai, HSA thuoituhai le Hmar Biel le Vangai tlanga Village Authority member po po deu thawin an uop a. A khuo sung mi tiem sa lovin, khaw danga inthawka mipui fe khawm kha mi sangkhat an hnai khuot. Khang anga inthuruola Seminar ropui kha ei nei nawk thei dim chu! Kha Seminar zo țin tieng khan unaupa Prof. Dr. L. Fimate leh Thanlonah Pu Chana inah kan tlunga, naute thar nuhmeite hmeltha deu hming la phuok lo an nei hlauh a; Seminar Rorelpui tiin hming kan phuok nghal a, tuhin pasal khawm a nei ta nghe nghe.
Hi Seminar-a hin thupui lien tak tak pathum: Education tienga ei sietna sanhai le thawidam dan ding Pu Lalzarlien Darngawn-in in a hril a; Back to the Bible & Christian Family (Bible le Kristien sungkuo hmang dik dan ding) Rev. H.K. Khawlkung le Rev. C.C. Rema’an an hril bawk a; Fak le dawn thua Hmarram harsatna keiin ka ziek ve thunga. Hieng thupui hai hi nithum sung chaih an nih a, thutlukna siemhai le seminar proceeding chu a hnungin L & R Printing Press-in a sut nghe nghe. Thupui pathum hmanga thurelhai kha vawisun chen khawmin an la pawimaw zing. Abikin tlangram sikul siemthatna ding lem chun Pu Lalzarlien seminar paper kha angiel anganin hmang inla thatpui ngawt ei tih.
Seminar thutlukna po po chu hril nawn ta nawng ei ta. Chu laia sakhuo tienga thutlukna pakhat chun “ei rama Chanchintha hung lut ni fie nawk zuola hriet nuom a um a, hi thu buoipui ding hin Dr. Lal Dena ni sien tha kan tih a, a hmu dan chu October thla bo hma ngeiin Follow-up committee kutah hung pe lut sien la; Follow-up committee thutlukna hi Seminar thutlukna anga ngai ning a tih” ti a nih. Seminar thurelhai bawzuitu dingin a hnuoia hming ziek hai khu thlang an nih nghal bawk: Lalzarlien Darngawn, Dr. Lalnghawrlien, Kh. Thangdailo, Darlienthang, Lalremthang Tusing, Rev.Dr. Lalthankhum Sinate (ama hi follow-up committee chairman a nih nghal), Rev. Darsanglien Ruolngul, Rev. Lalkhawmawi Tuolte, Rev. Dr. H.K. Khawlkung, Rev. J Khuma, Rev. T.T. Rochung, Rev. Sienglienkung, Upa Kiemlo Pulamte, Dr. Lal Dena, R.Th. Varte, Rev. Dr. Lalhmuoklien, Upa Darliensung, Rev. Dr. Ruolneikhum Pakhuongte, Thangsawihmang Songate, Dr. Lalzakung F. Tusing, Prof. Dr. L. Fimate, Upa Ngursangluoi Pudaite, Thangkhawsiem, Dr. H.L. Liensang, Laltleilien, Zolienkung le L. Tlana. Hieng memberhai hi ei hnam sunga thibe pawl laia mi vawng an nih a, hnam dang laia va the dawk ding khawmin suong an um em em.
Hnamin mawphurna lientak a mi pek chu thaw thei ngei dingin Pathienin lungvar le theina mi pe dingin ka ngen a. Kum 1982 khan Pathien le India sawrkar zar zoin, UK-ah thla thum research thawna dingin fellowship pekin ka um hlauh a. National Library of Wales, Aberystwyth, Wales-ah thal khat le a chan ve ka um a. India hmar saka a bikin Welsh missionary hunghai po po le muol lo liem tah le la dam haiin an private paper po po hi library-ah hin an sie tawl. Dr. Peter Fraser le Watkin R. Roberts (Toronto tienga a fe hmaa) file hai chu hmun khata sie a nih. Hi file ka hawng ni chun “Ei vela bu sik ding tamtak a hmin tah ie” ti Mizo tawng a inziek a lo um a. Chubakah thuthlung thar (Hmar) inlet hmasatak kha thar hlawkin an lo sie bawk a. Ka hei phawka, a rim kan hnam veng venga; zirtirbu ka suo hlima Chanchintha Johan bung khat chang khatna kha ka hei tiem a, thawkkhat lovin Pherzawl tlanga thuoi kaiin ka um a, khuo a sawt vawng vawng kher el. Hi taka document pawimaw ka ti hai po chu photocopy ka thaw vawng a. Thla khat le a chan ve dang chu Baptist Missionary Archives, Gluocester Palace, Baker Street, London; School of Oriental & African Studies, London Univ. le India Office Library-hai kar tawnin hun ka hmang zova. Sherlock Holmes chet tlatna hmun Baker Street-ah thla khat lai zet um zingin, a tienami Sherlock Holmes umna building tak le Madame Tussaud (mi ropui lim siena hmun) sir lova ka um kha kan sirna’n van a ur.
