Aizawl, Dec 16, Virthli (ONP): Mizoram sawrkar le Hmar People’s Convention (Democratic) HPC (D) inremna lampui zawnga inbiena fe mek chu vawisun khan Inbiekna a vawithumna (Third Round) chu State Guest House, Aizawl hmunah boruok muongum tak hnuoia an nei.

Hi inbiekna huna hin ahmaa Mizoram sawrkarin pek kir nawk dinga alo phut tah, HPC (D) in Zokhawthieng bula MLA hai an lo lambun tuma MAP hai silai an lakpek hai chu official hai bula HPC (D) Working Chairman Pu Lalthanglien Hmar in inhlanna a nei. Hieng silai an pek kir hai hi AK - 03, INSAS Rifle - 01 le 9MM Pistol - 04 a nih.

Vawisuna inbiekna a hin Sinlung Hills Development Council a hrat nawk zuolna ding le inzawmin Power & Functions hai ennawnna le hritlangna nei bik deu a nia, Chief Executive Member (CEM) hnuoaih council indin nisien ti a nia, thla 4 dan peia General Council nei ni hlak sien ti hai le an hlaw ding zat hai dam hriltlang a nia, amiruokchu hi chungthua hin iengkhawm thuthlukna siem ala um naw nih.



Vawisun khan Mizoram Home Minister R. Lalzirliana a chun chanchinbu mi hai pawlin HPC(D) ha'n sawrkar phutna angin H. Malsawmkima in a tlan hmangpui silai hai le inlambunna a silai an lakhai an hung thelut leiin HPC(D) Army chief Lalropui Famhoite chu baila insuo a ni thu a hrila, hi bakah Pu Ropui a ruola man mi 2 Pu Norbar Sanate le Ngurthangtluong hai khawm insuo dingin hmalak mek a nih, tiin a hril.

Hi inbiekna a hin Mizoram sawrkar palai hai hi Pu Lalbiekzama, Additional Secretary of Home, Mizoram in an rawia, HPC(D) tieng chu an Working Chairman Lalthanglien in rawina hnuoia mi paruk an nih.

Vawisuna inbiekna hi boruok thatak le inhmutlang tak hnuoia nei ani thu dawng a nih. Hi inbiekna fe mek hi a vawilina (Fourth Round) chu kumthar February thla hin nei nawk dingin an tia, a khawtieng tieng khawma hi inbiekna fe mak hin ra tha tak an tlun ngei an beisei a nih.

Post a Comment

Powered by Blogger.