CCPUR, September 26, 2017, Virthli (ONP): Sept. 26, 2017 zantieng dar 2PM khan Mizoram sawrkar le inremna lampui dapa inbiekna nei mek Hmar Peoples' Convention-Democratic/HPC(D) Palaihai chu VTI Auditorium, Rengkai, CCPur hmun ah Hmar Inpui (Hmar Supreme House), Gen. Hqrs inrawinaa Reception nei le palaihai a'nthawka report ngaithlakna nei a nih. Hi hun hi Mr. Joseph Lalrothang President, Hmar Inpui (Hmar Supreme House), Gen. Hqrs in a'n rawi a. Hmar Inpui affiliated bodies a thuoituhai, Executive Members le hnam sunga mi rawnkaihai an thang a, hun tawp ah Rev. Ruolhlei Pakhuongte in Pathien kuoma tawngtaina a nei zoin HPC(D) palai hai hi zantieng bu tuihnai tak fakpuina nei a nih. Mizoram-HPC(D) inbiekna hi vawi 5 lai lo nei a ni tah a. Sept. 21 & 22, 2017 khan State Guest House, Aizawl, Mizoram ah a vawi 5-na hi nei niin Agenda 2 (pahni), Draft Memorandum of Settlement (MoS) le Draft Sinlung Hills Council Bill, 2017 hai an entlang a, hieng draft hai hi HPC(D) tiengin Hmar Inpui, Gen. Hqrs inrawinaa la entlang dinga Mizoram sawrkar palaihai kuoma an lo ti ta angin hi huna fekhawm hai lai la entlang a ni theina di'n a ziek, a copy semdar a nih. Thurawn lak le Draft MoS le Draft SHC Bill, 2017 hai hi sawisel le siemthatna hun a la um a, chu ding chun HPC(D) hin a copy hi an semdar a nih. Inbiek nawk huna hi Draft MoS le Draft SHC Bill, 2017 hai hi sukfel thei beisei a um thu le inbiek nawkna chu Political Level a ni ta ding thu HPC(D) palai hai chun an hril a. Krismas hma ngeia Krismas Gift/Present anga hmu hman beisei a um thu an hrillangsa bawk.



Hi huna hin HPC(D) palai Mr. LT Hmar Working Chairman, HPC(D) & Team Leader, Upa Lalthalien, Spokesperson le Dr. John Pulamte, Member haia inthawk report felfai taka ngaithlak a nih a, Mizoram-HPC(D) inbiekna a hlawtling theina dinga kawng tum tum haia lo thlawptu hai kuom ah lawmthu an hril a. Hmar hnam sunga kohran thuoitu inzawmkhawm pawl lientak Hmar Christian Leaders' Forum (HCLF) in Pathien thu le tawngtainaa inbieknaa palaihai an inthla liem zie hlak le kohran ha'n tawngtainaa an san rawpna thu ah lawmthu an hril a. Mizoram-HPC(D) inbiekna leh inzawm hin State tum tum a Hmar hai leh a hranpa taka inrawntlangna an lo nei rawp ta thu an hril a. Chun, tulai hnaia Sinlung Hills Accord Implementation Demand Committee (SHAIDC) hmalakna a 1994 Accord/MoS thu a High Court Order um thu a chun MoS/MoU chu inhrietthiem tuona a ni a, in hnemna tlak tak tak nilo (chiengkuonglo thil/vague deu a) Court Order um a ni thu le beiseina umlo a ni thu an hril a, inbiekna nuhnungtak a khan Sentence pakhat ziek ding khawma darkar an aw tling pei thu le tuta Sinlung Hills Council Bill, 2017 hi a lo puitling huna chun tuta Sinlung Hills Development Council (SHDC) hnuoia lo um Department hai popo khawm SHC hnuoia an um vawng ta ding thu hai an hrillangsa bakah hi hun a bawk hin hnam mipui thlawpna leia hieng chen phak anni thu hrilin Mizoram sawrkar leh inbiekna nei mek HPC(D) (Chairman pawl) a Gen. Secy. chun anni pawl le Mizoram Hmar mipui aiawin lawmthu a hril bawk. Hmar Inpui affiliated bodies hai khawma Mizoram-HPC(D) inbiekna le inzawma inrawntlangna hun ah hi inbiekna hi an hrietpui a, an thlawp le an lawmpui thu hai inbiek tan tir khan an lo puong ta bawk a nih. Hmar Inpui affiliated bodies chu Hmar Christian Leaders' Forum (HCLF), Hmar Students' Association (HSA), Hmar Youth Association (HYA), Hmar Women Association (HWA), Hmar National Union (HNU), Hmar Literature Society (HLS), Hmar Arts & Culture Society (HACS), Hmar Artist Association (HAA) le Hmar Peoples' Convention-Democratic/HPC(D) hai an nih.

Post a Comment

Powered by Blogger.