Hmar Inpui 2016-'19 term Executive Council hmasatak tluong taka nei zo, Resolutions 6 passed; Gen. President in 11th Manipur State Assembly Election huna Candidate pakhat ni ve dinga inbuotsaina a nei mek thu Inpui a'n hriettir

CCPUR: Hmar Inpui 2016-'19 term Executive Council hmasatak chu Nov. 22, 2016 11:33AM-4:45PM khan VTI Auditorium, Rengkai, CCPur, Manipur hmun ah tluong taka nei zo a lo ni tah. Hi huna hin Palai mi 39 an țhanga, chuonghai chu Hmar Inpui hnuoia um pawl tum tum haia inthawka mi an nih. Chuonghai lai chun Guwahati Hmar Welfare Assn. (GHWA); Hmar Inpui (HI), Mizoram Region; Hmar National Union (HNU)-Manipur; Hmar Inpui (HI), Meghalaya Region; Hmar Literature Society (HLS)-Manipur; Hmar Inpui (HI), Jiri-Vangai Region; Hmar Artistes' Assn. (HAA); Hmar Youth Assn. (HYA) GHQ; Hmar Women Assn. (HWA) GHQ; MDCs-Manipur; Hmar Art & Culture Society (HACS); Hmar Peoples' Convention-Democratic (HPC-D); Hmar Christian Leaders' Forum (HCLF); Hmar Students' Assn. (HSA) GHQ, Executive Committee Members, Hmar Inpui (HI) GHQ Office Bearers' le Assembly Officers hai an țhang. Hmar Inpui (HI), Assam Region ti lo chu an țhang kim vawng niin Speaker chun a hril.


Hi Executive Council hi Hmar Inpui Assembly Speaker Pu (Prof.) Vanlalnghak, Dy. Speaker Pu Lalhmuok Famhoite le Assembly Secy., Pu Lalțhalien haiin an in rawia, Speaker Prof. Vanlalnghak in Council Member-hai lâwmlûtna a neia, Regions le Headquarters le Affiliated Organization-hai a’nthawk palai fekhâwm dungzuiin rorêl thei ding a ni thu a puong hnungin Speaker fielna angin Pu (Dr.) Lalkhawlien Pulamte-in Pathien kuoma Council inhlânna țawngțaina a nei zoin palai fekhâwm hai popoin inhmelhrietna (self introduction) an neia, chu zo chun Pu Joseph Lalrothang, General President, Hmar Inpui GHQ (Hmar Supreme House) in Presidential Address neiin Hmar nauhai ngîrhmun field dang dang ah tuta hun liemtah sûng khan Pathien zâra hmasâwnna hmu ding a um pei thu Inpui a'nhriettira, inremna kawnga hnam sûnga development a um pei thu hai hrilin hnam hmangaina leia suok pawl pathum hai pawl pakhata an um dan ding ngaituoin HCLF dande a ni angin hmalakna tluong taka a fe mek thu, hi le inzawma Nov. 24, 2016 ah inbiek tlangna a um nawk ding thu a hrilsa bawk. Hmar Welfare Fund chungchang a chun ‘Hmar Inpui’ in harsatna a tuok mek a, tum le beisei angin fund an lawi țhat naw thu Inpui a'nhriettir a, sum harsatna hlipkiengna dinga hmalak suk hrat a țulzie a hril. General President chun 11th Manipur State Assembly Election huna Candidate pakhat ni ve dinga inbuotsaina a nei mek thu Inpui an hriettir nghal a. A hril peinaa chun Election a a ngir tum chungchanga chun hiengang hin a hril. Kei ka tum thu el nilovin, Hmar hai tlingna thei, Golden Chance a nih. Ngir ve el ta la, tia mi tam tak țawngbau a um leiin ensin nuomna a um leia ngir tum niin a hril. Hi huna hin chieng takin ama'n la hril vawng naw sienla khawm Saikot Assembly Constituency a ngir tum niin hril a ni a, Party Ticket a lo hmu thei chun BJP hminga ngir a tum niin tulai hnai hril rik a nih. Hi huna bawk hin CCPur Assembly Constituency le hmun dang dang a hai khawm Hmar haiin MLA chance an nei thei ve thu hai a hril bawk. General President, Hmar Inpui chun Council member-hai rorelna tluong tak nei thei dingin ditsakna le ngenna a nei a, President thuhril ah Council palai hai an lawm hle.

