~ Ramthienghlim Varte
Thingtlang pa ei ni leiin khawpui hmun hrang hrang
sawrkar sin annawleh thil dang dang thaw’n um inla khawm tlangram nun hih ei
hlimpui, hril ringawt khawmin khuo a sawt vawng vawng el hlak. Thu le hla
kungpuihai khawm an talent hnukpui le thu le hla thlarau baptisma chang a, zun
thanga hla mawi tak tak le nunghak-tlangval inhmangaina (Love Story) chanchin
amani le ngainuomum le thu kulmut tak takhai an lak khawmna Bupang chuh
tlangram nun hi a ni zie. Chuleiin, keikhawm, kum 30 deu thaw sawrkar sin ka
thaw hnung khawma nun khawsawt lungleng chang chuh naupang kel khalthei ruol ka
ni hun laia ka pu’n Saidan tlangram Lungpuizawl bula lo a nei khah mit ngeia ka
hmuphakve a ni leiin ka chul ramfangna a ni zie hlak a. Hi, kawrvaihai le ei
nunphung danglamna thuthlung an hrietphaklo ei thuruk jnthup nun hlu chuh a ni
reng.
Ka farm chuh
a hmaa ka ziek tah Ka farm House-I
ang khan Shillonga inthawk 67 kms. a hla Umlapher, Karbi Anglong District,
Assam a ni a, Hmar tuhin chuh In 10 vel chauh an um tah a, kohran pawlhni ICI le EFCI an um. Kum 2011-a
kan chawk a na, thusep ‘ STEERING FAIL’
ti thupuia hmanga ka ziek khawm khah hi ram leilung hmu nuoma ka ramsuokna thu
le hla a ni nghe nghe.
Kum 2012-in
sungkuo thumin Aithing bil an nei a, kei khawmin Mound 20 hmun ka vat a, vat
faina hmun pova chun Khanghmuk ka ching
bit vawng bawk a. Ruoltha zarin Mano kak, Ruo, Far thing le Thingrai alo um
tasahai leh ka phun bawk a. Farm House,
a dung 28 feet, a khang 15 feet a lienin ka bawl a, Zawngta mu 2000 bawrvel le
Bangalore zawngta iemani zat Hotupa C.Songate IRS-in a mihung phur pek ka tu
bawk. Ka thilchinghaiin an pu hmangaina an hriet lei mani ding an inthangduong
khawp el.
HUON ENKAWLTU :
A chunga ei
hril ta angin Huon enkawltu ding mifel
tak Pu L.Thasanghai nupa an um a, a rama lo um sa reng Mawt, Kawlthei le keiin
ka ching thar thingtlang tlai le hmeruo lak ding a um lai a na, a ra hmasa dam,
sawma pakhat le dang dang thawlawm ding a um deu zing a, ka farm ka kan changhin
in tieng kan lawisan el thei ngai nawh. Dawnkhaw, Fanghma a lo inhlum remrum
hei hmu dam chuh nun hih a mukin ka hlim sawng sawng el a nih. Thingtlang nun
inhawi zie hih ka khawsak le seilienna hmunin a zir naw leiin naupangte ka ni
lai ka nu le pa mi hril ti naw chuh ka
hril ta angin naupang chite ka ni laia pu’n Saidan tlangram Lungpuizawl bula lo
a nei khah mit ngeia ka hmuphakve a nih. Chuleiin, tuta ka farm a tlaihna hieng
- Umzik, Maihna zik, Aithing par, Behna, Anphui, Dawl, Dawnkhaw, Fanghma le dang
dang kan hei lak khawm a, namthlak a kan
bum a, vuoilo dingin mawt hna or hnathielin kan hei tuom a, Mawt za (mawt hna
hlui a hnuoi tienga tlepthla tah) annawleh, hnangin ka hei khit pei a, inrik
deu awla in hei inlawi chuh intienga mi buktu an tha bawk, thafan a umin
pheikhai an hawi rik tup tup thei ngei el.
