Police Commemoration Day hmang
CCPur:  October 21, 2016, 8AM khan Mr Rakesh Balwal, IPS, SP, CCPur inrawinain CCPur Police Station­ah Police Commemoration Day hmang a nih. Union Home Ministry hnuoia Sept 1, 2015 a inthawk Aug 31, 2016 inkar sunga security officer le  personnel an duty­na hmuna ram le hnam sanna dinga hringna lo inhlan ta hai inzana Gun Salute pekna an nei bakah  par inhlanna nei a ni bawk. Hi huna hin 1st IRB le Police Station a um BSF Officer hai khawm an hang tawl.
   
Chun, kum danga la thaw ngai lo sawrkar thupek angin Police le Security an duty­naa lo martyrs ta hai lo kaina hlak School hai sir dinga ti a ni a. Hi dungzui hin Mr H. Basulal, SDPO, CCPur inrawinain  OC, second OC le BSF Officers han zanikhan school hours sungin Gandhi Memorial H/S, Leisang H/S le Vimala Raina H/S hai an sir a. Hieng Police le security lo thi ta hai hi ram le hnam sanna ding le mipui  ta dinga hringna inhlan anni dan hai student hai hrilhrietna an nei bakah student hai kuomah sweet an sem.

Singngat hmunah BJP  in One Day Political Awareness-cum-Mass enrolment program hmang
CCPur: BJP Singngat Mandal huoihawtnain zani sun dar 11:30 khan Singngat Bazar hmuna ah “One Day Political Awareness Conference – cum­ Mass Enrollment Programme’ hmang a nih. Hi huna hin Th. Chaoba, Ex­Dy. CM le Convenor Election Management Committee, BJP Manipur; Ashni Kumar, Vice President, Manipur (CCPur in­charge); Yanglet Haokip, BJP National Executive member; Basanta Sharma, Ex BJP Manipur Secretary; Vikramjit, Co­Convenor hai bakah K. Vungzalian, Ex­Minister, President BJP, CCPur District;V. Hangkhanlian, Ex­Minister, Vice President BJP Manipur hai khawm an hang.
   
Th. Chaoba in hi huna thu a hrilnaa chun, Singngat A/C a intending candidate chu Advocate ni bawk mi ha tak a ni thu a hril a. Singngat A/C in contractor MLA an nei chu an vangduoina a ni thu hrilin Manipur­a O.Ibobi sawrkar chu Hitler government le ang khat a nih tiin a hril. Tuivai, Jiribam le a dang dang haia leilak siem hmu ding a um naw a, sienkhawm ama constituency Thoubal a chun leilak ha tak tak 8 daw a ni thu, Manipur CM nit a lovin Thoubal Chief Minister a nita lem. BJP hi Christian le Muslim hai ta dinga halo a nih tiin propaganda tum tum thedar nisien khawm Mary Kom le Karnataka­ah HT Sangliana haia inthawk thudik hmu theiin a um. Congress in sawrkarna an la siem ding hi ni 100 vel chau a um ta a, vote inchawkna dingin sum an sem chun la ro, tiin a hril. 
   
Mr Ashni Kumar chun, Congress in Manipur tlangram a cheng hai chanvo nasa takin a hnuoisie a, kum 40 chuong Congress in sawrkarna an chel sungin tlangram bielah inthlakdanglamna a um am?  Congress in kum 15 sung sawrkarna an chel sungin danglamna a um am? tiin indawnna a siem a. CCPur Hqrts a inthawk Singngat lampui, health facilities, water supply hatnaw dana hin an lang chieng. Congress in tlangmi hai a hmangai naw a, Rs. 500 crore senga bawl Khuga Project a hlawsam a. Congress in mitin control a nuom leiin fake encounter in thawin mi tam takin an thi pha a, hi hi Ibobi direct command naa thaw a nih tiin an tum. Hi lei hin 2017 election­ah politics ah inthlakdanglamna hung um a ta, BJP in sawrkarna an hung siem ding a nih tia hrilin Singngat mipui hai chu BJP candidate vote seng dingin a ngen.
   