Hmar Inpui Assembly le Executive Council inkara Executive Committee hmalâkna minutes tiemlangna Hmar Inpui, General Secretary Pu Francis Songate-in a neia, indawn țulhai indawnna le hrilfie pei a ni hnungin, rel a ni angin Council palai haiin an pawmpui (approved) a nih. Hi Executive Council huna hin Resolutions 6 (paruk) passed a ni a, chuoghai chu ani ang angin ei hung suklang a nih.

Resolution. No.1. Hmar Inpui Region le Co-Ordination Committee chungchang ngun taka hriltlang ani hnungin Constitution Chapter – VII, Article – 19, Clause: i – viii dungzuiin Executive Committee-in hma hung la sien, tuchena Co-ordination Committee indina lo um ta sa, un-constitution-a lo thaw pal um hai la thiek (dissolved) nâwk phawt nisien ti rem ti a nih.
Resolution No.2. Tripura, Assam, Meghalaya le Manipur-a um unau suopui hai le inlaichinna thalem ei nei pei theina dingin Hmar Inpui le Hmar hnam Organization tin haiin nasa nawk zuola hma lak seng nisien ti a rel a nih.

Resolution No.3. 11th Manipur Legislative Assembly Election hung um ding le inzawmhin Hmar Inpui hminga party support puong ni naw raw seh ti tha titlang a ni a, mimal le pâwl tuelkhawmin, Election Commission-in inthlang dân a zam kala, mimal zalenna indiknaw taka hma la lo ding le inthlangna fel le thienghlim taka a fe theina dingin hnam sunga pâwl le mimal tin kuoma ngenna siem nisien tha ti a nih.

Resolution No.4. Jiribam ADC huomsunga Hmar chenghai Hill Tribes nina anga an ram le chanvo hai humhal (safeguard) ani theina dingin a thei ang anga hmalak nisien, chu thil a Tribal Rights le Land Acts chungchanga hmalatu ding bîk a hnuoia ang hin mi ruot a nih:-
a) Rev. Benjamin Shakum as Convenor
b) Dr. Immanuel Zarzosang le
c) Pu Lalthlamuana Hmar hai hi Commission members a ruot an nih.

Resolution No.5. Cachar Valley a Hmar tawng MIL Teacher hlaw inpêk chungchanga harsatna um hai hriltlingna nei a ni a, Hmar Literature sukhmasawnna kawnga lampui pawimaw tak pakhat a ngai a ni leiin, Cachar Literature Society-in theitawp suoa hma lo la zui dinga ngansie tha ti a nih. Barak Valley Hmar Inpui, Co-ordination Committee-in sum-le-pai thil a hma lo lapui sien ti a rel a nih.
Resolution No.6. Hmar Welfare Fund inlawi that tawk naw thu financial report dungzuiin hriet a ni a, Hmar Welfare Fund, Finance Department, Hmar Inpui-in Rate of Contribution bituk a siem ang dungzuiin Finance Committee-in Hmar Inpui Region dang dang hai le inruoltlang taka welfare fund pek dinga hmalak thar nisien, Finance Committee-in an hma thei ang takin, Hmar Inpui Region tin huopin hma hung la raw seh ti remti a nih.

Hmar Inpui Executive Council rorelna huna Resolutions hai Assembly Speaker in tiemlangna a nei zoin Speaker fielna angin Rev.Edwin Darsanglur-in resolution-hai le fak siema um Pathien kuoma inhlanna le Council inkhawm suktawp țawngțaina a nei a, chu zo chun Pu Joseph Lalrothang in Palai hai fak dinga a lo buotsai chu ama chengna in ngei ah palaihaiin an kiltlang a nih. PROCEEDINGS OF HMAR INPUI, EXECUTIVE COUNCIL A hmun : VTI, Rengkai, CCPur, Manipur; A hun: 22/11/2016 Copy dit hai chun Hmar Inpui Office, Hmar Secretariat, HSA Campus, Rengkai, CCPur, Manipur hmun ah Office Hours sungin Office Assistant (Contact Mob. No. +91-9612510400) kut a'nthawk Hmar Inpui Executive Council huna palai hai chun Assembly Secretary in a lo hril tah angin lak thei ning a tih tiin LRS Puruolte Jt. Secy., (Info. & Media), Hmar Inpui GHQ (Hmar Supreme House) chun a hril. Hi Executive Council hlawtling taka nei theia a umna thu a khawm HI GHQ hnuoia mi pawl tum tum le an palai hmun tum tum a inthawka mi fekhawm hai le Pathien kuoma țawngțainaa lo santu kohran le mimal hai chung ah Hmar Inpui GHQ chu lungriltakin a lawm hle thu a hril bawk.

Post a Comment

Powered by Blogger.