Lungthulien, November 28, 2016, Virthli (ONP): November ni 26, 2016, zan khan HPC(D) Chairman Pawlhai chu Lungthulien khuoah riekin, an riekna nu Pi Mawipui (name changed) chu beiseiin zanrilah a bana keiin tawk a tum a. A beiseitu hi Tlana, Tuisen khuo a nih. November ni 27, 2016 zan khan HPC(D) hai bawk chu Tlana rawi chun Pi Mawipui hai In ah riek nawk tumin an hang fe nawk a, Pi Mawipui le a nauhai chu ția thlabarin an zam sie tah a nih. Pi Mawipui hi a pasal Lengpui Mizorama inhlaw um a nih. Hi thil tlung hi Lungthulien Val-Upa Pu Vawmkapțhuom kuomah intlunin Pu Vawmkapțhuom chun HPC(D) hai chu a in tienga țhuoin a In ah an riektir a. Pu Vawmkapthuom chun HPC(D) hai kuomah hnam sipai inni leiin mi ta dinga buoina siem lovin kan in tieng hung riek ro tiin a in tieng a țhuoi a nih. An zalna ding a siem zova an hang zal hnung hun iemani chen hnunga chun Pu Vawmkapțhuom naunu kum 14 mi (hming thup) zalna khuma lawnin Tlana hin umpui a tum nawk leiin buoina hi a hung punlun (sosâng) ta pei a nih. Lungthulien Val-Upa naunu Nunghak pakhat (hmingthup) khawm HPC(D) Chariman Pawl tuta Lungthuliena um Commander inti Saka/Sakte chun, “I mi neia inhawi deua um am I nuom, mi nei lova thi I nuom”, tiin ințhițhaina a pek bawk a. Vawisun November 28, 2016 zing dar 9 hin Lungthulien khuo chun Emergency puongin Public Meeting an kova, tuhin public meeting an nei mek. Lungthulien tlangval haiin HPC(D) Chairman pawlhai mi 3 an man a, an hrentang mek, a dang po chu an tlan hmang hman. HPC(D) Chairman Pawlhai hi iengthawa hung am in nih tia an indawn chun, "Election duty dinga hung kan nih," tiin an dawn.



Hienglaizing hin misuolhai hum tumtu Lungthulien Village Authority Chairman chun zan kâr Churachandpur a pan a. A khuo mipuihai buoina ngaituopui loin an relhmang niin chanchin ei dawng.

Lungthulien school tum tumhai chun hi thiltlung dit nawzie suklangnain vawituk hin lam hrawna an nei bawk.

(Chanchin hi țan neia report a ni nawh. A nina ang tak suklang a nih. Chun HPCD ei sukmuolpho tum naw a. A sunga misuol um țha pei lohai a nih ei do hih. Thu kimchang lem chu Lungthulien Val-Upa hai anthawk indawn thei a nih.)

Post a Comment

Powered by Blogger.