V. Hangkhanlian chun, mipui palai dinga ei thlang hai an ni ditdana um ding ni lovin mipui ditdana um le mipui ditdan khekpuitu dinga ei thlang an ni. Bills 3 hai leiin mi 9 an thi a, ei MLA hai mi that pek an nih. A san chu Hills area a tawk chun HAC a refer hmasak ding ti Manipur Legislative Assembly Daan, rules and procedure and conduct of business rule no. 159 & 160 ah an ziek a nih. HAC a refer dinga hril ngam an umnaw leiin hiengang hun hi ei tuok a nih tiin a hril.
   
Yanglet Haokip chun, BJP hi Kristien dodaltu an nih tia Congress in propaganda tam tak an thedar hin tlangmi hai lungril a sukbuoi hle a, sienkhawm kum 20 chuong India state hran hran a BJP meeting ka hang naah Christian le Muslim hai sietna ding awngkam khat khawm hril a ni thu ka la hriet naw a, Kristien insunga mi Mary Kom khawm MP pek a nih tiin a hril.
     
CCPur District President K. Vungzalian chun PM Narendra Modi sawrkar hnuoia scheme tum tum hai  mipui hrilhrietna hi huna  hin a nei bawk.
   
Conference hmang zo hin Th. Chaoba chun Singngat Bazar hmuna BJP Information centre a hawng a, hi zo hin Imphal tieng an kir nawk.

Tribal Hostel Last Inspection an hung nei
CCPUR: Oct. 21, 2016 sun dar 11 AM khan HSA Campus, Rengkai, CCPur hmuna NEC Fund hmanga bawl mek Tribal Hostel (for Boys & Girls) chu NEC hung tir Independent Inspection Team chun Last Inspection an hung nei. Hi huna hin hi Hostel bawl dan chu ha tawk le lungawium tawk an ti hle. Hi Tribal Hostel Construction Committee a hin Chairman chu Deputy Commissioner, CCPur District a ni a, Secretary chu Dr. John H. Pulamte a nih.
   
Hi Hostel Construction Committee in ei indawnna an dawnna a chun Feb. 2017 a hawng hman tum a ni thu, 90% sin zo a ni tah thu, a hmang angkaitu ding tak inchûklaihaiin an hmang thei hun char a hawng ning a tih tiin an hril bakah hi Tribal Hostel hi zo a ni pha chun inchûklai a tlawm tawp ah 120 velin an sawr thei ding a nih tiin an hril bawk.
­LRS Puruolte

Dy. CO a inthawk 2­IC in an kaisang
CCPur: CRPF Officer pathum­Pu Michael Vanlalruot s/o Upa Thanzam Amo of Imphal, Manipur;  Pu Rothanglur L. Fimate, s/o Hminglien Fimate, Peacelane, CCPur, Manipur le Pu Ramvarlien Phillip @ Phillip Khawbung, s/o Tlangdanglien Khawbung of Sielmat, CCPur Manipur hai chu Deputy Commandant rank a inthawk Second­in­Command (2­IC) in an kaisang. An kaisangna hi ei chanchinbu chun a lawmpui hle.  (Sinlengnews)

DAO inrawinain an va enfel nawk
CCPur: Churachandpur ­a Saikot Lourup le Khawpuibung Lourup biel huop sunga Buhrik ‘Brown Planthopper’ in bukung a suksietna hmun hai chu Mr Radhacharan, DAO/Ch, Pu Lalhmuok Famhoite, EO (Agri) le officials dang dang han zanikhan a hmuna an va enfel nawk a. Brown Planthopper in bukung a suksietna hi Lo hectares 30 vela lien hisap a nih tiin Pu Lalhmuok Famhoite a inthawk ei thu dawngna chun a hril.

RPC­NEI K|P Phairam District khawmpui
CCPur: Reformed Presbyterian Church, (RPC­NEI) Kristien |halai Pawl, Phairam district 31st Annual Conference chu Oct. 21­23, 2016 inkar sungin “Vanglaini Krista ta di’n” ti thupui hmangin Muolvaiphei, CCPur hmunah um a tih. Conference sunga thuhriltu ding hai chu Mark T. Bube, General Secretary, Orthodox Presbyterian Church, USA;  Rev. Jacob L. Hmar, Youth Coordinator; Rev. Dr L. Anthony Curto, Chairman, Orthodox Presbyterian Church,USA le Rev. Lalkhumvel Joute, Dist. Supdt. Phairam district hai ning an tih. Conference hi zani zan 5:30 khan  Rev. Jacob L. Hmar, Out­Going Conference  Chairman in a hawng a,  Rev. Lalnghatlien Songate, Langol in Pathien thucha a hril.