LUNGNGAINA SUMPUI :
Ka huon
(farm)-a ka thlaichinghai hih taima taka enkawl chun sungkuo pakhat chuh awlsam
taka dam suok theina ding ni’n ka hriet leiin kum bul 2013 khan enkawltu dingin
ka sangpa Ruolkhumvel Varte Churachandpur-a um kan cha thlak a, a nuhmei naupanghai tlansanin unau Ṭhasanghai sung leh an um a. A hriselna
a ṭhatawk naw nia ka hriet leiin sinthaw ding taluo a um naw chun Shillong-ah
ka um pui a, Doctor pan puiin damdawi le vitamin a ṭul ang ang ka thaw pek hlak
a.
Ama hih a pa
lienin a hrat a, pa inthlahrung thei
tak, pa zaidam, mi vervek lo, ramtin a leng para ti ti sep thiem le ṭawng
thlahawl an naw a; chubakah, a thluok varna hmanga sum le pai zawnga thukhel le
mi theida hrila ramtina invak chingmi an
naw bawk leiin min an lunginsiet a. ICI Kohran a RWUS project-in Rickshaw an
pek ve a, ruol inhnar taluo lova a nuhmei le nau (Pasal pakhat le nuhmei pahni)
enkawla puhai veng Khawmawi, Churachandpur-a khawsa a nih. A naupa chuh College kaiin Shillong-ah ka um
pui nghe nghe.
Hun
an herliem vut vut a, Changer ( October ) thla a lo inhersuok nawk der el tah a; zingkar sikpui boruok
inthieng tak karah vairik nilum awia fiemthu thienghlim thawa ni inher liem vut hun khah a hungtlung nawk
tah a. Kristmass boruokin a mihung nawt ṭan mek ta bawk. Buvui a hung eng ṭan
a, chungleng vahai thafan inperkalang ri khawm a hung se ṭan a, hnuoia invak
chi ransa hrang hrang (a chin a lien)hai khawm an huong intau bawk. Khuo thenkhat Fapite (Pathien)
malsawmna dawnga bu le bal hnienghnar taka kum inzawna hlulut a FAPANG RAL-IN-SAN
theihai chun SIKPUI RUOI hmang tuma insingsa mek khawm a um ta a. Keini khawm
kan Ṭei vate’n an tlan nasa ti kan hriet a,
veng ding le a um ang ang sik dingin
thafan taka insiemin farm tieng kan fe tah a. Kei chuh Ofis ṭulna leiin
hunsawt ka cham thei naw a, ama (ka sangpa)chuh ka hung zamsan tah a nih.
November
2013 thlatawp tieng khan a hriselna a ṭha bek naw ti a mi hung hril a, a ṭul ṭul
hre fela Shillong tienga hung nghal dingin ka hril a. Nuhmei-naupang khawma
Kristmas hungtlung ding insingsat a tul ta bawka nghakhla taka an lo thlirve a
ni leiin ama khawmin “ U! Ka Busikhai a chi ding sieng ka ta Kristmas pha
beia siemding hung phur ka ti” tiin kan inbiek a.
Executive
Meeting Mysore a nei dingin Ofis order a hung leiin ka farm tieng reng
reng ngaituona ka seng hman naw a, fe
phurna ka nei naw leiin suonlam ding ka zawng a, a remchang naw pei bawk.
Thafan lo deuvin zanah Computer ka bi a, ka sang kan naupangtak chungtienga
milo inlawi san tah video ka en a, a hlasakhai dam ka ngaithlak a, ngaituona
pik churin ka um a. Ka hriselna a thatawk naw leiin inthuok hih harsa kati deu
lai a ni bawk, in tha thei lovin chungtienga mi lo inlawi san tah Ka Pa, ka Nu
le ka sangpa hai kuom tienga inlawi ve el ding dama inring thekthuokna dam
neiin hi zan hi ka hmang ral a. Chuh Tarik Ni 24, November 2013 zan khah a nih.
