Responsive Ad Slot

Hmar FC huoihawtna hnuoiah North East Festival Football Cup 2017

Thursday, October 19, 2017

/ Published by VIRTHLI
New Delhi, October 19, 2017, Virthli (ONP): Hung tlung ding October 21, 2017 a inthawk November 03, 2017 sung hin New Delhi-ah Hmar Football Club in ‘The 2nd North East Festival Football Cup 2017’ huoihawt a tih. Hi tournament a hin Delhi khawpuia Student Organisation hrang hrang hai le Delhi khawpuia college inlar tak tak hai inkhêl an tih. Hi tournament hih Delhi khawpuia nei hlak, North East Festival le inzawma huoihawt hlak a ni a, India sawrkar thlungpuiin sengso hai a tum hlak (sponsor) a nih. ‘The 2nd North East Festival Football Cup 2017’ khawm hih Ministry of Home Affairs, GoI, Ministry of Development of North Eastern Region, GoI le Kaziranga University, Assam haia inthawkin tangka sum hmanga Hmar FC in a huoihawt ding a nih.

October 21, 2017, zantieng dar 7-ah Thyagaraj Stadium, New Delhi ah Inaugural Ceremony nei ning a ta. Hi huna khuollien dinga fiel, Pu Kiren Rijiju, Minister of State, Ministry of Home Affairs in uopin tournament hawngna nei a tih.

‘The 2nd North East Festival Football Cup 2017’ a hin lawmman tha tawk induong a ni a. Hrattak nina changtu haiin Championship Cup, sum fai cheng nuoi thum (Rs. 3,00,000) le Certificate dawng an ta, hrattak dawtin Runner’s Up Cup, sum fai cheng nuoi khat (Rs. 1,00, 000) le Certificate, a pathumna in Runner’s Up Cup, sum fai cheng sing nga (Rs. 50, 000) le Certificate dawng an tih. Hieng hai baka hin Best Goalkeeper, Best Defender, Top Scorer, Best Mid-fielder le Best Striker hai thlang suok ning an ta, an ni hin tangka sum cheng sangthum, Trophy le Certificate seng dawng an tih. Player of the Tournament khawm thlang suok ning a ta, lawmman in cheng sang nga inhlan ning a tih.

Hi tournament a inkhel ding team hai chuh: Pool A-ah Venkateswara College, Lushai FC (Mizoram), Sumi FC (Nagaland) le SSPP FC; Pool B-ah Kaziranga University, KSO FC, Motilal Nehru College le United North East FC (Sikkim); Pool C-ah Hmar FC, St. Stephens College, Ramjas College le Nirvana FC (Assam) le Pool D-ah Hornbill FC, Kirori Mal College, Ram Lal Anand College le Garo Warriors FC (Meghalaya) hai an nih.

‘The 2nd North East Festival Football Cup 2017’ huoihawttu Hmar Football Club hi Hmar Students Association, Delhi in an din a ni a. Chu hnungah Delhi a Hmar tawng hmang hai laia pawl pathum: Delhi Hmar Welfare Association, Hmar Christian Fellowship Delhi le Hmar Students Assn Delhi thuoituhaiin a enkawltu dingin Hmar FC Board an din a. Tuhin Societies Registration Act, 1860 hnuoia zieklut ni ta in, Hmar hnam hming chawiin football inkhelna tieng a thei ang angin hnam chawisang tumin hma a lak mek a nih. Hmun hrang hranga um Hmarnau haiin sum le pai le tha le zung sengin Hmar FC hih an thangpui hlak bawk.
Don't Miss
© all rights reserved
made with by Simon L Infimate