SDOs/BDOs thar hai lawmpuina an nei
CCPur: Zani chawhnungtieng khan Chairman, ADCC office Chamber­ah ADC members han CCPur District sunga SDOs/BDO thar hai lawmpuina le inhmelhriepuina an nei a, SDOs/BDOs hai kuomah Mufler pakhat seng an inhlan. Hi huna hin Lanjoy Thoudam, SDO/BDO Kangvai; Seiminthang Thangbem, SDO/BDO CCPur; Lamminlal Simte, SDO/BDO Thanlon; James Doujapau Haokip, SDO/BDO Tuibong; Jameson Sehlal Hangshing, SDO/BDO Singngat le Chunglenmang, SDO/BDO Henglep hai an  thang.

Mi baw hlumna thuah inbiekremna nei
CCPur: October 24, 2016 zan dar 8 vela i20 MN01W­4907 in Mata khawsunga Culvert chunga inthung pasal pakhat Tongbram Premjit (35) s/o Khamba of Mata a baw hlumna le inzawm khan zani zingkar 8:00AM khan Thina tuok sungkuo hai le motor neitu tieng han T. Khamba chengnainah M. Thoiba Singh, President, Meitei Society, CCPur le Executive Members, Meitei Youth Organisation, CCPur le P. Kamkholal, MDC Haopi Range, ADCC hai hrietpuinain inbiekna nei a ni a, Car neitu le sung han thina tuok sungkuo hai kuomah Rs. 2,50,000/­ pek dingin an inbiekrem. Inbiekremna dungzui hin thina tuok sungkuo han hi thina thua hin complaint petition file lo le court case an siem naw ding ti a nih. An inremnaa hin Car neitu tiengah S. Khanza Zam (Car neitu); Pauzathang, Vungkhum Guite le S. Thangpu han hming an ziek a, thina tuok sungkuo tieng chun L. Khamba, Abung Singh, T. Bungcha le Budtu han hming an ziek. Inbiekremna nei a nita le inzawm hin a ruong Postmortem thaw zo a ni hnungin CCPur Police han mi thi sunghai kuomah ruong an inhlan. Police chun hi thua hin FIR No. 52(10) 2016 CCP­PS U/S 279/338/427/304­A IPC an registered a nih.
   
Car khan midang pahni a baw hliem bakah Car a chuong driver thangin mi 3 in hliemna an tuok bawk a nih.

AR personnel ama le ama an kap hlum
CCPur: October 24, 2016, 6:15PM vel khan Khuga Dam­a um 26­Assam Rifles personnel Bowang Wangso (30) s/o Hipha of Ozakho of Tirap District, Arunachal Pradesh chu an umna barrack sungah INSAS Rifle hmangin ama le ama an kap hlum. A ruong hi zanikhan Police le Assam Rifles han RIMS, Imphal hmunah post­mortem an inthawtir a, hi zo hin Police chun a ruong hi Assam Rifles kutah an inhlan nawk. Hi thil tlung le inzawm hin Police chun UD Case No. 7 CCP­PS U/S 174 Cr.P.C an registered.

HI le HYA Imphal JHQ in an dem
CCPur/Imphal: Manipur University seat reservation chungthua Central Govt. le UGC thupek zawm loa Academic Council meeting in Oct. 8, 2016 nia a lo rel anga Admission thawlui a nina, hi le inzawma Tribal students dodalna an nei huna thil tlung thuah Hmar Inpui General Hqrts chun University thuneitu hai le state forces hai chetdan chu nasa taka an dem thu an puong. ATSUM inrawinaa hi chungthua hmalakna chu Hmar Inpui in full support a pek thu LRS Puruolte, Joint Secretary (Information & Media), Hmar Inpui GHQ in Press statement an suoa chun an ziek.
   
Hmar Youth Association (HYA) Imphal Jt. HQ khawmin UGC thupek zawm lova University thuneitu han Academic Council thurel fethlengpui a nina le nuorna nei student hai chunga state forces hai chetdan chu nasa taka an dem thu an puong a. HYA chun tribal students hai thil ngen, a bikin tulaia ATSUM hmalakna chu a thlawp pei ding thu zani hmasaa Ms Thangthatling Sinate, President, HYA Imphal JHQ in press statement an suoa chun an ziek.
   