Zan
ril Dar 12 an ri hma metin ka huon enkawltu Lalthasang a nuhmei Huoli’n a
mihung phone a, ‘Ka pu Khumvel um an hawi naw a, inthuok intak a ti
bawk leiin kan in tieng a hung insawn a, U Thasangin a buoipui zing a, hieng
ringawta um nekin Pu, hung unla kha tieng an rang thei angin Doctor pan vat a
tha kan ringa ka hung phone el che ni’ tiin. Beidawng takin kan inrawnkhawm
a, kan hei insiem sung zing dar khat vel
chun Lalthasangin a hung phone nawk a, ‘ka
Pu chuh kan san zo ta naw, mi hei ko khawm dingin an umna kar a hla si leiin kan
bei a dawng hle ‘ ti thu tap pumin a
mihung hril tah a. Motor petrol ka farm tlung theina khawp alo um naw bawk, beidawng takin lungril mu le
mal nei lovin Zawng zan mangsie kan thaw tah a nih. Vangduoina hi a kawp a
thuoa tuok chang a lo um hlak. Ka sanghai kan makpa Louis L.Keivom le ka tupa
Tv Jefrey Khawzawl thuoiin Pu Rohminglien IFS in tieng kan tlan thla a, Motor
hmang a lo remchanga chuh petrol/Diesel hun tawk a lo nei bik chuong naw leiin
Shillonga Petrol pump iemanizat kan rawk tho zo naw hnungin a tawpah kan hmu
hlauva. Hi zana inthawk hin a nih Shillong khawpui Hmarsak state hrang hrang
pienghma Undivided Assam a ei umkhawm laia state Capital lo ni tah a changpar
deuva Shillong-a khawsa le sawrkar sinthawa umhai hi ei lo ropui hranpa naw
ngei ti a min ngaituo suok tir chuh. Chun, kan tlan phei ta vang vang a, zing
Dar 5:10 velin kan hei tlung chuh ka farm house hi ka sangpa ruong zalna dinga
ka bawl Lal remruot alo ni ta zing el. Lungngaina sumzingin a mi tuomvel a,
tawng dan, nghat dan le um dan ding ka
hriet naw a; a sakruong le hmel lungsietum ka hei ko khawma thonawkna/hnena
puon sil an tah leiin hmel pangai put sienkhawm a taksa pila siem ringawt a ni
ka biek chuh. Chuleiin, a dam laia khang lawm lawma minza le inthlahrungnaa sip
hlak, a chunga roreltu kuta a um an tah
leiin chang theina a nei nawh, mi en bawk
naw a, a mi hei to san tawk tawk el chuh taksaa ka sang a nina’n kan sumzo
hlawl nawh. Theitawpa thangpuia a khawsakna tlawma sawk zangkhai ka nuom leia
kan cha thlak ka thil hril reng reng sel
ngai lo, a nina an hrietchieng ema inthlahrungna ngawta sip hlak, pa
inngaitlawm, a chunga ka hmangaina tlan
hman lova hienga a khuol rama thina nunrawngin a chunga thla a hei zar khum el
hi hrietthiem harsa ka ti a. A hmel ka hei hmu’n ka lung a awi thei naw a, Lal
remruot dan hi hriethiem harsa ka ti a nih. Hiengang vangduoina hi hi tuok rawn
le thawthang leia hne ban el chi a ni der nawh. Ei tuok rawn po leh a nawk
hungtlungding tung a na ting el. Piengphunga mi rethei, ruolbanlo ( Physically
challenged) an lo ni lem chun ana nawk zuol a ni aw, hril sei dal ei tih.