NFSA list a hang lo Villages han peklut thei
CCPur:  Food Security Act (NFSA) a la hang lo villages hai chun  October 24, 2016, 12:00 chenin District Supply Officer (DSO) Office, CCPur­ah peklut thei ning a tih tiin M. Ginzasuan, DSO, CCPur chun zanikhan inhriettirna a siem.
           
Chun, Rationing Agents han Nov. 2016 a inthawk Release Order (R.O) pein Bufai lak thei a ni ta bawk a tih.Nov. 2, 2016 in Parbung A/C; Nov. 3&4, 2016 in Henglep A/C; Oct. 5, 7 le 8, 2016 haiah Churachanpdur A/C; Oct. 9, 10 le 11, 2016 haiah Saikawt A/C;  Nov. 12 le 14, 2016 haiah Singngat A/C le Nov. 15, 2016 in Thanlon A/C haia Rationing Agents han bufai hi lak thei ning a tih tiin District Supply Officer, CCPur in zanita inhriettirna a siema chun a hril.

HYA Saikot Branch han social work an nei
CCPur: October 21, 2016 zingkar khan HYA Saikot Branch indin champha a vawi 31­na le inzawmin HYA Saikot Branch sunga section 6 um hai chun an area chitah social work neiin an biel sung sukfaina sin an thaw a, Branch Committee ruok chun Sugnu Road Saikot fethlenga motor tlan hai badge belin an hnatlang. Hi thil thaw na dinga permit petu Pu Lunminthang Haokip, IAS, DC, CCPur le Saikot Village Authority chunga le motor neitu phal taka an motor haia badge bela hangpuia petu hai chunga HYA Saikot Branch chun lawmthu a hril. Chun hnatlanga hang member hai kuomah khawm HYA Saikot Branch huoituhai chun lawmthu an hril bawk. 

Asst. Professor sin hmu thar
CCPur: Tv. Jehova Jire L. Hmar s/o Mr Ginkhothang @ Evan Upa G.K. Thanga |hiek le Mrs Lalremsang @ Remsang of Rengkai, CCPur chun Central University of Jammu­a Dept. of ‘Physics and Astronomical Science’ –ah Assistant Professor sin a hmu thar. Tv. Jehova hi   National Institute of Technology (NIT), Agartala,Tripura hmuna Ph.D zo a ni a, a thesis chu “Growth and characteristics of Semiconductor­Polymer Nanocomposites for Flexible Electronic and Optoelectronic Devices” ti a nih.  A sin hmu thar zawm dingin Oct. 22, 2016 hin Jammu pan a tih. A sin hmu thar hi  ei chanchinbu chun a lawmpui hle.

CM Ukhrul­ah inzin tho a tum
Imphal: Tangkhul Naga Long (TNL) in Manipur CM, O.Ibobi Singh Ukhrul­a an zin tum chu nasa taka dang tum hai sienkhawm October 24, 2016 khin CM chun Helicopter hmangin inzin tho to a tum niin ei thu dawngna chun a hril. CM O.Ibobi Singh hi Kangla Helipad, Imphal­a inthawk Ukhrul pan a ta, Pakshi Ground, Ukhrul­ah um a ta, District Hospital Ukhrul, SDO/BDO Office, Hundung, 132/33 KV Sub­Station le 33/11 KV Sub­Station hai hawnga ta, hi zo hin Ukhrul suoksanin Imphal a hung pan nawk ding ti a nih.

Additional CEO thar ding ruot
Imphal: Modak Hrisheekesh Arvind, IAS, Joint Secretary (Financial), Govt. of Manipur sin chel laizing chu Additional Chief Electoral Officer (CEO), Manipur thar dinga ruot a nih. Additional CEO sin chel lai Nidhi Mani Tripathi chu Ministry of Textiles, Govt. of India, New Delhi­a PS sin chel dinga transfer a ni leia CEO, Manipur thar ding hi ruot a nih.