Hienglaizing hin Tribal students hai chun zanikhan MU Gate puo ah  sit in protest an sunzawm a, University a class sunzawm zing le admission khawm thaw sunzawm zing a nih tiin ei thu dawngna chun a hril.

LPF in CMO thar lawmpuina
CCPur:  Ladies Prayer Fellowship (LPF), CCPur chun  Oct. 27, 2016, 8AM khin CMO/CCPur thar Dr Kim Simte chu a chengna inah CMO a ni lawmpuina le Memento inlanna nei an tum. Hi huna hin LPF member hai chu thang seng dingin Secy. LPF chun ngenna le inhriettirna a siem.

CCPur­ah Student Organisation han rally
CCPur: KSO/CCPur; HSA Jt. Hqrts. CCPur; ZSF GHQ le MZP (M) hai hmalaknain October 26,2016 (vawisun), 10AM a inthawk khin Manipur University admission seat reservation chungthua MUTSU le ATSUM hmalaknaa dodalna fe mek le inzawmin CCPur khawpui sunga students han lampui hrawna (rally) nei an tih. Rally hi CCPur College a inthawk tan ding a ni a, Rally­a thang ding students hai chu zing dar 10 in CCPur College tlungkim seng dinga inhriettir an ni a, hi taka inthawk hin DC/CCPur Office chenin rally nei an tih.

Sangai festival­a Stall hawng nuom hai ta dingin
CCPur: Manipur Sangai Festival, 2016 hung um dinga Stalls hawng nuom Weavers, Artisans, Entrepreneurs, Association, Organisation le Small & Medium Enterprises hai chun hnina lekha Oct. 31, 2016 chenin Director, Commerce & Industries, Manipur annawleh www.dcimanipur.gov.in ah lak le peklut thei ning a tih. Participation fee Rs. 5000/­ (premium) le Rs. 10000/­ (food stall) ning a ta, Stall fee hi SBI, ECOM, Account No. 35315308011, IFSC Code: SBIN0004562 le MICR Code: 795002003 a thun ding a nih. 

II Division league 2016
CCPur: Hungtlung ding October 10, 2016 a inthawk khin Churachandpur District Sports Association (CDSA) huoihawtnain Peace Ground, Tuibong­ah (L) Damien Letminlun Gangte II Division League­2016 um a tih. Hi le inzawm hin II Division Clubs hai chun Oct. 25, 2016 a inthawk 11AM­2:00PM inkar sungin CDSA Office­ah Entry form lak thei ning a tih tiin Gen. Secy. CDSA chun inhriettirna a siem.

Ukhrul-a thil tlung enquiry thaw ning a tih: O.Ibobi Singh, CM
Imphal: October 24, 2016 nia Ukhrul­a thil tlung kha State sawrkar chun inquiry thaw dingin a rel. Inquiry thawna ding le inzawma inquiry thawna ding le inzawma Order chu L.M. Khaute, IPS, Director General of Police (DGP), Manipur in  an suo ta a, Inquiry Officer dingin P. Doungel, IPS, Additional Director General of Police (Intelligence) ruot a nih a, enquiry report chu ta inthawk ni 7 sungin pelut a tih tiin zanita CM O. Ibobi Singh in a Office­a Chanchin thar lakhawmtuhai an hmupui huna a hril. Ei hriet seng angin October 24, 2016 khan CM O.Ibobi Singh le a ministerial team Ukhrul a inzin hai chu bei (attack) an lo ni a, silai chena kap an nih.
   
O.Ibobi Singh in a hril peinaa chun, State sawrkar chun security forces huntawk a nei a. Amiruokchu, silai kha khawlaia inthawka hung kap am a na ti hriet a ninaw a. Security Forces han lo kaplet ve hai sienla pawitawklo, civil mi tam tak an thiin an hliem ding a ni a. Thiltha nekin thil tha lo an tlun lem ding a ni leia security forces han an kaplet ve naw a nih. Intelligence report dawng a ni a, sienkhawm inzin dinga tumna lo um tasa a ni leia inzin kan nih tiin a hril. Hi huna hin PWD thangsain Department thenkhatin a sawrkar hnuoia hmasawnna sin thawa um hai chu slight show hmangin chanchinthar lakhawmtuhai an inentir.
   
