CCPUR, October 20, 2017, Virthli (ONP): Oct. 20, 2017 dar 7 AM  khan 13th CEM's Cup Carnival Invitational Football Tournament 2017, Oct. 11 - Nov. 5, N.L. Daulagupu Sports Complex, Haflong, Dima Hasao, Assam a huoihawt a um ah Manipur a inthawka inkhel ve ding FC Ridil team hai chu Pastor Ralsunthang Hmar in Pathien kuoma tawngtaina'n FC Ridil Office, Hmarveng, CCPur a inthawk a'n thlaliem. Hi hma hin FC Ridil team hai in Camp-na, Saikot Children's Home, Saikot, CCPur a inthawk Pastor Lalrohlu Puruolte in Pathien kuoma tawngtaina'n a'n thla bawk.



FC Ridil hi Oct. 23 in FC Barail, Oct. 27 in Shan FC le Oct. 1 in Sikkim Himalayan SC hai leh Quarter Final Round a'n khel ding a nih. FC Ridil in 13th CEM's Cup a invitation dawnga a khel ve ding hi All Manipur Football Association (AMFA) in remtina a pek le a hrietpui a nih. Manipur a inthawk a hi football tournament a inkhel ve dinga ditsakna a dawngna a chun FC Ridil chun Organiser Dima Hasao Sports Assn., (Assam) le AMFA kuom ah lawmthu an hril a. Hi tournament le inzawma an in buotsaina hmun Saikot Children's Home (SCH) le an ground phal taka in hmang tirtu Rev. Ros Infimate Manager, Saikot Childrens' Home le Mission Secy., RPCNEI le a thawpui hai, hi tournament ah FC Ridil a thang ve theina dinga kawng tum tuma thangpuitu hai le Pathien kuoma tawngtainaa lo santu hai kuomah lawmthu an hril.

Hi 13th CEM's Cup Carnival Invitational Football Tournament 2017 a invitation dawnga khel ve ding lai Aizawl FC (Mizoram) le Sikkim Himalayan SC (Sikkim) khawm an thang a nih. Match khat  inkhel en man chu Quarter Final (Oct. 22 - Nov. 2) Rs. 30/-, Semi Final ( Nov. 3 - 4) Rs. 50/- le Final (Nov. 5) Rs. 100/- le 5:00 PM le 5:30 PM hai a ni hlak ding a nih. FC Ridil chun mi hai hriet chak  nisienkhawm an squad ding hai official takin an la puonglang naw a. Sukfel vawng a ni ta thu le an inkhel hun ah mipui in an la hung hriet el ding thu FC Ridil chun an hril. An fans hai tadi'n key chain le T-Shirt tlawmte siem niin an inkhelna ding hmun a hin inchawk thei a ni ding thu an hril bawk.

Post a Comment

Powered by Blogger.