Aizawl, October 5, 2016, Virthli (ONP): Inremna zawnga inbie mek Mizoram sawrkar le Hmar People’s Convention (Democratic) hai chu vawisun chawhma dar 11 khan State Guest House, Chaltlang, Aizawl ah boruok muongum tak hnuoiah inbiek vawihnina an neia, framework of agreement siem thei dingin an inrem niin ei thulakna chun a hril.

HPC (D) palai hotu Pu Lalthalien in Virthli palai a hril danin inbiekna hi borouk muongum tak hnuoiah nei a nia, a tu tieng tieng palai khawm an hlim tlang hle niin a hril. Tuchena inbiekna ah a tha zawngin thil a fe pei a nih a tia, framework of agreement khawm pei fel thei dingin an inrem thu a hril

Mizoram sawrkar le HPC(D) palai hai hi zing tarik 6 October, chawhma dar 11 hin inbie nawk an ta, hi huna hin framework of agreement chu pei fel ning a tih, ti’n Pu Lalthalien chun Virthli a hrila, nakie tieng chu Memorandum of Settlement (MoS) khawm ziek thei a ni a ring thu a hril bawk.



Pu Lalthalienin a hril peina ah kha hma a HPC (D) palai ha’n point 5 umna charter of demands, Mizoram sawrkar kuomah an lo thelut hai chu chipchier taka hriltlang a nia, HPC(D) in Autonomous Body siem dinga a ngenna khawm sawrkar palaihai hin iemanichenah rem an ti thu a hril bawk.

Sinlung Hills Development Council (SHDC) suk hrat dan ding le suk changtlung dan ding chu an thu cheitak laia mi a ni thu hrilin Pu Lalthalien chun Mizoram sawrkar khawm hi thu a hin an hawng hlea, thil thatak hung tlung ngei dingin beiseina insang tak ei nei a nih a tih.

Mizoram Home Department Additional Secretary Pu Lalbiakzama khawmin inbiekna chu boruok muongum tak hnuoia nei a ni thu a hrila, a tu tieng tieng khawmin inbiekna anthawk hin thil thatak suok dingin beiseina insang tak an nei a nih a tih. “Thil pawimaw tak tak hril tlangna nei a nia, abikin Sinlung Hills Development Council fe dan ding le suk changtlung dan ding hril tlang a nih,” a tih.

Kha hma a ei lo suklang ta ang khan Mizoram sawrkar le HPC (D) hai hi August ni 10 khan Tourist lodge, Chaltlangah inbiekna an lo nei tah a, September thla sung inbiek nawk dingin inthe hai sienkhawm harsatna dang dang leiin October ni 5 hin inbiekna nei lem a nih. Vawisuna inbiekna hi zing October ni 6 khin sunzawm nawk ning a ta, chawhmar dar 11 ah a hmun ngaia bawk nei nawk ning a tih.

Vawisun a inbiekna a hin sawrkar tieng hi Pu Lalbiakzama, Additional Secretary for Home Department in inrawiin mi dang 3- Pu Lalhriatpuia, Joint Secretary for Home; Pu Rodingliana Chawngthu, SP, CID(SB) le David H Lalthangliana, OSD (Home) hai an thangsa a. HPC (D) palai tieng hi Upa Lalthalienin an rawia, palai dang hai chu Dr. John H Pulamte, Hmar Inpui President hlui; Pu Lalthlamuana Hmar, HSA Assembly Speaker; Pu David Buhril, Human Right Activist; Pu Lalmalsawma Darngawn, SHDC Chairman hlui le Pu Thanglianchhunga hai an nih.





Post a Comment

Powered by Blogger.