Hieng laizing hin zanikhan Manipur Pradesh Congress Committee members han Oct. 24, 2016 a CM le a ministerial team Ukhrul a inzin hai an lo bei dodalzie le an demzie suklangnain Imphal khawpuiah lampui an hraw a, PM Narendra Modi; Nagaland CM T. R. Zeliang le NSCN(IM) General Secretary, Th. Muivah hai lim  siemfawm chu an raw. Hi lampui hrawnaa hin Congress party workers hai khawm an thang tawl. Lampui hrawna hi MPCC Office a inthawk an tan a, Kanglapat road­ah fein MPCC Office­ah bawk an hungkir nawk. PM, Nagaland CM le Th. Muivah hai lim an siemfawm hai hi Bir Tikendrajit Park tuol zawnah an raw.
           
Ukhrul a thil tlung hi sawrkar thlungpuiin a tosan el ding a ni nawh. NSCN (IM) in Ceasefire ground rule bawsiein CM le a ministerial team hi an lo kap a nih. Tuchen hin sarwkar thlungpui chun iengkhawm a la thaw naw a, sienkhawm a tul anga action a hung lak ka beisei. Thu dang dang hrilkawi nekin TNL chun mipui lakah thupha an chawi thang a tih tiin Dy. CM Gaikhangam in zanita Samurou Keithel Golden Jubilee lawmnaa khuolliena a thangnaa thu a hrilna huna a hril.

Information Technoogy le Mobile Apps
Imphal: Assembly Election hung um dingah hin Information Technology le Mobile Apps (iPhone & Android handset) hai hmang ning a tih tiin CEO, Manipur in zanita Conference Hall, South Block, Imphal­a Chanchin thar lakhawmtuhai an hmupui huna a hril. Hieng thil hai hmang hin online in thurawn le sawiselna um hai thawn thei a ni ding a nih. Assembly election ding le inzawma hmalakna a la fe tluong pei a, vote la nei lo thalaihai chu Electoral Roll ah inzieklut dingin CEO chun ngenna a siem nawn nawk.

MU VC dingin Prof. Adya Prasad Pandey
Imphal: India President le Manipur Unviersity (MU) Visitor Pranab Mukherjee chun Manipur University Vice Chancellor dingin Prof. Adya Prasad Pandey a hung ruot. Prof. Pandey hi Professor & Head of Department of Economics, Banaras Hindu University, Varanasi sin chel lai a nih. Tuhin Prof. Amar Yumnam chun in­charge in MU VC sin a lo chel mek a nih. Prof. Pandey hi a hung pha leh VC sin hi an hlan ding a nih.

Governor in a dem thu a puong
Imphal: October 24, 2016 a Manipur CM O.Ibobi Singh le a ministerial team Ukhrul inzin lo beituhai chu a dem hle thu zanikhan Manipur Governor Dr Najma Heptulla in a puong. Hi thil tlung hi a tha naw a, thil beidawngum a nih tiin a hril. halaihai chu hmasawnna sin thawna kawngah sawrkar thangpui dingin a ngen.

PM in Natl. Tribal Carnival a hawng
New Delhi: Prime Minister Narendra Modi chun zanikhan Indira Gandhi Indoor Stadium, New Delhi hmunah first National Tribal Carnival a hawng. Tribal Carnical hi tlangmi hai hmasawnna dinga hnam zierang le nunphung pholangna ding le huop zo an nih ti lungril an nei theina dinga buotsai a ni a, ennuom chi tum tum le insukhlimna hrang hrang buotsai a nih. Tribal hai ram lakpek theina thuneina tukhawmin an neinaw thu PM chun a hril a. Tlangmi hai ta ding lieuin PM Atal Behari Vajpayee huna khan Ministry hran indin a ni thu a hril bawk.