KA KALVARI :
Ruol thenkhatin ‘I farm hi suktlawng el rawh’ an mi ti hlak a. Kalvari tlang chuh
Judahai tadingin tlang ti um, Luru hmun, Juda nupuihaiin an nau tap bawr bawr
khawm Kalvari tlang an sam pha chuh an re tawt khawpa mi rap, tlangthlavai um ni sien khawm mi hmangaitu Lal
Krista ei suolhai phura lungngai le inruma a hringna an hlanna hmun a hei ni
meu chuh ‘ Aw ! Tlangmawi Kalvari, Min
hmusithai sienkhawm.. ‘tiin ngaina em ema vawisun chena khawvelin a
ngaisang le ei khukpui anghin Umlapher-a ka farm hi a tlang, muol le ram hi lungsie taka ka sangin
muol a mi liemsanna a ni leiin ka ngaina em em a, mi kuta ka hlan phal nawh. Ka
farm house kawtkhar lu chunga “Ruolkhumvel Varte In” ti mawl deuva
Meihawl duma in ziek ringawt khawm hi ka ngaina ngawi ngawi a, ka ta ding chun Jerusalem khawkawla KALVARI muol/tlang ang, ka
KALVARI a nih.
Tarik Ni 25th November, 2013 khan a
ruong Shillong kan hung panpui a, ei hnam tlawngngaina insuoa a ruong inkhum
hmasa inchua HYA memberhai le HSA, Val-Upa, nunghak-tlangval, Hmar Inpui
thuoitu le mi hmangaitu sungkuohai a tul ang peia iengkim milo siemrem pek tu;
chubakah, sawrkar chawlni khawm ni lova Umlapher
le Shillong mipui khang zozai mi sunpuitu, raltu le a ruong puon man tam tak
taka inkhumtu (Organization le lainatu mimal) hai ka sangpa leiin Pathien le
hnam danghai mit hmuah a mawi em em a, ei
hnam tlawmte hih chawimawiin a um a nih.
A ropui ngawt el.
Ka Sang ruong
Shillong-a vuiliem chuh remchanga kan hriet naw leiin Khawmawi, Churachandpur a
phur dingin ka hei insiem map map a, Dar 11:00 Am in Shillong kan hung suok tah
a nih.
LAWMTHU HRILNA :
Zan ril thlasik dei lai tak Diphu le Manza, Karbi
Anglong District, Assam-a HYA thuoitu le members, Kohran tienga thuoitu le Unau
Kuki (KNA le dang dang)hai ralna le puon inkhumtu, Dimapur chen Bus-a mihung inthlaliem a, Dar
1:45am velin Dimapur HYA haiin an milo tuok nawk a, a ruong inkhumna le ralna
neiin tawngtaina leh Dimapur tlangval tlawmngai haiin khaw daifem chen an mihung
inthla liem nawk a.
Tarik Ni 26th November, 2013 zingkar dar
6-7 vela Imphal HYA, INPUI thuoituhai le nu le pa Imphal City Hospital bulah
sunna programme hmangin, ralna sum le puon a lo tuomtu (Organisation hrang
hrang le mimal) hai; Imphal-a inthawk unau lainatu tam takhai leh kan hei suoka
lampui-intluona milo tuoktu unau, HYA memberhai/nunghak-tlangval tlawmngaina le
an mi tuorpuinahai khah kan phulo chunga hmangaina a nih.
Kangvai a inthawk a ruong phurna hnungtieng le
hmatienga Motor khang zozai tuommawitu mi tlawmngaihai chetdan khah a mawiin ka
damsungin theinghil ngai nawng ka tih.
A ruong, a chengna in Khawmawi-a hei lut a, lainatu a
hrephak taphawthai tlan khawma raltu, a ruong tuomtu, mimal le Organization
dang danghai ka lungril inthuk takin kan lawm tak zet a. Tarik Ni 26th
November, 2013 vuiliem a lo ni tah.
“A mi thienghlimhai thina chuh Lalpa ngaia
chun thil ropui tak a ni si a”
chuonghai chunga that insuo le tlawmngaihai chuh
Lalpa’n malsawmna tamtak a pek hlak. Chu malsawmna chuh ka sang (a mi
thienghlim) mi sunpuituhai po po kuoma thlung ngei dingin ditsakna hlu kan hlan.
(Ka sang mi rethei a thi
champha vawithumna hrietzingna dingin).
