Sielmat, November 05, 2017, Virthli (ONP):  November 4, 2017 khan The 12th Hmar Youth Association Triennial General Conference 2017 chu Rev. Chawnga Pudaite Memorila Chapel, Sielmat, CCpurah  ah hlawtling takin nei a nih. Hun khatna-ah Business session nei a ni a. Hun hnina a hin  HYA Election Commission - Hmar Inpui GHQ, HCLF inrawina hnuoiah election hi nei a ni a . HYA GHQ (2017-2020) sunga thuoitu dingin an ni hi thlangtling an nih . Gen. President: Upa Laldawnlien varte, Gen. Vice-President: Lalsanglien Inbuon, Gen.Secy: Alan Famhoite, Asst.Gen.,Secy: Lallienkhum Taite, Secy. Finance: Lalsanhim Sanate, Treasurer: Dr. Jire L. Pudaite, Secy. Information: Lalramsiem Zote, Secy. Art & Culture: Ruolchunghnung, Secy. Games & Sports: Robert Thiek. HYA GHQ Conference a hin  HYA branch 19 , HYA Jt.Hqtrs 4, Palai mi 123 an thang.

Zan program  hi dar 6:00PM in Rev. Chawnga Pudaite Memorial Chapel ah hmang a ni a. Pu Lalhuolhim F. Tusing in zan program a conduct a, Rev. Ruolhlei pakhuongte in hun hawng tawngtaina a nei a. Rev. Rohminglien Pakhuongte in HYA GHQ thouitu thlang thara um hai tawngtai pekna le intiemkamna hun an nei tir tawl.

Hi huna hin Pu Lalhmuok Famhoite, Founder Gen. Secy., HYA GHQ in “HYA Chanchin le tlawmngaina ” ti thupui hmanga paper a present huna chun “ Sietni, Thatnia Hmar Thalaihai tlawmngaina hi hnam danghai tlawmngaina nekin an hnuoi bik der nawh a. Inhmang/Tuitla an um changing Hmar thalaihai chu a kul-a-taiin theitawp insuoin thang ve hlak hai sien khawm,an thaw that reng reng chanchinbu a hai an lang ve ngai nawh a, asan chu hieng hun lai hin YMA, YPA hai angin HYA a la pieng ve naw lei a nih.Kum 1980 October 2-5 a HSA General Assembly, Saikot khuoa nei a ni tumin ‘ Tlawmngaina tienga mi keihruoitu ding pawl (Association) indin ni ve sien’ ti a HSA Tuithaphai Block Conference chun Sietni le Thatni a mi keihrouitu ding Hmar tlawmngai pawl (Association) indin tha an ti thu HSA 40th General Assembly, October 2-3,1984, Parbung-ah thelut nawk a ni angin Assembly chun indin tha a tih a. March 7, 1985 in inhnikna nei phawthai HSA Hall, Rengkaiah fekhawmin Hmar Youth Association(HYA) chu indin a nih. Tlawmngaina umzie chu phutletna um der lova mihai thangpui hi a nih a. Vawisun chena hlaw bova thlan cho dam,khawsawt ina leng dam, mithi zanngak ei thaw hlak dam,thangpui ngaihai ei thangpui hlak dam hi pi le pua inthawka ei sawm pei tlawmngaina ei la vawng hring pei chu a nih. HYA motto le ei sakhuo bu Bible hi an tlawn tlat a ni leiin HYA thuoitu ding chun thiltha thaw, nundan mawi le tlawmngaina vawng zing hlak, Pathien ti mi, mani mawphurna ngipawimaw hlak mi thuoitu dingin thlang hlak inla nuom a um. HYA indin a inthawk thangkhat liem zet a lo ni el tah, puitling taka kalpen a hun ta hle. Tuhin chu thangthar mi thiem tamtak ei hnam lai khawm ei hung suok tah a, thuoitu hmasahaiin an hriet lo thiltha thaw ding tamtak um ngei a tih. Chuonghai sunzawmtu dingin mawphurna lien tak ei koah an nghat a nih ti hi theinghil nawng ei tiu. Pi le Pua inthawka ei sawm hring pei tlawmngaina hi muol liem lovin sukthar pei ei tiu .Par angin HYA vul zing raw seh” tiin a hril.

Hi huna hin Rev. Songrolien Songate in Gospel Messege hrilna a nei a. HYA GHQ in May 7, 2004-a Tui tla a ruolhai pahni a sanhimnaa hringna chan (L) Nk. Grace Ramngaium d/o Lalhmunlien Infimate of Thingchom Village chu ‘Chawimawina” an inhlan a.Zan program hmang ani huna hin Blessed Choir, EFCI KTP Sielmat, ICI KTP Sielmat, HYA Choir (Muolvaiphei Branch), Guest Artistes- Nk. Lalengvari Sinate, Joseph M. Pakhuongte , Nk. Lawmnakim Hrangate ha’n hla sakin mipui fekhawm hai an inawi a. Vote of Thanks Pu Laldawnlien varte, Gen. President, HYA GHQ in hrilna hun a hmang a. Rev. HB Hluothang in tawngtaina a nei zoin hun hi khar a nih.

Report & Photo: Muona Infimate

Post a Comment

Powered by Blogger.