Bru raltlan hai Nov. 2 a inthawk thuoikir
Aizawl: Mizoram­a inthawk Tripura­a Bru raltlan, North Tripura hmuna relief camps 6 haia um mek hai thuoikirna chu November 2, 2016 a inthawk tan dingin hi chungthua indin State Level Core Committee meeting zanita nei huna an sukthluk niin Additional Secretary for Home Lalbiakzama chun a hril. Meeting hi Mizoram Home Secretary Renu Sharma inrawina hnuoia nei a ni a, Kaksau relief camp­a um hai identification thawna November 4, 2016 chen khin zofel beisei a ni a, November 7 in Khakchangpara relief camp le Nobember 9 le 10, 2016 haia identification thaw dinga ti a nih tiin Lalbiakzama chun a hril. November 11­14 inkar sungin Asapara relief camp le Nov. 15­18 sungin Naisingpara relief camp haia identification thaw ninga ta, Nov. 21, 2016 in Hazacherra relief camp­a identification thaw ning a tih tiin a hril bawk.

Kashmir­ah school building 3 raw
Srinagar:  Jammu and Kashmir a chun darkar 24 liemta sung khan hmun hran hranah tu ti hrietlo han School buildings 3 an raw. Hi lei hin educational institutions haia chun venghimna sukkhau a nih. Zani zingkar inhma tak khan Noorbagh hmuna Government school pakhat raw a ni bakah Anantnag district­a Aishmuqam hmuna Govt. Hr. Sec. School building raw a ni a, zani hmasa zan khan Bandipora district­a Sadrukote Bala hmuna Govt. Middle school chu tu ti hrietlo han an raw bawk. Security forces han Hizbul Mujahideen commander Burhan Wani an kap hlum lein J&K a schools hai chu khar nita sienkhawm state sawrkar chun annual board exam thla thara nei dingin a lo puong ta a nih. Hi thil dodalnain hmun tum tuma protest nei a ni bawk.

LeT in anni pawl an ni thu an puong
New Delhi: Pakistan thangsana um terrorist Lashkar­e­Toiba pawl chun, September thlaa Jammu and Kashmir­a Uri sector a Army base camp beitu kha anni pawl a ni thu an puong. Uri Army base bei a ni tum khan India sipai 20 zetin thina an tuok bakah a va beitu hai kha India sipai han an kap hlum vawng a nih.

VAWISUN THUPUI
Krista ruok chun Pathien sunghai chungah Naupaah ring a um a nih. A sunghai chu eini hi ei nih, a tawp chenin ei huoina le, ei beisei suongna hi dettaka ei chel phawt chun.
Hebrai 3:16

Editorial
Mi ta dinga malsawmna

Malsawmna hi thil hlu le ropui tak a ni a, mitinin malsawmna dawng le chang ei nuom seng. Hun khir tak tak tawng mek khawm um ei tih. Khawvel lien lem ei thlir lem chun thangpui ngai, hun khir tak tawng, nitin vawikhat bufak ding khawm nei lo tam tak, ei ni nek neka harsa le beidawng, khawvel khawsakna fak le dawn el chau ni lo, ringna leia suknawmnatna le sukdudana tuor tam tak an um ti ei hang hmu le hriet meu ruok chun ei vangnei zie hi ei hrietsuok nawk hlak.
   
Mitin­sungtinin buoina le harsatna ei nei seng a, tukhawm harsatna nei lo ei um naw a, ei harsatna tuok dan an ang nawh ti chau a nih. Sungkuo inhawi awm taka inlang hai khawm ei hang belchieng chun harsatna, beidawngna an lo nei fir fer hlak. Hieng harsatna le beidawngna tinreng hai lei hin mi ta dinga malsawmna ni thei loa inngaina ei  lo nei a ni thei. Sienkhawm, mi ta dinga malsawmna ni ding hin hausa amani annawleh ‘Super power’ ni kher a lo tul nawh. Iengtham lova ei ngai thil chite khawm kha mi ta dinga malsawmna ropui tak a ni thei ti hi ei hriet tlat a tul.
   
Eini tiengah iemani bek channa a um naw chun mi ta dinga malsawmna ni thei a ni nawh ti hi ei Lalpa Isu Krista chanchina inthawk chieng takin an lang. Isu Krista khan mani inphatin khawvel sandamna ding le mi hai ta dinga malsawmna ni dingin mihriem anga insiemin hnuoiah a hungin thi chenin a lo hung tuor a nih ti ei hmuh. Chu ngirhmun hrechieng lo hai ta ding chun mi ta dinga malsawmna ni hi thil harsa tak a ni ding hrim a lo nih.
   