MU VC i/c dingin Prof. Aman Yumnam
Imphal: Manipur University Vice Chancellor in­charge Prof. Th. Jekendra Singh chu a sina inthawk an ban leiin Prof. Aman Yumnam chu Manipur University Vice Chancellor in­charge dinga ruot a nih. Manipur University buoi hnunga Manipur University Vice Chancellor in­charge inban hi mi pahni an ni tah. Prof. Th. Jekendra Singh Singh hma hin Prof. M. Dhaneshwar chu Vice Chancellor in­charge a inthawk a lo inban ta a nih. Reservation policy le inzawma student­hai  nuorna khawm chawl lovin a la fe pei a, tuhin MU main  Gate bulah students 6 in bungheia nuorna an nei.\

Union minister 2 an hung ding
Imphal: October 23­30, 2016 inkar sunga THAU Ground,  Thangmeiband, Imphal West hmuna first State level festival of Indigenous Games of Manipur ‘ Rnangan”  hmangna hung uop ve dingin Union Minister of state for Youth Affairs and sports Vijay Goel le  minister for Culture and Tourism Dr Mahesh Sharma chu hai chu October 28 le 30, 2016 hai khin Manipur­ah an hung inzin ding niin ei thu dawngna chun a hril.

CBSE in Class X Board Exam
New Delhi:  Central Board of Secondary Education (CBSE) chun, students han exam leia pressure an nei nasat sukzieumna dinga kum 6 vel zet a lo suktawp tah Class X Board Examination thaw thar (reintroduced) nawk a tum. Class X board exam suktawpa um hin student hai academic standard nasa taka sukbuoi nia hril leia thaw thar nawk tum nia hril a nih. Hi thua thutlukna (final decision) chu October 25, 2016 nia Union HRD minister Prakash Javadekar inrawinaa  Central Advisory Board of Education (CABE) huna siem ni dingin ei thu dawngna chun a hril. Central Board of Secondary Education (CBSE) Class X examination hi kum 2010 a inthawka suktawp le tuta hmang mek Continuous and Comprehensive Evaluation (CCE) hin a hung thlakthleng a nih.

NHRC in cases nuoikhat chuong a sukfel
New Delhi:  National Human Rights Commission (NHRC) Chairperson Justice H.L. Dattu chun, kum khat liemta sung khan NHRC chun cases tum tum 1.11 lakh vel  a sukfel tiin zanita New Delhi hmuna NHRC Foundation Day hmangnaa thu a hrilna huna a hril.  Mitinin thuneina lien lem an dit a, NHRC khawmin chu chu a dit ve. Tuhin NHRC chu Sakei ha nei lo ang a nih tia hrilin sin ha lema a thaw theina dingin power lien lem a mamaw thu a hril. 

Police Commemoration Day hmang
New Delhi: India ram pumpuiah zanikhan Police Commemoration Day hmang a nih. New Delhi­a chun ram sanhimna dinga hringna lo chan ta (martyrs) hai inzanain Home Minister le milien milal han Police Memorial Ground, Chanakyapuri, Delhi hmunah par inhlanna an nei tawl. October 21, 1959 khan China Army han India Police personnel hai Grenade an dengkhum bakah silaia an kaphrut leiin Police 10 in thina an tuok a, Police 7 hai chu China sipai han an hrentang a, a dang po chu himin an suokdawk a nih.
      
January 1960 khan India rama states le Union Territories tin haia Inspector General of Police han Annual Conference an nei a, chu huna October 21 chu kum tin India rama Police station tina Commemoration Day­a hmang dinga an lo rel ta anga Police Commemoration Day hi hmang pei hung ni ta a nih. Kum 1961 a inthawk khan India ram sanna dingin Police Personnel 33,000 zetin an hringna an lo inhlan ta a nih.