Chuonga hnamin mawphurna pawimawtak a mi pek ta si chun tiin thesis-a ka zieksa lo document tam tak ka lakkhawm hai chu hun tepter tak kar laka nasa nawk zuolin ka tiem nawn nawk a. Hi taka thil hmusuokhai baka, oral sources le Watkin Roberts Senvawna lo hmutu la damhai chu thu indawnna ka nei nawk bawk a. Chuonghaia inthawka thil hmusuok (findings) hai chu compile thawin Rev. Dr. Lalthankhum Sinate, Chairmanna hnuoia Follow-up Committee, PMS Office-ah inthungna hmasa takah October thla bo hma ngeiin pek lut a ni tah a. Committee khawm chun lungruol takin chu findings chu a lo pawm tah a nih. Hi lai thu hi ka lekhabu, In Search of Identity: Hmars of North East India, bung nganaa kan chuonsa nghe nghe.
Chu Seminar Follow-up Committee thutlukna chu thlawpin HSA Gen.Hqtrs., CCPur, General Assembly vawi 40-na chun, a kum nawk Tuolbul ni 12, 1985-in thupuong hieng ang hin a siem nghal a: “Ei ram, thim sa mupin a lo bawm zing lai chun, thlang tieng ram tuipui rala inthawkin sappui nun le sakhuona, Chanchintha thlifim chu a hung hrang tah a. Kum 1910 Thlavul ni 5 chun Senvawn khuoa Kristienna sakhuo chu a hung lut tan tah a nih” tiin. Chuleiin HSA Gen. Hqtrs., Jt.Hqtrs., branch le unit tin lem chun hi thupuongah le thutluknaah hin chanvo le mawphurna lien tak an nei a nih.
Sakhuona tieng bawka thutlukna inchik tlak pakhat nawk chu hi hi a nih: “Ei rama Kohran po po kara inthuruolna le inhrietthiemna tha lem aum theina dingin hming pakhat hnuoia Kohran tin in enkawla bingna (autonomy) le inawp dan (internal admin) tawkbuoi chuong loin inkhaikhawm ni ta sien tha kan tih; chu inkhaikhawmna hming ding chun “Hmar Christian Fellowship” ni sien tha kan tih. Chun, kum 1985 Diamond Jubilee hi hmun khata hmang kawp tlang tha kan tih” tiin. Chu thurel chu sukpuitling peia umin, ei rama Chanchintha hung lut kum 60-na chu “The Hmar Christian Diamond Jubilee,” Saturday, Dec.7, 1985 tuta Rev. Chawnga Pudaite Memorial Chapel tuolzawlah hall ropui taka bawlin hmang zo a ni kha. Mikhuol pawimaw hieng Rishang Keishing (CM), PA Sangma (Minister of States, GoI), Dr. C. Lalrema , L. Keivom, Acting High Commissioner to New Zealand le ram dang mi iemani zat khawm an hung thang nghe nghe. Kha taka Hmar Male Choir-haiin “Aw, kan hmar ram inthim tlang dum duoi” tia thiem em ema an sak kha a ropui hle. Hi hla hi chu hnam hla ni si, Pathien kuomah mani le ram inhlanna hla a ni a, ka thu ni sien chu Hmar National Anthem-a hlu lut chi niin ka hriet. Hi hla hi tha ka ti em leiin ka lekhabu In Search of Identity: Hmars of North East India-ah khawm Hmar tawng le saptawngin kan chuonsa ngat a nih. Hi Jubilee-ah hla ropui dang pahnihai chu Edwin Rowlands (Zosapthara) inlet ve ve “Aw Pathien, nangma Chanchintha zar a” ti le “Chanchintha’n hmatieng a pan pei, khawvel ram tinah” ti an nih. Krista hming lamtuhai, thu thei khata thuna Pahtien ei hei inpak khan chu Pathien khawm lawm zuol a tih.
Hmar Bible Seminar khan ei ram Kohran hai kara inhrietthiemna tha lem a hung siem pei. Hmar Christian Fellowship ti hung indin a ni a; Kohran thuoituha’n hma hung la peiin Inpakna Hlabu le Sunday Sikul common-a ei hung nei thei dam hi ei ram Kohran histawri fe meka mellung mi phunpektu a nih. A hming danglam met sienkhawm, Kohran thuoituha’n Hmar Christian Leaders’ Forum tiin hma an hung lak pei a. An thilthaw that tam tak hai laia, Hmar Biel Seminar thurel inzaa Senvawn Gospel Monument Committee-hai thurawn tha tak pe a, Senvawn khawpui laili lai taka lung phunin “Watkin R. Roberts-in Senvawn khuo a lut ni Feb. 5, 1910” tia ziekin an daw. Hi hi ei histawri mellung pawimaw takhai laia mi a hung ni nawk pei tah a nih. Hmar Christian Leaders’ Forum-a thuoitu inza um tak takhai hi taksa le thlarau tienga khawm ei thiempu tak an ni leiin, Israel-haiin Mosie kut an dawmkang ang khan an kut dawmkang le sukhrat hi pawl tin le mitin mawphurna a nih ti hre nawn zing ei tiu. Hmatieng peia khawm HCLF hin thiltha tak tak mi la hung thawpek pei raw hai seh.
"Khaw lai ram khawm mani le mani indo chu an ram hlak; khaw lai khuo le insung khawm mani indo taphawt chu an ngir suok ngai nawh.”(Mt. 12:25)