Mi tam tak chun malsawmna ei dawng hai hmangin iengtin am midang ta dingin malsawmna ni ve thei ka ta? ti ngaituo lovin ei malsawmna dawng hai chu midang  sirdena le hnuoisiena damin ei hmang rawp hlak. Ei harsat beidawng laia lo thangpuituhai kha hrezinga, malsawmna ei dawng haia inthawk midang ta dingin iengtin am malsawmna intluntu ni thei ka ta ti ei insut nawn rawp a tul.
   
A hmaa ei hril ta angin mi ta dinga malsawmna ni ding hin hausa er ur le neinung tak ni a tul kher nawh. Mi pasie tak khawm mi ta dinga malsawmna ei ni thei. Sum le pai le thil pek pekding ei lo neinaw a ni thei. Mitinin thiem le thei zawng (talent) ei nei seng a nih. Pawisa sum tam tak ei neinaw leia malsawmna ni thei loa inngaina ei nei hi an dik nawh. Mi thangpui le sawmdawl hi sum tam tak pek el a ni nawh. Hang en vel la, mi ta dinga thangpuina kut rawl i nuom a, mi ta dinga malsawmna ni tumna tak tak i nei a ni phawt chun i ni thei zing a nih. Hang daksuok la, iemani kawng taka ei thangpui theina um ngei a tih. Pawisa sum kher hi mi ta dinga malsawmna ni theina a ninaw a, lungril taka thatna le inp>kzona le hmangaina hai hi a dawngtu ta ding chun thil ropui tak a lo ni hlak. Entirna dingin, motor tam lai lampui kan ding nghaka um taksa chau tak tak putar/pitar annawleh naupang lam hang kan pui ringawt khawm hi mi ta dinga malsawmna lampui chu a nih.    
   
Hiengang bawk hin mi hai sum le paia ei thangpui theinaw a lo ni khawmin ei kut le ke le ei hrietna le varna hai hmanga midang ta dinga malsawmna ni theina ding tam tak a um, chu lai chun ‘hun’ hi a thangsa. Harsatna, beidawngna le lungzingna nasa tak tuok a, i beisei le phut em em i ruol le pai le hnemtu ding i mamaw ngawi ngawi han i ta dingin minute khat khawm hun an lo pek theinaw che a ni chun iengtin am ngai i ta? 
   
Hun awl ei neinaw hle khawm a ni thei, sienkhawm mi ta dinga malsawmna nina dinga ei hun tawite hang puk zau chu a suolna um dingin an lang nawh. Sap han ‘history repeat itself’ an lo ti a. Thil hi a hung invir a hung invir a, nikhat chu mi chunga tlung ang kha ei chunga a hung tlung nawk hun a um hlak. History hi ama le ama hung inherkir nawk el lem chu a ni naw a, ei thiltuok le lo tawnghriet haia inthawk inchuka varna chang hre lova ei hnawl rawp leiin a hung inherkir nawk el a ni lem hlak. Chu leiin, ei chunga tlung dinga ei dit anga mi chunga khawm thaw ding ei ni a, mi hai ei ta dinga malsawmna anni ei nuom chun chawl lova mi ta dinga malsawmna ni chu ei thaw ding makmaw a nih.
   
Thu dik chu, mitinin ram le hnam le khawvel siemthatna dinga thaw ding hril hril nekin, a thaw a thaw tieng thaw rawn lem inla, ei ram, ei khawtlang le khawvel hi siemthain hmasawn lem ngei a tih. Pathienin kut le ke, hrietna le thaw theina a mi pek hai hi mi sietna ding le thina ding ni loin malsawmna a ni lem theina dingin kal pen seng inla, ei lo thangpui thei naw a, mi ta dinga malsawmna ei lo ni theinaw a ni khawmin an ta dingin harsatna siem tumnaw phawt inla chu khawvel rinum takel hi vanram tlafuol­ah inchangtir ngei ei tih.


Post a Comment

Powered by Blogger.