VAWISUN THUPUI
Eini chu van khuoletuihai ei ni sih a. Sandamtu Lal Isu Krista hung ding chu ei nghak zing a nih.    ­ Philippi 3:20

Editorial
Huou huou

Ei thaw nek nek a, ei hriet naw karin bar thla hnina ei lo chuongkai nawk der el tah. Sik le sa a hung inthlak danglam pei a, boruok khawm an hawiin a thienghlim an a, a lum taluo naw a, a la dei taluo naw bawk leiin ei rama ding chun boruok inhawi lai tak a ni ngei ring a um. Bar thla a hungtlung hin chu huou huou programme hi a hung indawt zut el ta ding a nih. Huou huou hi an hawi a, mihriemhai hin ei hlimpui a, inhawi ei ti bawk leiin huou huou programme bo chun ei um thei naw a ni deu tak. Huou huou programme a hangsa naw chun kohrana halaihai khawm kohran inkhawmpui le biekin inkhawm haia khawm an tha a tho ha thei tak tak ngai nawh.
   
Zohnathlak han kum tina ei hmang hlak Kut hun khawm a hungtlung ep a. Kut huoihawttu ding hai khawm an insingsa nasa ta hle. Kut khawm hi huou huou programme pakhat a ni a. Ei hnam thil le inzawma nei a ni leiin Kut hmang hi dem le sawisel el chi chu ninaw nih. Kut hmang hi a hat nawna a um naw a. Amiruokchu, a hmangtuhai izirin a hain a ha naw thei ti ruok chu thudik a nih. Chuleiin, Kut hmangtu dinghai po poin Kut hi a ha nawzawng ni lova a ha zawnga hmang dingin ei infielin ei inngen a nih.
   
Kohran pawl tum tum hai khawmin kum a hung tawp ta ding a ni leiin, kum tawp inkhawmpui nei dingin programme an siem tawl a, a hmang an ta le a hmang ding khawm an la hung um pei ding a nih. Kohran inkhawmpui ei ti khawm hi huou huou programme pakhat tho a nih. Hmang suol a, hmang hat thei ve tho a nih. Huou huou hi suol a ninaw a, a hmang suol hai chun an hmang suol ra an sik el ding a nih. Mihriem, khawvela cheng ei la ni leiin huou huou programme hi a hangsa naw chun hlimna le lawmna a kim thei naw a. Hi lei hin huou huou programme a ding hin thu le hlaa inruolsiekna ei nei hlak a, a ha ning a tih, tu Kohran khawma ei la bansan thei nawh. Inruolsiek dan khawm a changkang deu deu a, lawmman khawm a ha deu deu a, insukphurna le intuoitharna ha tak a nih.
   
Huou huou hi a ha hle ning a tih. Khawvel mihriemhai hin ei uor em em el a nih. TV hang en inla, insukhlimna le huou huou thil hi a tam hle a, tulaia hangthar, a bik takin tleirawl le halaihai mit latu tak le an tlaipui tak a nih. Lam thiem le hlasak thiem hai chu halaihai ngainat le ngaisang zawng tak a nih. Ei ni lai chau a ninaw a, ei ni neka ram hausa, hnam changkang le hnam var lem han huou huou thil tiengpang hi an uor lem. Suol le thil ha naw nisienla chu an bansan ngei ring a um. Hausak le changkang dan izir ang peiin huou huou programme hi a la hung tam zuol pei ding a nih. Hmang thiem le a dawng thiem tum el ding a ni awm.
           

Tulai chena Kristien han Christmas le Kum Thar ei hmangna haia khawm hin huou huou tiengpang kawk programme hi ei la bansan thei nawh. Ruoihe le hlasak lengkhawm tihai khawm hi huou huou le inzawmna nei vawng annih. Huou huou leh inzawmna a nei nawh ei ti chun hel hril ning ei tih. Faktlang, thawtlang le saktlang ti hai khawm hi huou huou a ni vawng a nih. Zu le inruithei dang dang hai khawm a hmangna ding indik taka hmang chun damdawi a ni hlak. Huou huou khawm ei hmang suol naw phawt chun hlimna, lawmna, inlaichinna le inunauna ha lem siemtu a nih. Hi lei hin huou huou hi bansan le hnawl el ding chi a ni nawh.


Post a Comment

Powered by Blogger.